ട്രിപ്പിളില്‍ കന്നി സ്വര്‍ണ നേട്ടവുമായി സജല്‍ഖാനും ബിനോയിയും
1478153
Monday, November 11, 2024 4:10 AM IST
കൊച്ചി: ലോംഗ്ജംപില്‍ കൈവിട്ടുപോയ സ്വര്‍ണം ട്രിപ്പില്‍ ജംപില്‍ നേടിയെടുത്ത് എറണാകുളം കീരമ്പാറ സെന്‍റ് സ്റ്റീഫന്‍സ് എച്ച്എസ്എസിലെ പ്ലസ്ടു വിദ്യാര്‍ഥി എസ്. സജല്‍ഖാന്‍. 14.82 മീറ്ററാണ് യോഗ്യതാ റൗണ്ടിലെ സജല്‍ഖാന്‍റെ നേട്ടം. ഫൈനല്‍ റൗണ്ടിലെ അവസാന ജംപില്‍ 14.68 മീറ്റര്‍ ദുരമേ ചാടാനായുള്ളൂവെങ്കിലും സ്വര്‍ണമണിയാന്‍ അത് ധാരാളമായിരുന്നു. സംസ്ഥാന സ്‌കൂള്‍ മീറ്റിലെ സജല്‍ഖാന്‍റെ ആദ്യ സ്വര്‍ണ നേട്ടമാണിത്.
കഴിഞ്ഞ സംസ്ഥാന സ്‌കൂള്‍ മീറ്റില്‍ ട്രിപ്പിള്‍ ജംപില്‍ മൂന്നാം സ്ഥാനമാണ് ലഭിച്ചത്. കോച്ച് എം.എ. ജോര്‍ജിന്‍റെ ശിക്ഷണത്തിലാണ് പരിശീലനം. കൊല്ലം നിരമേല്‍ സജനാ മന്‍സിലില്‍ ഷാജഹാന്‍, സുചിന ദമ്പതികളുടെ മകനാണ്. ഈ ഇനത്തില്‍ മലപ്പുറം ഐഡിയല്‍ ഇഎംഎച്ച്എസ്എസിലെ അമൃതേഷ് മുരളി (14.48) വെള്ളിയും തൃശുര്‍ വല്ലച്ചിറ സെന്‍റ് തോമസ് എച്ച്എസിലെ പി.എസ്. കര്‍ണന്‍ (14.16) വെങ്കലവും നേടി.
ജൂണിയര്‍ വിഭാഗം ട്രിപ്പിൾജംപില്‍ കന്നി സ്വര്‍ണനേട്ടവുമായി പാലക്കാട് മുണ്ടൂര്‍ എച്ച്എസിലെ ആര്‍. ബിനോയ് ട്രാക്ക് വാണു. 13.64 മീറ്റര്‍ ചാടിയാണ് ബിനോയ് സ്വര്‍ണമണിഞ്ഞത്. കഴിഞ്ഞ സംസ്ഥാന സ്‌കൂള്‍മീറ്റില്‍ മത്സരിച്ചിരുന്നെങ്കിലും മെഡലൊന്നും ലഭിച്ചിരുന്നില്ല. ഈ വിഭാഗത്തില്‍ കോട്ടയം കുറുമ്പനാടം സെന്‍റ് പീറ്റേഴ്‌സ് എച്ച്എസിലെ മിലന്‍ ബെന്നി (13.56) വെള്ളിയും തൃശൂര്‍ പാവറട്ടി സെന്‍റ് ജോസഫ് എച്ച്എസ്എസിലെ പി.എന്‍. നസീന്‍ (13.36) വെങ്കലവും നേടി.