ശനിയാഴ്ച പ്രവൃത്തിദിനം: കൂട്ട അവധിയെടുത്ത് അധ്യാപകരുടെ പ്രതിഷേധം
1429635
Sunday, June 16, 2024 5:17 AM IST
കൊച്ചി: വിദ്യാഭ്യാസ അവകാശ നിയമം അട്ടിമറിച്ച് ഏകപക്ഷീയമായി അധ്യയന ദിനങ്ങൾ വർധിപ്പിച്ച സർക്കാർ തീരുമാനത്തിൽ പ്രതിഷേധിച്ച് കേരള പ്രദേശ് സ്കൂൾ ടീച്ചേഴ്സ് അസോസിയേഷ(കെപിഎസ്ടിഎ)ന്റെ നേതൃത്വത്തിൽ അധ്യാപകർ കൂട്ട അവധിയെടുത്ത് പ്രതിഷേധിച്ചു. ആർഡിഡി ഓഫീസിൽ നിന്ന് ജില്ലാ വിദ്യാഭ്യാസ ഓഫീസിലേക്ക് അധ്യാപകർ മാർച്ചും ധർണയും നടത്തി.
ജില്ലാ പ്രസിഡന്റ് രഞ്ജിത്ത് മാത്യു അധ്യക്ഷത വഹിച്ചു. സംസ്ഥാന വൈസ് പ്രസിഡന്റ് ടി.യു. സാദത്ത് ഉദ്ഘാടനം ചെയ്തു. അടിസ്ഥാന സൗകര്യങ്ങൾക്ക് പ്രാമുഖ്യം കൊടുക്കാതെ അധ്യയന ദിനങ്ങൾ വർധിപ്പിച്ച് അധ്യാപകരെയും വിദ്യാർഥികളെയം ബുദ്ധിമുട്ടിക്കാനാണു സർക്കാർ ശ്രമിക്കുന്നതെന്ന് അദ്ദേഹം ആരോപിച്ചു.
ജില്ലാ സെക്രട്ടറി അജിമോൻ പൗലോസ്, ട്രഷറർ ഷൈനി ബെന്നി, സംസ്ഥാന നിർവാഹ സമിതിയംഗം കെ.എ. ഉണ്ണി, സംസ്ഥാന കമ്മിറ്റിയംഗങ്ങളായ ബിജു വർഗീസ്, പി.എ. സുനിത എന്നിവർ പ്രസംഗിച്ചു.