ADVERTISEMENT

ADVERTISEMENT

റെഡ്ക്രോസ് ഭാരവാഹികൾ

കോട്ടയം: ഇന്ത്യൻ റെഡ്ക്രോസ് സൊസൈറ്റി കോട്ടയം ബ്രാഞ്ചിന്‍റെ പുതിയ പതിനഞ്ചംഗ കമ്മിറ്റി സത്യപ്രതിജ്ഞ ചെയ്ത് അധികാരമേറ്റു. കളക്‌ടറേറ്റിൽ കളക്‌ടർ ജോൺ വി. സാമുവലിന്‍റെ മുമ്പാകെയായിരുന്നു സത്യപ്രതിജ്ഞ.

ചെയർമാനായി ജോബി തോമസ്, വൈസ് ചെയർമാനായി കെ.എസ്. സുമേഷ്, ട്രഷറർ ഹരി പ്രസാദ്, ജനറൽ സെക്രട്ടറി ജമീമ ടി. ജോയി എന്നിവരടങ്ങുന്ന 18 അംഗ കമ്മിറ്റിയാണ് അധികാരമേറ്റത്.

ADVERTISEMENT

ലഹരിക്കെതിരായ പോരാട്ടം സാമൂഹിക ചുമതല: ജോസ് കെ. മാണി എംപി

ചേര്‍പ്പുങ്കല്‍: ലഹരിക്കെതിരായ പോരാട്ടത്തില്‍ സമൂഹത്തിന്‍റെ പിന്തുണ അനിവാര്യമാണെന്ന് ജോസ് കെ. മാണി എംപി പറഞ്ഞു. സംസ്ഥാന കായികവകുപ്പ് ലഹരിക്കെതിരേ സംഘടിപ്പിക്കുന്ന ലഹരിവിരുദ്ധ സന്ദേശയാത്രയുടെ ഭാഗമായി ചേര്‍പ്പുങ്കലില്‍നിന്ന് ആരംഭിച്ച മാരത്തണ്‍ ഫ്‌ളാഗ് ഓഫ് ചെയ്ത് പ്രസംഗിക്കുകയായിരുന്നു അദ്ദേഹം. സ്‌കൂളുകളിലും കോളജുകളിലും ലഹരിവിരുദ്ധ സന്ദേശങ്ങള്‍ എത്തിക്കുന്നതില്‍ കായികതാരങ്ങള്‍ക്ക് വളരെ പ്രധാനപ്പെട്ട പങ്കു വഹിക്കാന്‍ കഴിയും. ഓരോ വീടുകളെയും ബാധിക്കുന്ന ഗൗരവമുള്ള വിഷയമായി രാസലഹരിയുടെ ഉപയോഗം വ്യാപിച്ചിരിക്കുന്നു. ലഹരിക്കെതിരേയുള്ള പോരാട്ടം ഓരോരുത്തരും നിറവേറ്റേണ്ട സാമൂഹിക ചുമതലയാണെന്നും ജോസ് കെ. മാണി പറഞ്ഞു. ജില്ലാ സ്‌പോര്‍ട്‌സ് കൗണ്‍സിലിന്‍റെ ആഭിമുഖ്യത്തിലാണ് മാരത്തണ്‍ സംഘടിപ്പിച്ചത്. നിരവധി കായികതാരങ്ങളും യുവതീയുവാക്കളും മാരത്തണില്‍ പങ്കെടുത്തു. ചേര്‍പ്പുങ്കലിൽനിന്ന് ആരംഭിച്ച മാരത്തണ്‍ ഏറ്റുമാനൂര്‍ പേരൂര്‍ കവലയില്‍ സമാപിച്ചു. ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്‍റ് ഡോ. ബൈജു വര്‍ഗീസ് ഗുരുക്കള്‍, സെക്രട്ടറി ഉഷാദേവി എന്നിവര്‍ നേതൃത്വം നല്‍കി.

എസ്എംവൈഎം ഫുട്ബോൾ ടൂർണമെന്‍റ്: കൂട്ടിക്കല്‍ യൂണിറ്റ് ചാമ്പ്യന്മാര്‍

പാലാ: എസ്എംവൈഎം പാലാ രൂപതയുടെയും ഇലഞ്ഞി ഫൊറോനയുടെയും വടകര യൂണിറ്റിന്‍റെയും ആഭിമുഖ്യത്തില്‍ നടന്ന നിധീരിക്കല്‍ മാണി കത്തനാര്‍ മെമ്മോറിയല്‍ നയന്‍സ് ഫുട്‌ബോള്‍ ടൂര്‍ണമെന്‍റിൽ എസ്എംവൈഎം കൂട്ടിക്കൽ യൂണിറ്റ് ജേതാക്കളായി. കുടക്കച്ചിറ, തിടനാട് യൂണിറ്റുകൾ യഥാക്രമം രണ്ടും മൂന്നും സ്ഥാനം നേടി. വടകര സീറോമലബാര്‍ പള്ളി വികാരി ഫാ. ജോണ്‍ പുതിയാമറ്റം ടൂര്‍ണമെന്‍റ് ഉദ്ഘാടനം ചെയ്തു. എറണാകുളം ഡിവൈഎസ്പി പയസ് പരിയാരത്ത് ട്രോഫികള്‍ വിതരണം ചെയ്തു. എസ്എംവൈഎം ഇലഞ്ഞി ഫൊറോന ഡയറക്ടര്‍ ഫാ. ജോസഫ് ആലാനിക്കല്‍, വടകര യൂണിറ്റ് ഡയറക്ടര്‍ ഫാ. മാത്യു പനങ്ങാട്ട്, പാലാ രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ ടി. ജോസ് താന്നിമല എന്നിവര്‍ നേതൃത്വം നല്‍കി.

പിഎസ്ഡബ്ല്യുഎസ് അരുവിത്തുറ സോൺ വാർഷികം ഇന്ന്‌

അരുവിത്തുറ: പിഎസ്ഡബ്ല്യുഎസ് അരുവിത്തുറ സോൺ വാർഷികം അരുവിത്തുറ പള്ളി പാരിഷ് ഹാളിൽ ഇന്നു നടക്കും. രാവിലെ 9.30നു രജിസ്ട്രേഷൻ. പത്തു മുതൽ 11വരെ "കുടുംബങ്ങൾ ആധുനിക ലോകത്തിൽ' എന്ന വിഷയത്തിൽ സൈക്കോളജിസ്റ്റ് ഡോ. പി.എം. ചാക്കോ സെമിനാർ നയിക്കും. 11ന് പൊതുസമ്മേളനം പിഎസ്ഡബ്ല്യുഎസ് രൂപത ഡയറക്ടർ ഫാ. തോമസ് കിഴക്കേല്‍ ഉദ്ഘാടനം ചെയ്യും. അരുവിത്തുറ ഫൊറോന വികാരി ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിക്കും. അരുവിത്തുറ സോൺ പ്രൊമോട്ടർ ജോജോ പ്ലാത്തോട്ടം, സോൺ കോ-ഓർഡിനേറ്റർ ശാന്തമ്മ ജോസഫ്, സിസ്റ്റർ ജാൻസി രാമരത്ത്, റീജൻ കോ-ഓർഡിനേറ്റർ സിബി കണിയാംപടി, കളത്തൂക്കടവ് കർഷക ഫെഡറേഷന്‍ പ്രസിഡന്‍റ് സിബി പ്ലാത്തോട്ടം, സോണ്‍ കൗണ്‍സില്‍ അംഗം ലിൻസി കുന്നക്കാട്ട് എന്നിവർ പ്രസംഗിക്കും. സമ്മേളനത്തിൽ മികച്ച സ്വാശ്രയസംഘം, വനിതാ ഗ്രൂപ്പ്, പുരുഷ ഗ്രൂപ്പ് എന്നിവയ്ക്ക് സമ്മാനം നൽകും. സോൺ വാർഷികത്തോടനുബന്ധിച്ച് അഗ്രിമ പാലാ, വിവിധ ഗ്രൂപ്പുകളുടെ സ്റ്റാളുകൾ, സ്നേഹഗിരി സിസ്റ്റേഴ്സിന്‍റെ നൈറ്റിമേള എന്നിവയും സജ്ജമാക്കിയിട്ടുണ്ട്.

ഡോ. കെ.സി. ബേബി ഓലിക്കല്‍ മെമ്മോറിയല്‍ അവാര്‍ഡ് കോട്ടയം ട്രാഡായ്ക്ക്

പാലാ: റോട്ടറി ക്ലബ്ബിന്‍റെ നേതൃത്വത്തില്‍ അല്‍ഫോന്‍സ കണ്ണാശുപത്രികളുടെ സ്ഥാപകന്‍ ഡോ. കെ.സി. ബേബിയുടെ ഓര്‍മയ്ക്കായി ഏര്‍പ്പെടുത്തിയ ഡോ. കെ.സി. ബേബി ഓലിക്കല്‍ മെമ്മോറിയല്‍ അവാര്‍ഡ് കോട്ടയത്ത് പ്രവര്‍ത്തിക്കുന്ന മദ്യപാനരോഗ ചികിത്സാ പുനരധിവാസ കൗണ്‍സലിംഗ് കേന്ദ്രമായ ട്രാഡായ്ക്കു സമ്മാനിക്കും. 1,00,001 രൂപയും ഫലകവും അടങ്ങുന്നതാണ് പുരസ്‌കാരം. സംയുക്ത ക്രൈസ്തവ മദ്യവര്‍ജന സമിതിയുടെ സഹകരണത്തോടെ 1987ല്‍ പ്രവര്‍ത്തനമാരംഭിച്ച സ്ഥാപനത്തിന് മദ്യപാനത്തിനും മയക്കുമരുന്നുകള്‍ക്കും അടിമപ്പെട്ട ആയിരക്കണക്കിനു വ്യക്തികളെ ശാസ്ത്രീയമായി ചികിത്സിച്ചു സമൂഹത്തിന്‍റെ മുഖ്യധാരയിലേക്ക് കൊണ്ടുവരാന്‍ സാധിച്ചു. പാലാ റോട്ടറി ക്ലബ്ബില്‍ 21നു വൈകുന്നേരം എട്ടിന് നടക്കുന്ന ചടങ്ങില്‍ റോട്ടറി മുന്‍ ഗവര്‍ണര്‍ ആര്‍. രഘുനാഥ് അവാര്‍ഡ് സമ്മാനിക്കും. ട്രാഡായ്ക്കു വേണ്ടി ഡോ. ജൊവാന്‍ ചുങ്കപ്പുര അവാര്‍ഡ് ഏറ്റുവാങ്ങും. പാലാ റോട്ടറി ക്ലബ് പ്രസിഡന്‍റ് ഡോ. സെലിന്‍ റോയി അധ്യക്ഷത വഹിക്കും.

ഈരാറ്റുപേട്ട ടൗണിൽ ഏർപ്പെടുത്തിയ ട്രാഫിക് പരിഷ്കാരം വീണ്ടും പാളി

ഈരാറ്റുപേട്ട: നഗരത്തിൽ ഏർപ്പെടുത്തിയ ട്രാഫിക് പരിഷ്‌കാരം വീണ്ടും ഗതാഗതക്കുരുക്കിനു കാരണമായി. വളരെക്കാലത്തെ പരിശ്രമത്തിനൊടുവിൽ നടപ്പിലാക്കിയ സമ്പൂർണ ട്രാഫിക് പരിഷ്‌കാരത്തിനു പോലീസിന്‍റെ സേവനം വേണ്ടവിധം കിട്ടുന്നില്ലന്ന പരാതിയും ശക്തമാണ്. പരിഷ്‌കാരത്തിന്‍റെ തുടക്കത്തിൽ ട്രാഫിക് നിയന്ത്രിക്കാനും നിയമലംഘകരെ കൈകാര്യം ചെയ്യാനും സജീവമായി ഉണ്ടായിരുന്ന പോലീസും ഹോം ഗാർഡും പിന്നീട് രംഗത്തില്ലാതായി. ഗതാഗതക്കുരുക്കിൽ വീർപ്പുമുട്ടിയിരുന്ന അഹമ്മദ് കുരിക്കൽ നഗറിൽ നടപ്പാക്കിയ മാറ്റം ടൗണിലെ പകുതി കുരുക്ക് അഴിച്ചിരുന്നു. ഇതു നിയന്ത്രിച്ചിരുന്നതു പോലീസായിരുന്നു. അനധികൃതമായി കറങ്ങിക്കൊണ്ടിരുന്ന ഓട്ടോയെ നിയന്ത്രിച്ചതും അധികസമയം ബസുകളെ സ്റ്റോപ്പിൽ കിടക്കാൻ അനുവദിക്കാതിരുന്നതുമാണ് ഗതാഗതക്കുരുക്കിൽനിന്നു ടൗണിലെ രക്ഷപ്പെടുത്തിയത്. പിന്നീടതു കൃത്യമായി പോലീസ് ശ്രദ്ധിക്കാത്തതിനാൽ വീണ്ടും ടൗൺ പലപ്പോഴും ഗതാഗതക്കുരുക്കിലാകുന്ന സ്ഥിതിയാണ്. വൺവേ തെറ്റിക്കുന്നവരെ നിരീക്ഷിക്കാൻ കാമറ സ്ഥാപിക്കുകയും ചെയ്തതാണ്. എന്നാൽ കാമറ നിരീക്ഷിക്കാനോ നിയമം തെറ്റിക്കുന്നവർക്കു പിഴ നൽകാനോ യാതൊരു നടപടിയും ഉണ്ടായിട്ടില്ല. ഈരാറ്റുപേട്ടയിൽ ട്രാഫിക് പോലീസ് യൂണിറ്റ് അനുവദിക്കണമെന്നതു വർഷങ്ങൾ പഴക്കമുള്ള ആവശ്യമാണ്. ഈ ആവശ്യത്തോടും അധികൃതർ പുറംതിരിഞ്ഞു നിൽക്കുകയാണ്. ട്രാഫിക് പോലീസ് യൂണിറ്റ് അനുവദിച്ചാൽ ടൗണിലെ ഗതാഗതപ്രശ്‌നങ്ങൾ പൂർണമായി പരിഹരിക്കാൻ കഴിയുമെന്നാണ് നാട്ടുകാരുടെ അഭിപ്രായം.

ധന്യന്‍ മത്തായി അച്ചന്‍ പ്രചോദനം: മാര്‍ ജോണ്‍ നെല്ലിക്കുന്നേല്‍

പാലാ: ധന്യന്‍ കദളിക്കാട്ടില്‍ മത്തായി അച്ചനെപ്പറ്റി ഓര്‍മിക്കുമ്പോള്‍ നമ്മുടെ ജീവിതത്തിന് ആവശ്യമായ ബലവും പ്രചോദനവും അതിലെല്ലാം ഉപരിയായി ദൈവത്തിന്‍റെ കൃപയും നമുക്ക് ലഭിക്കുന്നതായി ഇടുക്കി രൂപതാധ്യക്ഷന്‍ മാര്‍ ജോണ്‍ നെല്ലിക്കുന്നേല്‍. ധന്യന്‍ കദളിക്കാട്ടില്‍ മത്തായി അച്ചന്‍റെ ചര്‍മവാര്‍ഷികത്തോടനുബന്ധിച്ചുള്ള നവനാളിന്‍റെ ആറാം ദിവസമായ ഇന്നലെ പാലാ എസ്എച്ച് പ്രൊവിന്‍ ഷ്യൽ ഹൗസ് കപ്പേളയില്‍ വിശുദ്ധ കുര്‍ബാന അര്‍പ്പിച്ചു സന്ദേശം നല്‍കുകയായിരുന്നു ബിഷപ്. ഹൃദയമില്ലായ്മ ആധുനിക യുഗത്തിന്‍റെ പ്രത്യേകതയാണ്. എന്നാല്‍ കാലങ്ങള്‍ക്കു മുന്‍പേ ഹൃദയമുള്ള ഒരു വ്യക്തിത്വത്തിന്‍റെ സവിശേഷതകള്‍ പേറി ധന്യനായ കദളിക്കാട്ടില്‍ മത്തായി അച്ചന്‍ നമുക്ക് മാതൃകയായി നില്‍ക്കുന്നു. അനുകമ്പ തോന്നുമ്പോള്‍ ഹൃദയം തിരുഹൃദയമാകും. ഒരു വ്യക്തി വിശുദ്ധിയില്‍ വളരുമ്പോള്‍ അദ്ദേഹത്തിന്‍റെ ജീവിതവും ദര്‍ശനങ്ങളും കാഴ്ചപ്പാടുകളും വഴി ദൈവസ്‌നേഹത്തിന്‍റെ പ്രകാശരശ്മികള്‍ ലോകത്തിന്‍റെ അതിര്‍ത്തികള്‍ വരെ എത്തിക്കാന്‍ സാധിക്കുന്നുവെന്നും മാർ നെല്ലിക്കുന്നേൽ പറഞ്ഞു. ഇന്ന് ഉച്ചകഴിഞ്ഞ് മൂന്നിന് വിശുദ്ധ കുര്‍ബാന, നവനാള്‍ പ്രാര്‍ത്ഥന - ഫാ. മാത്യു കദളിക്കാട്ടില്‍ (വികാരി, ക്രിസ്തുരാജ് പള്ളി, കയ്യൂര്‍).

വലീറ്റ-ഒടിച്ചുകുത്തി റോഡ് നാടിന് സമർപ്പിച്ചു

കൂട്ടിക്കൽ: കൂട്ടിക്കൽ പഞ്ചായത്ത് 12-ാം വാർഡിലെ വലീറ്റ-ഒടിച്ചുകുത്തി-പറത്താനം റോഡ് സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ബിജോയി ജോസ് മുണ്ടുപാലം അധ്യക്ഷത വഹിച്ചു. പഞ്ചായത്തംഗങ്ങളായ കെ.എസ്. മോഹനൻ, സൗമ്യ ഷമീർ, പി.എസ്. സജിമോൻ, പൊതുപ്രവർത്തകരായ പി.കെ. സണ്ണി, ടി.പി. റഷീദ്, ജോയി കളരിക്കൽ, കെ.ജി. സാബു തുടങ്ങിയവർ പ്രസംഗിച്ചു. പ്രളയത്തിൽ തകർന്ന് റോഡ് എംഎൽഎ ആസ്തി വികസനഫണ്ടിൽനിന്ന് പത്തു ലക്ഷം രൂപ അനുവദിച്ചാണ് നവീകരിച്ചത്. കൂട്ടിക്കൽ ടൗണിൽനിന്നു പറത്താനത്തേക്ക് പോകുന്നതിനുള്ള ഏറ്റവും എളുപ്പവഴി കൂടിയാണിത്.

139-ാമത് ചങ്ങനാശേരി അതിരൂപതാ ദിനാചരണം ഇന്ന് മെത്രാപ്പോലീത്തന്‍ പള്ളിയില്‍

ചങ്ങനാശേരി: 139-ാമത് ചങ്ങനാശേരി അതിരൂപതാ ദിനാചരണം ഇന്ന് രാവിലെ ഒമ്പതിന് ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയങ്കണത്തിലെ കര്‍ദിനാള്‍ മാര്‍ ആന്‍റണി പടിയറ നഗറില്‍ നടക്കും. കേരളത്തിലെ അഞ്ചു ജില്ലകളിലായി വ്യാപിച്ചുകിടക്കുന്ന മുന്നൂറോളം ഇടവകകളിലെ വിശ്വാസികളുടെ പ്രതിനിധികളും സന്യസ്ത പ്രതിനിധികളും അതിരൂപതയില്‍ സേവനം ചെയ്യുന്ന വൈദികരും ഉള്‍പ്പെടെ മൂവായിരത്തോളം പേര്‍ സമ്മേളനത്തില്‍ പങ്കെടുക്കും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. ഇടുക്കി ബിഷപ് മാര്‍ ജോണ്‍ നെല്ലിക്കുന്നേല്‍ ഉദ്ഘാടനം ചെയ്യും. ആര്‍ച്ച്ബിഷപ് മാര്‍ ജോസഫ് പെരുന്തോട്ടം അനുഗ്രഹപ്രഭാഷണവും ബാംഗളൂര്‍ ക്രൈസ്റ്റ് യൂണിവേഴ്‌സിറ്റി വൈസ് ചാന്‍സിലര്‍ റവ. ഡോ. ജോസ് ചേന്നാട്ടുശേരി സിഎംഐ മുഖ്യപ്രഭാഷണവും നടത്തും. ചങ്ങനാശേരി അതിരൂപതയുടെ മുന്‍ മെത്രാപ്പോലീത്ത മാര്‍ ജോസഫ് പവ്വത്തിലിന്‍റെ സ്മരണാര്‍ഥമുള്ള ഫൗണ്ടേഷനും പാറേല്‍ മരിയന്‍ തീര്‍ഥാടനകേന്ദ്രത്തിന്‍റെ പുനഃപ്രതിഷ്ഠാ സ്മാരകമായുള്ള ഭവന നിര്‍മാണ പദ്ധതിയും ആര്‍ച്ച്ബിഷപ് മാര്‍ തോമസ് തറയില്‍ പ്രഖ്യാപിക്കും. പാസ്റ്ററല്‍ കൗണ്‍സില്‍ ജോയിന്‍റ് സെക്രട്ടറി ബിജു സെബാസ്റ്റ്യന്‍ പതാകയുയര്‍ത്തും. ഗായകസംഘം അതിരൂപത ആന്തം ആലപിക്കും. വികാരി ജനറാള്‍ മോണ്‍. സ്‌കറിയ കന്യാകോണില്‍ പ്രാര്‍ഥന നയിക്കും. തുടര്‍ന്ന് ഫ്രാന്‍സിസ് പാപ്പയെ അനുസ്മരിക്കും. വികാരി ജനറാള്‍ മോണ്‍. ആന്‍റണി എത്തയ്ക്കാട്ട് സ്വാഗതവും മെത്രാപ്പോലീത്തന്‍ പള്ളി വികാരി ഫാ. ജോസഫ് വാണിയപ്പുരയ്ക്കല്‍ ആമുഖപ്രസംഗവും നടത്തും. വികാരി ജനറാള്‍ മോണ്‍. മാത്യു ചങ്ങങ്കരി അതിരൂപതാ ദിന പ്രതിജ്ഞ ചൊല്ലിക്കൊടുക്കും. അതിരൂപതാ ദിന കോ-ഓര്‍ഡിനേറ്റര്‍ ഫാ. ജോബിന്‍ ആനക്കല്ലുങ്കല്‍, എഎസ്എംഐ കോണ്‍ഗ്രിഗേഷന്‍ മദര്‍ ജനറല്‍ സിസ്റ്റര്‍ മേഴ്‌സി മരിയ, യുവദീപ്തി ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസ്, പാസ്റ്ററല്‍ കൗണ്‍സില്‍ ജോയിന്‍റ് സെക്രട്ടറി പ്രഫ. പി.വി. ജറോം എന്നിവര്‍ പ്രസംഗിക്കും. മികച്ച പ്രതിഭകള്‍ക്ക് അതിരൂപതയുടെ ആദരവ് അതിരൂപതയുടെ പരമോന്നത ബഹുമതിയായ എക്‌സലന്‍സ് അവാര്‍ഡ് മഹാത്മഗാന്ധി യൂണിവേഴ്‌സിറ്റി മുന്‍ വൈസ് ചാന്‍സിലറും പോളിമര്‍ നാനോ ടെക്‌നോളജി ശാസ്ത്രജ്ഞനുമായ ഡോ. സാബു തോമസ്, പ്രമുഖ ജീവകാരുണ്യ പ്രവര്‍ത്തകനും വൈദ്യശാസ്ത്രരംഗത്തെ പ്രഗത്ഭ വ്യക്തിത്വവുമായ ഡോ. ജോര്‍ജ് പടനിലം എന്നിവര്‍ക്ക് മാര്‍ തോമസ് തറയില്‍ സമ്മാനിക്കും. കൂടാതെ, വിവിധ മേഖലകളില്‍ മികവു തെളിയച്ചവരെയും അതിരൂപതയിലെ അല്മായരായ ജീവകാരുണ്യ പ്രവര്‍ത്തകരെയും സംസ്ഥാന, ദേശീയ, അന്തര്‍ദേശീയ തലങ്ങളില്‍ നേട്ടങ്ങള്‍ കൈവരിച്ച അതിരൂപതാംഗങ്ങളെയും പ്രത്യേകം ആദരിക്കും. പിആര്‍ഒ അഡ്വ. ജോജി ചിറയില്‍ ഇവരെ പരിചയപ്പെടുത്തും. ഛായാചിത്ര, ദീപശിഖാ പ്രയാണങ്ങള്‍ക്ക് സ്വീകരണം ചങ്ങനാശേരി: 139-ാമത് ചങ്ങനാശേരി അതിരൂപതാ ദിനാഘോഷങ്ങളുടെ വിളംബര ഛായാചിത്ര, ദീപശിഖ പ്രയാണങ്ങള്‍ക്ക് മെത്രാപ്പോലീത്തന്‍ പള്ളിയിലെ സമ്മേളന നഗരിയില്‍ ഊഷ്മള സ്വീകരണം. ഛായാചിത്ര, ദീപശിഖ പ്രയാണങ്ങള്‍ വിവിധ ഇടവകകളില്‍ സന്ദേശമറിയിച്ച് അരമനപ്പടിയില്‍ സംഗമിച്ചു. തുടർന്ന് ഛായാചിത്ര, ദീപശിഖ പ്രയാണങ്ങള്‍ ഒരുമിച്ച് ചങ്ങനാശേരി മെത്രാപ്പോലീത്തന്‍ പള്ളിയില്‍ എത്തിച്ചേര്‍ന്നപ്പോൾ വാദ്യമേളങ്ങളുടെ അകമ്പടിയോടെയാണ് സ്വീകരണം നല്‍കിയത്. ആര്‍ച്ച്ബിഷപ് മാര്‍ തോമസ് തറയില്‍ ഛായാചിത്രവും ദീപശിഖയും ഏറ്റുവാങ്ങി ചങ്ങനാശേരി ഫൊറോന യുവദീപ്തി പ്രസിഡന്‍റ് ഈപ്പന്‍ മാത്യു, മിഷൻലീഗ് ചങ്ങനാശേരി മേഖലാ പ്രസിഡന്‍റ് ഹയ ടോജി എന്നിവര്‍ക്ക് കൈമാറി. വികാരി ജനറാള്‍ മോണ്‍. ആന്‍റണി എത്തയ്ക്കാട്ട് റംശ നയിച്ചു. അതിരൂപത വികാരി ജനറാള്‍മാരായ മോണ്‍. മാത്യു ചങ്ങങ്കരി, മോണ്‍. സ്‌കറിയ കന്യാകോണില്‍, മോണ്‍. ജോണ്‍ തെക്കേക്കര, ചാന്‍സലര്‍ റവ.ഡോ. ജോര്‍ജ് പുതുമനമൂഴിയില്‍, പ്രൊക്യുറേറ്റര്‍ ഫാ. ആന്‍റണി മാളിയേക്കല്‍, കത്തീഡ്രല്‍ വികാരി ഫാ. ജോസഫ് വാണിയപ്പുരയ്ക്കല്‍, ജനറല്‍ കോ-ഓര്‍ഡിനേറ്റര്‍ ഫാ. ജോബിന്‍ ആനക്കല്ലുങ്കല്‍, ഫാ. ആന്‍ഡ്രൂസ് പാണംപറമ്പില്‍, ഫാ. സാവിയോ മാനാട്ട്, ഫാ. ജിജോ മാറാട്ടുകളം, എ.ജെ. ജോസഫ്, കുര്യച്ചന്‍ ഒളശ, ചാള്‍സ് പാലാത്ര, സൈബി അക്കര, ഈപ്പന്‍ മാത്യു, ജോണ്‍സണ്‍ കാഞ്ഞിരക്കാട്ട് തുടങ്ങിയവര്‍ നേതൃത്വം നല്‍കി. നേരത്തെ, കര്‍ദിനാള്‍ മാര്‍ ആന്‍റണി പടിയറയുടെ മാതൃ ഇടവകയായ മണിമല സെന്‍റ് ബേസില്‍ പള്ളിയില്‍നിന്നുമാരംഭിച്ച ഛായാചിത്ര പ്രയാണം മണിമല പള്ളി വികാരി ഫാ. മാത്യു താന്നിയത്ത് ഛായാചിത്രം, യുവദീപ്തി അതിരൂപത പ്രസിഡന്‍റ് അരുണ്‍ ടോമിനു കൈമാറി ഉദ്ഘാടനം ചെയ്തു. ധന്യന്‍ മാര്‍ തോമസ് കുര്യാളശേരിയുടെ മാതൃ ഇടവകയായ ചമ്പക്കുളം ഫൊറോനാ പള്ളിയില്‍ നിന്നാരംഭിച്ച ദീപശിഖ പ്രയാണം ചമ്പക്കുളം ബസിലിക്ക റെക്ടർ റവ.ഡോ. ജയിംസ് പാലയ്ക്കല്‍, മിഷന്‍ലീഗ് അതിരൂപത ഓര്‍ഗനൈസിംഗ് പ്രസിഡന്‍റ് ടിന്‍റോ സെബാസ്റ്റ്യന് ദീപശിഖ കൈമാറി ഉദ്ഘാടനം ചെയ്തു. 18 ഫൊറോനകള്‍, 250 ഇടവകകള്‍ ചങ്ങനാശേരി അതിരൂപതയില്‍ ചങ്ങനാശേരി, ആലപ്പുഴ, അമ്പൂരി, അതിരമ്പുഴ, ചമ്പക്കുളം, ചെങ്ങന്നൂര്‍, എടത്വ, കൊല്ലം-ആയൂര്‍, കോട്ടയം, കുടമാളൂര്‍, കുറുമ്പനാടം, മണിമല, മുഹമ്മ, നെടുംകുന്നം, പുളിങ്കുന്ന്, തിരുവനന്തപുരം, തൃക്കൊടിത്താനം, തുരുത്തി എന്നിങ്ങനെ 18 ഫൊറോനകളാണുള്ളത്. 250 ഇടവകകളും കുരിശുപള്ളികളുമുണ്ട്.

മിഷന്‍ലീഗ് രൂപത ഭാരവാഹികളെ തെരഞ്ഞെടുത്തു

കാഞ്ഞിരപ്പള്ളി: രൂപത ചെറുപുഷ്പ മിഷന്‍ ലീഗ് ഇലക്‌ഷന്‍ ക്യാമ്പ് കുട്ടിക്കാനം മരിയന്‍ കോളജില്‍ നടത്തി. രൂപതാധ്യക്ഷന്‍ മാര്‍ ജോസ് പുളിക്കല്‍ സമ്മേളനം ഉദ്ഘാടനം ചെയ്തു. തുടര്‍ന്ന് ചെറുപുഷ്പ മിഷന്‍ലീഗ് രൂപത ഡയറക്ടര്‍ ഫാ. തോമസ് വാളന്മനാല്‍, അസിസ്റ്റന്‍റ് ഡയറക്ടര്‍ ഫാ. ബോബി വേലിക്കകത്ത്, വൈസ് ഡയറക്ടര്‍ സിസ്റ്റർ റിറ്റ മരിയ എഫ്‌സിസി, ബ്രദര്‍ ഷിജിന്‍ കമ്പിയകത്ത് എന്നിവരുടെ നേതൃത്വത്തില്‍ രൂപത ഭാരവാഹികളെ തെരഞ്ഞെടുത്തു. അലക്‌സ്‌മോന്‍ ബിനോയ് മണ്ണാര്‍കുളം (എരുമേലി ഫൊറോന)-പ്രസിഡന്‍റ്, എല്‍സ നൈനാന്‍ പുത്തന്‍പുരയ്ക്കല്‍ (കുമളി ഫൊറോന)-വൈസ് പ്രസിഡന്‍റ്, ക്രിസണ്‍ സെബാസ്റ്റ്യന്‍ താന്നിക്കല്‍ (പൊന്‍കുന്നം ഫൊറോന)-സെക്രട്ടറി, അയോണാ മരിയ റെജി ചാറാടിയില്‍ (ഉപ്പുതറ ഫൊറോന)-ജോയിന്‍റ് സെക്രട്ടറി, ആല്‍ബര്‍ട്ട് ടോം നടുത്തൊട്ടിയില്‍ (മുണ്ടക്കയം ഫൊറോന), ജുവല്‍ മാത്യു തെക്കുംമുറിയില്‍ (അണക്കര ഫൊറോന)-സ്റ്റുഡന്‍റ് ഓര്‍ഗനൈസർമാർ എന്നിവരാണു ഭാരവാഹികൾ.

മാതാപിതാക്കളുടെ സമ്പത്ത് മക്കൾ: മാര്‍ ജോസ് പുളിക്കല്‍

കാഞ്ഞിരപ്പള്ളി: മാതാപിതാക്കളുടെ ഏറ്റവും വലിയ സമ്പത്ത് മക്കളാണെന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. രൂപത മാതൃവേദിയുടെ നേതൃത്വത്തില്‍ രണ്ടായിരാമാണ്ടിനുശേഷം വിവാഹിതരായ അഞ്ചും അതില്‍ കൂടുതല്‍ മക്കളുള്ള കുടുംബങ്ങളുടെ കൂട്ടായ്മയായ സ്പന്ദനം 2k25 കുട്ടിക്കാനം മരിയന്‍ കോളജില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. കുട്ടികള്‍ ദൈവത്തിൽ അടിയുറച്ച് വിശ്വസിച്ച്, ദൈവത്തിലാശ്രയിച്ച് തങ്ങളുടെ ജീവിതം ഒരനുഗ്രഹമായി മാറ്റണമെന്നും മാർ ജോസ് പുളിക്കൽ കൂട്ടിച്ചേർത്തു. രൂപതയിലെ 13 ഫൊറോനകളില്‍നിന്നുള്ള വലിയ കുടുംബത്തിലെ അംഗങ്ങള്‍ സ്പന്ദനം കൂട്ടായ്മയില്‍ സംബന്ധിച്ചു. രൂപത മാതൃവേദി ഡയറക്ടര്‍ ഫാ. മാത്യു ഓലിക്കല്‍ വിശുദ്ധ കുര്‍ബാന അര്‍പ്പിച്ചു. കുട്ടിക്കാനം മരിയന്‍ കോളജ് അഡ്മിനിസ്‌ട്രേറ്റര്‍ ഫാ. തോമസ് ഞള്ളിയില്‍ അധ്യക്ഷത വഹിച്ചു. രൂപത മാതൃവേദി പ്രസിഡന്‍റ് ജിജി പുളിയംകുന്നേല്‍, ബ്രദര്‍ കെവിന്‍ നീര്‍ണാകുന്നേല്‍ എന്നിവർ പ്രസംഗിച്ചു. കുട്ടികളുടെയും മുതിര്‍ന്നവരുടെയും കലാപരിപാടികള്‍ നടത്തി.

ആവേശമായി കിക്ക് ഡ്രഗ്സ് സന്ദേശയാത്ര

കോട്ടയം: കായികവകുപ്പ് മന്ത്രി വി. അബ്ദുറഹ്മാന്‍റെ നേതൃത്വത്തില്‍ നടക്കുന്ന കിക്ക് ഡ്രഗ്സ് സന്ദേശയാത്രയ്ക്ക് ജില്ലയില്‍ ഉജ്വല വരവേല്‍പ്പ്. ഇന്നലെ രാവിലെ ഏറ്റുമാനൂരില്‍ നല്‍കിയ സ്വീകരണത്തില്‍ കായികതാരങ്ങളും സ്പോര്‍ട്സ് കൗണ്‍സില്‍ ഭാരവാഹികളും ജനപ്രതിനിധികളുമടക്കം നൂറുകണക്കിനാളുകള്‍ പങ്കെടുത്തു. സംസ്ഥാന സര്‍ക്കാരിന്‍റെ ലഹരിവിരുദ്ധ കാമ്പയിന്‍റെ ഭാഗമായി ലഹരി പദാര്‍ഥങ്ങള്‍ ഉന്മൂലനം ചെയ്യുക, ലഹരി ഉത്പന്നങ്ങള്‍ ശ്രദ്ധയില്‍പ്പെട്ടാല്‍ പോലീസിനെ അറിയിക്കുക, ലഹരി ഉപയോഗിക്കാതിരിക്കുക എന്നീ സന്ദേശങ്ങളുമായി സ്പോര്‍ട്സ് ആണ് ലഹരി എന്ന മുദ്രാവാക്യമുയര്‍ത്തിയാണ് സന്ദേശയാത്ര നടത്തുന്നത്. സ്വീകരണത്തിന് മുന്നോടിയായി ചേര്‍പ്പുങ്കലില്‍ നിന്ന് ഏറ്റുമാനൂരിലേക്ക് 12 കിലോമീറ്റര്‍ മാരത്തണ്‍ നടത്തി. ചേര്‍പ്പുങ്കല്‍ മാര്‍സ്ലീവാ ഷോപ്പിംഗ് കോംപ്ലക്സിനു സമീപം ജോസ് കെ. മാണി എംപി മാരത്തണ്‍ ഫ്ളാഗ് ഓഫ് ചെയ്തു. ഏറ്റുമാനൂര്‍ ബൈപാസ് ജംഗ്ഷനില്‍ സമാപിച്ചു. ഇവിടെനിന്ന് സ്വീകരണ സമ്മേളന വേദിയായ സ്വകാര്യ ബസ് സ്റ്റാന്‍ഡിലേക്ക് വര്‍ണാഭമായ വാക്കത്തണ്‍ നടന്നു. മന്ത്രി വി.എന്‍. വാസവന്‍ ഫ്ളാഗ് ഓഫ് ചെയ്തു. മന്ത്രിമാര്‍ക്കൊപ്പം നഗരസഭാ ചെയര്‍പേഴ്സണ്‍ ലൗലി ജോര്‍ജ്, ജില്ലാ പഞ്ചായത്തംഗങ്ങളായ ഹൈമി ബോബി, കെ.വി. ബിന്ദു, സംസ്ഥാന സ്പോര്‍ട്സ് കൗണ്‍സില്‍ വൈസ് പ്രസിഡന്‍റ് എം.ആര്‍. രഞ്ജിത്ത്, സ്പോര്‍ട്സ് കൗണ്‍സില്‍ ജില്ലാ പ്രസിഡന്‍റ് ഡോ. ബൈജു വര്‍ഗീസ് ഗുരുക്കള്‍, സെക്രട്ടറി എല്‍. മായാദേവി, സംസ്ഥാന സ്പോര്‍ട്സ് കൗണ്‍സില്‍ സ്റ്റാന്‍ഡിംഗ് കമ്മിറ്റി അംഗങ്ങളായ കെ.സി. ലേഖ, ജെ.എസ്. ഗോപന്‍, എ. ശ്രീകുമാര്‍, വ്യാപാരി വ്യവസായി സമിതി സംസ്ഥാന സെക്രട്ടറി ഇ.എസ്. ബിജു, ഫാ. ജയിംസ് മുല്ലശേരി സിഎംഐ തുടങ്ങിയവരും വാക്കത്തണില്‍ പങ്കാളികളായി. തുടര്‍ന്നു നടന്ന യോഗത്തില്‍ ഇ.എസ്. ബിജു അധ്യക്ഷത വഹിച്ചു. രാവിലെ നടന്ന മാരത്തണില്‍ വിജയികളായവര്‍ക്ക് മന്ത്രി വി. അബ്ദുറഹ്മാന്‍ സമ്മാനങ്ങള്‍ വിതരണം ചെയ്തു. സ്പോര്‍ട്സ് കൗണ്‍സില്‍ സ്റ്റാന്‍ഡിംഗ് കമ്മിറ്റി അംഗവും ബോക്സിംഗ് ചാമ്പ്യനുമായ കെ.സി. ലേഖ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.

സയൻസ് സിറ്റി വികസനരംഗത്ത് വിസ്മയം തീർക്കും: മന്ത്രി വാസവൻ

കുറവിലങ്ങാട്: സയൻസ് സിറ്റി വികസനരംഗത്ത് വിസ്മയം തീർക്കുമെന്ന് മന്ത്രി വി.എൻ. വാസവൻ പറഞ്ഞു. സയൻസ് സിറ്റിയുടെ ആദ്യഘട്ടമായ സയൻസ് സെന്‍റർ ഉദ്ഘാടനത്തോടനുബന്ധിച്ചുള്ള സ്വാഗതസംഘം രൂപീകരണയോഗം ഉദ്ഘാടനം ചെയ്യുകയായിരുന്നു മന്ത്രി. വിദ്യാഭ്യാസരംഗത്ത് വലിയ വിപ്ലവത്തിന് സയൻസ് സിറ്റി അവസരം സമ്മാനിക്കുമെന്ന് അധ്യക്ഷത വഹിച്ച ജോസ് കെ. മാണി എംപി പറഞ്ഞു. മോൻസ് ജോസഫ് എംഎൽഎ, ഉഴവൂർ ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ ചിറ്റേത്ത്, സംസ്ഥാന സയൻസ് ആൻഡ് മ്യൂസിയം ഡയറക്ടർ ഡോ. പി. സുരേഷ്‌കുമാർ, അഡീഷണൽ ഡയറക്ടർ സുന്ദർലാൽ എന്നിവർ പ്രസംഗിച്ചു. ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ ചെയർമാനും സംസ്ഥാന സയൻസ് ആൻഡ് മ്യൂസിയം ഡയറക്ടർ ഡോ. പി. സുരേഷ്‌കുമാർ കൺവീനറുമായി 501 അംഗ സ്വാഗതസംഘം രൂപീകരിച്ചു. ജനപ്രതിനിധികളും വിവിധ രാഷ്ട്രീയപാർട്ടി പ്രതിനിധികളുമായ ജോൺസൺ കൊട്ടുകാപ്പിള്ളിൽ, മിനി മത്തായി, സജേഷ് ശശി, എൻ.ബി. സ്മിത, ജോസ് പുത്തൻകാലാ, ഡോ. സിന്ധുമോൾ ജേക്കബ്, നിർമല ജിമ്മി, അൽഫോൻസാ ജോസഫ്, ടി.ആർ. രഘുനാഥൻ, സണ്ണി തെക്കേടം, പ്രഫ. ലോപ്പസ് മാത്യു, പി.വി. സുനിൽ, കെ. ജയകൃഷ്ണൻ, തോമസ് ടി. കീപ്പുറം, സക്കറിയാസ് കുതിരവേലി, എ.എൻ. ബാലകൃഷ്ണൻ, ബേബി തൊണ്ടാംകുഴി തുടങ്ങിയവർ പങ്കെടുത്തു. 29ന് വൈകുന്നേരം അഞ്ചിനാണ് സയൻസ് സെന്‍ററിന്‍റെ പ്രവർത്തനങ്ങൾ മുഖ്യമന്ത്രി പിണറായി വിജയൻ ഉദ്ഘാടനം ചെയ്യുന്നത്. മൂവായിരത്തോളംപേർക്ക് ഇരിപ്പിടമൊരുക്കാൻ കഴിയുന്ന പന്തലാകും ഉദ്ഘാടനവേദിയായി പ്രയോജനപ്പെടുത്തുക.

ചൊവ്വൂര്‍ ജനതയ്ക്ക് ആശ്വാസമായി റോഡ്

തലനാട്: ബാലവാടി-പാറേക്കയം-ചൊവ്വൂര്‍ റോഡ് ടാറിംഗ് നടത്തി നവീകരിച്ചതോടെ ചൊവ്വൂർ ജനതയ്ക്ക് ആശ്വാസം. മാണി സി. കാപ്പന്‍ എംഎല്‍എയുടെ ആസ്തിവികസന ഫണ്ടില്‍നിന്നു 38.40 ലക്ഷം രൂപ ചെലവഴിച്ചു നിർമിച്ച റോഡിൽ മൂന്നു കിലോമീറ്റര്‍ സഞ്ചരിച്ചാല്‍ ചൊവ്വൂര്‍ നിവാസികള്‍ക്ക് സ്വന്തം പഞ്ചായത്ത് കേന്ദ്രത്തിലെത്താന്‍ കഴിയും. തലനാട് പഞ്ചായത്തില്‍പ്പെട്ട ചൊവ്വൂര്‍ നിവാസികള്‍ക്ക് പഞ്ചായത്ത് കേന്ദ്രത്തിലെത്തണമെങ്കില്‍ കിലോമീറ്ററുകള്‍ സഞ്ചരിക്കണമായിരുന്നു. മൂന്നിലവ് പഞ്ചായത്ത് കേന്ദ്രത്തിലെത്തി അവിടെനിന്ന് ഈരാറ്റുപേട്ട മുനിസിപ്പാലിറ്റിയിലെത്തി ബസ് കയറി തലനാട് എത്തേണ്ട ഗതികേടായിരുന്നു മുമ്പുണ്ടായിരുന്നത്. സമയലാഭത്തിനായി ഓട്ടോ പിടിച്ചാല്‍ റോഡ് മോശമായതു കൊണ്ട് ചൊവ്വൂര്‍ നിവാസികള്‍ക്ക് നല്ലൊരു തുക ചെലവാകുമായിരുന്നു. നാട്ടുകാര്‍ വര്‍ഷങ്ങള്‍ക്കു മുമ്പ് എട്ട് മീറ്റര്‍ വീതിയില്‍ വെട്ടിത്തുറന്ന് പഞ്ചായത്തിന് വിട്ടുകൊടുത്ത റോഡാണിത്. മാണി സി. കാപ്പന്‍ എംഎല്‍എ റോഡിന്‍റെ ഉദ്ഘാടനം നിര്‍വഹിച്ചു. ഈരാറ്റുപേട്ട ബ്ലോക്ക് പഞ്ചായത്ത് വൈസ് പ്രസിഡന്‍റ് കുര്യന്‍ നെല്ലുവേലി, തലനാട് പഞ്ചായത്ത് മെംബര്‍ രോഹിണിഭായി ഉണ്ണിക്കൃഷ്ണന്‍ തുടങ്ങിയവര്‍ പങ്കെടുത്തു.

ഉറുമ്പിക്കര ഈസ്റ്റ് കോളനി ഭാഗത്ത് വനംവകുപ്പ് കാമറ സ്ഥാപിച്ചു

കൊക്കയാർ: പുലിയുടെ സാന്നിധ്യം സ്ഥിരീകരിച്ചതോടെ ഉറുമ്പിക്കര ഈസ്റ്റ് കോളനി ഭാഗത്ത് വനം വകുപ്പ് കാമറ സ്ഥാപിച്ചു. കൊക്കയാർ പഞ്ചായത്തിൽപ്പെട്ട ഉറുമ്പിക്കര ഈസ്റ്റ് കോളനി ഭാഗത്ത് താമസിക്കുന്ന കിടുകല്ലിങ്കൽ ബിജുവിന്‍റെ വളർത്തുനായയെ കഴിഞ്ഞ ദിവസം അജ്ഞാത ജീവി കടിച്ച് കൊന്ന് പാതി ഭക്ഷിച്ച നിലയിൽ കണ്ടെത്തിയിരുന്നു. ശനിയാഴ്ച രാത്രി 11 ഓടെ വീട്ടുമുറ്റത്ത് നായയുടെ കരച്ചിൽ കേട്ടിരുന്നതായി വീട്ടുകാർ പറയുന്നു. പിന്നീട് വനാതിർത്തിയോട് ചേർന്ന് പാതി ഭക്ഷിച്ച നിലയിൽ നായയെ കണ്ടെത്തുകയായിരുന്നു. വനം വകുപ്പ് അധികാരികൾ സ്ഥലത്തെത്തി കാൽപ്പാടുകളടക്കം പരിശോധിച്ചതിൽ പുലിയുടെ ആക്രമണമാണെന്ന് സ്ഥിരീകരിച്ചിരുന്നു. ഇതിനു പിന്നാലെയാണ് പ്രദേശത്ത് വനംവകുപ്പ് കാമറ സ്ഥാപിച്ചത്. കാമറയിൽ പുലിയുടെ സാന്നിധ്യം കണ്ടെത്തിയാൽ വരും ദിവസങ്ങളിൽ പുലിയെ പിടികൂടുവാൻ ഇവിടെ കൂട് സ്ഥാപിക്കും. മുന്പ് ഉറുമ്പിക്കര വനാതിർത്തി മേഖലയിൽ വന്യമൃഗ ആക്രമണം ഉണ്ടായിട്ടില്ലെന്ന് നാട്ടുകാർ പറയുന്നു. കുറ്റിപ്ലാങ്ങാട് സർക്കാർ ഹയർ സെക്കൻഡറി സ്കൂളിന് മൂന്ന് കിലോമീറ്റർ മാത്രം ദൂരത്തിലാണ് പുലിയുടെ സാന്നിധ്യം സ്ഥിരീകരിച്ചിരിക്കുന്നത്. ചെറിയ വനമേഖലയായതുകൊണ്ടുതന്നെ വനം വകുപ്പിന്‍റെ സുരക്ഷാക്രമീകരണങ്ങൾ ഒന്നും ഇവിടെ സ്ഥാപിക്കാത്തതും ജനങ്ങളിൽ ആശങ്ക വർധിപ്പിക്കുന്നുണ്ട്. വിനോദസഞ്ചാര കേന്ദ്രമായ ഉറുമ്പിക്കര വാഗമൺ മലനിരകളുടെ താഴ്ഭാഗത്തുള്ള ഈ പ്രദേശത്ത് പുലിയുടെ സാന്നിധ്യം സ്ഥിരീകരിച്ചത് ടൂറിസം മേഖലയെയും പ്രതികൂലമായി ബാധിക്കാൻ സാധ്യത ഏറെയാണ്. കഴിഞ്ഞ ഫെബ്രുവരിയിൽ ഇളങ്കാട് മ്ലാക്കരയിൽ പുലിയെ ചത്ത നിലയിൽ കണ്ടെത്തിയിരുന്നു.

മദര്‍ മേരി ഫ്രാന്‍സിസ്‌ക ദ് ഷന്താളിന്‍റെ 53-ാം ചരമവാര്‍ഷികം 23ന്

അതിരമ്പുഴ: ആരാധന സന്യാസിനീ സമൂഹത്തിന്‍റെ സഹസ്ഥാപക മദര്‍ മേരി ഫ്രാന്‍സിസ്‌ക ദ് ഷന്താളിന്‍റെ 53-ാം ചരമവാര്‍ഷികം മൃതദേഹം കബറടക്കിയിരിക്കുന്ന ആരാധനാ മഠം ചാപ്പലിലും അതിരമ്പുഴ സെന്‍റ് മേരീസ് ഫൊറോന പള്ളിയിലും 23ന് ആചരിക്കും. രാവിലെ 10.30നു ആഘോഷമായ വിശുദ്ധ കുര്‍ബാനയ്ക്ക് ഇടുക്കി ബിഷപ് മാര്‍ ജോണ്‍ നെല്ലിക്കുന്നേല്‍ മുഖ്യകാര്‍മികത്വം വഹിക്കും. വികാരി ജനറാള്‍ മോണ്‍. സ്‌കറിയ കന്യാകോണില്‍, പോസ്റ്റുലേറ്റര്‍ റവ.ഡോ. ജോസഫ് കൊല്ലാറ, റവ.ഡോ. ടോം പുത്തന്‍കളം, ഫാ. തോമസ് പ്ലാപ്പറമ്പില്‍, ഫാ. ജോര്‍ജ് വല്ലയില്‍, ഫാ. ജോര്‍ജ് വള്ളിയാംതടം, ഫാ. ജോസഫ് ചാലിച്ചിറ തുടങ്ങിയവര്‍ സഹകാര്‍മികത്വം വഹിക്കും. തുടര്‍ന്നു നേര്‍ച്ചസദ്യ നടക്കും. ഇന്നുമുതല്‍ 22വരെ മഠം ചാപ്പലില്‍ ആരാധന നടക്കും. സുപ്പീരിയര്‍ ജനറല്‍ മദര്‍ റോസിലി ഒഴുകയില്‍, ഫൊറോന വികാരി ഫാ. ജോസഫ് മുണ്ടകത്തില്‍, ഫാ. ജോസഫ് കൊല്ലാറ, വൈസ് പോസ്റ്റുലേറ്റര്‍മാരായ സിസ്റ്റര്‍ തെക്ല എസ്എബിഎസ്, സിസ്റ്റര്‍ എത്സാ പൈകട എസ്എബിഎസ് തുടങ്ങിയവര്‍ നേതൃത്വം നല്‍കും.

അൽഫോൻസ കോളജും അലയൻസ് ലേണിംഗ് അക്കാദമിയും ധാരണാപത്രം ഒപ്പുവച്ചു

പാലാ: വിദ്യാര്‍ഥിനികൾക്ക് റെഗുലര്‍ ഡിഗ്രിയോടൊപ്പം കൊമേഴ്സിലെ ഗ്ലോബലി അക്രഡിറ്റഡായിട്ടുള്ള പ്രഫഷണല്‍ സര്‍ട്ടിഫിക്കേഷൻ ബികോം വിത്ത് എസിസിഎ കോച്ചിംഗ് പരിശീലനത്തിനായുള്ള പദ്ധതിക്ക് പാലാ അല്‍ഫോന്‍സ കോളജും എസിസിഎ, ഐഎംഎ അലയന്‍സ് ലേണിംഗ് എന്നീ പ്രഫഷണല്‍ ബോഡികളുടെ അംഗീകൃത കോച്ചിംഗ് സ്ഥാപനമായ അലയന്‍സ് ലേണിംഗ് അക്കാദമിയും ധാരണാപത്രം ഒപ്പുവച്ചു. കോളജില്‍ നടന്ന ചടങ്ങില്‍ പ്രിന്‍സിപ്പല്‍ സിസ്റ്റര്‍ ഡോ. മിനിമോള്‍ മാത്യുവിന് അലയന്‍സ് ലേണിംഗ് അക്കാദമി ഡയറക്ടര്‍ അക്ഷയ് ലാല്‍ ധാരണാപത്രം കൈമാറി. വൈസ് പ്രിന്‍സിപ്പല്‍മാരായ സിസ്റ്റര്‍ ഡോ. മഞ്ജു എലിസബത്ത് കുരുവിള, മഞ്ജു ജോസ്, ബര്‍സാര്‍ ഫാ. കുര്യാക്കോസ് വെള്ളച്ചാലില്‍, റവ. ഡോ. ജോബിന്‍ സെബാസ്റ്റ്യന്‍, കൊമേഴ്‌സ് വിഭാഗം മേധാവി പൊന്നു കെ. അല്‍ഫോൻസ്, കോഴ്‌സ് കോ-ഓര്‍ഡിനേറ്റര്‍ ഷീനാ സെബാസ്റ്റ്യന്‍ തുടങ്ങിയവര്‍ പ്രസംഗിച്ചു.

ജനറൽ ആശുപത്രി കാത്ത് ലാബിലെ ജീവനക്കാർ സമരത്തിലേക്ക്

കാഞ്ഞിരപ്പള്ളി: ശന്പളം ലഭിക്കാത്തതിനെത്തുടർന്ന് ജനറൽ ആശുപത്രി കാത്ത് ലാബിലെ ജീവനക്കാർ സമരത്തിലേക്ക്. ശമ്പളം വൈകുന്നതിനെതിരേ ജീവനക്കാർ അധികൃതർക്ക് പരാതി നൽകി. ശമ്പളം നിശ്ചിത ദിവസം ലഭ്യമാക്കണമെന്നും ശമ്പള വര്‍ധനവ് വരുത്തണമെന്നും ആവശ്യപ്പെട്ടാണ് കാത്ത് ലാബിലെ പതിമൂന്ന് ജീവനക്കാര്‍ വാഴൂര്‍ ബ്ലോക്ക് പഞ്ചായത്ത് പ്രസിഡന്‍റ്, സെക്രട്ടറി, ആശുപത്രി സൂപ്രണ്ട് എന്നിവര്‍ക്ക് പരാതി നല്‍കിയിരിക്കുന്നത്. എല്ലാ മാസങ്ങളിലും ശമ്പളം ലഭിക്കുന്നത് പത്താംതീയതിക്ക് ശേഷമാണ്. എന്നാല്‍, ഇത്തവണ ഇതുവരെയായിട്ടും ശമ്പളം ലഭ്യമായിട്ടില്ല. ശമ്പളം വര്‍ധിപ്പിക്കാന്‍ നടപടി വേണമെന്നും എല്ലാ മാസവും അഞ്ചിനു മുന്പ് ശമ്പളം നല്‍കണമെന്നും യാത്രാച്ചെലവിനുള്ള പണം പോലുമില്ലാത്തതിനാല്‍ ശമ്പളം ലഭിക്കുന്നതുവരെ ജോലിയില്‍നിന്നു വിട്ടുനില്‍ക്കേണ്ട സ്ഥിതിയാണെന്നും ജീവനക്കാർ പറയുന്നു. ജനറൽ ആശുപത്രിയുടെ വികസനത്തിന് മുഖ്യ പങ്ക് വഹിച്ച കാത്ത് ലാബിലെ ജീവനക്കാരാണ് ഇപ്പോൾ ശന്പളമില്ലാത്തതിന്‍റെ പേരിൽ ദുരിതമനുഭവിക്കുന്നത്. ജനറൽ ആശുപത്രിയിൽ കാത്ത് ലാബ് സജ്ജീകരിച്ചതോടെ സാധാരണക്കാരായ നിരവധി ആളുകളായിരുന്നു ആശുപത്രിയെ ആശ്രയിച്ചിരുന്നത്. ഇതുവരെ കാത്ത് ലാബില്‍ ആയിരം ആന്‍ജിയോപ്ലാസ്റ്റികളും 2500 ആന്‍ജിയോഗ്രാം പരിശോധനകളും നടത്തി. നിരവധി രോഗികള്‍ക്ക് ആശ്വാസകരമാകുന്ന കാത്ത് ലാബിലെ ജീവനക്കാര്‍ പണിമുടക്കിയാല്‍ പ്രവര്‍ത്തനത്തെ സാരമായി ബാധിക്കും. ജീവനക്കാര്‍ക്ക് എത്രയും വേഗം ശമ്പളം ലഭ്യമാക്കുന്നതിന് നടപടി സ്വീകരിക്കുമെന്ന് ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി അറിയിച്ചു.

ഫ്രാൻസിസ്കൻ സഭാംഗങ്ങൾ സഭയെ നവീകരിക്കേണ്ടവർ: മാർ പുളിക്കൽ

കാഞ്ഞിരപ്പള്ളി: സഭയ്ക്കുള്ളിൽ നിന്നുകൊണ്ട് സഭയെ നവീകരിക്കാൻ കടപ്പെട്ടവരാണ് ഫ്രാൻസിസ്കൻ അല്മായ സഭാംഗങ്ങളെന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. കാഞ്ഞിരപ്പള്ളി രൂപത ഫ്രാൻസിസ്കൻ അല്മായസഭ വാർഷികം പാസ്റ്ററൽ സെന്‍റർ ഓഡിറ്റോറിയത്തിൽ ഉദ്ഘാടനം ചെയ്ത് സന്ദേശം നൽകുകയായിരുന്നു ബിഷപ്. വിശുദ്ധ ഫ്രാൻസിസ് അസീസിയുടെ ജീവിതമാതൃക ഉൾക്കൊണ്ട് അല്മായ സഭാംഗങ്ങൾ പ്രാർഥനകൊണ്ടും ഉപവി പ്രവർത്തനങ്ങളാലും സഭയെ വിശുദ്ധികരിക്കാൻ മുന്നിട്ടിറങ്ങണമെന്നും മാർ ജോസ് പുളിക്കൽ കൂട്ടിച്ചേർത്തു. രൂപത പ്രസിഡന്‍റ് ജോസ് തോമസ് വെട്ടത്ത് അധ്യക്ഷത വഹിച്ചു. വികാരി ജനറാൾ റവ.ഡോ. ജോസഫ് വെള്ളമറ്റം അനുഗ്രഹപ്രഭാഷണം നടത്തി. വിവാഹ സഹായനിധി വിതരണം രൂപത ചാൻസലർ ഫാ. മാത്യു ശൗര്യാംകുഴി നിർവഹിച്ചു. രൂപത ഡയറക്ടർ ഫാ. റോജോ പുരയിടത്തിൽ, തോമസ് ചാക്കോ മണിമലക്കരോട്ട്, ജോസ് കിഴക്കേത്തലയ്ക്കൽ, ബേബി ജോസഫ് പാണ്ടിയപ്പള്ളി, ജോസ് ടി. തോമസ് തയ്യിൽ, ജോജോ കിഴക്കേത്തലക്കൽ, സിസ്റ്റർ മോളി ജോസ് വാഴപ്പനാടി തുടങ്ങിയവർ പ്രസംഗിച്ചു.

എവറസ്റ്റ് തങ്കച്ചൻ പോരാട്ടം തുടരുന്നു, ലഹരിക്കെതിരേ

ചങ്ങനാശേരി: ഉണരൂ... സമൂഹമേ ഉണരൂ...ലഹരിക്കെതിരേ പോരാടൂ... ലഹരി ഉപയോഗം മഹാവിപത്ത്, ലഹരി നമുക്ക് വേണ്ടേ... വേണ്ട. ഇത് ചങ്ങനാശേരി കെഎസ്ആര്‍ടിസി ബസ് സ്റ്റാന്‍ഡിനോടു ചേര്‍ന്നുള്ള ഓട്ടോസ്റ്റാന്‍ഡിലെ എവറസ്റ്റ് എന്ന പേരിലുള്ള ഓട്ടോയിലെ പോസ്റ്ററാണ്. മറ്റ് ഓട്ടോകളില്‍ പല പരസ്യങ്ങളും കാണാമെങ്കിലും എവറസ്റ്റ് എന്ന ഓട്ടോയിലെ ലഹരിക്കെതിരേയുള്ള പോസ്റ്റര്‍ ഏറെ ശ്രദ്ധിക്കുന്നതാണ്. എവറസ്റ്റ് തങ്കച്ചന്‍ എന്നറിയപ്പെടുന്ന ചങ്ങനാശേരി മാര്‍ക്കറ്റ് സ്വദേശി കൂലിപ്പുരയ്ക്കല്‍ തോമസ് ആന്‍റണി മദ്യത്തിനും ലഹരിക്കുമെതിരേ പ്രചാരണം തുടരുകയാണ്. ഉപജീവനത്തിനായി തങ്കച്ചന്‍ ഓട്ടോ ഓടിക്കാന്‍ തുടങ്ങിയിട്ട് അരനൂറ്റാണ്ടോട് അടുക്കുകയാണ്. കൂട്ടുകാരുമൊപ്പം മദ്യപിച്ച് കറങ്ങിനടന്ന കാലമുണ്ടായിരുന്നു. അതൊക്കെ പഴങ്കഥ. ഇപ്പോള്‍ തങ്കച്ചന്‍റെ ജീവിതം വേറിട്ട കഥയാണ്. സര്‍ക്കാരും സന്നദ്ധസംഘടനകളും ലഹരിക്കെതിരേ പ്രചാരണം കര്‍ക്കശമാക്കുന്നതിനും മുമ്പേ എവറസ്റ്റ് തങ്കച്ചന്‍റെ തന്‍റെ എവറസ്റ്റ് എന്ന പേരുള്ള ഓട്ടോയില്‍ പ്രചാരണം തുടങ്ങിയിരുന്നു. 2020ല്‍ ഓട്ടോയ്ക്കകത്തായിരുന്നു പോസ്റ്റര്‍ പതിപ്പിച്ചിരുന്നത്. എന്നാല്‍ രണ്ടുവര്‍ഷക്കാലമായി പോസ്റ്റര്‍ എല്ലാവര്‍ക്കും കാണത്തക്കവിധം ഓട്ടോയുടെ വശത്താണ് പ്രദര്‍ശിപ്പിച്ചിരിക്കുന്നത്. തങ്കച്ചന്‍ പറയുന്ന,ു, അണ്ണാറക്കണ്ണനും തന്നാലായത്. 2000-2005 കാലഘട്ടത്തില്‍ ചങ്ങനാശേരി മുനിസിപ്പല്‍ കൗണ്‍സിലറായിരുന്ന എവറസ്റ്റ് തങ്കച്ചന്‍ കാക്കിയണിഞ്ഞ് കൗണ്‍സില്‍ ഹാളിലെത്തിയത് വാര്‍ത്തയായിരുന്നു. നേരത്തെ മാര്‍ക്കറ്റ് ഭാഗത്ത് നിലത്തെഴുത്ത് കളരി നടത്തിയിരുന്ന തങ്കച്ചന്‍ ഇപ്പോഴും ആശാനെന്നാണ് അറിയപ്പെടുന്നത്. കുട്ടികളെ ആദ്യാക്ഷരം എഴുതിപ്പിക്കാന്‍ ഇപ്പോഴും മാതാപിതാക്കള്‍ തങ്കച്ചന്‍റെ അടുത്ത് എത്താറുണ്ട്.

തൊഴിലുറപ്പ് പദ്ധതിയില്‍ ജലാശയങ്ങളിലെ കുളവാഴ നീക്കാനാകില്ലെന്ന് കേന്ദ്രസര്‍ക്കാര്‍

ചങ്ങനാശേരി: തൊഴിലുറപ്പ് പദ്ധതിയില്‍ ജലാശയങ്ങളിലെ കുളവാഴ നീക്കം ചെയ്യാനാവില്ലെന്ന് കേന്ദ്രസര്‍ക്കാര്‍. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില്‍ (എംജിഎന്‍ആര്‍ഇജിഎ) കേരളത്തിലെ കുട്ടനാട്, അപ്പര്‍ കുട്ടനാട് മേഖലയിലെ ജലാശയങ്ങളിലെ കുളവാഴ നീക്കം ചെയ്യുന്നത് അനുവദനീയമായ പ്രവര്‍ത്തനമായി ഉള്‍പ്പെടുത്തണമെന്ന് ആവശ്യപ്പെട്ട് കൊടിക്കുന്നില്‍ സുരേഷ് എംപി കേന്ദ്ര ഗ്രാമവികസന മന്ത്രി ശിവരാജ് സിംഗ് ചൗഹാന് നല്‍കിയ കത്തിനു മറുപടിയായാണ് ഇത് ഉള്‍പ്പെടുത്താന്‍ കഴിയില്ലായെന്ന് മന്ത്രി മറുപടി നല്‍കിയത്. നിലവിലുള്ള മാര്‍ഗനിര്‍ദേശങ്ങള്‍ പ്രകാരം കുളവാഴ നീക്കം ചെയ്യുന്നത് എംജിഎന്‍ആര്‍ഇജിഎയുടെ കീഴില്‍ അനുവദനീയമല്ലെന്നും 2005ലെ എംജിഎന്‍ആര്‍ഇജിഎ നിയമത്തിലെ ഷെഡ്യൂള്‍ 1, ഖണ്ഡിക 4(3) പ്രകാരം, പുല്ല്, കല്ലുകള്‍ നീക്കംചെയ്യല്‍, കാര്‍ഷിക പ്രവര്‍ത്തനങ്ങള്‍ എന്നിവ പോലുള്ള അളക്കാന്‍ കഴിയാത്തതും ആവര്‍ത്തിച്ചുള്ളതുമായ പ്രവൃത്തികള്‍ ഏറ്റെടുക്കാന്‍ പാടില്ലെന്നാണ് നിബന്ധന. കുട്ടനാടിനെ സഹായിക്കാന്‍ കുളവാഴനീക്കൽ അനിവാര്യം: കൊടിക്കുന്നില്‍ സുരേഷ് കുട്ടനാട് മേഖലയില്‍ മണല്‍ച്ചീര ഗുരുതരമായ പാരിസ്ഥിതികവുമായ വെല്ലുവിളിയായി മാറിയിരിക്കുന്നു. ഇത് കര്‍ഷകരുടെയും മത്സ്യത്തൊഴിലാളികളുടെയും ഉപജീവനമാര്‍ഗത്തെ ബാധിക്കുന്നു. കൂടാതെ ഉള്‍നാടന്‍ ജലഗതാഗതം, കൃഷി, പൊതുജനാരോഗ്യം എന്നിവയെ സാരമായി ബാധിച്ചിട്ടുണ്ട്. എംജിഎന്‍ആര്‍ഇജിഎ പ്രകാരം ഈ ഭീഷണി നീക്കം ചെയ്യുന്നതിന് തൊഴിലവസരങ്ങള്‍ നിഷേധിക്കുന്നത് ഗ്രാമീണ സമൂഹങ്ങളോടുള്ള കടുത്ത അനീതിയാണ്. മാര്‍ഗനിര്‍ദേശങ്ങള്‍ പുനഃപരിശോധിക്കാനും കുളവാഴ നീക്കം പോലുള്ള പരിസ്ഥിതി പുനഃസ്ഥാപന പ്രവര്‍ത്തനങ്ങള്‍ ഉള്‍പ്പെടുത്താന്‍ അനുവദിക്കുന്ന ഒരു മേഖലാ സംവേദന ക്ഷമതയുള്ള സമീപനം സ്വീകരിക്കാനും എംപി കേന്ദ്ര സര്‍ക്കാരിനോട് ആവശ്യപ്പെട്ടു. കുളവാഴ നീക്കം ആയിരക്കണക്കിന് ഗ്രാമീണ തൊഴിലാളികള്‍ക്ക് സുസ്ഥിര തൊഴില്‍ നല്‍കാനും കുട്ടനാട്ടിലെ ദുര്‍ബലമായ ആവാസവ്യവസ്ഥയെ സംരക്ഷിക്കാനും സഹായിക്കുമെന്ന് അദ്ദേഹം പറഞ്ഞു.

മണ്ണും കല്ലും കയറ്റി മത്സരപ്പാച്ചില്‍ : ടിപ്പറുകള്‍ക്കും ടോറസുകള്‍ക്കും കടിഞ്ഞാണിടണം

ചങ്ങനാശേരി: മണ്ണും കല്ലും കയറ്റി ടിപ്പറുകളും ടോറസുകളും മത്സരപ്പാച്ചില്‍ നടത്തുമ്പോള്‍ അധികാരികള്‍ വേണ്ടത്ര ശ്രദ്ധ പുലര്‍ത്തുന്നില്ലെന്ന് ആക്ഷേപം. ചങ്ങനാശേരി-വാഴൂര്‍, ചങ്ങനാശേരി ബൈപാസ്, മാമ്മൂട്-വെങ്കോട്ട-കുന്നുംപുറം റോഡുകളിലാണ് ടിപ്പറുകളും ടോറസുകളും അമിതവേഗത്തില്‍ സഞ്ചരിക്കുന്നത്. ഈ വാഹനങ്ങളുടെ അമിതവേഗത്തിലുള്ള സഞ്ചാരം ഇരുചക്രവാഹനങ്ങൾക്കും കാല്‍നട യാത്രക്കാര്‍ക്കും ഏറെ അപകടഭീഷണിയാണ്. കഴിഞ്ഞദിവസം ബൈപാസ് റോഡില്‍ എസ്എച്ച് ജംഗ്ഷനില്‍ ഭര്‍ത്താവിനൊപ്പം സ്‌കൂട്ടറില്‍ സഞ്ചരിച്ച വീട്ടമ്മ ടോറസിനടിയില്‍പ്പെട്ടു മരിച്ച സംഭവം ഉണ്ടായി. ചില സ്ഥലങ്ങള്‍ കേന്ദ്രീകരിച്ച് പോലീസ് വാഹന പരിശോധന നടത്താറുണ്ടെങ്കിലും മറ്റു സ്ഥലങ്ങളിലെത്തുമ്പോള്‍ ഇവര്‍ അമിതവേഗത്തില്‍ സഞ്ചരിക്കുകയാണ് ചെയ്യുന്നത്. ടിപ്പറുകളുടെയും ടോറസുകളുടെയും അമിതവേഗം നിയന്ത്രിച്ച് ജനങ്ങള്‍ക്ക് സുരക്ഷയൊരുക്കാന്‍ അധികൃതര്‍ ഉണര്‍ന്നു പ്രവര്‍ത്തിക്കണമെന്ന ആവശ്യം ശക്തമാണ്.

ചങ്ങനാശേരി അതിരൂപതയ്ക്ക് നാളെ 139-ാം പിറന്നാള്‍

ബെന്നി ചിറയില്‍ ചങ്ങനാശേരി: 1887 മേയ് 20ന് ജന്മംകൊണ്ട ചങ്ങനാശേരി അതിരൂപതയ്ക്ക് നാളെ 139-ാം പിറന്നാള്‍. നാളെ രാവിലെ ഒമ്പതിന് ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയിലാണ് അതിരൂപതാദിന സമ്മേളനം നടക്കുന്നത്. ലെയോ പതിമൂന്നാമന്‍ മാര്‍പാപ്പ "ക്വോദ് യാം പ്രദം' എന്ന തിരുവെഴുത്തിലൂടെയാണ് കോട്ടയം വികാരിയാത്തായി ചങ്ങനാശേരി അതിരൂപതയ്ക്കു ജന്മം നല്‍കിയത്. റവ.ഡോ. ചാള്‍സ് ലവീഞ്ഞായിരുന്നു പ്രഥമ വികാരി അപ്പസ്‌തോലിക്ക. 1891 മാര്‍ച്ച് 21ന് ആസ്ഥാനം ചങ്ങനാശേരിയിലേക്കു മാറ്റി. 1896 ജൂലൈ 28ന് കോട്ടയം, തൃശൂര്‍ വികാരിയാത്തുകള്‍ പുനര്‍ക്രമീകരിച്ച് ചങ്ങനാശേരി, തൃശൂര്‍, എറണാകുളം വികാരിയാത്തുകള്‍ ജന്മംകൊണ്ടു. മാര്‍ മാത്യു മാക്കീലിനെ അപ്പസ്‌തോലിക്കയായി നിയമിച്ചു. 1911 ഓഗസ്റ്റ് 28ന് ക്‌നാനായ സമുദായാംഗങ്ങള്‍ക്കായി കോട്ടയം വികാരിയാത്ത് രൂപംകൊണ്ടു. മാര്‍ മാത്യു മാക്കീലിനെ കോട്ടയം വികാരി അപ്പസ്‌തോലിക്കയാക്കി. 1911 നവംബര്‍ 15ന് ചങ്ങനാശേരിക്ക് സ്വന്തമായി നാട്ടുമെത്രാനായി മാര്‍ തോമസ് കുര്യാളശേരി നിയമിതനായി. 1923 ഡിസംബര്‍ 21ന് സീറോമലബാര്‍ ഹയരാര്‍ക്കി സ്ഥാപിച്ചു. എറണാകുളം അതിരൂപതയ്ക്കു കീഴില്‍ ചങ്ങനാശേരി, തൃശൂര്‍, കോട്ടയം സാമന്ത രൂപതകളായി. 1927 ഒക്‌ടോബര്‍ 29ന് മാര്‍ ജയിംസ് കാളാശേരി ചങ്ങനാശേരിയുടെ മെത്രാനായി നിയമിക്കപ്പെട്ടു. 1950 ജൂലൈ 25ന് ചങ്ങനാശേരി വിഭജിച്ച് പാലാ രൂപത സ്ഥാപിച്ചു. മാര്‍ മാത്യു കാവുകാട്ട് ചങ്ങനാശേരി ബിഷപ്പും മാര്‍ സെബാസ്റ്റ്യന്‍ വയലില്‍ പാലാ ബിഷപ്പുമായി നിയമിതരായി. 1955ല്‍ ചങ്ങനാശേരി രൂപതയുടെ അതിര്‍ത്തി കന്യാകുമാരി വരെ ദീർഘിപ്പിച്ചു. 1956 ല്‍ അതിരൂപത 1956 ഓഗസ്റ്റ് 22ന് ചങ്ങനാശേരി രൂപത അതിരൂപതയായി ഉയര്‍ത്തപ്പെട്ടു. കോട്ടയം, പാലാ സാമന്ത രൂപതകളായി. മാര്‍ മാത്യു കാവുകാട്ടിനെ പ്രഥമ ആര്‍ച്ച്ബിഷപ്പായി പ്രഖ്യാപിച്ചു. 1970 ജൂണ്‍ 14ന് മാര്‍ ആന്‍റണി പടിയറ ആര്‍ച്ച്ബിഷപ്പായി. 1972 ജനുവരി 29ന് മാര്‍ ജോസഫ് പവ്വത്തില്‍ സഹായമെത്രാനായി നിയമിതനായി. 1977ല്‍ ചങ്ങനാശേരി വിഭജിച്ച് കാഞ്ഞിരപ്പള്ളി രൂപത സ്ഥാപിച്ചപ്പോള്‍ പ്രഥമ ബിഷപ്പായി മാര്‍ ജോസഫ് പവ്വത്തിലിനെ നിയമിച്ചു. 1985 നവംബര്‍ 16ന് മാര്‍ ജോസഫ് പവ്വത്തില്‍ ചങ്ങനാശേരിയുടെ ആര്‍ച്ച്ബിഷപ്പായി. 1996 ഡിസംബര്‍ 18ന് ചങ്ങനാശേരിയെ വീണ്ടും വിഭജിച്ച് തക്കല രൂപതയ്ക്കു രൂപം കൊടുത്തു. മാര്‍ ജോര്‍ജ് ആലഞ്ചേരി പ്രഥമ മെത്രാനായി. 2002 മേയ് 20ന് മാര്‍ ജോസഫ് പെരുന്തോട്ടം അതിരൂപതയുടെ സഹായമെത്രാനായും 2007 മാര്‍ച്ച് 19ന് മാര്‍ പവ്വത്തില്‍ സ്ഥാനമൊഴിഞ്ഞപ്പോള്‍ മാര്‍ പെരുന്തോട്ടം ആര്‍ച്ച്ബിഷപ്പായും ഉയര്‍ത്തപ്പെട്ടു. 2017 ഏപ്രില്‍ 23ന് അതിരൂപത സഹായമെത്രാനായി നിയമിതനായ മാര്‍ തോമസ് തറയില്‍ 2024 ഒക്‌ടോബര്‍ 31ന് അതിരൂപതയുടെ മെത്രാപ്പോലീത്തയായി ഉയർത്തപ്പെട്ടു. അതിരൂപതാംഗങ്ങളായ അല്‍ ഫോന്‍സാമ്മ 2008ല ും ചാവറ കുര്യാക്കോസ് ഏലിയാസച്ചന്‍ 2014ലും വിശുദ്ധരാക്കപ്പെട്ടത് ചങ്ങനാശേരി അ തിരൂപതയ്ക്കെന്നും അഭിമാനമാണ്. തീഷ്ണമായ വിശ്വാസ പാരമ്പര്യങ്ങളുടേയും ജീവകാരുണ്യ പ്രവര്‍ത്തനങ്ങളുടേയും ദൈവവിളിയുടേയും വിളനിലമായി പ്രശോഭിക്കുന്ന ചങ്ങനാശേരി അതിരൂപത സീറോമലബാര്‍ സഭയ്ക്ക് എന്നും മാതൃകയാണ്. ഛായാചിത്ര, ദീപശിഖ പ്രയാണങ്ങള്‍ ഇന്ന് ചങ്ങനാശേരി: 139-ാമത് ചങ്ങനാശേരി അതിരൂപതാ ദിനാഘോഷങ്ങളുടെ മുന്നോടിയായി ഇന്നലെ ഇടവകതല ആഘോഷം നടന്നു. വിവിധ ഇടവകകളില്‍ വിശുദ്ധകുര്‍ബാന, അതിരൂപതാദിന പ്രതിജ്ഞ, അതിരൂപതാദിന സന്ദേശം, പതാക ഉയര്‍ത്തല്‍ എന്നിവ നടത്തി. സെന്‍റ് മേരീസ് മെത്രാപ്പോലീത്തന്‍പള്ളിയില്‍ വികാരി ഫാ. ജോസഫ് വാണിയപ്പുരയ്ക്കല്‍ പതാക ഉയര്‍ത്തി. ഇന്ന് ഉച്ചയ്ക്ക് ഒന്നിന് കര്‍ദിനാള്‍ മാര്‍ ആന്‍റണി പടിയറയുടെ മാതൃ ഇടവകയായ മണിമല സെന്‍റ് ബേസില്‍ പള്ളിയില്‍നിന്ന് ഛായാചിത്രപ്രയാണം ആരംഭിക്കും. മണിമല ഫൊറോനാ വികാരി ഫാ. മാത്യു താന്നിയത്ത് ഛായാചിത്രം യുവദീപ്തി അതിരൂപതാ പ്രസിഡന്‍റ് അരുണ്‍ ടോമിനു കൈമാറും. ഉച്ചകഴിഞ്ഞു രണ്ടിന് ധന്യന്‍ മാര്‍ തോമസ് കുര്യാളശേരിയുടെ മാതൃ ഇടവകയായ ചമ്പക്കുളം ബസിലിക്കയില്‍നിന്ന് ദീപശിഖ പ്രയാണം ആരംഭിക്കും. ബസിലിക്ക റെക്‌ടർ റവ.ഡോ. ജയിംസ് പാലയ്ക്കല്‍ മിഷന്‍ലീഗ് അതിരൂപത ഓര്‍ഗനൈസിംഗ് പ്രസിഡന്‍റ് ടിന്‍റോ സെബാസ്റ്റ്യന് ദീപശിഖ കൈമാറും. ഛായാചിത്ര-ദീപശിഖ പ്രയാണങ്ങള്‍ വിവിധ ഇടവകകളിലൂടെ കടന്ന് അരമനപ്പടിയില്‍ സംഗമിക്കും. വൈകുന്നേരം അഞ്ചിന് ഛായാചിത്ര-ദീപശിഖ പ്രയാണങ്ങള്‍ക്ക് ചങ്ങനാശേരി മെത്രാപ്പോലീത്തന്‍ പള്ളിയില്‍ സ്വീകരണം നല്‍കും. ആര്‍ച്ച്ബിഷപ് മാര്‍ തോമസ് തറയില്‍ ഛായാചിത്രവും ദീപശിഖയും ഏറ്റുവാങ്ങി ചങ്ങനാശേരി ഫൊറോന യുവദീപ്തി പ്രസിഡന്‍റ് ഈപ്പന്‍ മാത്യു, മിഷന്‍ലീഗ് ചങ്ങനാശേരി മേഖലാ പ്രസിഡന്‍റ് ഹയ ടോജി എന്നിവര്‍ക്ക് കൈമാറി സന്ദേശം നല്‍കും. മോണ്‍. ആന്‍റണി എത്തക്കാട്ട് റംശ നയിക്കും. മുന്നൂറ് ഇടവകകൾ;‍ മൂവായിരം പ്രതിനിധികള്‍ നാളെ രാവിലെ ഒമ്പതിന് ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയങ്കണത്തിലെ കര്‍ദിനാള്‍ മാര്‍ ആന്‍റണി പടിയറ നഗറിലാണ് അതിരൂപതാദിന സമ്മേളനം നടക്കുന്നത്. കേരളത്തിലെ അഞ്ചു ജില്ലകളിലായി വ്യാപിച്ചുകിടക്കുന്ന മുന്നൂറോളം ഇടവകകളിലെ വിശ്വാസികളുടെ പ്രതിനിധികളും സന്യസ്തപ്രതിനിധികളും അതിരൂപതയില്‍ സേവനം ചെയ്യുന്ന വൈദികരും സമ്മേളനത്തില്‍ പങ്കെടുക്കും. ആര്‍ച്ച്ബിഷപ് മാര്‍ തോമസ് തറയിലിന്‍റെ അധ്യക്ഷതയില്‍ ചേരുന്ന പൊതുസമ്മേളനം ഇടുക്കി ബിഷപ് മാര്‍ ജോണ്‍ നെല്ലിക്കുന്നേല്‍ ഉദ്ഘാടനം ചെയ്യും. ബാംഗ്ലൂര്‍ ക്രൈസ്റ്റ് യൂണിവേഴ്സിറ്റി വൈസ് ചാന്‍സിലര്‍ റവ. ഡോ. ജോസ് ചേന്നാട്ടുശേരി സിഎംഐ മുഖ്യപ്രഭാഷണവും ആര്‍ച്ച്ബിഷപ് മാര്‍ ജോസഫ് പെരുന്തോട്ടം അനുഗ്രഹപ്രഭാഷണവും നടത്തും. അവാര്‍ഡുദാനവും പ്രഖ്യാപനങ്ങളും ആര്‍ച്ച്ബിഷപ് മാര്‍ തോമസ് തറയില്‍ നിര്‍വഹിക്കും.

പക്ഷാഘാത ബോധവത്കരണ സെമിനാറുകൾക്ക് സമാപനം

കുറവിലങ്ങാട്: പാലാ രൂപതയുടെ പ്ലാറ്റിനം ജൂബിലി, മാർ സ്ലീവാ മെഡിസിറ്റിയുടെ അഞ്ചാം വാർഷികം എന്നിവയോടനുബന്ധിച്ച് നടപ്പാക്കുന്ന സാമൂഹിക പദ്ധതികളുടെ ഭാഗമായി പിതൃവേദിയുമായി സഹകരിച്ച് നടത്തിയ പക്ഷാഘാത ബോധവത്കരണ സെമിനാറുകൾക്ക് സമാപനം. മേജർ ആർക്കിഎപ്പിസ്‌കോപ്പൽ മർത്തമറിയം ആർച്ച്ഡീക്കൻ തീർഥാടന കേന്ദ്രത്തിൽ നൂറുകണക്കായ ആളുകൾ പങ്കെടുത്ത സമ്മേളനത്തിൽ സെമിനാറുകളുടെ സമാപനം പാലാ രൂപത വികാരി ജനറാളും മാർ സ്ലീവാ മെഡിസിറ്റി മാനേജിംഗ് ഡയറക്ടറുമായ മോൺ. ജോസഫ് കണിയോടിക്കൽ ഉദ്ഘാടനം ചെയ്തു. കൂടുതൽ ജനകീയ പദ്ധതികൾ മെഡിസിറ്റി നടപ്പിലാക്കുമെന്ന് വികാരി ജനറാൾ പറഞ്ഞു. വിവിധ കേന്ദ്രങ്ങളിലായി 25 സ്ഥലങ്ങളിലാണ് സെമിനാറുകൾ ഇതിനോടകം പൂർത്തീകരിച്ചത്. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അധ്യക്ഷത വഹിച്ചു. പിതൃവേദി രൂപത ഡയറക്ടർ ഫാ. ജോസഫ് നരിതൂക്കിൽ, രൂപത പ്രസിഡന്‍റ് ജോസ് തോമസ്, സെക്രട്ടറി ടോമി തുരുത്തിക്കര, കോ-ഓർഡിനേറ്റർ ബിൻസ് ജോസ്, മേഖലാ പ്രസിഡന്‍റ് ജോസ് സി. മണക്കാട്ട്, യൂണിറ്റ് പ്രസിഡന്‍റ് ടിക്‌സൺ മണിമലത്തടത്തിൽ, സെക്രട്ടറി ലൂക്കോസ് പുത്തൻകുളം എന്നിവർ പ്രസംഗിച്ചു. ന്യൂറോളജി വിഭാഗം കൺസൾട്ടന്‍റ് ഡോ. ജോസി ജെ. വള്ളിപ്പാലം ക്ലാസ് നയിച്ചു.

വാക്കേത്തറ-ചെട്ടിക്കരി റോഡ് തകർന്നു; ഗതാഗതം ദുഷ്കരം

തോട്ടകം: തലയാഴം പഞ്ചായത്തിലെ മൂന്നാം വാർഡുമായി ബന്ധപ്പെട്ട വാക്കേത്തറ- ചെട്ടിക്കരി റോഡിൽ വൻ കുഴികൾ രൂപപ്പെട്ട് യാത്ര ദുരിതപൂർണമായി. മഴ ആരംഭിച്ചതോടെ മെറ്റലിട്ട് മീതെ പൂഴിമണ്ണ് വിരിച്ച് ബലപ്പെടുത്തിയിരുന്ന റോഡിലെ മണ്ണൊഴികിപ്പോയി കല്ലുകൾ തെളിഞ്ഞു. ചെളിവെള്ളം നിറഞ്ഞ വൻ കുഴികളിൽ ഇരുചക്ര വാഹനങ്ങൾ മറിഞ്ഞ് യാത്രികർക്കു പരിക്കേൽക്കുന്നത് പതിവാകുകയാണ്. തലയാഴം പഞ്ചായത്തിലെ ഏറ്റവും പിന്നാക്ക പ്രദേശമായ ചെട്ടിക്കരിയിലുള്ളവർക്ക് പുറംലോകവുമായി ബന്ധപ്പെടാനുള്ള ഏക മാർഗമാണിത്. കുഴികൾ നിറഞ്ഞ റോഡിലെ കല്ലുകളിൽ തട്ടി വാഹനങ്ങൾക്ക് തകരാർ സംഭവിക്കുന്നതും പതിവാണെന്ന് വാഹന യാത്രികർ കുറ്റപ്പെടുത്തുന്നു. റോഡിന്‍റെ പ്രാധാന്യം കണക്കിലെടുത്ത് ബന്ധപ്പെട്ട അധികൃതരും ജനപ്രതിനിധികളും റോഡ് ഗതാഗത യോഗ്യമാക്കണമെന്ന ആവശ്യം പ്രദേശവാസികൾ ഉന്നയിച്ചു തുടങ്ങിയിട്ട് വർഷങ്ങളായെങ്കിലും റോഡ് സഞ്ചാരയോഗ്യമാക്കുന്നതിന് നടപടിയില്ലെന്ന് പ്രദേശവാസികൾ കുറ്റപ്പെടുത്തുന്നു.

കോവിലകത്തുംകടവ് മത്സ്യമാർക്കറ്റ് : ശോച്യാവസ്ഥ പരിഹരിക്കാൻ സഹായം തേടി നഗരസഭ

വൈക്കം: വൈക്കത്തെ പ്രമുഖ വ്യാപാരകേന്ദ്രമായ കോവിലകത്തുംകടവ് മത്സ്യമാർക്കറ്റിന്‍റെ ശോച്യാവസ്ഥ പരിഹരിക്കാൻ കേന്ദ്ര-സംസ്ഥാന പദ്ധതികൾക്കായി നഗരസഭ ശ്രമം ആരംഭിച്ചു. കാലപ്പഴക്കമേറിയ മാർക്കറ്റ് കെട്ടിടം അപകടാവസ്ഥയിലാണ്. കേന്ദ്ര സംസ്ഥാന സർക്കാരുകളുടെ സംയോജിതമായ പദ്ധതികളിലൂടെ മാത്രമേ മാർക്കറ്റ് നവീകരിക്കാൻ കഴിയുകയുള്ളൂവെന്ന് നഗരസഭാ ചെയർപേഴ്സൺ പ്രീതാ രാജേഷ്, വൈസ് ചെയർമാൻ പി.ടി. സുഭാഷ് എന്നിവർ പറഞ്ഞു. നൂറുകണക്കിന് മത്സ്യത്തൊഴിലാളികളുടെ ആശാകേന്ദ്രമായ മാർക്കറ്റിന്‍റെ ഭൗതിക സാഹചര്യം മെച്ചപ്പെടുത്തുന്നതിന്‍റെ മുന്നോടിയായി കേന്ദ്ര സഹമന്ത്രി ജോർജ് കുര്യൻ മാർക്കറ്റ് സന്ദർശിച്ച് സ്ഥിതിഗതികൾ ബോധ്യപ്പെട്ട് ആവശ്യമായ സഹായം ചെയ്യാമെന്ന് ഉറപ്പുനൽകി. നഗരസഭ ഇതിനകം മാർക്കറ്റിന്‍റെ നവീകരണത്തിനായി ഒരു കോടി രൂപയുടെ പദ്ധതികളാണ് വിഭാവനം ചെയ്തു നടപ്പാക്കാനൊരുങ്ങുന്നത്. മാർക്കറ്റിലെത്തുന്നവർ ഏറെക്കാലമായി മാർക്കറ്റിൽ ബയോഗ്യാസ് പ്ലാന്‍റ് സ്ഥാപിക്കണമെന്ന് ആവശ്യപ്പെട്ടുവരികയായിരുന്നു. ഏഴുലക്ഷം രൂപ വിനിയോഗിച്ച് ജൈവ മാലിന്യസംസ്കരണത്തിനായി ബയോഗ്യാസ് പ്ലാന്‍റ് സ്ഥാപിക്കാനുള്ള നടപടികൾ നഗരസഭ ത്വരിതപ്പെടുത്തിവരികയാണ്. ഇതിനു പുറമേ മാർക്കറ്റിലെ മലിനജലം ശുദ്ധീകരിക്കാൻ 60 ലക്ഷം രൂപ വിനിയോഗിച്ചുള്ള വാട്ടർ ട്രീറ്റ്മെന്‍റ് പ്ലാന്‍റും ഉടൻ യാഥാർഥ്യമാകുമെന്ന് നഗരസഭാ ചെയർപേഴ്സൺ പ്രീതാ രാജേഷും വൈസ് ചെയർമാൻ പി.ടി. സുഭാഷും പറഞ്ഞു.

ചെമ്മനത്തുകര വെൽനസ് സെന്‍റർ നിർമാണം അവസാന ഘട്ടത്തിൽ

ടിവിപുരം: പഞ്ചായത്തിലെ ചെമ്മനത്തുകരയിൽ നിർമിക്കുന്ന വെൽനസ് സെന്‍ററിന്‍റെ നിർമാണപ്രവർത്തനങ്ങൾ പുരോഗമിക്കുന്നു. 57 ലക്ഷം രൂപ വിനിയോഗിച്ച് 1200 ചതുരശ്ര അടി വിസ്തീർണത്തിൽ നിർമിക്കുന്ന കെട്ടിടത്തിന്‍റെ നിർമാണപ്രവർത്തനങ്ങൾ അവസാന ഘട്ടത്തിലാണ്. ടിവിപുരം പഞ്ചായത്തിലെ ഒന്നു മുതൽ ഏഴുവരെ വാർഡുകളിലെ ജനങ്ങളുടെ ജീവിതശൈലീ രോഗപ്രതിരോധ പ്രവർത്തനങ്ങൾക്ക് ആക്കം കൂട്ടുന്നതിന് വെൽനെസ് സെന്‍റർ ഉപകാരപ്പെടും. ഡോക്ടറടക്കം നാല് ആരോഗ്യപ്രവർത്തകരുടെ സേവനമാണ് ഇവിടെ ലഭിക്കുക. പ്രമേഹം, രക്തസമ്മർദ്ദം, കാൻസർ രോഗനിർണയത്തിനും വ്യായാമത്തിനും ഇവിടെ സൗകര്യമുണ്ടാകും. രണ്ടു മാസത്തിനകം നിർമാണം പൂർത്തിയാക്കി വെൽനസ് സെന്‍റർ നാടിനു സമർപ്പിക്കുമെന്ന് പഞ്ചായത്ത് പ്രസിഡന്‍റ് ശ്രീജിഷാജി, വൈസ് പ്രസിഡന്‍റ് വി.കെ. ശ്രീകുമാർ എന്നിവർ പറഞ്ഞു. പഞ്ചായത്തിലെ എട്ടു മുതൽ14 വരെ വാർഡുകളിലെ ജനങ്ങൾക്കു മൂത്തേടത്തുകാവിലെ വാടകക്കെട്ടിടത്തിൽ പ്രവർത്തിക്കുന്ന വെൽനസ് സെന്‍ററിൽ രോഗപ്രതിരോധത്തിനുള്ള സേവനങ്ങൾ ലഭിക്കും.

കിണറ്റിലകപ്പെട്ടയാളെ ഫയര്‍ഫോഴ്‌സ് രക്ഷിച്ചു

കോതനല്ലൂര്‍: കിണര്‍ വൃത്തിയാക്കാനിറങ്ങുന്നതിനിടെ കിണറ്റിലകപ്പെട്ടയാളെ ഫയര്‍ഫോഴ്‌സെത്തി രക്ഷിച്ചു. മാഞ്ഞൂര്‍ പഞ്ചായത്ത് എട്ടാം വാര്‍ഡിലെ വട്ടത്തുണ്ടത്തില്‍ റോയി ജോണ്‍ (54) ആണ് കിണറ്റിലകപ്പെട്ടത്. വീടിനോടു ചേര്‍ന്നുള്ള കിണര്‍ വൃത്തിയാക്കുന്നതിന് ഇറങ്ങിയപ്പോള്‍ ദേഹാസ്വസ്ഥ്യം ഉണ്ടാവുകയും കിണറിന്‍റെ പാതിവഴിയിലുള്ള അരഞ്ഞാണത്തില്‍ കുടുങ്ങുകയുമായിരുന്നു. തുടര്‍ന്ന് ഫയര്‍ഫോഴ്‌സെത്തി നെറ്റ് ഉപയോഗിച്ചു രക്ഷപ്പെടുത്തി പ്രാഥമിക ശുശ്രൂഷകള്‍ നല്‍കി.

കോണത്താറ്റ് പാലം നിർമാണം ഉടൻ പൂർത്തിയാക്കണം: സിപിഐ

അയ്മനം: കുമരകം കോണത്താറ്റ് പാലം നിർമാണം എത്രയും വേഗം പൂർത്തിയാക്കണമെന്നും ജനങ്ങളുടെ യാത്രാദുരിതത്തിന് താല്കാലിക ആശ്വാസത്തിനായി രാവിലെയും വൈകുന്നേരവും താത്കാലിക ബണ്ട് റോഡിലൂടെ ബസ് സർവീസിന് അനുമതി നൽകണമെന്നും സിപിഐ ഏറ്റുമാനൂർ മണ്ഡലം സമ്മേളനം പ്രമേയത്തിലൂടെ സർക്കാരിനോട് ആവശ്യപ്പെട്ടു. അയ്മനത്തു നടന്ന സമ്മേളനം ഇന്നലെ സമാപിച്ചു. കെ.ഐ. കുഞ്ഞച്ചനെ സെക്രട്ടറിയായി തെരഞ്ഞെടുത്തു. പൊതുസമ്മേളനം സംസ്ഥാന എക്സിക്യൂട്ടീവംഗം ആർ. രാജേന്ദ്രൻ ഉദ്ഘാടനം ചെയ്തു. പ്രതിനിധി സമ്മേളനം സംസ്ഥാന അസിസ്റ്റന്‍റ് സെക്രട്ടറി ഇ. ചന്ദ്രശേഖരൻ എംഎൽഎ ഉദ്ഘാടനം ചെയ്തു. ജില്ലാ സെക്രട്ടറി വി.ബി. ബിനു, സംസ്ഥാന എക്സിക്യൂട്ടീവംഗം സി.കെ. ശശിധരൻ, കൗൺസിലംഗം ആർ.സുശീലൻ തുടങ്ങിയവർ പ്രസംഗിച്ചു.

അകലക്കുന്നത്ത് ഇരുപത് കേന്ദ്രങ്ങളില്‍ മിനിമാസ്റ്റ് ലൈറ്റ്

അകലക്കുന്നം: ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച 25 ലക്ഷം രൂപ ഉപയോഗിച്ച് അകലക്കുന്നം പഞ്ചായത്തിലെ ഏഴു വാര്‍ഡുകളിലെ 20 ജംഗ്ഷനുകളില്‍ മിനിമാസ്റ്റ് ലൈറ്റുകള്‍ സ്ഥാപിച്ചു. പട്യാലിമറ്റം, നെല്ലിക്കുന്ന്, തച്ചിലങ്ങാട് വാര്‍ഡുകളിലെ മിനിമാസ്റ്റ് ലൈറ്റുകളുടെ ഉദ്ഘാടനം ഇന്ന് വൈകുന്നേരം 5.30 മുതല്‍ 7.30 വരെയും ചെങ്ങളം, ക്ടാക്കുഴി, തെക്കുംതല, മറ്റപ്പള്ളി വാര്‍ഡുകളില മിനിമാസ്റ്റ് ലൈറ്റുകളുടെ സ്വിച്ച് ഓണ്‍ കര്‍മം നാളെ വൈകുന്നേരം 5.30 മുതല്‍ 7.30 വരെയും നടത്തപ്പെടും. ചാണ്ടി ഉമ്മന്‍ എംഎല്‍എ സ്വിച്ച് ഓണ്‍ കര്‍മം നിര്‍വഹിക്കും. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അധ്യക്ഷത വഹിക്കും. പഞ്ചായത്ത് പ്രസിഡന്‍റ് സിന്ധു അനില്‍കുമാര്‍ മുഖ്യപ്രഭാഷണം നടത്തും.

കാർ നിയന്ത്രണംവിട്ട് മറിഞ്ഞു

അയർക്കുന്നം: കൊങ്ങാണ്ടൂർ എൻഎസ്എസ് കരയോഗമന്ദിരത്തിനു സമീപം കാർ നിയന്ത്രണംവിട്ട് മറിഞ്ഞു. ഇന്നലെ ഉച്ചയ്ക്ക് 1.30നായിരുന്നു അപകടം. കാറിൽ നാലു യാത്രക്കാർ ഉണ്ടായിരുന്നു. ഇവർക്ക് നിസാരപരിക്കുകളുണ്ട്. അയർക്കുന്നത്തുനിന്ന് പാലാ ഭാഗത്തേക്കു പോയ കാറാണ് അപകടത്തിൽപ്പെട്ടത്.

ലഹരിമുക്ത കേരളം സന്ദേശ സൈക്കിള്‍ റാലി സംഘടിപ്പിച്ചു

കോട്ടയം: ജില്ലാ സ്‌പോര്‍ട്‌സ് കൗണ്‍സില്‍, കോട്ടയം സൈക്ലിംഗ് ക്ലബ് എന്നിവ ചേര്‍ന്ന് സംഘടിപ്പിച്ച ലഹരിമുക്ത കേരള സന്ദേശ സൈക്കിള്‍ റാലി ജില്ലാ കളക്ടര്‍ ജോണ്‍ വി. സാമുവല്‍ ഫ്‌ളാഗ് ഓഫ് ചെയ്തു. കളക്ടറേറ്റില്‍നിന്ന് ആരംഭിച്ച റാലി സംക്രാന്തി, മെഡിക്കല്‍ കോളജ്, മാന്നാനം, അതിരമ്പുഴ, ഏറ്റുമാനൂര്‍, തിരുവഞ്ചൂര്‍, മണര്‍കാട് വഴി നാഗമ്പടം ഇന്‍ഡോര്‍ സ്റ്റേഡിയത്തില്‍ സമാപിച്ചു. സമാപന സമ്മേളനത്തില്‍ സൈക്ലിങ്ങില്‍ ദേശീയതലത്തില്‍ മെഡല്‍ നേടിയവരെ കോട്ടയം വെസ്റ്റ് പോലീസ് എസ്എച്ച്ഒ കെ.ആര്‍. പ്രശാന്ത് കുമാര്‍ ആദരിച്ചു. ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്‍റ് ബൈജു വര്‍ഗീസ് ഗുരുക്കള്‍, സെക്രട്ടറി എല്‍. മായാദേവി, എക്‌സിക്യൂട്ടീവ് കമ്മിറ്റി അംഗങ്ങളായ സാബു മുരിക്കവേലി, കെ.ആര്‍. ഷാജി എന്നിവര്‍ റാലിക്ക് നേതൃത്വം നല്‍കി. മന്ത്രി വി. അബ്ദുറഹ്മാന്‍ നേതൃത്വം നല്‍കുന്ന കിക്ക് ഡ്രഗ്‌സ് ലഹരിവിരുദ്ധ സന്ദേശ യാത്രയ്ക്കു മുന്നോടിയായാണ് സൈക്കിള്‍ റാലി സംഘടിപ്പിച്ചത്. കാസര്‍കോഡുനിന്നാരംഭിച്ച സന്ദേശയാത്ര ഇന്നു ജില്ലയില്‍ പര്യടനം നടത്തും. രാവിലെ 7.30 ന് ഏറ്റുമാനൂരിലും ഉച്ചകഴിഞ്ഞ് 3.30ന് കോട്ടയത്തും യാത്രയ്ക്ക് സ്വീകരണം നല്‍കും. സ്വീകരണത്തിനു മുന്നോടിയായി ഇന്നു രാവിലെ ആറിനു ചേര്‍പ്പുങ്കലില്‍നിന്ന് ഏറ്റുമാനൂരിലേക്ക് ലഹരിവിരുദ്ധ സന്ദേശ മാരത്തണും നടത്തും.

വിഴിഞ്ഞത്തെ കോട്ടയം തുറമുഖവുമായി ബന്ധിപ്പിക്കും: മന്ത്രി വാസവൻ

കോട്ടയം: വിഴിഞ്ഞത്തെ കോട്ടയം തുറമുഖവുമായി ബന്ധിപ്പിക്കുന്നതിനുള്ള നടപടികൾ ആരംഭിച്ചതായി മന്ത്രി വി.എൻ. വാസവൻ പറഞ്ഞു. വിഴിഞ്ഞവുമായി ബന്ധിപ്പിക്കുന്ന രീതിയിൽ കോട്ടയത്തെ ഉൾനാടൻ ജലഗതാഗതത്തെ ഉടൻതന്നെ വികസിപ്പിക്കുമെന്നും മന്ത്രി പറഞ്ഞു. കറുത്തേടം-തെള്ളകം-അടിച്ചിറ റോഡ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഏറ്റുമാനൂർ സിവിൽസ്റ്റേഷൻ, കോടതി സമൂച്ചയം എന്നിവകൂടി സമീപ ഭാവിയിൽ പൂർത്തിയാക്കുമെന്നും മന്ത്രികൂട്ടിചേർത്തു. ചടങ്ങിൽ മന്ത്രി പി.എ. മുഹമ്മദ് റിയാസ് അധ്യക്ഷത വഹിച്ചു. ഏറ്റുമാനൂർ നഗരസഭാധ്യക്ഷ ലൗലി ജോർജ്, നഗരസഭാഗങ്ങളായ മാത്യു കുര്യൻ, സിന്ധു കറുത്തേടം, പൊതുമരാമത്ത് നിരത്തു വിഭാഗം എക്സിക്യൂട്ടീവ് എൻജിനിയർ ടി.എസ്. ജയരാജ്, അസിസ്റ്റന്‍റ് എക്സിക്യൂട്ടീവ് എൻജിനിയർ പി.ബി. വിമൽ, അസിസ്റ്റന്‍റ് എൻജിനിയർ ആർ. രൂപേഷ് എന്നിവർ പങ്കെടുത്തു.

പുകപരിശോധനാ ഫീസ് വര്‍ധന അനിവാര്യമെന്ന് തിരുവഞ്ചൂര്‍

കോട്ടയം: വാഹന പുക പരിശോധനയുടെ ഫീസ് വര്‍ധന അനിവാര്യമെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. വെഹിക്കിള്‍ എമിഷന്‍ ടെസ്റ്റിംഗ് ഓണേഴ്സ് അസോസിയേഷന്‍ ജില്ലാ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദേഹം. പുതിയ സംവിധാനങ്ങള്‍ പ്രാബല്യത്തിലാകുമ്പോള്‍ തൊഴില്‍ സുരക്ഷ ഉറപ്പാക്കണമെന്നും അദ്ദേഹം ആവശ്യപ്പെട്ടു. ജില്ല പ്രസിഡന്‍റ് പി.ടി. യോഹന്നാന്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി ശ്രീകൃഷ്ണന്‍ അമ്പാടി, ടെക്‌നിക്കല്‍ ഹെഡ് സുബിന്‍ സാഗര്‍, ഷിനോജ് വിജി. ജില്ല എക്സിക്യൂട്ടീവ് അംഗം കെ. വിനോദ്, ട്രഷറര്‍ ജയിംസ് തോമസ്, മല്ലപ്പള്ളി എംവിഐ അജിത്ത് ആന്‍ഡ്രൂസ്, സംസ്ഥാന വൈസ് പ്രസിഡന്‍റ് മുഹമ്മദ് കുഞ്ഞി, സംസ്ഥാന ജോയിന്‍റ് സെക്രട്ടറി ജോയിസ് എം. ജോയ്, സ്റ്റേറ്റ് കോണ്‍ഫറന്‍സ് ജനറല്‍ കണ്‍വീനര്‍ കെ.പി.എ. റസാഖ് എന്നിവര്‍ പ്രസംഗിച്ചു. ഭാരവാഹികൾ:|മാത്യു രാജന്‍ (പ്രസിഡന്‍റ്), പി.പി. ഏബ്രഹാം (വൈസ് പ്രസിഡന്‍റ്), വി.ജി. മനോജ് (ജനറല്‍ സെക്രട്ടറി), കെ.ആര്‍. വേണു (ജോയന്‍റ്് സെക്രട്ടറി), ബോബന്‍ ടി. പുതുശേരി (ട്രഷറര്‍), ഹുസൈന്‍ കരിമ്പുചിറ (ടെക്‌നിക്കല്‍ ഹെഡ്).

വീട്ടമ്മമാര്‍ക്ക് കൈത്താങ്ങായി പാമ്പാടി ബാങ്കിന്‍റെ നൂതന സംരംഭം

പാമ്പാടി: പാമ്പാടി സര്‍വീസ് സഹകരണ ബാങ്ക് വീട്ടമ്മമാര്‍ക്ക് കൈത്താങ്ങായി ഒരു നൂതന സംരംഭം ആരംഭിക്കുന്നു. തിരക്കുപിടിച്ച ജീവിതത്തില്‍ പച്ചക്കറി അരിയുന്ന പ്രയാസം മൂലം പലരും ഫാസ്റ്റ് ഫുഡ് തെരഞ്ഞെടുക്കുന്നത് ഗുരുതരമായ ആരോഗ്യപ്രശ്‌നങ്ങള്‍ സൃഷ്ടിക്കുന്നു. ഈ സാഹചര്യത്തില്‍ ശുചീകരിച്ച വിന്നാഗിരി, മഞ്ഞള്‍, കല്ലുപ്പ് തുടങ്ങിയവ ഉപയോഗിച്ച് പച്ചക്കറികള്‍ കഴുകി അരിഞ്ഞ അവിയല്‍ കൂട്ട്, സാമ്പാര്‍കൂട്ട്, പയര്‍, ചുണ്ട്, കപ്പളങ്ങ, മറ്റ് തോരന്‍ കറിയിനങ്ങൾ, തേങ്ങ ചുരണ്ടിയത്, ഉള്ളി പൊളിച്ചത് തുടങ്ങിയവ പായ്ക്കറ്റുകളിലാക്കി നിലവിലെ മാര്‍ക്കറ്റ് വിലയ്ക്ക് ആനുപാതികമായ നിരക്കില്‍ റെഡി ടു കുക്ക് എന്ന പേരിൽ വിതരണത്തിന് എത്തിക്കുന്നു. മാര്‍ക്കറ്റ് ജംഗ്ഷനില്‍ പാമ്പാടി പഞ്ചായത്ത് ഷോപ്പിംഗ് കോംപ്ലക്‌സിലാണ് വിപണനകേന്ദ്രം തുറക്കുന്നത്. രാവിലെ ഒമ്പതു മുതല്‍ രാത്രി ഏഴു വരെയാണ് പ്രവര്‍ത്തനം. റെഡി ടു കുക്ക് സാധനങ്ങള്‍ക്കു പുറമേ ഗുണമേന്മ തെളിയിച്ച സഹകരണ സ്ഥാപനങ്ങളുടെ ഉത്പന്നങ്ങളും വിപണന കേന്ദ്രത്തില്‍ ലഭിക്കും. റെയിഡ്‌കോയുടെ ശുദ്ധമായ കറിപൗഡറുകള്‍, കര്‍ഷകരിൽനിന്ന് നേരിട്ട് ശേഖരിക്കുന്ന പുതിയ തേയിലയില്‍നിന്നു തങ്കമണി സര്‍വീസ് സഹകരണ ബാങ്ക് നിര്‍മിക്കുന്ന രുചികരമായ സഹ്യ തേയില, റബ്‌കോയുടെ ശുദ്ധമായ വെളിച്ചെണ്ണ, ഗുരുവായൂര്‍ അമ്പലത്തില്‍ കദളിപ്പഴം നല്‍കുന്ന തൃശൂര്‍ ലേബര്‍ കോണ്‍ടാക്‌ട് സൊസൈറ്റി ഉത്പാദിപ്പിക്കുന്ന കദളിപ്പഴം കൊണ്ടുള്ള ഹല്‍വ, പൊക്കാളി റൈസ്, ഗിര്‍ പശുവിന്‍റെ നെയ്യ്, തൈര്, എറണാകുളത്തെ സഹകരണസ്ഥാപനത്തിന്‍റെ ഉത്പന്നമായ ചക്കപ്പഴം കൊണ്ടുള്ള ചിപ്‌സ്, മറയൂര്‍ ശര്‍ക്കര, ചിറ്റൂര്‍ യുവജന സംഘം നിര്‍മിക്കുന്ന വാഴപ്പിണ്ടി ജ്യൂസ്, വാഴച്ചുണ്ട് ചമ്മന്തിപ്പൊടി എന്നിവയും ഷോപ്പില്‍ ലഭിക്കും. 22നു രാവിലെ 9.30ന് മന്ത്രി വി.എന്‍. വാസവന്‍ ഷോപ്പ് ഉദ്ഘാടനം ചെയ്യും. സംസ്ഥാന സഹകരണ യൂണിയന്‍ ഡയറക്‌ടര്‍ കെ.എം. രാധാകൃഷ്ണന്‍ ആദ്യ വില്പന നിര്‍വ്വഹിക്കും. എംജി യൂണിവേഴ്‌സിറ്റി സിന്‍ഡിക്കറ്റംഗം റെജി സഖറിയ സ്‌കൂള്‍ മാര്‍ക്കറ്റ് ഉദ്ഘാടനം ചെയ്യും. ബാങ്ക് പ്രസിഡന്‍റ് വി.എം. പ്രദീപ് അധ്യക്ഷനാകും.

ഗര്‍ഭാശയ അര്‍ബുദ നിര്‍ണയ ക്യാമ്പ് കാരിത്താസ് മാതായില്‍

കോട്ടയം: ഗര്‍ഭാശയ കാന്‍സര്‍ നേരത്തേ തിരിച്ചറിയുന്നതിനും ചികിത്സ ഉറപ്പുവരുത്തുന്നതിനുമായി കാരിത്താസ് മാതാ ആശുപത്രിയില്‍ ഗര്‍ഭാശയ അര്‍ബുദ നിര്‍ണയ ക്യാമ്പ് സംഘടിപ്പിക്കും. 21, 22 തീയതികളില്‍ രാവിലെ 10 മുതല്‍ ഉച്ചകഴിഞ്ഞു 1.30 വരെ ഗൈനക്കോളജിക് ഓങ്കോളജി വിദഗ്ധ ഡോ. എസ്. സുരഭിയുടെ നേതൃത്വത്തിലാണ് ക്യാമ്പ്. സൗജന്യ പരിശോധനകളോടൊപ്പം മറ്റു സേവനങ്ങളും ക്യാമ്പില്‍ ലഭ്യമാണ്. 25-30നും ഇടയില്‍ പ്രായമുള്ള സ്ത്രീകള്‍ക്ക് ഓരോ മൂന്നു വര്‍ഷത്തേക്കുള്ള പാസ്മിയര്‍ ടെസ്റ്റ്, 30-65 ഇടയില്‍ പ്രായമുള്ള സ്ത്രീകള്‍ക്ക് ഓരോ അഞ്ചു വര്‍ഷത്തേക്കുള്ള പ്രൈമറി എച്ച്ആർ-എച്ച്പിവി ഡിഎൻഎ ടെസ്റ്റ്, ഓരോ മൂന്നു വര്‍ഷത്തേക്കുള്ള പാപ് സ്മിയര്‍ ടെസ്റ്റ് എന്നിവ നടത്താം. 65 വയസിനു മുകളിലുള്ളവര്‍ക്കു നിര്‍ദിഷ്ട മാനദണ്ഡങ്ങള്‍ പാലിക്കപ്പെടുന്നുവെങ്കില്‍ പരിശോധന നടത്തേണ്ടതില്ല. ഗര്‍ഭാശയ അര്‍ബുദത്തിന്‍റെ ലക്ഷണങ്ങള്‍ തിരിച്ചറിയാന്‍, ആവശ്യമായ ടെസ്റ്റുകള്‍ ചെയ്യാനും തികച്ചും സുരക്ഷിതമായ ബോധവത്കരണവും പരിശോധനയും ലഭിക്കാനും ക്യാമ്പിലൂടെ സാധിക്കും. ഫോൺ- 9037947246.

ഇരട്ടപ്പാതയും പ്ലാറ്റ്‌ഫോമും വന്നിട്ടും കോട്ടയത്തിന് യാത്രാദുരിതം

കോട്ടയം: ഇരട്ടപ്പാതയും ആറ് പ്ലാറ്റ്‌ഫോമുകളും എസ്‌കലേറ്ററും മേല്‍പ്പാലങ്ങളും വന്നതുകൊണ്ടൊന്നും കോട്ടയത്തെ ട്രെയിന്‍തിരക്കിന് പരിഹാരമായില്ല. എറണാകുളം-കായംകുളം പാത ഇരട്ടിക്കലിന്‍റെ അവസാനഘട്ടം ഏറ്റുമാനൂര്‍-ചിങ്ങവനം ഡബിളിംഗ് യാഥാര്‍ഥ്യമായിട്ട് മൂന്നു വര്‍ഷം പിന്നിട്ടു. ഒരു വന്ദേഭാരതും ജന്‍ശതാബ്ദിയും വേളാങ്കണ്ണിയും വന്നതല്ലാതെ മറ്റൊരു ആശ്വാസവണ്ടിയും കോട്ടയം വഴി വന്നില്ല. ഓരോ വര്‍ഷവും യാത്രക്കാരുടെ എണ്ണത്തില്‍ അഞ്ചു ശതമാനം വര്‍ധനയുള്ളതായാണ് റെയില്‍വേയുടെ വരുമാനക്കണക്ക് വ്യക്തമാക്കുന്നത്. അതിഥിത്തൊഴിലാളികളുടെ വരവും പോക്കും കാരണം മലയാളികള്‍ക്ക് വടക്കു-കിഴക്കന്‍ മേഖലയിലേക്കും ഹൈദരാബാദിലേക്കും ബംഗാളിലേക്കും റിസര്‍വേഷന്‍ കിട്ടാനില്ല. ഉന്നത പഠനത്തിനു സീറ്റുകള്‍ തരപ്പെടുത്താന്‍ മലയാളിവിദ്യാര്‍ഥികളും രക്ഷിതാക്കളും അയല്‍സംസ്ഥാനങ്ങളെ ആശ്രിക്കുന്ന സാഹചര്യത്തില്‍ വെയിറ്റിംഗ് ലിസ്റ്റില്‍ ഇടംപിടിച്ച് ടിക്കറ്റിനായി കാത്തിരിക്കേണ്ട ഗതികേടാണ്. കോട്ടയത്തെ സാഹചര്യം മുന്നില്‍ക്കണ്ട് സ്വകാര്യ ടൂറിസ്റ്റ് ബസ് ലോബി ഓരോ മാസവും പുതിയ ബസുകള്‍ കോട്ടയത്തേക്ക് ഓടിച്ച് വിമാനനിരക്കിനേക്കാള്‍ ഉയര്‍ന്ന തോതില്‍ പണം വാങ്ങുന്നു. ഇവിടേക്ക് പുതിയ ട്രെയിനുകള്‍ അനുവദിക്കാത്തതിനു പിന്നില്‍ ബംഗളൂരു സ്വകാര്യ ബസ് ലോബിയുടെ വന്‍ ഇടപെടലുള്ളതായി പറയുന്നു. കോട്ടയം വഴി ഇരട്ടപ്പാത വന്നപ്പോള്‍ ഡല്‍ഹി, ഒഡിഷ, ബംഗാള്‍, ആസാം, മഹാരാഷ്ട്ര സംസ്ഥാനങ്ങളിലേക്ക് ദീര്‍ഘദൂരവണ്ടികള്‍ പരിഗണക്കും എന്നതായിരുന്നു റെയില്‍വേയുടെ ഉറപ്പ്. കോട്ടയത്തുനിന്നു കൊങ്കണ്‍ വഴി ഡല്‍ഹി വണ്ടിയും മറ്റൊരു ഉറപ്പായിരുന്നു. മംഗലാപുരത്തേക്കും ബംഗളൂരുവിലേക്കും ചെന്നൈയിലേക്കും പുതിയ വണ്ടികള്‍ നല്‍കുന്നതും പരിഗണനയിലായിരുന്നു. തിരക്കു വര്‍ധിക്കുമ്പോള്‍ ഏതാനും സ്‌പെഷല്‍ വണ്ടികള്‍ ചുരുങ്ങിയ കാലം ഓടിച്ച റെയില്‍വേ കണ്ണില്‍ പൊടിയിടുകയാണു പതിവ്. കൊച്ചിയില്‍ എത്തി ഒന്നും രണ്ടും ദിവസത്തിനുശേഷം മടങ്ങുന്ന നിരവധി ദീര്‍ഘദൂരവണ്ടികള്‍ കോട്ടയത്തേക്കു നീട്ടാന്‍ സാഹചര്യമുണ്ടായിരിക്കേ സാങ്കേതിക കാരണങ്ങള്‍ നിരത്തി റെയില്‍വേ നിഷേധിക്കുന്നു. കോട്ടയത്തുനിന്ന് എറണാകുളത്തെത്തി ദീര്‍ഘദൂര യാത്ര നടത്തുന്നവര്‍ ഏറെപ്പേരാണ്. പാലരുവി, ജയന്തി, ഐലന്‍ഡ്, മലബാര്‍, വഞ്ചിനാട്, വേണാട്, ചെന്നൈ മെയില്‍ വണ്ടികളെ ആശ്രയിച്ചാണ് നല്ലൊര ശതമാനംപേരും യാത്ര ചെയ്യുന്നത്. ഈ വണ്ടികളിലെ തിരക്കിന് യാതൊരു കുറവുമില്ല. രാവിലെ എറണാകുളം ഭാഗത്തേക്കുള്ള യാത്രക്കാര്‍ കോട്ടയത്തുനിന്നും ശ്വാസമടക്കിയാണ് യാത്ര ചെയ്യുന്നത്. എറണാകുളത്തുനിന്ന് ഉച്ചകഴിഞ്ഞ് 2.40നു പുറപ്പെട്ടിരുന്ന കൊല്ലം മെമുവിന്‍റെ സമയം കോവിഡിനുശേഷം മാറ്റിയതാണ് കൊല്ലം യാത്രക്കാരെ ദുരിതത്തിലാഴ്ത്തിയത്. വൈകുന്നേരം 3.30നുള്ള പരശുറാം എക്‌സ്പ്രസ് കഴിഞ്ഞാല്‍ 5.40നുള്ള മെമു മാത്രമാണ് കൊല്ലം ഭാഗത്തേക്ക് കോട്ടയത്തുനിന്നുള്ള യാത്രക്കാര്‍ക്ക് ആശ്രയം. പതിവു യാത്രക്കാരും വിദ്യാര്‍ഥികളും മണിക്കൂറുകളോളം കാത്തിരിക്കേണ്ട സാഹചര്യമാണ് നിലവിലുള്ളത്. 5.40ന് പുറപ്പെടുന്ന എട്ടു കോച്ചുകള്‍ മാത്രമുള്ള കൊല്ലം മെമു അഞ്ചോടെ യാത്രക്കാരെ ക്കൊണ്ട് നിറയും. ജൂണ്‍ മുതല്‍ മണ്‍സൂണ്‍ ഷെഡ്യൂള്‍ വരാനിരിക്കേ ഗംഗാനഗര്‍, ഗരീബ്, ലോക്മാന്യ തിലക് - കൊച്ചുവേളി ട്രെയിനുകളുടെ സമയത്തില്‍ മൂന്നുമണിക്കൂറിലേറെ വ്യത്യാസം വരും. ഇതോടെ മെമുവിലെ തിരക്ക് പാരമ്യത്തിലെത്തും. എറണാകുളത്തുനിന്ന് ഉച്ചകഴിഞ്ഞ് 1.55നുള്ള പരശുറാമിനും 5.20നുള്ള വേണാടിനും ഇടയില്‍ കൊല്ലത്തേക്ക് ഒരു മെമു അനുവദിച്ചാല്‍ വലിയ ആശ്വാസമാകും. 1.30ന് ഗുരുവായൂരില്‍നിന്ന് എറണാകുളത്തേക്കുള്ള പാസഞ്ചര്‍ കൊല്ലത്തേക്കു ദീര്‍ഘിപ്പിച്ചാല്‍ വൈകുന്നേരത്തെ തിരക്കിനു കുറവു വരും.

ധന്യന്‍ കദളിക്കാട്ടിലച്ചന്‍റെ ജീവിതവിശുദ്ധി അനേകര്‍ക്ക് അനുഗ്രഹം: മാര്‍ ജോര്‍ജ് മഠത്തിക്കണ്ടത്തില്‍

പാലാ: ധന്യന്‍ കദളിക്കാട്ടില്‍ മത്തായി അച്ചന്‍റെ ജീവിതവിശുദ്ധിയും സ്വപ്നങ്ങളും ഇന്ന് അനേകര്‍ക്ക് അനുഗ്രഹമാകുന്നുവെന്ന് കോതമംഗലം രൂപതാധ്യക്ഷന്‍ മാര്‍ ജോര്‍ജ് മഠത്തിക്കണ്ടത്തില്‍. ധന്യന്‍ കദളിക്കാട്ടില്‍ മത്തായി അച്ചന്‍റെ ചരമവാര്‍ഷികത്തോടനുബന്ധിച്ചുള്ള നവനാള്‍ ദിനത്തില്‍ പാലാ എസ്എച്ച് പ്രൊവിന്‍ഷ്യല്‍ ഹൗസ് കപ്പേളയില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു ബിഷപ്. ദൈവസ്‌നേഹത്തിലും പരസ്‌നേഹത്തിലും മുഴുകി പൗരോഹിത്യജീവിതം ധന്യമാക്കിത്തീര്‍ത്ത പുണ്യാത്മാവാണ് ധന്യന്‍ കദളിക്കാട്ടില്‍ മത്തായിച്ചന്‍. ദൈവം തന്നില്‍ നിക്ഷേപിച്ച അനുഗ്രഹ നീര്‍ച്ചാല്‍ തുടര്‍ന്നുകൊണ്ടു പോകാന്‍ അദ്ദേഹത്താല്‍ തിരുഹൃദയ സന്യാസിനീസമൂഹം സ്ഥാപിതമായി. തിരുഹൃദയ സന്യാസിനീസമൂഹം 114 വര്‍ഷങ്ങളായി ലോകത്തിന്‍റെ വിവിധ ഭാഗങ്ങളില്‍ ശുശ്രൂഷ ചെയ്യുന്നു. ഇതെല്ലാം സാധിച്ചതു മത്തായി അച്ചന്‍റെ ദൈവസ്‌നേഹവും ആത്മാക്കള്‍ക്ക് വേണ്ടിയുള്ള ദാഹവും തീഷ്ണതയും മൂലമാണെന്നും അദ്ദേഹം പറഞ്ഞു. ഇന്ന് ഉച്ചകഴിഞ്ഞ് മൂന്നിന് വിശുദ്ധ കുര്‍ബാന, നവനാള്‍ പ്രാര്‍ഥന - മാര്‍ ജോണ്‍ നെല്ലിക്കുന്നേല്‍ (ഇടുക്കി രൂപത ബിഷപ്).

കടപ്ലാമറ്റം മിനി സിവിൽ സ്റ്റേഷൻ നിർമാണം പുരോഗതിയിൽ

കടപ്ലാമറ്റം: കടപ്ലാമറ്റം ഗ്രാമപഞ്ചായത്തിലെ മിനി സിവിൽ സ്റ്റേഷൻ കെട്ടിടനിർമാണ പ്രവർത്തനങ്ങൾ പുരോഗതിയിൽ. മോൻസ് ജോസഫ് എംഎൽഎയുടെ ആസ്തി വികസന ഫണ്ടിൽനിന്നനുവദിച്ച രണ്ടു കോടി രൂപ വിനിയോഗിച്ചാണ് പദ്ധതി നടപ്പാക്കുന്നത്. രണ്ടു ഘട്ടങ്ങളിലായിട്ടാണു നിർമാണ പ്രവർത്തനങ്ങൾ പൂർത്തീകരിക്കുന്നത്. 2019-20 വർഷത്തിലെ ആസ്തി വികസന ഫണ്ടിൽനിന്ന് അനുവദിച്ച ഒരു കോടി രൂപയിലാണ് താഴത്തെ നിലയുടെ പണി പൂർത്തീകരിച്ചത്. കടപ്ലാമറ്റം പഞ്ചായത്തിൽനിന്ന് 50 മീറ്റർ ദൂരത്തിലാണ് മിനി സിവിൽ സ്റ്റേഷൻ നിർമിക്കുന്നത്. 1198.5 ചതുരശ്ര മീറ്ററിൽ നിർമിക്കുന്ന കെട്ടിടത്തിൽ വിവിധ സർക്കാർ സ്ഥാപനങ്ങൾക്ക് തൃപ്തികരമായി പ്രവർത്തിക്കാനുള്ള അടിസ്ഥാനസൗകര്യങ്ങളാണ് ഒരുക്കുന്നത്. പഞ്ചായത്ത് ഓഫീസ്, വില്ലേജ് ഓഫീസ്, ഹോമിയോ ആശുപത്രി, വിഇഒ ഓഫീസ്, കുടുംബശ്രീ ഓഫീസ്, തദ്ദേശ സ്വയംഭരണവകുപ്പ് ഓഫീസ് എന്നിവയാണ് ഉണ്ടാവുക. കടപ്ലാമറ്റം പഞ്ചായത്തിന്‍റെ പരിധിയിൽ വരുന്ന വില്ലേജ് ഓഫീസ് ഉൾപ്പെടെയുള്ള സർക്കാർ സ്ഥാപനങ്ങൾ മിനി സിവിൽ സ്റ്റേഷൻ പൂർത്തിയാകുന്നതോടെ ഒരു കുടക്കീഴിലാകും.

പക്ഷാഘാത ബോധവത്കരണം

കുറവിലങ്ങാട്: പാലാ രൂപതയുടെ പ്ലാറ്റിനം ജൂബിലി, മാര്‍ സ്ലീവാ മെഡിസിറ്റിയുടെ അഞ്ചാം വാര്‍ഷികം എന്നിവയോടനുബന്ധിച്ച് നടപ്പാക്കുന്ന സാമൂഹിക പദ്ധതികളുടെ ഭാഗമായി പിതൃവേദിയുമായി സഹകരിച്ചു രൂപതയിലെ വിവിധ പള്ളികളില്‍ നടത്തിവന്ന പക്ഷാഘാത ബോധവത്കരണ പരിപാടിയുടെ സമാപനം കുറവിലങ്ങാട് മേജര്‍ ആര്‍ക്കിഎപ്പിസ്‌കോപ്പല്‍ മര്‍ത്തമറിയം ആര്‍ച്ച്ഡീക്കന്‍ തീര്‍ഥാടന ദേവാലയത്തില്‍ നടന്നു. മാര്‍ സ്ലീവാ മെഡിസിറ്റി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ സമാപന സമ്മേളനം ഉദ്ഘാടനം ചെയ്തു. ആര്‍ച്ച്പ്രീസ്റ്റ് റവ. ഡോ. തോമസ് മേനാച്ചേരി അധ്യക്ഷത വഹിച്ചു. പിതൃവേദി രൂപത ഡയറക്ടര്‍ ഫാ. ജോസഫ് നരിതൂക്കില്‍, രൂപത പ്രസിഡന്‍റ് ജോസ് തോമസ്, കോ-ഓര്‍ഡിനേറ്റര്‍ ബിന്‍സ് ജോസ്, യൂണിറ്റ് പ്രസിഡന്‍റ് ടിക്‌സണ്‍ മണിമലതടത്തില്‍, സെക്രട്ടറി ലൂക്കോസ് പുത്തന്‍കുളം എന്നിവര്‍ പ്രസംഗിച്ചു. ന്യൂറോളജി വിഭാഗം കണ്‍സള്‍ട്ടന്‍റ് ഡോ. ജോസി ജെ. വള്ളിപ്പാലം ബോധവത്കരണ ക്ലാസ് നയിച്ചു.

വട്ടോത്തുകുന്നേല്‍ഭാഗം കുടിവെള്ള പദ്ധതിയുടെ നിര്‍മാണ പ്രവര്‍ത്തനങ്ങള്‍ പുനരാരംഭിച്ചു

മീനച്ചില്‍: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി രണ്ടു ഘട്ടങ്ങളിലായി അനുവദിച്ച 30 ലക്ഷം രൂപ ഉപയോഗിച്ച് മീനച്ചില്‍ പഞ്ചായത്ത് 11-ാം വാര്‍ഡില്‍ നിര്‍മിക്കുന്ന വട്ടോത്തുകുന്നേല്‍ ഭാഗം കുടിവെള്ള പദ്ധതിയുടെ കിണറിന്‍റെ മുടങ്ങിയ നിര്‍മാണ പ്രവര്‍ത്തനങ്ങള്‍ പുനരാരംഭിച്ചതായി ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അറിയിച്ചു. മാസങ്ങള്‍ക്കു മുമ്പ് കിണറിന്‍റെ നിര്‍മാണ പ്രവര്‍ത്തനങ്ങള്‍ നടക്കുന്നതിനിടയില്‍ മണ്ണിടിഞ്ഞുവീണ് തമിഴ്‌നാട് സ്വദേശിയായ ഒരാള്‍ മരിച്ചിരുന്നു. പന്ത്രണ്ട് അടി വ്യാസത്തില്‍ റിംഗുകള്‍ തീര്‍ത്ത് കിണറ്റില്‍ ഇറക്കുന്ന രീതിയില്‍ പുനര്‍നിര്‍മാണം നടത്തുന്നതിനാണ് തീരുമാനിച്ചിരിക്കുന്നത്. നിര്‍മാണ പ്രവര്‍ത്തനങ്ങളെപ്പറ്റി ആലോചിക്കുന്നതിനായി ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കലിന്‍റെ നിര്‍ദേശാനുസരണം വിളിച്ചുചേര്‍ത്ത ജനപ്രതിനിധികളുടെയും ഉദ്യോഗസ്ഥരുടെയും യോഗത്തില്‍ പഞ്ചായത്ത് പ്രസിഡന്‍റ് സോജന്‍ തൊടുക അധ്യക്ഷത വഹിച്ചു. രാജേഷ് വാളിപ്ലാക്കല്‍, പഞ്ചായത്ത് മെംബര്‍ സാജോ പൂവത്താനി, ജില്ലാ പ്ലാനിംഗ് ഓഫീസര്‍, ജില്ലാ, ബ്ലോക്ക്, പഞ്ചായത്ത് എന്‍ജിനിയര്‍മാര്‍ തുടങ്ങിയവര്‍ പങ്കെടുത്തു.

പാലാ നഗരസഭയിൽ മഴക്കാലപൂര്‍വ ശുചീകരണം

പാലാ: മഴക്കാല മുന്നൊരുക്ക പ്രവര്‍ത്തനങ്ങളുടെ ഭാഗമായുള്ള ശുചീകരണ പ്രവര്‍ത്തനങ്ങള്‍ കാര്യക്ഷമമായി നടപ്പിലാക്കാന്‍ നഗരസഭയില്‍ ചേര്‍ന്ന അടിയന്തര യോഗം തീരുമാനിച്ചു. പുതിയ അധ്യയന വര്‍ഷാരംഭത്തോടനുബന്ധിച്ച് അങ്കണവാടികള്‍, സ്‌കൂളുകള്‍, കോളജുകള്‍ തുടങ്ങിയ സ്ഥാപനങ്ങളുടെ കോമ്പൗണ്ടുകള്‍ മാലിന്യമുക്തമാക്കുന്നതിനും കുടിവെള്ള സ്രോതസുകള്‍ ക്ലോറിനേഷന്‍ നടത്തുന്നതിനും വാട്ടര്‍ ടാങ്കുകള്‍ വൃത്തിയാക്കുന്നതിനും വിദ്യാഭ്യാസ സ്ഥാപന പരിസരങ്ങളിലെ അപകടാവസ്ഥയിലുള്ള വൃക്ഷങ്ങള്‍ മുറിച്ചു നീക്കുന്നതിനും തീരുമാനിച്ചു. കൊതുകുജന്യ രോഗങ്ങളും എലിപ്പനി, മറ്റു പകര്‍ച്ചവ്യാധികള്‍ എന്നിവ നിയന്ത്രിക്കുന്നതിനും വാര്‍ഡ് തലത്തില്‍ ശുചിത്വ കമ്മിറ്റികളുടെ നേതൃത്വത്തില്‍ ഊര്‍ജിതമായ പ്രവര്‍ത്തനങ്ങള്‍ സംഘടിപ്പിക്കും. വിദ്യാലയങ്ങളില്‍ ലഹരിവിരുദ്ധ ബോധവത്കരണ പ്രവര്‍ത്തനങ്ങളും നിരീക്ഷണങ്ങളും കര്‍ക്കശമാക്കുന്നതിനും മയക്കുമരുന്ന് വിരുദ്ധ ജാഗ്രതാസമിതികള്‍ ശക്തിപ്പെടുത്തുന്നതിനും യോഗം തീരുമാനിച്ചു. നഗരസഭാ ചെയർമാൻ തോമസ് പീറ്റർ യോഗം ഉദ്ഘാടനം ചെയ്തു. വൈസ് ചെയര്‍പേഴ്‌സണ്‍ ബിജി ജോജോ അധ്യക്ഷത വഹിച്ചു. സ്റ്റാന്‍ഡിംഗ് കമ്മിറ്റി അധ്യക്ഷന്മാര്‍, ക്ലീന്‍ സിറ്റി മാനേജര്‍ ആറ്റ്‌‌ലി പി. ജോണ്‍, താലൂക്ക് ആശുപത്രി പബ്ലിക് ഹെല്‍ത്ത് ഇന്‍സ്‌പെക്ടര്‍ കുഞ്ഞബ്ദുള്ള എന്നിവര്‍ പ്രസംഗിച്ചു. നഗരസഭാ ആരോഗ്യവിഭാഗം ഉദ്യോഗസ്ഥര്‍, നഗരസഭാ പ്രദേശത്തെ സ്‌കൂള്‍, കോളജ് പ്രിന്‍സിപ്പല്‍മാര്‍, പ്രധാനാധ്യാപകര്‍, ആശാ പ്രവര്‍ത്തകര്‍ എന്നിവര്‍ യോഗത്തില്‍ പങ്കെടുത്തു.

ഡോ. രാജം പി.ആർ.എസ്. പിള്ളയ്ക്ക് പുരസ്‌കാരം നൽകി

പൊൻകുന്നം: മാനസികവളർച്ചക്കുറവുള്ള കുട്ടികളുടെ ക്ഷേമത്തിനായി നാലു പതിറ്റാണ്ടിലേറെ പ്രവർത്തിച്ച ഡോ. രാജം പി.ആർ.എസ്. പിള്ളയ്ക്ക് വെള്ളാള ആർട്‌സ് ആൻഡ് കൾച്ചറൽ ഫൗണ്ടേഷൻ കണ്ണകിദേവി പുരസ്‌കാരം സമ്മാനിച്ചു. പൊൻകുന്നം സ്വദേശിനിയായ ഡോ. രാജം തിരുവനന്തപുരം ജവഹർനഗറിലാണ് താമസിക്കുന്നത്. 96 വയസുള്ള ഡോ. രാജത്തിന് തിരുവനന്തപുരത്തെ വീട്ടിൽ നടന്ന ചടങ്ങിൽ ചലച്ചിത്രസംവിധായകൻ അടൂർ ഗോപാലകൃഷ്ണൻ പുരസ്‌കാരം സമ്മാനിച്ചു. ഡോ. ശശി തരൂർ എംപി മുഖ്യാതിഥിയായിരുന്നു. ഫൗണ്ടേഷൻ രക്ഷാധികാരി ഡോ. കാനം ശങ്കരപ്പിള്ള, ജനറൽ സെക്രട്ടറി അജീഷ് രാമനാഥപിള്ള, ശങ്കർ മോഹൻ തുടങ്ങിയവർ പ്രസംഗിച്ചു. പുരാതന ദ്രാവിഡ വെള്ളാള കുലത്തിന്‍റെ ആദ്യ ശാസ്ത്രീയ ചരിത്രമെഴുതിയ ഡോ. കാനം ശങ്കരപ്പിള്ളയെ അടൂർ ഗോപാലകൃഷ്ണനും ശശി തരൂരും അനുമോദിച്ചു.

സെപ്റ്റിക് ടാങ്കിനൊപ്പം സോക്പിറ്റും തകരാറിൽ; കംഫർട്ട് സ്റ്റേഷൻ അറ്റകുറ്റപ്പണി വൈകും

പൊൻകുന്നം: സെപ്റ്റിക് ടാങ്ക് ചോർന്നൊലിച്ചതിനെത്തുടർന്ന് ഒരു മാസമായി അടച്ചിട്ട പൊൻകുന്നം ബസ് സ്റ്റാൻഡിലെ കംഫർട്ട് സ്റ്റേഷന്‍റെ തകരാർ പരിഹരിക്കൽ നീളും. സോക്പിറ്റ് കൂടി തകരാറിലാണെന്ന് കണ്ടെത്തിയതിനെ തുടർന്നാണിത്. ഇതിന്‍റെ നിർമാണം കൂടി തീർക്കേണ്ടതിനാൽ മുൻ നിശ്ചയിച്ച സമയപരിധിയിൽ ജോലികൾ തീരില്ല. സെപ്റ്റിക് ടാങ്ക് നിറഞ്ഞ് മാലിന്യം പുറത്തേക്കൊഴുകിയതോടെയാണ് പൂട്ടിയത്. സർക്കാരിന്‍റെ വഴിയിടം പദ്ധതിയിൽ നവീകരിച്ചതാണ് പഴയ കംഫർട്ട് സ്റ്റേഷൻ. മൂന്നാഴ്ചയ്ക്കുള്ളിൽ നിർമാണം തീർത്ത് തുറക്കുമെന്ന് ചിറക്കടവ് പഞ്ചായത്ത് അധികൃതർ ഉറപ്പുനൽകിയെങ്കിലും സോക്പിറ്റ് തകരാർ കൂടി പരിഹരിക്കേണ്ടതിനാൽ കൂടുതൽ സമയമെടുക്കും. സ്റ്റാൻഡിലെത്തുന്ന യാത്രക്കാർക്ക് പ്രാഥമിക ആവശ്യങ്ങൾ നിർവഹിക്കാൻ ടൗണിലെ മിനി സിവിൽ സ്റ്റേഷനിലെ ശൗചാലയമാണ് ഇപ്പോൾ ആശ്രയം. സിവിൽ സ്റ്റേഷന്‍റെ പാർക്കിംഗ് നിലയിലുള്ള ശൗചാലയമാണ് പഞ്ചായത്തിന്‍റെ ചുമതലയിൽ ഇപ്പോൾ പ്രവർത്തിക്കുന്നത്.

ഇടക്കുന്നം-കൊരട്ടിപ്പടി-നാടുകാണി റോഡ് ഉദ്ഘാടനം ചെയ്തു

പാറത്തോട്: പാറത്തോട് പഞ്ചായത്ത് എട്ടാം വാർഡിലെ ഇടക്കുന്നം-കൊരട്ടിപ്പടി-നാടുകാണി റോഡ് എംഎൽഎ ഫണ്ടിൽനിന്ന് പത്തു ലക്ഷം രൂപ അനുവദിച്ച് കോൺക്രീറ്റിംഗ് നടത്തി ഗതാഗതയോഗ്യമാക്കിയതിന്‍റെ ഉദ്ഘാടനം സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. പഞ്ചായത്ത് പ്രസിഡന്‍റ് കെ.കെ. ശശികുമാർ അധ്യക്ഷത വഹിച്ചു. വാർഡ് മെംബർ സുമിന അലിയാർ, പഞ്ചായത്തംഗങ്ങളായ ഡയസ് കോക്കാട്ട്, കെ.യു. അലിയാർ, ജമാഅത്ത് സെക്രട്ടറി ബഷീർ കല്ലാനിക്കൽ, മുഹമ്മദ് ഫൈസൽ, അബ്ദുൾ സലാം, റഷീദ് മുക്കാലി, തോമസ് വാഴക്കാപാറ, ജോയി തെക്കേവയലിൽ തുടങ്ങിയവർ പ്രസംഗിച്ചു. ഇടക്കുന്നം-വട്ടക്കാവ് റോഡിന് സമാന്തരമായി ഇടക്കുന്നം തോടിന്‍റെ തീരത്തുകൂടി പോകുന്ന ഈ തീരദേശ റോഡ് കൊരട്ടിപ്പടി ഭാഗത്തെയും നാടുകാണി അടിവാരം ഭാഗത്തെയും നിരവധി കുടുംബങ്ങളുടെ ഏക ഗതാഗത മാർഗമാണ്. പ്രളയത്തിലും മറ്റും തകർന്നിരുന്ന ഈ റോഡിൽ വാഹനഗതാഗതം ദുരിതപൂർണമായിരുന്നു. വാർഡ് മെംബർ സുമിന അലിയാരുടെയും റോഡ് വികസന സമിതി കൺവീനർ ജോയി തെക്കേവയലിന്‍റെയും നേതൃത്വത്തിൽ എംഎൽഎയ്ക്ക് നിവേദനം നൽകിയതിനെത്തുടർന്നാണ് പത്തു ലക്ഷം രൂപ അനുവദിച്ചത്. മുന്പ് എംഎൽഎ ഫണ്ടിൽനിന്ന് മൂന്നു ലക്ഷം രൂപയും പഞ്ചായത്ത് ഫണ്ട് ആറു ലക്ഷം രൂപയും ഉപയോഗിച്ച് റോഡിന്‍റെ ആദ്യഭാഗങ്ങൾ കോൺക്രീറ്റ് ചെയ്തിരുന്നു. തോട്ടുതീരത്ത് സംരക്ഷണവേലിയും നിർമിച്ചിരുന്നു. ഇപ്പോൾ നടത്തിയ കോൺക്രീറ്റിംഗ് പ്രവൃത്തികൾ കൂടി പൂർത്തീകരിച്ചതോടെ ജനവാസ മേഖലകളിൽ പൂർണമായും റോഡ് ഗതാഗതയോഗ്യമായി.

എല്ലാരും പാടുന്നു; ദേശീയ വായനശാലയിൽ പാട്ടുനിറഞ്ഞ് 50-ാം മാസ ആഘോഷം

പനമറ്റം: ദേശീയ വായനശാലയിൽ എല്ലാരും പാടുന്നു എന്ന സംഗീത കൂട്ടായ്മയുടെ അന്പതാം മാസ ആഘോഷത്തിൽ മണിക്കൂറുകൾ നീണ്ട പാട്ടുത്സവം. കുട്ടികളും മുതിർന്നവരുമായി 39 പേർ വേദിയിൽ പാടി. പാട്ടുത്സവത്തിന്‍റെ ഉദ്ഘാടനം ഗാനരചയിതാവ് വയലാർ ശരത്ചന്ദ്രവർമ നിർവഹിച്ചു. കോളജ് പഠനകാലത്ത് യേശുദാസിന്‍റെ പാട്ട് വേദിയിൽ കേട്ട അനുഭവം ശരത്ചന്ദ്രവർമ പങ്കുവച്ചു. ദാസേട്ടൻ പാടിക്കഴിഞ്ഞപ്പോൾ ഒരു മനുഷ്യനും കൈയടിക്കുന്നില്ല. കുറച്ചുകഴിഞ്ഞപ്പോൾ ഒരാൾ കൈയടിച്ചു. അതോടെ കരഘോഷമായി. അവർ എല്ലാം മറന്നിരുന്നുപോയിരുന്നു. വേദിയിലെ പാട്ടുകൾ ആസ്വദിക്കുകയും അഭിനന്ദിക്കുകയും ചെയ്ത വയലാർ തിരുത്തലുകൾ നിർദേശിക്കുകയും ചെയ്തു. 2.25ന് തുടങ്ങിയ പാട്ടുത്സവം അവസാനിച്ചത് രാത്രി 7.30നാണ്. വായനശാലാ പ്രസിഡന്‍റ് എസ്. രാജീവ് അധ്യക്ഷത വഹിച്ചു.

ഓർമകളുടെ മൈതാനത്ത് തലമുറകളുടെ സംഗമം

കാഞ്ഞിരപ്പള്ളി: നൂറിലധികം വർഷം പഴക്കമുള്ള കുന്നുംഭാഗം ഗവൺമെന്‍റ് ഹൈസ്കൂൾ മൈതാനത്ത് തലമുറകളുടെ സംഗമം നടത്തി. സ്പോർട്സ് സ്കൂളായി ഉയർത്തിയതോടെ മൈതാനത്തിന്‍റെ രൂപവും ഭാവവും മാറുന്നതിനു മുമ്പ് ചീഫ് വിപ്പ് ഡോ. എൻ. ജയരാജിന്‍റെ നേതൃത്വത്തിൽ നടത്തിയ ഫുട്ബോൾ, ക്രിക്കറ്റ് ടൂർണമെന്‍റുകളോട് ചേർന്നാണ് സ്കൂൾ മൈതാനത്ത് സ്നേഹസംഗമം എന്ന പേരിൽ പൂർവവിദ്യാർഥീ സംഗമം സംഘടിപ്പിച്ചത്. സംഗമത്തിൽ മുൻ അധ്യാപകരും ഗ്രൗണ്ടിൽ കളിച്ച ദേശീയ കായികതാരങ്ങളായവർ അടക്കം പങ്കെടുത്തു. ചീഫ് വിപ്പ് ഡോ. എൻ. ജയരാജ് സ്നേഹസംഗമം ഉദ്ഘാടനം ചെയ്തു. പ്രോഗ്രാം കോ-ഓർഡിനേറ്റർ ആന്‍റണി മാർട്ടിൻ, ഗിരീഷ് എസ്. നായർ, സുമേഷ് ആൻഡ്രൂസ്, ബേബിച്ചൻ എർത്തയിൽ, മുൻ അധ്യാപകരായ സി.ആർ. സന്തോഷ് കുമാർ, കൃഷ്ണപിള്ള വലിയേടത്ത്, കെ.ജെ. ദേവസ്യ, അനിൽകുമാർ വെട്ടിക്കാപള്ളി, ബിനോയി മുണ്ടുവേലിക്കുന്നൽ, ബാലചന്ദ്രൻ ഉറുമ്പിൽ, ശ്രീകാന്ത് പുത്തൻവീട്ടിൽ, പ്രഫ. എം.ടി. ജോണി, തങ്കച്ചൻ പേഴത്തുവയലിൽ, ജോസുകുട്ടി വെട്ടിക്കാട്ട്, ജോയി മുണ്ടുവേലിക്കുന്നൽ എന്നിവർ പ്രസംഗിച്ചു.

കുടമാളൂര്‍ പള്ളി മതസൗഹാര്‍ദത്തിന്‍റെ പ്രതീകം: ഗവര്‍ണര്‍ പി.എസ്. ശ്രീധരന്‍പിള്ള

സ്വന്തം ലേഖകന്‍ കുടമാളൂര്‍: നൂറുകണക്കിനു വിശ്വാസികളെ സാക്ഷിനിര്‍ത്തി പ്രാര്‍ഥനാ മഞ്ജരികളുടെയും സ്തുതിഗീതങ്ങളുടെയും അകമ്പടിയില്‍ ചങ്ങനാശേരി അതിരൂപതയുടെ ഏക മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന കേന്ദ്രമായ കുടമാളൂര്‍ സെന്‍റ് മേരീസ് ദേവാലയം സ്ഥാപിതമായതിന്‍റെ 900 വര്‍ഷ മഹാജൂബിലി ആഘോഷത്തിനു തുടക്കമായി. ഇന്നലെ വൈകുന്നേരം മുക്തിമാതാ ഓഡിറ്റോറിയത്തില്‍ ചേര്‍ന്ന ജൂബിലി സമ്മേളനം ഗോവ ഗവര്‍ണര്‍ പി.എസ്. ശ്രീധരന്‍പിള്ള ഉദ്ഘാടനം ചെയ്തു. മതസൗഹാര്‍ദത്തിന്‍റെ പ്രതീകമാണ് കുടമാളൂര്‍ പള്ളിയെന്ന് ഗവര്‍ണര്‍ പി.എസ്. ശ്രീധരന്‍പിള്ള പറഞ്ഞു. വര്‍ത്തമാന കാലഘട്ടത്തില്‍ സമൂഹത്തിനു പുരോഗതിയും വികസനവും വിദ്യാഭ്യാസപരമായ നേട്ടവും നല്‍കാന്‍ ഈ ദേവാലയത്തിനു സാധിച്ചെന്നും ഗവര്‍ണര്‍ പറഞ്ഞു. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിച്ചു. ആഴമേറിയ ആത്മീയ സമൂഹമുള്ള ഇടവകയെന്നതിലപ്പുറം മതസൗഹാര്‍ദത്തിന്‍റെ പ്രതീകംകൂടിയാണ് കുടമാളൂര്‍ ഇടവക. ക്രൈസ്തവ സമൂഹം ഉള്ളിടത്ത് വളര്‍ച്ചയും വികാസവും നന്മയും ഉണ്ടെന്നും ക്രൈസ്തവ ആതുരാലയങ്ങളും സ്ഥാപനങ്ങളും നാടിനെ പുരോഗതിയിലേക്ക് നയിക്കുന്ന ഘടകങ്ങളാണെന്നും ആര്‍ച്ച്ബിഷപ് മാര്‍ തറയില്‍ പറഞ്ഞു. മന്ത്രി വി.എന്‍. വാസവന്‍ മുഖ്യപ്രഭാഷണം നടത്തി. തിരുവഞ്ചൂര്‍ രാധാകൃഷ്ണന്‍ എംഎല്‍എ, മോന്‍സ് ജോസഫ് എംഎല്‍എ, ചങ്ങനാശേരി അതിരൂപത പ്രോട്ടോ സിഞ്ചെല്ലൂസ് ഫാ. ആന്‍റണി എത്തയ്ക്കാട്ട്, കൈക്കാരന്‍ സോണി ജോസഫ് നെടുംതകിടി, പാരിഷ് കൗണ്‍സില്‍ സെക്രട്ടറി ഫ്രാങ്ക്ളിന്‍ ജോസഫ് പുത്തന്‍പറമ്പില്‍ തുടങ്ങിയവര്‍ പ്രസംഗിച്ചു. ആര്‍ച്ച് പ്രീസ്റ്റ് റവ.ഡോ.മാണി പുതിയിടം സ്വാഗതവും അഡ്മിനിസ്ട്രേറ്റര്‍ ഫാ. ജസ്റ്റിന്‍ വരവുകാലായില്‍ നന്ദിയും പറഞ്ഞു. ഗവര്‍ണര്‍ പി.എസ്. ശ്രീധരന്‍പിള്ളയ്ക്ക് കുടമാളൂര്‍ ഇടവകയുടെ സ്‌നേഹോപഹാരം ആര്‍ച്ച്ബിഷപ് മാര്‍ തോമസ് തറയിലും ആര്‍ച്ച്പ്രീസ്റ്റ് റവ.ഡോ. മാണി പുതിയിടവും ചേര്‍ന്ന് സമ്മാനിച്ചു. സമ്മേളനത്തിനു മുന്നോടിയായി ആര്‍ച്ച്പ്രീസ്റ്റ് റവ.ഡോ. മാണി പുതിയിടത്തിന്‍റെ മുഖ്യകാര്‍മികത്വത്തില്‍ ഇടവകയില്‍ ശുശ്രൂഷ ചെയ്തിരുന്ന വൈദികർ സമൂഹബലി അര്‍പ്പിച്ചു. ചെമ്പകശേരി രാജാവ് എഡി 115ല്‍ സ്ഥാപിച്ചതാണ് കുടമാളൂര്‍ പഴയപള്ളി. 2009 മേയ് 20നു കുടമാളൂര്‍ തീര്‍ഥാടന കേന്ദ്രമായി. 2020 സെപ്റ്റംബര്‍ 13ന് മേജര്‍ ആര്‍ക്കി എപ്പിസ്‌കോപ്പല്‍ ദേവാലയമായി. 1500 കുടുംബങ്ങളാണ് ഇടവകയിലുള്ളത്. വിശുദ്ധ അല്‍ഫോന്‍സാമ്മയുടെ ഇടവകപള്ളിയാണ്. വിശുദ്ധ ചാവറയച്ചന്‍ താമസിച്ച വൈദിക മന്ദിരവും ഇവിടെയുണ്ട്.

വളർത്തുനായയെ പുലി കൊന്നു വന്യമൃഗഭീതിയിൽ കുറ്റിപ്ലാങ്ങാട് ഗ്രാമം

കൊക്കയാർ: നാട്ടിൽ ഇറങ്ങിയ പുലി വളർത്തുനായയെ കടിച്ചുകീറി കൊന്നു. വന്യമൃഗ ഭീതിയിൽ കുറ്റിപ്ലാങ്ങാട് ഗ്രാമം. ഉറുമ്പിക്കര ഈസ്റ്റ് കോളനിയിലാണ് പുലിയുടെ ആക്രമണം ഉണ്ടായത്. കിടുകല്ലിങ്കൽ ബിജുവിന്‍റെ വളർത്തുനായയെയാണ് കൊലപ്പെടുത്തിയ നിലയിൽ കണ്ടെത്തിയത്. ഇന്നലെ രാത്രി 11ഓടെ മുറ്റത്ത് നായയുടെ കരച്ചിൽ കേട്ടെങ്കിലും ഭീതി കാരണം പുറത്തിറങ്ങി നോക്കിയില്ലെന്ന് ബിജുവിന്‍റെ കുടുംബാംഗങ്ങൾ പറയുന്നു. തുടർന്ന് രാവിലെ നായയെ കാണാതാവുകയും തെരച്ചിലിൽ 500 മീറ്റർ മാറി വനംഭാഗത്ത് നായയുടെ ജഡം കണ്ടെത്തുകയും ചെയ്തു. ഉടലും തലയും വേർപെട്ട നിലയിലും ശരീരഭാഗത്തിന്‍റെ പകുതി ഇല്ലാത്ത അവസ്ഥയിലുമാണ് കണ്ടെത്തിയത്. വന്യമൃഗ ആക്രമണം ആണെന്നറിഞ്ഞതോടെ വനം വകുപ്പിൽ വിവരമറിയിച്ചു. എരുമേലി റേഞ്ച് ഓഫീസർ ഹരിലാലിന്‍റെ നേതൃത്വത്തിലുള്ള സംഘം സ്ഥലത്തെത്തി. പ്രദേശത്തു കണ്ടെത്തിയ കാൽപ്പാടുകൾ പരിശോധിച്ച് ഇവ പുലിയുടേതാണെന്ന് ഉറപ്പുവരുത്തുകയും ചെയ്തു. പുലിയെ പിടികൂടുന്നതിനായി കൂട് സ്ഥാപിക്കുന്നതിന്‍റെ പ്രാരംഭ നടപടികളുടെ ഭാഗമായി ഉടൻ പ്രദേശത്തു കാമറകൾ സ്ഥാപിക്കുമെന്നും കാമറകളിൽ പുലിയുടെ ദൃശ്യം പതിഞ്ഞാൽ കൂടുവയ്ക്കാനുള്ള നടപടികൾ സ്വീകരിക്കുമെന്നും അധികൃതർ അറിയിച്ചു. വനാതിർത്തി മേഖലയാണെങ്കിലും ഈ പ്രദേശത്ത് ആദ്യമായാണ് വന്യജീവികളുടെ ശല്യം ഉണ്ടാകുന്നത്. ഇതോടെ ഇവിടത്തെ ജനങ്ങൾ ഭീതിയിലാണ്.

വലിയ വാഹനങ്ങള്‍ കണ്ണിമല എസ് വളവ് കടക്കുന്നത് അപകടഭീതിയില്‍

എരുമേലി: ഇറക്കത്തിലെ കൊടുംവളവാണ് മുണ്ടക്കയം-എരുമേലി റോഡിലെ കണ്ണിമല മഠം പടിയില്‍ വലിയ വാഹനങ്ങളുടെ നിയന്ത്രണം തെറ്റിക്കുന്നത്. താഴ്ന്ന ഗിയറില്‍ സഞ്ചരിച്ചാല്‍ എസ് ആകൃതിയിലുള്ള ഈ വളവില്‍ വാഹനം തിരിഞ്ഞുകിട്ടില്ലെന്ന് ഇക്കഴിഞ്ഞ ശബരിമല സീസണില്‍ റോഡ് സേഫ് സോണ്‍ ഓഫീസറായി പ്രവര്‍ത്തിച്ച ജോയിന്‍റ് ആര്‍ടിഒ ഷാനവാസ് കരീം പറയുന്നു. വേഗം പരമാവധി കുറയ്ക്കണം വേഗം പരമാവധി കുറച്ച് ഏറ്റവും സാവധാനം സഞ്ചരിച്ചാലാണ് വലിയ വാഹനങ്ങള്‍ക്ക് കണ്ണിമലയിലെ എസ് വളവ് സേഫ് ആവുകയെന്നും അദ്ദേഹം പറയുന്നു. ഇക്കഴിഞ്ഞ ശബരിമല സീസണിന്‍റെ തുടക്കത്തില്‍ത്തന്നെ അപകടങ്ങളുണ്ടായതോടെ സീസണ്‍ സമാപിക്കുന്നതുവരെ രാത്രിയും പകലും പോലീസ് കാവലിലായിരുന്നു വളവിലെ ഗതാഗതം. ശബരിമല സീസണിലെ ആദ്യ ദിനത്തില്‍ പച്ചക്കറി ലോഡുമായി വന്ന ലോറി മറിഞ്ഞിരുന്നു. ഇതിന്‍റെ പിറ്റേന്ന് തീര്‍ഥാടകര്‍ സഞ്ചരിച്ച ബസ് നിയന്ത്രണം തെറ്റി ക്രാഷ് ബാരിയറില്‍ ഇടിച്ചു. ഭാഗ്യംകൊണ്ട് ബസ് താഴ്ചയിലേക്ക് മറിഞ്ഞില്ല. ഇതിന് മണിക്കൂറുകള്‍ക്ക് ശേഷം തീര്‍ഥാടകരുമായി വന്ന കാര്‍ ക്രാഷ് ബാരിയറില്‍ ഇടിച്ച് അടുത്ത അപകടം സംഭവിച്ചിരുന്നു. ഇറക്കത്തിലെ കൊടുംവളവില്‍ ഇതര സംസ്ഥാന ബസുകള്‍ക്ക് നിയന്ത്രണം നഷ്ടപ്പെടുന്ന സാഹചര്യമാണ് അപകടം സൃഷ്ടിക്കുന്നത്. ഈ റോഡില്‍ പരിചിതരായ ഡ്രൈവര്‍മാര്‍വരെ സാവധാനമാണ് ഇറക്കത്തില്‍ വാഹനമോടിച്ച് വളവ് തിരിഞ്ഞു പോകുന്നത്. എന്നാല്‍ ഇതര സംസ്ഥാന ഡ്രൈവര്‍മാര്‍ വേഗത്തില്‍ ഇറക്കം ഇറങ്ങി എത്തുന്പോൾ വളവ് തിരിയാന്‍ പ്രയാസമായതിനാല്‍ ശക്തമായി ബ്രേക്ക് ചെയ്യേണ്ടി വരുന്നു. വാഹനങ്ങളുടെയും ടയറുകളുടെയും പഴക്കം കൂടുതലാണെങ്കില്‍ ബ്രേക്കിന്‍റെ സ്വാധീനം കുറയും. ഒപ്പം നിയന്ത്രണം തെറ്റി അപകടത്തിലേക്കെത്തും. അലംഭാവം തുടരുന്നു അപകടങ്ങള്‍ കുറയ്ക്കാനുള്ള സമാന്തര സംവിധാനങ്ങള്‍ സംബന്ധിച്ച് തീരുമാനവും നടപടികളും ഉണ്ടാകുന്നില്ല. ശബരിമല സീസണ്‍ തുടങ്ങുന്നതിനു മുന്‍പു മാത്രമാണ് ദേശീയപാത അധികൃതരും പോലീസും മോട്ടോര്‍വാഹനവകുപ്പും റോഡിന്‍റെ അപകടാവസ്ഥയെക്കുറിച്ച് ചര്‍ച്ചകളും അവലോകനങ്ങളും നടത്തുന്നത്. താത്കാലികമായി കരിങ്കല്ലുകൊണ്ട് സംരക്ഷണഭിത്തിയും ക്രാഷ്ബാരിയര്‍ സ്ഥാപിക്കലും മാത്രമാണ് സുരക്ഷാ നടപടികളായി നടന്നിട്ടുള്ളത്. കുത്തനെയുള്ള ഇറക്കവും കൊടുംവളവും ഇല്ലാത്ത സമാന്തര റോഡ് നിര്‍മിക്കണമെന്നാണു നാട്ടുകാരുടെ ആവശ്യം. നിര്‍ദിഷ്ട ഭരണിക്കാവ്- മുണ്ടക്കയം 183 എ ദേശീയ പാതയുടെ റൂട്ട് ഇതുവഴി ആയതിനാല്‍ നാട്ടുകാരുടെ ഈ ആവശ്യം സഫലമാകുമെന്നാണ് പ്രതീക്ഷ.

അക്ഷരം മ്യൂസിയം കാണാം, യാത്രയും പോകാം

കോട്ടയം: അറിവിന്‍റെയും അക്ഷരങ്ങളുടെയും മുദ്രകള്‍ ഒരുക്കിയിരിക്കുന്ന കോട്ടയത്തെ അക്ഷരം മ്യൂസിയം യാത്രകളും ഒരുക്കുന്നു. ഭാഷയെയും സംസ്‌കാരത്തെയും സ്‌നേഹിക്കുന്നവര്‍ക്കും യാത്രകള്‍ ഇഷ്ടപ്പെടുന്നവര്‍ക്കുമായി അക്ഷരം ഭാഷാ-സാഹിത്യ-സാംസ്‌കാരിക മ്യൂസിയത്തിന്‍റെ നേതൃത്വത്തിലാണ് ടൂര്‍ പാക്കേജുകള്‍. കേരകം, ലെറ്റര്‍ ടൂറിസം എന്നീ രണ്ട് ട്രാവല്‍ പാക്കേജുകളാണു മ്യൂസിയം ഒരുക്കുന്നത്. അക്ഷരം, സാംസ്‌കാരിക കേന്ദ്രങ്ങളിലൂടെയുള്ള യാത്രകളാണ് പാക്കേജില്‍ ഉള്‍പ്പെടുത്തിയിരിക്കുന്നത്. ജൂണ്‍ ആദ്യവാരത്തില്‍ പാക്കേജുകള്‍ക്ക് തുടക്കമാകുമെന്ന് അധികൃതര്‍ അറിയിച്ചു. കോട്ടയത്തെ പ്രധാന കേന്ദ്രങ്ങളെ ബന്ധിപ്പിച്ചാണ് ലെറ്റര്‍ ടൂറിസം യാത്ര. ഇതിലൂടെ അക്ഷരം മ്യൂസിയം, കൊട്ടാരത്തില്‍ ശങ്കുണ്ണി സ്മാരക മന്ദിരം, താഴത്തങ്ങാടി ജുമാമസ്ജിദ്, തളിയില്‍ ക്ഷേത്രം, വലിയപള്ളി, ചെറിയപള്ളി, സിഎംഎസ് പ്രസ്, പഴയ സെമിനാരി, മാന്നാനം സെന്‍റ് ജോസഫ് പ്രസ്, കുമാരനല്ലൂര്‍ ക്ഷേത്രം, സിഎംഎസ് കോളജ്, പനച്ചിക്കാട് ക്ഷേത്രം എന്നിവ സന്ദര്‍ശിക്കാം. ഉച്ചഭക്ഷണവും ലഘുഭക്ഷണവും പാക്കേജിന്‍റെ ഭാഗമാണ്. കേരകം സാംസ്‌കാരിക ഏകദിന ടൂറിസം പാക്കേജില്‍ അക്ഷരം മ്യൂസിയത്തിനു പുറമേ, മാവേലിക്കര രാജാ രവിവര്‍മ ഫൈന്‍ ആര്‍ട്സ് കോളജ്, പല്ലന, കുമാരകോടി, കൃഷ്ണപുരം കൊട്ടാരം, ആര്‍ട്ട് ഗാലറി, അഴീക്കല്‍ ബീച്ച്, ലൈറ്റ് ഹൗസ് എന്നിവയാണ് ഉള്‍പ്പെടുത്തിയിരിക്കുന്നത്. അഴീക്കലില്‍ സാംസ്‌കാരിക പരിപാടിയുമുണ്ടാകും. പ്രഭാതഭക്ഷണം, ഉച്ചഭക്ഷണം, ലഘുഭക്ഷണം, അത്താഴം എന്നിവ ഈ പാക്കേജില്‍ ലഭ്യമാക്കും. എസി ബസിലാണ് യാത്ര. ഒപ്പം ടൂര്‍ ഗൈഡുമുണ്ടാകും. നിരക്ക് അടക്കമുള്ളവ അടുത്ത ദിവസങ്ങളില്‍ പ്രഖ്യാപിക്കും. എസ്പിസിഎസിന്‍റെ ഉടമസ്ഥതയില്‍ നാട്ടകത്ത് പ്രവര്‍ത്തിക്കുന്ന ഇന്ത്യയിലെ ആദ്യ ഭാഷാ മ്യൂസിയമായ അക്ഷരം മാത്രമായും സന്ദര്‍ശിക്കാന്‍ സൗകര്യമുണ്ട്. അക്ഷരങ്ങളുടെ ഉല്‍പത്തി മുതല്‍ വര്‍ത്തമാനകാല രൂപംവരെ എങ്ങനെ മാറിയെന്നു കണ്ടറിയാവുന്ന മ്യൂസിയത്തില്‍ ആറായിരം ഭാഷകളുടെ ഡിജിറ്റല്‍ ശേഖരമുണ്ട്. ദിവസവും രാവിലെ 10 മുതല്‍ രാത്രി ഏഴുവരെ പൊതുജനങ്ങള്‍ക്ക് മ്യൂസിയം സന്ദര്‍ശിക്കാം. തിങ്കളാഴ്ച അവധിയായിരിക്കും. പ്രവേശന ഫീസ് മുതിര്‍ന്നവര്‍ക്ക് 60 രൂപയും കുട്ടികള്‍ക്ക് 30 രൂപയുമാണ്. 20ല്‍ കൂടുതലുള്ള സ്‌കൂള്‍, കോളജ് സംഘങ്ങള്‍ക്ക് 20 ശതമാനം ഇളവുമുണ്ട്. ഫോണ്‍: 9567829587.

സുഹൃത്തുക്കൾക്കൊപ്പം കുളിക്കാനെത്തിയ യുവാവ് മുങ്ങിമരിച്ചു

കടുത്തുരുത്തി: സുഹൃത്തുക്കൾക്കൊപ്പം കുളിക്കാനെത്തിയ യുവാവ് തോട്ടിൽ മുങ്ങിമരിച്ചു. മാഞ്ഞൂർ ചന്ദ്രമന്ദിരം പ്രസന്നകുമാറിന്‍റെ മകൻ പി. വിഷ്ണു (25) ആണ് മരിച്ചത്. കുറുപ്പന്തറ കടവ് തോട്ടിൽ കാക്കശേരി താഴെ ഭാഗത്തായിരുന്നു അപകടം. ഇന്നലെ വൈകുന്നേരം ആറിനാണ് സംഭവം. സുഹൃത്തുക്കളായ വിവേക്, അഖിൽ എന്നിവർക്കൊപ്പമാണ് വിഷ്ണു കുളിക്കാൻ പോയത്. തോട്ടിൽ നീന്തുന്നതിനിടെ വിഷ്ണു മുങ്ങിത്താഴുകയായിരുന്നുവെന്നാണ് കൂടെയുണ്ടായിരുന്ന സുഹൃത്തുക്കൾ പറയുന്നത്. ഇവരുടെ ബഹളം കേട്ട് ഓടിക്കൂടിയ നാട്ടുകാർ തെരച്ചിൽ നടത്തിയെങ്കിലും കണ്ടെത്താനായില്ല. കടുത്തുരുത്തിയിൽനിന്നെത്തിയ അഗ്നിരക്ഷാ സേനാംഗങ്ങൾ ചേർന്ന് ചെളിയിൽ പുതഞ്ഞുപോയ മൃതദേഹം പുറത്തെടുത്തു. കോതനല്ലൂരിലെ പെയിന്‍റ് കടയിലെ ജീവനക്കാരനാണ് മരിച്ച വിഷ്ണു. മൃതദേഹം കോട്ടയം മെഡിക്കൽ കോളജ് ആശുപത്രിയിൽ. കടുത്തുരുത്തി പോലീസ് സ്ഥലത്തെത്തി മേൽനടപടി സ്വീകരിച്ചു. അമ്മ: അംബിക. സഹോദരങ്ങൾ: അഭിജിത്ത്, ജിഷ്ണു.

വെള്ളൂർ റബര്‍ പാര്‍ക്കില്‍ സംരംഭം: 32 കമ്പനികള്‍ രംഗത്ത്

കോട്ടയം: റബര്‍കര്‍ഷകര്‍ക്കു പ്രതീക്ഷയേകി വെള്ളൂരിലെ റബര്‍ പാര്‍ക്കില്‍ സംരംഭങ്ങള്‍ തുടങ്ങാന്‍ താത്പര്യമറിയിച്ച് 32 കമ്പനികള്‍ രംഗത്ത്. ഓട്ടോമൊബൈല്‍ പാര്‍ട്സുകള്‍, കൈയുറകള്‍, മാറ്റുകള്‍, റബര്‍ അധിഷ്ഠിത സാധനങ്ങള്‍ എന്നിവ നിര്‍മിക്കുന്ന കേരളത്തില്‍ നിന്നുള്ള കമ്പനികളാണു താത്പര്യപത്രം കൈമാറിയിരിക്കുന്നത്. കേന്ദ്ര പൊതുമേഖലാ സ്ഥാപനമായ എച്ച്എന്‍എല്ലിനെ ഏറ്റെടുത്ത് സര്‍ക്കാര്‍ രൂപംനല്‍കിയ കേരള പേപ്പര്‍ പ്രൊഡക്റ്റ്‌സ് ലിമിറ്റഡ് വളപ്പിലെ 164.86 ഏക്കര്‍ ഭൂമിയാണ് റബര്‍ പാര്‍ക്കിനായി കേരള റബര്‍ ലിമിറ്റഡിനു കൈമാറിയത്. കേരള പേപ്പര്‍ പ്രൊഡക്റ്റ്‌സ് ലിമിറ്റഡിന്‍റെ പേരിലേക്ക് കേന്ദ്രത്തില്‍നിന്ന് ഏറ്റെടുത്ത ഭൂമിയുടെ രേഖകള്‍ മാറ്റുന്ന നടപടികള്‍ വൈകിയതാണ് റബര്‍ പാര്‍ക്കിനും തിരിച്ചടിയായത്. അടുത്തിടെ കേരള പേപ്പര്‍ പ്രൊഡക്റ്റ്‌സ് ലിമിറ്റഡ് പേരിലേക്ക് ഭൂമി മാറ്റിയിരുന്നു. ഇതിന്‍റെ തുടര്‍ച്ചയായി റബര്‍ പാര്‍ക്കിന്‍റെ കൈമാറ്റ നടപടിക്രമങ്ങള്‍ പുരോഗമിക്കുകയാണ്. ഈമാസം അവസാനത്തോടെ ഭൂമി ഇവരുടെ പേരിലാകും. ഇതിനുശേഷം വിദേശത്തുനിന്നടക്കം കൂടുതല്‍ കമ്പനികളില്‍നിന്നു താത്പര്യപത്രം ക്ഷണിക്കാനാണ് റബര്‍ ലിമിറ്റഡിന്‍റെ തീരുമാനം. പാര്‍ക്കിന്‍റെ ഭാഗമാകാന്‍ താത്പര്യം അറിയിക്കുന്നവര്‍ക്ക് പാട്ടവ്യവസ്ഥയില്‍ ഭൂമി കൈമാറുകയാണ് ആദ്യഘട്ടത്തില്‍ ചെയ്യുക. സംരംഭങ്ങള്‍ക്ക് ആവശ്യമായ പൊതുവായ അടിസ്ഥാനസൗകര്യങ്ങള്‍ റബര്‍ ലിമിറ്റഡ്‌ നല്‍കും. പാര്‍ക്കില്‍ ഇപ്പോള്‍ അടിസ്ഥാന സൗകര്യങ്ങള്‍ ഒരുക്കുന്ന ജോലികള്‍ പുരോഗമിക്കുകയാണ്. ചതുപ്പും വെള്ളക്കെട്ടും നിറഞ്ഞ സ്ഥലം നികത്തിയെടുക്കുന്ന ജോലികളാണ് നടന്നുവരുന്നത്. മണ്ണിന്‍റെ ലഭ്യതക്കുറവും മഴയുംമൂലം ജോലികള്‍ സാവകാശമാണ് നീങ്ങുന്നത്. നിലവില്‍ 22 ഏക്കര്‍ സ്ഥലം സജ്ജമാക്കിയിട്ടുണ്ട്. ഇവിടേക്ക് റോഡ് അടക്കമുള്ള സൗകര്യങ്ങളും ഒരുക്കിയിട്ടുണ്ട്. മുഴുവന്‍ സ്ഥലവും മണ്ണിട്ട് നികത്തിയശേഷമേ മതില്‍ നിര്‍മാണം ആരംഭിക്കുകയുള്ളൂ. റബര്‍ ഉപയോഗം വര്‍ധിപ്പിക്കാനും റബര്‍ അധിഷ്ഠിത വ്യവസായങ്ങള്‍ തുടങ്ങുന്നതുവഴി കര്‍ഷകരെ സഹായിക്കാനും ലക്ഷ്യമിട്ടാണ് സിയാല്‍ മാതൃകയില്‍ സംസ്ഥാന സര്‍ക്കാര്‍ കേരള റബര്‍ ലിമിറ്റഡിന് രൂപം നല്‍കിയത്. തുടര്‍ന്ന് റബര്‍ പാര്‍ക്ക് സ്ഥാപിക്കാനായി വെള്ളൂരിലെ സ്ഥലം കൈമാറുകയായിരുന്നു. 253.58 കോടി ചെലവില്‍ രൂപപ്പെടുത്തുന്ന പാര്‍ക്കില്‍ 65 യൂണിറ്റുകള്‍ക്ക് പ്രവര്‍ത്തിക്കാന്‍ കഴിയുമെന്നാണ് വിലയിരുത്തല്‍. പാര്‍ക്ക് പൂര്‍ണതോതില്‍ പ്രവര്‍ത്തനസജ്ജമാകുമ്പോള്‍ 8000 പേര്‍ക്ക് തൊഴിലും ലഭ്യമാകും. രണ്ടാംഘട്ടത്തില്‍ റബര്‍ ഉത്പന്ന പ്രദര്‍ശന കേന്ദ്രം, ടയര്‍ ടെസ്റ്റിംഗ് സെന്‍റര്‍, സ്‌റ്റെറിലൈസിംഗ് സെന്‍റര്‍, ബിസിനസ് ഇന്‍കുബേഷന്‍ സെന്‍റര്‍, വെയര്‍ഹൗസ്, ടൂള്‍ റൂം, ഏകജാലക അനുമതി കേന്ദ്രം എന്നിവയും പദ്ധതിയുടെ ഭാഗമായിട്ടുണ്ട്.

മൃഗസംരക്ഷണ വകുപ്പിന്‍റെ സേവനം ഇനി വീട്ടുപടിക്കല്‍

കോട്ടയം: മൃഗസംരക്ഷണ വകുപ്പിന്‍റെ സേവനം ഇനി ജില്ലയിലെ കര്‍ഷകരുടെ വീട്ടുപടിക്കല്‍ എത്തും. മൃഗചികിത്സാരംഗത്ത് കര്‍ഷകര്‍ക്ക് കൈത്താങ്ങാകുന്നതിനു സഞ്ചരിക്കുന്ന മൂന്ന് മൊബൈല്‍ വെറ്ററിനറി യൂണിറ്റും ഒരു മൊബൈല്‍ സര്‍ജറി യൂണിറ്റും ജില്ലയില്‍ പ്രവര്‍ത്തനമാരംഭിച്ചു. ക്ഷീര കര്‍ഷകര്‍ ഉള്‍പ്പെടെയുള്ളവര്‍ക്ക് വീട്ടുപടിക്കല്‍ സേവനം എത്തിക്കുക എന്ന ലക്ഷ്യത്തോടെ തുടങ്ങിയ മൊബൈല്‍ വെറ്ററിനറി യൂണിറ്റിന്‍റെ സേവനം രാത്രി ആറുമുതല്‍ രാവിലെ അഞ്ചുവരെ ലഭിക്കും. ഏറ്റുമാനൂര്‍, ചങ്ങനാശേരി, ളാലം ബ്ലോക്കുകള്‍ കേന്ദ്രീകരിച്ചാണു മൂന്നു യൂണിറ്റുകളും പ്രവര്‍ത്തിക്കുന്നത്. ഇതിനു പുറമേ ജില്ലയ്ക്കായി അനുവദിച്ച ഒരു മൊബൈല്‍ സര്‍ജറി യൂണിറ്റിന്‍റെയും പ്രവര്‍ത്തനം കര്‍ഷകര്‍ക്ക് ഏറെ പ്രയോജനപ്പെടും. ജില്ലയിലെ തെരഞ്ഞെടുത്ത ആശുപത്രികളില്‍ സര്‍ജറി യൂണിറ്റിന്‍റെ സേവനം ലഭ്യമാകുന്നതോടെ മൃഗങ്ങളുടെ ശസ്ത്രക്രിയകള്‍ അധികദൂരം സഞ്ചരിക്കാതെതന്നെ സാധ്യമാകും. കര്‍ഷകര്‍ സേവനത്തിനായി 1962 എന്ന ടോള്‍ ഫ്രീ നമ്പറില്‍ വിളിച്ചാല്‍ മതി. വീട്ടുപടിക്കല്‍ ലഭിക്കുന്ന സേവനത്തിനു സര്‍ക്കാര്‍ നിശ്ചയിച്ച ഫീസ് നിരക്ക് വാഹനത്തില്‍ സജ്ജമാക്കിയിട്ടുള്ള ക്യു ആര്‍ കോഡ് വഴി സ്‌കാന്‍ ചെയ്തു നല്കണം. മൂന്നു മൊബൈല്‍ വെറ്ററിനറി യൂണിറ്റിന്‍റെയും മൊബൈല്‍ സര്‍ജറി യൂണിറ്റിന്‍റെയും ഫ്‌ളാഗ് ഓഫ് കോടിമത ജില്ലാ വെറ്ററിനറി കേന്ദ്രത്തില്‍ തിരുവഞ്ചൂര്‍ രാധാകൃഷ്ണന്‍ എംഎല്‍എ നിര്‍വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേം സാഗര്‍, കോട്ടയം നഗരസഭ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍, ജില്ലാ മൃഗസംരക്ഷണ ഓഫീസര്‍ ഡോ. മനോജ് കുമാര്‍, മൃഗസംരക്ഷണ വകുപ്പ് ഡെപ്യൂട്ടി ഡയറക്ടര്‍ ഡോ. മാത്യു ഫിലിപ്പ് തുടങ്ങിയവര്‍ പങ്കെടുത്തു.

ഭൂമിക നേറ്റീവ് വിൻഡോ വഴിക്കടവിൽ തുടങ്ങി

വാഗമൺ: തലനാട് ഫാർമേഴ്സ് പ്രൊഡ്യൂസർ കമ്പനിയുടെ പ്രവേശക സംരംഭമായ സ്റ്റാറ്റിക് വെന്‍റിംഗ് കാർട്ടും ഭൂമിക നേറ്റീവ് വിൻഡോയും വഴിക്കടവിൽ പ്രവർത്തനം ആരംഭിച്ചു. ഹോർട്ടികൾച്ചർ മിഷന്‍റെ 2024-25 വർഷത്തെ പദ്ധതിയിൽപ്പെടുത്തി ഈരാറ്റുപേട്ട കൃഷി അസിസ്റ്റന്‍റ് ഡയറക്ടർ ഓഫീസിനു കീഴിൽ തീക്കോയി കൃഷിഭവൻ മുഖേന ലഭ്യമാക്കിയ 15,000 രൂപ സബ്സിഡി പദ്ധതി പ്രയോജനപ്പെടുത്തിയാണ് അരലക്ഷം രൂപ മുതൽമുടക്കിൽ സ്റ്റാറ്റിക് വെന്‍റിംഗ് കാർട്ടും നേറ്റീവ് വിൻഡോയും പൂർത്തിയാക്കിയത്. തിക്കോയി-വാഗമൺ റോഡരികിൽ വഴിക്കടവ് ഭാഗത്താണ് സംരംഭം ആരംഭിച്ചത്. തീക്കോയി പഞ്ചായത്ത് പ്രസിഡന്‍റ് കെ.സി. ജയിംസ് ഉദ്ഘാടനം ചെയ്തു. കൃഷി അസി. ഡയറക്ടർ അശ്വതി വിജയൻ ആദ്യ വില്പന നടത്തി. തലനാട് ഫാർമേഴ്സ് പ്രൊഡ്യൂസർ കമ്പനി ചെയർപേഴ്സൺ നിഷ ഡെന്നീസ്, മാനേജിംഗ് ഡയറക്ടർ പി.എസ്. ബാബു, സിഇഒ അനന്തു പ്രസാദ്, ഭൂമിക സെക്രട്ടറി എബി ഇമ്മാനുവൽ, പ്രസിഡന്‍റ് കെ.ഇ. ക്ലമന്‍റ്, ജോസഫ് ഡൊമിനിക്, കൃഷി ഓഫീസർ അജ്മൽ അജാസ്, ഷെറിൻ മരിയ മാത്യു, ജോണി വർഗീസ്, കെ.വി. ഏബ്രഹാം എന്നിവർ പ്രസംഗിച്ചു.

എരപ്പുങ്കര-കാളച്ചാൽ റോഡ് പൊട്ടിപ്പൊളിഞ്ഞു; സമരത്തിനൊരുങ്ങി നാട്ടുകാര്‍

രാമപുരം: എരപ്പുങ്കര-കാളച്ചാല്‍ റോഡില്‍ കാളച്ചാല്‍ ഭാഗത്ത് റോഡ് തകര്‍ന്നുകിടക്കാന്‍ തുടങ്ങിയിട്ട് നാളുകളേറെയായി. അധികൃതരുടെ നിസംഗതയ്ക്കെതിരേ സമരത്തിനൊരുങ്ങുകയാണ് നാട്ടുകാര്‍. കെഎസ്ടിപി മോഡല്‍ ടാറിംഗ് ഗാരണ്ടിയോടെയാണ് റോഡിന്‍റെ പണി പൂര്‍ത്തീകരിച്ചത്. പൂവക്കുളം പള്ളി, ആനന്ദഷണ്‍മുഖ ക്ഷേത്രം, നരസിംഹസ്വാമി ക്ഷേത്രം, പൂവക്കുളം സ്‌കൂള്‍ എന്നിവിടങ്ങളിലേക്കുള്ള പ്രധാനപ്പെട്ട റോഡാണിത്. നാലമ്പല തീര്‍ഥാടനകാലത്ത് നിരവധി തീര്‍ഥാടകരും ഈ റോഡിനെ ആശ്രയിക്കുന്നുണ്ട്. നൂറുകണക്കിന് വീട്ടുകാര്‍ തിങ്ങിപ്പാര്‍ക്കുന്ന പ്രദേശമാണിത്. കരിങ്കല്‍ കയറ്റി അമിത ഭാരവുമായി കടന്നുപോകുന്ന ടോറസ് ലോറികളാണ് ഇവിടെ പ്രധാനമായും റോഡ് പൊളിയാന്‍ കാരണമാകുന്നതെന്ന് നാട്ടുകാര്‍ പറയുന്നു. കാല്‍നടയാത്രക്കാര്‍ക്കു പോലും സഞ്ചരിക്കാനാകാത്ത സ്ഥിതിയിലാണ് ഇപ്പോള്‍ റോഡുള്ളത്. മഴ പെയ്താല്‍ റോഡിലെ കുഴികളില്‍ വെള്ളം നിറഞ്ഞ് തിരിച്ചറിയാന്‍ സാധിക്കുന്നില്ല. ഇതിനാല്‍ വാഹനങ്ങള്‍ വേഗത്തിലെത്തി കുഴികളില്‍ ചാടി അപകടങ്ങള്‍ സംഭവിക്കുന്നത് പതിവാണ്. ചില പ്രദേശങ്ങളില്‍ മണ്ണിടിഞ്ഞുവീണ് റോഡിന്‍റെ ഒരുവശത്തുകൂടി മാത്രമേ വാഹനങ്ങള്‍ക്ക് സഞ്ചരിക്കാനാകൂ. കടുത്തുരുത്തി പിഡബ്ല്യുഡിയുടെ കീഴിലാണ് റോഡുള്ളത്. എത്രയും പെട്ടെന്ന് റോഡ് റീടാറിംഗ് നടത്തി സഞ്ചാരയോഗ്യമാക്കണമെന്നും അല്ലെങ്കില്‍ സമരം നടത്തുമെന്നും നാട്ടുകാര്‍ പറഞ്ഞു.

അമിത വില ചോദ്യംചെയ്ത അയ്യപ്പഭക്തന് മർദനം

എരുമേലി: ഭക്ഷണശാലയിൽ അമിത വില ഈടാക്കിയത് ചോദ്യം ചെയ്ത ശബരിമല തീർഥാടകന് മർദനം. പോലീസ് സ്റ്റേഷനിൽ എത്തി തീർഥാടകൻ പരാതി നൽകിയപ്പോൾ പരാതിക്ക് രസീത് നൽകുകയോ അന്വേഷണം നടത്തുകയോ ചെയ്തില്ലെന്നും പരാതി. സംഭവം വിവാദമായതോടെ അന്വേഷണം നടത്തിയ പോലീസ് രണ്ടു പേരെ സ്റ്റേഷനിൽ കൊണ്ടുവന്ന് വിവരങ്ങൾ ചോദിച്ച ശേഷം വിട്ടയച്ചു. തുടർന്ന് ഭക്ഷണശാല അടപ്പിച്ച പോലീസ് പരാതി നൽകിയ തീർഥാടകന്‍റെ മൊഴി ലഭിച്ച ശേഷം കേസെടുക്കാമെന്ന നിലപാടിലാണ്. കഴിഞ്ഞ ദിവസം എരുമേലി വലിയമ്പല നടപ്പന്തലിലെ താത്കാലിക കടയിലാണ് അമിത വിലയെച്ചൊല്ലി വാക്കേറ്റവും മർദനവുമുണ്ടായത്. ശബരിമല ദർശനം കഴിഞ്ഞു മടങ്ങുകയായിരുന്ന മലപ്പുറം തിരൂരങ്ങാടി സ്വദേശി സുമേഷിനാണ് മര്‍ദനമേറ്റത്. ആറ് ചായയ്ക്കും ഒരു പാക്കറ്റ് ബിസ്‌കറ്റിനുമായി 140 രൂപ വാങ്ങിയെന്നും ഇത് അമിത വിലയാണെന്ന് പറഞ്ഞ് സുമേഷ് വിലവിവരപ്പട്ടിക കാണിക്കാൻ ആവശ്യപ്പെട്ടപ്പോൾ കടയിലെ രണ്ടു പേർ മര്‍ദിച്ചെന്നാണു പരാതി. ഇതിനിടെ ദൃശ്യങ്ങൾ മൊബൈൽ ഫോണിൽ പകര്‍ത്താന്‍ ശ്രമിച്ചപ്പോള്‍ കൂടുതല്‍ ആളുകള്‍ വന്ന് ഭീഷണിപ്പെടുത്തിയെന്ന് സുമേഷ് നൽകിയ പരാതിയിൽ പറയുന്നു. സുമേഷ് നൽകിയ പരാതി സ്വീകരിച്ച പോലീസ് പരാതിക്ക് രസീത് ആവശ്യപ്പെട്ടപ്പോൾ നിരസിച്ചെന്നും ഏറെ സമയം സ്റ്റേഷനിൽ കാത്തിരുന്നിട്ടും അന്വേഷണം നടത്തി നടപടികൾ സ്വീകരിക്കാൻ പോലീസ് തയാറായില്ലന്നും പറയുന്നു. തുടർന്ന് സുമേഷ് നാട്ടിലേക്ക് മടങ്ങിയ ശേഷം പോലീസ് സ്റ്റേഷനിൽനിന്നു ഫോണിൽ വിളിച്ചു സ്റ്റേഷനിൽ എത്തി മൊഴി നൽകണമെന്ന് ഉദ്യോഗസ്ഥർ ആവശ്യപ്പെട്ടന്നും പറയുന്നു. മലപ്പുറത്തുനിന്നു യാത്ര ചെയ്ത് എരുമേലി സ്റ്റേഷനിൽ എത്തി മൊഴി നൽകാൻ ബുദ്ധിമുട്ടുണ്ടെന്നും ഇ-മെയിൽ ചെയ്ത് മൊഴി അയക്കാമെന്നും പോലീസിനെ അറിയിച്ചെന്നും എന്നാൽ, സ്റ്റേഷനിൽ എത്തണമെന്ന് ആവശ്യപ്പെട്ടന്നും സുമേഷ് പറയുന്നു. മൊഴി ലഭിക്കാത്തതിനാൽ സംഭവം സംബന്ധിച്ച് കേസ് രജിസ്റ്റർ ചെയ്തിട്ടില്ല. അതേസമയം ശബരിമല തീർഥാടന കേന്ദ്രങ്ങളിൽ വിലവിവരപ്പട്ടിക പ്രദർശിപ്പിക്കാത്ത കച്ചവട സ്ഥാപനങ്ങൾക്കെതിരെയും അമിത വില ഈടാക്കുന്നത് സംബന്ധിച്ചും പോലീസ് എസ്എച്ച്ഒയും പഞ്ചായത്ത്‌ സെക്രട്ടറിയും സ്വമേധയാ അന്വേഷണം നടത്തി നടപടികൾ സ്വീകരിക്കണമെന്ന് ഹൈക്കോടതി നിർദേശം ഉണ്ടെന്നും ഇത് എരുമേലിയിൽ പാലിക്കുന്നില്ലെന്നും അയ്യപ്പ സേവാസമാജം സംസ്ഥാന സെക്രട്ടറി മനോജ്‌ എസ്. നായർ പറഞ്ഞു.

എരുമേലി-മുക്കട വനപാതയിൽ യാത്ര അപകടഭീഷണിയിൽ

എരുമേലി: വനംവകുപ്പ് മുൻകരുതൽ നടപടികൾ സ്വീകരിക്കാത്തതുകൊണ്ട് അപകട ഭീതിയിൽ യാത്ര ചെയ്യേണ്ടി വരുന്ന കാഴ്ചയാണ് എരുമേലി-മുക്കട വനപാതയിൽ. റോഡിലേക്ക് വീഴാറായ നിലയിൽ ഒട്ടനവധി മരങ്ങളാണ് ഈ പാതയിൽ. ഇവയിൽ മിക്കതിന്‍റെയും ശിഖരങ്ങൾ മുറിച്ചാൽ ഇതുവഴിയുള്ള ഗതാഗതം ഒരു പരിധി വരെ സുരക്ഷിതമാകും. ഇക്കാര്യം നിരവധിത്തവണ നാട്ടുകാർ ഉന്നയിച്ചതാണ്. മരങ്ങൾ വീണ് അപകടങ്ങൾ ഉണ്ടാകുന്നതല്ലാതെ പരിഹാര നടപടികൾ ഇതുവരെയില്ല. പഴക്കം ചെന്ന മരങ്ങൾ റോഡരികിൽ ഭീഷണിയായി നിൽക്കുന്നതുമൂലം കാറ്റും മഴയും ഉള്ളപ്പോൾ യാത്ര അപകടഭീതിയിലാകുകയാണ്. കഴിഞ്ഞ ദിവസം ഒരു മരുതി മരം പിക്കപ്പ് വാനിന്‍റെ മുന്നിലേക്കാണ് വീണത്. ഡ്രൈവർ പെട്ടെന്ന് ബ്രേക്ക്‌ ചെയ്ത് വാഹനം നിർത്തിയതുകൊണ്ട് മരം വാഹനത്തിന്‍റെ മുകളിൽ വീണില്ല. ഒട്ടേറെ സ്വകാര്യ ബസുകളും കെഎസ്ആർടിസി ബസുകളും സ്വകാര്യ വാഹനങ്ങളും ടാക്സികളും ഇതുവഴി കടന്നുപോകുന്നുണ്ട്. മഴക്കാലമാകുന്നതോടെ കാറ്റും മഴയും പതിവാകും. മരങ്ങൾ വീഴാൻ സാധ്യത കൂടും. അതിന് ഇടവരുത്താതെ ശിഖരങ്ങളും പഴക്കമേറിയ മരങ്ങളും മുറിച്ചുമാറ്റാൻ വനംവകുപ്പ് ഉടനടി സ്വീകരിക്കണം. അയൽവാസിയുടെ മരം ഭീഷണിയായാൽ ദുരന്തനിവാരണ നിയമം പ്രകാരം പെട്ടെന്ന് മുറിച്ചു മാറ്റണമെന്ന് സർക്കാരും തദ്ദേശ സ്ഥാപനങ്ങളും ഉത്തരവ് നൽകിയിട്ടുണ്ടെന്നിരിക്കേ സർക്കാർ വകുപ്പിന്‍റെ മരങ്ങൾ മൂലമുള്ള അപകടസാധ്യത സംബന്ധിച്ച് നടപടി ഇല്ലാത്തത് കടുത്ത നിയമ ലംഘനമല്ലേയെന്ന് നാട്ടുകാർ ചോദിക്കുന്നു. സ്വകാര്യ വ്യക്തിയുടെ മരം വീണ് വൈദ്യുതിപോസ്റ്റും ലൈനും തകർന്നാൽ കെഎസ്ഇബി നഷ്ടം ഈടാക്കും. എന്നാൽ, സർക്കാർവകുപ്പിന്‍റെ മരമാണെങ്കിൽ നഷ്ടം ഈടാക്കാറില്ലെന്നു നാട്ടുകാർ പറയുന്നു.

വാകത്താനത്ത് വൻ ചീട്ടുകളി സംഘം പിടിയിൽ

വാകത്താനം: വൻ ചീട്ടുകളിസംഘത്തെ പിടികൂടി പോലീസ്. ഉണ്ണാമറ്റം കാലായിൽ ബിജോയി എന്ന വ്യക്തിയുടെ കെട്ടിടത്തിലായിരുന്നു പണംവച്ച് ചീട്ടുകളി നടന്നിരുന്നത്. 5,60,450 രൂപ സ്ഥലത്തുനിന്നു പോലീസ് പിടിച്ചെടുത്തു. സംഭവത്തിൽ കെട്ടിട ഉടമസ്ഥനെയും ജില്ലയിലും പുറത്തുമായി കൊലപാതകശ്രമം, ലഹരിവ്യാപാരം ഉൾപ്പടെ 12 ലധികം കേസുകളിൽ പ്രതിയായ മിഥുൻ തോമസിനെ‍യും ചീട്ടു കളിക്കാനെത്തിയ 12 പേരെയും വാകത്താനം പോലീസ് അറസ്റ്റ് ചെയ്തു.

ലതയുടെ വൃക്കമാറ്റിവയ്ക്കലിന് മാടപ്പള്ളിക്കാര്‍ ഇന്നു കൈ കോര്‍ക്കും

ചങ്ങനാശേരി: മാടപ്പള്ളി ജീവന്‍രക്ഷാ സമിതിയുടെ നേതൃത്വത്തില്‍ വീട്ടമ്മയുടെ വൃക്ക മാറ്റിവയ്ക്കല്‍ ശസ്ത്രക്രിയയ്ക്കായി ഇന്നു സഹായ ധന സമാഹരണം നടത്തും. മാടപ്പള്ളി പഞ്ചായത്ത് അഞ്ചാം വാര്‍ഡ് പുളിയാംകുന്ന് കൃഷ്ണാലയം വീട്ടില്‍ ലത രാധാകൃഷ്ണ (46)ന്‍റെ ചികിത്സാര്‍ഥമാണ് പ്രത്യാശ ചാരിറ്റി വേള്‍ഡിന്‍റെയും മാടപ്പള്ളി പഞ്ചായത്തിന്‍റെയും നേതൃത്വത്തില്‍ മാടപ്പള്ളി പഞ്ചായത്തിലെ 12 വാര്‍ഡുകളില്‍ ധനസമാഹരണം നടത്തുന്നത്. കഴിഞ്ഞ എട്ടു വര്‍ഷമായി ലത കിഡ്‌നി രോഗത്താല്‍ ചികിത്സയില്‍ കഴിയുകയാണ്. എന്നാല്‍, കിഡ്‌നി വീണ്ടും ചുരുങ്ങിയതിനാല്‍ കിഡ്‌നി മാറ്റിവച്ചാല്‍ മാത്രമേ ജീവന്‍ നിലനിര്‍ത്താന്‍ സാധ്യമാകുകയുള്ളൂ. കല്‍പ്പണിക്കാരനായ രാധാകൃഷ്ണന് അലര്‍ജി മൂലം കൈകളും കാലുകളും പൊട്ടി വൃണമാകുന്നതിനാല്‍ ജോലി ചെയ്യാന്‍ സാധ്യമല്ല. ഇവര്‍ക്കു രണ്ട് ആണ്‍മക്കളാണുള്ളത്. മൂത്തകുട്ടി ഭിന്നശേഷിക്കാരനും ഇളയ കുട്ടി ഹൃദയസംബന്ധമായ അസുഖത്തിന് ശസ്ത്രക്രിയ കഴിഞ്ഞതുമാണ്. ഈ നിര്‍ധന കുടുംബാംഗമായ ലതയുടെ ജീവന്‍ നിലനിര്‍ത്താന്‍ ഏകദേശം 25 ലക്ഷം രൂപ ചെലവ് വരുന്ന ശസ്ത്രക്രിയ നടത്തി കിഡ്‌നി മാറ്റിവച്ചാല്‍ മാത്രമേ സാധിക്കുകയുള്ളൂ. പഞ്ചായത്തിലെ ഒന്ന് മുതല്‍ ഒമ്പതുവരെയും 14, 19, 20 വാര്‍ഡുകളിലുമാണ് ധനശേഖരണം നടത്തുന്നത്. രാവിലെ ഒമ്പതു മുതല്‍ ഉച്ചകഴിഞ്ഞ് രണ്ടു വരെയാണ് ധനസമാഹരണം നടത്തുന്നത്. ചങ്ങനാശേരി കേരള ഗ്രാമീണ്‍ ബാങ്കില്‍ മാടപ്പള്ളി ജീവന്‍ രക്ഷാസമിതി ബാങ്ക് അക്കൗണ്ട് തുറന്നിട്ടുണ്ട്. അക്കൗണ്ട് നന്പർ: 4056 81 0 1 07 74 70 IFSC -KLGB0040568.

പെരുമ്പനച്ചി-തോട്ടയ്ക്കാട് റോഡിൽ ഗതാഗതം തടസപ്പെട്ടു

പെരുമ്പനച്ചിയിൽ ഓട നിർമാണം തുടങ്ങി ചങ്ങനാശേരി: ചങ്ങനാശേരി - വാഴൂർ റോഡിൽ പെരുമ്പനച്ചിയിലെ മലിന ജലപ്രശ്നം പരിഹരിക്കാൻ ഓട നിർമാണം ആരംഭിച്ചു. മാടപ്പള്ളി സഹകരണ ബാങ്കിനു സമീപം മുതൽ പെരുമ്പനച്ചി തോടുവരെയുള്ള ഭാഗത്താണ് ഓട നിർമിക്കുന്നത്. ഓടയില്ലാത്തതുമൂലം മഴക്കാലത്ത് ഈ ഭാഗത്ത് വെള്ളക്കെട്ടുണ്ടാകുന്നത് ഏറെ ദുരിതമായിരുന്നു. 25 ലക്ഷം രൂപ മുടക്കി പൊതുമരാമത്ത് വകുപ്പാണ് ഓട നിർമിക്കുന്നത്. ഓട നിർമാണത്തിനായി റോഡ് മുറിച്ചതിനെത്തുടർന്ന് പെരുമ്പനച്ചി-തോട്ടയ്ക്കാട് റോഡിൽ ഗതാഗതം തടസപ്പെട്ടു. 10 ദിവസംകൊണ്ടു പൂർത്തിയാക്കും: എംഎൽഎ ഈ മാസം അവസാനത്തോടെ ഓടനിർമാണം പൂർത്തിയാക്കത്തക്കവിധം വളരെ വേഗത്തിലാണ് ജോലികൾ നടക്കുന്നതെന്ന് ജോബ് മൈക്കിൾ എംഎൽഎ പറഞ്ഞു.

എംജി സര്‍വകലാശാലാ ഡിഗ്രി പരീക്ഷ : ചെത്തിപ്പുഴ ക്രിസ്തുജ്യോതി കോളജിന് 24 റാങ്കുകള്‍

ചങ്ങനാശേരി: എംജി യൂണിവേഴ്‌സിറ്റിയുടെ ഡിഗ്രി പരീക്ഷയില്‍ ചെത്തിപ്പുഴ ക്രിസ്തുജ്യോതി കോളജ് വിവിധ വിഷയങ്ങളിലായി 24 റാങ്കുകള്‍ കരസ്ഥമാക്കി. കൂടാതെ 25 ലധികം വിദ്യാര്‍ഥികള്‍ ഓവറോള്‍ എ പ്ലസ് ഗ്രേഡോടു കൂടി ഉന്നത വിജയം നേടി. ബികോം ഫിനാന്‍സ് ആന്‍ഡ് ടാക്‌സേഷന്‍ വിഭാഗത്തില്‍ അക്ഷയ അനില്‍കുമാര്‍ എ പ്ലസ് ഗ്രേഡോടെ ഒന്നാംറാങ്ക്, അല്‍ അമീന്‍ ടി.എസ്. എ പ്ലസ് ഗ്രേഡോടെ രണ്ടാംറാങ്ക്, അമൃത എം. കുമാര്‍ എ പ്ലസ് ഗ്രേഡോടെ മൂന്നാംറാങ്കും നേടി. റുബിമോള്‍ സിബിച്ചന്‍, ജ്യോതി എം. പൈ, അലീന ചാക്കോ, അനാമിക പ്രസാദ്, എയ്ഞ്ചല്‍ പൊരുത്തല ജിജി, താരാ ബ്രിജിത് തോമസ് എന്നിവര്‍ യഥാക്രമം നാലു മുതല്‍ ഒമ്പത് വരെയുള്ള റാങ്കുകള്‍ എ പ്ലസ് ഗ്രേഡോടെ കരസ്ഥമാക്കി. ബികോം കമ്പ്യൂട്ടര്‍ ആപ്ലിക്കേഷന്‍ വിഭാഗത്തില്‍ മരീന റോജന്‍ രണ്ടാംറാങ്കും മിഥുന്‍ വര്‍ഗീസ് അഞ്ചാംറാങ്കും എ പ്ലസ് ഗ്രേഡോടെ നേടി. തുടര്‍ച്ചയായി രണ്ടാം വര്‍ഷവും ബിഎസ്‌സി സൈക്കോളജി വിഭാഗത്തില്‍ ഒന്നാം റാങ്ക് നേട്ടം ക്രിസ്തുജ്യോതിക്കാണ്. ജൂണിയ ആന്‍ തോമസ് -ഒന്ന്, ശ്രേയ എസ്. നായര്‍ -രണ്ട്, ഐശ്വര്യ എ. -നാല്, ജിനി എലിസബത്ത് ഐപ്പ് -ഏഴ്, ഫെമി ആന്‍ നൈനാന്‍ -ഒമ്പത്, ആന്‍ തെരേസ് തോമസ് -പത്ത് എന്ന ക്രമത്തില്‍ എ പ്ലസ് ഗ്രേഡോടെ റാങ്കുകള്‍ കരസ്ഥമാക്കി. ബിഎസ്‌സി ജിയോളജി വിഭാഗത്തില്‍ ഗോവിന്ദ് സി.എ. മൂന്നാം റാങ്കും നേഹ ജയകുമാര്‍ നായര്‍ നാലാം റാങ്കും അനാമിക ബിജു ഏഴാം റാങ്കും ആദര്‍ശ് പി. എട്ടാം റാങ്കും വര്‍ഗീസ് റോയ് ഒമ്പതാം റാങ്കും എ പ്ലസ് ഗ്രേഡോടെ നേടി. ബിബിഎ വിഭാഗത്തില്‍ രേഷ്‌ന രാജ് എ പ്ലസ് ഗ്രേഡോടെ ഏഴാം റാങ്കും ബിസിഎ വിഭാഗത്തില്‍ ആദിത്യ പ്രസാദ് എ പ്ലസ് ഗ്രേഡോടെ പത്താം റാങ്കും കരസ്ഥമാക്കി. മികച്ച വിജയം നേടിയ വിദ്യാര്‍ഥികളെയും പരിശീലനം നല്‍കിയ അധ്യാപകരെയും കോളജ് മാനേജര്‍ റവ. ഡോ. തോമസ് കല്ലുകളം സിഎംഐ, കോളജ് പ്രിന്‍സിപ്പല്‍ റവ.ഡോ. ജോഷി ചീരാംകുഴി സിഎംഐ, വൈസ് പ്രിന്‍സിപ്പല്‍ ഡോ. ജോസഫ് സാം, രക്ഷാകര്‍തൃ പ്രതിനിധികള്‍ എന്നിവര്‍ അഭിനന്ദിച്ചു.

ധന്യന്‍ മാര്‍ തോമസ് കുര്യാളശേരി ചരമശതാബ്ദി പ്രസംഗമത്സരം

ചങ്ങനാശേരി: രൂപതയുടെ പ്രഥമ ബിഷപ്പും ആരാധനാ സന്യാസിനി സമൂഹ സ്ഥാപകനുമായ ധന്യന്‍ മാര്‍ തോമസ് കുര്യാളശേരിയുടെ ചരമശതാബ്ദിയാചരണത്തോടനുബന്ധിച്ച് എകെഎം പബ്ലിക് സ്‌കൂള്‍ ഇന്‍ഡോര്‍ സ്റ്റേഡിയത്തില്‍ നടന്ന ദേശീയ പ്രസംഗമത്സരം ജനറല്‍ കൗണ്‍സിലര്‍ സിസ്റ്റര്‍ എല്‍സ പൈകട എസ്എബിഎസ് ഉദ്ഘാടനം ചെയ്തു. പുരസ്‌കാര സമര്‍പ്പണ സമാപന സമ്മേളനത്തില്‍ അതിരൂപത വികാരി ജനറാള്‍ മോണ്‍. സ്‌കറിയ കന്യാകോണില്‍ അധ്യക്ഷത വഹിച്ചു. സെന്‍റ് തെരേസാസ് ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ഷിജി വര്‍ഗീസ് ഉദ്ഘാടനം നിര്‍വഹിച്ചു. സിസ്റ്റര്‍ എമിലി തെക്കേത്തെരുവില്‍, സിസ്റ്റര്‍ അനറ്റ് ചാലങ്ങാടി, സൈബി അക്കര, കുഞ്ഞുമോന്‍ തൂമ്പൂങ്കല്‍, കെ.പി. മാത്യു എന്നിവര്‍ പ്രസംഗിച്ചു.

മാഞ്ഞൂര്‍ കൃഷിഭവനിലേക്ക് മാര്‍ച്ചും ധര്‍ണയും നടത്തി

കുറുപ്പന്തറ: നെല്‍കര്‍ഷകരോട് സര്‍ക്കാര്‍ കാണിക്കുന്ന അവഗണന അവസാനിപ്പിക്കണമെന്ന് ആവശ്യപ്പെട്ടും കേരകൃഷി സംരക്ഷണത്തിന് ലോകബാങ്ക് നല്‍കിയ 139 കോടി വകമാറ്റി ചെലവഴിച്ച സര്‍ക്കാര്‍ നിലപാടില്‍ പ്രതിഷേധിച്ചും മാഞ്ഞൂര്‍ കൃഷിഭവനിലേക്ക് കര്‍ഷക കോണ്‍ഗ്രസ് മാഞ്ഞൂര്‍ മണ്ഡലം കമ്മിറ്റിയുടെ നേതൃത്വത്തില്‍ മാര്‍ച്ചും ധര്‍ണയും നടത്തി. ഡിസിസി ജനറല്‍ സെക്രട്ടറി സുനു ജോര്‍ജ് ഉദ്ഘാടനം ചെയ്തു. കര്‍ഷക കോണ്‍ഗ്രസ് മണ്ഡലം പ്രസിഡന്‍റ് ജോയി പാറക്കാല അധ്യക്ഷത വഹിച്ചു. ജില്ലാ ജനറല്‍ സെക്രട്ടറി ടോമി പൂവക്കോട്ട്, ടോമി കലമറ്റം, ലൂക്കോസ് മാക്കിയില്‍, ജോര്‍ജ് നെടുനിലം, ബിനോയ് സഖറിയ തുടങ്ങിയവര്‍ പ്രസംഗിച്ചു.

"ധന്യന്‍ കദളിക്കാട്ടിലച്ചന്‍ ഈശോയുടെ ഹൃദയം അറിഞ്ഞ പുണ്യാത്മാവ്'

പാലാ: തിരുഹൃദയദാസനായ ധന്യന്‍ കദളിക്കാട്ടില്‍ മത്തായി അച്ചനെ സുവിശേഷത്തിലെ വിശുദ്ധ യോഹന്നാനോട് താരതമ്യം ചെയ്യാന്‍ സാധിക്കുമെന്ന് അമല്‍ജ്യോതി എൻജിനിയറിംഗ് കോളജിലെ ഫാ. കാര്‍ലോസ് കീരഞ്ചിറകുന്നേല്‍. ധന്യന്‍ കദളിക്കാട്ടില്‍ മത്തായി അച്ചന്‍റെ ചരമവാര്‍ഷികത്തോടനുബന്ധിച്ചുള്ള നവനാള്‍ ദിനത്തില്‍ പാലാ എസ്എച്ച് പ്രൊവിന്‍ഷ്യല്‍ ഹൗസ് കപ്പേളയില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു അദ്ദേഹം. ഈശോയുടെ വക്ഷസില്‍ ചാരിക്കിടന്ന യോഹന്നാന്‍, ഈശോയുടെ മനസറിയുകയും ഹൃദയം അറിയുകയും ചെയ്തതുപോലെ ധന്യന്‍ കദളിക്കാട്ടില്‍ മത്തായി അച്ചനും ഈശോയുടെ ഹൃദയവും മനസും അറിയുകയും ആര്‍ദ്രതയും കരുണയും സ്‌നേഹവും ചുറ്റുമുള്ളവരിലേക്ക് പ്രവഹിപ്പിക്കുകയും ചെയ്തു. ഈശോ മനുഷ്യമക്കളോട് കൂടെ ആയിരിക്കാന്‍ വിശുദ്ധ കുര്‍ബാന സ്ഥാപിച്ചു എന്നതുപോലെ തിരുഹൃദയ മഹത്വം നിലനിൽക്കാന്‍ തിരുഹൃദയ സന്യാസിനീസമൂഹം സ്ഥാപിച്ചുവെന്നും അദ്ദേഹം പറഞ്ഞു. ഇന്ന് ഉച്ചകഴിഞ്ഞ് മൂന്നിന് വിശുദ്ധ കുര്‍ബാന, നവനാള്‍ പ്രാര്‍ഥന - മാര്‍ ജോര്‍ജ് മഠത്തിക്കണ്ടത്തില്‍ (കോതമംഗലം രൂപത ബിഷപ്).

ദുരന്തമുഖങ്ങളിൽ സഹായഹസ്തവുമായി ആദ്യമെത്തുന്നത് സഹകരണ സ്ഥാപനങ്ങൾ: മന്ത്രി വി.എൻ. വാസവൻ

വെച്ചൂർ: നാട്ടിൽ ദുരന്തമുണ്ടാകുമ്പോൾ സഹായ ഹസ്തവുമായി ആദ്യമെത്തുന്നത് സഹകരണസ്ഥാപനങ്ങളാണെന്ന് മന്ത്രി വി.എൻ. വാസവൻ. വെച്ചൂർ പഞ്ചായത്ത് സർവീസ് സഹകരണ ബാങ്ക് പുതിയതായി നിർമിക്കുന്ന ഓഫീസ് സമുച്ചയത്തിന്‍റെ ശിലാസ്ഥാപന-നിർമാണ ഉദ് ഘാടനവും ചികിധനസഹായ വിതരണവും നിർവഹിച്ചു പ്രസംഗിക്കുകയായിരുന്നു അദ്ദേഹം. സി.കെ. ആശ എംഎൽഎ അധ്യക്ഷത വഹിച്ചു. സെക്രട്ടറി ഇൻ ചാർജ് അൻഷു സുനീഷ് റിപ്പോർട്ട് അവതരിപ്പിച്ചു. ബാങ്ക് പ്രസിഡന്‍റ് ഒ.ബഷീർ, കെ.കെ. രഞ്ജിത്ത്, ഇ.എൻ.ദാസപ്പൻ, കെ.കെ. ഗണേശൻ, ജില്ലാ പഞ്ചായത്ത് അംഗം ഹൈമിബോബി, ബ്ലോക്ക് പഞ്ചായത്തംഗം വീണ അജി, വൈക്കം അസിസ്റ്റന്‍റ് രജിസ്ട്രാർ ജനറൽ സി.ആർ. മിനി തുടങ്ങിയവർ സംബന്ധിച്ചു.

ചെമ്മനത്തുകര റോഡിലെ വെള്ളക്കെട്ടിനു പരിഹാരമായി ഓട നിർമാണം പുരോഗമിക്കുന്നു

ചെമ്മനത്തുകര: വൈക്കം - ചെമ്മനത്തുകര റോഡിൽ ഓട നിർമിച്ച് വെള്ളക്കെട്ട് ഒഴിവാക്കുന്നതിനുള്ള നടപടികൾ പുരോഗമിക്കുന്നു. ചെമ്മനത്തുകര പൈനുങ്കൽ ജംഗ്ഷനിലും ചെമ്മനത്തുകര ശ്രീകൃഷ്ണസ്വാമിക്ഷേത്രത്തിനു മുൻവശം മുതൽ ചെമ്മനത്തുകര പള്ളിക്കു സമീപം വരെയുള്ള500 മീറ്റർ ദൂരത്തിലുമാണ് ഓട തീർക്കുന്നത്. വർഷങ്ങളായി വർഷകാലത്ത് വെള്ളത്തിൽ മുങ്ങിയിരുന്ന പൈനുങ്കൽ ജംഗ്ഷനിൽ വെള്ളക്കെട്ട് പരിഹരിക്കണമെന്ന് പ്രദേശവാസികൾ ആവശ്യപ്പെട്ടുവരികയായിരുന്നു. 21 ലക്ഷം രൂപ വിനിയോഗിച്ചാണ് ചെമ്മനത്തുകര പൈനുങ്കൽ ജംഗ്ഷനിലെ ഓട നിർമാണം പൂർത്തിയാക്കിയത്. ചെമ്മനത്തുകര പള്ളിമുതൽ ചെമ്മനത്തുകര ശ്രീകൃഷ്ണസ്വാമി ക്ഷേത്ര പരിസരം വരെയുള്ള 500 മീറ്റർ ദൂരം 40ലക്ഷം രൂപ വിനിയോഗിച്ചാണ് ഓട നിർമിച്ചുവരുന്നത്. ഓട പൂർത്തിയാകുന്നതോടെ വെള്ളക്കെട്ടിന് ശാശ്വത പരിഹാരമാകുമെന്നാണ് കരുതുന്നതെന്ന് പഞ്ചായത്തംഗങ്ങളായ കവിത റെജി,ലേവിച്ചൻ കാട്ടേത്ത് എന്നിവർ പറഞ്ഞു.

മാര്‍ സ്ലീവാ മെഡിസിറ്റിയില്‍ ഓവേറിയന്‍ കാന്‍സര്‍ പഠന സെമിനാര്‍

പാലാ: മാര്‍ സ്ലീവാ മെഡിസിറ്റിയിലെ ഓങ്കോളജി വിഭാഗത്തിന്‍റെയും ഒബ്സ്റ്റട്രിക്‌സ്, ഗൈനക്കോളജി വിഭാഗത്തിന്‍റെയും നേതൃത്വത്തില്‍ കോട്ടയം ഒ ആന്‍ഡ് ജി സൊസൈറ്റിയുമായി സഹകരിച്ച് ഓവേറിയന്‍ കാന്‍സര്‍ എന്ന വിഷയത്തില്‍ പഠന സെമിനാര്‍ നടത്തി. മാര്‍ സ്ലീവാ കാന്‍സര്‍ കെയര്‍ ആന്‍ഡ് റിസര്‍ച്ച് സെന്‍ററിന്‍റെ ആഭിമുഖ്യത്തില്‍ നടത്തുന്ന കാന്‍സര്‍ കെയര്‍ സീരീസിന്‍റെ ഭാഗമായാണ് പരിപാടി സംഘടിപ്പിച്ചത്. ഐഎംഎ പാലാ പ്രസിഡന്‍റ് ഡോ. കുര്യന്‍ ജോസഫ് ഉദ്ഘാടനം ചെയ്തു. ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ അധ്യക്ഷത വഹിച്ചു. ആശുപത്രി ഓങ്കോളജി വിഭാഗം മേധാവി ഡോ. റോണി ബെന്‍സണ്‍, കോട്ടയം ഒ ആന്‍ഡ് ജി സൊസൈറ്റി പ്രസിഡന്‍റ് ഡോ. അനിത കെ.ഗോപാല്‍, ആശുപത്രി ചീഫ് ഓഫ് മെഡിക്കല്‍ സര്‍വീസസ് എയര്‍ കോമൊഡോര്‍ ഡോ. പോളിന്‍ ബാബു, ഒബ്‌സ്റ്റട്രിക്‌സ് ആന്‍ഡ് ഗൈനക്കോളജി വിഭാഗം മേധാവി ഡോ. അജിതാകുമാരി എന്നിവര്‍ പ്രസംഗിച്ചു. ഓവേറിയന്‍ കാന്‍സറുമായി ബന്ധപ്പെട്ടുള്ള വിവിധ വിഷയങ്ങളില്‍ ആശുപത്രി ഗൈനക്കോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. ടി. ഗീത, ലബോറട്ടറി മെഡിസിന്‍ ആന്‍ഡ് പതോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. റോസമ്മ തോമസ്, റേഡിയോ ഡയഗ്‌നോസിസ് ആന്‍ഡ് ഇമേജിംഗ് വിഭാഗം സീനിയര്‍ കണ്‍സള്‍ട്ടന്‍റ് ഡോ. രചന ജോര്‍ജ്, തിരുവനന്തപുരം ആര്‍സിസിയിലെ അസോസിയേറ്റ് പ്രഫസർ ഡോ. ശിവരഞ്ജിത്ത്, ഡോ. പി. രമ, ഡോ. ലക്ഷ്മി ഹരിദാസ് എന്നിവര്‍ പ്രബന്ധം അവതരിപ്പിച്ചു. വിവിധ ആശുപത്രികളില്‍ നിന്നുള്ള ഓങ്കോളജി, ഒബ്സ്റ്റട്രിക്‌സ്, ഗൈനക്കോളജി വിഭാഗങ്ങളിലെ ഡോക്ടര്‍മാര്‍ ചര്‍ച്ചകളില്‍ പങ്കെടുത്തു.

വേനലവധി വെറുതേകളയാനല്ല; ലയയും ലീനും തിരക്കിലാണ്

കടുത്തുരുത്തി. വേനലവധിക്കാലം വസ്ത്ര ശേഖരണത്തിനായി മാറ്റിവച്ച് സഹോദരങ്ങള്‍. കടുത്തുരുത്തി സെന്‍റ് കുര്യാക്കോസ് പബ്ലിക് സ്‌കൂളിലെ പത്താംക്ലാസ് വിദ്യാര്‍ഥിനി ലയ മരിയ ബിജുവും ആറാം ക്ലാസ് വിദ്യാര്‍ഥിയായ സഹോദരന്‍ ലീന്‍ ബി. പുളിക്കനുമാണ് അവധിക്കാലം വസ്ത്രശേഖരണത്തിനായി മാറ്റിവച്ചിരിക്കുന്നത്. വസ്ത്രങ്ങള്‍ ശേഖരിച്ചു ക്ലോത്ത് ബാങ്കിന് നല്‍കുകയാണ് ലക്ഷ്യം. ക്ലോത്ത് ബാങ്കില്‍നിന്നു വസ്ത്രങ്ങള്‍ സൗജന്യമായി ആര്‍ക്കും നല്‍കും. വീടുകളിലെത്തി ശേഖരിക്കുന്ന വസ്ത്രങ്ങള്‍ ആദ്യം തരംതിരിക്കും. പിന്നീട് ലയയും ലീനും ചേര്‍ന്ന് ഇവ വൃത്തിയായി കഴുകി ഉണക്കിയെടുക്കും. തുടര്‍ന്ന് ഇവ തേച്ചു മടക്കി അടുക്കിവയ്ക്കും. ശേഖരിച്ച വസ്ത്രങ്ങള്‍ സ്‌കൂള്‍ മാനേജര്‍ ഫാ. ബിനോ ചേരിയില്‍, പ്രിന്‍സിപ്പല്‍ ഫാ. അജീഷ് കുഞ്ചിറക്കാട്ട്, സഹമാനേജര്‍ ഫാ. ജിന്‍സ് അലക്‌സാണ്ടര്‍ എന്നിവര്‍ക്ക് കൈമാറും. സ്‌കൂള്‍ അധികൃതര്‍ വസ്ത്രങ്ങള്‍ പിന്നീട് ക്ലോത്ത് ബാങ്കിന് കൈമാറും. ലയയും ലീനും ചേര്‍ന്ന് ഇത്തരത്തില്‍ രണ്ടുതവണ വസ്ത്രങ്ങള്‍ കൈമാറി. ആവശ്യക്കാര്‍ക്ക് ഇവര്‍ വീടുകളില്‍ എത്തിച്ചും നല്‍കുന്നുണ്ട്. കഴിഞ്ഞ അവധിക്കാലത്ത് ജലസ്രോതസുകളില്‍നിന്നും റോഡുകളില്‍നിന്നും മാലിന്യം നീക്കം ചെയ്യുന്ന ജോലികളായിരുന്നു ഇരുവരും നടത്തിയത്. സ്‌കൂളിന്‍റെയും അധ്യാപകരുടെയും രക്ഷിതാക്കളുടെയും പിന്തുണയും ഇരുവര്‍ക്കുമുണ്ട്. ലയ മരിയ ഇക്കുറി പത്താം ക്ലാസ് പരീക്ഷയില്‍ എല്ലാ വിഷയങ്ങള്‍ക്കും എ വണ്‍ നേടി വിജയിച്ചിരുന്നു. പഠനത്തോടൊപ്പം പ്രകൃതി സംരക്ഷണ പ്രവര്‍ത്തനങ്ങളിലും സജീവമായി തുടരാനാണ് സഹോദരങ്ങളുടെ തീരുമാനം.

തെരുവുനായ്ക്കള്‍ ആട്ടിന്‍കുട്ടിയെ കടിച്ചുകൊന്നു

ഞീഴൂര്‍: തെരുവുനായ്ക്കള്‍ ആട്ടിന്‍കുട്ടിയെ കടിച്ചുകൊന്നു. ഞീഴൂര്‍ തുരുത്തിപ്പള്ളി കുമ്പനാട്ടേല്‍ മാഗി ചാക്കോയുടെ ഏഴുമാസം പ്രായമായ ആട്ടിന്‍കുട്ടിയെയാണ് കൂട്ടമായെത്തിയ തെരുവുനായ്ക്കള്‍ കടിച്ചുകൊന്നത്. വീടിനു സമീപം കെട്ടിയിട്ടിരുന്ന ആട്ടിന്‍കുട്ടിയാണ് നായ്ക്കളുടെ ആക്രമണത്തിനിരയായത്. ആടിന്‍റെ കരച്ചില്‍ കേട്ട് വീട്ടുകാരെത്തി നായ്ക്കളെ ഓടിക്കാന്‍ ശ്രമിച്ചെങ്കിലും ആട് ചത്തിരുന്നു. പ്രദേശത്ത് തെരുവുനായശല്യം രൂക്ഷമാണെന്ന് നാട്ടുകാര്‍ പറഞ്ഞു.

ജി. സുധാകരനെതിരേ എച്ച്. സലാം എംഎൽഎ

ആലപ്പുഴ: മുൻമന്ത്രിയും സിപിഎം നേതാവുമായ ജി. സുധാകരനെതിരേ അമ്പലപ്പുഴ എംഎൽഎ എച്ച്. സലാം രംഗത്ത്. കുഞ്ചൻ നമ്പ്യാർ സ്മാരകത്തിന്‍റെ നിർമാണം ശരിയല്ലെന്നും യുദ്ധക്കളമാക്കിയെന്നുമുള്ള ജി. സുധാകരന്‍റെ പ്രസ്താവനയ്‌ക്കെതിരേയാണ് എച്ച്. സലാം രംഗത്തുവന്നത്. ഫേസ്ബുക്കിലൂടെയായിരുന്നു എച്ച്. സലാമിന്‍റെ പ്രതികരണം. എംഎൽഎ എന്ന നിലയിലും സ്മാരകസമിതിയുടെ ഭാഗമായും നിന്നു പുതിയ മന്ദിരത്തിന്‍റെ നിർമാണത്തിൽ താൻ വ്യക്തിപരമായ ഉത്തരവാദിത്വം നിർവഹിച്ചിട്ടുണ്ട്. അമ്പലപ്പുഴ രാമവർമ ചെയർമാൻ ആയിരുന്നപ്പോഴും പള്ളിപ്പുറം മുരളി ചെയർമാനായിരുന്ന കഴിഞ്ഞ സർക്കാരിന്‍റെ കാലത്തും സ്മാരകസമിതിയുടെ വൈസ് ചെയർമാനായി താൻ പ്രവർത്തിച്ചിരുന്നു. ആ സമയം മുതൽ സ്മാരകത്തിന്‍റെ വികസനത്തിന്‌ വേണ്ടി ഏറെ താത്പര്യപൂർവമാണ് പ്രവർത്തിക്കുന്നതെന്നും എംഎൽഎ കുറിച്ചു. ശേഷം ജി. സുധാകരനെതിരേ രൂക്ഷവിമർശനവും നടത്തി. അനാവശ്യങ്ങൾ പറയുമ്പോൾ പ്രതികരിക്കാത്തത് ഭാഷ വശമില്ലാത്തതുകൊണ്ടോ പറയാൻ അറിയാത്തതുകൊണ്ടോ അല്ല. തന്നെ പോലെയുള്ളവരുടെ ഉള്ളിൽ ബഹുമാനം അവശേഷിക്കുന്നതുകൊണ്ടാണ്. അത് ഇനിയും കളഞ്ഞുകുളിക്കരുത് എന്നും എച്ച്. സലാം മുന്നറിയിപ്പ് നൽകുന്നു. സുധാകരൻ ഉദ്‌ഘാടനം ചെയ്ത പഴയ ഫലകം ഇപ്പോൾ ഇല്ല എന്ന വാദം തെറ്റാണെന്നും സലാം ചിത്രങ്ങൾ അടക്കം പങ്കുവച്ചുകൊണ്ട് പറയുന്നു. നിർമാണത്തിന്‍റെ ഓരോ കാര്യങ്ങളും അതത് സമയത്ത് സ്മാരകസമിതി ചർച്ച ചെയ്ത് നിർമാണ സബ് കമ്മിറ്റി മേൽനോട്ടം വഹിച്ചുമാണ് നടത്തിയിട്ടുള്ളത്. മനോഹരമായ സാംസ്‌കാരിക കേന്ദ്രം നിർമിക്കാൻ ആത്മാർഥമായി പരിശ്രമിച്ച സ്മാരകസമിതി അംഗങ്ങളുടെ അന്തസ് ഇടിച്ചുതാഴ്ത്താൻ ദയവായി പരിശ്രമിക്കരുതെന്നും സുധാകരനോട് സലാം അഭ്യർഥിക്കുന്നു. കുഞ്ചൻ നമ്പ്യാർ സ്മാരകം പരിപാലനമില്ലാതെ നശിക്കുകയാണെന്നും താൻ എംഎൽഎ ആയിരുന്ന കാലത്ത് പണം അനുവദിച്ചതാണെന്നുമായിരുന്നു സുധാകരൻ പറഞ്ഞിരുന്നത്. സ്മാരകം ഒരു യുദ്ധക്കളമായി മാറിയിരിക്കുകയാണ്. പ്രതിമയും ഹോളും മറ്റുമെല്ലാം നശിച്ചുതുടങ്ങിയിരിക്കുന്നു. എച്ച്. സലാമിന്‍റെ പേര് എടുത്തുപറയാതെയായിരുന്നു സുധാകരന്‍റെ വിമർശനം. ഇതിനാണ് സലാം മറുപടിയുമായി രംഗത്തുവന്നത്.

വിശുദ്ധ റീത്ത ക്രൈസ്തവജീവിതത്തിന് മാതൃക: മാർ ജോസഫ് പെരുന്തോട്ടം

പുളിങ്കുന്ന്: കുടുംബജീവിതത്തിലൂടെയും സമർപ്പണ ജീവിതത്തിലൂടെയും എല്ലാവർക്കും ക്രൈസ്തവ ജീവിതത്തിന്‍റെ ഉത്തമ മാതൃക കാണിച്ചുതന്ന വ്യക്തിയായിരുന്നു വിശുദ്ധ റീത്ത പുണ്യവതി എന്ന് ആർച്ച്ബിഷപ് എമിരറ്റസ് മാർ ജോസഫ് പെരുന്തോട്ടം. പുളിങ്കുന്ന് ഫൊറോന മാതൃ-പിതൃവേദിയുടെ ആഭിമുഖ്യത്തിൽ നടത്തിയ പതിനാറാമത് കണ്ണാടി തീർഥാടനത്തിൽ സന്ദേശം നൽകുകയായിരുന്നു മാർ പെരുന്തോട്ടം. ഫൊറോന ഡയറക്ടർ ഫാ. ടോം ആര്യങ്കാലാ ആമുഖ സന്ദേശവും പിതൃവേദി അതിരൂപത പ്രസിഡന്‍റ് റോയി കപ്പാങ്കൽ ആശംസാ പ്രസംഗവും നടത്തി. കണ്ണാടി തീർഥാടന റാലി ഫൊറോന വികാരി റവ.ഡോ. ടോം പുത്തൻകളം ഫ്ലാഗ് ഓഫ് ചെയ്തു. പിതൃവേദി പ്രസിഡന്‍റ് സണ്ണി അഞ്ചിലിനും മാതൃവേദി പ്രസിഡന്‍റ് ബീന ജോസഫിനും പതാക കൈമാറി. ഗ്രേസി സക്കറിയാസ് നെല്ലുവേലി ഛായചിത്രവും റപ്പേൽ ജോസഫ് ജൂബിലി തിരിയും മറിയമ്മ അലക്സാണ്ടർ ജൂബിലി പതാകയും വഹിച്ചു. ആയിരക്കണക്കിന് വിശ്വാസികൾ പങ്കെടുത്തു.

ശമ്പള കമ്മീഷന്‍ നിയമനം വൈകരുത്: പെന്‍ഷനേഴ്‌സ് ഫ്രണ്ട്

കോട്ടയം: സർക്കാർ ജീവനക്കാരുടെയും പെന്‍ഷന്‍കാരുടെയും ശമ്പളവും പെന്‍ഷനും പരിഷ്‌കരിക്കുന്നതിനായി ശമ്പള കമ്മീഷനെ ഉടന്‍ നിയമിക്കണമെന്ന് കേരള സ്റ്റേറ്റ് സര്‍വീസ് പെന്‍ഷനേഴ്‌സ് ഫ്രണ്ട് സംസ്ഥാന കമ്മിറ്റി ആവശ്യപ്പെട്ടു. ക്ഷാമബത്ത കുടിശികപോലും കൃത്യമായി ലഭിക്കാതെ ജീവനക്കാരും പെന്‍ഷന്‍കാരും കടുത്ത സാമ്പത്തിക ഞെരുക്കത്തിലാണെന്ന് യോഗം ചൂണ്ടിക്കാട്ടി. സംസ്ഥാന പ്രസിഡന്‍റ് വി.എം. മോഹനന്‍പിള്ളയുടെ അധ്യക്ഷതയില്‍ ജനറല്‍ സെക്രട്ടറി മൈക്കിള്‍ സിറിയക്, പി.രാധാകൃഷ്ണ കുറുപ്പ്, ജയ്‌സണ്‍ മാന്തോട്ടം, ഡോ. വര്‍ഗീസ് പേരയില്‍, വടയക്കണ്ടി നാരായണ്‍, മാത്തച്ചന്‍ പ്ലാന്തോട്ടം, പി.ടി. ജേക്കബ്, ബാബു ജോസഫ്, ജോയി അഗസ്റ്റിന്‍ എന്നിവര്‍ പ്രസംഗിച്ചു.

ഡോ. അഞ്ജു ആൻ മാത്യുവിനെ അനുമോദിച്ചു

ഏറ്റുമാനൂർ: നീറ്റ് എംഡിഎസ് പരീക്ഷയിൽ ദേശീയ തലത്തിൽ ഒന്നാം റാങ്ക് നേടിയ ഏറ്റുമാനൂർ അന്തനാട്ട് ഡോ. അഞ്ജു ആൻ മാത്യുവിനെ മോൻസ് ജോസഫ് എംഎൽഎ വീട്ടിലെത്തി അനുമോദിക്കുകയും എംഎൽഎയുടെ എക്സ‌ലൻസ് അവാർഡ് സമ്മാനിക്കുകയും ചെയ്തു. കേരള കോൺഗ്രസ് ജില്ലാ പ്രസിഡന്‍റ് ജയ്‌സ്‌ൺ ജോസഫ് ഒഴുകയിൽ, നിയോജകമണ്ഡലം പ്രസിഡന്‍റ് ബിനു ചെങ്ങളം, ബ്ലോക്ക് പഞ്ചായത്തംഗം ആൻസ് വർഗീസ്, കോൺഗ്രസ് വാർഡ് പ്രസിഡന്‍റ് സനിൽ കാട്ടാത്തി എന്നിവർ എംഎൽഎയ്ക്ക് ഒപ്പമുണ്ടായിരുന്നു. തിരുവഞ്ചൂർ രാധാകൃഷ്‌ണൻ എംഎൽഎയും അഞ്ജുവിനെ വീട്ടിലെത്തി അനുമോദിച്ചു. കോൺഗ്രസ് ബ്ലോക്ക് സെക്രട്ടറി വിഷ്ണു ചെമ്മുണ്ടവള്ളി, വാർഡ് കമ്മിറ്റിയംഗം തമ്പി മാത്യു എന്നിവർ ഒപ്പമുണ്ടായിരുന്നു. അതിരമ്പുഴ പഞ്ചായത്തിന്‍റെ ആദരം പഞ്ചായത്ത് പ്രസിഡന്‍റ് ജോസ് അമ്പലക്കുളം, പഞ്ചായത്ത് അംഗങ്ങളായ രജിത ഹരികുമാർ, ഹരി പ്രകാശ്, ഫസീന സുധീർ എന്നിവർ ചേർന്നു സമ്മാനിച്ചു.

മാന്നാര്‍ ശ്രീകൃഷ്ണസ്വാമി ക്ഷേത്രത്തില്‍ മോഷണം

കടുത്തുരുത്തി: മാന്നാര്‍ ശ്രീകൃഷ്ണസ്വാമി ക്ഷേത്രത്തില്‍ മോഷണം. ശ്രീകോവിലിന്‍റെ ചുറ്റമ്പലത്തിനു മുകളില്‍ വച്ചിരുന്ന താഴികക്കുടത്തിന്‍റെ ബോളുപോലുള്ള ഒരുഭാഗവും ഓട്ടുരുളിയുമാണ് മോഷണംപോയത്. ചുറ്റുവിളക്കിന്‍റെ വിളക്കുമാടത്തില്‍ ചവിട്ടിയാണ് മോഷ്ടാവ് അകത്ത് കയറിയത്. കഴിഞ്ഞ ദിവസം രാത്രിയാണ് മോഷണം നടന്നത്. പിറ്റേദിവസം രാവിലെ ക്ഷേത്ര ജീവനക്കാരാണ് മോഷണ വിവരം അറിയുന്നത്. ദേവസ്വം മാനേജര്‍ കടുത്തുരുത്തി പോലീസില്‍ പരാതി നല്‍കി. പോലീസ് സ്ഥലത്തെത്തി അന്വേഷണം ആരംഭിച്ചു. സമീപകാലത്ത് കുന്നയ്ക്കല്‍ ഹരികുമാറിന്‍റ് വീട്ടിലെ ചെന്പു പാത്രവും മോഷണം പോയിരുന്നു. പ്രദേശത്ത് സാമൂഹ്യവിരുദ്ധരുടെയും മദ്യപാനികളുടെയും ലഹരി മാഫിയയുടെയും ശല്യം രൂക്ഷമാണെന്നു നാട്ടുകാര്‍ പറഞ്ഞു.

കറുത്തേടം-തെള്ളകം-അടിച്ചിറ റോഡ് ഉദ്ഘാടനം ഇന്ന്

കോട്ടയം: ആധുനിക നിലവാരത്തിൽ നിർമാണം പൂർത്തിയായ ഏറ്റുമാനൂരിലെ കറുത്തേടം - തെള്ളകം- അടിച്ചിറ റോഡിന്‍റെ ഉദ്ഘാടനം ഇന്ന് നടക്കും. വൈകുന്നേരം നാലിന് തെള്ളകത്തുശേരി ജംഗ്ഷനിൽ മന്ത്രി വി.എൻ. വാസവൻ ഉദ്ഘാടനം നിർവഹിക്കും. മന്ത്രി പി.എ. മുഹമ്മദ് റിയാസ് അധ്യക്ഷത വഹിക്കും. ഏറ്റുമാനൂർ നഗരസഭയുടെ അധീനതയിലുള്ള റോഡ് പൊതുമരാമത്ത് ഏറ്റെടുത്ത് ആധുനിക നിലവാരത്തിൽ പൂർത്തിയാക്കുകയായിരുന്നു. 2.35 കിലോമീറ്റർ നീളമുള്ള റോഡ് 4.88 കോടി രൂപ ചെലവിട്ടാണ് ബിഎംബിസി നിലവാരത്തിൽ പുനർനിർമിച്ചത്. ഏറ്റുമാനൂർ നഗരസഭാധ്യക്ഷ ലൗലി ജോർജ്, വൈസ് ചെയർമാൻ പി.ബി. ജയമോഹൻ, നഗരസഭാംഗങ്ങളായ മാത്യു കുര്യൻ, സിന്ധു കറുത്തേടം, പൊതുമരാമത്ത് നിരത്ത് വിഭാഗം എക്സിക്യൂട്ടീവ് എൻജിനിയർ ടി.എസ്. ജയരാജ്, സംഘാടകസമിതി ചെയർമാൻ ജോണി വർഗീസ്, കൺവീനർ പി.വി. പ്രദീപ് എന്നിവർ പങ്കെടുക്കും.

എയ്ഞ്ചല്‍സ് മീറ്റ് ഇന്ന്

കുടമാളൂര്‍: ചെറുപുഷ്പ മിഷന്‍ലീഗ് കുടമാളൂര്‍ മേഖലയുടെ ആഭിമുഖ്യത്തില്‍ ഈ വര്‍ഷം ദിവ്യകാരുണ്യ സ്വീകരണം നടത്തിയ കുട്ടികളുടെ സംഗമം - എയ്ഞ്ചല്‍സ് മീറ്റ്-2025 ഇന്ന് കുടമാളൂര്‍ മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന കേന്ദ്രത്തില്‍ നടക്കും. മാര്‍ ജോസഫ് പെരുന്തോട്ടം വിശുദ്ധ കുര്‍ബാനയ്ക്ക് കാര്‍മികത്വം വഹിക്കും. കെസിഎസ്എല്‍ ഡയറക്ടര്‍ ഫാ. ജോജോ പള്ളിച്ചിറ ക്ലാസ് നയിക്കും. കുടമാളൂര്‍ മേഖലാ പ്രസിഡന്‍റ് അമല്‍ ജോസഫിന്‍റെ അധ്യക്ഷതയില്‍ ഫൊറോനയിലെ 14 ഇടവകകളില്‍നിന്നുള്ള കുട്ടികള്‍ പങ്കെടുക്കുന്ന സമ്മേളനം ആര്‍ച്ച്പ്രീസ്റ്റ് റവ. ഡോ. മാണി പുതിയിടം ഉദ്ഘാടനം ചെയ്യും. അതിരൂപത മിഷന്‍ലീഗ് അസിസ്റ്റന്‍റ് ഡയറക്ടര്‍ ഫാ. സെബാസ്റ്റ്യന്‍ മാമ്പറ, ദേശീയ ജനറല്‍ സെക്രട്ടറി ലൂക്ക് അലക്‌സ് പിണമറുകില്‍, മേഖലാ ഡയറക്ടര്‍ ഫാ. ജസ്റ്റിന്‍ വരവുകാലായില്‍, ഭാരവാഹികളായ സാലിച്ചന്‍ തുമ്പേക്കളം, ജെറിന്‍ കളപ്പുര, ജോണ്‍സ് ഇടച്ചേത്ര, വി.ജെ. സെബാസറ്റിയന്‍, മിനി തോമസ്, സാന്ദ്ര, അനിഷ്മ എന്നിവര്‍ പ്രസംഗിക്കും.

കോട്ടയം റെയിൽവേ സ്റ്റേഷനിൽ നടുവൊടിക്കും കുഴികൾ

കോട്ടയം: ദിവസവും ഏറെ യാത്രക്കാര്‍ വന്നുപോകുന്ന കോട്ടയം റെയില്‍വേ സ്റ്റേഷനില്‍നിന്നു പുറത്തേക്കിറങ്ങുന്ന റോഡിലെ കുഴികള്‍ യാത്രക്കാരുടെ നടുവൊടിക്കുന്നു. സ്റ്റേഷനില്‍നിന്ന് പുറത്തേക്ക് ഇറങ്ങുന്ന വഴിയിലെ കുഴിയിൽ യാത്രക്കാർ വീഴുന്നത് പതിവായിരിക്കുക യാണ്. മാസങ്ങളായി ഈ വഴി പൊളിഞ്ഞു കിടക്കുന്നു. ഇതു മൂലം പലപ്പോഴും ഇവിടെ തിരക്ക് അനുഭവപ്പെടുന്നതായും യാത്രക്കാര്‍ പറയുന്നു. നഗരത്തിന്‍റെ സമീപപ്രദേശമായി ഇറഞ്ഞാല്‍ പാലത്തിനു സമീപവും യാത്രക്കാരെ തേടി ഒളിഞ്ഞിരിക്കുന്ന കുഴിയുണ്ട്. റോഡിനു കുറുകെ പെട്ടെന്ന് ശ്രദ്ധിക്കാന്‍ പറ്റാത്ത തരത്തിലുള്ള കുഴിയാണിത്. വട്ടമൂട് പാലത്തില്‍നിന്ന് ഇറഞ്ഞാലിലേക്കുള്ള വഴിയില്‍ മീനച്ചിലാറിന്‍റെ തീരത്തേക്ക് തിരിയുന്ന വഴിയിലും റോഡ് പൊളിഞ്ഞു കിടക്കുകയാണ്. നാളുകളായി ഈ അവസ്ഥ യാണ്. നഗരത്തിലെയും സമീപ പ്രദേശങ്ങളിലെയും കുഴികള്‍ അടയ്ക്കാൻ അധികൃതർ നടപടി സ്വീകരിക്ക ണമെന്ന ആവശ്യം ശക്തമായി.

വാകത്താനത്ത് വൻ ചീട്ടുകളി സംഘം പിടിയിൽ

വാകത്താനം: വൻ ചീട്ടുകളി സംഘത്തെ പിടികൂടി പോലീസ്. ഉണ്ണാമറ്റം കാലായിൽ ബിജോയി എന്ന വ്യക്തിയുടെ കെട്ടിടത്തിലായിരുന്നു പണംവച്ച് ചീട്ടുകളി നടന്നത്. 5,60,450 രൂപ സ്ഥലത്തുനിന്നു പോലീസ് പിടിച്ചെടുത്തു. സംഭവത്തിൽ കെട്ടിട ഉടമസ്ഥനെയും ജില്ലയിലും പുറത്തുമായി കൊലപാതകശ്രമം, ലഹരി വ്യാപാരം ഉൾപ്പെടെ പന്ത്രണ്ടി ലധികം കേസുകളിൽ പ്രതിയായ മിഥുൻ തോമസിനെ‍യും ചീട്ടുകളിക്കാനെത്തിയ 12 പേരെയും പോലീസ് അറസ്റ്റ് ചെയ്തു.

ചങ്ങനാശേരി അതിരൂപത ദിനാഘോഷം: ഇടവകകളില്‍ ഇന്ന് പതാക ഉയര്‍ത്തും

ഛായാചിത്ര ദീപശിഖാ പ്രയാണങ്ങള്‍ നാളെ ചങ്ങനാശേരി: 139-ാമത് ചങ്ങനാശേരി അതിരൂപതാദിനാഘോഷങ്ങളുടെ മുന്നോടിയായി ഇന്ന് ഇടവകതല ആഘോഷം നടത്തും. വിവിധ ഇടവകകളില്‍ വിശുദ്ധകുര്‍ബാന, അതിരൂപതാദിന പ്രതിജ്ഞ, അതിരൂപതാദിന സന്ദേശം, പതാക ഉയര്‍ത്തല്‍ എന്നിവ നടത്തും. നാളെ വിളംബരദിനമായി ആചരിക്കും. ഉച്ചയ്ക്ക് ഒന്നിന് കര്‍ദിനാള്‍ മാര്‍ ആന്‍റണി പടിയറയുടെ മാതൃ ഇടവകയായ മണിമല സെന്‍റ് ബേസില്‍ പള്ളിയില്‍നിന്ന് ഛായാചിത്ര പ്രയാണം ആരംഭിക്കും. മണിമല പള്ളി വികാരി ഫാ. മാത്യു താന്നിയത്ത് ഛായാചിത്രം യുവദീപ്തി അതിരൂപത പ്രസിഡന്‍റ് അരുണ്‍ ടോമിനു കൈമാറും. ഉച്ചകഴിഞ്ഞ് രണ്ടിന് ധന്യന്‍ മാര്‍ തോമസ് കുര്യാളശേരിയുടെ മാതൃ ഇടവകയായ ചമ്പക്കുളം ഫൊറോനാ പള്ളിയില്‍നിന്ന് ദീപശിഖാപ്രയാണം ആരംഭിക്കും. ചമ്പക്കുളം ഫൊറോനാ വികാരി റവ.ഡോ. ജയിംസ് പാലയ്ക്കല്‍ മിഷന്‍ലീഗ് അതിരൂപത ഓര്‍ഗനൈസിംഗ് പ്രസിഡന്‍റ് ടിന്‍റോ സെബാസ്റ്റ്യന് ദീപശിഖ കൈമാറും. ഛായാചിത്ര-ദീപശിഖാ പ്രയാണങ്ങള്‍ വിവിധ ഇടവകകളിലൂടെ കടന്ന് അരമനപ്പടിയില്‍ സംഗമിക്കും. വൈകുന്നേരം അഞ്ചിന് ഛായാചിത്ര-ദീപശിഖാ പ്രയാണങ്ങള്‍ക്ക് ചങ്ങനാശേരി മെത്രാപ്പോലീത്തന്‍ പള്ളിയില്‍ സ്വീകരണം നല്‍കും. ആര്‍ച്ച്ബിഷപ് മാര്‍ തോമസ് തറയില്‍ ഛായാചിത്രവും ദീപശിഖയും ഏറ്റുവാങ്ങി ചങ്ങനാശേരി ഫൊറോന യുവദീപ്തി പ്രസിഡന്‍റ് ഈപ്പന്‍ മാത്യു, മിഷന്‍ലീഗ് ചങ്ങനാശേരി മേഖലാ പ്രസിഡന്‍റ് ഹയ ടോജി എന്നിവര്‍ക്ക് കൈമാറി സന്ദേശം നല്‍കും. മോണ്‍. ആന്‍റണി എത്തയ്ക്കാട്ട് റംശ നയിക്കും.

കിക്ക് ഡ്രഗ്സ് സന്ദേശയാത്ര നാളെ ജില്ലയിൽ

കോട്ടയം: സംസ്ഥാന സർക്കാരിന്‍റെ ലഹരിവിരുദ്ധ കാമ്പയിന്‍റെ ഭാഗമായി ലഹരി ഉപയോഗിക്കാതിരിക്കുക, സ്പോർട്സാണ് ലഹരി എന്ന മുദ്രാവാക്യം ഉയർത്തി മന്ത്രി വി. അബ്‌ദുറഹ്‌മാൻ നേതൃത്വം നൽകുന്ന കിക്ക് ഡ്രഗ്‌സ് സന്ദേശ യാത്ര നാളെ ജില്ലയിൽ പര്യടനം നടത്തും. ജില്ലാ സ്പോർട്സ് കൗൺസിലിന്‍റെ നേതൃത്വത്തിൽ രാവിലെ ആറിന് ചേർപ്പുങ്കൽ കവലയ്ക്ക് സമീപമുള്ള മാർ സ്ലീവാ ഷോപ്പിംഗ് കോംപ്ലക്‌സിന് മുന്നിൽനിന്ന് കായികതാരങ്ങളും ബഹുജനങ്ങളും ജനപ്രതിനിധികളും നേതൃത്വം നൽകുന്ന മാരത്തൺ ജോസ് കെ. മാണി എംപി ഫ്ളാഗ് ഓഫ് ചെയ്യും. രാവിലെ എട്ടിന് പേരൂർ കവലയിൽ എത്തിച്ചേരുന്ന ലഹരിവിരുദ്ധ സന്ദേശ യാത്രയെ മന്ത്രി വി.എൻ. വാസവന്‍റെ നേതൃത്വത്തിൽ സ്വീകരിക്കും. തുടർന്ന് ഏറ്റുമാനൂർ പ്രൈവറ്റ് ബസ് സ്റ്റാൻഡ് മൈതാനത്ത് അവസാനിക്കുന്ന വാക്കത്തോണിൽ മന്ത്രിമാർ, എംപിമാർ, എംഎൽഎമാർ, ജനപ്രതിനിധികൾ, സാംസ്കാരിക നായകന്മാർ, മത-സമുദായിക നേതാക്കൾ, അസോസിയേഷൻ പ്രതിനിധികൾ, കായിക രംഗത്തെ പ്രമുഖർ തുടങ്ങിയവർ പങ്കെടുക്കും. ലഹരിവിരുദ്ധ സമ്മേളനവും, മാരത്തൺ വിജയികൾക്കുള്ള സമ്മാനദാനവും അസോസിയേഷനുകളുടെ നേതൃത്വത്തിൽ വിവിധ പരിപാടികളും നടത്തപ്പെടും. രാവിലെ 11ന് കളിക്കളം വീണ്ടെടുക്കൽ പദ്ധതിയുടെ ഭാഗമായി ജില്ലയിലെ ഗ്രൗണ്ട് സന്ദർശനവും കായികോപകരണങ്ങളുടെ വിതരണവും കായികമന്ത്രി നിർവഹിക്കും. ലഹരിവിരുദ്ധ പ്രചാരണ യാത്രയ്ക്ക് മുന്നോടിയായി ഇന്നു കളക്‌ടറേറ്റിൽനിന്ന് ആരംഭിക്കുന്ന സൈക്കിൾ റാലി ജില്ലാ കളക്ടർ ജോൺ വി. സാമുവൽ ഫ്ളാഗ് ചെയ്യും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]