പത്തനംതിട്ട: കോഴഞ്ചേരി സെന്‍റ് തോമസ് കോളജ് സപ്തതി ആഘോഷത്തിന്‍റെ ഭാഗമായുള്ള മെഗാ അലൂമ്നി സംഗമം 11ന് നടക്കുമെന്ന് ഭാരവാഹികള്‍ പത്രസമ്മേളനത്തില്‍ അറിയിച്ചു. കോളജിലെ പൂർവ വിദ്യാർഥികൾ, പൂർവ അധ്യാപകർ, പൂർവ അനധ്യാപകർ എന്നിവര്‍ പങ്കെടുക്കും. കോളജിൽ 1953 മുതൽ പഠിച്ച ഇന്‍റർമീഡിയേറ്റ്, പ്രീ യൂണിവേഴ്സിറ്റി, പ്രീഡിഗ്രി, ഡിഗ്രി, പിജി, സെൽഫ് ഫിനാൻസ് ക്ലാസുകളിൽ പഠിച്ച പൂർവ വിദ്യാർഥികളാണ് പങ്കെടുക്കുന്നത്. 11ന് രാവിലെ പത്തിന് കോളജ് ഓഡിറ്റോറിയത്തില്‍ ഗോവ ഗവർണർ പി.എസ്. ശ്രീധരൻ പിള്ള ഉദ്ഘാടനം ചെയ്യും. കോളജ് മാനേജർ ഏബ്രഹാം മാർ പൗലോസ് എപ്പിസ്കോപ്പ അനുഗ്രഹപ്രഭാഷണം നടത്തും. രാജ്യസഭ മുൻ ഉപാധ്യക്ഷൻ പ്രഫ. പി.ജെ. കുര്യൻ, പ്രധാനമന്ത്രിയുടെ മുൻ പ്രിൻസിപ്പൽ സെക്രട്ടറി ടി.കെ.എ. നായർ തുടങ്ങിയവരെ പ്രത്യേകം ആദരിക്കും. ഉച്ചകഴിഞ്ഞ് 2.30നു നടക്കുന്ന സമ്മേളനത്തിൽ കോളജ് യൂണിയൻ മുൻ ഭാരവാഹികൾ, മുൻ ത്രിതല പഞ്ചായത്തംഗങ്ങൾ, ജനപ്രതിനിധികൾ, സിനിമ കലാ-സാംസ്കാരിക രംഗത്തെ പ്രശസ്തര്‍, വിദ്യാഭ്യാസ മേഖലയിലെ പ്രമുഖരായ അധ്യാപകർ, വിദ്യാർഥികൾ തുടങ്ങിയവരെ ആദരിക്കും. അനുമോദന സമ്മേളനം ടി.കെ.എ. നായർ ഉദ്ഘാടനം ചെയ്യും.
കോളജ് പ്രിൻസിപ്പൽ ഡോ. കെ. റോയി ജോർജ്, സംഘാടകസമിതി ചെയർമാൻ വിക്ടർ ടി. തോമസ്, കോ-ഓർഡിനേറ്റർ ജോബി മാത്യു വർഗീസ് എന്നിവർ പത്രസമ്മേളനത്തിൽ പങ്കെടുത്തു.
അസിസ്റ്റന്‍റ് പ്രഫസര്‍ നിയമനം
ആറന്മുള: സഹകരണ എൻജിനിയറിംഗ് കോളജിൽ ഇലക്‌ട്രിക്കല്‍ ആന്‍ഡ് ഇലക്‌ട്രോണിക്‌സ് വിഭാഗത്തില്‍ ഒഴിവുള്ള അസിസ്റ്റന്‍റ് പ്രഫസര്‍ തസ്തികയിലേക്ക് കരാര്‍ അടിസ്ഥാനത്തില്‍ നിയമനം നടത്തും. ഉദ്യോഗാര്ഥികള് അസല്‍ സര്‍ട്ടിഫിക്കറ്റ് സഹിതം ആറിന് രാവിലെ പത്തിനു കോളജില്‍ നടത്തുന്ന അഭിമുഖത്തില്‍ പങ്കെടുക്കണം. ഫോണ്‍: 9496231647.