അന്നമനട: വയോജന സൗഹൃദ ഗ്രാമപഞ്ചായത്തായ അന്നമനടയിൽ 18 വാർഡുകളിലെ മുതിർന്നവരെ ഉൾപ്പെടുത്തി വയോജന സംഗമവും വാർഷികാഘോഷവും സംഘടിപ്പിച്ചു. സംഗമം ജില്ലാ പഞ്ചായത്ത് പ്രസിഡന്റ് പി.കെ. ഡേവീസ് ഉദ്ഘാടനം ചെയ്തു.
ഗ്രാമപഞ്ചായത്ത് പ്രസിഡന്റ് പി.വി. വിനോദ് അധ്യക്ഷനായി. ബ്ലോക്ക് പഞ്ചായത്ത് പ്രസിഡന്റ് സന്ധ്യ നൈസണ് മുഖ്യാതിഥിയായി. ചടങ്ങിനോടനുബന്ധിച്ച് അങ്കമാലി ലിറ്റിൽ ഫ്ലവർ ആശുപത്രിയുടെ സഹകരണത്തോടെ നടപ്പിലാക്കുന്ന തിമിര രഹിത പഞ്ചായത്ത് പദ്ധതി പ്രഖ്യാപനവും നേത്ര രോഗ നിർണയ ക്യാന്പും നടന്നു. വയോജന കൂട്ടായ്മകൾ, വാർഡുതല ജാഗ്രതാ സമിതികൾ, പകൽ വീടുകൾ, മ്യൂസിക് ക്ലബുകൾ, വോളി ക്ലബ്, നാടക ക്ലബ്, ആകാശ യാത്ര, പൊതിച്ചോറ് വിതരണം, ഓപ്പണ് ജിം അടക്കം വയോജനങ്ങളും ക്ഷേമവും സന്തോഷവും ആരോഗ്യവും ലക്ഷ്യമിട്ട് ഒട്ടേറെ മാതൃകാ പ്രവർത്തനങ്ങൾ നടപ്പിലാക്കുന്ന ഗ്രാമ പഞ്ചായത്തുകളിലൊന്നാണ് അന്നമനട.
ചടങ്ങിൽ അന്നമനട എൽ.എഫ് ആശുപത്രി അസിസ്റ്റന്റ് ഡയറക്ടർ ഫാ. വർഗീസ് പാലാട്ടി, പഞ്ചായത്ത് വൈസ് പ്രസിഡന്റ് ടെസി ടൈറ്റസ്, ജനപ്രതിനിധികളായ ടി.കെ. സതീശൻ, സിന്ധു ജയൻ, കെ.എ. ബൈജു, ടി.വി. സുരേഷ് കുമാർ, മോളി വർഗീസ്, മഞ്ജു സതീശൻ, ഷീജ നസീർ, ഡേവിസ് കുര്യൻ, സവിത എന്നിവർ പ്രസംഗിച്ചു.