വനം വകുപ്പ് വഴി തടഞ്ഞു : മാമലക്കണ്ടം -കൊയ്നിപ്പാറ പ്രദേശത്ത് സംഘർഷം
1339603
Sunday, October 1, 2023 5:35 AM IST
കോതമംഗലം: മാമലക്കണ്ടം കൊയ്നിപ്പാറ പ്രദേശത്തേക്കുള്ള സഞ്ചാര സ്വാതന്ത്ര്യം വനം വകുപ്പ് തടഞ്ഞതിനെ തുടർന്ന് പ്രദേശത്ത് സംഘർഷാവസ്ഥ.
പതിറ്റാണ്ടുകളായി പ്രദേശത്ത് ജനങ്ങൾ താമസിച്ച് വരുന്നതാണ്. കഴിഞ്ഞ കുറെ വർഷങ്ങളായി നിരവധി ടൂറിസ്റ്റുകളും എത്തുന്നു. ഇന്നലെ രാവിലെ വനം വകുപ്പ് സംഘം സ്ഥലത്തെത്തിയാണ് സഞ്ചാര സ്വാതന്ത്ര്യം തടഞ്ഞത്. ഇതോടെ ജനങ്ങളും തടിച്ചുകൂടി. വിവരമറിഞ്ഞ് ആന്റണി ജോണ് എംഎൽഎ സ്ഥലത്തെത്തി.
ജനങ്ങളുടെ സഞ്ചാര സ്വാതന്ത്ര്യം നിഷേധിക്കാൻ അനുവദിക്കില്ലെന്ന് എംഎൽഎ പറഞ്ഞു. വന്യമൃഗശല്യംകൊണ്ട് പൊറുതിമുട്ടിയ പ്രദേശത്തെ ജനങ്ങളുടെ പ്രധാന വരുമാനമാർഗം പ്രദേശത്തേയ്ക്ക് ടൂറിസ്റ്റുകളുടെ വരവാണ്. അത് തടയാൻ ആര് ശ്രമിച്ചാലും അംഗീകരിക്കില്ലെന്ന് എംഎൽഎ പറഞ്ഞു. പഞ്ചായത്ത് റോഡിലൂടെയുള്ള യാത്രയാണിപ്പോൾ വനം വകുപ്പ് തടഞ്ഞത്.
എംഎൽഎയുടെ നേതൃത്വത്തിൽ നാട്ടുകാർ ശക്തമായ പ്രതിഷേധം അറിയിച്ചതിനെ തുടർന്ന് വനം വകുപ്പ് സംഘം മടങ്ങുകയായിരുന്നു. സംഘർഷം മുന്നിൽ കണ്ട് വൻ പോലീസ് സംഘം സ്ഥലത്തെത്തിയിരുന്നു.