കോതമംഗലം: ലോക ഹൃദയദിനത്തിന്‍റെ ഭാഗമായി കോതമംഗലം സെന്‍റ് ജോസഫ്സ് (ധർമഗിരി) ആശുപത്രിയുടെ നേതൃത്വത്തിൽ റാലിയും റോഡ് ഷോയും ഇന്ന് നടത്തും. രാവിലെ 8.30ന് ആശുപത്രി അങ്കണത്തിൽ നടക്കുന്ന യോഗത്തിൽ ആന്‍റണി ജോണ് എംഎൽഎ റാലിയും റോഡ്ഷോയും ഉദ്ഘാടനം ചെയ്യും. കത്തീഡ്രൽ വികാരി റവ. ഡോ. തോമസ് ചെറുപറന്പിൽ അധ്യക്ഷത വഹിക്കും.
ബുക്ക്‌‌ലറ്റ് പ്രകാശനം നഗരസഭാംഗം ജോസ് വർഗീസ് നിർവഹിക്കും. അഡ്മിനിസ്ട്രേറ്റർ സിസ്റ്റർ അഭയ, മനോജ് തോമസ്, അപെക് (എപിഇസി) ചെയർമാൻ ജയേഷ് തന്പാൻ, ആശുപത്രി സെക്രട്ടറി മാത്യു ജോസഫ് എന്നിവർ പ്രസംഗിക്കും. റാലിയോടബനുബന്ധിച്ച് നടത്തുന്ന റോഡ് ഷോയിൽ ഹൃദയ സംബന്ധമായ രോഗങ്ങളെപ്പറ്റിയും അടിയന്തര ഘട്ടത്തിൽ ആശുപത്രിയിൽ എത്തുന്നതുവരെ രോഗിയും കൂടെയുള്ളവരും ചെയ്യേണ്ട പ്രഥമ ശുശ്രൂഷകളെപ്പറ്റിയും ജനങ്ങളെ ബോധവൽകരിക്കും.
ധർമഗിരി ആശുപത്രിയിൽനിന്നു പുറപ്പെടുന്ന റോഡ് ഷോ കോതമംഗലം കെഎസ്ആർടിസി ജംഗ്ഷൻ, സെന്‍റ് ജോർജ് സ്കൂൾ, നെല്ലിമറ്റം, ഊന്നുകൽ, നേര്യമംഗലം, അടിമാലി, പൈങ്ങോട്ടൂർ, പോത്താനിക്കാട്, അടിവാട്, വാരപ്പെട്ടി, മാതിരപ്പിള്ളി, ചേലാട്, കോട്ടപ്പടി, ഓടക്കാലി, നെല്ലിക്കുഴി എന്നിവിടങ്ങളിലൂടെ സഞ്ചരിച്ച് കോതമംഗലം നഗരസഭ സ്വകാര്യ ബസ് സ്റ്റാന്‍ഡിൽ സമാപിക്കും.
ധർമഗിരി ആശുപത്രിയിൽ ഒന്ന് മുതൽ 2022 ഡിസംബർ 31 വരെയുള്ള കാലയളവിൽ എല്ലാ ശനിയാഴ്ചയും കാർഡിയോളജി വിഭാഗത്തിൽ പുതിയതായി ചാർട്ട് എടുക്കുന്നവർക്ക് കണ്‍സൾട്ടേഷൻ ഫീസ് സൗജന്യമായിരിക്കും. രോഗികൾക്ക് അന്നേദിവസം ഇസിജി, എക്കോ, ടിഎംടി എന്നിവയ്ക്ക് 50 ശതമാനം ചാർജ് മാത്രമേ ഈടാക്കുകയുള്ളൂ. ആൻജിയോഗ്രാം ഉൾപ്പെടെയുള്ള പരിശോധനകളും മിതമായ നിരക്കിൽ ലഭ്യമാക്കും. നിർധനരായ ഹൃദ്രോഗികൾക്ക് സൗജന്യമായി മരുന്നും നൽകുന്നതാണെന്ന് ആശുപത്രി അഡ്മിനിസ്ട്രേറ്റർ സിസ്റ്റർ അഭയ അറിയിച്ചു.