കോതമംഗലം: മാര്ത്തോമ ചെറിയപള്ളിക്ക് അനുകൂലമായുണ്ടായ കോതമംഗലം മുന്സിഫ് കോടതി വിധിയില് ആഹ്ലാദം പ്രകടപ്പിച്ച് മതമൈത്രി സംരക്ഷണ സമിതിയുടെ നേതൃത്വത്തില് നഗരത്തില് പ്രകടനം നടത്തി. തുടര്ന്നുനടന്ന പൊതുസമ്മേളനം ശ്രേഷ്ഠ കാതോലിക്ക ബസേലിയോസ് തോമസ് പ്രഥമന് ബാവ ഉദ്ഘാടനം ചെയ്തു. സഭയില് ശാശ്വത സമാധാനത്തിന്റെ സൂചനയാണ് കോതമംഗലം കോടതിയില് നിന്ന് ചെറിയപള്ളിക്ക് ലഭിച്ച വിധിയെന്ന് ശ്രേഷ്ഠ ബാവ പറഞ്ഞു. ഏലിയാസ് മാര് യൂലിയോസ് മെത്രാപ്പോലീത്ത അനുഗ്രഹ പ്രഭാഷണം നടത്തി.
എംഎല്എമാരായ ആന്റണി ജോണ്, എല്ദോസ് കുന്നപ്പിള്ളി, മതമൈത്രി സംരക്ഷണ സമിതി കണ്വീനര് എ.ജി. ജോര്ജ്, കണ്വീനര് കെ.എ. നൗഷാദ്, മുന്മന്ത്രി ടി.യു. കുരുവിള, പഞ്ചായത്ത് പ്രസിഡന്റുമാരായ ജെസി സാജു, ഷൈജന്റ് ചാക്കോ, മാമച്ചന് ജോസഫ്, നഗരസഭാംഗം ഭാനുമതി രാജു, പി.എ. സോമന്, വ്യാപാരി സമൂഹത്തിനുവേണ്ടി ഇ.കെ. സേവ്യര്, എല്ദോസ് ചേലാട്ട്, മൈതീന് ഇഞ്ചക്കുടി, പൗലോസ് ആനച്ചിറ, പ്രവാസി അഷ്റഫ്, കെ.പി. ബാബു, മാത്യു ജോസഫ്, എന്.സി. ചെറിയാന്വ എന്നിവര് പങ്കെടുത്തു.
ചെറിയപള്ളി വികാരി ഫാ. ജോസ് പരത്തുവയലില്, സഹവികാരിമാരായ ഫാ.ജോസ് തച്ചേത്ത്കുടി, ഫാ. ഏലിയാസ് പൂമറ്റത്തില്, ഫാ. ബിജോ കാവാട്ട്, ഫാ. ബേസില് ഇട്ടിയാണിയക്കല്, പള്ളി ട്രസ്റ്റിമാരായ സി.ഐ. ബേബി ചുണ്ടാട്ട്, ബിനോയി തോമസ് മണ്ണഞ്ചേരി എന്നിവര് നേതൃത്വം നല്കി.