കാഞ്ഞിരപ്പള്ളി: മലനാടിന്‍റെ കവാടത്തില്‍ കൗമാര കലോത്സവത്തിന് ഇന്ന് കേളികൊട്ടുയരും. ഇനിയുള്ള നാലു ദിനങ്ങള്‍ റബറിന്‍റെയും നാണ്യവിളകളുടെയും നാട്ടില്‍ സംഗീതത്തിന്‍റെയും നൃത്തത്തിന്‍റെയും അഭിനയത്തിന്‍റെയും കലാമാലകളില്‍ കുരുന്നുകള്‍ മുത്തുകോര്‍ക്കും.
ഇന്നു മുതല്‍ ഒമ്പതു വരെയാണ് 33-ാമത് റവന്യു ജില്ലാ കലോത്സവം കാഞ്ഞിരപ്പള്ളി നഗരത്തിന് വിരുന്നാകുന്നത്. കാഞ്ഞിരപ്പള്ളി നഗരത്തിലും പരിസരത്തുമുള്ള ആറു സ്‌കൂളുകളിലാണ് വേദികള്‍. യുപി, ഹൈസ്‌കൂള്‍, ഹയര്‍ സെക്കന്‍ഡറി വിഭാഗങ്ങളില്‍നിന്നായി 1,804 ആണ്‍കുട്ടികളും 3,730 പെണ്‍കുട്ടികളും ഉള്‍പ്പെടെ 5,534 കുട്ടികള്‍ മത്സരത്തില്‍ മാറ്റുരയ്ക്കും.
ഇന്നു വൈകുന്നേരം നാലിന് ചീഫ് വിപ്പ് എന്‍. ജയരാജ് കലോത്സവം ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് നിര്‍മല ജിമ്മി അധ്യക്ഷത വഹിക്കും. ത്രിതല പഞ്ചായത്ത് പ്രതിനിധികള്‍ സമ്മേളനത്തില്‍ പങ്കെടുക്കും. ചലച്ചിത്ര താരം ബാബു ആന്‍റണി മുഖ്യാതിഥിയായിരിക്കും.
ആറ് സ്കൂളുകള്‍
19 വേദികള്‍
ആറു സ്‌കൂളുകളിലായി 19 വേദികളാണുള്ളത്. കാഞ്ഞിരപ്പള്ളി സെന്‍റ് ഡൊമിനിക്‌സ് ഹയര്‍സെക്കന്‍ഡറി സ്‌കൂളാണ് പ്രധാന വേദി.
സെന്‍റ് മേരീസ് ഹയര്‍സെക്കന്‍ഡറി സ്‌കൂള്‍, എകെജെഎം ഹയര്‍സെക്കന്‍ഡറി സ്‌കൂള്‍, എന്‍എച്ച്എ യുപി സ്‌കൂള്‍, പേട്ട ഗവ. ഹൈസ്‌കൂള്‍ മൈക്ക ഇംഗ്ലീഷ് മീഡിയം സ്‌കൂള്‍ എന്നിവയാണ് വേദികള്‍. യുപി വിഭാഗത്തില്‍ 171 സ്‌കൂളുകളും ഹൈസ്‌കൂള്‍ വിഭാഗത്തില്‍ 154 ഉം ഹയര്‍സെക്കന്‍ഡറി വിഭാഗത്തില്‍ 113 സ്‌കൂളുകളും കലോത്സവത്തില്‍ പങ്കെടുക്കുന്നുണ്ട്. സംസ്‌കൃതോത്സവം യുപി വിഭാഗത്തില്‍ 66 സ്‌കൂളുകളും ഹൈസ്‌കൂള്‍ വിഭാഗത്തില്‍ 17 സ്‌കൂളുകളും പങ്കെടുക്കും. അറബി കലോത്സവത്തില്‍ യുപി വിഭാഗത്തില്‍ 13 ഉം ഹൈസ്‌കൂള്‍ വിഭാഗത്തില്‍ നാലും സ്‌കൂളുകളും പങ്കെടുക്കുന്നുണ്ട്. ഇന്ന് 18 വേദികളിലും നാളെ 12 വേദികളിലും എട്ടിന് 11 വേദികളിലും സമാപന ദിവസമായ ഒമ്പിന് ഏഴ് വേദികളിലും മത്സരങ്ങള്‍ നടക്കും.
ഊട്ടുപുര
സെന്‍റ് മേരീസ്
സ്കൂളില്
കലോത്സവത്തില്‍ പങ്കെടുക്കുന്ന മത്സാര്‍ഥികള്‍ക്കും അധ്യാപകര്‍ക്കും ഒഫീഷല്‍സിനുമുള്ള ഭക്ഷണം സെന്‍റ് മേരീസ് സ്‌കൂളിലാണ് ഒരുക്കുന്നത്. പഴയിടം മോഹനന്‍ നമ്പൂതിരിയാണ് സദ്യ ഒരുക്കുന്നത്. നാലു ദിവസവും പായസം കൂട്ടിയുള്ള സദ്യയാണ് ഉച്ചഭക്ഷണം. കെഎസ്ടിഎയ്ക്കാണ് ഭക്ഷണത്തിന്‍റെ ചുമതല.
നഗരം ചുറ്റി
ഘോഷയാത്ര
കലോത്സവത്തിനു തുടക്കം കുറിച്ചുള്ള ഘോഷയാത്ര ഉച്ചകഴിഞ്ഞ് 3.30ന് സെന്‍റ് മേരീസ് ഹയര്‍സെക്കനന്‍ഡറി സ്‌കൂളില്‍നിന്നാരംഭിക്കും. തമ്പലക്കാട് റോഡിലൂടെ കുരിശിങ്കലെത്തി ബസ്‌ സ്റ്റാന്‍ഡ് റോഡു വഴി സെന്‍റ് ഡൊമിനിസ്‌ക് സ്കൂളില് സമാപിക്കും. സെന്‍റ് ഡൊമിനിക്‌സ്, സെന്‍റ് മേരീസ്, എകെജെഎം, എന്‍എച്ച്എ, മൈക്ക, പേട്ട സ്‌കൂള്‍ എന്നിവിടങ്ങളില്‍നിന്നുള്ള ആയിരത്തോളം കുട്ടികള്‍ ഘോഷയത്രയില്‍ പങ്കെടുക്കും. എന്‍സിസി, സ്‌കൗട്ട് ആന്‍ഡ് ഗൈഡ് എന്നിവയും സ്റ്റുഡന്‍റ് പോലീസും വിവിധ കലാരൂപങ്ങളും ഘോഷയാത്രയില്‍ അണിനിരക്കും.
യക്ഷഗാനത്തോടെ
വേദിയുണരും
പ്രധാന വേദിയായ സെന്‍റ് ഡൊമിനിക്‌സ് സ്‌കൂളിലെ ഒന്നാം വേദിയായ ഓഡിറ്റോറിയത്തില്‍ രാവിലെ ഒമ്പതിന് യക്ഷഗാനത്തോടെ മത്സരങ്ങള്‍ ആരംഭിക്കും. സെന്‍റ് മേരീസ് സ്‌കൂളിലെ ഓഡിറ്റോറിയത്തില്‍ യുപി വിഭാഗം നാടോടിനൃത്തത്തോടെ വേദിയുണരും. എകെജെഎം സ്‌കൂളിലെ വേദിയില്‍ അറബനമുട്ട്, ദഫ് മുട്ട്, കോല്‍ക്കളികള്‍ അരങ്ങിലെത്തും. മൈക്ക സ്‌കൂളിലെ വേദിയില്‍ ഓട്ടംതുള്ളലാണ് ആദ്യ ഇനം. എകെജെഎം സ്‌കൂളിലെ ഗ്രൗണ്ടില്‍ ബാന്‍ഡുമേള മത്സരവും രാവിലെ ആരംഭിക്കും. പേട്ട സ്‌കൂളിലെ വേദിയില്‍ ചെണ്ട, തായമ്പക മത്സരങ്ങളാണ്. രചന മത്സരങ്ങള്‍ മറ്റു വേദികളില്‍ നടക്കും.