ചേർപ്പ്: ഊരകം അമ്മത്തിരുവടി ക്ഷേത്രത്തിൽ ദേവമേളയോടു പ്രാരംഭം കുറിച്ചുകൊണ്ട് ബ്രഹ്മകലശാഭിഷേകം, ശ്രീഭൂതബലി, രോഹിണിവിളക്ക് എന്നിവ 27നു നടക്കും. ദീപാരാധനക്കുശേഷം തുടങ്ങിയ ശുദ്ധികലശകർമങ്ങൾ പ്രാസാദ ശുദ്ധി, അസ്ത്രകലശം, രക്ഷോഘ്ന ഹോമം, വാസ്തുഹോമം, വാസ്തുകലശം, വാസ്തുബലി, ചതുശുദ്ധി ധാര, കുണ്ഡശുദ്ധി, പ്രായശ്ചിത്തം ഹോമം, എന്നിവയുണ്ടായിരുന്നു.
27നു രാവിലെ അധിവാസം വിടർത്തി പൂജ, പരികലശ പൂജ,108 പരികലശം, സ്വർണക്കുടത്തിൽ ബ്രഹ്മകലശാഭിഷേകം രാവിലെ 9.30നു നടക്കും. പെരുവനം ആറാട്ടുപുഴ പൂരങ്ങളിൽ പങ്കെടുക്കുന്ന ക്ഷേത്രങ്ങളിൽ ശുദ്ധികലശത്തോടെ പ്രാരംഭം കുറിക്കുന്ന, ബ്രഹ്മകലശം ആടുന്ന ഏകക്ഷേത്രമാണ് ഊരകം അമ്മത്തിരുവടി ക്ഷേത്രം.സന്ധ്യക്കു വിശേഷാൽ നിറമാല രാത്രി അത്താഴശീവേലിയോട് അനുബന്ധിച്ച് ശ്രീഭൂതബലി നടക്കും.
വർഷത്തിൽ ഒരിക്കൽ മാത്രമാണ് ഊരകം അമ്മത്തിരുവടി ക്ഷേത്രത്തിൽ ശ്രീഭൂതബലി നടക്കുക. ശ്രീഭൂതബലിക്കു ശേഷം രോഹിണി വിളക്കിന് ദേവിയെ അഞ്ചു ഗജവീരന്മാരുടെ അകമ്പടിയോടെ കൂട്ടിയെഴുന്നള്ളിക്കും. ചെറുശേരി പണ്ടാരത്തിൽ കുട്ടൻ മാരാരുടെ നേതൃത്വത്തിൽ മേളവും തുടർന്ന് ചോറ്റാനിക്കര വിജയൻ മാരാരുടെ നേതൃത്വത്തിൽ പഞ്ചവാദ്യവും ഉണ്ടാകും.