ഭരണങ്ങാനം: കാര്‍ഷിക വികസനം, മൃഗസംരക്ഷണം, ക്ഷീരവികസനം, മാലിന്യ ശുചിത്വ പരിപാടി, ലൈഫ് പദ്ധതി, ആര്‍ദ്രം ദുരന്തനിവാരണ പദ്ധതി, പൊതു വിദ്യാഭ്യാസ സംരക്ഷണ യജ്ഞം എന്നിവയ്ക്ക് പ്രാധാന്യം നല്‍കി ഭരണങ്ങാനം പഞ്ചായത്ത് 2023-24 വര്‍ഷത്തെ ബജറ്റ് വൈസ് പ്രസിഡന്‍റ് വിനോദ് ചെറിയാന്‍ വേരനാനി അവതരിപ്പിച്ചു. 16,81,67,850 രൂപ വരവും 16,58,04,000 രൂപ വിനിയോഗവും 23,63,850 രൂപ നീക്കിയിരിപ്പും പ്രതീക്ഷിക്കുന്ന ബജറ്റാണ് അവതരിപ്പിച്ചത്.
സൂപ്പര്‍ ഫുഡ് പദ്ധതി, സ്‌കൂളുകളില്‍ സിക്ക് റൂം, ഭിന്നശേഷി സൗഹൃദ പദ്ധതി, ഹോം ഫാം ടൂറിസം പദ്ധതികള്‍ എന്നിവയ്ക്ക് തുക വകയിരിത്തി. തൊഴിലുറപ്പ് പദ്ധതിക്ക് 1.55 കോടി, ആശുപത്രികളില്‍ മരുന്നു വാങ്ങാന്‍ 23 ലക്ഷം, പശു വളര്‍ത്തല്‍ പദ്ധതിക്ക് 5.50 ലക്ഷം, മൃഗസംരക്ഷണ മേഖലയില്‍ മറ്റ് പദ്ധതികള്‍ക്കായി 3.5 ലക്ഷം, ആങ്കണവാടി ആധുനികവത്കരണത്തിന് 13 ലക്ഷം, കുടിവെള്ള പദ്ധതികള്‍ക്ക് നാലു ലക്ഷം, വ്യവസായ സംരഭങ്ങള്‍ക്ക് മൂന്നു ലക്ഷം, ഓഫീസുകളുടെ അടിസ്ഥാന സൗകര്യ വികസനത്തിന് അഞ്ചു ലക്ഷം എന്നിങ്ങനെയും വകയിരുത്തി. പട്ടികജാതി-പട്ടികവര്‍ഗ മേഖലകളിലെ വിവിധ പദ്ധതികള്‍ക്കായി 19 ലക്ഷം, ഗ്രാമീണ റോഡുകളുടെ പുനരുദ്ധാരണത്തിന് 1.79 കോടി രൂപയും നീക്കി വച്ചു.
ബജറ്റ് ചര്‍ച്ചയില്‍ പഞ്ചായത്ത് പ്രസിഡന്‍റ് ലിസമ്മ സെബാസ്റ്റ്യന്‍ അധ്യക്ഷത വഹിച്ചു.