കുറിച്ചിയിൽ "നിലാവ്’ ഉദിച്ചില്ലെന്ന് : Deepika.com Nattu Visesham

KOTTAYAM

കുറിച്ചിയിൽ "നിലാവ്’ ഉദിച്ചില്ലെന്ന്

Tuesday, September 21, 2021 12:37 AM IST

ചിങ്ങവനം: കുറിച്ചി പഞ്ചായത്തിൽ സർക്കാരിന്‍റെ നിലാവ് പദ്ധതി പരാജയമെന്നു പരാതി. പദ്ധതി പ്രഖ്യാപിച്ചു നടപടികൾ തുടങ്ങി നാളുകളേറെയായെങ്കിലും പഞ്ചായത്തിൽ പലയിടങ്ങളിലും ഇപ്പോഴും വഴിവിളക്കുകൾ കത്തുന്നില്ല. വഴിവിളക്കുകൾ എൽഇഡി ബൾബുകളാക്കി പ്രകാശം വർധിപ്പിക്കുകയും വൈദ്യുതി ചെലവ് കുറയ്ക്കുകയുമായിരുന്നു പദ്ധതിയുടെ പ്രധാന ഉദ്ദേശ്യം.
എന്നാൽ, കാര്യങ്ങൾ എങ്ങുമെത്തിയില്ല. പദ്ധതി നടത്തിപ്പിനുള്ള സാധനങ്ങൾ ലഭ്യമാകാത്തതാണു പ്രധാന കാരണം. 3500 ബൾബുകളാണ് കുറിച്ചിയിൽ വേണ്ടത്. 500 ബൾബുകൾ മാത്രമാണ് കുറിച്ചിയിൽ ലഭിച്ചിട്ടുള്ളതെന്നു പഞ്ചായത്ത് അംഗങ്ങൾത്തന്നെ പറയുന്നു. വഴിവിളക്കുകൾ തെളിക്കാൻ അടിയന്തര നടപടി ഉണ്ടാവണമെന്നും നിലാവ് പദ്ധതിക്ക് ആവശ്യമായ ബൾബുകൾ പഞ്ചായത്തിൽ ലഭ്യമാക്കണമെന്നും ആവശ്യപ്പെട്ടു ബിജെപി കുറിച്ചി പഞ്ചായത്ത് കമ്മിറ്റി പ്രതിഷേധ ധർണ സംഘടിപ്പിച്ചു.
സമരത്തിനു ബിജെപി പഞ്ചായത്ത് പ്രസിഡന്‍റ് കെ.കെ. ഉദയകുമാർ അധ്യക്ഷത വഹിച്ചു. സംസ്ഥാന സമിതിയംഗം കെ.ജി. രാജ്മോഹൻ പ്രതിഷേധം ഉദ്ഘാടനം ചെയ്തു. നിയോജക മണ്ഡലം ജനറൽ സെക്രട്ടറി ബി.ആർ. മഞ്ജീഷ്, പഞ്ചായത്ത് അംഗങ്ങളായ ശൈലജ സോമൻ, കെ.എൻ. മഞ്ജു, ആര്യമോൾ പി. രാജ്, നേതാക്കളായ അന്പിളി വിനോദ്, ഹരി കെ. നായർ, പി.കെ. ഗോപാലകൃഷ്ണൻ, വിനീഷ് വിജയനാഥ്, സദാനന്ദൻ കുറിച്ചി, കെ.ജെ. കൊച്ചുമോൻ, അനീഷ് കുമാർ, ജയരാജ് ചിറവംമുട്ടം, ശശികുമാർ തുടങ്ങിയവർ പ്രസംഗിച്ചു.