ചെറുപുഷ്പ മിഷൻലീഗ് പ്ലാറ്റിനം ജൂബിലിയിലേക്ക് : Deepika.com Nattu Visesham

KOTTAYAM

ചെറുപുഷ്പ മിഷൻലീഗ് പ്ലാറ്റിനം ജൂബിലിയിലേക്ക്

Thursday, September 23, 2021 10:57 PM IST

ചങ്ങനാശേരി: ചെറുപുഷ്പ മിഷൻലീഗ് സ്ഥാപിതമായിട്ട് ഒക്ടോബർ മൂന്നിന് 74വയസ് പൂർത്തിയാക്കി പ്ലാറ്റിനം ജൂബിലിയിലേക്ക് പ്രവേശിക്കുന്നു. ഒരുവർഷം നീണ്ടുനിൽക്കുന്ന അതിരൂപതാ പ്ലാറ്റിനം ജൂബിലി ആഘോഷങ്ങളുടെ ഉദ്ഘാടനം അതിരൂപത ഡയറക്ടർ ഫാ. ജോബിൻ പെരുന്പളത്തുശേരി മേഖലാ ഭാരവാഹികൾക്ക് പ്രേഷിതദീപം നല്കി ഉദ്ഘാടനം ചെയ്തു.
മിഷൻലീഗ് സംഘടനയ്ക്ക് പ്രവർത്തനാനുമതിയും അംഗീകാരവും നല്കിയ അവിഭക്ത ചങ്ങനാശേരി രൂപതയുടെ അന്നത്തെ മെത്രാനായിരുന്ന മാർ ജയിംസ് കാളാശേരിയുടെ കബറിടത്തിൽ അതിരൂപത ജോയിന്‍റ് ഡയറക്ടർ ഫാ. ജോഷി പാണംപറന്പിലിന്‍റെ നേതൃത്വത്തിൽ പ്രാർഥന നടത്തിയ ശേഷം തെളിച്ച ദീപത്തിൽനിന്നാണ് അതിരൂപതയുടെ 16 മേഖലകളിലെയും ഭാരവാഹികൾക്ക് ദീപം പകർന്നത്.
ജൂബിലി ആഘോഷങ്ങളുടെ മേഖലാതല ഉദ്ഘാടനം ഒക്ടോബർ രണ്ടിനും ശാഖാതല ഉദ്ഘാടനം ഒക്ടോബർ 10 നും നടക്കും. ഫൊറോനാ ഡയറക്ടർമാർ അന്നേ ദിവസം ശാഖകളിൽ പതാക ഉയർത്തുകയും പ്രേഷിതദീപം കുട്ടികൾക്ക് കൈമാറുകയും ചെയ്യും. അന്നേ ദിവസം വൈകുന്നേരം മിഷൻലീഗ് അംഗങ്ങൾ കുടുംബ പ്രാർഥനയോടൊപ്പം പ്രേഷിതദീപം തെളിച്ച് ജൂബിലി ആഘോഷങ്ങൾക്ക് ഭവനങ്ങളിൽ തുടക്കം കുറിക്കും.
കുട്ടികളുടെ വ്യക്തിത്വ വികസനവും പ്രേഷിത തീക്ഷ്ണതയും വളർത്തുന്ന വിവിധങ്ങളായ കർമ്മപരിപാടികളാണ് ജൂബിലി വർഷത്തിൽ ചങ്ങനാശേരി അതിരൂപത മിഷൻലീഗ് ക്രമീകരിച്ചിരിക്കുന്നത്. ജൂബിലി ആഘോഷങ്ങളുടെ ഉദ്ഘാടനത്തെ തുടർന്ന് നടന്ന അതിരൂപതാ കൗണ്‍സിൽ മുൻ അസി. ഡയറക്ടർ ഫാ. അനീഷ് കുടിലിൽ ഉദ്ഘാടനം ചെയ്തു. മിഷൻലീഗിന്‍റെ നേതൃത്വത്തിൽ നടത്തിയ വിവിധ മത്സരങ്ങളുടെ സമ്മാനങ്ങളും അദ്ദേഹം വിതരണം ചെയ്തു.
കോവിഡ് പ്രോട്ടോക്കോൾ പാലിച്ചുകൊണ്ട് അതിരൂപതയിലെ 16 മേഖലകളിലെയും ഭാരവാഹികൾ പങ്കെടുത്ത മീറ്റിംഗിന് മിഷൻലീഗ് അതിരൂപത എക്സിക്യുട്ടീവ് അംഗങ്ങൾ നേതൃത്വം നല്കി.