ഇരിങ്ങാലക്കുട: മുൻ മന്ത്രിയും കേരള കോണ്ഗ്രസ് നേതാവുമായിരുന്ന സി.എഫ്. തോമസ് ഏവർക്കും മാതൃകയായിരുന്ന പൊതുപ്രവർത്തകനായിരുന്നുവെന്ന് കേരള കോണ്ഗ്രസ് ഡെപ്യൂട്ടി ചെയർമാൻ തോമസ് ഉണ്ണിയാടൻ. സി.എഫ്. തോമസിന്റെ രണ്ടാം ചരമവാർഷികത്തോടനുബന്ധിച്ചു നടന്ന അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
ദീർഘനാൾ ചങ്ങനാശേരി എംഎൽഎ ആയിരുന്ന സി.എഫ്. കേരള കോണ്ഗ്രസിന്റെ ഉന്നത പദവികൾ വഹിച്ചതോടൊപ്പം മന്ത്രിയായിരുന്ന കാലഘട്ടത്തിൽ കേരളത്തിന്റെ വികസനത്തിൽ തന്റേതായ സംഭാവനകളും നൽകിയിട്ടുണ്ടെന്നും ഉണ്ണിയാടൻ പറഞ്ഞു. നിയോജക മണ്ഡലം ചെയർമാൻ റോക്കി ആളൂക്കാരൻ അധ്യക്ഷത വഹിച്ചു.
സംസ്ഥാന വൈസ് ചെയർമാൻ എം.പി. പോളി, സംസ്ഥാന ജനറൽ സെക്രട്ടറി മിനി മോഹൻദാസ്, കൗണ്സിലർ ഫെനി എബിൻ വെള്ളാനിക്കാരൻ, ഭാരവാഹികളായ ജോയി എടാട്ടുകാരൻ, ഡേവിസ് പാറേക്കാട്ട്, സണ്ണി പാവറട്ടി, നിയോജകമണ്ഡലം പ്രസിഡന്റുമാരായ പീറ്റർ പാറേക്കാട്ട്, ജോണ് മുണ്ടന്മാണി, സജി റാഫേൽ, ജില്ലാ ഭാരവാഹികളായ പി.ടി. ജോർജ്, സിജോയ് തോമസ്, എം.കെ. സേതുമാധവൻ, ഷൈനി ജോജോ, മാഗി വിൻസെന്റ്, തുഷാര ഷിജിൻ, അജിത സദാനന്ദൻ എന്നിവർ പ്രസംഗിച്ചു.