പാലാ: മുതിര്‍ന്ന പൗരന്മാര്‍ സമൂഹത്തില്‍ നേരിടുന്ന വിവിധ പ്രശ്നങ്ങള്‍ക്ക് പരിഹാരം കാണേണ്ടത് വികസിത സമൂഹത്തിന്‍റെ കടമയാണെന്ന് ജില്ലാ പഞ്ചായത്ത് പ്രസിഡന്‍റ് നിര്‍മല ജിമ്മി. സാമൂഹ്യ നീതി വകുപ്പ്, കോട്ടയം, പാലാ സാമൂഹ്യ സുരക്ഷാ മിഷന്‍ മെയിന്‍റനന്‍സ് ട്രൈബ്യൂണല്‍ എന്നിവയുടെ നേതൃത്വത്തില്‍ പാലാ ദൈവദാന്‍ സെന്‍ററില്‍ നടത്തിയ രാജ്യാന്തര വയോജന ദിനാചരണം ഉദ്ഘാടനം ചെയ്ത് പ്രസംഗിക്കുകയായിരുന്നു നിര്‍മല ജിമ്മി.
പാലാ നഗരസഭാധ്യക്ഷന്‍ ആന്‍റോ ജോസ് പടിഞ്ഞാറെക്കര അധ്യക്ഷത വഹിച്ചു. ആര്‍ഡിഒയും പാലാ മെയിന്‍റനന്‍സ് ട്രൈബ്യൂണല്‍ ചെയര്‍മാനുമായ പി.ജി. രാജേന്ദ്രബാബു, മുതിര്‍ന്ന പൗരന്മാരായ പി.പി. ഐസക്, സി.പി. അന്ന, ജോസഫ് ചാവേലി എന്നിവരെ ആദരിച്ചു. ജില്ലാ വയോജന കൗണ്‍സില്‍ അംഗം ടി.എന്‍ വാസുദേവന്‍ നായര്‍, ജില്ലാ സാമൂഹ്യ നീതി ഓഫീസര്‍ വി.എ. ഷംനാദ്, സാമൂഹ്യ സുരക്ഷാ മിഷന്‍ കോ-ഓര്‍ഡിനേറ്റര്‍ നൗഫല്‍ കെ. മീരാന്‍, ജില്ലാ സാമൂഹ്യനീതി ഓഫീസ് സീനിയര്‍ സൂപ്രണ്ട് എന്‍.പി. പ്രമോദ് കുമാര്‍, ഓര്‍ഫനേജ് കണ്ട്രോള് ബോര്‍ഡ് കൗണ്‍സിലര്‍ എം.പി. ജോസഫ്, മെയിന്‍റനന്‍സ് ട്രൈബ്യൂണല്‍ ടെക്നിക്കല്‍ അസിസ്റ്റന്‍റുമാരായ പി.എച്ച്. ചിത്ര, സ്റ്റെഫി മരിയ ജോസ്, പാല ദൈവദാന്‍ സെന്‍റര്‍ ഡയറക്ടര്‍ സിസ്റ്റര്‍ ചെറുപുഷ്പം എസ്എംഎസ് എന്നിവര്‍ പങ്കെടുത്തു.
കുറവിലങ്ങാട്: വിവിധ പഞ്ചായത്തുകളില്‍ മുതിര്‍ന്ന പൗരന്മാര്‍ക്ക് ആദരവ്. കുറവിലങ്ങാട് പഞ്ചായത്തില്‍ കൃഷിഭവന്‍റെയും ജയ്ഗിരി ഹരിതസമൃദ്ധി കര്‍ഷകദളത്തിന്‍റെയും നേതൃത്വത്തില്‍ കരുണാഭവനിലെ അന്തേവാസികളെ ആദരിച്ചു. ജില്ലാ പഞ്ചായത്ത് പ്രസിഡന്‍റ് നിര്‍മല ജിമ്മി, പഞ്ചായത്തംഗങ്ങളായ ഡാര്‍ലി ജോജി, ബേബി തൊണ്ടാംകുഴി, കൃഷിവകുപ്പ് ഉദ്യോഗസ്ഥര് എന്നിവര്‍ പങ്കെടുത്തു.
മരങ്ങാട്ടുപിള്ളി: പഞ്ചായത്തിന്‍റെയും കുടുംബാരോഗ്യകേന്ദ്രത്തിന്‍റെയും ആഭിമുഖ്യത്തില്‍ വയോജന സംഗമവും മുതിര്‍ന്ന പൗരന്മാരെ ആദരിക്കുകയും ചെയ്തു. പഞ്ചായത്ത് പ്രസിഡന്‍റ് ബെല്‍ജി ഇമ്മാനുവല്‍ ഉദ്ഘാടനം ചെയ്തു. വൈസ് പ്രസിഡന്‍റ് നിര്‍മല ദിവാകരന്‍ അധ്യക്ഷത വഹിച്ചു. മുതിര്‍ന്നവരെ ഉഴവൂര്‍ ബ്ലോക്ക് സ്റ്റാൻഡിംഗ് കമ്മിറ്റി ചെയര്‍മാന്‍ ജോണ്‍സണ്‍ ജോസഫ് പുളിക്കയില്‍ ആദരിച്ചു. ബ്ലോക്ക്-ഗ്രാമപഞ്ചായത്തംഗങ്ങൾ, ജെഎച്ച്ഐമാർ തുടങ്ങിയവർ പങ്കെടുത്തു.
ഉഴവൂര്‍: പഞ്ചായത്തില്‍ വയോജനദിനാചരണത്തില്‍ മുതിര്‍ന്ന പൗരന്മാരെ ജനപ്രതിനിധികള്‍ വീട്ടിലെത്തി ആദരിച്ചു. പഞ്ചായത്ത് പ്രസിഡന്‍റ് ജോണിസ് പി. സ്റ്റീഫന്‍റെ നേതൃത്വത്തിലായിരുന്നു ആദരവ്. ആദരവിന്‍റെ ഭാഗമായി പൊന്നാടയണിയിക്കലും പൂക്കള്‍ സമര്‍പ്പിക്കലും നടന്നു. സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ.എം. തങ്കച്ചന്‍, പഞ്ചായത്തംഗം ബിന്‍സി അനില്‍, അങ്കണവാടി അധ്യാപകരായ ആന്‍സി തോമസ്, മിനി ഡാനിയേല്‍ എന്നിവര്‍ പങ്കെടുത്തു.