ചങ്ങനാശേരി: ചങ്ങനാശേരി സെന്റ് മേരീസ് മെത്രാപ്പോലീത്തന് പള്ളിയില് ഇന്ന് മകരം തിരുനാള് ആഘോഷിക്കും. വേദസാക്ഷിയെന്നു വിശേഷിക്കപ്പെടുന്ന വിശുദ്ധസെബസ്ത്യാനോസിന്റെ തിരുസ്വരൂപവും വഹിച്ച് ഇന്നലെ സായംസന്ധ്യയില് കവലയിലേക്കു നടത്തിയ പ്രദക്ഷിണം ഭക്തിനിര്ഭരമായി. അപ്രതീക്ഷിതമായി പെയ്ത മഴയെ അവഗണിച്ചാണ് നൂറുകണക്കിനുവിശ്വാസികള് മധ്യസ്ഥപ്രാര്ഥനകളുമായി പ്രദക്ഷിണത്തില് അണിചേര്ന്നത്. വ്യാപാരികളും വ്യവസായികളും തൊഴിലാളികളും ഉള്പ്പെടുന്ന വലിയ സമൂഹം കവലയില് പ്രദക്ഷിണത്തെ വരവേറ്റു.
അതിരൂപതാസഹായ മെത്രാന് മാര് തോമസ് തറയില് അര്പ്പിച്ച വിശുദ്ധകുര്ബാനയെതുടര്ന്നാണ് കവലയിലേക്ക് പ്രദക്ഷിണം നടന്നത്. കവലയില് ഫാ. ആന്റണി എത്തയ്ക്കാട് സന്ദേശം നല്കി. ചെണ്ട, ബാന്റ് വാദ്യമേളങ്ങള് പ്രദക്ഷിണത്തിന് ആഘോഷം പകര്ന്നു. വികാരി റവ.ഡോ. ജോസ് കൊച്ചുപറമ്പില് പ്രാര്ഥനാശുശ്രൂഷകള്ക്ക് കാര്മികനായിരുന്നു.
മാനവമൈത്രി
സംഗമം നടത്തി
ചങ്ങനാശേരി: സെന്റ് മേരീസ് മെത്രാപ്പോലീത്തന് പള്ളിയില് വിശുദ്ധ സെബാസ്ത്യാനോസിന്റെ മകരം തിരുനാളിനോട് അനുബന്ധിച്ച് നടന്ന മാനവമൈത്രി സംഗമം നടത്തി. ജോബ് മൈക്കിള് എംഎല്എ ഉദ്ഘാടനം നിര്വഹിച്ചു. വികാരി റവ.ഡോ. ജോസ് കൊച്ചുപറമ്പില് അധ്യക്ഷത വഹിച്ചു. എന്എസ്എസ് താലൂക്ക് യൂണിയന് പ്രസിഡന്റ് ഹരികുമാര് കോയിക്കല്, എസ്എന്ഡിപി താലൂക്ക് യൂണിയന് പ്രസിഡന്റ് ഗിരീഷ് കോനാട്ട് മനിസിപ്പല് ചെയര്പേഴ്സണ് സന്ധ്യാ മനോജ്, വൈസ് ചെയര്മാന് ബെന്നി ജോസഫ്, പഴയപള്ളി മുസ്ലീം ജമാത്ത് പ്രസിഡന്റ് എസ്.എം. ഫുവാദ്, പുതൂര്പ്പള്ളി മുസ്ലീം ജമാത്ത് പ്രസിഡന്റ് മുഹമ്മദ് ബഷീര്, എഡിഎം ജിനു പുന്നൂസ്, തഹസീല്ദാര് പി.ഐ. വിജയസേനന്, മുനിസിപ്പല് സെക്രട്ടറി എല്.എസ്. സജി, ഡിവൈഎസ്പി സനല്കുമാര്, വാര്ഡ് കൗണ്സിലര് ബീന ജോബി, ഷിബിന് കറുകയില്, ജോബി തൂമ്പുങ്കല്, ജോമ്മ കാട്ടടി, തങ്കച്ചന് പുന്നശേരി തുടങ്ങിയവര് പ്രസംഗിച്ചു.
വേദസാക്ഷിയുടെ
പട്ടണ പ്രദക്ഷിണം ഇന്ന്
പ്രധാനതിരുനാള്ദിനമായ ഇന്നു രാവിലെ 5.15ന് ആഘോഷമായ വിശുദ്ധകുര്ബാന ഫാ. ആന്റണി മൂലയില്, 6.45ന് ആര്ച്ച്ബിഷപ് മാര് ജോസഫ് പെരുന്തോട്ടം വിശുദ്ധകുര്ബാന അര്പ്പിച്ച് സന്ദേശം നല്കും. 10ന് തിരുനാള് റാസ ഫാ. ജോസഫ് വേലങ്ങാട്ടുശേരി. സന്ദേശം ഫാ. ടോമി നമ്പിശേരിക്കളം. ഉച്ചകഴിഞ്ഞ് മൂന്നിന് ആഘോഷമായ
തിരുനാള് കുര്ബാന ഫാ. ജോസ് മുല്ലക്കരി. വൈകുന്നേരം അഞ്ചിന് നഗരം ചുറ്റിയുള്ള പട്ടണ പ്രദക്ഷിണം ആരംഭിക്കും. വിശുദ്ധ സെബസ്ത്യാനോസിന്റെ തിരുസ്വരൂപം കാവില് ഭഗവതിക്ഷേത്രം ഭാരവാഹികള് ഏറ്റുവാങ്ങി ക്ഷേത്രാങ്കണത്തില് പ്രതിഷ്ഠിച്ച് മതമൈത്രിയുടെ സന്ദേശം പകരുന്ന സ്വീകരണം നല്കും. 6.30ന് ചന്തക്കടവ് കുരിശുപള്ളിയില് അതിരൂപതാ വികാരി ജനറാള് ഫാ. ജോസഫ് വാണിയപ്പുരയ്ക്കല് സന്ദേശം നല്കും.