ഇരിങ്ങാലക്കുട: കഥകളി ക്ലബ് 48-ാം വാർഷികാഘോഷവും അനിയേട്ടന്റെ സപ്തതിയും 28, 29 തീയതികളിൽ ഇരിങ്ങാലക്കുട ക്രൈസ്റ്റ് കോളജ് ഓഡിറ്റോറിയത്തിൽ നടക്കും. 29ന് നടക്കുന്ന വാർഷികാഘോഷ ചടങ്ങിൽ കോട്ടയ്ക്കൽ ഗോപി നായർ, ചേർത്തല തങ്കപ്പപ്പണിക്കർ, മാങ്ങോട് അപ്പുണ്ണിത്തരകൻ എന്നിവരെ നവതി പ്രണാമം ചെയ്ത് ആദരിക്കും.
കലാമണ്ഡലം എംപിഎസ് നന്പൂതിരി, കോട്ടക്കൽ നാരായണൻ എന്നിവർക്ക് കഥകളി പുരസ്കാരവും കെ.വി. വിസ്മയക്ക് കഥകളി എൻഡോവ്മെന്റും സമ്മാനിക്കും. കേന്ദ്ര സംഗീത നാടക അക്കാദമി പുരസ്കാരങ്ങൾ ലഭിച്ച ഡോ. സദനം കൃഷ്ണൻകുട്ടി, കോട്ടക്കൽ നന്ദകുമാരൻനായർ, പെരുവനം കുട്ടൻമാരാർ, നിർമല പണിക്കർ, ശ്രീലക്ഷി ഗോവർധൻ, അനുപമ മേനോൻ, സദനം ജ്യോതിഷ് ബാബു, കലാമണ്ഡലം ആദിത്യൻ എന്നിവരെ അനുമോദിക്കുന്ന വേദിയിൽ കഥകളി ക്ലബിന്റെ മുൻ ഭരണസമിതിയംഗങ്ങൾക്ക് അശീതിയാദരണവും നടത്തും.
നടന കൈരളി ചെയർമാൻ വേണുജിയുടെ സാന്നിധ്യത്തിൽ നഗരസഭ ചെയർപേഴ്സണ് സോണിയ ഗിരി തിരിതെളിയിച്ച് വാർഷികാഘോഷത്തിന് തുടക്കം കുറിക്കും. അഞ്ച് പതിറ്റാണ്ടോളമായി കേരളത്തിലെ കലാസാംസ്കാരിക സംഘാടകരംഗത്ത് വേറിട്ട ചുവടുവയ്പ്പുകളോടെ തനതായ വ്യക്തിമുദ്ര പതിപ്പിച്ച, പ്രായഭേദമന്യേ അനിയേട്ടൻ എന്നു സർവരാലും വിളിക്കപ്പെടുന്ന അനിയൻ മംഗലശേരിയുടെ സപ്തതി ആഘോഷം 28ന് ആഘോഷിക്കുന്നു. പദ്മശ്രീ ഡോ. കലാമണ്ഡലം ഗോപി ഉദ്ഘാടനം നിർവഹിക്കും. കേരള കലാ മണ്ഡലം വൈസ് ചാൻസലർ ഡോ. എം.വി. നാരായണൻ, കോളജ് പ്രിൻസിപ്പൽ ഡോ. ജോളി ആൻഡ്രൂസ് എന്നിവർ സന്നിഹിതരായിരിക്കും. വൈകീട്ട് നാലിന് നടക്കുന്ന ആദര സമ്മേളനം ഉന്നതവിദ്യാഭ്യാസ മന്ത്രി ഡോ. ആർ. ബിന്ദു ഉദ്ഘാടനം ചെയ്യും. കേരള സംഗീത നാടക അക്കാദമി ചെയർമാൻ മട്ടന്നൂർ ശങ്കരൻകുട്ടി മാരാർ അധ്യക്ഷത വഹിക്കും.
കോളജ് പ്രിൻസിപ്പൽ ഡോ. ജോളി ആൻഡ്രൂസ്, സംഘാടകസമിതി കണ്വീനർ രമേശൻ നന്പീശൻ എന്നിവർ പത്രസമ്മേളനത്തിൽ അറിയിച്ചു. കഥകളി ക്ലബ് വൈസ് പ്രസിഡന്റ് എ.എസ്. സതീശൻ, ട്രഷറർ എൻ. ശ്രീരാമൻ, ഡോ. ബി.പി. അരവിന്ദ്, പ്രദീപ് നന്പീശൻ, പ്രഫ. മൂവീഷ് മുരളി എന്നിവരും പത്രസമ്മേളനത്തിൽ പങ്കെടുത്തു.