വൈക്കം: 603 ദിവസം നീളുന്ന വൈക്കം സത്യഗ്രഹ ശതാബ്ദി ആഘോഷങ്ങളുടെ സംസ്ഥാനതല ഉദ്ഘാടനം ഇന്ന് വൈകുന്നേരം 3.30ന് വൈക്കം ബീച്ചില് നടക്കുന്ന ചടങ്ങില് മുഖ്യമന്ത്രി പിണറായി വിജയനും തമിഴ്നാട് മുഖ്യമന്ത്രി എം.കെ. സ്റ്റാലിനും ചേര്ന്നു നിര്വഹിക്കുമെന്ന് മന്ത്രി സജി ചെറിയാന് അറിയിച്ചു.
വൈകുന്നേരം മൂന്നിന് വലിയകവലയിലെ വൈക്കം തന്തൈ പെരിയാര് സ്മാരകത്തിലെത്തി മഹാത്മാഗാന്ധി, പെരിയാര്, ടി.കെ. മാധവന്, മന്നത്ത് പദ്മനാഭന് എന്നിവരുടെ സ്മൃതി മണ്ഡപങ്ങളിലും കുഞ്ഞാപ്പി, ബാഹുലേയന്, ഗോവിന്ദപണിക്കര്, ആമചാടി തേവന്, രാമന് ഇളയത് തുടങ്ങിയ സത്യഗ്രഹികളുടെയും നവോത്ഥാനനായകരുടെയും പ്രത്യേകം തയാറാക്കിയ സ്മൃതി മണ്ഡപങ്ങളില് ഇരു മുഖ്യമന്ത്രിമാരും പുഷ്പാര്ച്ചന നടത്തും.
പുഷ്പാര്ച്ചനയ്ക്ക് ശേഷമാണ് ബീച്ചില് ഉദ്ഘാടന ചടങ്ങ് ആരംഭിക്കുക. മന്ത്രി വി.എന്. വാസവന് അധ്യക്ഷത വഹിക്കും. ഇന്ഫര്മേഷന് ആന്ഡ് പബ്ലിക് റിലേഷന്സ് വകുപ്പ് പുറത്തിറക്കുന്ന വൈക്കം പോരാട്ടം എന്ന പുസ്തകത്തിന്റെ മലയാളം പതിപ്പ് പ്രകാശനം തമിഴ്നാട് മുഖ്യമന്ത്രി എം.കെ. സ്റ്റാലിനു നല്കി മുഖ്യമന്ത്രി പിണറായി വിജയന് നിര്വഹിക്കും. ശതാബ്ദി ലോഗോ പ്രകാശനം സി.കെ. ആശ എംഎല്എയ്ക്കുനല്കി എം.കെ. സ്റ്റാലിന് നിര്വഹിക്കും. വൈക്കം സത്യഗ്രഹം കൈപ്പുസ്തക പ്രകാശനം തോമസ് ചാഴികാടന് നല്കി മുഖ്യമന്ത്രി പിണറായി വിജയന് നിര്വഹിക്കും.
ശതാബ്ദി ആഘോഷ രൂപരേഖ ചീഫ് സെക്രട്ടറി ഡോ. വി.പി. ജോയ് അവതരിപ്പിക്കും. മന്ത്രിമാരായ സജി ചെറിയാന്, കെ.എന്. ബാലഗോപാല്, റോഷി അഗസ്റ്റിന്, കെ.രാധാകൃഷ്ണന്, കെ. കൃഷ്ണന് കുട്ടി, അഡ്വ. ആന്റണി രാജു, അഹമ്മദ് ദേവര്കോവില്, സര്ക്കാര് ചീഫ് വിപ്പ് ഡോ. എന്. ജയരാജ്, പ്രതിപക്ഷനേതാവ് വി.ഡി. സതീശന്, മുന് മുഖ്യമന്ത്രി ഉമ്മന്ചാണ്ടി, ലോക്സഭാംഗം ടി.ആര്. ബാലു, രാജ്യസഭാംഗങ്ങളായ ജോസ് കെ. മാണി, ബിനോയ് വിശ്വം, സിപിഐ സംസ്ഥാനസെക്രട്ടറി കാനം രാജേന്ദ്രന്, എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്, കെപിഎംഎസ് ജനറല് സെക്രട്ടറി പുന്നല ശ്രീകുമാര്, കേരള നവോത്ഥാന സമിതി ജനറല് സെക്രട്ടറി പി. രാമഭദ്രന്, മുന്രാജ്യസഭാംഗം കെ. സോമപ്രസാദ് എന്നിവര് വിശിഷ്ടാതിഥികളാകും.
എംഎല്എമാരായ തിരുവഞ്ചൂര് രാധാകൃഷ്ണന്, മോന്സ് ജോസഫ്, മാണി സി. കാപ്പന്, അഡ്വ. ജോബ് മൈക്കിള്, അഡ്വ. സെബാസ്റ്റ്യന് കുളത്തുങ്കല്, ജില്ലാ പഞ്ചായത്ത് പ്രസിഡന്റ് കെ.വി. ബിന്ദു, സാംസ്കാരിവകുപ്പ് സെക്രട്ടറി മിനി ആന്റണി, സാംസ്കാരിക വകുപ്പ് ഡയറക്ടര് എസ്. സുബ്ര്മണ്യന്, ജില്ലാ കളക്ടര് ഡോ.പി.കെ. ജയശ്രീ, വൈക്കം നഗരസഭാധ്യക്ഷ രാധിക ശ്യാം, വൈക്കം ബ്ലോക്ക് പഞ്ചായത്ത് പ്രസിഡന്റ് അഡ്വ. കെ.കെ. രഞ്ജിത്ത്, നഗരസഭാംഗം ബിന്ദു ഷാജി എന്നിവര് സന്നിഹിതരായിരിക്കും.
ലക്ഷം പേര് പങ്കെടുക്കും
വൈക്കം: സത്യഗ്രഹ ശതാബ്ദി ആഘോഷം സംസ്ഥാനതല ഉദ്ഘാടന ചടങ്ങില് ലക്ഷം പേര് പങ്കെടുക്കുമെന്നും ഒരുക്കം പൂര്ത്തിയായെന്നും മന്ത്രിമാരായ സജി ചെറിയാനും വി.എന്. വാസവനും പറഞ്ഞു. വൈക്കം ബീച്ചിലെ ഒരുക്കം നേരിട്ടു വിലയിരുത്തുകയായിരുന്നു മന്ത്രിമാര്. സുരക്ഷാ - ഗതാഗത ക്രമീകരണങ്ങളടക്കം മന്ത്രിമാര് വിലയിരുത്തി. മെഡിക്കല് സംഘം, അഗ്നിരക്ഷാ സേന, പോലീസ് എന്നിവ ഏര്പ്പെടുത്തിയിട്ടുള്ള ക്രമീകരണങ്ങള് വിലയിരുത്തി. സി.കെ. ആശ എംഎല്എ, സാംസ്കാര വകുപ്പ് സെക്രട്ടറി മിനി ആന്റണി, ജില്ലാ കളക്ടര് പി.കെ. ജയശ്രീ, ജില്ലാ പോലീസ് ചീഫ് കെ. കാര്ത്തിക്, വൈക്കം എസിപി നകുല് ദേശ്മുഖ്, ചലച്ചിത്ര അക്കാദമി സെക്രട്ടറി സി. അജോയ്, ആര്ഡിഒ പി.ജി. രാജേന്ദ്ര ബാബു, ജില്ലാ ഇന്ഫര്മേഷന് ഓഫീസര് എ. അരുണ് കുമാര്, പൊതുമരാമത്ത് കെട്ടിടവിഭാഗം എക്സിക്യൂട്ടീവ് എന്ജിനീയര് പി. ശ്രീലേഖ, തഹീസല്ദാര് ടി.എന്. വിജയന്, വിവിധ വകുപ്പ് ഉദ്യോഗസ്ഥര് എന്നിവര് പങ്കെടുത്തു.
പാട്ടുമായി സിതാരയും അതുല് നറുകരയും
ഉദ്ഘാടന ചടങ്ങിനോടനുബന്ധിച്ച് ഉച്ചകഴിഞ്ഞ് ഒന്നിന് അതുല് നറുകരയും സംഘവും അവതരിപ്പിക്കുന്ന സോള് ഓഫ് ഫോക്ക്, വൈകുന്നേരം ആറിന് സിതാര കൃഷ്ണകുമാറും സംഘവും അവതരിപ്പിക്കുന്ന പ്രോജക്ട് മലബാറിക്കസ് എന്നീ സംഗീത പരിപാടികള് അരങ്ങേറും.
വൈക്കത്ത് ഇന്ന് ഗതാഗതനിയന്ത്രണം
വൈക്കം: വൈക്കം സത്യഗ്രഹ ശതാബ്ദിയോടനുബന്ധിച്ച് വൈക്കത്ത് ഇന്ന് ഗതാഗത നിയന്ത്രണം ഏര്പ്പെടുത്തിയതായി ജില്ലാ പോലീസ് ചീഫ് കെ. കാര്ത്തിക് അറിയിച്ചു.
ഭാരവാഹനങ്ങള്ക്ക് നിരോധനം
കോട്ടയം: വൈക്കം-തണ്ണീര്മുക്കം ബണ്ട് റോഡില് ഇന്ന് ഭാരവാഹനങ്ങളുടെ ഗതാഗതം നിരോധിച്ച് ജില്ലാ കളക്ടര് ഉത്തരവായി. രാവിലെ എട്ടുമുതല് രാതി എട്ടുവരെയാണ് നിരോധനം. തണ്ണീര്മുക്കം ബണ്ട് റോഡില് കൂടി ടിപ്പര്, ടോറസ് അടക്കമുള്ള ഭാരവാഹനങ്ങളുടെ ഗതാഗം അനുവദിക്കില്ല.