കാഞ്ഞങ്ങാട്: വെള്ളരികൃഷിയില്‍ നൂറുമേനി കൊയ്ത് ഹൊസ്ദുര്‍ഗ് ജില്ലാ ജയില്‍. ജൈവരീതിയില്‍ വളര്‍ത്തിയെടുത്ത വെള്ളരി കൃഷിയില്‍ ഇത്തവണ ഹൊസ്ദുര്‍ഗ് ജില്ലാ ജയിലിന് ലഭിച്ചത് നൂറുമേനി വിളവാണ്. ഒരു ടണ്ണോളം വെള്ളരിയാണ് വിളവെടുത്തത്.
ജയിലിലെ ബയോഗ്യാസ് സ്ലറിയാണ് ക്യഷിക്ക് വളമായി നല്‍കിയത്. വെള്ളരി കൃഷിക്ക് പുറമെ ഒരു ടണ്ണോളം കപ്പ, 50 കിലോ പയര്‍, 25 കിലോ പച്ചമുളക്, വഴുതിന, വെണ്ട, പടവലം എന്നിവയും ലഭിച്ചു. കാഞ്ഞങ്ങാട് കൃഷി വകുപ്പിന്‍റെ സഹകരണത്തോടെയാണ് ജയിലില്‍ ജൈവ പച്ചക്കറി കൃഷി നടത്തുന്നത്. ജയിലിലെ വനിതാ ജയില്‍ ബ്ലോക്കിനടുത്തായി മുന്തിരി കൃഷിയും ഉണ്ട്. വെള്ളരി വിളവെടുപ്പ് നഗരസഭ വൈസ് ചെയര്‍മാന്‍ ബില്‍ടെക്ക് അബ്ദുള്ള ഉദ്ഘാടനം ചെയ്തു.
അസി. പ്രിസണ്‍ ഓഫീസര്‍ യു. ജയാനന്ദനാണ് കൃഷിക്ക് നേതൃത്വം നല്‍കുന്നത്. ജയില്‍ സൂപ്രണ്ട് കെ. വേണു, അസി. സൂപ്രണ്ട് നവാസ് ബാബു, കെ.ജി. രാജേന്ദ്രന്‍, വനിത അസി. സൂപ്രണ്ട് ഗ്രേഡ് വണ്‍ എം. പ്രമീള, ഡെപ്യൂട്ടി പ്രിസണ്‍ ഓഫീസര്‍മാരായ ദീപു, പുഷ്പ രാജു, പ്രമോദ്, സന്തോഷ്‌കുമാര്‍, അസി. പ്രിസണ്‍ ഓഫീസര്‍ വിനീത് വി. പിള്ള, സുര്‍ജിത്ത്, വിവേക്, ബൈജു, രതീഷ് എന്നിവര്‍ പങ്കെടുത്തു.