അതിരന്പുഴ ദർശനത്തിരുനാൾ സമാപിച്ചു : Deepika.com Nattu Visesham

KOTTAYAM

അതിരന്പുഴ ദർശനത്തിരുനാൾ സമാപിച്ചു

Sunday, September 19, 2021 11:53 PM IST

അതിരന്പുഴ: സെന്‍റ് മേരീസ് ഫൊറോനാ പള്ളിയിൽ ഇടവക മധ്യസ്ഥയായ പരിശുദ്ധ വ്യാകുലമാതാവിന്‍റെ ദർശനത്തിരുനാൾ സമാപിച്ചു. സമാപനത്തോടനുബന്ധിച്ച് നടന്ന തിരുനാൾ പ്രദക്ഷിണം ഭക്തിസാന്ദ്രമായി. രാവിലെ ചങ്ങനാശേരി അതിരൂപത മതബോധന ഡയറക്ടർ ഫാ. ഏബ്രഹാം പെരുന്പളത്തുശേരി തിരുനാൾ കുർബാനയർപ്പിച്ചു. വൈകുന്നേരം ഫാ. ടോണി നന്പിശേരിക്കളം അർപ്പിച്ച വിശുദ്ധ കുർബാനയെത്തുടർന്നായിരുന്നു തിരുനാൾ പ്രദക്ഷിണം. പരിശുദ്ധ വ്യാകുല മാതാവിന്‍റെയും വിശുദ്ധ തോമാ ശ്ലീഹായുടെയും രൂപങ്ങൾ വഹിച്ചുകൊണ്ട് വാദ്യമേളങ്ങളുടെയും മുത്തുക്കുടകളുടെയും അകന്പടിയോടെ നടന്ന പ്രദക്ഷിണം വലിയപള്ളി ചുറ്റി സമാപിച്ചു. തുടർന്ന് കൊടിയിറക്കി.
രാവിലെ 7.30ന് പരിശുദ്ധ വ്യാകുല മാതാവിന്‍റെയും വിശുദ്ധ സെബസ്ത്യാനോസിന്‍റെയും രൂപങ്ങൾ പരസ്യ വണക്കത്തിനായി മോണ്ടളത്തിൽ പ്രതിഷ്ഠിച്ചു. രാത്രി 7.30ന് വികാരി റവ.ഡോ. ജോസഫ് മുണ്ടകത്തിലിന്‍റെ മുഖ്യകാർമികത്വത്തിൽ വിശുദ്ധ സെബസ്ത്യാനോസിന്‍റെ രൂപം മദ്ബഹായിൽ പുനഃപ്രതിഷ്ഠിച്ചു. അസിസ്റ്റന്‍റ് വികാരിമാരായ ഫാ. ലിബിൻ തുണ്ടിയിൽ, ഫാ. ബിബിൻ കൊച്ചീത്ര, ഫാ. ടോണി നന്പിശേരിക്കളം എന്നിവർ സഹകാർമികരായിരുന്നു. പ്രസുദേന്തി ജോഷി ഇലഞ്ഞിയിൽ, കൈക്കാരന്മാരായ ടോമി ചക്കാലയ്ക്കൽ, ജോണി പണ്ടാരക്കളം, മാത്യു തേക്കു നിൽക്കുംപറന്പിൽ, റോബിൻ ആലഞ്ചേരി മാനാട്ട് തുടങ്ങിയവർ നേതൃത്വം നൽകി. മരിച്ചവരുടെ ഓർമദിനമായ ഇന്നു രാവിലെ 6.30ന് സമൂഹബലി. തുടർന്ന് സെമിത്തേരി സന്ദർശനം, വലിയ ഒപ്പീസ് എന്നിവ നടക്കും.