കട്ടപ്പന: ഇടുക്കി ജില്ലാ രൂപീകരണത്തിന്റെ അന്പതാം വാർഷികത്തിന്റെയും കട്ടപ്പന മർച്ചന്റ്സ് അസോസിയേഷൻ സുവർണ ജൂബിലി ആഘോഷത്തിന്റെയും ഭാഗമായി മർച്ചന്റ്സ് അസോസിയേഷൻ, മർച്ചന്റ്സ് യൂത്ത് വിംഗ്, വനിതാ വിംഗ് എന്നിവയുടെ നേതൃത്വത്തിൽ ഫെബ്രുവരി 10 മുതൽ 26 വരെ കട്ടപ്പന നഗരസഭാ മൈതാനിയിൽ കട്ടപ്പന ഫെസ്റ്റ് നടത്തും.
പത്തിനു വൈകുന്നേരം 4.30നു ഇടുക്കിക്കവലയിൽനിന്ന് ഘോഷയാത്ര ആരംഭിക്കും. തുടർന്നു നടക്കുന്ന ഫെസ്റ്റിന്റെ ഉദ്ഘാടനം മന്ത്രി റോഷി അഗസ്റ്റിൻ നിർവഹിക്കും. ഡീൻ കുര്യാക്കോസ് എംപി, എംഎൽഎമാർ, ജില്ലാ കളക്ടർ, സിനിമാ-സീരിയൽ താരങ്ങൾ തുടങ്ങിയവർ പങ്കെടുക്കും.
വിനോദവും വിജ്ഞാനവും പകരുന്ന സർക്കാർ, സർക്കാരിതര സ്റ്റാളുകൾ, അത്യാധുനിക സജ്ജീകരണങ്ങളുമായി അന്താരാഷ്ട്ര നിലവാരത്തിലുള്ള അമ്യൂസ്മെന്റ് പാർക്ക്, കുട്ടികൾക്കായുള്ള പ്രത്യേക റൈഡുകൾ, ഫ്ളവർഷോ, ഒട്ടക-കുതിര സവാരി തുടങ്ങിയ വേറിട്ട പരിപാടികളാണു ഫെസ്റ്റിൽ ഒരുക്കുന്നത്. ദിവസവും വൈകുന്നേരം സിനിമാ, ടിവി താരങ്ങളെ പങ്കെടുപ്പിച്ചു കലാവിരുന്നും അരങ്ങേറും.
ഗാനമേളകൾ, മെഗാഷോകൾ, ഫ്യൂഷൻ മ്യൂസിക്, സിനിമാറ്റിക് ഡാൻസ്, നാടൻപാട്ട്, ഡിജെ, ബെല്ലി ഡാൻസ്, മിസ് ഇടുക്കി, മിസ്റ്റർ കേരള, സെമിനാറുകൾ, കലാപരിപാടികൾ തുടങ്ങിയവയും സംഘടിപ്പിക്കും. രാവിലെ ഒൻപതുമുതൽ രാത്രി ഒൻപതുവരെ പാസ് മുഖേന ഫെസ്റ്റ് നഗരിയിലേക്ക് പ്രവേശിക്കാം. 70 രൂപയാണ് പാസ് നിരക്ക്. കട്ടപ്പനയിലെ വ്യാപാര സ്ഥാപനങ്ങളിൽനിന്നു ഡിസ്കൗണ്ട് റേറ്റിൽ പ്രവേശന പാസ് ലഭിക്കുന്നതിനുള്ള സംവിധാനവും ഒരുക്കിയിട്ടുണ്ട്.
ഫെസ്റ്റിന്റെ പ്രചാരണാർഥം 28, 29 തിയതികളിൽ നഗരസഭാ മൈതാനിയിൽ ഫുട്ബോൾ ടൂർണമെന്റും നടക്കുമെന്ന് സംഘാടസമിതി ഭാരവാഹികളായ കെ.പി. ഹസൻ, അഡ്വ. എം.കെ. തോമസ്, സിജോമോൻ ജോസ്, ഷാജി നെല്ലിപ്പറന്പിൽ, സന്തോഷ് ദേവസ്യ, അജിത്ത് സുകുമാരൻ, അനിൽകുമാർ എസ്. നായർ, ബൈജു ഏബ്രഹാം, ജിജി ജോബിൻ എന്നിവർ അറിയിച്ചു.