ചാലക്കുടി: സെന്റ് മേരീസ് ഫൊറോന ദേവാലയത്തിൽ വിശുദ്ധ സെബസ്ത്യാനോസിന്റെ തിരുനാൾ 3, 4, 5, 6, തീയതികളിലായി ആഘോഷിക്കും. ഇന്നു വൈകീട്ട് 4.45 ന് ഫാ. ജോസ് പാലാട്ടി തിരുനാളിനു കൊടി ഉയർത്തും. തുടർന്ന് ലദീഞ്ഞ്, നോവേന, വിശുദ്ധ കുർബാന, ദീപക്കാ ഴ്ച. നാളെ നടക്കുന്ന സമർപ്പിത സംഗമത്തിൽ ഇടവക അതിർത്തിയിലെ മുഴുവൻ വൈദികരും കന്യാസ്ത്രികളും ഇടവക അംഗങ്ങളായ സന്യസ്തരും സംഗമത്തിൽ പങ്കെടുക്കും.
വെള്ളിയാഴ്ച വൈകീട്ട് അഞ്ചിന് ദിവ്യബലിക്കുശേഷം തിരുസ്വരൂപം എഴുന്നള്ളിച്ചുവെക്കൽ. ഏഴിന് ദീപാലങ്കാരം സ്വിച്ച് ഓണ്. പള്ളി പാർക്കിംഗ് ഗ്രൗണ്ടിൽ തൃശൂർ കലാസദൻ ഗാനമേള. ശനിയാഴ്ച രാവിലെ 7.15 ന് ദിവ്യബലി. വിവിധ യൂണിറ്റുകളിലേക്കും സമുദായങ്ങളിലേക്കും അന്പെഴുന്നള്ളിപ്പ്. രാത്രി 10 ന് അന്പെഴുന്നള്ളിപ്പുകൾ പള്ളിയിൽ സമാപിക്കും.
ഞായറാഴ്ച രാവിലെ 10 ന് ആഘോഷമായ തിരുനാൾ പാട്ടുകുർബാനയ്ക്ക് ഫാ. ഷാജി തുന്പെച്ചിറയിൽ മുഖ്യ കാർമികത്വം വഹിക്കും. റവ. ഡോ. ജോയി നെല്ലിശേരി സന്ദേശം നല്കും. ഉച്ചകഴിഞ്ഞ് മൂന്നിന് വിശുദ്ധ കുർബാന. നാലിന് തിരുനാൾ പ്രദിക്ഷണം ആരംഭിക്കും. നാല് അങ്ങാടികളും ചുറ്റിയുള്ള പ്രദക്ഷിണം ഏഴിന് പള്ളിയിൽ സമാപിക്കും. തുടർന്ന് ദിവ്യബലിക്ക് ഇടവകയിലെ വൈദികർ കാർമികത്വം വഹിക്കും. തുടർന്ന് വർണ മഴ.
തിങ്കളാഴ്ച രാവിലെ വിവിധ യൂണിറ്റുകളിലേക്ക് അന്പെഴുന്നെള്ളിപ്പ്. രാത്രി അന്പെഴുന്നെളിപ്പുകൾ പള്ളിയിൽ സമാപിക്കും. അന്നുതന്നെയാണ് ടൗണ് അന്പ് . രാത്രി എട്ടിന് വെള്ളിക്കുളം ജംഗ്ഷനിൽ നിന്നും ആരംഭിക്കുന്ന ടൗണ് അന്പ് പ്രദക്ഷിണം രാത്രി പള്ളിയിൽ പ്രവേശിക്കും. തുടർന്ന് വർണ മഴ.
തിരുനാളിന്റെ ഭാഗമായി ജീവകാരുണ്യ പ്രവർത്തനവും നടത്തുന്നുണ്ട്. ഭവനരഹിതരായ മൂന്നു കുടുബങ്ങൾക്കു "കൂടൊരുക്കാൻ കൂടെയുണ്ട്' എന്ന പദ്ധതി വഴി മൂന്ന് ഭവനങ്ങൾ നിർമിച്ചു നൽകുമെന്ന് വികാരി ഫാ. ജോളി വടക്കൻ പത്രസമ്മേളനത്തിൽ അറിയിച്ചു. ഇതിന്റെ അപേക്ഷകൾ സ്വീകരിച്ചു കഴിഞ്ഞു. അടുത്ത വർഷം തിരുനാൾ കൊടികയറ്റത്തിനു മുൻപായി മൂന്നു വീടുകളുടെ താക്കോൽ ദാനം നടത്തുമെന്നും അദ്ദേഹം അറിയിച്ചു.
തിരുനാളിനോടനുബന്ധിച്ച് വിവിധ സംഘടനകളുടെ നേതൃത്വത്തിൽ എക്സിബിഷനുകളും ദീപാലങ്കാര പന്തലുകളും ഒരുക്കിയിട്ടുണ്ട്. അസി. വികാരി ഫാ. ലിജൊ മണിമലക്കുന്നേൽ, കൈക്കാരന്മാരായ അബ്രാഹം മേനാച്ചേരി, വർഗീസ് തേനംകുടത്ത്, പോൾ ഈയ്യന്നൻ, ബാ ബു എടാട്ടുകുറ്റിയിൽ, ജനറൽ കണ്വീനർ തങ്കച്ചൻ കട്ടക്കയം, ജോയിന്റ് കണ്വീനർ ജോഷി മാളിയേക്കൽ, സെക്രട്ടറി അഡ്വ. സുനിൽ ജോസ്, വിവിധ കണ്വീനർമാരായ ഡെന്നി മൂത്തേടൻ, ജോഷി കൊള്ളന്നൂർ, ഷൈജി ഷിബു, ജോജോ കൊള്ളന്നൂർ, ജോസഫ് തീതായി തുടങ്ങിയവർ പത്രസമ്മേളനത്തിൽ പങ്കെടുത്തു.