തിരുവല്ല: പികെസിഎസ് കനിവ് പെയിൻ ആൻഡ് പാലിയേറ്റീവ് കെയർ സൊസൈറ്റിയുടെ ആഭിമുഖ്യത്തിൽ "കനിവ് കാരുണ്യത്തിന്റെ കരസ്പർശം" എന്ന സന്ദേശം ഉയർത്തി 27ന് വൈകുന്നേരം 6.30ന് തിരുവല്ല പബ്ലിക് സ്റ്റേഡിയത്തിൽ കനിവ് കലാസന്ധ്യ 2022 മെഗാ സംഗീത പരിപാടി സംഘടിപ്പിക്കും.
അല്പനേരത്തെ വിനോദത്തിലൂടെ നൂറുകണക്കിന് കിടപ്പു രോഗികൾക്കും അശരണർക്കും സ്വാന്തനമേകാൻ ആവശ്യമായ സമ്പത്ത് സമാഹരിക്കുകയാണ് കനിവിന്റെ ലക്ഷ്യം. സ്റ്റീഫൻ ദേവസി, സിത്താര കൃഷ്ണകുമാർ, ഹരിശങ്കർ തുടങ്ങിയവർ നയിക്കുന്ന കലാസന്ധ്യയിൽ ബ്രോൺസ്, സിൽവർ, ഗോൾഡ്, ഡയമണ്ട്, പ്ലാറ്റിനം എന്നീ ക്രമത്തിലുള്ള പാസുകളിലൂടെയാണ് പ്രവേശനം നിയന്ത്രിച്ചിരിക്കുന്നത്.
പാസ് സൊസൈറ്റി ഓഫീസിൽനിന്നും (പികെസിഎസ് കനിവ് പാലിയേക്കര റോഡ് തിരുവല്ല ഫോൺ: 8078302952 ) കൂടാതെ സോണൽ, വാർഡ് കമ്മിറ്റികൾ വഴിയും തിരുവല്ലയിലെ വിവിധ സ്ഥാപനങ്ങളിലൂടെയും ലഭ്യമാകും. കനിവ് കലാസന്ധ്യയിൽ നിയമസഭാ സ്പീക്കർ എ.എൻ. ഷംസീർ, മന്ത്രി വീണാ ജോർജ്, ആന്റോ ആന്റണി എംപി, മുൻ മന്ത്രിമാരായ കെ.കെ. ശൈലജ, സജി ചെറിയാൻ, ഡെപ്യൂട്ടി സ്പീക്കർ ചിറ്റയം ഗോപകുമാർ, എംഎൽഎമാരായ മാത്യു ടി. തോമസ്, പ്രമോദ് നാരായണൻ, കെ.യു. ജനീഷ് കുമാർ, ജില്ലാ കളക്ടർ ഡോ. ദിവ്യ എസ്. അയ്യർ തുടങ്ങിയവർ പങ്കെടുക്കും.