കുറവിലങ്ങാട്: വ്യവസായ-വാണിജ്യ വകുപ്പിന്‍റെ നേതൃത്വത്തിലുള്ള സംരംഭക വര്‍ഷാചരണം 2022-23 തൊഴില്‍ദാന പദ്ധതിയിൽ കടുത്തുരുത്തി നിയോജക മണ്ഡലത്തില്‍ ആയിരം സംരംഭകരെ കണ്ടെത്തുമെന്നു മോൻസ് ജോസഫ് എംഎൽഎ. മാര്‍ച്ച് 31നുള്ളിൽ സംസ്ഥാനത്ത് ഒരു ലക്ഷം സംരംഭങ്ങളും നാലു ലക്ഷം തൊഴില്‍ അവസരങ്ങളും സൃഷ്ടിക്കാനുള്ള പദ്ധതിയാണിത്.
പദ്ധതിയുടെ കടുത്തുരുത്തി നിയോജക മണ്ഡലം അവലോകനയോഗം എംഎൽഎ ഉദ്ഘാടനം ചെയ്തു. പൊതു ബോധവത്കരണത്തിനു ശേഷം സംരംഭങ്ങള്‍ക്ക് പഞ്ചായത്തുകൾ ലൈസൻസ് നൽകും. വായ്പയ്ക്കു വിവിധ ബാങ്കുകളും നടപടിയെടുക്കും. പഞ്ചായത്ത് അടിസ്ഥാനത്തില്‍ സബ്‌സിഡി മേളകള്‍ നടത്തും.വികസനയോഗങ്ങള്‍ നടത്തും. ജനപ്രതിനിധികളുടെ യോഗങ്ങൾ എന്നിവയും ചേരും.
കടത്തുരുത്തി നിയോജക മണ്ഡലത്തില്‍ ലക്ഷ്യമിടുന്ന സംരംഭക പദ്ധതിയുടെ റിപ്പോര്‍ട്ട് അവതരിപ്പിച്ചു. കടപ്ലാമറ്റം-59, കടുത്തുരുത്തി-144, കാണക്കാരി-103, കിടങ്ങൂര്‍-96, കുറവിലങ്ങാട്-81, മാഞ്ഞൂര്‍-126, മരങ്ങാട്ടുപിള്ളി-80, മുളക്കുളം-116, ഞീഴൂര്‍-80, ഉഴവൂര്‍-65, വെളിയന്നൂര്‍-50 എന്ന ക്രമത്തില്‍ ആയിരം പേരുടെ പട്ടികയാണ് അംഗീകരിച്ചിരിക്കുന്നതെന്ന് എംഎല്‍എ അറിയിച്ചു.
കടത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് പി.വി. സുനില്‍ അധ്യക്ഷത വഹിച്ചു. ഉഴവൂര്‍ ബ്ലോക്ക് പ്രസിഡന്‍റ് ബൈജു ജോണ്‍, കോട്ടയം ജില്ലാ വ്യവസായകേന്ദ്രം മാനേജര്‍ കെ.എസ്. അജിമോന്‍, വിവിധ ഗ്രാമപഞ്ചായത്ത് പ്രസിഡന്‍റുമാരായ മിനി മത്തായി (കുറവിലങ്ങാട്), ജോയി കല്ലുപുര (കടപ്ലാമറ്റം), ജോണീസ് പി. സ്റ്റീഫന്‍ (ഉഴവൂര്‍), ബിന്‍സി സിറിയക് (കാണക്കാരി), പഞ്ചായത്ത് വൈസ് പ്രസിഡന്‍റുമാരായ ഹേമ രാജു (കിടങ്ങൂര്‍), ബിജു സെബാസ്റ്റ്യന്‍ കൊണ്ടുക്കാല (മാഞ്ഞൂര്‍), പഞ്ചായത്ത് അംഗങ്ങളായ സലിമോള്‍ ബെന്നി, ലൈസമ്മ ജോര്‍ജ്, എസ്ബിഐ ചീഫ് മാനേജര്‍മാരായ വി. മനു (ഉഴവൂര്‍), ആര്‍. ജയശങ്കര്‍ (കടുത്തുരുത്തി ), വ്യവസായ വകുപ്പ് ഉപജില്ല ഓഫീസര്‍മാരായ സി.ഡി. സ്വരാജ്, ഇ.എം. അലക്‌സ്, സിനോ ജേക്കബ് മാത്യു, ബി. പ്രശാന്ത് എന്നിവര്‍ പ്രസംഗിച്ചു.