വി​മാ​ന​ത്താ​വ​ള​ത്തി​ന്‍റെ ചു​റ്റു​മ​തി​ൽ ത​ക​ർ​ന്നു; വെ​ള്ളം കു​ത്തി​യൊ​ഴു​കി വീ​ടു​ക​ൾ​ക്ക് നാ​ശം
Saturday, May 25, 2024 1:32 AM IST
മ​ട്ട​ന്നൂ​ർ: ക​ണ്ണൂ​ർ രാ​ജ്യാ​ന്ത​ര വി​മാ​ന​ത്താ​വ​ള​ത്തി​ന്‍റെ ചു​റ്റു​മ​തി​ൽ ത​ക​ർ​ന്നു. വെ​ള്ളം കു​ത്തി​യൊ​ഴു​കി വീ​ടു​ക​ളി​ലും ബൈ​ക്ക് വ​ർ​ക്ക് ഷോ​പ്പി​ലും വെ​ള്ളം ക​യ​റി നാ​ശ​ന​ഷ്ട​മു​ണ്ടാ​യി. വ്യാ​ഴാ​ഴ്ച അ​ർ​ധ​രാ​ത്രി​യി​ലു​ണ്ടാ​യ ശ​ക്ത​മാ​യ മ​ഴ​യി​ൽ ക​ല്ലേ​രി​ക്ക​ര​യി​ൽ വി​മാ​ന​ത്താ​വ​ള ക​വാ​ട​ത്തി​ന് സ​മീ​പ​ത്താ​യി​രു​ന്നു സം​ഭ​വം. വി​മാ​ന​ത്താ​വ​ള​ത്തി​ൽ നി​ന്ന് ഡ്രെ​യ്നേ​ജി​ലൂ​ടെ ഒ​ഴു​കി​യെ​ത്തി​യ വെ​ള്ള​ത്തി​ന്‍റെ സ​മ്മ​ർ​ദ്ദം കാ​ര​ണം ചെ​ങ്ക​ല്ല് കൊ​ണ്ട് നി​ർ​മി​ച്ച ചു​റ്റു​മ​തി​ൽ ത​ക​രു​ക​യാ​യി​രു​ന്നു. മ​തി​ൽ ത​ക​ർ​ന്ന ഭാ​ഗ​ത്തൂ​ടെ വെ​ള്ളം റോ​ഡി​ലൂ​ടെ കു​ത്തി​യൊ​ഴു​കി സ​മീ​പ​ത്തെ വീ​ടു​ക​ളി​ലും ബൈ​ക്ക് വ​ർ​ക്ക് ഷോ​പ്പി​ലും വെ​ള്ളം ക​യ​റു​ക​യാ​യി​രു​ന്നു.

ഓ​ട്ടോ ഡ്രൈ​വ​ർ കെ. ​മോ​ഹ​ന​ന്‍റെ വീ​ട്ടി​നു​ള്ളി​ലേ​ക്ക് വെ​ള്ളം ഇ​ര​ച്ചു ക​യ​റി​യ​തി​നാ​ൽ വീ​ട്ടു​പ​ക​ര​ണ​ങ്ങ​ളും വീ​ട്ടു​മു​റ്റ​ത്ത് പാ​കി​യ ഇ​ന്‍റ​ർ ലോ​ക്ക് അ​ട​ക്കം ന​ശി​ച്ചു. വീ​ട്ടു​മു​റ്റ​ത്ത് നി​ർ​ത്തി​യി​ട്ട ഓ​ട്ടോ​യ്ക്കും കാ​റി​നും കേ​ടു​പാ​ടു​ക​ളു​ണ്ടാ​യി. സ​മീ​പ​ത്തെ കെ.​സു​മേ​ഷി​ന്‍റെ വീ​ട്ടി​ലും വെ​ള്ളം ക​യ​റി. റോ​ഡ​രി​കി​ലെ ബി​ജു​വി​ന്‍റെ ഉ​ട​മ​സ്ഥ​ത​യി​ലു​ള്ള ബൈ​ക്ക് വ​ർ​ക്ക് ഷോ​പ്പി​ൽ വെ​ള്ളം ക​യ​റി​യ​തി​നാ​ൽ സാ​ധ​ന​ങ്ങ​ൾ ഒ​ഴു​കി പോ​കു​ക​യും പി​ൻ​ഭാ​ഗ​ത്തെ ചു​റ്റു​മ​തി​ൽ ത​ക​രു​ക​യും ചെ​യ്തു.

വ​ർ​ഷ​ങ്ങ​ൾ​ക്ക് മു​മ്പും ഇ​തേ സ്ഥ​ല​ത്ത് ചു​റ്റു​മ​തി​ൽ ത​ക​ർ​ന്ന​തി​നാ​ൽ സ​മീ​പ​ത്തെ വീ​ടു​ക​ളി​ൽ വെ​ള്ളം ക​യ​റി നാ​ശ​ന​ഷ്ട​മു​ണ്ടാ​യി​രു​ന്നു. ഡ്രെ​യ്നേ​ജ് നി​റ​ഞ്ഞു ക​വി​ഞ്ഞൊ​ഴു​കി​യ​താ​ണ് മ​തി​ൽ ത​ക​രാ​ൻ ഇ​ട​യാ​യ​ത്.

മ​ട്ട​ന്നൂ​ർ ന​ഗ​ര​സ​ഭ ചെ​യ​ർ​മാ​ൻ എ​ൻ.​ഷാ​ജി​ത്ത്, കൗ​ൺ​സി​ല​ർ നി​ഷ, കി​യാ​ൽ എം​ഡി സി.​ദി​നേ​ശ്, ജ​ന​പ്ര​തി​നി​ധി​ക​ൾ തു​ട​ങ്ങി​യ​വ​ർ സ്ഥ​ലം സ​ന്ദ​ർ​ശി​ച്ചു. വീ​ടു​ക​ളി​ൽ ക​യ​റി​യ ചെ​ളി നീ​ക്കം ചെ​യ്തു.