അടിമാലി സെന്‍റ് ജോർജ് പള്ളിയിൽ പെരുന്നാൾ
1478120
Monday, November 11, 2024 4:07 AM IST
അടിമാലി: സെന്‍റ് ജോര്‍ജ് യാക്കോബായ സുറിയാനി കത്തീഡ്രലില്‍ വാര്‍ഷിക പെരുന്നാളും വിശുദ്ധ ദൈവമാതാവിന്‍റെ സൂനോറോ വണക്കവും പരിശുദ്ധ യല്‍ദോ മോര്‍ ബസേലിയോസ് ബാവായുടെ ശ്രാദ്ധപ്പെരുന്നാളും 12, 13, 14 തീയതികളില്‍ നടക്കും.
ശ്രേഷ്ഠ ബസേലിയോസ് തോമസ് പ്രഥമന്‍ കാതോലിക്ക ബാവയുടെ ദേഹവിയോഗത്തെ തുടര്‍ന്ന് പെരുന്നാള്‍ ലളിതമായി ആഘോഷിക്കാനാണ് തീരുമാനിച്ചിട്ടുള്ളതെന്ന് ഭാരവാഹികള്‍ അറിയിച്ചു.
12ന് രാവിലെ പ്രഭാത പ്രാര്‍ഥനയ്ക്കും വിശുദ്ധ മൂന്നിന്‍മേല്‍ കുര്‍ബാനയ്ക്കും ശേഷം തിരുന്നാളിന് കൊടിയേറ്റും. 13ന് രാവിലെ പ്രഭാത പ്രാര്‍ഥനയ്ക്കും വിശുദ്ധ മൂന്നിന്‍മേല്‍ കുര്‍ബാനയ്ക്കും പ്രസംഗത്തിനും ശേഷം നവീകരിച്ച സൂനോറോ പേടകത്തിന്‍റെ കൂദാശ നടക്കും.
വൈകുന്നേരം നടക്കുന്ന സന്ധ്യാപ്രാര്‍ത്ഥനക്കും പ്രസംഗത്തിനും ഹൈറേഞ്ച് മേഖല മെത്രാപ്പോലീത്ത ഡോ. ഏലിയാസ് മോര്‍ അത്താനാസിയോസ് കാര്‍മികത്വം വഹിക്കും.തുടര്‍ന്ന് സൂനോറോ വണക്കവും പ്രദക്ഷിണവും നേര്‍ച്ചസദ്യയും.
14ന് രാവിലെ പ്രഭാത പ്രാര്‍ത്ഥനയ്ക്കും വിശുദ്ധ മൂന്നിന്‍മേല്‍ കുര്‍ബാനയ്ക്കും പ്രസംഗത്തിനും മൈലാപ്പൂര്‍ ഭദ്രാസന മെത്രാപ്പോലീത്ത ഐസക്ക് മോര്‍ ഒസ്താത്തിയോസ് കാര്‍മികത്വം വഹിക്കും.
10.30ന് സൂനോറോ വണക്കവും നെയ്യപ്പ നേര്‍ച്ചയും പ്രദക്ഷിണവും തുടര്‍ന്ന് ആശിര്‍വാദവും നേര്‍ച്ചസദ്യയും ലേലവും നടത്തുമെന്ന് വികാരി എല്‍ദോസ് കൂറ്റപ്പാല കോര്‍ എപ്പിസ്‌ക്കോപ്പ, സഹവികാരി ഫാ. ബേസില്‍ ജേക്കബ് പുളിഞ്ചോട്ടില്‍ എന്നിവർ അറിയിച്ചു.