കൊച്ചി: സ്ഥലപരിമിതി മൂലം പ്രയാസപ്പെടുന്ന ലക്ഷക്കണക്കിന് കുടുംബങ്ങളെ വികേന്ദ്രീകൃത മാലിന്യ പദ്ധതിയുടെ പേരില് ബുദ്ധിമുട്ടിലാക്കുന്ന നഗരസഭ, നഗരവാസികളോട് യുദ്ധം പ്രഖ്യാപിച്ചിരിക്കുകയാണെന്ന് പ്രതിപക്ഷ നേതാവ് വി.ഡി. സതീശന്. മാലിന്യ മാഫിയയുടെ മറവില് കൊച്ചിന് കോര്പ്പറേഷനില് നടക്കുന്ന കൊള്ളക്കെതിരെ ഡിസിസി പ്രസിഡന്റ് മുഹമ്മദ് ഷിയാസ് നയിക്കുന്ന വാഹന പ്രചരണജാഥ "നഗരം നിറഞ്ഞ് സമര'ത്തിന്റെ അഞ്ചാം ദിവസത്തെ പര്യടനം ഉദ്ഘാടനം ചെയത് സംസാരിക്കുകയായിരുന്നു അദ്ദേഹം.
മാലിന്യം സംഭരിക്കാന് വലിയ തുക പൊതുജനങ്ങളില് നിന്നും തുക ഈടാക്കുന്ന സിപിഎം പിന്തുണയുള്ള മാലിന്യ മാഫിയ കോടികളുടെ അഴിമതിക്കായി സ്വകാര്യ കമ്പനികളെ മറയാക്കുകയാണ്.
ബ്രഹ്മപുരത്തെ ആസൂത്രിത തീപിടുത്തം കൊച്ചി നഗരസഭയുടെയും പിണറായി സര്ക്കാരിന്റെയും അഴിമതിയുടെ ബാക്കിപത്രമായിരുന്നു. ആര്ക്ക് കരാര് കൊടുത്താലും അതിന്റെ ലാഭവിഹിതം പോകുന്നത് പിണറായി വിജയന്റെ പെട്ടിയിലേക്കാണ്.
എംഎല്എമാരായ ടി.ജെ. വിനോദ്, അന്വര് സാദത്ത്, ഉമ തോമസ്, കെപിസിസി ജനറല് സെക്രട്ടറി ദീപ്തി മേരി വര്ഗീസ്, യുഡിഎഫ് ചെയര്മാന് ഡൊമനിക് പ്രസന്റേഷന്, നേതാക്കളായ എന്. വേണുഗോപാല്, ടോണി ചമ്മിണി, ജോസഫ് ആന്റണി, എന്.ആര്. ശ്രീകുമാര്, കെ.ആര്. പ്രദീപ്കുമാര്, സേവ്യര് തായങ്കരി, വി.കെ. മിനിമോള്, ജോഷി പള്ളന്, ജോസഫ് അലക്സ്, ലിസി ജോര്ജ് തുടങ്ങിയവര് സംസാരിച്ചു.