ലോകസംഗീത ദിനത്തിൽ മധുര സംഗീതം വിളമ്പി അംബിക, വീഡിയോ ഷെയർചെയ്ത് മന്ത്രിയും
1431004
Sunday, June 23, 2024 5:46 AM IST
കൊല്ലം: സ്കൂളിലെ സംഗീത ദിനാഘോഷത്തിൽ ഏവരെയും ഞെട്ടിച്ചു കയറിവന്ന് പാട്ടുപാടി വൈറലായി പാചക തൊഴിലാളി. കൊല്ലം കുളക്കട സബ്ജില്ലയിലെ മഞ്ഞക്കാല ഗവ ബിവി എൽപിഎസിലെ അംബികയാണ് തന്റെകഴിവ് വേദിയിൽ പ്രകടിപ്പിച്ചത്. സ്കൂളിൽ സ൪ഗവേള സമയത്ത് സംഗീത ദിനാഘോഷപരിപാടികൾ സ്കൂൾ അധ്യാപിക കവിത ആർ പിള്ളയുടെ നേതൃത്വത്തിൽ നടക്കുകയായിരുന്നു.
കുട്ടികളും അധ്യാപകരും വേദിയിൽ പരിപാടി അവതരിപ്പിച്ചു കൊണ്ടിരിക്കുമ്പോഴാണ് അംബികയ്ക്കും പാടണമെന്ന മോഹം ഉണ്ടായത്. ആ മോഹം അടക്കി വയ്ക്കാൻ കഴിഞ്ഞില്ല. തുടർന്ന് തന്റെ ആഗ്രഹം പറയുകയും മൈക്ക് കൈമാറുകയും ആയിരുന്നു. എല്ലാവരെയും അതിശയിപ്പിച്ചു കൊണ്ട് " ശ്രീരാഗമോ തേടുന്നു നീ.. എന്ന് തുടങ്ങുന്ന ഗാനം ആലപിച്ചു. ഇത് സ്കൂളിലെ അധ്യാപകൻ എബി പള്ളിക്കൂടം ടിവിക്ക് അയച്ചു കൊടുക്കുകയും അത് വിദ്യാഭ്യാസ മന്ത്രിയുടെ ശ്രദ്ധയിൽ പെട്ടതിനെ തുടർന്ന് അദ്ദേഹം സ്വന്തം പേജിൽ ഷെയർ ചെയ്യുകയുമാണ് ചെയ്തത്. ഈ വീഡിയോ ഇതിനോടകം ലക്ഷക്കണക്കിന് പേരാണ് കണ്ടത്. അതിലൂടെ അംബിക ഇപ്പോൾ നാട്ടിലെ താരമാണ്.