ചാലകം പാടശേഖരം കൃഷിയോഗ്യമാക്കുന്നതിനു തുടക്കമായി : Deepika.com Nattu Visesham

KOTTAYAM

ചാലകം പാടശേഖരം കൃഷിയോഗ്യമാക്കുന്നതിനു തുടക്കമായി

Thursday, September 23, 2021 11:19 PM IST

ഉദയനാപുരം: ഉദയനാപുരം പഞ്ചായത്ത് നാലാം വാർഡിൽ പതിറ്റാണ്ടുകളായി തരിശു കിടക്കുന്ന ചാലകം പാടശേഖരം കൃഷിയോഗ്യമാക്കുന്നതിനു പ്രവർത്തനങ്ങൾ ആരംഭിച്ചു. സംസ്ഥാന സർക്കാരിന്‍റെ സുഭിക്ഷ കേരളം പദ്ധതിയിലുൾപ്പെടുത്തി 90 ഏക്കറോളം വരുന്ന പാടശേഖരത്തിലെ 50 ഏക്കറോളമാണ് ആദ്യഘട്ടത്തിൽ കൃഷിയോഗ്യമാക്കുന്നത്.
മുപ്പതു വർഷങ്ങൾക്കു ശേഷമാണ് ചാലകം പാടശേഖരത്ത് യന്ത്രങ്ങൾ ഇറക്കിക്കൊണ്ടുള്ള പ്രവർത്തനങ്ങൾ പുനരാരംഭിക്കുന്നത്. പാടശേഖര സമിതിയുടെ നേതൃത്വത്തിൽ ദിവസങ്ങൾ നീണ്ട പരിശ്രമത്തിന്‍റെ ഫലമായാണ് യന്ത്ര സാമഗ്രികൾ എത്തിക്കുന്നതിനുള്ള വഴിയൊരുക്കാനായത്. വാർഡ് മെന്പർ ജിനു ബാബുവിന്‍റെ നേതൃത്വത്തിൽ തൊഴിലുറപ്പ് തൊഴിലാളികളും കർഷകരും പാടശേഖര സമിതി അംഗങ്ങളും സിപിഎം- ഡിവൈഎഫ്ഐ പ്രവർത്തകരും ചേർന്നാണു കൃഷി ആരംഭിക്കുന്നതിനുള്ള പ്രവർത്തനങ്ങൾ നടത്തിയത്.
വൈക്കം ബ്ലോക്ക് പഞ്ചായത്ത് പ്രസിഡന്‍റ് കെ.കെ. രഞ്ജിത്ത് നിലമൊരുക്കൽ പ്രവർത്തനങ്ങൾ ഉദ്ഘാടനം ചെയ്തു. ഉദയനാപുരം പഞ്ചായത്ത് പ്രസിഡന്‍റ് ഗിരിജ പുഷ്കരൻ, വൈസ് പ്രസിഡന്‍റ് ടി. പ്രസാദ്, ബ്ലോക്ക് പഞ്ചായത്ത് അംഗം കെ.എസ്. ഗോപിനാഥൻ, വാർഡ് മെന്പർ ജിനു ബാബു, അഗ്രികൾച്ചറൽ ഡെവലപ്മെന്‍റ് ഓഫീസർ ശോഭ, ബ്ലോക്ക് ഡെവലപ്പ്മെന്‍റ് ഓഫീസർ അനീഷ്, സിപിഎം ഉദയനാപുരം വെസ്റ്റ് ലോക്കൽ സെക്രട്ടറി എ.പി. നന്ദകുമാർ, പാടശേഖര സമിതി സെക്രട്ടറി സുധീഷ് മോൻ, പ്രസിഡന്‍റ് ശിവൻ, ട്രഷറർ രാജഗോപാൽ, ജോയിന്‍റ് സെക്രട്ടറി മനേഷ് മോഹൻ, കമ്മിറ്റി അംഗങ്ങളായ മോഹനൻ, നിഖിൽ, തൊഴിലുറപ്പ് തൊഴിലാളികൾ, സിപിഎം - ഡിവൈഎഫ്ഐ പ്രവർത്തകർ തുടങ്ങിയവർ പങ്കെടുത്തു.