കൊച്ചി: വീടുകളില് നിന്ന് ജൈവ അജൈവ മാലിന്യങ്ങള് ശേഖരിക്കുന്നതിന് ദിവസങ്ങള് തിട്ടപ്പെടുത്തിയുള്ള കലണ്ടര് കൊച്ചി നഗരസഭ പുറത്തിറക്കി. ജൈവമാലിന്യങ്ങള് ദിവസവും വീടുകളില് നിന്നും ശേഖരിക്കും. അജൈവ മാലിന്യം തരംതിരിച്ച് ഓരോന്നിനും ഓരോ ദിവസം കലണ്ടറില് നിശ്ചയിച്ചിട്ടുണ്ട്. ഹരിതകര്മ സേന വഴിയാണ് മാലിന്യ ശേഖരണം. ഇതിനായി 21 ഹെല്ത്ത് സര്ക്കിള് ഓഫീസുകള് അടിസ്ഥാനത്തിലുള്ള ഹരിതകര്മ സേനയ്ക്ക് രൂപം നല്കുമെന്ന് മേയര് എം. അനില്കുമാര് അറിയിച്ചു.
വര്ഷത്തില് നാലുതവണയാണ് ഇലക്ട്രോണിക് മാലിന്യം ശേഖരിക്കുക. ഇതില് ജനുവരി, ജൂലൈ മാസങ്ങളില് അപകടകരമല്ലാത്ത ഇ-മാലിന്യങ്ങളും മാര്ച്ച്, ഒക്ടോബര് മാസങ്ങളില് പിക്ചര് ട്യൂബ്, ഇലക്ട്രിക് ബള്ബ്, ട്യൂബ്, തുടങ്ങിയ മാലിന്യങ്ങളും ശേഖരിക്കും. ഫെബ്രുവരി, സെപ്റ്റംബര് മാസങ്ങളില് തുണി, മെഡിക്കല് വേസ്റ്റുകളും ഏപ്രില്, നവംബര് മാസങ്ങളില് ചെരുപ്പ്, ബാഗ്, തെര്മോക്കോള്, തുകല്, കാര്പെറ്റ്, അപ്ഹോള്സ്റ്ററി വേസ്റ്റ്, മെത്ത, തലയിണ, പ്ലാസ്റ്റിക് പായ തുടങ്ങിയ മാലിന്യങ്ങളും ശേഖരിക്കും.
മേയ്, ഡിസംബര് മാസങ്ങളിലാണ് കുപ്പി, ചില്ല്, മറ്റ് ഗ്ലാസ് നിര്മിത മാലിന്യം, മരക്കഷണം തുടങ്ങിവയ ശേഖരിക്കുക. ജൂണിൽ ഒരുതവണ ഉപയോഗശൂന്യമായ വാഹന ടയര്, ട്യൂബ് തുടങ്ങിയവയും ഓഗസ്റ്റിൽ പോളിത്തിന്, പ്രിന്റിംഗ് ഷീറ്റ്, ലോഹം, മറ്റ് സ്ക്രാപ്പ് മുതലവായവയും ശേഖരിക്കും. ഇവയൊക്കെ അതാതു മാസങ്ങളില് ഓരോ തവണയാകും വീടുകളില്നിന്നും എടുക്കുന്നത്. പേപ്പര് ഉത്പന്നങ്ങള്, പ്ലാസ്റ്റിക്, പ്ലാസ്റ്റിക് കവറുകള് എന്നിവ എല്ലാ മാസവും ആഴ്ചയില് ഒരു തവണ വീതവും ചിരട്ട, തൊണ്ട് എന്നിവ മാസത്തില് രണ്ടുതവണ വീതവും ശേഖരിക്കും. ഗാര്ഹിക ബയോ മെഡിക്കല്, സാനിറ്ററി മാലിന്യങ്ങള് എല്ലാ ദിവസവും പ്രത്യേക സംവിധാനം വഴി ശേഖരിക്കും. ഓരോ മാസവും ലിസ്റ്റ് പ്രകാരം മാലിന്യം ശേഖരിക്കുന്ന തീയതി മുന്കൂട്ടി അറിയിക്കുന്നതാണെന്നും മേയര് പറഞ്ഞു.
മാലിന്യശേഖരണത്തിന് നഗരസഭ നിശ്ചയിക്കുന്ന യൂസര് ഫീസ് ബാധകമായിരിക്കും. കലണ്ടര് സംബന്ധിച്ച് പൊതുജനങ്ങള്ക്ക് അഭിപ്രായം രേഖപ്പെടുത്താം. നിര്ദേശങ്ങള് kmc.pms23 @gmail.com എന്ന ഇമെയിലില് ഐഡിയിലേക്കും നഗരസഭാ ഓഫീസില് നേരിട്ടും സമര്പ്പിക്കാം.
മാലിന്യ ശേഖരത്തിന് ഹരിത കര്മസേന
കൊച്ചി: വീടുകളില് നിന്നും മാലിന്യം ശേഖരിക്കാന് സര്ക്കിള് ഓഫീസ് അടിസ്ഥാനത്തില് ഹരിത കര്മ സേനയ്ക്കു രൂപം നല്കുന്നു. ഇതിന്റെ ആദ്യപടിയായി കൊച്ചിയില് മാലിന്യ ശേഖരണം നടത്തി വരുന്ന ആയിരത്തിലധികം തൊഴിലാളികളുടെ യോഗം ടൗണ്ഹാളില് ചേര്ന്നു.
കുടുംബശ്രീ മിഷന്റെ സഹായത്തോടെയാണ് സേനയ്ക്കു രൂപം നല്കുന്നത്. ആദ്യപടിയായി നഗരസഭയുടെ 21 ഹെല്ത്ത് സര്ക്കിള് ഓഫീസുകള് കേന്ദ്രീകരിച്ച് കുടുംബശ്രീ മീഷന് ഇവര്ക്ക് പരിശീലനംനല്കും. അടുത്ത മാസത്തോടുകൂടി ഹരിത കര്മസേന നഗരത്തില് രൂപീകരിക്കുകയാണ് ലക്ഷ്യം.