കാഞ്ഞിരമറ്റം: കാർഷിക മൂല്യവർധിത ഉത്പ്പന്ന നിർമാണ യൂണിറ്റിലൂടെ കർഷകർക്ക് തൊഴിലവസരവും വരുമാന വർധനയും ഉറപ്പു വരുത്തുന്ന കാഞ്ഞിരമറ്റം അഗ്രോ പ്രൊഡ്യൂസർ കമ്പനി മറ്റുള്ളവർക്ക് മാതൃകയാണന്ന് പാലാ സോഷ്യൽ വെൽഫെയർ സൊസൈറ്റി ഡയറക്ടർ ഫാ. തോമസ് കിഴക്കേൽ. കാഞ്ഞിരമറ്റം അഗ്രോ പ്രൊഡ്യൂസർ കമ്പനിയുടെ ഉത്പ്പന്ന നിർമാണ യൂണിറ്റിന്റെ നവീകരണ പ്രവർത്തനങ്ങൾ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
ഇടനിലക്കാരുടെ ചൂഷണത്തിൽ നിന്ന് കർഷകർക്ക് സുരക്ഷ നൽകി കാർഷിക വിളകൾ സംഭരിച്ച് മൂല്യവർധിത ഉത്പ്പന്നങ്ങളാക്കി വിപണനം ചെയ്യുന്നത് വരുമാന വർധനവിനും കൃഷിയിലേക്ക് കൂടുതൽ പേരെ ആകർഷിക്കുന്നതിനും കാരണമാകുമെന്നും ആഭ്യന്തര വിപണിക്കൊപ്പം വിദേശ വിപണിയും ലക്ഷ്യമിട്ടു പ്രവർത്തിക്കാനാവണമെന്നും അദ്ദേഹം പറഞ്ഞു.
കർഷക ദള ഫെഡറേഷൻ രക്ഷാധികാരി ഫാ. എബ്രാഹം ഏരിമറ്റം അധ്യക്ഷതവഹിച്ചു. പഞ്ചായത്തു മെംബർ ജേക്കബ് തോമസ്, സഹകരണബാങ്ക് പ്രസിഡന്റ് മാത്തുക്കുട്ടി ഞായർകുളം, ഫെഡറേഷൻ ഡയറക്ടർ ഫാ. മാത്യു വെണ്ണായിപ്പളളിൽ, കൃഷി ഓഫീസർ സ്നേഹലത മാത്യൂസ്, കാപ്കോ ചെയർമാൻ സണ്ണി കളരിക്കൽ, ചീഫ് എക്സിക്യൂട്ടീവ് ഓഫീസർ ടോം ജേക്കബ് ആലയ്ക്കൽ, ഡയറക്ടർമാരായ ഡാന്റീസ് കൂനാനിക്കൽ, ജയ്മോൻ പുത്തൽപുരയ്ക്കൽ എന്നിവർ പ്രസംഗിച്ചു.
കാപ്കോ അംഗങ്ങൾക്കുള്ള ലാഭ വിഹിതത്തിന്റെ വിതരണോദ്ഘാടനവും നടന്നു. സംസ്ഥാന സാക്ഷരതാ മിഷൻ അഥോറിറ്റി ഭരണ സമിതിയംഗം ഡാന്റീസ് കൂനാനിക്കൽ, ഒറ്റക്കാൽ പുഷ് അപിലൂടെ ഏഷ്യാ ബുക്ക് ഓഫ് റിക്കോർഡ്സിൽ ഇടം പിടിച്ച ജിതിൻ ജോസ് പാറേക്കുളം എന്നിവരെ മെമന്റോ നൽകി ആദരിച്ചു.
ജോർജുകുട്ടി കുന്നപ്പള്ളി, ടോമി മുടന്തിയാനി, തോമസ് കൈപ്പൻപ്ലാക്കൽ, തങ്കച്ചൻ പ്ലാത്തറ, ഷേർളി ടോം, ലീലാമ്മ മാത്യു, സുനിജ രാജു, ജോണി കളരിക്കൽ, ജോസഫ് ഓലിയ്ക്കതകിടിയിൽ, ജയിംസ് പെരുമന, പി.വി. ജോർജ്, ജോസ് മാത്യു, സണ്ണി ആരുശേരിൽ തുടങ്ങിയർ നേതൃത്വം നൽകി.