പരാതി പരിഹാര അദാലത്ത് 22ന്
ആലപ്പുഴ: ജില്ലാ കളക്ടറുടെ പൊതുജന പരാതി പരിഹാര അദാലത്ത് കാര്ത്തികപ്പള്ളി താലൂക്കില് 22ന് രാവിലെ 10 മുതല് ഹരിപ്പാട് റവന്യു ടവറില് നടക്കും.എല്.ആര്.എം. കേസുകള്, ഭൂമിയുടെ പരിവര്ത്തനം, റേഷന് കാര്ഡ്, ഭൂമി തരംമാറ്റം, സിഎംഡിആര്എഫ്, ലൈഫ്, കോവിഡ്, ക്ഷേമ പെന്ഷന്, പ്രകൃതി ക്ഷോഭം, ജോലി സംബന്ധമായ പരാതികള് എന്നിവ ഒഴികെയുള്ള എല്ലാ പരാതികളും താലൂക്ക് വകുപ്പ് മേധാവികളുടെ സാന്നിധ്യത്തില് കളക്ടര് തീര്പ്പാക്കും. 12 മുതല് 17 വരെ കാര്ത്തികപ്പള്ളി താലൂക്കിലെ വില്ലേജ് ഓഫീസുകള്, താലൂക്ക് ഓഫീസ് എന്നിവടങ്ങളില് പരാതികള് നല്കാം.
ഗതാഗതം നിരോധിച്ചു
ആലപ്പുഴ: പുളിങ്കുന്ന് പഞ്ചായത്ത് ആറ്, ഏഴ് വാര്ഡുകള്ക്ക് ഇടയിലുള്ള പുത്തന്തോടിനു കുറുകെ നിലവിലുള്ള പാലം പൊളിച്ച് പുതിയ പാലം നിര്മിക്കുന്നതുമായി ബന്ധപ്പെട്ട് പ്രസ്തുത തോട്ടിലൂടെയുള്ള ജലഗതാഗതവും പാലത്തിലുടെ കാല്നടയാത്ര ഉള്പ്പെടെയുള്ള ഗതാഗതവും പൂര്ണമായും നിരോധിച്ചു. പാലത്തിന്റെ നിര്മാണ ജോലികൾ പൂര്ത്തിയാക്കി, ഗതാഗതം പുനരാരംഭിക്കുന്നതുവരെ ബദല് യാത്ര സൗകര്യങ്ങളും സംവിധാനങ്ങളും പ്രയോജനപ്പെടുത്തണമെന്ന് ജലസേചന വകുപ്പ് എക്സിക്യൂട്ടിവ് എന്ജിനിയര് അറിയിച്ചു.
ആലപ്പുഴ: ക്രെസന്റ് സ്കൂള്- തൈവേലി റോഡ് നിര്മാണവുമായി ബന്ധപ്പെട്ട് സ്കൂളിനു സമീപമുള്ള കലുങ്ക് പൊളിച്ചു പണിയുന്നു. ഇതിന്റെ ഭാഗമായി ഇന്നു മുതല് ഇതുവഴിയുള്ള വാഹന ഗതാഗതം പൂര്ണമായും നിരോധിച്ചു.
അപേക്ഷ 18 വരെ സമര്പ്പിക്കാം
ആലപ്പുഴ: പ്രത്യേക വോട്ടര് പട്ടിക പുതുക്കല് 2023-ന്റെ ഭാഗമായി പുതിയ അപേക്ഷ, വോട്ടര് പട്ടികയിലെ തെറ്റുതിരുത്തല്, പേരുകള് നീക്കം ചെയ്യല് എന്നീ അപേക്ഷകള് സമര്പ്പിക്കുന്നതിനുള്ള സമയപരിധി 18 വരെ നീട്ടി. 2023 ജനുവരി ഒന്നിന് 18 വയസ് പൂര്ത്തിയാകുന്നവര്ക്കും നിലവില് 17 വയസ് പൂര്ത്തിയായവര്ക്കും വോട്ടര് പട്ടികയില് പേര് ചേര്ക്കുന്നതിനുള്ള അപേക്ഷകള് www.nvsp.in, voter helpline app എന്നിവയിലൂടെയോ ബൂത്ത് ലെവല് ഓഫീസര്മാര് വഴിയോ 18 വരെ അപേക്ഷ സമര്പ്പിക്കാം.
കെട്ടിട ലേലം
ആലപ്പുഴ: ആല ഗവണ്മെന്റ് ഹയര് സെക്കന്ഡറി സ്കൂളിലെ കാലപ്പഴക്കം ചെന്ന് ഉപയോഗശൂന്യമായ രണ്ടു കെട്ടിടങ്ങള് 14ന് പകല് 11 സ്കൂള് ഓഫീസില് ലേലം ചെയ്യും.
പൂവന്കോഴി കുഞ്ഞുങ്ങള്
ആലപ്പുഴ: ചെങ്ങന്നൂര് സെന്ട്രല് ഹാച്ചറിയില്നിന്നും ഒരുദിവസം പ്രായമായ പൂവന്കോഴിക്കുഞ്ഞുങ്ങളെ അഞ്ചു രൂപ നിരക്കില് ചൊവ്വ, വെള്ളി ദിവസങ്ങളില് വിതരണം ചെയ്യും. ഫോണ്: 0479-2452277.
ജാപ്പനീസ് കാടക്കുഞ്ഞുങ്ങള്
ആലപ്പുഴ: ചെങ്ങന്നൂര് സെന്ട്രല് ഹാച്ചറിയില്നിന്നും ഒരു ദിവസം പ്രായമായ അത്യുത്പാദന ശേഷിയുള്ള ജാപ്പനീസ് കാടക്കുഞ്ഞുങ്ങള് എട്ടു രൂപ നിരക്കില് തിങ്കള്, വ്യാഴം ദിവസങ്ങളില് വിതരണം ചെയ്യും.