കൊച്ചി: ജില്ലയിലെ വിവിധ സ്ഥാപനങ്ങളും സംഘടനകളും വിവിധ പരിപാടികളോടെ പരിസ്ഥിതി ദിനാചരണം നടത്തി. കളക്ടറേറ്റില് നടന്ന പരിസ്ഥിതിദിനാചാരണത്തില് കളക്ടറേറ്റ് വളപ്പില് നിര്മാണത്തിലിരിക്കുന്ന പൂന്തോട്ടത്തില് കളക്ടര് എന്.എസ്.കെ. ഉമേഷ് ഫലവൃക്ഷത്തൈകള് നട്ടു. അഡീഷണല് ജില്ലാ മജിസ്ട്രേറ്റ് എസ്. ഷാജഹാന്, തൃക്കാക്കര സ്റ്റേഷന് ഹൗസ് ഓഫീസര് ആര്. ഷാബു, കാക്കനാട് മാര് അത്തനേഷ്യസ് ഹൈസ്കൂള് പ്രധാനാധ്യാപിക ബിബു പുറവത്ത്, സ്കൂളിലെ സ്റ്റുഡന്റ് പോലീസ് കേഡറ്റുകള് തുടങ്ങിയവര് ചടങ്ങില് പങ്കെടുത്തു.
സഹൃദയ, റിലയന്സ് ഫൗണ്ടേഷന് എന്നിവര് സംയുക്തമായി നടത്തിയ പരിസ്ഥിതി ദിനാചരണത്തില് തീരമേഖലയിലെ ഏഴു പഞ്ചായത്തുകളുടെ തീരങ്ങളില് 2,250 തെങ്ങിന് തൈകള് നട്ടുപിടിപ്പിക്കുന്ന ഹരിതവേലി പദ്ധതിക്ക് തുടക്കമിട്ടു. ഹൈബി ഈഡന് എംപി ഉദ്ഘാടനം നിര്വഹിച്ചു. നായരമ്പലം മുതല് ചെല്ലാനം വരെയുള്ള തീരപ്രദേശങ്ങളില് ഗ്രാമപഞ്ചായത്തുകളുടെ സഹകരണത്തോടെയാണ് പദ്ധതി നടപ്പാക്കുന്നത്.
എസ്ആര്വി ഗവണ്മെന്റ് വൊക്കേഷണല് ഹയര് സെക്കന്ഡറി സ്കൂള് നാഷണല് സര്വീസ് സ്കീമിന്റെ ആഭിമുഖ്യത്തില് പരിസ്ഥിതി സംരക്ഷിക്കുന്നതിലെ പ്ലാസ്റ്റിക് നിര്മാര്ജനത്തിന്റെ പ്രാധാന്യം വെളിപ്പെടുത്തുന്ന പോസ്റ്ററുകളുമായി വിദ്യാര്ഥികള് നഗരത്തില് സൈക്കിള് റാലി നടത്തി. പ്രിന്സിപ്പല് ജിന്സി ജോസഫ് റാലി ഫ്ളാഗ് ഓഫ് ചെയ്തു. ദിനാചരണത്തിന്റെ ഭാഗമായി വൃക്ഷത്തൈ നടീല്, പ്രകൃതി സംരക്ഷണ പ്രതിജ്ഞയെടുക്കല് എന്നിവയും സംഘടിപ്പിച്ചു.
എറണാകുളം ജനറല് ആശുപത്രിയില് പ്രകൃതി: പ്രതീക്ഷ എന്ന പേരില് പരിസ്ഥിതി ദിനാചരണ പരിപാടികള് സംഘടിപ്പിച്ചു. ആശുപത്രി അങ്കണത്തില് ഹൈബി ഈഡന് എംപി ഉദ്ഘാടനം ചെയ്തു. ചടങ്ങിനോടനുബന്ധിച്ച് ആശുപത്രി അങ്കണത്തില് സ്ഥിതി ചെയ്യുന്ന 200 വര്ഷത്തിലേറെ പഴക്കമുള്ള മഴമരത്തിനു വൃക്ഷ ശ്രേഷ്ഠ പുരസ്കാരം നല്കി. എറണാകുളം സോഷ്യല് സര്വീസ് സൊസൈറ്റിയുടെയും ആശുപത്രി സ്റ്റാഫ് വെല്ഫെയര് കമ്മിറ്റിയുടെയും സംയുക്താഭിമുഖ്യത്തിലാണ് ചടങ്ങ് സംഘടിപ്പിച്ചത്.
കോടനാട് ക്ലബ്ബിന്റെ നേതൃത്വത്തില് നടന്ന വൃക്ഷത്തൈ വിതരണവും വൃക്ഷത്തൈ നടീലും ചേരാനല്ലൂര് സെന്റ് ഫ്രാന്സിസ് സേവിയേഴ്സ് പള്ളി അങ്കണത്തില് വികാരി ഫാ. ജോണ്സണ് കക്കാട്ട് ഉദ്ഘാടനം ചെയ്തു.
ഓയിസ്ക ഇന്റര്നാഷണല് കൊച്ചി സിറ്റി ചാപ്റ്ററിന്റെ നേതൃത്വത്തില് മെട്രോ മീഡിയനില് ചെടികള് നട്ട് പരിസ്ഥിതി ദിനം ആചരിച്ചു. കലൂര് ദേശാഭിമാനി ജംഗ്ഷനില് നടന്ന പരിപാടികള്ക്ക് ചാപ്റ്റര് പ്രസിഡന്റ് ജെ.ജെ കുറ്റിക്കാട്ട് നേതൃത്വം നല്കി.
ശ്രീശങ്കരാചാര്യ സംസ്കൃത സര്വകലാശാലയുടെ കാലടി മുഖ്യകാംപസില് നാഷണല് സര്വീസ് സ്കീമിന്റെ നേതൃത്വത്തില് ലോക പരിസ്ഥിതി ദിനാചരണം നടത്തി. സര്വകലാശാലയിലെ രജിസ്ട്രാര് ഡോ. എം.ബി. ഗോപാലകൃഷ്ണന് ഫലവൃക്ഷ തൈ നട്ട് പരിപാടികള് ഉദ്ഘാടനം ചെയ്തു.
സെന്റ് പോള്സ് ഇന്റര്നാഷണല് സ്കൂളില് സയന്സ് ക്ലബിന്റെ ആഭിമുഖ്യത്തില് പരിസ്ഥിതി ദിനാചരണം നടത്തി. വിദ്യാര്ഥികള് സ്കൂള് അങ്കണത്തി 50 ഫലവൃക്ഷത്തൈകള് നട്ടു. വന്യജീവിസംരക്ഷണം പ്രോത്സാഹിപ്പിക്കുന്നതിനുള്ള സുപ്രധാന ചുവടുവയ്പായി കുട്ടികളില് കൗതുകവും മൃഗസ്നേഹവും വളര്ത്താന് സ്കൂള് കാംപസില് ആനയുടെ പ്രതിമ അനാഛാദനം ചെയ്തു.
വേള്ഡ് മലയാളി കൗണ്സില് തിരുക്കൊച്ചി പ്രൊവിന്സും ചാവറ കള്ച്ചറല് സെന്ററും സംയുക്തമായി സംഘടിപ്പിച്ച പരിസ്ഥിതിദിനാചരണവും വൃക്ഷത്തൈവിതരണവും ജസ്റ്റീസ് മേരി ജോസഫ് ഉദ്ഘാടനം ചെയ്തു. വേള്ഡ് മലയാളി കൗണ്സില് തിരുക്കൊച്ചി പ്രൊവിന്സ് പ്രസിഡന്റ് അബ്ദുള്ള ഖാന് അധ്യക്ഷത വഹിച്ചു. ചാവറ കള്ച്ചറല് സെന്റര് ഡയറക്ടര് ഫാ.അനില് ഫിലിപ്പ് മുഖ്യപ്രഭാഷണം നടത്തി. ഗ്ലോബല് വൈസ് ചെയര്മാന് ജോര്ജ് കുളങ്ങര, അഡ്വ. ശിവന് മഠത്തില്, ജോസഫ് മാത്യു, ജോണ്സണ് സി. ഏബ്രഹാം, സി.വി. മത്തായി എന്നിവര് പ്രസംഗിച്ചു.
ഐസിഎഐ എറണാകുളം ബ്രാഞ്ചിന്റെ ആഭിമുഖ്യത്തിൽ ലോക പരിസ്ഥിതി ദിനത്തിൽ മിനി മാരത്തൺ സംഘടിപ്പിച്ചു. കലൂർ ജവഹർലാൽ നെഹ്റു സ്റ്റേഡിയം പരിസരത്ത് ടി.ജെ വിനോദ് എംഎൽഎ ഉദ്ഘാടനം ചെയ്തു. കൊച്ചിൻ ഓർത്തോപീഡിക് സൊസൈറ്റി പ്രസിഡന്റ് ഡോ. ഡെന്നീസ് ജോസ് ഫ്ലാഗ് ഓഫ് ചെയ്തു. പ്ലാസ്റ്റിക് ഉപയോഗത്തിനെതിരായ ബോധവത്കരണ സന്ദേശമുയർത്തിയാണ് മിനി മാരത്തൺ സംഘടിപ്പിച്ചത്.
കൊച്ചി ലുലു മാളിൽ യുവജന സംവാദം സംഘടിപ്പിച്ചു. സസ്റ്റൈനബിള് ഫാഷന് ആന്ഡ് സീറോ വേസ്റ്റ് ലിവിംഗ് ആസ് ദി ഫ്യൂച്ചര്' എന്ന വിഷയത്തിലായിരുന്നു സംവാദം. കൊച്ചിയിലെയും സമീപപ്രദേശങ്ങളിലെയും ആറു കോളജുകളില് നിന്നായി 12 പേര് പങ്കെടുത്തു. രഞ്ജിനി തമ്പി, കീര്ത്തി തിലകന് എന്നിവരായിരുന്നു മോഡറേറ്റര്മാര്.
സേക്രഡ് ഹാര്ട്ട് കോളജിനാണ് സംവാദത്തില് ഒന്നാം സ്ഥാനം. 20,000 രൂപയാണ് സമ്മാനത്തുക. രണ്ടാം സ്ഥാനം സെന്റ് തെരേസാസ് കോളജിനാണ്. സമ്മാനത്തുക 10,000 രൂപ. സംവാദത്തില് ഭാഗമായ എല്ലാവരെയും ലുലു മാള് ടീം അഭിനന്ദിച്ചു.
അസറ്റ് ഹോംസ് സംഘടിപ്പിക്കുന്ന ബിയോണ്ട് സ്ക്വയര് ഫീറ്റ് (ബിഎസ്എഫ്) പ്രഭാഷണ പരമ്പരയിലെ 25-ാമത് പ്രഭാഷണ പരിപാടിയില് ഫ്രണ്ട്സ് ഓഫ് ഭാരതപ്പുഴയുടെ ജനറല് സെക്രട്ടറിയും വയലി ഫോക് ലോര് ഗ്രൂപ്പ് അമരക്കാരനും എന്ജിനീയറുമായ വിനോദ് നമ്പ്യാര് പരിസ്ഥിതി പ്രഭാഷണം നടത്തി. അസറ്റ് ഹോംസ് മാനേജിംഗ് ഡയറക്ടര് വി. സുനില് കുമാര് സന്നിഹിതനായിരുന്നു.
തൃപ്പൂണിത്തുറ നഗരസഭയുടെ ആഭിമുഖ്യത്തിൽ നടന്ന ഹരിതസഭ, നഗരസഭ ചെയർപേഴ്സൺ രമ സന്തോഷ് ഉദ്ഘാടനം ചെയ്തു. ദീപ്തി സുമേഷ് അധ്യക്ഷത വഹിച്ചു. തൃപ്പൂണിത്തുറ ഗവ.ഗേൾസ് ഹൈസ്കൂൾ വളപ്പിൽ നഗരസഭ ചെയർപേഴ്സൺ രമാ സന്തോഷ് വൃക്ഷത്തൈ നട്ടു.
കളമശേരി നിയോജക മണ്ഡലം മുസ്ലിം ലീഗ് കമ്മിറ്റി മണ്ഡലത്തിൽ ആയിരം വൃക്ഷത്തൈകൾ നട്ടു പിടിപ്പിക്കുന്നതിന്റെ ഉദ്ഘാടനം ഏലൂർ ഇഎസ്ഐ ഡിസ്പൻസറി വളപ്പിൽ വ-ൃക്ഷത്തൈ നട്ട് ശ്രീമൻ നാരായണൻ ഉദ്ഘാടനം ചെയ്തു.
സെന്റ് ആൽബർട്സ് കോളജ് (ഓട്ടോണമസ്) സുവോളജി വിഭാഗവും ബോട്ടണി വിഭാഗവും എൻഎസ് എസ് യൂണിറ്റും ഒത്തുചേർന്നു പരിസ്ഥിതി ദിനാഘോഷത്തിന്റെ ഭാഗമായി ഫലവൃക്ഷ തൈകൾ നട്ടുപിടിപ്പിച്ചു. ബിപിസിൽ കൊച്ചിൻ റെഫൈനറി ജനറൽ മാനേജർ മാത്യു പി. തോമസ് പരിപാടി ഉദ്ഘാടനം ചെയ്ത് വൃക്ഷതൈകൾ വിതരണം ചെയ്തു. കോളജ് ചെയർമാൻ റവ. ഡോ. ആന്റണി തോപ്പിൽ അധ്യക്ഷത വഹിച്ചു.
ഇടക്കൊച്ചി സഹകരണ ബാങ്കിൽ ഫലവൃക്ഷ തൈകളുടേയും പച്ചക്കറി തൈകളുടേയും വിതരണം നടത്തി. ബാങ്ക് പ്രസിഡന്റ് ജോൺ റിബല്ലോ ഉദ്ഘാടനം നിർവഹിച്ചു.
കോട്ടപ്പുറം ഗവ. സ്കൂളിൽ പരിസ്ഥിതി ദിനമായി ബന്ധപ്പെട്ട പരിപാടികളുടെ ഉദ്ഘാടനം കൃഷി ഓഫീസർ അഞ്ജു മറിയം നിർവഹിച്ചു. സിബിൻ കരുമാലൂർ അധ്യക്ഷത വഹിച്ചു.
ചേരാനല്ലൂർ സർഗവേദി കലാ കൂട്ടായ്മയുടെ നേതൃത്ത്വത്തിൽ നടന്ന വൃക്ഷതൈ നടീൽ സർഗവേദി പ്രസിഡന്റ് സെബാസ്റ്റ്യൻ ആറ്റുപുറവും വൈസ് പ്രസിഡന്റ് ഗീതാ ഗോപിയും ചേർന്ന് നിർവഹിച്ചു.
കാലടി പഞ്ചായത്തിൽ വലിച്ചെറിയൽമുക്ത നവകേരളം കാമ്പയിന്റെ ഭാഗമായി ഹരിതസഭ സംഘടിപ്പിച്ചു. പ്രസിഡന്റ് എം. പി. ആന്റണി ഉദ്ഘാടനം ചെയ്തു. അംബിക ബാലകൃഷ്ണൻ അധ്യക്ഷത വഹിച്ചു.
എഐവൈഎഫ് ഉദയംപേരൂർ മേഖലാ കമ്മിറ്റി സംഘടിപ്പിച്ച 500 വൃക്ഷത്തൈകളുടെ വിതരണം നടൻ ശ്രീനിവാസൻ ഉദ്ഘാടനം ചെയ്തു.
ഞാറക്കൽ ലിറ്റിൽ ഫ്ലവർ ഹൈസ്കൂളിലെ പരിസ്ഥിതി ദിനാചരണം ഞാറക്കൽ ഫസ്റ്റ് ക്ലാസ് മജിസ്ട്രേറ്റ് ഡിൻസി ഡേവിസ് ഉദ്ഘാടനം ചെയ്തു. പ്രധാനാധ്യാപിക സിസ്റ്റർ ജിനി ജോൺ അധ്യക്ഷത വഹിച്ച യോഗത്തിൽ നേച്ചർ ക്ലബ് കോ ഓർഡിനേറ്റർ മരിയ ഗൊരേറ്റി, സെബാസ്റ്റ്യൻ ആന്റണി, കെ.പി. മേരി എന്നിവർ സംസാരിച്ചു.
ഭൂമിക്കൊരു കുട വരാപ്പുഴ ഗ്രാമപഞ്ചായത്ത്തല ഉദ്ഘാടനം തത്തപ്പള്ളി ഗവ. ഹൈസ്കൂൾ അങ്കണത്തിൽ എറണാകുളം ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ് നിർവഹിച്ചു. പഞ്ചാത്ത് പ്രസിഡന്റ് കെ.എസ്. ഷാജി അധ്യക്ഷത വഹിച്ചു.
നെറ്റ് സീറോ എമിഷന് പദ്ധതി നെടുമ്പാശേരി മേഖല മർക്കന്റെയിൽ കോ -ഓപ്പറേറ്റീവ് സൊസൈറ്റിയിൽ അൻവർ സാദത്ത് എംഎൽഎ ഉദ്ഘാടനം ചെയ്തു. പ്രസിഡന്റ് സി.പി. തരിയൻ അധ്യക്ഷനായി.
കിസാൻസഭ തൃപ്പൂണിത്തുറ മണ്ഡലം കമ്മറ്റിയുടെ നേതൃത്വത്തിൽ തൃപ്പൂണിത്തുറ മോനിപ്പിള്ളി പൊക്കാളിപ്പാടത്ത് കൃഷിയിറക്കി. സിപിഐ സംസ്ഥാന കമ്മറ്റിയംഗം ടി. രഘുവരൻ ഉദ്ഘാടനം ചെയ്തു.
ടിസിസിയിൽ ഫലവൃക്ഷത്തൈകൾ നടുകയും 500 ഓളം ജീവനക്കാർക്ക് തൈകൾ വിതരണം ചെയ്യുകയും ചെയ്തു.ഫാക്ട് ടൗൺഷിപ്പിൽ സിഎംഡി കിഷോർ റുംഗ്ത വൃക്ഷതൈ നട്ടു.
അയിരൂർ സെന്റ് തോമസ് ഹയർ സെക്കൻഡറി സ്കൂളിൽ പിടിഎ പ്രസിഡന്റ് വി.പി. ജോണി , പഞ്ചായത്തംഗം മിനി പോളി, പ്രധാനാധ്യാപകൻ ജോജോ തോമസ് എന്നിവരുടെ നേതൃത്വത്തിൽ വൃക്ഷ തൈ നട്ടു.
കുസാറ്റ് വിദ്യാര്ഥികള് 1,000 വൃക്ഷ തൈകള് വിതരണം ചെയ്തു. സ്കൂള് ഓഫ് എൻജിനീറിംഗില് നടന്ന ചടങ്ങ് പ്രിന്സിപ്പൽ ഡോ. ദീപക് കുമാര് സാഹു മരം നട്ടു ഉദ്ഘാടനം ചെയ്തു.
പെരുമ്പാവൂർ അർബൻ സഹകരണ സംഘത്തിന്റെ നേതൃത്വത്തിൽ പെരുമ്പാവൂർ ബോയ്സ് എൽപി സ്കൂളിൽ സംഘടിപ്പിച്ച പരിപാടി സംഘം പ്രസിഡന്റ് പോൾ പാത്തിക്കൽ വൃക്ഷതൈ നട്ട് ഉദ്ഘാടനം ചെയ്തു.വാഴക്കുളം പഞ്ചായത്തില് നടത്തിയ ഹരിത സഭ ജില്ലാ പഞ്ചായത്ത് വൈസ് പ്രസിഡന്റ് സനിത റഹീം ഉദ്ഘാടനം ചെയ്തു.
ആലുവ പരിസ്ഥിതി സംരക്ഷണ സംഘം ഏർപ്പെടുത്തിയ ഭൂമിമിത്ര പുരസ്കാരദാന സമ്മേളനം അൻവർ സാദത്ത് എംഎൽഎ ഉദ്ഘാടനം ചെയ്തു.വി.കെ. ശ്രീധരന് കേരള അഡ്മിനിസ്ട്രേറ്റീവ് ട്രൈബ്യൂണൽ ചെയർമാൻ ജസ്റ്റിസ് സി.കെ. അബ്ദുൾ റഹിം പുരസ്കാരം കൈമാറി.
ഇടക്കൊച്ചി അക്വിനാസ് കോളജ് എൻഎസ്എസ് യൂണിറ്റിന്റെയും നേച്ചർ ആൻഡ് ടൂറിസം ക്ലബിന്റെയും നേതൃത്വത്തിൽ ഇടക്കൊച്ചി സെന്റ് മേരീസ് എൽപി സ്കൂളിൽ ഫലവൃക്ഷത്തൈ നട്ടു കൊണ്ട് പരിസ്ഥിതി ദിനം ആഘോഷിച്ചു.
എറണാകുളം ഗവൺമെന്റ് ഹയർ സെക്കൻഡറി സ്കൂളിൽ നേച്ചർ ക്ലബ്, എൻഎസ്എസ് യൂണിറ്റ് ലയൺസ് ക്ലബ് കൊച്ചിൻ പ്രൈഡ് എന്നിവയുടെ സഹകരണത്തോടെ പരിസ്ഥിതി ദിനാചരണവും നേച്ചർ ക്ലബിന്റെ ഉദ്ഘാടനവും നടത്തി.
കോർപറേഷൻ വികസനകാര്യ ചെയർമാൻ പി. ആർ. റെനീഷ് വൃക്ഷത്തൈ നൽകി ഉദ്ഘാടനം നിർവഹിച്ചു.
ഫലവൃക്ഷത്തൈകളുടെ വിതരണ ഉദ്ഘാടനം ലയൺസ് ക്ലബ് 318 സിയുടെ പ്രോജക്ട് കോ-ഓർഡിനേറ്റർ സിബി ഫ്രാൻസിസ് നിർവഹിച്ചു. പരിസ്ഥിതി ദിന റാലി ലയൺസ് ക്ലബ് കൊച്ചിൻ പ്രൈഡ് പ്രസിഡന്റ് കുമ്പളം രവി ഫ്ലാഗ് ഓഫ് ചെയ്തു.
ഏലൂർ നഗരസഭയിലെ ഹരിത സഭ - ജനകീയ വേദി പാതാളം ടൗൺ ഹാളിൽ മന്ത്രി പി. രാജീവ് ഉദ്ഘാടനം ചെയ്തു. നഗരസഭ ചെയർമാൻ എ.ഡി. സുജിൽ അധ്യക്ഷത വഹിച്ചു.