ചെറുവത്തൂര്‍: സംസ്ഥാന സ്‌കൂള്‍ കായികമേളയില്‍ ജില്ലയ്ക്ക് മികച്ച നേട്ടം സമ്മാനിച്ച കായിക താരങ്ങള്‍ക്ക് ചെറുവത്തൂര്‍ റെയില്‍വേ സ്റ്റേഷനില്‍ ആവേശോജ്വല സ്വീകരണം. ജില്ലയില്‍ നിന്നും കായികമേളയില്‍ പങ്കെടുത്ത താരങ്ങളും പരിശീലകരും ഇന്നലെ രാവിലെ ഒമ്പതോടെ തിരുവനന്തപുരം-മംഗളൂരു എക്‌സ്പ്രസ്സിലാണ് വന്നിറങ്ങിയത്.
റെക്കോര്‍ഡുകളോടെ എട്ടു സ്വര്‍ണവും ഒരു വെള്ളിയും ഒരു വെങ്കലവുമായി 45 പോയിന്‍റാണ് ഇത്തവണ ജില്ലയ്ക്ക് ലഭിച്ചത്.
ആദ്യമായാണ് സ്‌കൂള്‍ കായികമേളയില്‍ ജില്ലയ്ക്ക് ഇത്രയും മികച്ച നേട്ടം ലഭിക്കുന്നത്. പോയിന്‍റ് പട്ടികയില്‍ ഇത്തവണ ഏഴാം സ്ഥാനത്താണ് കാസര്‍ഗോഡ് ജില്ല.
ലോംഗ്ജമ്പില്‍ ആദ്യമായി ജില്ലയ്ക്ക് സ്വര്‍ണമെഡല്‍ സമ്മാനിച്ച പാലാവയല്‍ സെന്‍റ് ജോണ്‍സ് ഹയര്‍ സെക്കന്‍ഡറി സ്‌കൂളിലെ ആല്‍ബിന്‍ ആന്‍റണി, ഡിസ്‌ക്‌സ് ത്രോയില് റിക്കാർഡോടെ സ്വര്‍ണം നേടിയ കുട്ടമത്ത് എച്ച്എസ്എസിലെ കെ.സി.സര്‍വാന്‍, ഡിസ്‌കസ് ത്രോയില് റിക്കാർഡോടെ സ്വര്‍ണവും ഷോട്ട്പുട്ടില്‍ സ്വര്‍ണവും നേടിയ ചീമേനി ഗവ.എച്ച്എസ്എസിലെ അഖില രാജു, പതിനാല് വയസില്‍ താഴെയുള്ള പെണ്‍കുട്ടികളുടെ ഷോട്ട്പുട്ടില്‍ റിക്കാർഡും സ്വര്‍ണവും ഡിസ്‌കസില്‍ സ്വര്‍ണവും നേടിയ പാര്‍വണ ജിതേഷ്, ഷോട്ട്പുട്ടില്‍ റിക്കാർഡും സ്വര്‍ണവും ഡിസ്‌കസ് ത്രോയില് സ്വര്‍ണവും കരസ്ഥമാക്കിയ തൃക്കരിപ്പൂര്‍ ഇളമ്പച്ചി ഗവ.ഹയര്‍ സെക്കന്‍ഡറി സ്‌കൂളിലെ വി.എസ്.അനുപ്രിയ, ഷോട്ട്പുട്ടില്‍ വെള്ളി നേടിയ കുട്ടമത്ത് സ്‌കൂളിലെ ഹെനന്‍ എലിസബത്ത്, പതിനേഴ് വയസില്‍ താഴെയുള്ള കുട്ടികളുടെ 4ഃ100 മീറ്റര്‍ റിലേയില്‍ വെങ്കലം നേടിയ ടീമിലെ അംഗങ്ങളായ പാലാവയല്‍ സ്‌കൂളിലെ തന്നെ കെ.പി.അഭിനവ്, മുഹമ്മദ് ജസീര്‍ എന്നിവര്‍ക്കാണ് സ്വീകരണം നല്‍കിയത്. പാലാവയല്‍ സ്‌കൂളിന്‍റെ പരിശീലകന്‍ ക്യാപ്റ്റന്‍ കെ.എസ്.മാത്യു, കായികാധ്യാപകന്‍ നിഥിന്‍ ജോസഫ് എന്നിവരുള്‍പ്പെടെയുള്ള പരിശീലകര്‍ക്കും ആദരം നല്‍കി. ജില്ലാ വിദ്യാഭ്യാസ ഡെപ്യൂട്ടി ഡയറക്ടര്‍ സി.കെ.വാസു, നീലേശ്വരം ബ്ലോക്ക് പഞ്ചായത്ത് പ്രസിഡന്‍റ് മാധവന്‍ മണിയറ, ചെറുവത്തൂര്‍ പഞ്ചായത്ത് പ്രസിഡന്‍റ് സി.വി. പ്രമീള, ജില്ല പഞ്ചായത്ത് അംഗം കെ.ശകുന്തള, ചെറുവത്തൂര്‍ ഉപജില്ല വിദ്യാഭ്യാസ ഓഫീസര്‍ കെ.വി.രാമകൃഷ്ണന്‍, ജില്ലാ സ്‌കൂള്‍ ഗെയിംസ് അസോസിയേഷന്‍ സെക്രട്ടറി എം.ധനേഷ് കുമാര്‍, കോ-ഓര്‍ഡിനേറ്റര്‍ കെ.മധുസൂദനന്‍, ജില്ല സ്‌പോര്‍ട്‌സ് കൗണ്‍സില്‍ വൈസ് പ്രസിഡന്‍റ് പി.പി.അശോകന്‍, ഹെഡ്മാസ്റ്റേഴ്‌സ് ഫോറം കണ്‍വീനര്‍ പി.ഗംഗാധരന്‍, സുധീപ് ബോസ്, പാലാവയല്‍ സ്‌കൂള്‍ പ്രിന്‍സിപ്പല്‍ ഡോ.മെന്‍ഡലിന്‍ മാത്യു, പിടിഎ പ്രസിഡന്‍റ് സോമി അറയ്ക്കല്‍ തുടങ്ങിയവര്‍ സംബന്ധിച്ചു.