ADVERTISEMENT

ADVERTISEMENT

കെത്രിഎ ഇഫ്താർ, വിഷു, ഈസ്റ്റര്‍ ആഘോഷിച്ചു

കണ്ണൂർ: കേരള അഡ്വർട്ടൈസിംഗ് ഏജൻസീസ് അസോസിയേഷന്‍ കണ്ണൂര്‍, കാസര്‍ഗോഡ് സോൺ ഇഫ്താർ വിരുന്നും ഈസ്റ്റര്‍, വിഷു ആഘോഷവും നടത്തി. കണ്ണൂര്‍ താവക്കര കെടിഡിസി ലൂം ലാൻഡ് ഹോട്ടലിൽ നടന്ന പരിപാടിയില്‍ കണ്ണൂര്‍, കാസര്‍ഗോഡ് സോൺ പ്രസിഡന്‍റ് പി.വി. വിജയകുമാര്‍ അധ്യക്ഷത വഹിച്ചു. മുതിർന്ന അംഗം ടി.കെ.സി. അഹമ്മദ്, സോൺ എക്സിക്യൂട്ടീവ് അംഗം സജാദ് സഹീർ, സ്റ്റേറ്റ് കമ്മിറ്റിയംഗം മുസ്തഫ റാസി, സി. മുഹമ്മദ് ഇംതിയാസ് എന്നിവര്‍ റംസാന്‍ വ്രതാനുഷ്ഠാനത്തെകുറിച്ചും ബെന്നിച്ചൻ മാനുവൽ ഈസ്റ്റര്‍ ഐതിഹ്യങ്ങളെക്കുറിച്ചും പ്രഭാഷണം നടത്തി.

സെക്രട്ടറി പി.വി. സന്തോഷ്, ട്രഷറർ ധനേഷ് നമ്പ്യാർ, സ്റ്റേറ്റ് അഡ്വൈസറി ബോർഡ് വൈസ് ചെയർമാൻ വി.വി. രാജേഷ്, സോൺ വൈസ് പ്രസിഡന്‍റ് സി.എച്ച്. ജഷിൻദാസ്, ജോയിന്‍റ് സെക്രട്ടറി എൻ.വി. സിരോഷ്, എക്സിക്യൂട്ടീവ് അംഗങ്ങളായ പി. ശ്യാമള, മഹേഷ് മറോളി, ശ്രീഹരി നായർ, പി.കെ. രഘുനാഥ് എന്നിവർ പ്രസംഗിച്ചു.

ADVERTISEMENT

മലയോരമേഖലയിൽ മൊബൈൽ കണക്ടിവിറ്റി ലഭ്യമാക്കണം: സജീവ് ജോസഫ് എംഎൽഎ

ശ്രീകണ്ഠാപുരം: മലയോര മേഖലയിലെ വിവിധ ഗ്രാമങ്ങളിലും ടൂറിസം കേന്ദ്രങ്ങളിലും മൊബൈൽ കണക്ടിവിറ്റി ലഭ്യമാക്കണമെന്ന് ആവശ്യപ്പെട്ട് സജീവ് ജോസഫ് എംഎൽഎ ബിഎസ്എൻഎൽ ജനറൽ മാനേജറെ നേരിൽ കണ്ടു കത്തുനൽകി. മുന്പ് കണക്ടിവിറ്റി ഉണ്ടായിരുന്ന സ്ഥലങ്ങളിൽ പോലും ടവറുകൾ പ്രവർത്തനക്ഷമമല്ലാതായതു കാരണം കണക്ടിവിറ്റി നഷ്ടപ്പെട്ടുവെന്ന് എംഎൽഎ ചൂണ്ടിക്കാട്ടി. പ്രശ്നം പരിഹരിക്കാൻ കൂടുതൽ ടവറുകൾ സ്ഥാപിച്ചും വൈഫൈ കണക്‌ഷൻ നൽകിയും പ്രവർത്തനക്ഷമത കുറഞ്ഞ സംവിധാനങ്ങൾ മെച്ചപ്പെടുത്തിയും സേവനം ഉറപ്പാക്കണമെന്ന് എംഎൽഎ ആവശ്യപ്പെട്ടു. ഇതുമായി ബന്ധപ്പെട്ട പരിശോധന നടത്താനും ഇരിക്കൂർ നിയോജക മണ്ഡലത്തിൽ ഉടൻ ബിഎസ്എൻഎൽ അദാലത്ത് സംഘടിപ്പിക്കുമെന്നും ജനറൽ മാനേജർ സജീവ് ജോസഫ് എംഎൽഎയെ അറിയിച്ചു.

അമിതവേഗക്കാരെ പിടിക്കാൻ കാമറ വേണം

പയ്യാവൂർ: ചെറുപുഴ-വള്ളിത്തോട് സംസ്ഥാന പാതയിൽ ചമതച്ചാൽ ജംഗ്ഷൻ അപകട മേഖലയായി മാറുന്നു. രണ്ടു മാസത്തിനുള്ളിൽ പൊലിഞ്ഞത് രണ്ടുജീവൻ. മേയ് രണ്ടിന് കാർ നിയന്ത്രണംവിട്ട് റോഡരികിലൂടെ നടന്നുപോയ മൂന്നുവയസുകാരി മരിച്ചത്. ഈ നൊമ്പരം മാറുന്നതിനിടെയാണ് റോഡ് മുറിച്ച് കടക്കവേ ലോട്ടറി തൊഴിലാളിയായ 58കാരൻ ദിവസങ്ങൾക്കു മുന്പ് കാറിടിച്ച് മരിച്ചത്. ഇതുപോലെ ഇവിടെ നടന്ന ചെറുതും വലുതുമായ അപകടങ്ങൾ നൂറിലേറെ വരും. അമിതവേഗതയാണ് മിക്ക അപകടങ്ങൾക്കു പിന്നിൽ. വാഹനങ്ങൾ കാക്കത്തോട് മുതൽ വർധിക്കുന്ന വേഗത ചമതച്ചാൽ വളവിലാണ് കുറയ്ക്കുന്നത്. വളവുകളിൽ വേഗത കുറയ്ക്കാത്തതും ഡ്രൈവിംഗിനിടെയുള്ള ഫോൺ ഉപയോഗവും അപകടത്തിന് കാരണമാകുന്നുണ്ട്. ചമതച്ചാൽ ജംഗ്ഷനിൽ നിരീക്ഷണ കാമറകളും വേഗനിയന്ത്രണ ബോർഡുകളും സ്ഥാപിക്കണമെന്ന് നാട്ടുകാർ ആവശ്യപ്പെട്ടു. ചമതച്ചാൽ പള്ളി കഴിഞ്ഞാൽ ജംഗ്ഷൻ വരെ ഇറക്കമായതിനാൽ അപകടസാധ്യത ഏറെയാണ്.

റോഡുകൾ കുളമായി: പദ്ധതി പ്രവർത്തനവും അവതാളത്തിൽ

ആലക്കോട്: മലയോര മേഖലയിലെ കുടിവെള്ള ക്ഷാമം പരിഹരിക്കുന്നതിനായുള്ള ജൽജീവൻ മിഷൻ പദ്ധതിക്ക് പൈപ്പിടാൻ വേണ്ടി കുഴിയെടുത്ത റോഡുകൾ തകർന്നു. കുഴിയെടുത്ത ഭാഗങ്ങൾ കൃത്യസമയത്ത് മൂടി ബലപ്പെടുത്താതിനെ തുടർന്ന് വെള്ളം ഒഴുകി റോഡ് പലയിടത്തും തകരുകയാണ്. പൈപ്പ് സ്ഥാപിക്കൽ പ്രവൃത്തി നടത്തിയ കരാറുകാർക്ക് പണം നൽകാതെ വന്നതോടെ പണി നിർത്തി പോകുകയായിരുന്നു. ഇതേതുടർന്ന് എട്ടുമാസമായി പൈപ്പിടൽ ഉൾപ്പടെയുള്ള പ്രവൃത്തികൾ നിലച്ചിരിക്കുകയാണ്. അഞ്ചുവർഷം മുമ്പ് കേന്ദ്രസർക്കാർ പ്രഖ്യാപിച്ച പദ്ധതി കഴിഞ്ഞവർഷം പൂർത്തീകരിക്കുമെന്നായിരുന്നു പറഞ്ഞിരുന്നതെങ്കിലും എവിടെയുമെത്താത്ത നിലയിലാണ്. പദ്ധതിക്കായി മലയോര മേഖലയുടെ പല ഭാഗത്തായി റോഡരികിൽ ഇറക്കിയിട്ടിരിക്കുന്ന ലക്ഷങ്ങൾ വിലയുള്ള പൈപ്പുകൾ വർഷങ്ങളായി വെയിലും മഴയുമേറ്റ് കാടുമൂടിക്കിടക്കുകയാണ്.

പേരാവൂർ മൗണ്ട് കാർമൽ ആശ്രമം പള്ളിയിൽ തിരുനാൾ തുടങ്ങി

പേരാവൂർ: പേരാവൂർ മൗണ്ട് കാർമൽ ആശ്രമം പള്ളിയിൽ തിരുനാൾ ആഘോഷത്തിന് കൊടിയേറി. ജൂലൈ 20 വരെ നീണ്ടുനിൽക്കുന്ന തിരുനാൾ ആഘോഷത്തിനും വിശുദ്ധ കുർബാനയ്ക്കും നൊവേനയ്ക്കും ഫാ. ടിനു പ്ലാത്തോട്ടത്തിൽ, ഫാ. പോൾ മുണ്ടയ്ക്കൽ, ഫാ. ജോസഫ് ചക്കാലക്കുടിയിൽ എന്നിവർ മുഖ്യകാർമികത്വം വഹിക്കും. പ്രധാന തിരുനാൾ ദിവസമായ ജൂലൈ 20ന് ഫാ. ഫിലിപ്പ് നടുത്തോട്ടത്തിൽ തിരുകർമങ്ങൾക്ക് മുഖ്യകാർമികത്വം വഹിക്കും. തുടർന്ന് ഉത്തരിയം വിതരണം, പാച്ചോർ നേർച്ച എന്നിവയും ഉണ്ടായിരിക്കും.

ചേറ്റൂരിന്‍റെ പേര് കോൺഗ്രസ് ചരിത്രത്തിൽ അനശ്വരം: മൻസൂർ അലിഖാൻ

കണ്ണൂർ: കോൺഗ്രസിന്‍റെ ചരിത്രത്തിൽ ചേറ്റൂർ ശങ്കരൻ നായർ എന്ന മലയാളിയുടെ നാമം അനശ്വരമാണെന്ന് എഐസിസി ജനറൽ സെക്രട്ടറി മൻസൂർ അലിഖാൻ. ഇന്ത്യൻ നാഷണൽ കോൺഗ്രസിന്‍റെ അധ്യക്ഷ സ്ഥാനത്തെത്തിയ ഏക മലയാളി എന്ന നിലയിൽ ചേറ്റൂർ ചരിത്രത്തിലിടം നേടിയ വ്യക്തിയ കൂടിയാണെന്നും അദ്ദേഹം പറഞ്ഞു. ചേറ്റൂർ ശങ്കരൻ നായരുടെ 168-ാം ജന്മവാർഷിക ദിനത്തിൽ ഡിസിസിയിൽ നടന്ന പുഷ്പാർച്ചനയും അനുസ്മരണ യോഗവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. അഭിമാനത്തോടെ എടുത്തുപറയാൻ മികച്ച ഒരു ചരിത്രമില്ലാത്തതിന്‍റെ ജാള്യതയിൽ ബിജെപി നേതാക്കളൊക്കെ ചേറ്റൂർ ശങ്കരൻ നായർക്ക് മേൽ അവകാശവാദം ഉന്നയിച്ചു രംഗത്ത് വരുന്നത് പരിഹാസ്യമാണെന്നും മൻസൂർ അലിഖാൻ പറഞ്ഞു. ഡിസിസി പ്രസിഡന്‍റ് മാർട്ടിൻ ജോർജ് അധ്യക്ഷത വഹിച്ചു. സജീവ് ജോസഫ് എംഎൽഎ, കെപിസിസി രാഷ്‌ട്രീയകാര്യ സമിതി അംഗം അജയ് തറയിൽ, സോണി സെബാസ്റ്റ്യൻ, പി.എം. നിയാസ്, പ്രഫ. എ.ഡി. മുസ്തഫ, ചന്ദ്രൻ തില്ലങ്കേരി, ടി.ഒ. മോഹനൻ, കെ. പ്രമോദ്, മുഹമ്മദ് ബ്ലാത്തൂർ, കെ.സി. മുഹമ്മദ് ഫൈസൽ, രാജീവൻ എളയാവൂർ എന്നിവർ പ്രസംഗിച്ചു.

കായകൽപ് പുരസ്‌കാരം: ജില്ലയ്ക്ക് അഭിമാന നേട്ടം

കണ്ണൂർ: 2024-25 വർഷത്തിലെ സംസ്ഥാന കായകൽപ് അവാർഡുകളിൽ ജില്ലയിലെ ആരോഗ്യ സ്ഥാപനങ്ങൾക്ക് അഭിമാന നേട്ടം. ജില്ലാ/ജനറൽ ആശുപത്രി വിഭാഗത്തിൽ 70 ശതമാനത്തിൽ കൂടുതൽ മാർക്ക് നേടി സ്ത്രീകളുടെയും കുട്ടികളുടെയും ആശുപത്രി, മാങ്ങാട്ടുപ്പറമ്പ്, (81 ശതമാനം) കായകൽപ് കമൻഡേഷൻ അവാർഡ് കരസ്ഥമാക്കി. മൂന്ന് ലക്ഷം രൂപയാണ് അവാർഡ് തുക. താലൂക്ക് ആശുപത്രി വിഭാഗത്തിൽ 70 ശതമാനത്തിൽ കൂടുതൽ മാർക്ക് നേടി പഴയങ്ങാടി താലൂക്ക് ആശുപത്രി (73ശതമാനം) ഒരുലക്ഷം രൂപയുടെ കായകൽപ് കമൻഡേഷൻ അവാർഡിന് അർഹമായി. പ്രാഥമികാരോഗ്യ കേന്ദ്ര വിഭാഗത്തിൽ 95.8 ശതമാനം മാർക്ക് നേടി ചൊക്ലി കുടുംബാരോഗ്യ കേന്ദ്രം രണ്ടുലക്ഷം രൂപയുടെയും 92.5 ശതമാനം മാർക്ക് നേടി കല്യാശേരി കുടുംബാരോഗ്യ കേന്ദ്രം 50,000 രൂപയുടെയും 90.8 ശതമാനം മാർക്ക് നേടി മൊറാഴ, ഉദയഗിരി കുടുംബാരോഗ്യ കേന്ദ്രങ്ങൾ 25,000 രൂപയുടെയും അവാർഡുകൾ സ്വന്തമാക്കി. ജനകീയാരോഗ്യകേന്ദ്ര വിഭാഗത്തിൽ 97.5 ശതമാനം മാർക്ക് നേടി കതിരൂർ മെയിൻ സെന്‍റർ ഒരുലക്ഷം രൂപയുടെയും 96.2 ശതമാനം മാർക്ക് നേടി കുണ്ടുചിറ 50,000 രൂപയുടെയും 93.8 ശതമാനം മാർക്ക് നേടി മൊറാഴ 35,000 രൂപയുടെയും അവാർഡുകൾ കരസ്ഥമാക്കി. സർക്കാർ ആരോഗ്യ സ്ഥാപനങ്ങളിലെ ശുചിത്വം, മാലിന്യ പരിപാലനം, അണുബാധ നിയന്ത്രണം എന്നിവ വിലയിരുത്തി പ്രോത്സാഹിപ്പിക്കുന്നതിന് വേണ്ടി സർക്കാർ ആവിഷ്‌കരിച്ച അവാർഡാണ് കായകൽപ്. കേരളത്തിലെ ജില്ലാ/ജനറൽ/സ്ത്രീകളുടെയും കുട്ടികളുടെയും ആശുപത്രികൾ, താലൂക്ക് ആശുപത്രികൾ, സാമൂഹികാരോഗ്യ കേന്ദ്രങ്ങൾ എന്നിവയിൽ നിന്ന് തെരഞ്ഞെടുക്കുന്ന മികച്ച ആശുപത്രികൾക്കാണ് സംസ്ഥാനതല കായകൽപ് അവാർഡ് നൽകുന്നത്. ആശുപത്രികളിൽ ജില്ലാതല പരിശോധനയും പിന്നീട് സംസ്ഥാനതല പരിശോധനയും നടത്തി, സംസ്ഥാനതല കായകൽപ് അവാർഡ് കമ്മിറ്റിയാണ് ഏറ്റവും മികച്ച ആശുപത്രികളെ തെരഞ്ഞെടുത്തത്.

പിണറായി എഡ്യുക്കേഷൻ ഹബ്ബ് നിർമാണം വേഗത്തിലാക്കണമെന്ന്

കണ്ണൂർ: ധർമടം മണ്ഡലത്തിലെ സമഗ്ര വിദ്യാഭ്യാസ സമുച്ചയം പിണറായി എഡ്യുക്കേഷൻ ഹബ്ബിന്‍റെ നിർമാണ പ്രവൃത്തികൾ ജില്ലാ കളക്ടർ അരുൺ കെ. വിജയന്‍റെ സാന്നിധ്യത്തിൽ സംസ്ഥാന ചീഫ് സെക്രട്ടറി ഡോ. എ. ജയതിലക് നേരിൽ കണ്ട് വിലയിരുത്തി. ഐഎച്ച്ആർഡി കോളജ്, പോളിടെക്‌നിക്, ഐടിഐ, കേരള ഇൻസ്റ്റിറ്റ്യൂട്ട് ഓഫ് ഹോസ്പിറ്റാലിറ്റി മാനേജ്‌മെന്‍റ്, സിവിൽ സർവീസ് അക്കാദമി എന്നിവയുടെ നിർമാണം നടക്കുന്ന സ്ഥലങ്ങൾ അദ്ദേഹം സന്ദർശിച്ചു. നിർമാണ പ്രവൃത്തികൾ വേഗത്തിലാക്കാൻ കെഎസ്‌ഐടിഐഎൽ അധികൃതർക്ക് ചീഫ് സെക്രട്ടറി നിർദേശം നൽകി. പദ്ധതിയുടെ ഭാഗമായി ഒരുക്കുന്ന കാന്‍റീൻ, ഓഡിറ്റോറിയം, പൊതുകളി സ്ഥലം, ഹോസ്റ്റൽ, പൊതുലൈബ്രറി ഉൾപ്പെടെ അടിസ്ഥാന സൗകര്യ വികസന പദ്ധതികൾ സംബന്ധിച്ച കാര്യങ്ങളും ചീഫ് സെക്രട്ടറി ചോദിച്ചറിഞ്ഞു. 12.93 ഏക്കർ സ്ഥലത്ത് 285 കോടി രൂപ ചെലവിൽ നിർമിക്കുന്ന ഈ പദ്ധതി കിഫ്ബി ധനസഹായത്തോടെയാണ് നടപ്പിലാക്കുന്നത്. പദ്ധതിയുടെ ഏകോപനച്ചുമതല ഐഎച്ച്ആർഡിക്കും നിർമാണ മേൽനോട്ടം കെഎസ്ഐടിഐഎല്ലിനുമാണ്. തുടർന്ന് പിണറായി കൺവൻഷണൽ സെന്‍ററും ചീഫ് സെക്രട്ടറി ഡോ. എ. ജയതിലക് സന്ദർശിച്ചു. സ്പീക്കർ എ.എൻ. ഷംസീറുമായി അദ്ദേഹം പിണറായി കൺവൻഷൻ സെന്‍ററിൽ കൂടിക്കാഴ്ച നടത്തി.

ബിരുദ‌ദാനവും സ്നേഹവീട് സമർപ്പണവും നടത്തി

എടത്തൊട്ടി: എടത്തൊട്ടി ഡി പോൾ ആർട്സ് ആൻഡ് സയൻസ് കോളജിൽ 2024-25 വർഷത്തെ ബിരുദദാന ചടങ്ങും അഞ്ചാമത് സ്നേഹവീടിന്‍റെ താക്കോൽ സമർണവും കണ്ണൂർ യൂണിവേഴ്‌സിറ്റി ഡയറക്റ്റ് ഓഫ് സ്റ്റുഡന്‍റ് സർവീസ് ഡോ. കെ.വി. സുജിത്ത് നിർവഹിച്ചു. കണ്ണൂർ യൂണിവേഴ്സിറ്റിയുടെയും ചിറ്റിലപിള്ളി ഫൗണ്ടേഷന്‍റെയും ധനസഹായത്തോടെ നിർമിച്ച അഞ്ചാമത്തെ വീടിന്‍റെ താക്കാൽ ദാനമാണ് നടന്നത്. കോളജ് പ്രിൻസിപ്പൽ റവ. ഡോ. പീറ്റർ ഓരോത്ത് അധ്യക്ഷത വഹിച്ചു. റിട്ട. എസ്പി പ്രിൻസ് ഏബ്രഹാം മുഖ്യപ്രഭാഷണം നടത്തി. കോളജ് മാനേജർ ഫാ. ജോർജ് പൊട്ടയിൽ, വൈസ് പ്രിൻസിപ്പൽ ഫാ. ജോർജ് മേലുകുന്നേൽ, വിവിധ വകുപ്പ് മേധാവികളായ ഡോ. ഏബ്രഹാം ജോർജ്, ജോസ് ജോസഫ്, സ്റ്റാഫ് പ്രതിനിധി തോമസ് പോൾ എന്നിവർ പ്രസംഗിച്ചു. കോളജ് യൂണിയൻ മാഗസിൻ "അകം', റിസർച്ച് ജേർണൽ "ഡി ഫൈൻ' എന്നിവയുടെ പ്രകാശനവും നടന്നു.

ആറളം പുനരധിവാസ മേഖലയിൽ മുട്ടക്കോഴികളെ വന്യജീവി കടിച്ചുകൊന്നു

ഇരിട്ടി: ആറളം പുനരധിവാസ മേഖലയിലെ ബ്ലോക്ക് ഒന്പത് കാളിക്കയത്തിൽ ലതയുടെ മുട്ടക്കോഴികളെ വന്യജീവി കടിച്ചു കൊന്നു. ബുധനാഴ്ച രാത്രിയാണ് സംഭവം. വ്യാഴാഴ്ച പുലർച്ചെ കോഴികൾക്ക് തീറ്റ കൊടുക്കാൻ എത്തിയപ്പോഴാണ് ലതയും കുടുംബവും കോഴികളെ കടിച്ച് കൊന്നത് കാണുന്നത്. മുട്ടയിടാൻ പ്രായമായ ഒന്പത് കോഴികളെയാണ് വന്യജീവി കടിച്ച് കൊന്നത്. ഒന്നോ രണ്ടോ കോഴികളെ തിന്ന ശേഷം ജീവി ബാക്കി കോഴികളെ മുഴുവൻ കടിച്ച് കൊന്ന ശേഷം കൂട്ടിൽ ഉപേക്ഷിച്ച് നിലയിലാണ്. കൂടിന്‍റെ അടിഭാഗത്തെ രണ്ട് കല്ലുകൾ ഇളക്കി മാറ്റിയ നിലയിലാണ് ഉള്ളതെന്ന് ലത പറയുന്നു. അഞ്ചുമാസം മുന്പാണ് പഞ്ചായത്ത് മുഖേന ലതക്ക് 10 കോഴി കുഞ്ഞുങ്ങളെ ലഭിക്കുന്നത്. ഒരു മാസമായി കൊട്ടിയൂർ അമ്പലത്തിൽ ജോലിക്ക് പോയ ലതയും കുടുബവും കഴിഞ്ഞ ദിവസമാണ് മടങ്ങി എത്തിയത്. അതുവരെ അയൽവാസികൾ ആയിരുന്നു കോഴികളെ പരിപാലിച്ചിരുന്നത്. കോഴികളെ വന്യമൃഗം കടിച്ചുകൊന്ന വിവരം പ്രമോട്ടർ ഉൾപ്പെടെ അധികൃതരെ അറിയിച്ചിട്ട് ആരും സ്ഥലത്തെത്തി പരിശോധന നടത്തിയില്ലെന്ന് കുടുംബം പരാതി പറയുന്നു. കോഴികൾ ചത്തതിന് കാരണം പക്ഷിപ്പനിയോ നിപ്പയോ ആയിരിക്കുമെന്ന് പ്രൊമോട്ടർ പറഞ്ഞതായും കുടുംബം പറയുന്നു.

ധനരാജ് രക്തസാക്ഷിത്വ ദിനാചരണ പ്രചാരണ ബോർഡുകൾ നശിപ്പിച്ചു

പയ്യന്നൂർ: ധനരാജ് രക്തസാക്ഷിത്വ ദിനാചരണത്തിന്‍റെ ഭാഗമായി വിവിധ സ്ഥലങ്ങളിൽ സ്ഥാപിച്ചിരുന്ന പ്രചാരണ ബോർഡുകൾ നശിപ്പിച്ചു. രാമന്തളി സെൻട്രലിലും കല്ലേറ്റും കടവിലും കുരിശുമുക്കിലും സ്ഥാപിച്ചിരുന്ന ബോർഡുകളാണ് കീറി നശിപ്പിച്ചത്. സിപിഎം മുൻ ബ്രാഞ്ച് സെക്രട്ടറിയും ഡിവൈഎഫ്‌ഐ മുന്‍ ബ്ലോക്ക് കമ്മിറ്റിയംഗവുമായിരുന്ന കുന്നരു കാരന്താട്ടെ സി.വി. ധനരാജിന്‍റെ ഒന്പതാം രക്തസാക്ഷത്വദിനാചരണം ഇന്നലെ കുന്നരുവിൽ നടക്കുന്നതിനിടയിലാണ് പ്രചാരണ ബോർഡുകൾ നശിപ്പിക്കപ്പെട്ടത്. ഇന്നലെ രാവിലെയാണ് ബോർഡ് നശിപ്പിക്കപ്പെട്ടതായി കണ്ടെത്തി‍യത്. വിവരമറിയിച്ചതിനെ തുടർന്നെത്തിയ പോലീസ് സമീപ പ്രദേശങ്ങളിലെ നിരീക്ഷണ കാമറ ദൃശ്യങ്ങൾ പരിശോധിച്ചു വരികയാണ്. കുന്നരുവിലെ ടി. അർജുന്‍റെ പരാതിയിൽ പയ്യന്നൂർ പോലീസ് കേസെടുത്തു.

ഇരിട്ടി താലൂക്ക് ആശുപത്രിയിലെ മൂന്നു ഓഫീസുകൾ മാറ്റുന്നു

ഇരിട്ടി: ഇരിട്ടി താലൂക്ക് ആശുപത്രിയിലെ ചോർന്നൊലിച്ച് അപകടാവസ്ഥയിലായ പഴയ ഒപി ബ്ലോക്കിലെ മൂന്ന് ഓഫീസുകൾ മാറ്റാൻ നടപടി തുടങ്ങി. 2009 ൽ ഉദ്‌ഘാടനം ചെയ്ത ഒപി ബ്ലോക്കിന്‍റെ മുകളിലത്തെ നിലയിൽ പ്രവർത്തിക്കുന്ന താലൂക്ക് ആശുപത്രി ഓഫീസും പൊതുജനാരോഗ്യ വിഭാഗം പ്രവർത്തിക്കുന്ന കെട്ടിട ഭാഗവുമാണ് അപകടാവസ്ഥയിലായത്. പൊതുജനാരോഗ്യ വിഭാഗം പ്രവർത്തിക്കുന്ന മൂന്നു മുറികളിലെ ഫയലുകളും മറ്റ് ഉപകരണങ്ങളും നനയാതെ മേശപ്പുറത്ത് പ്ലാസ്റ്റിക് ഷീറ്റ് കൊണ്ട് മൂടിയിട്ടിരിക്കുകയാണ്. കെട്ടിടത്തിന്‍റെ കോൺക്രീറ്റിനും ചുമരിലും വിള്ളൽ വീണ് ഇളകിയ നിലയിലാണ്. ദന്തരോഗ വിഭാഗവും ഇവിടെതന്നെയാണ് പ്രവർത്തിക്കുന്നത്. കെട്ടിടത്തിന്‍റെ മുന്പിലുള്ള കൂറ്റൻ ടാങ്കും പമ്പ് ഹൗസും കാലപ്പഴക്കവും അവഗണനയും കാരണം അപകട ഭീഷണിയിലാണ്. കൃത്യമായ അറ്റകുറ്റപ്പണികൾ നടത്താതിരുന്നതും നിർമാണത്തിലെ അപാകതയുമാണ് കെട്ടിടത്തിന് ബലക്ഷയം സംഭവിക്കാൻ കാരണമെന്ന് ആക്ഷേപമുണ്ട്. കോട്ടയം മെഡിക്കൽ കോളജിൽ പഴയ കെട്ടിടത്തിന്‍റെ ഭാഗം തകർന്നു വീണ് ഒരു സ്ത്രീ മരിക്കാനിടയായ സംഭവത്തിനു പിന്നാലെയാണ് നഗരസഭ എൻജിനിയറിംഗ് വിഭാഗം കെട്ടടത്തിൽ പരിശോധന നടത്തുകയും ഉടൻ ഓഫീസ് മുറികൾ മാറ്റാൻ നിർദേശിക്കുകയും ചെയ്തത്.

റബറിന് വിലയുണ്ട്; പക്ഷേ, "ഇലകൊഴിഞ്ഞ് സ്വപ്നങ്ങൾ'

കേളകം: കനത്ത മഴയിൽ റബർ മരങ്ങളുടെ ഇലകൾക്കൊപ്പം പൊഴിഞ്ഞത് കർഷകന്‍റെ സ്വപ്നങ്ങൾ കൂടിയാണ്. റബറിന് 205 രൂപ വിലയുണ്ടെങ്കിലും റബർ കർഷകർക്ക് കണ്ണീർ കാലം, ആഴ്ചകളോളം നിർത്താതെ പെയ്ത മഴയെ തുടർന്ന് ഇലക്കണ്ണികളെ വ്യാപകമായ തോതിൽ ഫംഗസ് ബാധിച്ചതാണ് മേഖലയിലെ തോട്ടങ്ങളിലെ ഇലകൊഴിച്ചിലിന് കാരണം. ഇലയില്ലാത്ത റബർമരം ടാപ്പിംഗ് നടത്തിയാൽ മൂന്നിലൊന്ന് ആദായം മാത്രമാണ് ലഭിക്കുകയെന്നാണ് കർഷകർ പറയുന്നു. തളിരില മൂപ്പാകുമ്പോഴേക്കും ഡിസംബർ അവസാനമുണ്ടാകാറുള്ള ശിശിരകാല ഇല കൊഴിച്ചിലുണ്ടാവും. വീണ്ടും വേനൽക്കാല ഇടവേളയ്ക്കായി ടാപ്പിംഗ് നിർത്തണം. അതിനാൽ ഇക്കൊല്ലം കാര്യമായ വരുമാന പ്രതീക്ഷയില്ല. മികച്ച വിലയുള്ളതിനാൽ ജൂൺ മാസം മുതൽ ടാപ്പിംഗ് ആരംഭിക്കാമെന്ന പ്രതീക്ഷയിൽ മിക്ക തോട്ടങ്ങളിലും റബറിന് നേരത്തെ തന്നെ കർഷകർ പ്ലാസ്റ്റിക് ഇട്ടിരുന്നു. എന്നാൽ, തുടർച്ചയായി പെയ്ത മഴ കാരണം പ്ലാസ്റ്റിക്കിട്ട തോട്ടങ്ങളിൽ പോലും ടാപ്പിംഗ് നടന്നില്ല. കടം വാങ്ങിയും മറ്റും ഭാരിച്ച ചെലവിൽ റബർ മരത്തിലിട്ട പ്ലാസ്റ്റിക് വിട്ടിലുകളുടെ ആക്രമണത്തിലും നശിച്ചു. 2021- 23 വരെയുള്ള കാലയളവിലെ റബർ വില സ്ഥിരതാ ഫണ്ടിൽ പത്തുമാസത്തോളം കുടിശികയുണ്ട്.

നിമിഷപ്രിയയുടെ മോചനത്തിന് സമ്മർദ്ദം ചെലുത്തണം: കത്തോലിക്ക കോൺഗ്രസ്

തലശേരി: വധശിക്ഷയ്ക്ക് വിധിക്കപ്പെട്ട് യെമനിലെ ജയിലിൽ കഴിയുന്ന നിമിഷപ്രിയയുടെ മോചനത്തിന് കക്ഷിരാഷ്‌ട്രീയത്തിന് അതീതമായി എല്ലാവരും ഒത്തുചേർന്ന് കേന്ദ്ര സർക്കാരിൽ സമ്മർദ്ദം ചെലുത്തണമെന്ന് കത്തോലിക്ക കോൺഗ്രസ് തലശേരി അതിരൂപത കമ്മിറ്റി. നിമിഷപ്രിയ സ്വന്തം ജീവൻ രക്ഷിക്കാൻ നടത്തിയ ശ്രമത്തിനിടയിലാണ് യമൻ പൗരൻ മരിച്ചത്. എത്രയോ വർഷങ്ങളായി നിമിഷപ്രിയ ജയിലിൽ കഴിയുകയാണ്. നമ്മുടെ രാജ്യത്തെ ഒരു പൗര മറ്റൊരു രാജ്യത്തിന്‍റെ നിയമത്തിന്‍റെ ഭാഗമായി തൂക്കിലേറ്റപ്പെടുകയെന്ന് പറയുന്നത് നമ്മുടെ രാജ്യത്തിന്‍റെ നയതന്ത്രത്തിലെ പാളിച്ചയാണ്. അമേരിക്ക പോലെയുള്ള സമ്പന്ന രാജ്യങ്ങളിലെ പൗരന്മാർ ആണെങ്കിൽ അവർ എന്തു വിലകൊടുത്തും തങ്ങളുടെ പൗരന്മാരെ രക്ഷിച്ചു കൊണ്ടുവരും. അത് മുൻകാലങ്ങളിൽ നമ്മൾ കണ്ടിട്ടുള്ളതാണ്. ലോകത്ത് മൂന്നാം ശക്തിയായി വികസിച്ചുകൊണ്ടിരിക്കുന്ന ഒരു രാജ്യമാണ് ഇന്ത്യയെന്ന് കൊട്ടിഘോഷിക്കുമ്പോൾ ഇത്തരം അനുഭവങ്ങൾ നൊമ്പരമായി മാറുകയാണ്. ഈ വിഷയത്തിൽ കേന്ദ്രസർക്കാർ ആത്മാർഥതയോടെ ഇടപെടാത്തതാണ് കോടതി വഴി കഴിഞ്ഞദിവസം ഒരു നീക്കം നടന്നിട്ടുള്ളത്. കേന്ദ്രസർക്കാർ ഉടൻ ഈ വിഷയത്തിൽ ഇടപെടണമെന്ന് കത്തോലിക്ക കോൺഗ്രസ് യോഗം ആവശ്യപ്പെട്ടു. കത്തോലിക്ക കോൺഗ്രസ് ഗ്ലോബൽ ഡയറക്ടർ റവ.ഡോ.ഫിലിപ്പ് കവിയിൽ ഉദ്ഘാടനം ചെയ്തു. അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. ഗ്ലോബൽ ട്രഷറർ ടോണി ജോസഫ് പുഞ്ചക്കുന്നേൽ, ജനറൽ സെക്രട്ടറി ജിമ്മി ആയിത്തമറ്റം, ട്രഷറർ സുരേഷ് ജോർജ്, വൈസ് പ്രസിഡന്‍റുമാരായ ബെന്നിച്ചൻ മഠത്തിനകം, ഐ.സി.മേരി, ടോമി കണയങ്കൽ, ഷിനോ പാറയ്ക്കൽ, ഗ്ലോബൽ വർക്കിംഗ് കമ്മിറ്റി മെംബർ ബെന്നി പുതിയാംപുറം, ഗ്ലോബൽ സെക്രട്ടറിമാരായ ഷീജ കാറുകുളം, പീയൂസ് പറയിടം, അതിരൂപത സെക്രട്ടറിമാരായ ജയിംസ് ഇമ്മാനുവേൽ, കെ.എ.ജോസഫ്, രാജീവ് കണിയാന്തര, ജോർജ് വലിയമുറത്താങ്കൽ ഫൊറോന പ്രസിഡന്‍റുമാരായ മാത്യു വള്ളോംകോട്ട്, സാജു പടിഞ്ഞാറേട്ട്, സാജു പുത്തൻപുര, ജോസഫ് മാത്യു കൈതമറ്റം, തോമസ് ഒഴുകയിൽ, ബേബി കോയിക്കൽ എന്നിവർ പ്രസംഗിച്ചു.

ലക്ഷ്യബോധത്തോടെ മുന്നേറാൻ സിവിൽ സർവീസ് പരിശീലനം വഴിയൊരുക്കും: ചീഫ് സെക്രട്ടറി

കണ്ണൂർ: വിദ്യാർഥികൾക്ക് ലക്ഷ്യബോധത്തോടെ മുന്നേറാൻ സിവിൽ സർവീസ് പരിശീലനം വഴിയൊരുക്കുമെന്ന് സംസ്ഥാന ചീഫ് സെക്രട്ടറി ഡോ. എ. ജയതിലക്. മുദ്രകിരണം പദ്ധതിയുടെ ഭാഗമായി മുണ്ടേരി ഗവ. ഹയർ സെക്കൻഡറി സ്‌കൂളിൽ ആരംഭിച്ച സിവിൽ സർവീസ് പരീശീലന പരിപാടി ഉദ്ഘാടനം ചെയ്ത് സംസാരിക്കുകയായിരുന്നു ചീഫ് സെക്രട്ടറി. വിദ്യാർഥികൾ ലക്ഷ്യബോധത്തോടെ മുന്നേറണമെന്നും കുട്ടികളുടെ മുന്നേറ്റത്തിൽ മാതാപിതാക്കൾ പൂർണ പിന്തുണ നൽകണമെന്നും അദേഹം പറഞ്ഞു. 21 ാം വയസിൽ സിവിൽ സർവീസ് പരീക്ഷ എഴുതണം. ആദ്യ ശ്രമത്തിൽ ഐഎഎസ് കരസ്ഥമാക്കണം. സ്‌കൂൾ കാലഘട്ടത്തിൽ തുടങ്ങിയാൽ അത് സാധ്യമാക്കാമെന്നും ചീഫ് സെക്രട്ടറി പറഞ്ഞു. ഏത് വിഷയം എടുക്കണമെന്ന കാര്യത്തിൽ ധാരണ ഉണ്ടാകണം. ഓരോ ദിവസവും ഉപന്യാസങ്ങൾ എഴുതി പരിശീലിക്കണമെന്നും എല്ലാ ദിവസവും പത്രവും മറ്റ് മാസികകളും വായിക്കണം. സിവിൽ സർവീസിന് ഉപകരിക്കുന്ന പുസ്തകങ്ങൾ ഉൾക്കൊള്ളുന്ന ലൈബ്രറികൾ ഉണ്ടാവണം. സിവിൽ സർവീസ് പരിശീലന ക്ലാസുകളിൽ അഭിമുഖത്തിനുള്ള വേദികൾ ഒരുക്കണം. സിവിൽ സർവീസ് നേടിയവരെ പരിശീലകരാക്കി കൊണ്ടുവരാൻ ശ്രദ്ധിക്കണം. സിവിൽ സർവീസ് ഉദ്യോഗസ്ഥരുടെ ദൈനംദിന ജോലികൾ കണ്ടുപഠിക്കുന്നതിന് കുട്ടികൾക്ക് അവസരം ഒരുക്കണമെന്നും അദ്ദേഹം നിർദ്ദേശിച്ചു. ഭൗതിക സാഹചര്യം മെച്ചപ്പെടുത്തിയ മുണ്ടേരി ഗവ. ഹയർ സെക്കൻഡറി സ്‌കൂൾ രാജ്യത്തിന് തന്നെ മാതൃകയായെന്നും ചീഫ് സെക്രട്ടറി പറഞ്ഞു. കേരള സിവിൽ സർവീസ് അക്കാദമിയും മുണ്ടേരി ഗവ. ഹയർ സെക്കൻഡറി സ്‌കൂൾ മുദ്രാ പദ്ധതിയും ചേർന്നാണ് സിവിൽ സർവീസ് പരിശീലന പരിപാടി സംഘടിപ്പിക്കുന്നത്. മുദ്രാ വിദ്യാഭ്യാസ സമിതി ചെയർമാൻ മുൻ എംപി കെ.കെ. രാഗേഷ്അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരി സംസാരിച്ചു. ജില്ലാ കളക്ടർ അരുൺ കെ. വിജയൻ, ഡിഐജി ജി.എച്ച്. യതീഷ് ചന്ദ്ര, സിസിഎഫ് ബി.എൻ. അൻജൻകുമാർ, സിറ്റി ജില്ലാ പോലീസ് മേധാവി സി.നിധിൻരാജ്, തലശേരി സബ് കളക്‌ടർ കാർത്തിക് പാണിഗ്രാഹി, അസി. കളക്‌ടർ എഹ്‌തെദ മുഫസീർ, കണ്ണൂർ ഡിഎഫ്ഒ വൈശാഖ് ശശികുമാർ എന്നിവർ വിദ്യാർഥികൾക്ക് ലഘു പരിശീലനം നൽകി.

തലശേരി അതിരൂപത യുവജന സംഗമവും ‌റാലിയും ഇന്ന് ആലക്കോട്ട്

ആലക്കോട്: കെസിവൈഎം-എസ്എംവൈഎം തലശേരി അതിരൂപത യുവജന സംഗമവും റാലിയും ഇന്ന് ആലക്കോട് നടക്കും. വൈകുന്നേരം നാലിന് അരങ്ങത്തു നിന്ന് ആരംഭിക്കുന്ന റാലി ആലക്കോട് സെന്‍റ് മേരീസ് ഫൊറോന പള്ളിയിൽ സമാപിക്കും. ആലക്കോട്, മേരിഗിരി, വായാട്ടുപറമ്പ്, ചെറുപുഴ ഫൊറോനകളിൽ നിന്നുള്ള യുവജനങ്ങളാണ് ആതിഥേയത്വം വഹിക്കുന്നത്. യുവജനസംഗമം തലശേരി ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്യും. രാജ്യസഭാംഗം ജോൺ ബ്രിട്ടാസ് എംപി മുഖ്യാതിഥിയായിരിക്കും. സജീവ് ജോസഫ് എംഎൽഎ അവാർഡ് സമർപ്പണം നടത്തും. കെസിവൈഎം-എസ്എംവൈഎം അതിരൂപത ഡയറക്‌ടർ ഫാ. അഖിൽ മാത്യു മുക്കുഴി ആമുഖപ്രഭാഷണം നടത്തും. അതിരൂപത പ്രസിഡന്‍റ് ജോയൽ പുതുപ്പറമ്പിൽ അധ്യക്ഷ വഹിക്കും. തലശേരി അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴി അനുഗ്രഹ പ്രഭാഷണം നടത്തും. ആലക്കോട് ഫൊറോന വികാരി ഫാ. ആന്‍റണി പുന്നൂര്, കെസിവൈഎം അതിരൂപത ജനറൽ സെക്രട്ടറി അബിൻ വടക്കേക്കര, വൈസ് ഡയറക്‌‌ടർ സിസ്റ്റർ ജോസ് റോസ് എസ്എച്ച്, ഗ്ലോറിയ കുനാനിക്കൽ എന്നിവർ പ്രസംഗിക്കും. വാദ്യമേളങ്ങളുടെയും പ്ലോട്ടുകളുടെയും അകമ്പടിയോടെ നടക്കുന്ന റാലിയിൽ നൂറുകണക്കിന് യുവജനങ്ങൾ പങ്കെടുക്കും.

വളപട്ടണത്ത് റെയിൽവേ ട്രാക്കിൽ കോൺക്രീറ്റ് സ്ലാബ്

കണ്ണൂർ: വളപട്ടണത്ത് റെയിൽവേ ട്രാക്കിൽ കോൺക്രീറ്റ് സ്ലാബ് കണ്ടെത്തി. സംഭവത്തിൽ പോലീസും ആർപിഎഫും അന്വേഷണം ഊർജിതമാക്കി. ഇന്നലെ പുലർച്ചെ രണ്ടോടെയാണു സംഭവം. കൊച്ചുവേളിയിൽനിന്നു ഭാവ്നഗറിലേക്കു പോകുന്ന ട്രെയിൻ കടന്നുപോകുന്ന സമയത്താണ് കോൺക്രീറ്റ് സ്ലാബ് കണ്ടെത്തിയത്. സ്ലാബിന് മുകളിൽ കയറി ട്രെയിൻ കുലുങ്ങുകയായിരുന്നു. ട്രെയിൻ നിർത്തി പരിശോധിച്ചപ്പോഴാണ് കോൺക്രീറ്റ് സ്ലാബാണെന്ന് മനസിലായത്. റെയിൽവേ അറ്റകുറ്റപ്പണികൾക്കായി റെയിൽവേ സ്റ്റേഷനിൽ സൂക്ഷിച്ച നമ്പർ പതിച്ച സ്ലാബാണു ട്രാക്കിൽ കണ്ടെത്തിയത്. വളപട്ടണം റെയിൽവേ സ്റ്റേഷനിൽനിന്ന് 50 മീറ്റർ മാറിയാണു ട്രാക്കിൽ കോൺക്രീറ്റ് സ്ലാബ് കണ്ടെത്തിയത്. സംഭവം നടന്ന ഉടൻ റെയിൽവേ പോലീസും വളപട്ടണം പോലീസും സ്ഥലത്തെത്തി പരിശോധന നടത്തി. സമീപത്തെ സിസിടിവികളടക്കം പോലീസ് പരിശോധിക്കുന്നുണ്ട്.

മട്ടന്നൂരിലും സുരക്ഷാക്രമീകരണം

മട്ടന്നൂർ: കേന്ദ്ര ആഭ്യന്തര മന്ത്രി അമിത് ഷാ കണ്ണൂരിലെത്തുന്നതിന്‍റെ ഭാഗമായി ഇന്ന് മട്ടന്നൂരിലും പരിസരങ്ങളിലും കനത്ത സുരക്ഷ. കണ്ണൂർ സിറ്റി പോലീസ് കമ്മീഷണർ നിധിൻ രാജ് ഐപിഎസിന്‍റെ നേതൃത്വത്തിൽ മട്ടന്നൂരിൽ ഉന്നതതല യോഗം ചേർന്നു. സംസ്ഥാനത്തെ വിവിധയിടങ്ങളിൽ നിന്നായി ആയിരത്തിലധികം പോലീസുകാരാണ് സുരക്ഷയ്ക്കായി എത്തുന്നത്. വൈകുന്നേരം നാലിനാണ് കേന്ദ്ര ആഭ്യന്തര മന്ത്രി അമിത് ഷാ കണ്ണൂർ വിമാനത്താവളത്തിലെത്തുന്നത്. വിമാനത്താവളത്തിലെത്തുന്ന അമിത് ഷായ്ക്ക് ബിജെപി കണ്ണൂർ സൗത്ത് ജില്ലാ കമ്മിറ്റിയുടെ നേതൃ ത്വത്തിൽ സ്വീകരണം നൽകും. തുടർന്നു റോഡ് മാർഗം അമിത് ഷാ തളിപ്പറമ്പ് രാജരാജേശ്വര ക്ഷേത്ര ദർശനത്തിനായി പോകും. സുരക്ഷയുടെ ഭാഗമായി കണ്ണൂർ സിറ്റി പോലീസ് കമ്മീഷണർ നിധിൻ രാജിന്‍റെ നേതൃത്വത്തിൽ മട്ടന്നൂർ റൂറൽ ബാങ്ക് ഓഡിറ്റോറിയത്തിൽ ഉന്നതതല യോഗം ചേർന്നു. കണ്ണൂർ, കാസർഗോഡ്, കോഴിക്കോട് ജില്ലകളിലെ അഡീഷണൽ കമ്മീഷണർമാർ, എഎസ്പിമാർ, ഡിവൈഎസ്പിമാർ ഇൻസ്പെക്ടർമാർ തുടങ്ങിയവരുടെ യോഗമാണ് നടന്നത്. ഇന്നു രാവിലെ പത്തിന് മട്ടന്നൂരിൽ പോലീസുകാരുടെ യോഗവും വിളിച്ചു ചേർത്തിട്ടുണ്ട്.

വിമാനത്താവള ചുറ്റളവിലും തളിപ്പറന്പ് താലൂക്കിലും ഡ്രോൺ നിരോധനം

കണ്ണൂർ/തളിപ്പറന്പ്: കണ്ണൂർ വിമാനത്താവളത്തിന്‍റെ അഞ്ചുകിലോ മീറ്റർ ചുറ്റളവിൽ ഇന്നലെ മ ുതൽ മൂന്നുദിവസത്തേക്ക് ഡ്രോൺ, പാരാ ഗ്ലൈഡർ, ഹോട്ട് എയർ ബലൂണുകൾ, മറ്റേതെങ്കിലും ആളില്ലാത്ത വ്യോമ വാഹനങ്ങൾ എന്നിവ ഉപയോഗിക്കുന്നത് നിരോധിച്ച് ജില്ലാ കളക്ടർ അരുൺ കെ.വിജയൻ ഉത്തരവിട്ടു. വിമാനങ്ങൾ ഇറങ്ങുന്നതിനോ പറന്നുയരുന്നതിനോ തടസമാവുന്ന രീതിയിൽ ഇത്തരത്തിൽ ഏതെങ്കിലും പ്രവർത്തനം കണ്ടാൽ അടുത്ത പോലീസ് സ്‌റ്റേഷനിൽ വിവരം അറിയിക്കണം. ഭാരതീയ നാഗരിക് സുരക്ഷ സംഹിത 2023 പ്രകാരമാണ് ജില്ലാ കളക്ടറുടെ ഉത്തരവ്‌. തളിപ്പറന്പ് താലൂക്കിലും ഇന്നലെ മുതൽ മൂന്നുദിവസത്തേക്ക് ഡ്രോൺ, ആളില്ലാത്ത വ്യോമ വാഹനങ്ങൾ എന്നിവ ഉപയോഗിക്കുന്നത് നിരോധിച്ചുകൊണ്ട് കളക്ടർ ഉത്തരവിറക്കി. പോലീസ്, പാരാമിലിറ്ററി, എയർഫോഴ്‌സ്‌, എസ്പിജി തുടങ്ങിയവയ്ക്ക് നിരോധനം ബാധകമല്ല.

അമിത്ഷായുടെ സന്ദർശനം ഇന്ന്: തളിപ്പറന്പിൽ കനത്ത സുരക്ഷ

തളിപ്പറമ്പ്: കേന്ദ്ര ആഭ്യന്തര മന്ത്രി അമിത് ഷാ രാജരാജേശ്വര ക്ഷേത്രദർശനത്തിനെത്തുന്ന പശ്ചാത്തലത്തിൽ തളിപ്പറന്പിൽ കനത്ത സുരക്ഷാ ക്രമീകരങ്ങൾ ഏർപ്പെടുത്തി. ദേശീയ സുരക്ഷാ ഗാർഡിന്‍റെ നിർദേശങ്ങൾക്കനുസൃതമായ സുരക്ഷയാണ് ഒരുക്കിയത്. അമിത് ഷാ ക്ഷേത്രദർശനം നടത്തി തിരിച്ചുപോകുന്നതുവരെ ക്ഷേത്രത്തിൽ മറ്റാർക്കും പ്രവേശനമുണ്ടാകില്ല. മന്ത്രിക്കൊപ്പം ചുരുക്കം പാർട്ടി പ്രവർത്തകരെ മാത്രമേ സഞ്ചരിക്കാൻ അനുവദിക്കുകയുള്ളൂ. ക്ഷേത്രത്തിനകത്തേക്ക് മന്ത്രിക്കൊപ്പം അഞ്ചുപേരെ മാത്രമേ കടത്തി വിടുകയുള്ളൂ. ക്ഷേത്രത്തിലേക്കുള്ള റോഡ് ഇടുങ്ങിയത് ആയതിനാൽ ഇവിടെയും ഗതാഗതനിയന്ത്രണം ഏർപ്പെടുത്തിയിട്ടുണ്ട്. സുരക്ഷയുടെ ഭാഗമായി ക്ഷേത്ര കവാടത്തിന് സമീപത്തെ മരങ്ങൾ മുറിച്ചുനീക്കി. മന്ത്രിയുടെ യാത്രാ വഴികളിലൂടെ ഇന്നലെ ട്രയൽ റൺ നടത്തി. മന്ത്രി വിശ്രമിക്കുന്ന ക്ഷേത്രം പ്രസിഡന്‍റിന്‍റെ മുറിയും പരിസരവും ദേശീയ സുരക്ഷാ ഉദ്യോഗസ്ഥരും ഉന്നത പോലീസ് ഉദ്യോഗസ്ഥരും പരിശോധിച്ചു. പോലീസ് കാവലും ഏർപ്പെടുത്തി. സുരക്ഷാ ക്രമീകരണങ്ങളുടെ ഭാഗമായി എഡിജിപി, ഐജി റാങ്കിലുള്ള പോലീസുദ്യോഗസ്ഥർ തളിപ്പറന്പിലെത്തി. തളിപ്പറമ്പിലെത്തുന്ന മന്ത്രിയെ ബിജെപി കണ്ണൂർ നോർത്ത് കമ്മിറ്റി പുഷ്പവൃഷ്ടി നടത്തിയാകും സ്വീകരിക്കുക. ടാക്സി സ്റ്റാൻഡ് പരിസരത്ത് ബാരിക്കേഡ് സംവിധാനം സ്ഥാപിച്ചു. ക്ഷേത്രത്തിലെത്തുന്ന അമിത് ഷാ പ്രധാന വഴിപാടായ പൊന്നിൻകുടം സമർപ്പിച്ച് തൊഴും. നെയ്യമൃത് വഴിപാടുകളും നടത്തുമെന്നാണ് വിവരം. ഇത് മൂന്നാം തവണയാണ് അമിത്ഷാ തളിപ്പറന്പ് രാജരാജേശ്വര ക്ഷേത്രത്തിലെത്തുന്നത്.

സ്ഥലം കൊടുക്കുന്നവർക്ക് തുച്ഛമായ നഷ്‌ടപരിഹാരം

ഇരിട്ടി: വയനാട്-കരിന്തളം 400 കെവി ലൈനിന്‍റെ നഷ്ടപരിഹാര തുകയും ഭൂമി നഷ്ടപ്പെടുന്നവരുടെ യഥാർഥനഷ്ടവും കണക്കാക്കുമ്പോൾ മറ്റൊരു കുടിയിറക്കിന് സമാനമായ സാഹചര്യമാണ് നിലനിൽക്കുന്നത്. ലൈൻ കടന്നുപോകുന്നതിൽ ഏറ്റവുമധികം നഷ്ടം നേരിടുന്ന പഞ്ചായത്തുകളിലൊന്നായ അയ്യൻകുന്നിൽ നൂറു കണക്കിന് കർഷകരുടെ കൃഷിഭൂമിയും വീടുകളുമാണ് നഷ്ടപ്പെടുന്നത്. നഷ്ടപരിഹാരം സംബന്ധിച്ചുള്ള കണക്കെടുപ്പിന്‍റെ ഭാഗമായി നടത്തിയ സർവേയിലാണ് നഷ്ടത്തിന്‍റെ യഥാർഥ കണക്കുകൾ വെളിയിൽ വരുന്നത്. ഉഷയുടെ വീടും സ്ഥലവും ലൈനിന് അടിയിൽ അയ്യൻകുന്ന് പഞ്ചായത്തിലെ കമ്പിനിനിരത്തെ പുല്ലോപടത്തിൽ ഉഷയുടെ ഒരു ആയുസിന്‍റെ സമ്പാദ്യമായ വീടും സ്ഥലവും ലൈനിന് അടിയിൽ വരുമ്പോൾ കെഎസ്ഇബി നിശ്ചയിച്ച വില രണ്ടര ലക്ഷം രൂപയാണ്. 30 വർഷത്തിൽ അധികമായി ഇവിടെ താമസിച്ചു വന്നിരുന്ന ഇവർ അഞ്ചുവർഷം മുന്പാണ് ലോൺ എടുത്ത് വീട് നിർമിച്ചത്. പട്ടാളക്കാരനായ മകന്‍റെ വരുമാനത്തെ മാത്രം ആശ്രയിച്ചു ജീവിക്കുന്ന ഉഷയും മകന്‍റെ ഭാര്യയും രണ്ട് കൊച്ചു കുട്ടികളുമുള്ള കുടുംബം എന്തുചെയ്യണമെന്നറിയാതെ പകച്ചു നിൽക്കുകയാണ്. ലോണും മറ്റ് ചികിത്സാ ചെലവുകളുമായി രണ്ടറ്റം കൂട്ടിമുട്ടിക്കാൻ കഴിയാതെ ബുദ്ധിമുട്ടുന്ന കുടുംബത്തിന് ഇരുട്ടടിയാണ് 400 കെവി ലൈൻ. കെഎസ്ഇബിയുടെ പ്ലാനിൽ ഇങ്ങനെയൊരു വീട് അടയാളപ്പെടുത്തിയിട്ടില്ല. ലോൺ അടവ് മുടങ്ങിയതോടെ ജപ്തി നടപടികളുമായി എത്തിയ ബാങ്ക് അധികൃതരിൽ നിന്ന് അവധി നീട്ടിവാങ്ങിയാണ് കുടുംബം ജീവിതം തള്ളിനീക്കുന്നത്. വീടും സ്ഥലവും വിറ്റ് കടം തീർക്കാനായി നടത്തിയ ശ്രമവും കെഎസ്ഇ ബിയുടെ ചതിയിൽ മാറിപ്പോയി. 18 ലക്ഷം രൂപയ്ക്ക് കച്ചവടം ഉറപ്പിച്ചിരുന്ന വീടാണ് ലൈൻ വരുന്ന വിവരം അറിഞ്ഞതോടെ അവസാന നിമിഷം ഇടപാടുകാർ ഒഴിവായി പോയത്. വീടുകൾക്ക് മുകളിലൂടെ ലൈൻ കടന്നുപോയാൽ കുഴപ്പമില്ലെന്ന് കെഎസ്ഇബി അധികൃതർ പറയുമ്പോഴും ആകെയുള്ള സമ്പാദ്യമായ വീടിനും സ്ഥലത്തിനും വില ലഭിക്കാതെ കുടുംബം നിസഹായരായി നിൽക്കുകയാണ്. വീടിന് രണ്ടുലക്ഷം രൂപ മന്ത്രി പ്രഖ്യാപിച്ചിട്ടുണ്ടെങ്കിലും നാലരലക്ഷം രൂപക്ക് ലോൺ പോലും അടച്ചുതീർക്കാൻ കഴിയില്ലെന്ന് ഉഷയുടെ മരുമകൾ പ്രീഷ്ണ പറയുന്നു. മാത്രമല്ല, കെഎസ്ഇബിയുടെ അലൈൻമെന്‍റ് ലിസ്റ്റിൽ വീട് അടയാളപ്പെടുത്താത്തതും മറ്റൊരു പ്രശനമായി അവശേഷിക്കുന്നു . നെടുമ്പുറത്ത് ഏലിക്കുട്ടിക്ക് നഷ്ടം വീടും മൂന്നരയേക്കറും അയ്യൻകുന്ന് പഞ്ചായത്തിലെ നെടുമ്പുറത്ത് ഏലിക്കുട്ടിയുടെ പഴയ തറവാട് വീടിന്‍റെ പകുതി ഭാഗത്തിന് മുകളിലൂടെയാണ് ലൈൻ കടന്നുപോകുന്നത്. കൂടാതെ മക്കളുടെ പേരിൽ ഉൾപ്പെടെ വരുന്ന മൂന്നരയേക്കർ കൃഷി സ്ഥലവും പദ്ധതിയിൽ ഉൾപ്പെടുന്നുണ്ട്. ഒന്നരക്കോടിയിൽ അധികം വിലവരുന്ന സ്ഥലത്തിന് സർക്കാർ നഷ്‌ടപരിഹാര കണക്കനുസരിച്ച് ലഭിക്കുന്നത് 65 ലക്ഷം രൂപ മാത്രമാണ്. പൂർണമായും കൃഷിയെ ആശ്രയിച്ച് ജീവിക്കുന്ന കുടുംബത്തിന് നഷ്ടപ്പെടുന്നത് വരുമാന മാർഗങ്ങൾ ആയിരുന്ന 350 റബറും 40 ഓളം തെങ്ങും 50 ൽ അധികം കശുമാവുമാണ്. ഭൂമിക്ക് ന്യായമായ വില നൽകിയാൽ വിട്ടുനൽകാൻ കർഷകർ തയാറാണെങ്കിലും നഷ്ടം കണക്കാക്കുന്നതിൽ കെഎസ്ഇബിയും സർക്കാരും ഏകപക്ഷീയമായ നിലപാടാണ് സ്വീകരിക്കുന്നതെന്നാണ് വീട്ടുകാർ പറയുന്നത്. വീടും സ്ഥലവും നഷ്‌ടമാകുന്ന കമ്പിനിനിരത്തെ പുല്ലോപടത്തിൽ ഉഷ, നെടുമ്പുറത്ത് ഏലിക്കുട്ടി തുടങ്ങി കർഷകരുടെ വീടുകൾ പഞ്ചായത്ത പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ, സ്റ്റാൻഡിംഗ് കമ്മിറ്റി ചെയർമാൻമാരായ ഐസക് ജോസഫ്, സിന്ധു ബെന്നി, പഞ്ചായത്തംഗങ്ങളായ ലിസി തോമസ്, സജി മച്ചിത്താന്നി, കർമസമിതി കൺവീനർ ബെന്നി പുതിയാമ്പുറം, ജോർജ് മുടയരഞ്ഞി എന്നിവർ സന്ദർശിച്ചു. ന്യായമായ വില ലഭിക്കും വരെ ഭൂമി വിട്ടുനൽകില്ല കർഷകന്‍റെ കൃഷിഭൂമിക്കും വീടുകൾക്കും ഞങ്ങൾ ആവശ്യപ്പെടുന്നത് കർഷകന്‍റെ വിയർപ്പിന്‍റെ വിലയാണ്. അത് ലഭിക്കുന്നതുവരെ യാതൊരു വിട്ടുവീഴ്ചയും ഇല്ലാതെ സമരമുഖത്ത് തന്നെ ഉണ്ടാവും. പല സ്ഥലങ്ങളിലും അലൈൻമെന്‍റ് ഉൾപ്പെടെ മാറ്റം വരുത്തിയാൽ കർഷകരുടെ നഷ്ടം പകുതിയായി കുറയും. ഇതിനൊന്നും വഴങ്ങാത്ത ബോർഡിന്‍റെ പിടിവാശിയാണ് പദ്ധതി വൈകാൻ കാരണം. കർഷകരുടെ ആവശ്യങ്ങൾ അംഗീകരിക്കാതെ അയ്യൻകുന്ന് പഞ്ചായത്തിലെ ഒരു സ്ഥലത്തും പ്രവൃത്തി നടത്താൻ അനുവദിക്കില്ല. -കുര്യാച്ചൻ പൈമ്പള്ളിക്കുന്നേൽ (അയ്യൻകുന്ന് പഞ്ചായത്ത് പ്രസിഡന്‍റ്)

എസ്എഫ്ഐ ഹെഡ് പോസ്റ്റ് ഓഫീസ് മാർച്ചിൽ ഉന്തും തള്ളും

കണ്ണൂർ: കേരളത്തിലെ ഉന്നത വിദ്യാഭ്യാസ സ്ഥാപനങ്ങളെ കാവിവത്കരിക്കാനുള്ള ഗവർണറുടെ നടപടികൾ അവസാനിപ്പിക്കുക എന്നാവശ്യപ്പെട്ട് എസ്എഫ്ഐ കണ്ണൂർ ഹെഡ് പോസ്റ്റ് ഓഫീസിലേക്ക് നടത്തിയ മാർച്ചിൽ പോലീസും സമരക്കാരും തമ്മിൽ സംഘർഷം. മാർച്ച് പോലീസ് ഹെഡ് പോസ്റ്റ് ഓഫീസ് ഗേറ്റ് അടച്ച് തടഞ്ഞെങ്കിലും സമരക്കാർ പോലീസിനെ മറികടന്ന് ഓഫീസിലേക്ക് കടക്കാൻ ശ്രമിച്ചതാണ് ഉന്തിലും തള്ളിലും കലാശിച്ചത്. പോലീസ് വലയം ഭേദിച്ച് സമരക്കാർ ഹെഡ് പോസ്റ്റ് ഓഫീസ് വളപ്പിലേക്ക് കടന്നെങ്കിലും നേതാക്കളുൾപ്പടെയുള്ളവർ സമരക്കാരെ പിന്തിരിപ്പിച്ചു. തുടർന്ന് എസ്എഫ്ഐ സംസ്ഥാന സെക്രട്ടേറിയറ്റംഗം ടി.പി. അഖില ഉദ്ഘാടനം ചെയ്തു. കേരളത്തിലെ സർവകലാശാലകളെ കാവിവത്കരിക്കാനായി ആർഎസ്എസും ബിജെപിയും ഗവർണറെയും വൈസ് ചാൻസലർമാരെയും ഉപയോഗപ്പെടുത്തുകയാണ്. ഇതിനെ എസ്എഫ്ഐ പ്രതിരോധിക്കുമെന്ന് ടി.പി. അഖില പറഞ്ഞു.

അന്നം അഭിമാനം പദ്ധതിയിലേക്ക് ഒരു ദിവസത്തെ ഭക്ഷണം കൈമാറി

ഇരിട്ടി: ഇരിട്ടി പോലീസും ജെസിഐ ഇരിട്ടിയും സംയുക്തമായി നടത്തിവരുന്ന "വിശപ്പുരഹിത ഇരിട്ടി- അന്നം അഭിമാനം' പദ്ധതിക്ക് ഒരു ദിവസത്തെ ഭക്ഷണം കൈമാറി. ഷീല ഏബ്രഹാമിന്‍റെ രണ്ടാം ചരമ വാർഷികംദിനത്തിൽ മകൻ ജെയിൻ ഏബ്രഹാം ഇരിട്ടി എസ്ഐ കെ. ഷറഫുദ്ദീൻ, അനോജ് ജോയ് എന്നിവർക്ക് ഭക്ഷണം കൈമാറി. രണ്ടുവർഷമായി ഇരിട്ടിയിൽ പ്രവർത്തിച്ചുവരുന്ന അന്നം അഭിമാനം പദ്ധതി ഇരിട്ടിക്ക് അഭിമാനമായി മാറുകയാണ്. ദിനം പ്രതി 15 ഓളം പേർക്കാണു മുടങ്ങാതെ ഭക്ഷണം നൽകി വരുന്നത്. പദ്ധതി കമ്മിറ്റി അംഗങ്ങളായ കെ. സുരേഷ് ബാബു, ഡോ. ജി. ശിവരാമകൃഷ്ണൻ, കെയർ ടേക്കർ സജീഷ് പുത്തൻപുരയിൽ എന്നിവർ പങ്കെടുത്തു.

കുരുക്കഴിഞ്ഞില്ല, കൂടുതൽ കുടുക്കിലായി

കണ്ണൂർ: ഗതാഗതക്കുരുക്കഴിക്കാൻ തെക്കിബസാർ-കക്കാട് ജംഗ്ഷൻ വൺവേയാക്കിയെങ്കിലും കുരുക്കഴിക്കാൻ സാധിച്ചില്ല. പതിവിലും കൂടുതൽ ബ്ലോക്കാണ് ഇന്നലെ അനുഭവപ്പെട്ടത്. പരീക്ഷണാടിസ്ഥാനത്തിലുള്ള ഗതാഗതക്രമീകരണം ചൊവ്വാഴ്ച മുതലാണ് നടപ്പിലാക്കിയത്. എന്നാൽ, സ്വകാര്യബസുകളുടെ പണിമുടക്ക് കാരണം അന്ന് വലിയ തിരക്കുണ്ടായിരുന്നില്ല. ഇന്നലെ ബസുകളും കൂടി നിരത്തിലിറങ്ങിയതോടെ വലിയ ഗതാഗതക്കുരുക്കാണ് അനുഭവപ്പെട്ടത്. കണ്ണൂർ ഭാഗത്ത് നിന്ന് കക്കാട് ഭാഗത്തേക്ക് പോകുന്ന വാഹനങ്ങൾക്ക് നിലവിലെ ജംഗ്ഷനിൽ നിന്ന് നേരിട്ട് കക്കാട് റോഡിലേക്കുള്ള പ്രവേശനം തടഞ്ഞിരുന്നു. ഇതിനു പകരം നിലവിലെ ജംഗ്ഷനിൽ നിന്ന് നൂറുമീറ്റർ മുന്നോട്ടു പോയി വലതുഭാഗത്ത് തിരിഞ്ഞ് കക്കാടേക്ക് പോകുന്ന റോഡിലൂടെ കടന്നു പോകണം. ഇവിടെ, ബസുകൾ ഉൾപ്പെടെയുള്ള വാഹനങ്ങൾ തിരിയുന്പോൾ വലിയ കുരുക്കാണ് അനുഭവപ്പെടുന്നത്. പുതിയതെരു ഭാഗത്ത് നിന്ന് കക്കാടേക്ക് പോകേണ്ട വാഹനങ്ങളും ഇതു വഴിയാണ് കടന്നു പോകേണ്ടത്. കക്കാട് ഭാഗത്ത് നിന്ന് കണ്ണൂരിലേക്ക് വരുന്ന വാഹനങ്ങളെ നിലവിലെ റോഡിലൂടെ തന്നെയാണ് കടത്തിവിടുന്നത്. കക്കാട് നിന്ന് തളിപ്പറന്പ് ഭാഗത്തേക്ക് പോകേണ്ട വാഹനങ്ങളെ ജംഗ്ഷനിൽ നിന്ന് യുടേൺ എടുത്ത് തളിപ്പറന്പ് ഭാഗത്തേക്ക് കടത്തി വിടില്ല. വാഹനങ്ങൾ നേരെ ഗാന്ധി സർക്കിൾ ചുറ്റി ദേശീയപാതയിലൂടെ തന്നെയോ കടന്നുപോകണം. പരീക്ഷണാടിസ്ഥാനത്തിൽ നടപ്പാക്കുന്ന ക്രമീകരണം വിലയിരുത്തിയ ശേഷമായിരിക്കും സ്ഥിരം നടപടികളിലേക്ക് കടക്കുകയെന്ന് ട്രാഫിക് പോലീസ് അറിയിച്ചു.

കാടുകയറുന്ന കായിക സ്വപ്നം

മഞ്ഞളാംപുറം: കേളകം പഞ്ചായത്തിലെ മഞ്ഞളാംപുറത്ത് നിര്‍മിച്ച മള്‍ട്ടി പര്‍പ്പസ് സിന്തറ്റിക്ക് സ്റ്റേഡിയത്തോട് അവഗണ. 30 ലക്ഷം രൂപ ചെലവില്‍ നിര്‍മിച്ച സിന്തറ്റിക്ക് സ്‌റ്റേഡിയം ആരും തിരിഞ്ഞ് നോക്കാന്‍ ഇല്ലാതെ വന്നതോടെ എതാണ്ട് പൂര്‍ണമായി നശിച്ചു. മലയോരത്തെ കായിക പ്രതിഭകള്‍ക്ക് ഉപകാരപ്രദമാകേണ്ട സ്‌റ്റേഡിയമാണ് നശിച്ചത്. സ്‌റ്റേഡിയം നവീകരിക്കുന്നതിന് യാതൊരു നടപടിയും ഉണ്ടാകുന്നില്ല. ഇപ്പോള്‍ സ്റ്റേഡിയത്തിന്‍റെ സ്ഥിതി പരിതാപകരമാണ്. സ്‌റ്റേഡിയം പൂര്‍ണമായും കാട് കയറിയ നിലയിലാണ്. സ്റ്റേഡിയത്തിന് ചുറ്റം ഉണ്ടായിരുന്ന വേലികള്‍ പൂര്‍ണമായി തകര്‍ന്നു. വേലിയുടെ തൂണുകള്‍ മാത്രമാണ് ബാക്കിയുളളത്. തൂണുകളും തുരുമ്പെടുത്തു. കൃത്യമായ പരിപാലം നടത്താതെ വന്നതോടെ സ്റ്റേഡിയത്തിലെ സിന്തറ്റിക്ക് പ്രതലം പൂര്‍ണമായി നശിച്ചു. ബാസ്‌ക്കറ്റ് ബോള്‍ പോളും തുരുമ്പെടുത്തു. രാത്രിയില്‍ മത്സരങ്ങളും പരിശീലനവും നടത്തുന്നതിനായി ചുറ്റം ലൈറ്റുകള്‍ സ്ഥാപിച്ചിരുന്നു. ഇതും നശിക്കുകയാണ്. കേന്ദ്രസര്‍ക്കാര്‍ അനുവദിച്ച ഫണ്ട് ഉപയോഗിച്ച് സംസ്ഥാന കായിക വകുപ്പാണ് സ്റ്റേഡിയം നിര്‍മിച്ചത്. 2015ല്‍ ഉമ്മന്‍ ചാണ്ടി സര്‍ക്കാരിന്‍റെ കാലത്ത് അന്നത്തെ കായിക മന്ത്രി തിരുവഞ്ചൂര്‍ രാധാകൃഷ്ണനാണ് സ്റ്റേഡിയം ഉദ്ഘാടനം ചെയ്തത്. എന്നാല്‍, പിന്നീട് വേണ്ട രീതിയില്‍ ഉപയോഗിക്കുകയോ പരിപാലിക്കുകയോ ചെയ്തില്ല. അതോടെ സ്‌റ്റേഡിയം നശിക്കുകയായിരുന്നു. ഫണ്ട് ഇല്ലാത്തതുകൊണ്ടാണ് സ്റ്റേഡിയം നവീകരിക്കാന്‍ സാധിക്കാത്തത് എന്ന് പഞ്ചായത്തംഗം ജോണി പാമ്പാടി പറഞ്ഞു. മള്‍ട്ടി പര്‍പ്പസ് സിന്തറ്റിക്ക് സ്റ്റേഡിയം വേണ്ട രീതിയില്‍ നവീകരിച്ചാല്‍ കുട്ടികള്‍ക്കും കായികതാരങ്ങള്‍ക്ക് പരിശീലനം നടത്താനും മത്സരങ്ങള്‍ സംഘടിപ്പിക്കാനും സാധിക്കും. എന്നാല്‍, കായിക വകുപ്പ് പോലും സ്റ്റേഡിയത്തെ മറന്ന നിലയിലാണ്.

ന്യായമായ നഷ്ടപരിഹാരം ഇല്ലെങ്കിൽ പ്രക്ഷോഭം ശക്തമാക്കാൻ കർഷകരും ഭൂവുടമകളും

ഇരിട്ടി: നിർദിഷ്ട 400 കെവി ലൈൻ നഷ്ടപരിഹാര പാക്കേജുമായി ബന്ധപ്പെട്ട് സമരസമിതിയുടെ ആവശ്യങ്ങൾ പരിഗണിക്കാതെ ഏകപഷീയമായ പാക്കേജ് പ്രഖ്യാപനത്തിന് എതിരെ ഭൂമി നഷ്ടപ്പടുന്ന കർഷകർ ശക്തമായ പ്രക്ഷോഭത്തിലേക്ക്. അയ്യൻകുന്ന് പഞ്ചായത്തിൽ ചേർന്ന കർഷകരും ഭൂവുടമകളും സമരപരിപാടികൾ ആസൂത്രണം ചെയ്യുന്നതിനായി യോഗം ചേർന്നു. വൈദ്യുത മന്ത്രി പ്രഖ്യാപിച്ചിരിക്കുന്ന നഷ്ടപരിഹാര പാക്കേജ് അംഗീകരിക്കില്ലെന്നും ന്യായമായ വില ലഭിക്കുന്നതുവരെ സമരവുമായി മുന്നോട്ടുപോകുമെന്നും യോഗം ഏകകണ്ഠമായി പ്രഖ്യാപിച്ചു. പഞ്ചായത്ത് പ്രസിഡന്‍റ് കുര്യാച്ചൻ പൈന്പള്ളിക്കുന്നേൽ അധ്യക്ഷത വഹിച്ചു. പഞ്ചായത്ത്തലത്തിൽ യോഗം വിളിച്ചു ചേർക്കാനും ഭൂമി നഷ്ടപ്പെടുന്ന മുഴുവൻ പേരെയും അണിനിരത്തി ജില്ലാ ആസ്ഥാനത്തേക്ക് ബഹുജന സമരപരിപാടികൾ സംഘടിപ്പിക്കാൻ തീരുമാനിച്ചു. ന്യയമായ വില ലഭിക്കാതെ ഭൂമിയിൽ പ്രവേശിക്കാൻ അധികൃതരെ അനുവദിക്കില്ലെന്ന് യോഗം മുന്നറിയിപ്പ് നൽകി. ‌വില നിർണയത്തിലെ അപാകതകൾ ചൂണ്ടിക്കാണിച്ച യോഗം നാലും അഞ്ചും കോടി രൂപ ലഭിക്കേണ്ട ഭൂമിക്ക് നിസാര നഷ്ടപരിഹാരമാണ് നിലവിൽ സർക്കാർ പ്രഖ്യാപിച്ചിരിക്കുന്നതെന്ന് ചൂണ്ടിക്കാട്ടി. പ്രധാന റോഡുകൾ, പഞ്ചായത്ത് റോഡുകൾ എന്നിവ കണക്കാക്കി സ്ഥലത്തിന് പ്രത്യേക നഷ്ടപരിഹാരം നൽകണമെന്നും യോഗം ആവശ്യപ്പെട്ടു. ലൈൻ കടന്നുപോകുന്നതിന് താഴെ വരുന്ന വീടുകൾക്ക് ചതുരശ്ര അടിക്ക് 2500 രൂപ നഷടപരിഹാരം എന്ന ആവശ്യം വീണ്ടും സർക്കാരിൽ ഉന്നയിക്കും. ഇന്നലത്തെ യോഗതീരുമാനങ്ങൾ ഉൾക്കൊള്ളിച്ചുകൊണ്ടുള്ള ജനകീയ പരാതി മന്ത്രിക്കും കളക്ടർക്കും വൈദ്യുതി ബോർഡിനും കൈമാറും. യോഗത്തിൽ ആക്‌ഷൻ കമ്മിറ്റി ചെയർമാൻ തോമസ് വർഗീസ്, പഞ്ചായത്തംഗങ്ങളായ ലിസി തോമസ്, മിനി വിശ്വനാഥൻ, സിബി വാഴക്കാലയിൽ, ആക്‌ഷൻ കമ്മിറ്റി കൺവീനർ ബെന്നി പുതിയാമ്പുറം എന്നിവർ പ്രസംഗിച്ചു.

ഉളിക്കൽ കോളിത്തട്ടിൽ കാട്ടാന കൃഷി നശിപ്പിച്ചു

ഉളിക്കൽ: ഉളിക്കൽ പഞ്ചായത്ത്‌ കോളിത്തട്ട് രണ്ടാംകൈയിൽ കാട്ടാനയിറങ്ങി കാഞ്ഞിരത്തിങ്കൽ ദാസന്‍റെ കൃഷി നശിപ്പിച്ചു. വാഴ, തെങ്ങ്, കവുങ്ങ് തുടങ്ങിയ കൃഷികൾ ആന ചവിട്ടിനശിപ്പിച്ചു. പ്രദേശത്ത് ആദ്യമായാണ് കാട്ടാന എത്തുന്നതെന്നു പ്രദേശവാസികൾ പറയുന്നു. കഴിഞ്ഞദിവസം രാത്രിയായിരുന്നു സംഭവം. രാത്രിയിൽ ശക്തമായ മഴ പെയ്തതുകൊണ്ട് ശബ്ദം ഒന്നും കേട്ടില്ലെന്നാണ് ദാസൻ പറയുന്നത്. കർണാടക വനത്തിൽ നിന്നെത്തിയ ആനയാണെന്നാണ് കരുതുന്നത്. ഉളിക്കൽ പഞ്ചായത്ത്‌ പ്രസിഡന്‍റും ഭരണസമിതി അംഗങ്ങളും വനം വകുപ്പ് അധികൃതരും സ്ഥലത്തെത്തി പരിശോധന നടത്തി. ജനവാസമേഖലയിൽ കാട്ടാന ഇറങ്ങി കർഷകർക്ക് ഭീഷണിയാകുന്നത് തടയാനുള്ള നടപടി വനം വകുപ്പിന്‍റെ ഭാഗത്തുനിന്നുണ്ടാകണമെന്ന് പഞ്ചായത്ത് പ്രസിഡന്‍റ് പി.സി. ഷാജി ആവശ്യപ്പെട്ടു. ഉളിക്കൽ പഞ്ചായത്തിലും പായം പഞ്ചായത്തിലും കാട്ടാന ഇറങ്ങി വിലപ്പെട്ട രണ്ടു ജീവനുകളുമാണ് ചവിട്ടി മെതിച്ചത്. ഇനിയൊരു അപകടം സംഭവിക്കാതിരിക്കാൻ അധികൃതർ ജാഗ്രത പാലിക്കണമെന്നും രണ്ടു വർഷമായി മുടങ്ങിക്കിടക്കുന്ന കർഷകരുടെ നഷ്ടപരിഹാരം അടിയന്തരമായി കൈമാറണമെന്നും പ്രസിഡന്‍റ് ആവശ്യപ്പെട്ടു.

ഇന്‍റർ ഹയർ സെക്കൻഡറി ക്വിസ്: ശ്രീകണ്ഠപുരം ഗവ. ഹയർ സെക്കൻഡറി ജേതാക്കൾ

പയ്യാവൂർ: പൈസക്കരി ദേവമാതാ ആർട്സ് ആൻഡ് സയൻസ് കോളജ് കൊമേഴ്സ് വിഭാഗം ഹയർസെക്കൻഡറി സ്കൂൾ വിദ്യാർഥികൾക്കായി സംഘടിപ്പിച്ച ബിസിനസ് ക്വിസ് മത്സരത്തിൽ ശ്രീകണ്ഠപുരം ഗവ. ഹയർ സെക്കൻഡറി സ്കൂൾ ജേതാക്കൾ. ചെന്പേരി നിർമല, പൈസക്കരി ദേവമാതാ സ്കൂളുകൾ യഥാക്രമം രണ്ടും മൂന്നും സ്ഥാനം നേടി. ജില്ലയിലെ വിവിധ സ്കൂളുകളിൽ നിന്നായി പതിനൊന്ന് ടീമുകൾ മത്സരിച്ചു. കോളജ് സെമിനാർ ഹാളിൽ നടന്ന മത്സരം പ്രിൻസിപ്പൽ ഡോ. എം.ജെ. മാത്യു ഉദ്ഘാടനം ചെയ്തു. അധ്യാപകരായ സിബിച്ചൻ തോമസ്, സൗമ്യ മാനുവൽ, മോനിഷ മോഹൻദാസ്, വിദ്യാർഥിനി നിജ ഫാത്തിമ എന്നിവർ നേതൃത്വം നൽകി. സമാപന സമ്മേളനത്തിൽ കോളജ് മാനേജർ ഫാ. നോബിൾ ഓണംകുളം വിജയികൾക്ക് കാഷ് അവാർഡും സർട്ടിഫിക്കറ്റുകളും സമ്മാനിച്ചു. കൊമേഴ്സ് വിഭാഗം മേധാവി പി.എസ്. ഷൈജോ, കോ-ഓർഡിനേറ്റർ മനു ജോസഫ് എന്നിവർ പ്രസംഗിച്ചു.

പ്രവാസികൾക്കായി സംരംഭകത്വ ശില്പശാല സംഘടിപ്പിച്ചു

കണ്ണൂർ: നോർക്കാ റൂട്ട്സിന്‍റെയും സെന്‍റർ ഫോർ മാനേജ്‌മെന്‍റ് ഡവലപ്‌മെന്‍റിന്‍റെയും സംയുക്താഭിമുഖ്യത്തിൽ ജില്ലയിലെ പ്രവാസികൾക്കും തിരിച്ചെത്തിയ പ്രവാസികൾക്കുമായി സംഘടിപ്പിച്ച ഏകദിന സംരംഭകത്വ ശില്പശാല ഡിപിസി ഹാളിൽ നോർക്ക റൂട്ട്‌സ് ജനറൽ മാനേജർ ടി. രശ്മി ഉദ്ഘാടനം ചെയ്തു. തിരിച്ചെത്തിയ പ്രവാസികളുടെ പുനരധിവാസത്തിനായി സംസ്ഥാന സർക്കാർ നോർക്ക റൂട്ട്‌സ് വഴി നടപ്പിലാക്കുന്ന നോർക്ക ഡിപ്പാർട്ട്‌മെന്‍റ് പ്രോജക്ട് ഫോർ റിട്ടേൺഡ് എമിഗ്രന്‍റ്സ് പദ്ധതി (എൻഡിപിആർഇഎം), മറ്റ് പദ്ധതികൾ എന്നിവയെക്കുറിച്ച് സെന്‍റർ ഫോർ മാനേജ്‌മെന്‍റ് ഡവലപ്‌മെന്‍റ് അസോസിയേറ്റ് പ്രഫസർ പി.ജി അനിൽ ക്ലാസെടുത്തു. രണ്ടു വർഷത്തിൽ കൂടുതൽ വിദേശത്ത് ജോലിചെയ്ത് നാട്ടിൽ സ്ഥിരതാമസമാക്കിയ പ്രവാസി മലയാളികൾക്ക് സ്വയംതൊഴിൽ, സംരംഭങ്ങൾ എന്നിവ ആരംഭിക്കുന്നതിനും നിലവിലുള്ളവയുടെ വിപുലീകരണത്തിനും പ്രയോജനപ്പെടുന്നതാണ് എൻഡിപിആർഇഎം പദ്ധതി. 2025-26 വർഷത്തിൽ കേരളത്തിൽ 1500 പുതിയ സംരംഭകരെ സൃഷ്ടിക്കുകയാണ് ഇതിലൂടെ ലക്ഷ്യമിടുന്നത്. സംരംഭങ്ങൾ തെരഞ്ഞെടുക്കുന്നതിനും പദ്ധതി നടപ്പിലാക്കുന്നതിനും ആവശ്യമായ സാമ്പത്തിക, നിയമ, മാനേജ്‌മെന്‍റ് മേഖലകളെ സംബന്ധിച്ചുള്ള മാർഗനിർദേശങ്ങളും കുറഞ്ഞ മൂലധനത്തിൽ നാട്ടിൽ ആരംഭിക്കാൻ കഴിയുന്ന നൂതന ബിസിനസ് ആശയങ്ങളെക്കുറിച്ചും ശില്പശാലയിൽ സംവദിച്ചു. ജില്ലയുടെ വിവിധ ഭാഗങ്ങളിൽ നിന്നായി 125 ലധികം പ്രവാസികൾ പങ്കെടുത്തു. ശില്പശാലയിൽ സെന്‍റർ ഫോർ മാനേജ്‌മെന്‍റ് ഡവലപ്‌മെന്‍റ് പ്രോജക്ട് ഓഫീസർ സ്മിത ചന്ദ്രൻ അധ്യക്ഷത വഹിച്ചു. സിഎംഡി പ്രോജക്ട് ഓഫീസർ ജി. ഷിബു, വി. ഷിജി എന്നിവർ പങ്കെടുത്തു.

ചെങ്കൽ ഖനനം: ബാലേശുഗിരി ആക്‌ഷൻ കമ്മിറ്റി താലൂക്ക് ഓഫീസ് ധർണ നടത്തും

ചപ്പാരപ്പടവ്: കളക്ടറുടെ ഉത്തരവ് മറികടന്ന് മാവിലംപാറയിൽ ചെങ്കൽ ഖനനം നടത്തുന്നതിനെതിരെ ശക്തമായ സമരം ആരംഭിക്കാൻ ബാലേശുഗിരിയിലെ ജനങ്ങൾ തീരുമാനിച്ചു. ചെങ്ങളായി പഞ്ചായത്തിലെ മാവിലം പാറയിൽ നടക്കന്ന ഖനനത്തിന്‍റെ ദുരിതം ചപ്പാരപ്പടവ് പഞ്ചായത്തിലെ ബാലേശുഗിരിയിലെ ജനങ്ങളാണ് അനുഭവിക്കുന്നതെന്ന് സമരപരിപാടികൾ ആലോചിക്കാനായി ചേർന്ന യോഗം ചൂണ്ടിക്കാട്ടി. ഖനനത്തിനെതിരെ പ്രദേശവാസികൾ ബാലേശുഗിരി ആക്‌ഷൻ കമ്മിറ്റി രൂപീകരിച്ചാണ് സമരത്തിനൊരുങ്ങുന്നത്. ആക്‌ഷൻ കമ്മിറ്റി പ്രദേശവാസികൾ നേരിടുന്ന ദുരിതം സംബന്ധിച്ച് കളക്ടർക്ക് നൽകിയ പരാതിയെ തുടർന്ന് കളക്ടർ സ്ഥലം സന്ദർശിച്ചിരുന്നു. തുടർന്നാണ് ഖനനം നിർത്തി വെക്കാൻ ഉത്തരവിട്ടത്. എന്നാൽ, കളക്ടറുടെ ഉത്തരവ് ലംഘിച്ചും ഖനനം നടത്തുകയാണ്. അധികാരികളുടെ ഒത്താശയോടെയാണ് അനധികൃത ഖനനം നടക്കുന്നതെന്ന് യോഗം അഭിപ്രായപ്പെട്ടു. സമരം ശക്തമാക്കുന്നതിന്‍റെ ഭാഗമായി താലൂക്ക് ഓഫീസ് ധർണ ഉൾപ്പെടുയുള്ള സമരപരിപാടികൾക്ക് യോഗം രൂപം നൽകി. യോഗത്തിന് പ്രസിഡന്‍റ് സുനിജ ബാലകൃഷ്ണൻ അധ്യക്ഷത വഹിച്ചു. എ.എൻ. വിനോദ്, വി.വി. നാരായണൻ, മനോജ് ശാസ്താംപടവിൽ, ജോസ് മുടവനാട്ട്, വിൽസൺ കിഴക്കേക്കര, കെ.വി. അരുൺ ബാബു, ജോബി കിഴക്കേക്കര, ടോം എടാട്ടേൽ എന്നിവർ പ്രസംഗിച്ചു.

വൈഎംസിഎ ഭാരവാഹികൾ സ്ഥാനമേറ്റു

പെരുമ്പടവ്: പെരുമ്പടവ് വൈഎംസിഎ ഭാരവാഹികളുടെ സ്ഥാനാരോഹണവും കുടുംബ സംഗമവും പുതിയ അംഗങ്ങൾക്കുള്ള സ്വീകരണവും നടന്നു. പെരുമ്പടവ് മറിയം ഓഡിറ്റോറിയത്തിൽ ജില്ലാ പഞ്ചായത്ത് പ്രതിപക്ഷ നേതാവ് തോമസ് വെക്കത്താനം ഉദ്ഘാടനം ചെയ്തു. വൈഎംസിഎ പ്രസിഡന്‍റ് ബെന്നി ചിറ്റിലപ്പള്ളി അധ്യക്ഷത വഹിച്ചു. പെരുമ്പടവ് സെന്‍റ് ജോസഫ് ഇടവക വികാരി ഫാ. ജോർജ് തൈക്കുന്നുംപുറം അനുഗ്രഹ പ്രഭാഷണം നടത്തി. കണ്ണൂർ വൈഎംസിഎ സബ് റീജണൽ ചെയർമാൻ ബെന്നി ജോൺ പുതിയ ഭാരവാഹികളുടെ സ്ഥാനാരോഹണം നടത്തി. പ്രസിഡന്‍റായി ബെന്നി ചിറ്റിലപ്പള്ളിയും സെക്രട്ടറിയായി ജയ്സൺ മുടിയാനിക്കൽ, ട്രഷററായി ഏബ്രഹാം കണ്ടത്തിൽ എന്നിവരും ഭരണസമിതിയംഗങ്ങളും ചുമതലയേറ്റു. വനിത ഫോറം പ്രസിഡന്‍റായി ഹെലൻ മുടയാനിക്കലും സെക്രട്ടറിയായി ഷാനി മൂത്തേടത്തും യൂണി-വൈ പ്രസിഡന്‍റായി ജസ്റ്റിൻ പെരിഞ്ചേരിയും സെക്രട്ടറിയായി ഗോഡ്‌വിൻ ചിറ്റിലപ്പള്ളിയും ചുമതലയേറ്റു. പുതിയ അംഗങ്ങളുടെ സത്യപ്രതിജ്ഞാ ചടങ്ങിന് വൈഎംസിഎ ഏഷ്യ പസഫിക്ക് കമ്മിറ്റി മെംബർ ഡോ. കെ.എം. തോമസ് നേതൃത്വം നൽകി. വനിതാ ഭാരവാഹികളുടെ സ്ഥാനാരോഹണ ചടങ്ങ് കണ്ണൂർ വനിത സബ് റീജണൽ ചെയർപേഴ്സൺ ടിന്‍റു ബിജി ഉദ്ഘാടനം ചെയ്തു. യുവജന വിഭാഗമായ യൂണി-വൈയുടെ പെരുമ്പടവ് യൂണിറ്റ് സ്ഥാപനം ജനറൽ കൺവീനർ ഷാജി ജോസഫ് നിർവഹിച്ചു. നാഷണൽ എക്സിക്യൂട്ടീവ് അംഗം മത്തായി വീട്ടിയാങ്കൽ മുഖ്യപ്രഭാഷണം നടത്തി. സമൂഹത്തിലെ യുവജനങ്ങളെ കാർന്നുതിന്നുന്ന രാസലഹരിക്കെതിരായി ആദ്യ പ്രസിഡന്‍റ് മാത്യു വട്ടോത്ത് പ്രമേയം അവതരിപ്പിച്ചു.

തടിക്കടവ് പന്ത്രണ്ടാം ചാലിൽ റോഡ് ആര് സംരക്ഷിക്കും

തടിക്കടവ്: തടിക്കടവ് റോഡിൽ പന്ത്രണ്ടാംചാൽ പക്ഷിസങ്കേതത്തിനു സമീപം റോഡ് പുഴയിലേക്ക് ഇടിഞ്ഞിട്ട് രണ്ടുവർഷം കഴിഞ്ഞു. കഴിഞ്ഞവർഷവും റോഡ് പുഴയിലേക്ക് ഇടിയുകയുണ്ടായി. സംരക്ഷണഭിത്തി നിർമിക്കാത്തതാണ് മണ്ണിടിയാൻ കാരണം. നൂറ്റാണ്ട് പഴക്കമുള്ള നിരവധി മരങ്ങൾ ഉൾപ്പെടെ റോഡിലേക്കു വീഴുന്ന നിലയിലാണ്. സമീപത്ത് വീടുമുണ്ട്. ഇരുപതോളം അടി ഉയരത്തിലുള്ള മണ്ണാണ് പുഴയിലേക്ക് ഇടിഞ്ഞുവീണത്. റോഡ് ഇനിയും ഇടിയാൻ സാധ്യതയുണ്ടെന്നു ചൂണ്ടിക്കാട്ടി ചപ്പാരപ്പടവ് പഞ്ചായത്ത് കഴിഞ്ഞ രണ്ടു വർഷവും ദുരന്ത നിവാരണ അഥോറിറ്റിക്ക് റിപ്പോർട്ട് നൽകിയിരുന്നു. ‌‌ മണിക്കൽ പുഴയോടു ചേർന്നുള്ള ഈ ഭാഗത്തെ റോഡ് കൊടുംവളവുകളും ചെരിവുമുള്ളതാണ്. 12 മീറ്റർ വീതിയിൽ നിർമിച്ച റോഡിന്‍റെ ഈ ഭാഗത്തെ വീതി 10 മീറ്ററിൽ താഴെയാണ്. ഇവിടെ പാതയോരമില്ല. ടാറിംഗ് കഴിഞ്ഞ ഭാഗം വൻ താഴ്ചയാണ്. മണ്ണിടിച്ചിലും അപകട ഭീഷണിയും ഉണ്ടാകുമെന്ന് ചൂണ്ടിക്കാട്ടി നാട്ടുകാർ കളക്ടർക്ക് അടക്കം പരാതി നൽകിയതാണ്. 70 കോടി ചെലവഴിച്ച് ലോകോത്തര നിലവാരത്തിൽ നവീകരിക്കുന്നതായി പറഞ്ഞ റോഡിനാണ് ഈ ദുർഗതി. അതേസമയം, ഏഴുവർഷമായിട്ടും റോഡ് നവീകരണം പൂർത്തിയായിട്ടുമില്ല. 12 മീറ്ററിൽ നവീകരിച്ച റോഡിന്‍റെ പലഭാഗത്തും 10 മീറ്ററോ അതിൽ താഴെയോ മാത്രമേ വീതിയുളളൂ. ചിലയിടങ്ങളിൽ കേസുള്ളതിനാൽ നിശ്ചിത വീതി ലഭിക്കാത്ത അവസ്ഥ നിലനിൽക്കുന്നുണ്ട്. ആദ്യം 10 മീറ്ററിൽ നവീകരിക്കുമെന്നു പറഞ്ഞ റോഡാണ് പിന്നീട് 12 മീറ്ററായി ഉയർത്തിയത്. എന്നാൽ, ഏഴര മീറ്ററേ ടാറിംഗ് ഉള്ളൂ. അതിലേക്കും ഇപ്പോൾ കാടുവളർന്നു നിൽക്കുകയാണ്. ടാറിംഗിനു ശേഷമുള്ള ഭാഗം കോൺക്രീറ്റ് ചെയ്യാത്തതാണ് ഇതിനു കാരണം. പലയിടങ്ങളിലും ഓവുചാൽ നിർമിക്കാത്തതിനാൽ മഴവെള്ളം റോഡിലൂടെയാണ് ഒഴുകുന്നത്. റോഡിന് ഇരുവശത്തു നിന്നും രണ്ടുമീറ്റർ വീതമെടുത്തായിരുന്നു നവീകരണം. കെട്ടിടങ്ങളും മതിലുകളും മുറ്റവുമെല്ലാം ഇടിച്ചുതകർത്താണ് റോഡിന് വീതി കൂട്ടിയതെങ്കിലും ഇതിന്‍റെ പ്രയോജനം ജനങ്ങൾക്കു ലഭിക്കുന്നില്ല. കഴിഞ്ഞവർഷം പുഴയിടിഞ്ഞപ്പോൾ നാട്ടുകാരുടെയും ചപ്പാരപ്പടവ് പഞ്ചായത്തിന്‍റെയും പരാതികളെ തുടർന്ന് സബ് കളക്ടർ സ്ഥലം സന്ദർശിച്ചിക്കുകയും ആവശ്യമായ നടപടികൾ സ്വീകരിക്കാമെന്ന് ഉറപ്പു നൽകുകയും ചെയ്തതാണ്. എന്നാൽ, ആ സമയത്ത് പുഴയിൽ വലിയ വെള്ളമായതിനാൽ ഒന്നും ചെയ്യാൻ സാധിക്കില്ലെന്നും പുഴയിൽ വെള്ളം കുറയുമ്പോൾ നടപടി സ്വീകരിക്കാമെന്നുമാണ് പറഞ്ഞത്. എന്നാൽ കഴിഞ്ഞ വേനലിലും ഒന്നും ചെയ്തിട്ടില്ല. ഇപ്പോഴും അതേ അവസ്ഥ തുടരുന്നു. വലിയ അപകടങ്ങൾ ക്ഷണിച്ചു വരുത്താതെ സത്വര നടപടി സ്വീകരിക്കാൻ തയാറാകണമെന്നാണ് നാട്ടുകാരും പഞ്ചായത്ത് ഭരണസമിതിയും ആവശ്യപ്പെടുന്നത്.

വിന്‍വിന്‍ കോര്‍പറേഷന്‍ പത്താം വാർഷികം ആഘോഷിച്ചു

കണ്ണൂര്‍: പത്രപരസ്യ രംഗത്തും ഇവന്‍റ് മാനേജ്മെന്‍റ് മേഖലയിലും സജീവ സാന്നിധ്യമായ വിൻവിൻ കോർപറേഷൻ പത്താം വാർഷികം ആഘോഷിച്ചു. ഭക്തി സംവർദ്ധിനി യോഗം വൈസ് പ്രസിഡന്‍റ് ടി.കെ. രാജേന്ദ്രൻ ഭദ്രദീപം കൊളുത്തി. നോർത്ത് മലബാർ ചേംബർ ഓഫ് കൊമേഴ്സ് പ്രസിഡന്‍റ് ടി.കെ.രമേഷ്കുമാർ ഉദ്ഘാടനം ചെയ്തു. കണ്ണൂർ ആകാശവാണി മുൻ സ്റ്റേഷൻ ഡയറക്ടർ കെ. ബാലചന്ദ്രൻ അധ്യക്ഷത വഹിച്ചു. ഓള്‍ ഇന്ത്യ മോട്ടോര്‍ ട്രാന്‍സ്പോര്‍ട്ട് കോണ്‍ഗ്രസ് മാനേജിംഗ് കമ്മിറ്റി മെംബര്‍ എം.ടി പ്രകാശന്‍, സദാനന്ദ റിയാല്‍റ്റസ് എംഡി സി.കെ സദാന്ദന്‍, റസിഡൻസ് അസോസിയേഷന്‍ സംസ്ഥാന വൈസ്. പ്രസിഡന്‍റ് ആര്‍. അനില്‍കുമാര്‍, ജില്ലാ സെക്രട്ടറി കെ.പി.മുരളി കൃഷ്ണന്‍, മുന്‍ ഡെപ്യൂട്ടി ലേബര്‍ കമ്മീഷര്‍ പി.സി. വിജയരാജന്‍, ദീപിക മാർക്കറ്റിംഗ് സീനിയർ ബിസിനസ് മാനേജർ പി.ജെ. മാത്യു, കേരളകൗമുദി യൂണിറ്റ് ചീഫ് കെ.വി. ബാബുരാജൻ, പരസ്യവിഭാഗം മാനേജര്‍ കെ.ടി. രാജു, കണ്ണൂര്‍ മീഡിയ എഡിറ്റര്‍ ശിവദാസന്‍ കരിപ്പാല്‍, ആര്‍ട്ടിസ്റ്റ് ശശികല, ബ്ലൂഇങ്ക് ബുക്സ് എംഡി സി.പി. ചന്ദ്രന്‍, മാതൃഭൂമി മാർക്കറ്റിംഗ് ഡെപ്യൂട്ടി മാനേജർ കെ. ധനീഷ്, ശ്രീജിത്ത് കൈതേരി, ഡോ.ടി. ശശിധരന്‍, ചാര്‍ട്ടേഡ് അക്കൗണ്ടന്‍റ് ശിശില്‍ രാമകൃഷ്ണന്‍, കണ്ണൂര്‍ മിറര്‍ സര്‍ഗവേദി പ്രസിഡന്‍റ് കെ.സി.ശശീന്ദ്രന്‍, ഗ്ലൈസീമിയ ആന്‍റി ഡയബറ്റിക് ക്ലിനിക് മാനേജിംഗ് ഡയറക്ടര്‍ അനീഷ് കല്ലി, കണ്ണൂര്‍ മെട്രോ വാര്‍ത്ത റിപ്പോര്‍ട്ടര്‍ ഷമൽ, ക്ലബ്ബ് എഫ്എം റേഡിയോ സൊലൂഷന്‍സ് മാനേജര്‍ പി.പ്രസാദ്, കണ്ണൂര്‍ വിഷന്‍ മാര്‍ക്കറ്റിംഗ് മാനേജർ ജയന്‍ ചോല, പി.സി. അശോകന്‍, കെ.ജ്യോതിപ്രകാശ്, രഘുത്തമന്‍ എന്നിവർ പ്രസംഗിച്ചു.

മാടായി പഞ്ചായത്ത് പ്രസിഡന്‍റിന്‍റെ വീട്ടിൽ വിജിലൻസ് റെയ്ഡ്; രേഖകൾ പിടിച്ചെടുത്തു

പഴയങ്ങാടി: മാടായി പഞ്ചായത്ത് പ്രസിഡന്‍റ് കായിക്കാരൻ സഹീദിന്‍റെ വീട്ടിലും പഞ്ചായത്ത് ഓഫീസിലും വിജിലൻസ് റെയ്ഡ്. അനധികൃത സ്വത്തു സന്പാദനമെന്ന പരാതിയെ തുടർന്നായിരുന്നു റെയ്ഡ്. പരിശോധനയിൽ ചില നിർണായക രേഖകൾ കണ്ടെത്തി കസ്റ്റഡിയിലെടുത്തതായാണ് വിവരം. ഇന്നലെ പുലർച്ചെ ആറോടെയാണ് വിജിലൻസ് സംഘം മാട്ടൂൽ നോർത്തിലെ വീട്ടിൽ റെയ്ഡിനെത്തിയത്. കോഴിക്കോട് വിജിലൻസ് വിഭാഗം സ്പെഷൽ സെല്ലിലെ ഡിവൈഎസ്പിമാരായ സുരേഷ്, രമേശ് എന്നിവരുടെ നേതൃത്വത്തിലുള്ള 33 അംഗ സംഘമാണ് പരിശോധന നടത്തിയത്. പരിശോധന വൈകുന്നേരം ഏഴു വരെ നീണ്ടു. പ്രസിഡന്‍റിന്‍റെ വീട്ടിൽ റെയ്ഡ് നടക്കുന്ന അതേ സമയം തന്നെയാണ് പഞ്ചായത്ത് ഓഫീസിലും പരിശോധന നടത്തിയത്. കൂടാതെ കായിക്കാരൻ സഹീദിന്‍റെ അടുത്ത സുഹൃത്തായ ഒരാളുടെ മാട്ടൂലിലെ വീട്ടിലും പരിശോധന നടത്തി. മുസ്‌ലിം ലീഗ് അഖിലേന്ത്യാ കമ്മിറ്റിയംഗവും പുതിയങ്ങാടി ജമാഅത്ത് ഹൈസ്കൂൾ ചെയർമാനും കൂടിയാണ് കായിക്കാരൻ സഹീദ്. അനധികൃത സ്വത്ത് സന്പാദനമെന്ന പരാതിയിൽ കണ്ണൂർ വിജിലൻസ് വിഭാഗം പ്രാഥമികാന്വേഷണം നടത്തിയതിനെ തുടർന്ന് പരാതിയിൽ കഴന്പുണ്ടെന്ന് കാണിച്ച് വിജിലൻസ് ഡയറക്ടർക്ക് റിപ്പോർട്ട് സമർപ്പിച്ചിരുന്നു. ഇതേത്തുടർന്ന് വിജിലൻസ് ഡയറക്ടറേറ്റ് നിർദേശപ്രകാരം നേരത്തെ കോഴിക്കോട് സ്പെഷ്യൽ സെൽ അന്വേഷിക്കുകയും ഇതിന്‍റെ റിപ്പോർട്ട് സമർപ്പിക്കുകയും ചെയ്തിരുന്നു. ഈ റിപ്പോർട്ടിന്‍റെയും കൂടി അടിസ്ഥാനത്തിലാണ് റെയ്ഡ് നടത്തിയത്.

കണ്ണൂർ റെയിൽവേ സ്റ്റേഷനിലേക്ക് പ്രവേശിക്കാൻ പുതിയ പാത വരുന്നു

കണ്ണൂർ: കണ്ണൂർ റെയിൽവേ സ്റ്റേഷന്‍റെ മുഖ്യകവാടത്തിലേക്ക് പ്രവേശിക്കാൻ ഇനി കുരുക്കിൽ കിടക്കേണ്ട. ഇവിടെ പുതിയ പാതയ്ക്കൊരുങ്ങുകയാണ് റെയിൽവേ. നിലവിലുള്ള കവാടത്തിന് പുറമെ മുനീശ്വരൻ കോവിലിലെ ആർഎസ് പോസ്റ്റ് ഓഫീസിന് അരികിലൂടെയാണ് പുതിയ പാത നിർമിക്കാനുദ്ദേശിക്കുന്നത്. പാഴ്സൽ ഓഫീസിനോട് ചേർന്ന് നിലവിലുള്ള വീതികുറഞ്ഞ റോഡ് ഇതുമായി ബന്ധിപ്പിച്ച് വിപുലീകരിച്ച് നിലവിൽ പുറത്തേക്കുള്ള വഴിയുമായി ചേരും. ഏഴുമീറ്റർ വീതിയിൽ വൺവേയായിരിക്കും നിർമിക്കുക. റോഡിൽനിന്ന് സ്റ്റേഷനിലേക്ക് പ്രവേശിക്കുന്ന കവാടം അതുപോലെ തുടരും. പാത യാഥാർത്ഥ്യമായാൽ മുനീശ്വരൻ കോവിൽ മുതൽ താവക്കര വരെയുണ്ടാകുന്ന രൂക്ഷമായ ഗതാഗതക്കുരുക്ക് കുറയുമെന്ന് അധികൃതർ പറഞ്ഞു. അതേസമയം റെയിൽവേ വികസനം ഇല്ലാതാക്കി ഭൂമി സ്വകാര്യ കന്പനിക്ക് പാട്ടത്തിന് നല്കിയത് സ്റ്റേഷൻ റോഡ് വിപുലീകരണത്തെയും ബാധിക്കും. സ്റ്റേഷന് പടിഞ്ഞാറുഭാഗത്തെ റോഡിലൂടെ നിലവിൽ രൂക്ഷമായ തിരക്കാണ് അനുഭവപ്പെടുന്നത്. ഇവിടെ സ്വകാര്യ കമ്പനിയുടെ ഷോപ്പിംഗ് കോംപ്ലക്സ് വന്നാൽ വീതികൂട്ടാനാകില്ലെന്നാണ് വ്യാപാരികളടക്കം പറയുന്നത്. റെയിൽവേ ഭൂമി പാട്ടത്തിനെടുത്ത ടെക്സ് വർത്ത് കന്പനി വാണിജ്യകെട്ടിടം നിർമിക്കാനുള്ള പ്രവൃത്തിയിലാണ്. റെയിൽവേ പദ്ധതിയുടെ സ്കെച്ചിലും റോഡ് തുറക്കുന്നത് ഏറ്റവും തിരക്കുള്ള പ്ലാസ ജംഗ്ഷനിലേക്കാണ്. ഇത് തിരിച്ചടിയാകാം.

കെഎഎസ്എൽജിഇയു സംസ്ഥാന സമ്മേളനം ഇന്നു മുതൽ കണ്ണൂരിൽ

കണ്ണൂർ: കേരള എയ്ഡഡ് സ്കൂൾ ലാസ്റ്റ് ഗ്രേഡ് എംപ്ലോയീസ് യൂണിയൻ (കെഎഎസ്എൽജിഇയു) 55ാം വാർഷികാഘോഷവും 31ാം സംസ്ഥാന സമ്മേളനവും ഇന്നു മുതൽ 13 വരെ കണ്ണൂരിൽ നടക്കും. ഇന്നു വൈകുന്നേരം അഞ്ചിന് ശിക്ഷക് സദനിൽ പതാക ഉയർത്തുന്നതോടെ സമ്മേളനത്തിനു തുടക്കമാകും. തുടർന്ന് നടക്കുന്ന സംസ്ഥാന എക്സിക്യുട്ടീവ് കൗൺസിൽ മുൻ സംസ്ഥാന ജനറൽ സെക്രട്ടറി ടി.കെ. അബ്ദുൾ റഷീദ് ഉദ്ഘാടനം ചെയ്യുമെന്ന് ഭാരവാഹികളായ കെ.എം. ബാലകൃഷ്ണൻ നന്പൂതിരിയും കെ.ടി. സജീവനും പത്രസമ്മേളനത്തിൽ അറിയിച്ചു. നാളെ രാവിലെ 11ന് സമ്മേളനം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്യും. കോർപറേഷൻ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സുരേഷ് ബാബു എളയാവൂർ മുഖ്യാതിഥിയായിരിക്കും. സർവീസിൽ നിന്നു വിരമിക്കുന്ന ജീവനക്കാരെ ഡപ്യൂട്ടി മേയർ ടി. ഇന്ദിര ആദരിക്കും. ഉന്നതവിജയികളെ ഡിഡിഇ ഡി. ഷൈനി അനുമോദിക്കും. 13ന് രാവിലെ 10ന് തളാപ്പ് ചെങ്ങിനിപ്പടി യുപി സ്കൂളിൽ നടക്കുന്ന പ്രതിനിധി സമ്മേളനം ടി.കെ. അബ്ദുൾ റഷീദ് ഉദ്ഘാടനം ചെയ്യും. ഉച്ചകഴിഞ്ഞ് രണ്ടിന് പുതിയ ഭാരവാഹികളെ തെരഞ്ഞെടുക്കും. ഹയർ സെക്കൻഡറി പരീക്ഷ പേപ്പർ സൂക്ഷിക്കുന്ന സ്കൂളുകളിൽ സുരക്ഷാ ചുമതലയ്ക്ക് ക്ലാസ് ഡി ജീവനക്കാരെ നിയോഗിച്ച് പീഡിപ്പിക്കുന്ന സർക്കാർ നടപടി പിൻവലിക്കണം. നേരത്തെ പോലീസ് വഹിച്ചിരുന്ന ചുമതലയാണ് ജീവനക്കാരുടെ തലയിലേക്ക് അടിച്ചേൽപ്പിക്കുന്നത്. യാതൊരു സുരക്ഷയുമില്ലാത്ത സ്ഥലത്ത് ഇത്തരത്തിൽ ജീവനക്കാരെ നിയോഗിക്കാനുള്ള തീരുമാനം പുനഃപരിശോധിക്കണമെന്ന് നേതാക്കൾ ആവശ്യപ്പെട്ടു. എല്ലാ ജീവനക്കാരെയും സ്റ്റാറ്റ്യൂട്ടറി പെൻഷനു കീഴിൽ കൊണ്ടുവരണമെന്നും നേതാക്കൾ ആവശ്യപ്പെട്ടു. പത്രസമ്മേളനത്തിൽ ടി.വി. അനിൽകുമാർ, ഇ.സി. മനോജ്, കെ.എൻ. രാജു തുടങ്ങിയവരും പങ്കെടുത്തു.

കാരുണ്യ സ്പർശം അവാർഡ് കരുവഞ്ചാൽ ആശാഭവന്

വായാട്ടുപറമ്പ്: ഈ വർഷത്തെ ജോർജ് അർത്തനാകുന്നേൽ സ്മാരക കാരുണ്യ സ്പർശം അവാർഡിന് കരുവഞ്ചാൽ ആശാഭവൻ സ്പെഷൽ സ്കൂൾ അർഹമായി. കാൽലക്ഷം രൂപയും പ്രശസ്തി ഫലകവും അടങ്ങുന്ന അവാർഡ് 14 ന് രാവിലെ11 ന് കരുവഞ്ചാൽ ആശാഭവൻ ഓഡിറ്റോറിയത്തിൽ ചേരുന്ന സമ്മേളനത്തിൽ ആശാഭവൻ പ്രിൻസിപ്പൽ സിസ്റ്റർ മെർലിനു കരുവഞ്ചാൽ ലിറ്റിൽ ഫ്ലവർ ഇടവക വികാരി ഫാ. ജോസഫ് ഈനാച്ചേരി സമ്മാനിക്കുമെന്ന് ബി പോസിറ്റീവ് ഭാരവാഹികൾ അറിയിച്ചു. എസ്എച്ച് കോൺവന്‍റ് തലശേരി പ്രോവിൻസിനു കീഴിൽ ബുദ്ധിപരമായ വെല്ലുവിളി നേരിടുന്ന കുട്ടികളെ പരിശീലിപ്പിക്കുന്ന ആശാഭവൻ സ്പെഷൽ സ്കൂളിന്‍റെ പ്രവർത്തനം മാതൃകാപരവും അനേകം കുടുംബങ്ങൾക്കു വലിയ ആശ്വാസം നൽകുന്നതുമാണെന്ന് അവാർഡ് കമ്മറ്റി വിലയിരുത്തി. വലിയ ക്ഷമയും ശ്രദ്ധയും സഹാനുഭൂതിയും സാമ്പത്തിക ബാധ്യതയും ആവശ്യമായ സ്കൂളിന്‍റെ പ്രവർത്തനങ്ങൾക്ക് സമൂഹത്തിൽ അർഹമായ പരിഗണന ലഭിക്കുന്നില്ലെന്നും കമ്മിറ്റി നിരീക്ഷിച്ചു. ഇത്തരം സ്ഥാപനങ്ങൾ ദേശത്തിന് അനുഗ്രഹവും പ്രോത്സാഹിക്കപ്പെടേണ്ടതുമാണ്. 41 വർഷം മുന്പ് ഫാ. തോമസ് കുറിച്യാപറമ്പിൽ മുൻകൈ എടുത്ത് സ്ഥാപിച്ച ആശാഭവൻ സ്പെഷൽ സ്കൂളിൽ ആറ് സിസ്റ്റേഴ്സ് അടക്കം 13 പേർ സേവനം അനുഷ്ഠിക്കുന്നു. ബുദ്ധിപരമായി വെല്ലുവിളി നേരിടുന്ന ആൺകുട്ടികളും പെൺകുട്ടികളുമടക്കം 50 പേരാണ് ഇപ്പോൾ സ്പെഷൽ സ്കൂളിൽ പരിശീലനത്തിനുള്ളത്. വായാട്ടുപറമ്പ് കേന്ദ്രമായി പ്രവർത്തിക്കുന്ന ബി പോസിറ്റീവ് ട്രസ്റ്റിന്‍റെ കാരുണ്യ സ്പർശം അവാർഡ് കഴിഞ്ഞ വർഷങ്ങളിൽ ആശാൻകവല തിരുരക്ത ആശ്രമം, ചെമ്പേരി കരുണാലയം, കരുണാപുരം കാരുണ്യഭവൻ എന്നീ സ്ഥാപനങ്ങൾക്കാണ് ലഭിച്ചത്.

സ്കൂളിലെ പാചകക്കാരിയെ ഡിവൈഎഫ്ഐ വനിതാ നേതാവ് മർദിച്ചു

മണത്തണ: എസ്എഫ്ഐയുടെ പഠിപ്പ് മുടക്കിന്‍റെ ഭാഗമായി മണത്തണ ഗവ. ഹയർ സെക്കൻഡറി സ്കൂളിൽ എത്തിയ ഡിവൈഎഫ്ഐ വനിതാ നേതാവ് സ്കൂളിൽ ഉച്ചഭക്ഷണം പാചകം ചെയ്യുന്ന പ്രായമായ സ്ത്രീയെ കൈയേറ്റം ചെയ്തു. സ്കൂളിൽ മൂന്നുവർഷമായി ഹെൽപ്പറായി ജോലി ചെയ്യുന്ന വസന്തയെയാണ് കൈയേറ്റം ചെയ്തത്. കൈപിടിച്ച് തിരിച്ചുവെന്നും കൈയിലുണ്ടായിരുന്ന ഭക്ഷണം തട്ടി താഴെയിട്ടുവെന്നും വസന്ത പറഞ്ഞു. ഇന്നലെ രാവിലെ പത്തോടെയായിരുന്നു സംഭവം. കൈയ്ക്ക് പരിക്കേറ്റ വസന്ത പേരാവൂർ താലൂക്ക് ആശുപത്രിയിൽ ചികിത്സ തേടി. സംഭവത്തിൽ ഡിവൈഎഫ്ഐ നേതാവും വളയങ്ങാട് സ്വദേശിനിയുമായ അക്ഷയ മനോജിനെതിരേ വസന്ത പേരാവൂർ പോലീസിൽ പരാതി നൽകിയിട്ടുണ്ട്. യാതൊരു പ്രകോപനവുമില്ലാതെയാണ് സ്കൂളിന് പുറത്തുള്ളവർ കഞ്ഞിപ്പുരയിൽ കയറി അക്രമം കാണിച്ചതെന്ന് വസന്തയുടെ ബന്ധുക്കൾ പറഞ്ഞു. സംസ്ഥാന വ്യാപകമായി ഇന്നലെ എസ്എഫ്ഐ വിദ്യാഭ്യാസ ബന്ദ് പ്രഖ്യാപിച്ചിരുന്നു. ഇതിന്‍റെ ഭാഗമായാണ് മണത്തണ ഗവ. ഹയർ സെക്കൻഡറി സ്കൂളിൽ പുറത്തുള്ള ആളുകൾ സ്കൂൾ അടപ്പിക്കുന്നതിന് എത്തിയത്. ഇവർ ഭക്ഷണം പാകം ചെയ്യുന്നിടത്ത് എത്തി ബഹളമുണ്ടാക്കുകയായിരുന്നു. കൂട്ടത്തിൽ മറ്റാളുകൾ ഉണ്ടായിരുന്നെങ്കിലും ഡിവൈഎഫ്ഐ വനിതാ നേതാവാണ് വസന്തയെ കൈയേറ്റം ചെയ്തതെന്ന് ബന്ധുക്കൾ പറഞ്ഞു. പ്രായമായ സ്ത്രീയെ കൈയേറ്റം ചെയ്തതിൽ വ്യാപക പ്രതിഷേധമാണ് ഉയരുന്നത്.

ഖദീജ വധം: സഹോദരങ്ങൾക്ക് ജീവപര്യന്തവും പിഴയും

തലശേരി: രണ്ടാം വിവാഹം കഴിക്കുന്നതിന്‍റെ വിരോധത്താല്‍ സഹോദരിയെ വെട്ടിക്കൊന്ന കേസില്‍ പ്രതികള്‍ക്ക് ജീവപര്യന്തം തടവും 60,000 രൂപ പിഴയും. തില്ലങ്കേരി പടിക്കച്ചാലിലെ പുതിയപുരയിൽ കെ.എന്‍. ഇസ്മയിൽ (40), കെ.എന്‍. ഫിറോസ് (36) എന്നിവരെയാണ് തലശേരി അഡീഷണല്‍ ജില്ലാസെഷന്‍സ് കോടതി ജഡ്ജി (ഒന്ന്) ഫിലി തോമസ് ശിക്ഷിച്ചത്. സഹോദരിയായ പടിക്കച്ചാലിലെ പുതിയപുരയില്‍ ഖദീജയെ (28) വെട്ടിക്കൊല്ലുകയും രണ്ടാം ഭര്‍ത്താവ് ഹമീദിനെ (47) വധിക്കാന്‍ ശ്രമിച്ചെന്നുമാണ് കേസ്. പ്രതികള്‍ പിഴ അടച്ചില്ലെങ്കില്‍ ഒരുവര്‍ഷം അധികതടവ് അനുഭവിക്കണം. 2012 ഡിസംബര്‍ 12ന് ഉച്ചയ്ക്ക് 12 ഓടെയാണ് കേസിനാസ്പദമായ സംഭവം. പഴശി കുഴിക്കലിലെ ജസീല മന്‍സിലില്‍ കെ. നൗഷാദാണ് ഖദീജയുടെ ആദ്യ ഭര്‍ത്താവ്. ഈ ബന്ധത്തില്‍ രണ്ട് പെണ്‍മക്കളുണ്ട്. ഇതിനിടയിലാണ് ഷാഹുല്‍ ഹമീദുമായി യുവതി സ്നേഹത്തിലായത്. ഈ ബന്ധം ഒഴിവാക്കാനായി പറഞ്ഞെങ്കിലും പിന്മാറാത്ത വിരോധമാണ് കൊലയ്ക്ക് കാരണമെന്നാണ് അന്വേഷണത്തിലെ കണ്ടെത്തല്‍.രണ്ടാം വിവാഹം നടത്താമെന്ന വ്യാജേന ആദ്യ വിവാഹം തലാഖ് നടത്തി. ഖദീജയെയും ഷാഹുല്‍ ഹമീദിനെയും നാട്ടില്‍ എത്തിച്ചശേഷമാണ് കൊലയും കൊലപാതക ശ്രമവും നടന്നത്. മതാചാരപ്രകാരം വിവാഹം നടത്തിക്കൊടുക്കാമെന്ന് വാഗ്ദാനം ചെയ്താണ് ഖദീജയെ വിവാഹം കഴിക്കാനിരുന്ന ഷാഹുല്‍ ഹമീദിനെയും ബന്ധുക്കളെയും പ്രതികള്‍ വീട്ടിലേക്ക് വിളിപ്പിച്ചത്. നിക്കാഹിന്‍റെ കാര്യം സംസാരിക്കാനെന്ന് പറഞ്ഞ് ബന്ധുക്കളെ പള്ളിയിലേക്ക് കൂട്ടിക്കൊണ്ടുപോയി. ഈസമയം പ്രതികള്‍ ഖദീജയെ കുത്തിക്കൊലപ്പെടുത്തുകയും ഷാഹുല്‍ ഹമീദിനെയും കുത്തി പരിക്കേല്‍പ്പിക്കുകയും ചെയ്തു. മട്ടന്നൂര്‍ പോലീസ് ഇന്‍സ്‌പെക്ടറായിരുന്ന കെ.വി വേണുഗോപാലായിരുന്നു കേസ് അന്വേഷിച്ചത്. ആറ് പ്രതികളുണ്ടായിരുന്നതില്‍ നാലുപേരെ കോടതി വെറുതെ വിട്ടിരുന്നു. പ്രോസിക്യൂഷന് വേണ്ടി അഡീഷനല്‍ ജില്ലാ ഗവ.പ്ലീഡര്‍ കെ.രൂപേഷ് ഹാജരായി.

വാഹനാപകടത്തിൽ പരിക്കേറ്റ ഓട്ടോ ഡ്രൈവർ മരിച്ചു

പള്ളിക്കുന്ന്: വാഹനാപകടത്തെ തുടർന്ന് ചികിത്സയിലായിരുന്ന ഓട്ടോ ഡ്രൈവർ മരിച്ചു. പെരുമണ്ണ് മല്ലിശേരി ഇല്ലത്ത് പരേതരായ നാരായണൻ നമ്പൂതിരി-പള്ളിക്കുന്ന് മൂകാംബിക ക്ഷേത്രത്തിനു സമീപത്തെ വടക്കെ വാര്യത്ത് ലക്ഷ്മിക്കുട്ടി വാരസ്യാർ ദന്പതികളുടെ മകൻ ദുർഗ റോഡിൽ അച്യുതത്തിൽ ഗോപിനാഥൻ (അച്ചൂട്ടി-70) ആണ് മരിച്ചത്. ഫെബ്രുവരി 15ന് ചാല പനോന്നേരിയിലുണ്ടായ വാഹനാപകടത്തെ തുടർന്ന് ചികിത്സയിലായിരുന്നു. സംസ്കാരം ഇന്ന് മൂന്നിന് പയ്യാമ്പലത്ത്. ഭാര്യ: വസന്ത. മക്കൾ: മഞ്ജുള, മിഥുൻ (കെവിആർ മാരുതി, പുതിയതെരു). മരുമക്കൾ: മുരളീധര വാര്യർ (ജ്യോൽസ്യർ, കല്യാശേരി), ദിവ്യ. സഹോദരങ്ങൾ: പത്മാവതി, ചന്ദ്രവല്ലി, ജയനാരായണൻ, പരേതരായ കമലം, യശോദ, ബാലകൃഷ്ണ വാര്യർ, രാമചന്ദ്ര വാര്യർ.

നഷ്ടപരിഹാരം ഏകപക്ഷീയമെന്ന് ഭൂവുടമകൾ; പായത്ത് പ്രതിഷേധ യോഗം നടത്തി

ഇരിട്ടി: വയനാട്-കരിന്തളം 400 കെവി ലൈൻ പുതിയ നഷ്ടപരിഹാര പാക്കേജ് സർക്കാർ ഏകപക്ഷീയമായി തീരുമാനിച്ചതാണെന്ന് ഭൂവുടമകൾ. സർക്കാരിന്‍റെ ഏകപക്ഷീയ പാക്കേജിനെതിരെ പായം പഞ്ചായത്തിലെ ഭൂവുടമകളും കർഷകരും പ്രതിഷേധ യോഗം നടത്തി. കിളിയന്തറ പാരിഷ് ഹാളിൽ ഇടവക വികാരി ഫാ. ആന്‍റണി ആനക്കല്ലിൽ ഉദ്ഘാടനം ചെയ്‌തു. സമര സമിതി ചെയർമാൻ തോമസ് വർഗീസ് അധ്യക്ഷത വഹിച്ചു. വീടും സ്ഥലവും നഷ്ട്ടപ്പെടുന്നവർക്ക് അർഹമായ നഷ്ട്ടപരിഹാരം നൽകാതെ ജനങ്ങളെ വഞ്ചിക്കുന്ന സർക്കാർ നിലപാടിനെതിരെ ശക്തമായ സമരപരിപാടികൾക്ക് നേതൃത്വം നൽകാൻ യോഗം തീരുമാനിച്ചു. ബെന്നി പുതിയാന്പുറം, ഡെന്നീസ് മാണി, ജിജോ അടവനാൽ, തങ്കച്ചൻ നെടുമല, റോബിൻസ് മണ്ണനാൽ, രാജി അടവനാൽ എന്നിവർ പ്രസംഗിച്ചു.

നിയന്ത്രണം വിട്ട കാർ വൈദ്യുത തൂണിലിടിച്ച് മറിഞ്ഞു

മട്ടന്നൂർ: ചാവശേരി കൂരൻ മുക്കിൽ കാർ നിയന്ത്രണം വിട്ടു വൈദ്യുതി തൂണിലിടിച്ച് മറിഞ്ഞു. ഇന്നലെ പുലർച്ചെ അഞ്ചരയോടെയായിരുന്നു അപകടം. ഇരിക്കൂറിൽ നിന്നു ഉളിയിൽ ഭാഗത്തേക്ക് പോയ കാർ കൂരൻമുക്കിൽ നിയന്ത്രണം വിട്ടു റോഡരികിലെ വൈദ്യുത തൂണിലിടിച്ച് മറിയുകയായിരുന്നു. കാർ ഡ്രൈവർ പരിക്കേൽക്കാതെ രക്ഷപ്പെട്ടു. അപകടത്തെ തുടർന്നു വൈദ്യുത തൂണും കമ്പിയും റോഡിലേക്ക് വീണു. പ്രദേശത്ത് വൈദ്യുത ബന്ധം തടസപ്പെട്ടു. വൈദ്യുത തൂൺ റോഡിൽ നിന്ന് മാറ്റുന്നതിനിടെ ഇരിട്ടി ഭാഗത്തേക്ക് പോയ പാർസൽ ലോറി തട്ടി മൂന്നുപേർക്ക് പരിക്കേറ്റു. ഇവരെ മട്ടന്നൂരിലെ ആശുപത്രിയിൽ പ്രവേശിപ്പിച്ചു. മറിഞ്ഞ കാർ പിന്നീട് ക്രെയിൻ ഉപയോഗിച്ച് നീക്കി.

കരാറുകാർ കനിഞ്ഞാൽ വീട് ലഭിക്കും; അയൽവീടുകളിൽ അന്തിയുറങ്ങി ദമ്പതികൾ

ഉളിക്കൽ: ലൈഫ് ഭവന പദ്ധതിയിൽ വീട് അനുവദിച്ചിട്ടും അന്തിയുറങ്ങാൻ ഇടമില്ലാതെ വൃദ്ധദമ്പതിമാർ അയൽവീട്ടിൽ അഭയം പ്രാപിക്കുന്നു. ഉളിക്കൽ വയത്തൂരിലെ പി.എ. കൃഷ്‌ണൻ നമ്പ്യാരും ഭാര്യ കമലാക്ഷിയുമാണ് കിടക്കാൻ ഇടമില്ലാതെ ബന്ധുക്കളുടെ സഹായത്താൽ കഴിയുന്നത്. ലൈഫ് ഭവന പദ്ധതിയിൽ വീട് അനുവദിച്ചിട്ടുണ്ടെങ്കിലും കരാറുകാർ ഏറ്റെടുക്കാൻ തയാറാവാതെ വന്നതോടെ ഇവരുടെ വീട് പണി അനിശ്ചിതത്വത്തിലാണ്. ആരെങ്കിലും കരാർ ഏറ്റെടുത്താൽ മാത്രമേ പ്രായം എൺപതിനോട് അടുക്കുന്ന ഇരുവരുടെയും വീടെന്ന സ്വപനം യാഥാർഥ്യമാകുകയുള്ളൂ. ലൈഫ് പദ്ധതി പ്രകാരം അനുവദിച്ച് വീടിന്‍റെ ഒന്നാം ഗഡു തുക ലഭിച്ചെങ്കിലും ഇത് ബാങ്കിൽ നിന്ന് എടുക്കാൻ കഴിഞ്ഞിട്ടില്ല. മക്കളില്ലാത്ത ഇവർ പ്രായത്തിന്‍റെ ബുദ്ധിമുട്ടുകളും രോഗങ്ങളും കാരണം മരുന്നിനുപോലും കഷ്‌ടപ്പെടുകയാണ്. ബന്ധുവിന്‍റെ സഹായത്തിലാണ് ഇപ്പോൾ ഇടിഞ്ഞുവീഴാറായ പഴയവീട്ടിൽ നിന്ന് മാറി താമസിക്കുന്നത്.

ഇൻഡക്ഷൻ പ്രോഗ്രാം സംഘടിപ്പിച്ചു

നിർമലഗിരി: നിർമലഗിരി കോളജ് (ഓട്ടോണമസ്) ചരിത്ര വിദ്യാർഥികൾക്കായി ഇൻഡക്ഷൻ പ്രോഗ്രാം സംഘടിപ്പിച്ചു. നിർമലഗിരി കോളജ് ചരിത്ര വിഭാഗം മുൻ മേധാവിയും ആലക്കോട് മേരി മാതാ ആർട്സ് ആൻഡ് സയൻസ് കോളജ് പ്രിൻസിപ്പലുമായ ഡോ. ടി.ജെ. ഷാജിമോൻ മുഖ്യപ്രഭാഷണം നടത്തി. ചരിത്ര വിഭാഗം മേധാവി രേഷ്മ ടോം, സിസ്റ്റർ ഡോ. സുജമോൾ ജോസഫ്, ഫാത്തിമത്ത് റാഹില എന്നിവർ പ്രസംഗിച്ചു. മലയാള വിഭാഗം ഒന്നാം വർഷ വിദ്യാർഥികൾക്കായി ഇൻഡക്ഷൻ പ്രോഗ്രാം "പ്രവേശകം 25' സംഘടിപ്പിച്ചു. മലയാള വിഭാഗം പൂർവ വിദ്യാർഥി സഞ്ജയ് ഷാജി മുഖ്യാതിഥിയായിരുന്നു. മലയാള ഭാഷാ പഠനത്തിന്‍റെ പ്രാധാന്യത്തെകുറിച്ചും വിവിധ ജോലി സാധ്യതകളെകുറിച്ചും അദ്ദേഹം സംസാരിച്ചു. മലയാള വിഭാഗം അധ്യക്ഷ ഡോ. ദീപാ മോൾ മാത്യു, പി. അമയ എന്നിവർ പ്രസംഗിച്ചു.

പഴകിയ ഭക്ഷ്യവസ്തുക്കൾ പിടിച്ചെടുത്തു നശിപ്പിച്ചു

ഇരിട്ടി: ഇരിട്ടി നഗരസഭ ആരോഗ്യ വിഭാഗം ന‌ടത്തിയ പരിശോധനയിൽ പഴകിയ പഴവർഗങ്ങളും ഇളനീരും പിടിച്ചെടുത്തു. സ്വകാര്യ ആശുപത്രിക്ക് സമീപമുള്ള ഇരിട്ടി കീഴൂരിലെ ത്രീസ്റ്റാർ ഫ്രൂട്ട്സ് സ്റ്റേഷനറി ആൻഡ് കൂൾബാറിൽ കഴിഞ്ഞദിവസം ഇരിട്ടി നഗരസഭ ആരോഗ്യ വിഭാഗം നടത്തിയ പരിശോധനയിലാണ് പഴകിയ പഴവർഗങ്ങളും ഫ്രീസറിൽ സൂക്ഷിച്ച വലിയ ബക്കറ്റ് നിറയെ ജ്യൂസ് അടിക്കാൻ സൂക്ഷിച്ച ഇളനീരും പിടിച്ചെടുത്ത് നശിപ്പിച്ചത്. കരിക്ക് വെട്ടിയ ശേഷം ഉള്ളിലെ കാമ്പ് മാത്രം ബക്കറ്റിൽ സൂക്ഷിച്ച നിലയിലായിരുന്നു ഇവ കണ്ടെത്തിയത്. ഇതോടൊപ്പം പഴകിയ അനാറും മുന്തിരിയും നഗരസഭ ആരോഗ്യ വിഭാഗം പിടിച്ചെടുത്തു നശിപ്പിച്ചു. ഇവിടെ നിന്ന് നിരോധിച്ച പ്ലാസ്റ്റിക് ഗ്ലാസുകളും പിടിച്ചെടുത്തു. മഞ്ഞപ്പിത്തം ഉൾപ്പെടെ പകർച്ച വ്യാധികൾ പടർന്നു പിടിക്കുന്ന സാഹടര്യത്തിലാണ് പരിശോധന നടത്തിയത്. ഉപഭോക്താവിന് ചോദിച്ച് ഉറപ്പുവരുത്താം: ക്ലീൻ സിറ്റി മാനേജർ ഭക്ഷണം കഴിക്കാൻ കയറുന്ന സ്ഥാപനങ്ങളിൽ മാനദണ്ഡങ്ങൾ പാലിക്കുന്നുണ്ടോ എന്ന് ഉപഭോക്താവിന് അന്വേഷിച്ച് ഉറപ്പുവരുത്താനുള്ള അവകാശം ഉണ്ടെന്ന് ഇരിട്ടി ക്ലീൻ സിറ്റി മാനേജർ കെ.വി. രാജീവൻ പറഞ്ഞു. ഹോട്ടലുകളിലും കൂൾബാറുകളിലും വെള്ളം പരിശോധിച്ച റിപ്പോർട്ടും ഹെൽത്ത് കാർഡ് ഉൾപ്പെടെ നിർബന്ധമാണ്. എന്നാൽ, ഇത് എത്രയധികം പ്രയോഗികമാണെന്ന് ജനങ്ങൾ അന്വേഷിക്കാൻ തയാറാകുമോ എന്നതും പ്രശ്‌നമാണ്. കട ഉടമകൾ വിവരങ്ങൾ കൈമാറാൻ തയാറായില്ലെങ്കിൽ വാക്കുതർക്കത്തിന് ഉൾപ്പെടെ കാരണമായേക്കാം. ഇത്തരം സിർട്ടിഫിക്കറ്റുകൾ കടയുടമകൾ ഉപഭോക്താക്കൾക്ക് കാണാവുന്ന രീതിയിൽ പ്രദർശിപ്പിക്കുക മാത്രമാണ് ഇതിനൊരു പോംവഴി. മഴക്കാലമായതോടെ പകർച്ചവ്യാധി രോഗങ്ങളിൽ നിന്ന് രക്ഷനേടാൻ ജനങ്ങൾ പരമാവധി ശ്രദ്ധിക്കണം. പഴകിയ വസ്തുക്കൾ സൂക്ഷിച്ച കടയുടമയിൽ നിന്ന് 3000 രൂപ പിഴ ഈടാക്കി. വരുംദിവസങ്ങളിൽ ഹോട്ടലുകളിലും കുൾബാറുകളിലും ഉൾപ്പെടെ പരിശോധന ശക്തമാക്കുമെന്ന് ഇരിട്ടി നഗരസഭ ആരോഗ്യ വിഭാഗം അറിയിച്ചു.

പണിമുടക്ക് ദിനം ജോലിക്കെത്തിയവർക്കു നേരെ കൈയേറ്റവും ഭീഷണിയുമെന്ന് എൻജിഒ അസോ.

കണ്ണൂർ: ഇടത് സംഘടനകൾ ആഹ്വാനം ചെയ്ത ദേശീയ പണിമുടക്ക് ദിനത്തിൽ പണിമുടക്കിൽ പങ്കെടുക്കാതെ സർക്കാർ ഓഫീസുകളിലും സ്കൂളുകളിലും ജോലിക്കെത്തിയവർക്ക് നേരെ കൈയേറ്റവും ഭീഷണിയും നടന്നതായും ജീവനക്കാരുടെ വാഹനം കേടുവരുത്തുകയും ചെയ്തതായി കേരള എൻജിഒ അസോസിയേഷൻ കണ്ണൂർ ജില്ലാ കമ്മിറ്റി ആരോപിച്ചു. സംഭവത്തിൽ പ്രതിഷേധിച്ച് ഇന്ന് ഉച്ചയ്ക്ക് കേരള എൻജിഒ അസോസിയേഷൻ കളക്ടറേറ്റ് പരിസരത്ത് പ്രകടനം നടത്തുമെന്നും ജില്ലാ കമ്മിറ്റി അറിയിച്ചു. കളക്ടറേറ്റ്, പിണറായി സിഎച്ച്സി, തലശേരി ബ്രണ്ണൻ കോളജ് ബിഎഡ് സെന്‍റർ, പേരാവൂർ ബ്ലോക്ക് പഞ്ചായത്ത് ഓഫീസ്, പെരിങ്ങോം വില്ലേജ് ഓഫീസ് തുടങ്ങിയ സ്ഥലങ്ങളിൽ ജോലിക്ക് ഹാജരായവരെയാണ് പണിമുടക്ക് അനുകൂലികൾ ഭീഷണിപ്പെടുത്തി കൈയേറ്റം നടത്തിയത്. പെരിങ്ങോം വില്ലേജ് ഓഫീസ് ജീവനക്കാരന്‍റെ ഇരുചക്രവാഹനം കേടുവരുത്തുകയും ചെയ്തു. കേരളത്തിലെ സർക്കാർ ജീവനക്കാരുടെ ആനുകൂല്യങ്ങളും ശന്പള പരിഷ്കരണങ്ങളും നിഷേധിക്കുന്ന ഇടത് അനുകൂല സംഘടനകൾ ഇതെല്ലാം മറന്ന് കേന്ദ്ര സർക്കാരിനെതിരെ മാത്രം പണിമുടക്ക് സമരം നടത്തുന്നത് ഇരട്ടത്താപ്പാണെന്ന് കേരള എൻജിഒ അസോസിയേഷൻ ജില്ലാ കമ്മിറ്റി കുറ്റപ്പെടുത്തി. പണിമുടക്ക് ദിനത്തിൽ ഇടത് യൂണിയനിലുള്ളവർ പോലും ഓഫീസിൽ ഹാജരാവുകയും എത്തിപ്പെടാൻ കഴിയാത്തവർ അവധിയെടുക്കുകയും ചെയ്ത് ഇടത് സംഘടനാ നേതാക്കളെ പ്രകോപിതരാക്കി. സർക്കാർ സ്പോൺസേർഡ് സമരമായിട്ടും സമരം വിജയിപ്പിക്കാൻ കൈയൂക്കിന്‍റെ സ്ഥിതിയിലേക്ക് പോകേണ്ടി വന്ന സാഹചര്യം കേരളത്തിൽ ആദ്യമാണെന്നും എൻജിഒ അസോസിയേഷൻ പ്രസ്താവനയിൽ പറഞ്ഞു.

പണിമുടക്കിൽ സ്തംഭിച്ച് ജില്ല

കണ്ണൂർ: കേന്ദ്രസർക്കാരിന്‍റെ തൊഴിലാളി വിരുദ്ധ നയങ്ങൾക്കെതിരേ കേന്ദ്ര ട്രേഡ് യൂണിയനുകൾ ആഹ്വാനം ചെയ്ത അഖിലേന്ത്യാ പണിമുടക്ക് കണ്ണൂർ ജില്ലയിൽ പൂർണം. വിദ്യാഭ്യാസസ്ഥാപനങ്ങളൊന്നും പ്രവർത്തിച്ചില്ല. സർക്കാർ ഓഫീസിൽ‌ ഹാജർ നില കുറവായിരുന്നു. സർക്കാർ ഓഫീസിൽ സമരക്കാർ എത്തി ജീവനക്കാരെ ഇറക്കിവിട്ട സംഭവങ്ങളും ഉണ്ടായിരുന്നു. കെഎസ്ആർടിസി ബസുകളൊന്നും സർവീസ് നടത്തിയില്ല. ഇന്നലെ രാവിലെ കണ്ണൂർ ഡിപ്പോയിൽ സർവീസ് നടത്താൻ ചിലർ തയാറായെങ്കിലും സിഐടിയു പ്രവർത്തകർ ഇവരെ തടയുകയായിരുന്നു. പണിമുടക്കിയ തൊഴിലാളികൾ കണ്ണൂർ, പയ്യന്നൂർ, തലശേരി, ഇരിട്ടി, തളിപ്പറന്പ്, മട്ടന്നൂർ നഗരങ്ങളിൽ പ്രകടനം നടത്തി. തോട്ടട ഗവ. ഐടിഐയിൽ എത്തിയ സമരാനുകൂലികൾ ജോലിക്കെത്തിയ അധ്യാപകരെയും ജീവനക്കാരെയും ഭീഷണിപ്പെടുത്തി. പോലീസെത്തിയാണ് സമരാനുകൂലികളെ പിന്തിരിപ്പിച്ചത്. ഇരിട്ടിയിൽ സ്ഥാപനങ്ങൾ അടപ്പിച്ചു; വീരാജ്പേട്ടയിൽ ജനജീവിതം സാധാരണ ഗതിയിൽ ഇരിട്ടി: ഇരിട്ടി ടൗണിൽ ദേശീയ പണിമുടക്ക് ദിനത്തിൽ തുറന്ന സ്ഥാപനങ്ങൾ സമരാനുകൂലികൾ അടപ്പിച്ചു. സമരാനുകൂലികൾ പ്രകടനമായെത്തി പോസ്റ്റ് ഓഫീസ് അടക്കമുള്ള കേന്ദ്ര-സംസ്ഥാന സർക്കാർ ഓഫീസുകൾ അടപ്പിക്കുകയായിരുന്നു. അതേസമയം, തൊട്ടടുത്ത പ്രദേശവും അയൽ സംസ്ഥാനവുമായ കർണാടകയിലെ വീരാജ്പേട്ടയിൽ പണിമുടക്ക് ബാധിച്ചില്ല. ഇവിടെ ജനജീവിതം സാധാരണ പോലെയായിരുന്നു. ഫെഡറൽ ബാങ്കിലേക്ക് പ്രകടനമായെത്തിയ സമരക്കാരെ കണ്ട് ബാങ്ക് ജീവനക്കാർ ഷട്ടർ അകത്ത് നിന്ന് പൂട്ടാൻ ശ്രമിച്ചെങ്കിലും സമരാനുകൂലികൾ ബാങ്കിനകത്തേക്ക് ഇരച്ചു കയറി ബാങ്കിന്‍റെ പ്രവർത്തനം നിർത്തിവയ്പ്പിക്കുകയായിരുന്നു. സബ് രജിസ്ട്രാർ ഓഫീസിലെ ചില ജീവനക്കാർ പണിമുടക്കനുകൂലികളുടെ ആവശ്യം നിരാകരിച്ചത് വാക്കേറ്റത്തിനിടയാക്കിയെങ്കിലും പിന്നീട് ഓഫീസ് അടക്കുകയായിരുന്നു. കീഴൂരിലെ മുത്തൂറ്റ് മൈക്രോ ഫിൻകോർപ്പുംഅടപ്പിച്ചു. ഇരിട്ടി ടൗണിൽ ആശുപത്രികളും മെഡിക്കൽ ഷോപ്പുകളും മാത്രമാണ് തുറന്നു പ്രവർത്തിച്ചത്. ഇരിട്ടി ഹൈസ്‌കൂൾ വിഭാഗം അധ്യാപകരും അനധ്യാപകരും എത്തിയതിനെ തുടർന്ന് തുറന്ന് പ്രവർത്തിച്ചു. ഹയർ സെക്കൻഡറി വിഭാഗത്തിൽ ജീവനക്കാർ ആരും എത്തിയിരുന്നില്ല. ഹൈസ്‌കൂൾ വിഭാഗത്തിൽ 42 പേരിൽ 29 ജീവനക്കാർ ജോലിക്ക് ഹാജരായി. ഹയർ സെക്കൻഡറി വിഭാഗത്തിൽ ആറുപേരാണ് പണിമുടക്കിയത്. വൈകുന്നേരം നാലിന് ശേഷമാണ് ഹൈസ്‌കൂൾ ഓഫീസ് അടച്ച് എല്ലാവരും പോയത്. ഇരിട്ടി താലൂക്ക് ഓഫീസിൽ മൂന്ന് ജീവനക്കാർ മാത്രമാണ് എത്തിയത്. സമരക്കലി ഭക്ഷണത്തോടും ഗവ. ബ്രണ്ണൻ സ്കൂളിൽ സമരാനുകൂലികൾ ഭക്ഷണം വലിച്ചെറിഞ്ഞു. ഇന്നലെ രാവിലെ 11 ഓടെയാണ് സംഭവം. ബ്രണ്ണൻ സ്കൂളിൽ കോൺഗ്രസ് അധ്യാപക സംഘടനയിൽപ്പെട്ടവരും ഇടത് അനുകൂലസംഘടനയിൽപ്പെട്ടവരുമായ എട്ട് അധ്യാപകർ ജോലിക്ക് ഹാജരായിരുന്നു. ഇതിനിടയിൽ, സമരാനുകൂലികൾ സ്കൂളിൽ എത്തുകയും പുറത്തുപോകുവാൻ ആവശ്യപ്പെടുകയുമായിരുന്നു. ഇതോടെ, അധ്യാപകർ ജോലി മതിയാക്കി പിരിഞ്ഞു പോകുവാൻ തയാറെടുക്കുകയായിരുന്നു. ഇതിനിടയിൽ, സ്കൂളിലെ പ്യൂണിന് ഒരു അധ്യാപിക താൻ കൊണ്ടുവന്ന ഉച്ചഭക്ഷണം നല്കുകയായിരുന്നു. എന്നാൽ, ഉച്ചഭക്ഷണം തട്ടിപ്പറിച്ച് സമരാനുകൂലി വലിച്ചെറിയുകയായിരുന്നു. പഴയങ്ങാടിയിൽ സമരക്കാർ വാഹനം തടഞ്ഞു; സമരാനുകൂലികളും പോലീസും വാക്കേറ്റവും പഴയങ്ങാടി: പഴയങ്ങാടിയിൽ സംയുക്ത തൊഴിലാളി യൂണിയന്‍റെ ന നേതൃത്വത്തിൽ വാഹനങ്ങൾ തടഞ്ഞതിനെ തുടർന്ന് സമരാനുകൂലികളും പോലീസും തമ്മിൽ വാക്കേറ്റവും ഉന്തും തള്ളും. പഴയങ്ങാടി ബസ് സ്റ്റാൻഡ് പരിസരത്ത് സിഐടിയുവിന്‍റെ നേതൃത്വത്തിലായിരുന്നു പണിമുടക്ക് വിവരം അറിയാതെ ഇതരസംസ്ഥാന ഡ്രൈവർമാർ ഓടിച്ച നാഷണൽ പെർമിറ്റ് ലോറികൾ ഉൾപ്പടെയുള്ള വാഹനങ്ങളും സ്വകാര്യ വാഹനങ്ങളുമായിരുന്നു തടഞ്ഞത്. ഇതേതുടർന്ന് യാത്രക്കാരും സമരക്കാരും തമ്മിൽ വാക്കേറ്റമുണ്ടായി. വിവരമറിഞ്ഞ് പഴയങ്ങാടി എസ്ഐ കെ. സുഹൈലിന്‍റെ നേതൃത്വത്തിലുള്ള പോലീസ് സ്ഥലത്തെത്തി വാഹനങ്ങളെ തടയരുതെന്ന് നിർദേശിച്ചെങ്കിലും സമരക്കാർ അംഗീകരിച്ചില്ല. ഇതോടെ സമരക്കാരും പോലീസും തമ്മിൽ വാക്കേറ്റമുണ്ടാകുകയും ഉന്തും തള്ളിലും കലാശിക്കുകയുമായിരുന്നു. തുടർന്ന് പോലീസ് സമരക്കാരുമായി ചർച്ച നടത്തുക‍യും ഒരു മണിക്കൂറിന് ശേഷം തടഞ്ഞു വച്ച സ്വകാര്യ വാഹനങ്ങളെ പോകാൻ സമരക്കാർ അനുവദിക്കുകയുമായിരുന്നു. ബൈപാസിൽ വാഹനങ്ങൾ തടഞ്ഞു മാഹി: മുഴപ്പിലങ്ങാട്-മാഹി ബൈപാസിൽ ചരക്ക് ലോറികൾ സമരക്കാർ തടഞ്ഞു. പെരിങ്ങാടി സിഗ്നൽ പരിസരത്താണ് വാഹനങ്ങളെ പണിമുടക്കനുകൂലികൾ തടഞ്ഞത്. ഒരു മണിക്കൂറിനകം ബൈപാസിന്‍റെ ഇരുവശങ്ങളിലും ചരക്ക് ലോറികളുടെ നീണ്ട നിര രൂപപ്പെട്ടു. പണിമുടക്കിനെ കുറിച്ചറിയാതെ വാഹനം ഓടിച്ചു വന്ന അന്യസംസ്ഥാനങ്ങളിൽ നിന്നുള്ള ലോറികളായിരുന്നു തടഞ്ഞിട്ടത്. വാഹനം തടഞ്ഞത് ലോറി ജീവനക്കാർ ചോദ്യം ചെയ്തതിനെ തുടർന്ന് വാക്കേറ്റമുണ്ടായി. വിവരമറിഞ്ഞ് പള്ളൂർ എസ്ഐ വി.പി. സുരേഷിന്‍റെ നേതൃത്വത്തിലുള്ള പോലീസ് സ്ഥലത്തെത്തി വാഹനം തടഞ്ഞവരുമായി ചർച്ച നടത്തി പ്രശ്നം രമ്യമായി പരിഹരിക്കുകയായിരുന്നു. തുടർന്ന ചരക്ക് ലോറികളെ പോകാൻ അനുവദിച്ചു. മാഹിയിൽ സ്കൂൾ വിട്ടില്ല; അധ്യാപകരെ സമരക്കാർ തടഞ്ഞുവച്ചു സ്കൂൾ വിടണമെന്ന സമരാനുകൂലികളുടെ ആവശ്യം അംഗീകരിക്കാത്തതിനെ തുട‌ർന്ന് സ്കൂളിൽ സംഘർഷം. പന്തക്കൽ ഐ.കെ. കുമാരൻ ഹയർസെക്കൻഡറി സ്കൂളിലായിരുന്നു സിപിഎം പ്രവർത്തകരും വൈസ് പ്രിൻസിപ്പലും തമ്മിൽ വാക്കേറ്റവും സംഘർഷവുമുണ്ടായത്. രാവിലെ ക്ലാസ് ആരംഭിച്ചതിന് ശേഷം സിപിഎം പ്രവർത്തകർ സ്കൂളിലെത്തി വൈസ് പ്രിൻസിപ്പൽ ഷീബയുമായി സംസാരിച്ച് ക്ലാസ് വിടണമെന്ന് ആവശ്യപ്പെട്ടു. എന്നാൽ, മാഹി റീജണൽ അഡ്മിനിസ്ട്രേറ്ററുടെ അനുമതി ഉണ്ടെങ്കിൽ മാത്രമേ സ്കൂൾ വിടാൻ പറ്റൂ എന്ന് വൈസ് പ്രിൻസിപ്പൽ അറിയിച്ചു. ഇതംഗീകരിക്കാൻ സമരക്കാർ തയാറായില്ല. ഇതോടെ സ്കൂൾ പരിസരത്ത് കൂടുതൽ സമരാനുകൂലികൾ സംഘടിപ്പച്ചെത്തി. മാഹി പോലീസ് സൂപ്രണ്ട് ജി. ശരവണന്‍റെ പന്തക്കൽ എസ്ഐ പി. ഹരിദാസൻ, പള്ളൂർ എസ്ഐ വി.പി. സുരേഷ് ബാബു എന്നിവരടക്കമുള്ള പോലീസും സ്ഥലത്തെത്തി. സ്കൂൾ സാധാരണ പോലെ വൈകുന്നേരം നാലുവരെ പ്രവർത്തിച്ച ശേഷമാണ് വിട്ടത്. സ്കൂൾ വിട്ടതിനു ശേഷം സ്വന്തം വാഹനങ്ങളിലെത്തിയ അധ്യാപകരും ജീവനക്കാരും തിരിച്ചുപോകുന്നത് സമരക്കാർ തടഞ്ഞു. ഇവരെ പോലീസ് വാഹനത്തിൽ സ്കൂളിൽ നിന്നും മാറ്റാൻ ശ്രമിച്ചെങ്കിലും സമരക്കാർ പോലീസ് വാഹനം തടഞ്ഞ് മുദ്രാവാക്യം മുഴക്കി. ഇതോടെ സമരക്കാരെ പോലീസ് ബലം പ്രയോഗിച്ച് മാറ്റാൻ ശ്രമിച്ചത് ഉന്തിലും തള്ളിലും കലാശിച്ചു. സമരക്കാരെ ബലമായി മാറ്റിയാണ് അധ്യാപകരെയും ജീവനക്കാരെയും പോലീസ് സ്കൂളിൽ നിന്നും പുറത്തെത്തിച്ചത്. ഇതോടെ സമരക്കാരും പിരിഞ്ഞു പോകുകയായിരുന്നു.

സയൻസ് ഓൺ വീൽസ് പ്രോഗ്രാം സമാപിച്ചു

ചെമ്പേരി: സ്കൂൾ വിദ്യാർഥികളിൽ ശാസ്ത്ര അഭിരുചി വളർത്തി സയൻസ് പഠനം എളുപ്പമാക്കുന്നതിനായി ചെമ്പേരി റോട്ടറി ക്ലബിന്‍റെ ആഭിമുഖ്യത്തിൽ മലയോര മേഖലയിലെ വിവിധ സ്കൂളുകളിലായി നടത്തിവന്ന സയൻസ് ഓൺ വീൽസ് പ്രോഗ്രാം 'വിജ്ഞാൻ രഥ് ' സമാപിച്ചു. കഴിഞ്ഞ രണ്ടാഴ്ചകളിലായി മലയോരത്തെ 21 സ്കൂളുകളിലാണ് ശാസ്ത്ര പരീക്ഷണ ബോധവത്കരണ പരിപാടി നടത്തിയത്. തമിഴ്നാട്ടിലെ വിരുതുനഗർ റോട്ടറി ക്ലബ് മെംബറായ ഇദയം ഓയിൽ കമ്പനി ഉടമ പി.ഡി.ജി. മുത്തു സ്പോൺസർ ചെയ്ത് വടിവേലു രാമയ്യ ചെയർമാനായി ഫുഡ് സയന്‍റിസ്റ്റ് ഡോ. പശുപതി ആരംഭിച്ചതാണ് സയൻസ് ഓൺ വീൽസ് പ്രോഗ്രാം. കഴിഞ്ഞ പതിനഞ്ച് വർഷങ്ങൾക്കിടയിൽ തമിഴ്നാട്ടിലും കർണാടകയിലുമായി ഇരുപത്തഞ്ച് ലക്ഷത്തോളം വിദ്യാർഥികൾക്ക് മുന്നിൽ അവതരിപ്പിച്ച പരിപാടി ചെമ്പേരി റോട്ടറി ക്ലബാണ് കേരളത്തിൽ ആദ്യമായി മലയോര ഗ്രാമമായ ചെമ്പേരിയിൽ എത്തിക്കുന്നത്. ചെമ്പേരി നിർമല ഹൈസ്കൂളിൽ നടന്ന സമാപന ചടങ്ങിൽ ചെമ്പേരി റോട്ടറി ക്ലബ് പ്രസിഡന്‍റ് മാർട്ടിൻ മാത്യു അധ്യക്ഷത വഹിച്ചു. റോട്ടറി ക്ലബ് പ്രോഗ്രാം ഡയറക്ടർ സുനിൽ, സയൻസ് ഓൺ വീൽസ് കോ ഓർഡിനേറ്റർമാരായ അറിവരശൻ, നവീൻകുമാർ, സതീഷ് കുമാർ എന്നിവർ നേതൃത്വം നൽകി.

പുതിയ പാക്കേജ് ഉടൻ പ്രഖ്യാപിക്കണം: സോണി സെബാസ്റ്റ്യൻ

ആലക്കോട്: വയനാട്-കരിന്തളം 400 കെവി വൈദ്യുത ലൈൻ കടന്നുപോകുമ്പോൾ വീടും സ്ഥലവും വിളകളും നഷ്ടപ്പെടുന്ന കൃഷിക്കാർക്ക് വേണ്ടി വൈദ്യുതി മന്ത്രി കെ. കൃഷ്ണൻകുട്ടി പ്രഖ്യാപിച്ച നഷ്ടപരിഹാര പാക്കേജിലെ അപാകതകൾ പരിഹരിച്ച് പുതിയ പാക്കേജ് ഉടൻ പ്രഖ്യാപിക്കണമെന്ന് കെപിസിസി ജനറൽ സെക്രട്ടറി സോണി സെബാസ്റ്റ്യൻ ആവശ്യപ്പെട്ടു. ഭൂമിയും വിളകളും വീടും നഷ്ടപ്പെടുന്ന കർഷകരെ പൂർണമായി വിശ്വാസത്തിൽ എടുക്കാതെ ഏകപക്ഷീയമായി പ്രഖ്യാപിച്ച നഷ്ടപരിഹാര പാക്കേജിനെക്കുറിച്ച് വ്യാപകമായ പരാതികളാണ് ഉയർന്നുവന്നിരിക്കുന്നത്. ഈ സാഹചര്യത്തിൽ ഭൂമിയും വിളകളും വീടും നഷ്ടപ്പെടുന്ന കർഷകരുടെ ഭൂമിക്കും വിളകൾക്കും അതാത് പ്രദേശത്തെ ന്യായവില ഉറപ്പാക്കാനുളള നടപടിയാണ് സർക്കാർ സ്വീകരിക്കേണ്ടതെന്ന് സോണി സെബാസ്റ്റ്യൻ പറഞ്ഞു. മുന്നോട്ടുവച്ച ആവശ്യങ്ങൾ പരിഗണിക്കാതെ ഏകപക്ഷീയമായ പാക്കേജ് പ്രഖ്യാപനം അടിച്ചേൽപ്പിക്കുന്നത് ഒരു കാരണവശാലും അംഗീകരിക്കാൻ കഴിയില്ലന്നും അദ്ദേഹം പറഞ്ഞു. ഭൂമി നഷ്ടപ്പെടുന്ന കർഷകർക്ക് വിളകൾക്കും ഭൂമിക്കും വീടിനും മതിയായ നഷ്ടപരിഹാരം ഉറപ്പുവരുത്താതെ ഭൂമിയിൽ കടന്നു കയറി നിർമാണ പ്രവർത്തികൾ ചെയ്യാനുള്ള കെഎസ്ഇബി ഉദ്യോഗസ്ഥരുടെ ശ്രമം കർഷകരെ അണിനിരത്തി നേരിടും. കൃഷിക്കാരെ വഴിയാധാരമാക്കുന്ന കെഎസ്ഇബിയുടെ നടപടിയെ ഒരു കാരണവശാലും അംഗീകരിക്കാൻ കഴിയില്ല. വയനാട് മുതൽ കാസർഗോഡ് വരെ 100 കണക്കിന് കൃഷിക്കാരെ ബാധിക്കുന്ന പ്രശ്നത്തിൽ സർക്കാർ അടിയന്തരമായി ഇടപെട്ട് കൂട്ടായ ചർച്ചയ്ക്ക് ശേഷം മതിയായ നഷ്ടപരിഹാര പാക്കേജ് പ്രഖ്യാപിക്കണമെന്നും സോണി സെബാസ്റ്റ്യൻ ആവശ്യപ്പെട്ടു.

പണിമുടക്കിൽ സ്തംഭിച്ച് ജില്ല

കണ്ണൂർ: കേന്ദ്രസർക്കാരിന്‍റെ തൊഴിലാളി വിരുദ്ധ നയങ്ങൾക്കെതിരേ കേന്ദ്ര ട്രേഡ് യൂണിയനുകൾ ആഹ്വാനം ചെയ്ത അഖിലേന്ത്യാ പണിമുടക്ക് കണ്ണൂർ ജില്ലയിൽ പൂർണം. വിദ്യാഭ്യാസസ്ഥാപനങ്ങളൊന്നും പ്രവർത്തിച്ചില്ല. സർക്കാർ ഓഫീസിൽ‌ ഹാജർ നില കുറവായിരുന്നു. സർക്കാർ ഓഫീസിൽ സമരക്കാർ എത്തി ജീവനക്കാരെ ഇറക്കിവിട്ട സംഭവങ്ങളും ഉണ്ടായിരുന്നു. കെഎസ്ആർടിസി ബസുകളൊന്നും സർവീസ് നടത്തിയില്ല. ഇന്നലെ രാവിലെ കണ്ണൂർ ഡിപ്പോയിൽ സർവീസ് നടത്താൻ ചിലർ തയാറായെങ്കിലും സിഐടിയു പ്രവർത്തകർ ഇവരെ തടയുകയായിരുന്നു. തട്ടുകടകൾ പോലും പ്രവർത്തിച്ചിരുന്നില്ല. പഴയങ്ങാടിയിൽ ദേശീയപാതയിൽ ചരക്കുവാഹനങ്ങൾ സമരാനുകൂലികൾ തടഞ്ഞത് പോലീസും പ്രതിഷേധക്കാരും തമ്മിൽ വാക്കേറ്റത്തിനിടയാക്കി. പണിമുടക്കിയ തൊഴിലാളികൾ കണ്ണൂർ, പയ്യന്നൂർ, തലശേരി, ഇരിട്ടി, തളിപ്പറന്പ്, മട്ടന്നൂർ നഗരങ്ങളിൽ പ്രകടനം നടത്തി. തോട്ടട ഗവ. ഐടിഐയിൽ എത്തിയ സമരാനുകൂലികൾ ജോലിക്കെത്തിയ അധ്യാപകരെയും ജീവനക്കാരെയും ഭീഷണിപ്പെടുത്തി. പോലീസെത്തിയാണ് സമരാനുകൂലികളെ പിന്തിരിപ്പിച്ചത്. പഴയങ്ങാടിയിൽ സമരക്കാർ വാഹനം തടഞ്ഞു; സമരാനുകൂലികളും പോലീസും വാക്കേറ്റവും പഴയങ്ങാടി: പഴയങ്ങാടിയിൽ സംയുക്ത തൊഴിലാളി യൂണിയന്‍റെ ന നേതൃത്വത്തിൽ വാഹനങ്ങൾ തടഞ്ഞതിനെ തുടർന്ന് സമരാനുകൂലികളും പോലീസും തമ്മിൽ വാക്കേറ്റവും ഉന്തും തള്ളും. പഴയങ്ങാടി ബസ് സ്റ്റാൻഡ് പരിസരത്ത് സിഐടിയുവിന്‍റെ നേതൃത്വത്തിലായിരുന്നു പണിമുടക്ക് വിവരം അറിയാതെ ഇതരസംസ്ഥാന ഡ്രൈവർമാർ ഓടിച്ച നാഷണൽ പെർമിറ്റ് ലോറികൾ ഉൾപ്പടെയുള്ള വാഹനങ്ങളും സ്വകാര്യ വാഹനങ്ങളുമായിരുന്നു തടഞ്ഞത്. ഇതേതുടർന്ന് യാത്രക്കാരും സമരക്കാരും തമ്മിൽ വാക്കേറ്റമുണ്ടായി. വിവരമറിഞ്ഞ് പഴയങ്ങാടി എസ്ഐ കെ. സുഹൈലിന്‍റെ നേതൃത്വത്തിലുള്ള പോലീസ് സ്ഥലത്തെത്തി വാഹനങ്ങളെ തടയരുതെന്ന് നിർദേശിച്ചെങ്കിലും സമരക്കാർ അംഗീകരിച്ചില്ല. ഇതോടെ സമരക്കാരും പോലീസും തമ്മിൽ വാക്കേറ്റമുണ്ടാകുകയും ഉന്തും തള്ളിലും കലാശിക്കുകയുമായിരുന്നു. തുടർന്ന് പോലീസ് സമരക്കാരുമായി ചർച്ച നടത്തുക‍യും ഒരു മണിക്കൂറിന് ശേഷം തടഞ്ഞു വച്ച സ്വകാര്യ വാഹനങ്ങളെ പോകാൻ സമരക്കാർ അനുവദിക്കുകയുമായിരുന്നു. ശ്രീകണ്ഠപുരം: പണിമുടക്കിയ തൊഴിലാളി സംഘടനകൾ സംയുക്തസമരസമിതിയുടെ ആഭിമുഖ്യത്തിൽ മണ്ഡലം കേന്ദ്രങ്ങളിലും പഞ്ചായത്ത് കേന്ദ്രങ്ങളിലും പ്രകടനം നടത്തി ശ്രീകണ്ഠപുരത്ത് നടന്ന പ്രകടനത്തിന് നേതാക്കളായ എം.സി. ഹരിദാസൻ, സി. രവീന്ദ്രൻ, പി. മാധവൻ, സി. സന്തോഷ്, രാമചന്ദ്രൻ, പി. ഗോവിന്ദൻ, ടി. ഗീത എന്നിവരും മലപ്പട്ടത്ത് ഇ.വി. ഉണ്ണികൃഷ്ണൻ, എ. പുരുഷോത്തമൻ എന്നിവരും യുഡിടിഎഫിന്‍റെ ആഭിമുഖ്യത്തിൽ ശ്രീകണ്ഠപുരത്ത് നടത്തിയ പ്രകടനത്തിന് പി.ടി. കുര്യാക്കോസ്, എൻ.പി. ബക്കർ ഹാജി, കെ. ഇബ്രാഹിം എന്നിവരും നേതൃത്വം നൽകി. ശ്രീകണ്ഠപുരത്തെ ഒഴിഞ്ഞ റോഡുകളിൽ കുട്ടികൾ സ്കേറ്റിംഗും സൈക്കിളിംഗും നടത്തി.

ശുചിമുറി മാലിന്യം തോട്ടിലേക്ക് ഒഴുക്കി; ഹോട്ടല്‍ നഗരസഭ അടപ്പിച്ചു

തളിപ്പറമ്പ്: പൊതുപണിമുടക്കിന്‍റെ മറവില്‍ പട്ടാപ്പകല്‍ ഹോട്ടലിലെ കക്കൂസ് മാലിന്യം തോട്ടിലേക്ക് പന്പ് ചെയ്ത് ഒഴുക്കി. സംഭവത്തെ തുടർന്ന നഗരസഭാധികൃതർ ഹോട്ടൽ അടപ്പിച്ചു. ഇന്നലെ ഉച്ചയോടെ തളിപ്പറന്പ് ചിറവക്കിലെ ബാംബു ഫ്രഷ് റസ്റ്റോറന്‍റിലെ ശുചിമുറി മാലിന്യമാണ് കീഴാറ്റൂർ തോട്ടിലേക്ക് ഒഴുക്കിവിട്ടത്. കടുത്ത ദുർഗന്ധത്തെ തുടർന്ന് പ്രദേശവാസികൾ അന്വേഷിച്ചപ്പോഴാണ് ഹോട്ടലിലെ ശുചിമുറി മാലിന്യം ഒഴുക്കി വിട്ടതാണെന്ന് മനസിലായത്. ഇതോടെ കീഴാറ്റൂരില്‍ നിന്നും എത്തിയ നാട്ടുകാര്‍ പ്രതിഷേധവുമായി ഹോട്ടൽ വളയുകയായിരുന്നു. നഗരസഭാ വൈസ് ചെയര്‍മാന്‍ കല്ലിങ്കീല്‍ പദ്മനാഭന്‍, സ്ഥിരം സമിതി അധ്യക്ഷന്‍മാരായ കെ. നബീസബീവി, പി.പി. മുഹമ്മദ്‌ നിസാര്‍, കൗണ്‍സിലര്‍മാരായ കെ.എം. ലത്തീഫ്, കെ. രമേശന്‍, സിപിഎം നോര്‍ത്ത് ലോക്കല്‍ സെക്രട്ടറി കെ.ബിജുമോന്‍ എന്നിവരും സ്ഥലത്തെത്തിയിരുന്നു. തളിപ്പറന്പ് പോലീസും സ്ഥലത്തെത്തി. സെപ്റ്റിക് ടാങ്ക് പ്രശ്‌നത്തില്‍ ശാശ്വതപരിഹാരം കണ്ടാൽ മാത്രമേ ഹോട്ടൽ തുറന്നു പ്രവർത്തിപ്പിക്കാൻ അനുവദിക്കുകയുള്ളൂവെന്ന് നഗരസഭ വൈസ്ചെയർമാൻ കല്ലിങ്കീൽ പദ്മനാഭൻ അറിയിച്ചു. റസ്റ്റോറന്‍റ് ഉടമയ്ക്കെതിരേ കേസ് ഹോട്ടലിലെ ശുചിമുറി മാലിന്യം തോട്ടിലേക്ക് ഒഴുക്കി വിട്ട സംഭവത്തിൽ ബാംബു ഫ്രഷ് റസ്റ്റോറന്‍റ് ഉടമക്കെതിരേ പോലീസ് കേസെടുത്തു. സിപിഎം തളിപ്പറന്പ് നോർത്ത് ലോക്കൽ സെക്രട്ടറി കെ. ബിജുമോൻ നൽകിയ പരാതിയിലാണ് നടപടി. ആറുമാസം തടവോ പിഴയോ രണ്ടും കൂടിയോ ശിക്ഷ ലഭിക്കാവുന്ന കുറ്റമാണ് ഹോട്ടലുടമ ചെയ്തിരിക്കുന്നത്.

കള്ളത്തോക്ക് നിര്‍മാണം: ആലക്കോട് സ്വദേശി അറസ്റ്റില്‍

രാജപുരം: കള്ളത്തോക്ക് നിര്‍മാണകേന്ദ്രത്തില്‍ പോലീസ് നടത്തിയ റെയ്ഡില്‍ ഒരാള്‍ അറസ്റ്റില്‍. കള്ളാര്‍ കോട്ടക്കുന്ന് കൈക്കളംകല്ലില്‍ താമസിക്കുന്ന കണ്ണൂര്‍ ആലക്കോട് കാര്‍ത്തികപുരം എരുത്തമാട സ്വദേശി എം.കെ.അജിത്കുമാര്‍ (55) ആണ് അറസ്റ്റിലായത്. താമസസ്ഥലത്തുനിന്ന് രണ്ടു തോക്കുകളും നിര്‍മാണത്തിലിരിക്കുന്ന ഒരു തോക്കും നിര്‍മാണസാമഗ്രികളും പിടികൂടി. പ്രതിയുടെ സഹായികളായിരുന്ന രാജപുരം പുഞ്ചക്കരയിലെ സന്തോഷ്, പരപ്പയിലെ ഷാജി എന്നിവര്‍ക്കെതിരെ രാജപുരം പോലീസ് കേസെടുത്തു. ഇവര്‍ ഒളിവിലാണ്. ഒരുമാസം മുമ്പാണ് പ്രതി ഇവിടെ താമസം ആരംഭിച്ച് ആവശ്യക്കാര്‍ക്ക് തോക്ക് നിര്‍മിച്ചുകൊടുക്കാന്‍ തുടങ്ങിയതെന്ന് പോലീസ് പറഞ്ഞു. നാടന്‍ ഒറ്റക്കുഴല്‍ തോക്കാണ് നിര്‍മിച്ചുനല്‍കിയിരുന്നത്. കഴിഞ്ഞദിവസം വൈകുന്നേരമാണ് ജില്ലാ പോലീസ് മേധാവിയുടെ നിര്‍ദേശപ്രകാരം കാഞ്ഞങ്ങാട്, ബേക്കല്‍ ഡിവൈഎസ്പിമാരുടെ സ്‌ക്വാഡുകളും രാജപുരം പോലീസ് ചേര്‍ന്ന് ഈ വീട്ടില്‍ റെയ്ഡ് നടത്തിയത്.

മഴവെള്ളത്തിനൊപ്പം തോട്ടിൽ പത ഉയർന്നു

ഇരിട്ടി: മഴ പെയ്തതിനു പിന്നാലെ തോട് വെള്ളപ്പതയോടെ നിറഞ്ഞൊഴുകിയത് പ്രദേശവാസികളെ ആശങ്കയിലാക്കുന്നു. ഉളിക്കൽ പഞ്ചായത്തിലെ നെല്ലിക്കാംപൊയിലിന് സമീപത്തെ ചുള്ളിയോട് തോടാണ് വെള്ള നിറത്തിലുള്ള പതയാൽ നിറഞ്ഞൊഴുകിയത്. ഇന്നലെ വൈകുന്നേരമാണ് തോട്ടിൽ അസാധാരണമായ നിലയിലുള്ള പത പ്രദേശത്തുകാരുടെ ശ്രദ്ധയിൽപ്പെട്ടത്. പാറക്കൽ നിന്ന് ആരംഭിക്കുന്ന തോട്ടിൽ ചുള്ളിയോട് മുതൽ ചെട്ട്യാർപീടിക പഴശി പദ്ധതി ജലസംഭരണി പ്രദേശം വരെ രണ്ടുകിലോമീറ്ററോളം ദൂരത്തിലാണ് പത പ്രത്യക്ഷപ്പെട്ടത്. വ്യവസായ സ്ഥാപനങ്ങളില്ലാത്ത മേഖലയിൽ തോട് പതഞ്ഞതിന്‍റെ കാരണം വ്യക്തമല്ല. സംഭവമറിഞ്ഞ് ആരോഗ്യവകുപ്പ് അധികൃതരും പഞ്ചായത്തധികൃതരും പോലീസും സ്‌ഥലത്തെത്തി. ജനങ്ങളോട് ജാഗ്രത പുലർത്താൻ നിർദേശിച്ചിട്ടുണ്ട്. ഏറെ നേരത്തെ പതഞ്ഞ് ഒഴുകലിനുശേഷം തോട് സാധാരണ നിലയിലായിട്ടുണ്ട്. പത ഉയരാനുണ്ടായ കാരണം എന്താണെന്ന് വ്യക്തമായിട്ടില്ല.

ഇരിട്ടി നഗരസഭാധ്യക്ഷ പരീക്ഷാച്ചൂടിലാണ്...

ബിജു പാരിക്കാപള്ളി ഇരിട്ടി: ഇരിട്ടി നഗരസഭാ ചെയർപേഴ്സൺ കെ. ശ്രീലത ഇന്നുമുതൽ പരീക്ഷ തിരക്കിലാണ്. പഠനകാലത്ത് പൂർത്തീകരിക്കാൻ കഴിയാതെപോയ സ്വപ്നങ്ങൾ സാക്ഷാത്കരിക്കുന്ന തിരക്കിൽ. സാക്ഷരതാ മിഷൻ പൊതുവിദ്യാഭ്യാസ വകുപ്പുമായി ചേർന്ന് നടത്തുന്ന ഹയർ സെക്കൻഡറി രണ്ടാം വർഷ തുല്യതാ പരീക്ഷയുടെ എട്ടാമത്തെ ബാച്ചിൽ നഗരസഭാ അധ്യക്ഷയും ഇന്നുമുതൽ പരീക്ഷ എഴുതി തുടങ്ങും. ഇരിട്ടി കീഴൂർ മഹാത്മ കോളജിൽ 1991-92 ബാച്ചിൽ പ്രീഡിഗ്രി ഒന്നാം വർഷം പഠിക്കുമ്പോൾ വിവാഹം കഴിഞ്ഞതോടെ പഠനം മുടങ്ങുകയായിരുന്നു. 35 വർഷത്തെ ഇടവേളക്ക് ശേഷമാണ് പഴയ ആഗ്രഹങ്ങൾ പൊടിതട്ടിയെടുത്ത് അധ്യക്ഷ എത്തുന്നത്. ആദ്യവർഷ പരീക്ഷയിൽ 70 ശതമാനത്തിന് മുകളിൽ മാർക്ക് നേടാൻ കഴിഞ്ഞതിന്‍റെ ആത്മവിശ്വാസം ഉണ്ടെങ്കിലും ടെൻഷനും ഇല്ലാതില്ല. ഒന്നാംവർഷ പരീക്ഷയിൽ ഡബിൾ പാസ് നേടിയതിനാൽ വിജയം ഉറപ്പാണ്. വിവാഹം കഴിഞ്ഞും പഠിക്കണമെന്ന ആഗ്രഹം ഉണ്ടായിരുന്നെങ്കിലും കുട്ടി ജനിച്ചതോടെ പഠനമെന്ന സ്വപ്‍നം മാറ്റിവെച്ച് കുടുംബമെന്ന സ്വപ്നത്തിനൊപ്പം സഞ്ചരിക്കുകയായിരുന്നു. ഇരിട്ടി നഗരസഭാ ചെയർപേഴ്സണായി ചുമതല ഏറ്റെടുത്ത ആദ്യദിവസം കാണാൻ വന്നവരുടെ കൂട്ടത്തിലുണ്ടായിരുന്ന സാക്ഷരത പ്രേരക് ഷൈമയാണ് തുടർപഠനത്തിന്‍റെ ആദ്യപ്രേരണ. ഭർത്താവും കുട്ടികളും കൂടെനിന്നതോടെ രണ്ടാം ഘട്ടം പിന്നിട്ടു. നഗരസഭയിലെ തിരക്കുകൾ കാരണം അല്പം കാലതാമസം നേരിട്ടു. നഗരസഭയുടെ സാക്ഷരതാ സമിതി ചെയർപേഴ്സൺ എന്ന നിലയിൽ പ്രവർത്തനങ്ങൾ അടുത്തറിഞ്ഞതോടെ പഠിക്കണമെന്ന താത്പര്യം ഉറപ്പിച്ചു. മറ്റു കൗൺസിലർമാരും ജീവനക്കാരും നല്ല പിന്തുണയാണ് നൽകുന്നത്. തിരക്കുകൾക്കിടയിലും ഒഴിവാക്കാൻ കഴിയാത്ത ക്ലാസുകളിൽ പഠിതാവായി എത്തും. ഇരിട്ടി നഗരസഭാ സ്റ്റാൻഡിംഗ് കമ്മറ്റി ചെയർമാൻ കെ. സോയയും നഗരസഭയിലെ എട്ട് ആശാവർക്കർമാരും ചെയർപേഴ്സണൊപ്പം പരീക്ഷ എഴുതുന്നുണ്ട്. ഇന്ന് നടക്കുന്ന പരീക്ഷയിൽ ഇരിട്ടി നഗരസഭയുടെ പരിധിയിൽ 56 പേരാണ് രണ്ടാം വർഷ തുല്യതാ പരീക്ഷ എഴുതുന്നത്. പരീക്ഷ എഴുതുന്നതിൽ ഏറ്റവും മുതിർന്ന വ്യക്തി ആറളം പഞ്ചായത്തിലെ 54 നാലുകാരനായ കെ. വിശ്വംഭരനാണ്. 23 വയസുള്ളതാണ് പ്രായം കുറഞ്ഞ പഠിതാവ്. ചാവശേരി ഹയർ സെക്കൻഡറി സ്കൂളിൽ ജൂലൈ 28 വരെയാണ് പരീക്ഷ.

കോരിക്കൊമ്പനെ കാട്ടിലേക്ക് തുരത്തി

ഇരിട്ടി: ആറളം പുനരധിവാസ മേഖലയിലിറങ്ങിയ കോരിക്കൊമ്പൻ എന്ന കാട്ടാനയെ വനത്തിലേക്ക് തുരത്തി. കാട്ടാനകളെ തുരത്തുന്നതിന്‍റെ ഭാഗമായി കഴിഞ്ഞ ദിവസം നടത്തിയ ദൗത്യത്തിലാണ് ആനയെ കാട്ടിലേക്ക് തുരത്തിയത്. കൊട്ടിയൂർ റേഞ്ചർ നിതിൻ രാജ്, ആർആർടി ഡെപ്യൂട്ടി റേഞ്ചർ ഷൈനികുമാർ എന്നിവരുടെ നേതൃത്വത്തിൽ 25 അംഗ ദൗത്യസംഘം പങ്കെടുത്തു. ഫാം ബ്ലോക്ക് ആറിൽ കൈതക്കൊല്ലി ഭാഗത്തെ ജനവാസ കേന്ദ്രത്തോട് ചേർന്നുള്ള വട്ടക്കാടിനുള്ളിൽ തമ്പടിച്ച കോരിക്കൊമ്പനെ തുരത്തിയത്. പ്രതികൂല കാലാവസ്ഥയെ അവഗണിച്ച് മണിക്കൂറുകൾ നീണ്ട പരിശ്രമത്തിനൊടുവിലാണ് ആനയെ വട്ടക്കാട് വഴി താളിപ്പാറയിലേക്കും തുടർന്ന് കോട്ടപ്പാറ ഭാഗത്ത് സ്ഥാപിച്ചിട്ടുള്ള സോളാർ തൂക്കുവേലി കടത്തി ഉരുപ്പുകുന്ന് വനഭാഗത്തേക്ക് കടത്തിവിട്ടത്. ദൗത്യത്തിൽ ആർആർടി ഇരിട്ടി, കീഴ്പള്ളി, മണത്തണ, തോലമ്പ്ര, ആറളം വൈൽഡ് ലൈഫ്, നരിക്കടവ്, ആറളം സെക്ഷൻ എന്നിവിടങ്ങളിലെ ജീവനക്കാരും പങ്കെടുത്തു.

മസ്ജിദുകൾ കേന്ദ്രീകരിച്ച് കവര്‍ച്ച: പ്രതി ആന്ധ്രയില്‍ അറസ്റ്റില്‍

കാസര്‍ഗോഡ്: മസ്ജിദുകൾ മാത്രം കേന്ദ്രീകരിച്ച് കവര്‍ച്ച നടത്തുന്ന കുപ്രസിദ്ധ മോഷ്ടാവ് ആന്ധ്രയില്‍ അറസ്റ്റില്‍. ആന്ധ്രാപ്രദേശ് വെസ്റ്റ് ഗോദാവരി അക്കിവിട് സ്വദേശി മുഹമ്മദ് സല്‍മാന്‍ അഹമ്മദ് (34) ആണ് അറസ്റ്റിലായത്. ജൂണ്‍ 24ന് കാസര്‍ഗോഡ് ചൂരിയിലെ സലഫി മസ്ജിദില്‍ നിന്ന് 3.10 ലക്ഷം രൂപയും രണ്ടു പവന്‍ സ്വര്‍ണവും ഇയാള്‍ കവര്‍ന്നിരുന്നു. കണ്ണൂര്‍ പാനൂര്‍, മലപ്പുറം, പാലക്കാട്, കസബ, ഏലത്തൂര്‍ പോലീസ് സ്റ്റേഷൻ പരിധിയിലെ മസ്ജിദിൽ മോഷണം നടത്തിയ കേസുകളില്‍ പ്രതിയാണ് ഇയാള്‍. പല സംഭവത്തിലും പരാതിയില്ല. കളവു ചെയ്ത പണം കോഴിക്കോട് ബാറില്‍ കൂട്ടുകാരുടെ കൂടെ അടിച്ചു പൊളിച്ചു തീര്‍ക്കുകയാണ് ശീലം. സിസിടിവി കേന്ദ്രികരിച്ച് നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്. കോഴിക്കോട് ആണ് ഇയാള്‍ സാധാരണ ഉണ്ടാകാറുള്ള സ്ഥലം എന്ന് മനസിലാക്കി കണ്ടെത്താന്‍ ശ്രമം നടത്തിയെങ്കിലും പിടികൂടാനായില്ല. തുടര്‍ന്ന് നടത്തിയ അന്വേഷണത്തില്‍ ഇയാള്‍ സ്വദേശമായ ആന്ധ്രായിലേക്ക് പോയിട്ടുണ്ടാകും എന്ന നിഗമനത്തില്‍ അന്വേഷണ സംഘം പ്രതിയുടെ താമസസ്ഥലത്തെത്തി ആന്ധ്രാ പോലീസിന്‍റെ സഹായത്തോടെ പിടികൂടുകയായിരുന്നു. കാസര്‍ഗോഡ് ടൗണ്‍ എസ്‌ഐ ജോജോ ജോര്‍ജ് എസ്‌സിപിമാരായ പി.സതീശന്‍, കെ.വി.രതീഷ്‌കുമാര്‍, ജയിംസ് എന്നിവര്‍ ചേര്‍ന്നാണ് പ്രതിയെ സാഹസികമായി പിടികൂടിയത്.

ഡ്രാഗണ്‍ ഫ്രൂട്ട് കൃഷിയിൽ നൂറുമേനി; വിപണിക്ക് കർഷകന്‍റെ നെട്ടോട്ടം

പെരുമ്പടവ്: പാറപ്പുറത്ത് ഡ്രാഗണ്‍ ഫ്രൂട്ട് കൃഷി നടത്തി ചപ്പാരപ്പടവ് തേറണ്ടിയിലെ കര്‍ഷകനായ പാലക്കീൽ രാജൻ നൂറുമേനി വിജയം കണ്ടെങ്കിലും വിപണി കണ്ടെത്താൻ സാധിക്കാതെ നെട്ടോട്ടത്തിലാണ്. ഒരേക്കറോളം സ്ഥലത്തെ റബർ മരങ്ങൾ മുറിച്ചുമാറ്റിയാണ് രാജന്‍റെ ഡ്രാഗൺ ഫ്രൂട്ട് കൃഷി. കോവിഡ് കാലത്താണ് രാജന് ഡ്രാഗൺ ഫ്രൂട്ട് കൃഷിയിറക്കണമെന്ന മോഹമുദിച്ചത്. റബര്‍ വിലയിടിവും തൊഴിലാളികളെ കിട്ടാത്തതുമാണ് രാജനെ മാറി ചിന്തിപ്പിച്ചത്. പത്തനംതിട്ട, കാസർഗോഡ് എന്നിവിടങ്ങളിൽ നിന്ന് തൈകൾ എത്തിച്ചു. പരീക്ഷണാടിസ്ഥാനത്തിൽ ഒരേക്കറോളം സ്ഥലത്ത് കൃഷിയിറക്കി. കോൺക്രീറ്റ് വേലിക്കല്ലുകൾ നാട്ടി തൈകൾ നട്ടു. ചെടിക്ക് പടരാന്‍ പഴയ ടയറുകളും സ്ഥാപിച്ചു. യൂട്യൂബിൽ നോക്കിയാണ് പ്രധാനമായും കൃഷി രീതികൾ പഠിച്ചത്. മൂന്നുവർഷംകൊണ്ട് രാജന്‍റെ ഡ്രാഗൺ ഫ്രൂട്ടുകൾ വിളവെടുപ്പിന് തയാറാവുകയും കഴിഞ്ഞവർഷം 200 രൂപയോളം വില ലഭിച്ചു. വില്പനയ്ക്ക് തടസങ്ങളുമുണ്ടായില്ല. മലേഷ്യൻ റെഡ്, വൈറ്റ് ഡ്രാഗൺ, ഇസ്രായേൽ യെല്ലോ, റോയൽ റെഡ്, മെക്സിക്കൻ റെഡ് തുടങ്ങിയ ഇനങ്ങളാണ് കൃഷി ചെയ്തത്. എന്നാൽ, ഈ വർഷം സ്ഥിതി ഏറെ വ്യത്യസ്തമാണ്. പ്രതീക്ഷിച്ച പോലെ തന്നെ നല്ല വിളവ് ലഭിക്കുന്നുണ്ട്. പക്ഷേ വിപണനം പ്രയാസമാണ്. വീട്ടിൽ വരുന്നവർക്ക് 180 രൂപ തോതിൽ വിൽക്കുന്നുണ്ട്. വ്യാപാര സ്ഥാപനങ്ങളിൽ എത്തിച്ചു നൽകുമ്പോൾ 120 മുതൽ 150 രൂപ വരെയാണ് ലഭിക്കുന്നത്. വലിയ ഷോപ്പുകളിൽ എത്തിച്ചാല് ഇതിലും വളരെ കുറഞ്ഞ തുകയാണ് ലഭിക്കുന്നത്. ആശങ്ക നിലനിൽക്കുന്നതിനാൽ ചെറിയ തുകയ്ക്കും വില്പന നടത്തുകയാണ്. കൂടാതെ നാടുകാണി, പയ്യന്നൂർ, പഴയങ്ങാടി, മാട്ടൂൽ എന്നിവിടങ്ങളിൽ വാഹനങ്ങളിൽ കൊണ്ടുപോയി വഴിയോര കച്ചവടവും നടത്തുന്നു. ഇത്തരത്തിൽ ദിവസം ഒരു ക്വിന്‍റലോളം പഴങ്ങൾ വിറ്റു പോകുന്നുണ്ട്. ഏപ്രിൽ മാസത്തിൽ പുഷ്പിക്കുന്ന ഡ്രാഗൺ ഫ്രൂട്ടിൽ മേയ് മുതൽ നവംബർ വരെയാണ് വിളവ് ലഭിക്കുന്നത്. ഈ വർഷം ഇനിയും 30 ക്വിന്‍റലോളം വിളവ് പ്രതീക്ഷിക്കുന്നുണ്ട്. എന്നാൽ, വിപണി ലഭിക്കാത്തതിനാൽ രാജനും കുടുംബവും നിരാശയിലാണ്.

ബിഎസ്എൻഎൽ കേബിൾ മോഷ്ടാക്കൾ അറസ്റ്റിൽ

ഉളിക്കല്‍: നുച്യാട് പാലത്തിനു സമീപത്തുനിന്ന് ബിഎസ്എന്‍എല്‍ കേബിള്‍ മോഷ്ടിച്ച രണ്ടുപേരെ ഉളിക്കൽ പോലീസ് അറസ്റ്റ് ചെയ്തു. അസം സ്വദേശികളായ മുനവര്‍ അലി ( 31), ചനോവര്‍ ഹുസൈന്‍ ( 25) എന്നിവരെയാണ് പോലീസ് സംഘം പയ്യന്നൂരില്‍ നിന്ന് അറസ്റ്റ് ചെയ്തത്. ജൂണ്‍ 28നാണ് നുച്യാട് പാലത്തില്‍ നിന്ന് ബിഎസ്എൻഎൽ കേബിള്‍ മോഷണം പോയത്. അധികൃതർ ഉളിക്കൽ പോലീസിൽ നൽകിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് സംഘം പിടിയിലായത്. പകല്‍ സമയങ്ങളില്‍ കുപ്പി പെറുക്കാനെന്ന നിലയിൽ മോഷണം നടത്തേണ്ട സ്ഥലം നിരീക്ഷിക്കും. രാത്രിയിൽ വാഹനത്തിൽ എത്തി കേബിളുകള്‍ മുറിച്ചെടുത്ത് കടക്കുന്ന രീതിയാണ് നടത്തിയിരുന്നത്. ഇരിട്ടി ഡിവൈഎസ്പി ധനഞ്ജയബാബുവിന്‍റെ നേതൃത്വത്തിലുള്ള സ്‌ക്വാഡ് അംഗങ്ങളും ഉളിക്കല്‍ പോലീസും ചേര്‍ന്ന് നടത്തിയ അന്വേഷണത്തിലാണ് പ്രതികള്‍ പിടിയിലായത്. ഒരാഴ്ചക്കുള്ളിൽ 200 ഓളം സിസിടിവി ദൃശ്യങ്ങൾ പോലീസ് പരിശോധിച്ചതില്‍ നിന്നാണ് പ്രതികളെകുറിച്ചുള്ള സൂചന ലഭിച്ചത്. സമാനമായി തളിപ്പറമ്പ് ദേശീയ പാതയിലും കേബിളുകള്‍ മോഷണം പോയതായി വിവരം ലഭിച്ചു. തുടര്‍ന്ന് അന്വേഷണ സംഘം നടത്തിയ പരിശോധനയിൽ രണ്ടുമോഷണവും ഒരേ രീതിയിൽ നടന്നതായും പ്രതികളെക്കുറിച്ചും വ്യക്തമായ തെളിവുകൾ ലഭിച്ചു. തളിപ്പറമ്പിലെ മോഷണത്തിന് ഉപയോഗിച്ച വാഹനം തന്നെ നുച്യാട് പാലത്തിലെ കേബിളുകള്‍ മോഷ്ടിക്കാൻ ഉപയോഗിച്ചതായി അന്വേഷണത്തിൽ പോലീസ് കണ്ടെത്തി. പോലീസ് പിന്തുടരുന്നതായി മനസിലാക്കിയ പ്രതികൾ അന്വേഷണം വഴി തെറ്റിക്കാനായി പല സ്ഥലങ്ങളിലൂടെയും ചുറ്റി സഞ്ചരിച്ചു. മോഷ്ടിക്കാൻ ഉപയോഗിച്ച വാഹനം പയ്യന്നൂരിലെ വര്‍ക്ക്ഷോപ്പില്‍ ഒളിപ്പിച്ചിടത്തു നിന്ന് പോലീസ് കണ്ടെടുത്തു. തുടർന്നാണ് പ്രതികളും പിടിയിലാകുന്നത്. അന്വേഷണ സംഘത്തില്‍ ഉളിക്കല്‍ സിഐ വി.എം. ഡോളി, എസ്ഐ ഷാജന്‍, സീനിയർ സിവിൽ പോലീസ് ഓഫീസർമാരായ പ്രവീണ്‍ ഊരത്തൂര്‍, തോമസ് ജോസഫ്, ഷാജി, ഇരിട്ടി സ്റ്റേഷനിലെ സ്‌ക്വാഡ് അംഗം ഷിജോയി, പെരിങ്ങോം സ്‌റ്റേഷനിലെ എസ്‌ഐ റൗഫ് എന്നിവരും ഉണ്ടായിരുന്നു. പ്രതികളെ കോടതിയിൽ ഹാജരാക്കി.

മട്ടന്നൂർ അഗ്‌നിരക്ഷാ സേനയ്ക്ക് ഇനി വെള്ളത്തിനടിയിലും ആശയവിനിമയം

മട്ടന്നൂർ: മട്ടന്നൂർ അഗ്നിരക്ഷാ സേനയ്ക്ക് വെള്ളത്തിനടിയിൽ നിന്ന് ആശയവിനിമയം നടത്താനുള്ള അത്യാധുനിക സംവിധാനമെത്തി. മട്ടന്നൂർ മഹാദേവ ക്ഷേത്രക്കുളത്തിൽ പരീക്ഷണം നടത്തി. ജലാശയങ്ങളിൽ രക്ഷാപ്രവർത്തനം നടത്തുന്ന ഡൈവർമാരുമായി സംസാരിക്കാൻ സാധിക്കുന്ന മെഷിനറിയാണ് ലഭിച്ചത്. വെള്ളത്തിൽപ്പെടുന്നവരെ രക്ഷിക്കാൻ ഇറങ്ങുമ്പോഴുള്ള സംവിധാനത്തിന്‍റെ പ്രവർത്തനമാണ് വിലയിരുത്തിയത്. അഗ്നിശമന വിഭാഗം എന്തൊക്കെ മുൻ കരുതലുകൾ സ്വീകരിക്കണമെന്നുള്ളത് മനസിലാക്കുന്നതിനാണ് മട്ടന്നൂർ അഗ്നി രക്ഷാ സേന പരിശീലനം നൽകിയത്. കുളത്തിലും മറ്റും ഇറങ്ങുന്ന സേനാംഗങ്ങളുമായി കരയിലുള്ളവർക്ക് കേബിളിന്‍റെ സഹായത്തോടെ ആശയ വിനിമയം നടത്താൻ സഹായിക്കുന്ന സംവിധാനമാണിത്. ഏതാനും മാസം മുമ്പാണ് മട്ടന്നൂർ അഗ്നിരക്ഷാ സേനക്ക് ഇത് ലഭിച്ചത്.

കുളത്തിൽ കുളിക്കുന്നതിനിടെ വിദ്യാർഥി മുങ്ങിമരിച്ചു

വളപട്ടണം: സുഹൃത്തുകൾക്കൊപ്പം കുളത്തിൽ കുളിക്കുന്നതിനിടെ വിദ്യാർഥി മുങ്ങിമരിച്ചു. വളപട്ടണം സിഎച്ച് മുഹമ്മദ് കോയ സ്മാരക ഗവ. എച്ച്എസ്എസ് പത്താം ക്ലാസ് വിദ്യാർഥിയും അഴീക്കലിലെ മനാഫ്-സുഹറാബി ദന്പതികളുടെ മകനുമായ സമദ് (15) ആണ് മരിച്ചത്. ചൊവ്വാഴ്ച വൈകുന്നേരം കക്കുളങ്ങര മസ്ജിദിലെ കുളത്തിൽ കുളിക്കുന്നതിനിടെയായിരുന്നു അപകടം. മുങ്ങിപ്പോയ സമദിനെ ഉടൻ നാട്ടുകാരും പോലീസും ചേർന്ന് പുറത്തെടുത്ത് ആശുപത്രിയിലെത്തിച്ചെങ്കിലും രാത്രി 11ഓടെ മരിച്ചു.

ഓട്ടോമറിഞ്ഞ് ഡ്രൈവർ മരിച്ചു

ഇരിട്ടി: ഓട്ടോറിക്ഷ മറിഞ്ഞ് ഡ്രൈവർ മരിച്ചു. മലയോര ഹൈവേയിൽ കരിക്കോട്ടക്കരി-എടൂർ റോഡിൽ കൊട്ടുകപ്പാറ കാലിവളവിൽ ഇന്നലെ രാവിലെ പത്തോടെയാണ് അപകടം അപകടം. കരിക്കോട്ടക്കരി വളയങ്കോട് സ്വദേശി കെട്ടിലിങ്കൽ സുബൈറാണ് (46) മരിച്ചത്. കരിക്കോട്ടക്കരിയിൽ എടൂർ ഭാഗത്തേക്ക് വരികയായിരുന്ന ഓട്ടോ വളവിലെ ഇറക്കത്തിൽ നിയന്ത്രണം വിട്ട് മറിയുകയായിരുന്നു. ഓട്ടോയുടെ അടിയിലായ സുബൈറിനെ ഓടിയെത്തിയ സമീപവാസികൾ ചേർന്ന് ഇരിട്ടിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കരിക്കോട്ടക്കരിയിലെ ജാസ്മിൻ പിക്കിൾസ് സംരംഭത്തിന്‍റെ ഉടമ കൂടിയായ സുബൈർ യൂത്ത് ലീഗ് അയ്യൻകുന്ന് പഞ്ചായത്ത് പ്രസിഡന്‍റും കൂടിയാണ്. ഭാര്യ: ഹസീന. മക്കൾ: റുസൈന, അജ്മൽ. കുഞ്ഞിമോൻ-സക്കീന ദന്പതികളുടെ മകനാണ്. സഹോദരങ്ങൾ: ഷമീർ, നാസർ, മുനീർ, സുഹറ.

ന്യൂമോണിയ ബാധിച്ച് വിദ്യാർഥി മരിച്ചു

മണക്കടവ്: ന്യൂമോണിയ ബാധിച്ച് വിദ്യാർഥി മരിച്ചു. ശ്രീപുരം ഗവ. ഹയർ സെക്കണ്ടറി സ്കൂൾ പ്ലസ് വൺ വിദ്യാർഥി ഹരികൃഷ്ണനാണ് (15) മരിച്ചത്. പരിയാരം മെഡിക്കൽ കോളജിൽ ചികിത്സയിലായിരുന്നു. വായക്കമ്പ പൊറ്റമല ഹരിപ്രകാശിന്‍റെയും ജയകുമാരിയുടേയും മകനാണ്. സഹോദരൻ:ഹരിനന്ദൻ (വിദ്യാർഥി). മൃതദേഹം സ്കൂൾ ഓഡിറ്റോറിയത്തിൽ പൊതു ദർശനത്തിനു ശേഷം ഒരു മണിയോടെ വീട്ടുവളപ്പിൽ സംസ്കരിച്ചു.

ഓട്ടോയിൽ മദ്യവില്പന; യുവാവ് പിടിയിൽ

പഴയങ്ങാടി: ഓട്ടോയിൽ സഞ്ചരിച്ച് മദ്യവില്പന നടത്തുകയായിരുന്ന യുവാവിനെ പോലീസ് അറസ്റ്റ് ചെയ്തു. മാട്ടൂലിലെ സ്റ്റേവി ജോസിനെയാണ് (40) പഴയങ്ങാടി എസ്ഐ കെ. സുഹൈലിന്‍റെ നേതൃത്വത്തിലുള്ള പോലീസ് അറസ്റ്റ് ചെയ്തത്. ഇന്നലെ രാത്രി പത്തോടെ മാട്ടൂൽ സൗത്ത് മടക്കര റോഡിൽ അസ്വാഭാവിക നിലയിൽ ഓട്ടോറിക്ഷ കണ്ടെത്തിയതിനെ തുടർന്ന് നടത്തിയ പരിശോധനയിലാണ് മദ്യം പിടികൂടിയത്. ‍ഓട്ടോയിൽ നിന്ന് 15 കുപ്പി വിദേശ മദ്യവും 12 ഒഴിഞ്ഞ മദ്യകുപ്പികളും 5,220 രൂപയും പിടികൂടി. ഓട്ടോ റിക്ഷയും കസ്റ്റഡിയിലെടുത്തു. ജൂണിയർ എസ്ഐ പി. മൻസൂർ, സീനിയർ സിവിൽ പോലീസ് ഓഫീസർ സുരേഷ്, സിവിൽ പോലീസ് ഓഫീസർമാരായ പ്രിയങ്ക, മിഥുൻ എന്നിവരും അന്വേഷണ സംഘത്തിലുണ്ടായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ഇൻഡക്ഷൻ പ്രോഗ്രാം സംഘടിപ്പിച്ചു

നിർമലഗിരി: നിർമലഗിരി കോളജ് (ഓട്ടോണമസ്) ഹോം സയൻസ് വിഭാഗം ഒന്നാം വർഷ ബിരുദ വിദ്യാർഥികൾക്കായി ഇൻഡക്ഷൻ പ്രോഗ്രാം സംഘടിപ്പിച്ചു. പ്രിൻസിപ്പൽ സിസ്റ്റർ ഡോ. സെലിൻ മാത്യു ഉദ്ഘാടനം ചെയ്തു. മാനാ സ്പൈൻ ആൻഡ് വെൽനസ് ക്ലിനിക്കിലെ കൺസൾട്ടന്‍റ് ന്യൂട്രീഷ്യനിസ്റ്റ് എം.ജെ. ആഗ്‌നറ്റ് മുഖ്യാതിഥിയായിരുന്നു. വിദ്യാർഥികൾക്ക് ഹോം സയൻസ്, പ്രത്യേകിച്ച് ന്യൂട്രീഷ്യൻ മേഖലയിലെ തൊഴിലവസരങ്ങളെയും സാധ്യതകളെയും കുറിച്ച് പ്രസംഗിച്ചു. ഹോം സയൻസ് പഠനത്തിന്‍റെ പ്രാധാന്യം, വിവിധ കരിയർ സാധ്യതകൾ എന്നിവയെക്കുറിച്ച് വിദ്യാർഥികൾക്ക് വ്യക്തമായ ധാരണ നൽകുകയും അവരുടെ സംശയങ്ങൾക്ക് മറുപടി നൽകുകയും ചെയ്തു. ഹോം സയൻസ് വിഭാഗം അധ്യക്ഷ കെ. ദീപ്തി ലിസ്ബത്ത് അധ്യക്ഷത വഹിച്ചു. അസിസ്റ്റന്‍റ് പ്രഫ. എ. ഐശ്വര്യ, വിദ്യാർഥിനി ശിവാനി രഞ്ജിത്ത് എന്നിവർ പ്രസംഗിച്ചു.

മരം കടപുഴകി കെട്ടിടത്തിൽ വീണു

മട്ടന്നൂർ: ശക്തമായ കാറ്റിലും മഴയിലും മട്ടന്നൂരിൽ മരം കടപുഴകി വീണ് കെട്ടിടത്തിന് നാശനഷ്ടം. മട്ടന്നൂർ - കണ്ണൂർ റോഡിലെ കോളാരി വില്ലേജ് ഓഫീസ് പരിസരത്തെ കൂറ്റൻ തേക്ക് മരമാണ് കടപുഴകി സമീപത്തെ കെട്ടിടത്തിലേക്ക് വീണത്. മരം വീണതിനെ തുടർന്ന് റാറാവീസ് മന്തി ഹൗസിന്‍റെ ഷീറ്റുകളാണ് തകർന്നത്. ഇന്നലെ രാവിലെയായിരുന്നു അപകടം.

മലയോരത്ത് ഇന്നലെ നാല് വാഹനാപകടങ്ങൾ; ഒരു മരണം

ഇരിട്ടി: ഇന്നലെ മലയോര മേഖലയിൽ നാലിടങ്ങളിലുണ്ടായ വാഹനപാകടങ്ങളിൽ ഒരാൾ മരിക്കുകയും ആറു പേർക്ക് പരിക്കേൽക്കുകയും ചെയ്തു. സ്വകാര്യ ബസ് പണിമുടക്കിനെ തുടർന്ന് റോഡുകളിൽ സാധാരണ നിലയെക്കാളും തിരക്കായിരുന്നു അനുഭവപ്പട്ടത്. പലരും യാത്രക്കായി സ്വകാര്യ വാഹനങ്ങൾ നിരത്തിലിറക്കിയതാണ് തിരിക്കിനിടയാക്കിയത്. അയ്യൻകുന്ന് പഞ്ചായത്തിലെ കരിക്കോട്ടക്കരി കൊട്ടുകപ്പാറ കാലിവളവിലുണ്ടായ വാഹനാപാകടത്തിലാണ് ഒരാൾ മരിച്ചത്. ഇന്നലെ രാവിലെ പത്തോടെ ഓട്ടോറിക്ഷ നിയന്ത്രണം വിട്ട് മറിയുകയായിരുന്നു. ഉളിക്കൽ റോഡിൽ പുതുശേരി കണ്ണിക്കരിയിൽ പിക്കപ്പ് ജിപ്പും ബൈക്കും കൂട്ടിയിടിച്ചുണ്ടായ അപകടത്തിൽ മൂന്ന് പേർക്ക് പരിക്കേറ്റു. ഇന്നലെ ഉച്ചയോടെയായിരുന്നു അപകടം. ഇരിട്ടി ഭാഗത്ത് നിന്നും ഉളിക്കൽ ഭാഗത്തേക്ക് പോകുകയായിരുന്ന പിക്കപ്പ് ജിപ്പും ഇരിട്ടി ഭാഗത്തേക്ക് വരികയായിരുന്ന ബൈക്കുമാണ് അപകടത്തിൽപ്പെട്ടത്. അപകടത്തിൽ പിക്കപ്പ് ജീപ്പ് മറിയുകയും ബൈക്ക് പൂർണമായും തകർന്നു. ചെമ്പേരി കരയത്തുംചാൽ സ്വദേശി നവീൻ (25) സഹോദരി ആറളം ഫാം ഒമ്പതാം ബ്ലോക്കിലെ ഗ്രീഷ്മ (28) എന്നിവർക്ക് സാരമായി പരിക്കേറ്റു. ഇവരെ കണ്ണൂരിലെ സ്വകാര്യാശുപത്രിയിൽ പ്രവേശിപ്പിച്ചു . പിക്കപ്പ് ജീപ്പ് ഡ്രൈവർ ബിനുവിന്‍റെ പരിക്ക് സാരമുള്ളതല്ല. മട്ടന്നൂർ: ചാവശേരി ഗവ. ഹയർ സെക്കൻഡറി സ്കൂളിന് സമീപം പാർസൽ വാനും സ്കോർപിയോ കാറും കൂട്ടിയിടിച്ച് കാർ യാത്രികനായ സാജൻ, പാർസൽ വാനിലെ രണ്ടു പേർ എന്നിവർക്ക് പരിക്കേറ്റു. വാഹനങ്ങളിൽ കുടുങ്ങിപ്പോയവരെ ഏറെ പരിശ്രമിച്ചാണ് പുറത്തെടുത്തത്. പരിക്കേറ്റവരെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇതിനു പിന്നാലെ അപകടത്തിൽ പെട്ട വാഹനത്തിന് പിന്നിൽ മറ്റൊരു കാറും കൂട്ടിയിടിച്ചു. കോളിക്കടവിൽ ഡ്രൈവിംഗ് പരിശീലനത്തിനിടെ കാർ നിയന്ത്രണം വിട്ട് മറിഞ്ഞെങ്കിലും പരിശീലകനും സഹായിയും പരിക്കേൽക്കാതെ രക്ഷപ്പെട്ടു. മഴയിൽ ഓടകൾ നിറഞ്ഞ് കവിഞ്ഞ് വെള്ളം റോഡിലൂടെ ഒഴുകുന്നതും തുടർച്ചയായുള്ള മഴകാരണം റോഡുകളുടെ ഉപരിതലം തെന്നുന്നതുമാണ് അപകടങ്ങൾക്കിടിയാക്കുന്നതെന്ന് ഡ്രൈവർമാർ പറയുന്നു.

തെക്കിബസാർ-കക്കാട് റോഡ് ജംഗ്ഷൻ വൺവേ ആക്കുന്നു; ട്രയൽ ആരംഭിച്ചു

കണ്ണൂർ: തളിപ്പറന്പ്-കണ്ണൂർ ദേശീയ പാതയിൽ നഗരത്തിൽ ഏറ്റവും വലിയ ഗതാഗതകുരുക്കിനിടയാക്കുന്ന തെക്കിബസാർ-കക്കാട് ജംഗ്ഷൻ വൺവേ ആക്കാൻ ട്രാഫിക് പോലീസ് തീരുമാനം. പരീക്ഷണാടിസ്ഥാനത്തിലുള്ള ഗതാഗതക്രമീകരണം ഇന്നലെ വൈകുന്നേരം നടപ്പാക്കി. തീരുമാന പ്രകാരം കണ്ണൂർ ഭാഗത്ത് നിന്ന് കക്കാട് ഭാഗത്തേക്ക് പോകുന്ന വാഹനങ്ങൾക്ക് നിലവിലെ ജംഗ്ഷനിൽ നിന്ന് നേരിട്ട് കക്കാട് റോഡിലേക്കുള്ള പ്രവേശനം തടഞ്ഞു. ഇതിനു പകരം നിലവിലെ ജംഗ്ഷനിൽ നിന്ന് നൂറു മീറ്റർ മുന്നോട്ടു പോയി വലതുഭാഗത്ത് തിരിഞ്ഞ് കക്കാടേക്ക് പോകുന്ന റോഡിലൂടെ കടന്നു പോകണം. ഇതിനായി ഇവിടെയുണ്ടായിരുന്ന ദേശീയ പാതയിലെ ഡിവൈഡറുകൾ ദേശീയ പാത അഥോറിറ്റിയുടെ അനുമതിയോടെ നീക്കം ചെയ്താണ് ഗതാഗത സൗകര്യമൊരുക്കിയത്. പുതിയതെരു ഭാഗത്ത് നിന്ന് കക്കാടേക്ക് പോകേണ്ട വാഹനങ്ങളും ഇതു വഴിയാണ് കടന്നു പോകേണ്ടത്. കക്കാട് ഭാഗത്ത് നിന്ന് തളിപ്പറന്പ് ഭാഗത്തേക്ക് പോകേണ്ട വാഹനങ്ങളെ ജംഗ്ഷനിൽ നിന്ന് യു ടേൺ എടുത്ത് തളിപ്പറന്പ് ഭാഗത്തേക്ക് കടത്തി വിടില്ല. വാഹനങ്ങൾ നേരെ ഗാന്ധി സർക്കിളിലെത്തി ഇവിടെ നിന്ന് താലൂക്ക് ഓഫീസിന് മുൻ വശത്തൂടെ എസ്പിസിഎ റോഡിലേക്ക് പ്രവേശിച്ച് എകെജി ആശുപത്രിക്ക് മുന്നിലെത്തുന്ന വഴിയോ അല്ലെങ്കിൽ സർക്കിൾ ചുറ്റി ദേശീയപാതയിലൂടെ തന്നെയോ കടന്നു പോകണം. വ്യാപാരികൾ, ബസ് ഉടമകൾ,ഓട്ടോറിക്ഷ തൊഴിലാളികൾ, പ്രാദേശിക ജനപ്രതിനിധികൾ എന്നിവരുമായി കൂടിയാലോചിച്ചാണ് നടപടി. പരീക്ഷണാടിസ്ഥാനത്തിൽ നടപ്പാക്കുന്ന ക്രമീകരണം വിലയിരുത്തിയ ശേഷമായിരിക്കും സ്ഥിരം നടപടികളിലേക്ക് കടക്കുക.

സ്വകാര്യ ബസ് പണിമുടക്ക് ജില്ലയിൽ പൂർണം

കണ്ണൂർ: ജില്ലയിൽ സ്വകാര്യ ബസുടമകൾ നടത്തിവന്ന പണിമുടക്ക് പൂർണം. സ്വകാര്യ ബസുകളൊന്നും നിരത്തിലിറങ്ങിയില്ല. നിലവിൽ ജില്ലയിൽ സർവീസ് നടത്തുന്ന 800 ഓളം ബസുകളാണ് പണിമുടക്കിയത്. സ്വകാര്യ ബസ് പണിമുടക്കിന്‍റെ പശ്ചാത്തലത്തിൽ കെഎസ്ആർടിസി അധിക സർവീസ് നടത്തുമെന്ന് ആളുകൾ പ്രതീക്ഷിച്ചിരുന്നെങ്കിലും കണ്ണൂർ ഡിപ്പോയിൽ നിന്നാകെ ആറ് അധിക സർവീസുകൾ മാത്രമാണ് ഉണ്ടായിരുന്നത്. മയ്യിൽ, ഇരിട്ടി, കൂത്തുപറന്പ്, കോഴിക്കോട് എന്നിവിടങ്ങളിലേക്കായിരുന്നു അധിക സർവീസ്. പയ്യന്നൂർ ഡിപ്പോയിൽ നിന്ന് അധിക സർവീസ് ഒന്നും നടത്തിയില്ല. തലശേരി ഡിപ്പോയിൽ നിന്ന് ഇരിട്ടിയിലേക്ക് മാത്രമാണ് നാല് അധിക സർവീസുകൾ നടത്തിയത്. ആലക്കോട്, ശ്രീകണ്ഠാപുരം, പയ്യാവൂർ, ചെറുപുഴ തുടങ്ങിയ സ്ഥലങ്ങളിലേക്കൊന്നും കെഎസ്ആർടിസി അധിക സർവീസ് നടത്താത്തത് ജനങ്ങളെ ആകെ വലച്ചു. ടൂറിസ്റ്റ് ബസുകളും, ഓട്ടോകളും ട്രാവലറിനെയുമെല്ലാം ആശ്രയിച്ച് വലിയ പണം മുടക്കിയാണ് ജോലി സ്ഥലത്തെത്തിയത്. സ്വകാര്യ വാഹനങ്ങൾ കൂടുതലായും നിരത്തിൽ ഇറങ്ങിയപ്പോൾ ഗതാഗതകുരുക്കും രൂക്ഷമായിരുന്നു. ഇതോടെ ഏറെ വൈകിയാണ് ആളുകൾ ലക്ഷ്യസ്ഥാനത്ത് എത്തിയത്.

ലയൺസ് ക്ലബ് ഭാരവാഹികൾ സ്ഥാനമേറ്റു

ചെറുപുഴ: ചെറുപുഴ ലയൺസ് ക്ലബ് ഭാരവാഹികൾ സ്ഥാനമേറ്റു. പുതിയ അംഗങ്ങളുടെ സത്യപ്രതിജ്ഞയും നടന്നു. ഡിസ്ട്രിക്ട് മുൻ ഗവർണർ ഡെന്നീസ് തോമസ് ഉദ്ഘാടനം ചെയ്തു. ചെറുപുഴ ലയൺസ് ക്ലബ് പ്രസിഡന്‍റ് എം.ടി.പി. അബ്ദുള്ള അധ്യക്ഷത വഹിച്ചു. സെക്രട്ടറി സെൻ സെബാസ്റ്റ്യൻ, കെ.കെ. വേണുഗോപാൽ, ഡോ. മെൻഡലിൻ മാത്യു, ബോബൻ ജോസഫ്, ഷാജി ജോസഫ്, ബെന്നി ജോൺ, ഡോ. സുജ വിനോദ്, ഡോ. പ്രവൺ ഗോപിനാഥ്, ബെന്നി സെബാസ്റ്റ്യൻ, കെ.എ. സെബാസ്റ്റ്യൻ, എൻ.ജെ. ജോസഫ്, മഞ്ജു അഭിലാഷ്, റോയി ജോസഫ് എന്നിവർ പ്രസംഗിച്ചു. വിവിധ മേഖലകളിൽ കഴിവ് തെളിയിച്ച വിദ്യാർഥികളെയും 70 വയസിന് മുകളിൽ പ്രായമുള്ള ക്ലബംഗങ്ങളേയും ആദരിച്ചു. ഭാരവാഹികൾ ബോബൻ ജോസഫ് -പ്രസിഡന്‍റ്, റോയി ജോസഫ് -സെക്രട്ടറി, തോമസ് ജോസഫ് -ട്രഷറർ. ചെറുപുഴ: പാടിയോട്ടുചാൽ ലയൺസ് ക്ലബ്‌ ഭാരവാഹികൾ ചുമതലയേറ്റു. മുൻ ഡിസ്ട്രിക്ട് ഗവർണർ ടി.കെ. രജീഷ് ഉദ്ഘാടനം ചെയ്തു. കെ. സിനു അധ്യക്ഷത വഹിച്ചു. ചീഫ് ഐടി കോ-ഓർഡിനേറ്റർ ശ്രീനിവാസ പൈ, വി.പി.നിതീഷ്, രാഘവൻ തെക്കെടവൻ, ജീവ് ജയിംസ്, ഹൈമ ശശിധരൻ, കെ.പി. ജ്യോതിഷ്, ഷാജീവൻ എന്നിവർ പ്രസംഗിച്ചു. ഭാരവാഹികൾ: കെ. സീനു (പ്രസിഡന്‍റ്), വി.പി. നിതീഷ് (സെക്രട്ടറി).

കാരുണ്യ പദ്ധതി പിണറായി സർക്കാർ തകർത്തു: മാർട്ടിൻ ജോർജ്

കണ്ണൂർ: സാധാരണക്കാർക്ക് ഏറെ ആശ്വാസമായി ഉമ്മൻ ചാണ്ടി സർക്കാർ ആവിഷ്കരിച്ച കാരുണ്യ പദ്ധതിയെ പോലും പിണറായി സർക്കാർ തകർത്തിരിക്കുകയാണെന്ന് ഡിസിസി പ്രസിഡന്‍റ് മാർട്ടിൻ ജോർജ്. ആരോഗ്യ മേഖലയിലെ സർക്കാരിന്‍റെ പരാജയത്തിൽ പ്രതിഷേധിച്ചും ആരോഗ്യമന്ത്രിയുടെ രാജി ആവശ്യപ്പെട്ടും ജില്ലയിലെ താലൂക്ക് ആശുപത്രികൾക്കു മുന്നിൽ കോൺഗ്രസ് നടത്തിയ ധർണയുടെ ജില്ലാതല ഉദ്ഘാടനം ജില്ലാ ആശുപത്രി പരിസരത്ത് നിർവഹിച്ച് പ്രസംഗിക്കുകയായിരുന്നു അദ്ദേഹം. കണ്ണൂർ-അഴീക്കോട് നിയോജക മണ്ഡലം കമ്മറ്റികളുടെ നേതൃത്വത്തിൽ കണ്ണൂർ ജില്ലാ ആശുപത്രിയുടെ മുമ്പിൽ നടത്തിയ പ്രതിഷേധ ധർണയിൽ കണ്ണൂർ ബ്ലോക്ക് കോൺഗ്രസ് പ്രസിഡന്‍റ് രാഹുൽ കായക്കൽ അധ്യക്ഷത വഹിച്ചു. പ്രഫ.എ.ഡി മുസ്തഫ മുഖ്യപ്രഭാഷണം നടത്തി.കെ.‌ പ്രമോദ്, രാജീവൻ എളയാവൂർ, അമൃത രാമകൃഷ്ണൻ, സുരേഷ് ബാബു എളയാവൂർ, ടി.ജയകൃഷ്ണൻ, പി.മുഹമ്മദ് ഷമ്മാസ്, പി.മാധവൻ, അഡ്വ. പി.ഇന്ദിര, ഷമാ മുഹമ്മദ്, മുണ്ടേരി ഗംഗാധരൻ, ശ്രീജ മഠത്തിൽ, എം.പി. വേലായുധൻ, സി.ടി. ഗിരിജ, ലിഷ ദീപക്ക്, ലക്ഷ്മണൻ തുണ്ടിക്കോത്ത്, കൂക്കിരി രാജേഷ്, ബിജു ഉമ്മർ, എം.കെ. വരുൺ എന്നിവർ പ്രസംഗിച്ചു. പയ്യന്നൂര്‍: കേരളത്തിന്‍റെ ആരോഗ്യരംഗത്ത് ഉണ്ടായിരുന്ന പുരോഗതി കഴിഞ്ഞ അഞ്ചു വര്‍ഷം കൊണ്ട് മന്ത്രിയുടെ കാര്യക്ഷമത ഇല്ലായ്മയും ധനവകുപ്പിന്‍റെ പിടിപ്പുകേടുംമൂലം തകിടം മറിച്ചതായി കോൺഗ്രസ് നേതാവ് റിജില്‍ മാക്കുറ്റി. പയ്യന്നൂര്‍, ചെറുപുഴ ബ്ലോക്ക് കോണ്‍ഗ്രസ് കമ്മിറ്റികളുടെ സംയുക്താഭിമുഖ്യത്തില്‍ പയ്യന്നൂര്‍ താലൂക്ക് ആശുപത്രിക്ക് മുന്നില്‍ നടത്തിയ ധര്‍ണ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. പയ്യന്നൂര്‍ ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് കെ. ജയരാജ് അധ്യക്ഷത വഹിച്ചു. ചെറുപുഴ ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് മഹേഷ് കുന്നുമ്മല്‍, ഡിസിസി ജനറല്‍ സെക്രട്ടറി രജിത്ത് നാറാത്ത്, ഡിസിസി ജനറല്‍ സെക്രട്ടറിമാരായ എ.പി. നാരായണന്‍, പി. ലളിത, ഡി.കെ. ഗോപിനാഥ്, ആലയില്‍ ബാലകൃഷ്ണന്‍, കെ.കെ. സുരേഷ് കുമാര്‍, എം. ഉമ്മര്‍, ടി.വി. ഗംഗാധരന്‍, മണ്ഡലം കോണ്‍ഗ്രസ് കമ്മിറ്റി പ്രസിഡന്‍റുമാർ, നഗരസഭ പ്രതിപക്ഷ നേതാവ് കെ.കെ. ഫല്‍ഗുനന്‍, എ. രൂപേഷ്, അത്തായി പത്മിനി, യൂത്ത് കോണ്‍ഗ്രസ് കണ്ണൂര്‍ ജില്ലാ വൈസ് പ്രസിഡന്‍റ് മഹിത മോഹന്‍, ആകാശ് ഭാസ്‌കരന്‍, അര്‍ജുന്‍ കൊറോം, നവനീത് നാരായണന്‍ തുടങ്ങിയവര്‍ പ്രസംഗിച്ചു. ഇരിക്കൂർ: ആരോഗ്യ മേഖലയോടുള്ള സർക്കാരിന്‍റെ അവഗണക്കെതിരെയും, ആരോഗ്യ മന്ത്രിയുടെ കെടുകാര്യസ്ഥതയ്ക്കെതിരേയും ബ്ലോക്ക്‌ കോൺഗ്രസ്‌ കമ്മിറ്റികളുടെ നേതൃത്വത്തിൽ ഇരിക്കൂർ താലൂക്ക് ആശുപത്രിക്ക് മുന്നിൽ ധർണ നടത്തി. സജീവ് ജോസഫ് എംഎൽഎ ഉദ്ഘാടനം ചെയ്തു. ഇരിക്കൂർ ബ്ലോക്ക് കോൺഗ്രസ്‌ പ്രസിഡന്‍റ് എ.ജെ. ജോസഫ് അധ്യക്ഷത വഹിച്ചു. കെപിസിസി അംഗം ഡോ. കെ.വി. ഫിലോമിന,കൊയ്യo ജനാർദനൻ, കെ. പി. ഗംഗാധരൻ, ബേബി തോലാനി, ജോജി വർഗീസ്, ഇ.വി. രാമകൃഷ്ണൻ, കെ.കെ ഷഫീഖ്, കെ.ആർ. അബ്ദുൽ കാദർ, നസീമഖാദർ, ടി.സി. പ്രിയ, വിജിൽമോഹൻ, പ്രിൻസ് പി. ജോർജ്, എന്നിവർ പ്രസംഗിച്ചു.

കരുവഞ്ചാലിലെ പൊതു ശൗചാലയം പ്രവർത്തനക്ഷമമാക്കണം

കരുവഞ്ചാൽ: നടുവിൽ പഞ്ചായത്ത് ടൗണിൽ പാലത്തിന് സമീപം ടേക്ക് എ ബ്രേക്ക് പദ്ധതിയിൽ ഉൾപ്പെടുത്തി നിർമിച്ച പൊതുശൗചാലയം ഉടൻ പ്രവർത്തനക്ഷമമാക്കണമെന്ന് ആവശ്യപ്പെട്ട് നാഷണൽ ഹ്യൂമൻ റൈറ്റ്സ് എൻവയോൺമെന്‍റ് മിഷൻ തളിപ്പറമ്പ് മേഖലാ കമ്മറ്റി പൊതുജനങ്ങളിൽ ഒപ്പുകൾ ശേഖരിച്ച് ഹർജി സജീവ് ജോസഫ് എംഎൽഎക്ക് കൈമാറി. നടുവിൽ പഞ്ചായത്ത് അധികാരികളുടെ കെടുകാര്യസ്ഥതയുടെ ഫലമായി മൂന്നുവർഷത്തോളമായി ഇതിനുവേണ്ടി നിർമിച്ച കെട്ടിടം കാടുപിടിച്ച് അനാഥാവസ്ഥയിലാണ്. കരുവഞ്ചാൽ ടൗണിലെ വ്യാപാര സ്ഥാപനങ്ങളിലെ സ്ത്രീകൾ ഉൾപ്പെടെയുള്ള ജോലിക്കാർ, ഓട്ടോ ടാക്സി തൊഴിലാളികൾ, ചുമട്ടുതൊഴിലാളികൾ, യാത്രക്കാർ ഉൾപ്പടെ ആയിരക്കണക്കിന് ആളുകൾക്ക് പ്രയോജനകരമാകുന്ന ഈ പദ്ധതി പൂർത്തീകരിക്കാത്ത പക്ഷം ജനകീയവും നിയമപരവുമായ പ്രക്ഷോഭങ്ങൾക്ക് നേതൃത്വം നല്കുമെന്ന് എൻഎച്ച്ആർഇഎം ഭാരവാഹികൾ പറഞ്ഞു. ഒപ്പുശേഖരണ കാമ്പയിന് ജെയ്സൺ ഡൊമിനിക്, ബേബി അഗസ്റ്റിൻ, അൻവർ കരുവഞ്ചാൽ എന്നിവർ നേതൃത്വം നൽകി.

ആലക്കോട് ടൗണിൽ തെരുവുനായ വിളയാട്ടം

ആലക്കോട്: ആലക്കോട് ടൗണിലും പരിസരത്തും തെരുവുനായ ശല്യം രൂക്ഷമാകുന്നു. തെരുവുനായകൾ വർധിക്കുന്നത് സ്കൂ‌ൾ വിദ്യാർഥികൾക്കും കാൽനട യാത്രക്കാർക്കും ഇരുചക്ര വാഹന യാത്രക്കാർക്കും ഭീഷണിയാകുന്നു. വ്യാപാരികളും തൊഴിലാളികളും ടൗണിൽ എത്തുന്നവരും പ്രദേശ വാസികളും തെരുവുനായ ശല്യം കൊണ്ട് പൊറുതി മുട്ടിയിരിക്കുകയാണ്. രാത്രികാലങ്ങളിൽ കടത്തിണ്ണകളിലാണ് തെരുവുനായകൾ തന്പടിക്കുന്നത്. രാത്രി വൈകി ടൗണിൽ നിന്ന് എത്തുന്ന യാത്രക്കാർക്കു നേരേ കുരച്ചു ചാടുകയാണ്. യാത്രക്കാർ ഭാഗ്യത്താൽ മാത്രം കടിയേൽക്കാതെ രക്ഷപ്പെടുന്നു. അക്രമകാരികളായ നായകളുടെ ശല്യം കാരണം ടൗണിലൂടെ നടക്കാൻ വിദ്യാർഥികൾ ഭയക്കുകയാണ്. തെരുവുനായകൾക്ക് ചിലർ ടൗണിൽ ഭക്ഷണം നൽകുന്നു. ഭക്ഷണം നൽകുന്ന സ്ഥലങ്ങളിൽ ഒത്തു കൂടുന്ന തെരുവ് നായകൾ ശല്യമായി മാറുകയും പെറ്റു പെരുകി പ്രദേശത്ത് ശല്യമായി മാറുകയും ചെയ്യുന്നു. വീടുകളിൽ നിന്ന് പുറന്തള്ളുന്ന നായ്ക്കളെ ടൗണിൽ ഉപേക്ഷിക്കുന്നതും തെരുവുനായ ശല്യം വർധിക്കാൻ കാരണമായിട്ടുണ്ട്. വർധിച്ചുവരുന്ന തെരുവുനായ ശല്യം അവസാനിപ്പിക്കാൻ തദ്ദേശ സ്ഥാപനങ്ങൾ നടപടികൾ സ്വീകരിക്കണമെന്നാണ് നാ‌ട്ടുകാരുടേയും വ്യാപാരികളുടേയും ആവശ്യം.

എൽഐസി ഓഫീസുകൾക്ക് മുന്നിൽ പ്രകടനവും കവാട യോഗങ്ങളും നടത്തി

മട്ടന്നൂർ: അഖിലേന്ത്യാ പണിമുടക്കിന് മുന്നോടിയായി ഇൻഷ്വറൻസ് ജീവനക്കാരും ഏജന്‍റുമാരും ജില്ലയിലെ എൽഐസി ഓഫീസുകൾക്ക് മുന്നിൽ പ്രകടനവും യോഗവും നടത്തി. എൽഐസി എംപ്ലോയീസ് യൂണിയൻ, എൽഐസി ഏജന്‍റസ് ഓർഗനൈസേഷൻ ഓഫ് ഇന്ത്യ, എൽഐസി പെൻഷനേഴ്സ് അസോസിയേഷൻ സെക്യൂരിറ്റി ആൻഡ് ലേബർ കോൺട്രാക്ട് വർക്കേഴ്സ് യൂണിയൻ എന്നിവയുടെ സംയുക്താഭിമുഖ്യത്തിലായിരുന്നു പ്രകടനവും യോഗവും നടത്തിയത്. കണ്ണൂരിൽ എൽഐസി എംപ്ലോയീസ് യൂണിയൻ കോഴിക്കോട് ഡിവിഷൻ പ്രസിഡന്‍റ് കെ. ബാഹുലേയൻ ഉദ്ഘാടനം ചെയ്തു. കണ്ണൂർ-കാസർഗോഡ് ജില്ലാ കോ-ഓർഡിനേഷൻ കമ്മിറ്റി കൺവീനർ എം.കെ. പ്രേംജിത്ത് അധ്യക്ഷത വഹിച്ചു. തളിപ്പറമ്പിൽ പി. വി. ഷിജു, കെ. ഗണേശൻ,സി. ദാമോദരൻ, സി. വി. മനീഷ, കെ. ചന്ദ്രൻ എന്നിവരും പയ്യന്നൂരിൽ ടി.വി.ഗണേശൻ, കെ.വി. വേണു, രമേഷ് പുതിയറക്കൽ, എം. ഷിബിൻ, എം. ചന്ദ്രൻ, കെ. ജയരാജൻ എന്നിവരും പ്രസംഗിച്ചു.

തെക്കിബസാർ-കക്കാട് റോഡ് ജംഗ്ഷൻ വൺവേ ആക്കുന്നു; ട്രയൽ ആരംഭിച്ചു

കണ്ണൂർ: തളിപ്പറന്പ്-കണ്ണൂർ ദേശീയ പാതയിൽ നഗരത്തിൽ ഏറ്റവും വലിയ ഗതാഗതകുരുക്കിനിടയാക്കുന്ന തെക്കിബസാർ-കക്കാട് ജംഗ്ഷൻ വൺവേ ആക്കാൻ ട്രാഫിക് പോലീസ് തീരുമാനം. പരീക്ഷണാടിസ്ഥാനത്തിലുള്ള ഗതാഗതക്രമീകരണം ഇന്നലെ വൈകുന്നേരം നടപ്പാക്കി. തീരുമാന പ്രകാരം കണ്ണൂർ ഭാഗത്ത് നിന്ന് കക്കാട് ഭാഗത്തേക്ക് പോകുന്ന വാഹനങ്ങൾക്ക് നിലവിലെ ജംഗ്ഷനിൽ നിന്ന് നേരിട്ട് കക്കാട് റോഡിലേക്കുള്ള പ്രവേശനം തടഞ്ഞു. ഇതിനു പകരം നിലവിലെ ജംഗ്ഷനിൽ നിന്ന് നൂറു മീറ്റർ മുന്നോട്ടു പോയി വലതുഭാഗത്ത് തിരിഞ്ഞ് കക്കാടേക്ക് പോകുന്ന റോഡിലൂടെ കടന്നു പോകണം. ഇതിനായി ഇവിടെയുണ്ടായിരുന്ന ദേശീയ പാതയിലെ ഡിവൈഡറുകൾ ദേശീയ പാത അഥോറിറ്റിയുടെ അനുമതിയോടെ നീക്കം ചെയ്താണ് ഗതാഗത സൗകര്യമൊരുക്കിയത്. പുതിയതെരു ഭാഗത്ത് നിന്ന് കക്കാടേക്ക് പോകേണ്ട വാഹനങ്ങളും ഇതു വഴിയാണ് കടന്നു പോകേണ്ടത്. കക്കാട് ഭാഗത്ത് നിന്ന് തളിപ്പറന്പ് ഭാഗത്തേക്ക് പോകേണ്ട വാഹനങ്ങളെ ജംഗ്ഷനിൽ നിന്ന് യു ടേൺ എടുത്ത് തളിപ്പറന്പ് ഭാഗത്തേക്ക് കടത്തി വിടില്ല. വാഹനങ്ങൾ നേരെ ഗാന്ധി സർക്കിളിലെത്തി ഇവിടെ നിന്ന് താലൂക്ക് ഓഫീസിന് മുൻ വശത്തൂടെ എസ്പിസിഎ റോഡിലേക്ക് പ്രവേശിച്ച് എകെജി ആശുപത്രിക്ക് മുന്നിലെത്തുന്ന വഴിയോ അല്ലെങ്കിൽ സർക്കിൾ ചുറ്റി ദേശീയപാതയിലൂടെ തന്നെയോ കടന്നു പോകണം. വ്യാപാരികൾ, ബസ് ഉടമകൾ,ഓട്ടോറിക്ഷ തൊഴിലാളികൾ, പ്രാദേശിക ജനപ്രതിനിധികൾ എന്നിവരുമായി കൂടിയാലോചിച്ചാണ് നടപടി. പരീക്ഷണാടിസ്ഥാനത്തിൽ നടപ്പാക്കുന്ന ക്രമീകരണം വിലയിരുത്തിയ ശേഷമായിരിക്കും സ്ഥിരം നടപടികളിലേക്ക് കടക്കുക.

നഴ്സുമാരുടെ മൊബൈല്‍ മോഷ്ടിച്ച പ്രതി പിടിയില്‍

പയ്യന്നൂര്‍: പയ്യന്നൂരില്‍ സ്വകാര്യ ആശുപത്രിയിലെ നഴ്‌സുമാരുടെ മൊബൈല്‍ ഫോണുകള്‍ കവര്‍ന്ന കേസില്‍ പ്രതി അറസ്റ്റില്‍. കുഞ്ഞിമംഗലം കൊവ്വപ്പുറം സ്വദേശി കെ.പി. സലീമിനെയാണ് (38) പയ്യന്നൂര്‍ എസ്‌ഐ പി.യദുകൃഷ്ണനും സംഘവും അറസ്റ്റ് ചെയ്തത്. ബംഗളൂരുവിൽ ഒളിവില്‍ കഴിയുന്നതിനിടെയാണ് പോലീസ് പിടികൂടിയത്. കണ്ണൂര്‍ ടൗണിലെ ആശുപത്രിയിലും കാഞ്ഞങ്ങാട്ടെ സ്വകാര്യ ആശുപത്രിയിലും സമാനമായ രീതിയില്‍ മൊബൈല്‍ മോഷണം നടത്തിയതായി പോലീസ് കണ്ടെത്തിയിട്ടുണ്ട്. മംഗളൂരുവിൽ താമസിക്കുന്നതിനിടയില്‍ ഓരോ സ്ഥലത്തുമെത്തിയായിരുന്നു മോഷണം. ഫോണ്‍ ചെയ്യുന്നതുപോലെ നടിച്ച് മൊബൈലുകള്‍ നോട്ടംവച്ച് അവസരം അനുകൂലമാകുമ്പോള്‍ ഫോണുമായി സ്ഥലം വിടുകയാണെന്ന്് പോലീസ് പറയുന്നു. മേയ് നാലിന് ഉച്ചക്ക് 1.30 തിനും രണ്ടിനുമിടയിലായിരുന്നു പരാതിക്കാസ്പദമായ മോഷണം. മൂരിക്കൊവ്വല്‍ അനാമയ ആശുപത്രിയിലെ നഴ്‌സുമാരായ പരിയാരം കുറ്റ്യേരിയിലെ സന്ധ്യാവിനോദ്, ചെറുപുഴയിലെ സാന്ദ്ര, നിധി ജോസഫ് എന്നിവരുടെ ഫോണുകളാണ് മോഷ്ടിച്ചത്. സിസിടിവി ദൃശ്യത്തില്‍നിന്നാണ് പോലീസ് പ്രതിയെ തിരിച്ചറിഞ്ഞത്.

കണ്ണില്‍ ചോരയില്ലാതെ റവന്യുവകുപ്പ് : എങ്ങോട്ടുപോകുമെന്നറിയാതെ ലക്ഷ്മിയമ്മയും കുടുംബവും

കാസര്‍ഗോഡ്: റവന്യു വകുപ്പിന്‍റെ പരസ്പരവിരുദ്ധമായ കത്തില്‍ പകച്ചുനില്‍ക്കുകയാണ് കാസര്‍ഗോഡ് നായ്കസ് റോഡില്‍ ഒരു കുടുംബം. 90 വര്‍ഷമായി കുടിയിരിക്കുന്ന ഭൂമിയില്‍നിന്ന് മൂന്നു ദിവസത്തിനകം കുടിയൊഴിയണമെന്നും അല്ലെങ്കില്‍ ഒഴിപ്പിക്കല്‍ നടപടി സ്വീകരിക്കുമെന്നുമാണ് നോട്ടീസ്. മാറിപ്പോകേണ്ട സ്ഥലത്തിന്‍റെ സര്‍വേ നമ്പര്‍ ഉള്‍പ്പെടെ നല്‍കിയിട്ടുണ്ടെങ്കിലും അങ്ങനെയൊരു സ്ഥലം ഇവര്‍ക്ക് അനുവദിച്ചതിന്‍റെ രേഖകള്‍ ഫയലില്ലെന്ന് ആര്‍ഡിഒയും പറയുന്നു. ഇല്ലാത്ത സ്ഥലത്തേക്ക് കുടിയൊഴിയാന്‍ ആവശ്യപ്പെടുമ്പോള്‍ പട്ടികജാതി വിഭാഗത്തില്‍പ്പെടുന്ന കുടുംബം അനുഭവിക്കുന്നത് കടുത്ത നീതി നിഷേധമാണ്. "വില്ലേജ് ഓഫീസീന്ന് കൊണ്ടുവന്ന കടലാസില്‍ പറയുന്നു മൂന്നു ദിവസത്തില്‍ കുടിയൊഴിയണമെന്ന്. ഞങ്ങള്‍ എങ്ങോട്ടാണ് പോകേണ്ടത് ?' സംസാരിക്കുമ്പോള്‍ കണ്ണീര്‍ വാര്‍ക്കുന്നുണ്ട് ഈ വീട്ടിലെ അംഗങ്ങള്‍ ഓരോരുത്തരും. ഭൂമിക്കായി വര്‍ഷങ്ങള്‍ നീണ്ട നിയമപോരാട്ടം നടക്കുമ്പോഴാണ് റവന്യൂ അധികൃതരില്‍നിന്നും മനുഷ്യത്വ വിരുദ്ധമായ സമീപനം. കാസര്‍ഗോഡ് വില്ലേജിലെ സര്‍വേ നമ്പര്‍ 89/11ല്‍പ്പെട്ട സ്ഥലത്താണ് 92 കാരിയായ ലക്ഷ്മിയമ്മയും മകള്‍ കമലാക്ഷിയും, മകന്‍റെ ഭാര്യ ചിത്രയും അവരുടെ മൂന്നുമക്കളും കഴിയുന്നത്. പൊളിഞ്ഞു വീഴാറായ വീട് ഒന്ന് പുതുക്കി പണിയാന്‍ പോലും ഇതുവരെ സാധിച്ചിട്ടില്ല. ലക്ഷ്മിയമ്മ കിടപ്പിലാണ്. ഇനിയിപ്പോള്‍ അധികൃതര്‍ കുടിയിറക്കിയാല്‍ കിടപ്പിലായ അമ്മയെയും കൊണ്ട് എങ്ങോട്ട് പോകുമെന്നതില്‍ കുടുംബാംഗങ്ങള്‍ക്ക് നിശ്ചയമില്ല. കഴിഞ്ഞ അഞ്ചിനാണ് താലൂക്ക് തഹസില്‍ദാര്‍ ഒപ്പുവച്ച നോട്ടീസ് കുടുംബത്തിന് ലഭിച്ചത്. വര്‍ഷങ്ങളായി കുടിയിരിപ്പുള്ള സ്ഥലത്തുനിന്ന് 122/1 പിടി യില്‍പ്പെട്ട സ്ഥലത്തേക്ക് മാറാനാണ് ഉത്തരവ്. എന്നാല്‍, ഇതേ സര്‍വേ നമ്പര്‍ പ്രകാരമുള്ള സ്ഥലം സംബന്ധിച്ച വിവരങ്ങള്‍ ആരാഞ്ഞ് വിവരാവകാശ നിയമപ്രകാരം നല്‍കിയ അപേക്ഷക്ക് ജൂണ്‍ 28ന് ആര്‍ഡിഒ നല്‍കിയ മറുപടിയില്‍ ഈ സര്‍വേ നമ്പറില്‍ ലക്ഷ്മിഅമ്മക്ക് ഭൂമി അനുവദിച്ചതിന്‍റെ രേഖകള്‍ ഫയലില്‍ കാണുന്നില്ലെന്നും പറയുന്നു. ഭൂരഹിതരായവര്‍ക്ക് അവരുടെ അപേക്ഷ പരിഗണിച്ചാണ് ഭൂമി അനുവദിക്കുന്നത്. എന്നാല്‍, വര്‍ഷങ്ങളായി ഒരിടത്ത് കുടിയറക്കുമ്പോള്‍ അപേക്ഷ പോലും നല്‍കാതിരിക്കെ എങ്ങനെയാണ് തഹസില്‍ദാരുടെ കത്തില്‍ പരാമര്‍ശിക്കുന്ന സര്‍വേ നമ്പറില്‍ ഭൂമി ലഭിച്ചതെന്നതിലും വ്യക്തതയില്ല. കുടിയിരിപ്പ് ഭൂമി അനുവദിക്കണമെന്നാവശ്യപ്പെട്ട് വര്‍ഷങ്ങളായി ഈ കുടുംബം ഹൈക്കോടതിയില്‍ കേസ് നടത്തുന്നുണ്ട്. റവന്യുമന്ത്രിക്കും കുടുംബം അപേക്ഷ നല്‍കിയിട്ടുണ്ട്.

തൃക്കണ്ണാട്ട് കടലാക്രമണം രൂക്ഷം; കെട്ടിടങ്ങള്‍ തകര്‍ന്നുവീണു

ബേക്കല്‍: തൃക്കണ്ണാട്ട് കടലാക്രമണം രൂക്ഷമായി. തിങ്കളാഴ്ച രാത്രിയോടെ ആരംഭിച്ച കടലാക്രമണത്തെതുടര്‍ന്ന് ഉച്ചയോടെ ആളുകള്‍ നോക്കിനില്‍ക്കെ രണ്ടു കെട്ടിടങ്ങള്‍ തകര്‍ന്നുവീണു. കാസര്‍ഗോഡ്-കാഞ്ഞങ്ങാട് സംസ്ഥാനപാതയിലെ തൃക്കണ്ണാട് ക്ഷേത്രത്തിനു മുന്‍വശം കടലും റോഡും തമ്മിലുള്ള അകലം വെറും 10 മീറ്റര്‍ മാത്രമായി ചുരുങ്ങി. സംസ്ഥാനപാതയില്‍ ഏതു സമയത്തും കടല്‍ കയറുമെന്ന അവസ്ഥയിലാണ് ഉള്ളത്. തൃക്കണ്ണാട് ത്രയംബകേശ്വര ക്ഷേത്രത്തിന്‍റെ നമസ്‌കാര മണ്ഡപവും കടലാക്രമണ ഭീഷണിയിലാണ്. മണ്ഡപത്തിനു ചുറ്റും കല്ലുകള്‍ കൂട്ടിയിട്ടാണ് താത്കാലിക കവചം തീര്‍ത്തിട്ടുള്ളത്. മണ്ഡപത്തിന്‍റെ തെക്കു ഭാഗത്ത് കടല്‍കരയിലേക്ക് കൂടുതല്‍ കയറിയതാണ് കെട്ടിടങ്ങള്‍ തകരാന്‍ ഇടയാക്കിയത്. റവന്യു ഉദ്യോഗസ്ഥരും പോലീസും സ്ഥലത്തു ക്യാമ്പ് ചെയ്തിട്ടുണ്ട്.

കാട്ടാനക്കലി തുടരുന്നു; വീട്ടമ്മ രക്ഷപ്പെട്ടത് തലനാരിഴയ്ക്ക്

ഇരിട്ടി: ആറളം ഫാം ബ്ലോക്ക് പത്തിലെ ആനമുക്കിൽ പ്ലോട്ട് നമ്പർ 746 ലെ രാജമ്മയുടെ പുരയിടത്തിൽ ഇന്നലെ പുലർച്ചെ 2.30 ഓടെ കാട്ടാനയിറങ്ങി വ്യാപക നാശനഷ്ടമുണ്ടാക്കി. കൊലയാളി മോഴയാനയാണ് ഇന്നലെ മേഖലയിൽ ഭീതിവിതച്ചത്. രാജമ്മയുടെ കൃഷിയിടത്തിലെ തെങ്ങ്, കവുങ്ങ്, വാഴ, കശുമാവ് എന്നിവ നശിപ്പിച്ച ആന കുടിവെള്ള പൈപ്പും നശിപ്പിച്ചു. കിണറിൽ നിന്ന് വീട്ടിലെ ടാങ്കിലേക്ക് വെള്ളം എത്തിക്കുന്ന പൈപ്പാണ് ആന തകർത്തത്. ഇതോടെ ഇവരുടെ വീട്ടിലേക്കുള്ള കുടിവെള്ളം നിലച്ചിരിക്കുകയാണ്. ഈ വർഷം മൂന്നാം തവണയാണ് കാട്ടാന രാജമ്മയുടെ കൃഷിയിടത്തിലെത്തി കൃഷി നശിപ്പിക്കുന്നത്. ബ്ലോക്ക് പത്തിലെ പ്ലോട്ട് നമ്പർ 745 ലെ കൃഷ്‌ണൻ പുലിക്കരി, പ്ലോട്ട് നമ്പർ 714 ലെ നാരായണി ചപ്പിലി എന്നിവരുടെ കൃഷിയിടത്തിലും മോഴയാന നാശം വിതച്ചു. ഇവരുടെയും പ്ലാവ് ഉൾപ്പെടെയുള്ള കൃഷികൾ മോഴയാന നശിപ്പിച്ചു. പുലർച്ചെ നാലോടെയാണ് ആന എത്തിയത്. ചെവിക്ക് കേൾവിക്കുറവുള്ള ചിപ്പിലി നാരായണി ഭാഗ്യം കൊണ്ടാണ് ആനയുടെ പിടിയിൽ നിന്നു രക്ഷപ്പെട്ടത്. ‌ഒറ്റയ്ക്ക് താമസിക്കുന്ന നാരായണിയുടെ വീട്ടിലെ നായ കുരച്ച് ബഹളം വച്ചപ്പോൾ ലൈറ്റ് പോലുമില്ലാതെ നാരായണി വീടിന്‍റെ തിണ്ണവരെ എത്തിനോക്കിയിട്ട് തിരിച്ചുപോകുകയായിരുന്നു. ആ സമയം വീടിന്‍റെ മുറ്റത്ത് ആനയുണ്ടായിരുന്നു. പിന്നീട് വീട്ടുമുറ്റത്തെ തെങ്ങ് നശിപ്പിച്ചശേഷമാണ് ആന അവിടെനിന്ന് മാറിയത്. 2007 ൽ ആലക്കോട് വെള്ളാട്, ഉദയഗിരി ഭാഗത്തു നിന്നെത്തിയ കുടുംബങ്ങളാണ് ഇവിടെ ഭൂരിഭാഗവും. കശുമാവ് മാത്രം ഉണ്ടായിരുന്ന പ്രദേശം ഓരോ വിളകളായി പിടിപ്പിച്ചു വന്നതാണ് ഇന്ന് കാട്ടാനകൾ നശിപ്പിക്കുന്നത്. അഞ്ചു വർഷമായി ആനയുടെ ആക്രമണം വളരെ കൂടുതലാണെന്ന് പ്രദേശവാസികൾ പറയുന്നത്. നാലു മാസത്തിനുള്ളിൽ പതിനെട്ടിലധികം കുടിലുകൾ കാട്ടാന തകർത്തിരുന്നു. പലരും ഭാഗ്യംകൊണ്ടാണ് ആനയ്ക്ക് മുന്നിൽനിന്ന് രക്ഷപ്പെട്ടത്. ഭയന്നോടിയവരിൽ പലരും വീണ് പരിക്കേറ്റ സംഭവങ്ങളും ഉണ്ടായിട്ടുണ്ട്. താത്കാലിക സോളാർ വേലി സ്ഥാപിച്ചിട്ടുണ്ടെങ്കിലും ഇവ തകർത്താണ് ആനകൾ ജനവാസ മേഖലയിൽ പ്രവേശിക്കുന്നതെന്നാണ് പ്രദേശവാസികൾ പറയുന്നത്. മനുഷ്യനെ കൊല്ലുന്ന കാട്ടാനകളിൽ നിന്ന് ആദിവാസികളെ രക്ഷിക്കണമെന്നാണ് ഇവരുടെ ആവശ്യം. ഞങ്ങൾക്ക് വേണ്ടത് ജീവന് സുരക്ഷയാണ്: രാജമ്മ പത്രമാധ്യമങ്ങളിൽ വാർത്ത വന്നാൽ ആദിവാസികളുടെ ജീവന് സുരക്ഷയാവില്ല. ഞങ്ങൾക്ക് വേണ്ടത് ശാശ്വത പരിഹാരമാണ്. മനുഷ്യനെ കൊല്ലുന്ന കാട്ടാനകൾ പുനരധിവാസ മേഖലയിൽ ചുറ്റിത്തിരിയുമ്പോൾ വലിയ വലിയ ഓഫീസുകളിൽ ഇരിക്കുന്ന ഉദ്യോഗസ്ഥർ ജനങ്ങളുടെ നിസഹായ അവസ്ഥ മനസിലാക്കുന്നില്ല. ചർച്ചകൾകൊണ്ട് കാര്യമില്ല. ആനമതിൽ ഉൾപ്പെടെ നിർമാണം നിലച്ചിട്ടും യാതൊരു നടപടിയും ഉണ്ടാകാത്തത് ആദിവാസികളോട് കാണിക്കുന്ന അനീതിയാണ്. മാനസികവും ശാരീരികവുമായി വളരെയേറെ ബുദ്ധിമുട്ടുകളാണ് മേഖലയിലെ ജനങ്ങൾ നേരിടുന്നത്. തൊഴിലെടുത്ത് ജീവിക്കാൻ കഴിയാതായവരെ എന്തിനാണ് ആനക്കാട്ടിൽ മരിച്ചുതീരാൻ വിടുന്നത്.

"എന്‍റെ പ്രിയ മുഖ്യമന്ത്രീ...ഭയമാകുന്നു,' പോലീസിനെതിരേ നടപടി ആവശ്യപ്പട്ട് മുഖ്യമന്ത്രിക്ക് എഴുത്തുകാരന്‍റെ പരാതി

കണ്ണൂർ: റോഡ് മുറിച്ചുകടക്കാൻ കഴിയാതിരുന്ന വയോധികനെ റോഡ് മുറിച്ചുകടത്തി കൊടുക്കുന്നതിനിടെ ഡ്യൂട്ടിയിലുണ്ടായിരുന്ന പോലീസുകാരനോട് ഒന്നു സഹായിച്ചു കൂടെ എന്നു ചോദിച്ച വിരോധത്തിൽ എസ്ഐ ജീപ്പിൽ കയറ്റി സ്റ്റേഷനിൽ കൊണ്ടുപോയി മാനസികമായി പീഡിപ്പിക്കുകയും മദ്യപാനിയെന്ന് വരുത്തിത്തീർക്കാൻ ശ്രമിക്കുകയും ചെയ്തെന്ന് കാണിച്ച് മുഖ്യമന്ത്രിക്ക് പരാതി. എഴുത്തുകാരനും വ്യാപാരിയുമായ ഇയ്യ വളപട്ടണമാണ് വളപട്ടണം എസ്ഐക്കെതിരെ മുഖ്യമന്ത്രിക്ക് പരാതി നൽകിയത്. കഴിഞ്ഞ ശനിയാഴ്ചയായിരുന്നു പരാതിക്കാസ്പദമായ സംഭവം. റോഡ് മുറിച്ചു കടക്കാൻ വിഷമിച്ച വയോധികനെ റോഡ് കടത്തി കൊടുക്കുന്പോൾ ഡ്യൂട്ടിയിലുണ്ടായിരുന്ന പോലീസുകാരനോട് ഒന്നു സഹായിച്ചു കൂടെ എന്നു ചോദിച്ചപ്പോൾ എന്‍റെ ഡ്യൂട്ടി അതല്ല, ഞാൻ തളിപ്പറന്പ് രാജരാജേശ്വര ക്ഷേത്രത്തിലേക്ക് പോകുന്ന ഗവർണറുടെ സുരക്ഷാ ഡ്യൂട്ടിയിലാണെന്ന് പറഞ്ഞ് തട്ടിക്കയറുകയും എസ്ഐ വിളിപ്പിച്ച് ജീപ്പിൽ കയറ്റി സ്റ്റേഷനിലേക്ക് കൊണ്ടു പോകുകയുമായിരുന്നു. മദ്യലഹരിയിൽ പോലീസിനോട് തട്ടിക്കയറി ഡ്യൂട്ടി തടസപ്പെടുത്താൻ ശ്രമിച്ചെന്ന കേസ് ചുമത്തി ആറുമാസം ജയിലിലാക്കുമെന്ന് ഭീഷണിപ്പെടുത്തിയെന്നും പരാതിയിൽ പറയുന്നു. ജീവിതത്തിൽ ഇന്നു വരെ മദ്യപിക്കാത്ത തന്നെ മദ്യപനായി ചിത്രീകരിക്കാനാണ് എസ്ഐയും അവിടെയുള്ള ചില പോലീസുകാരും ശ്രമിച്ചത്. തന്നെ അറിയാവുന്ന പോലീസ് സുഹൃത്തുക്കൾ താൻ മദ്യപിക്കാത്ത വ്യക്തിയാണെന്ന് എസ്ഐയെ അറിയിച്ചപ്പോഴും അംഗീകരിക്കാൻ തയാറായില്ല. ആധാർ കാർഡ് ആവശ്യപ്പെട്ടപ്പോൾ കൈയിലില്ലെന്ന് പറഞ്ഞപ്പോൾ ആധാർ കൈവശം വയ്ക്കാത്തതിന് കേസെടുക്കുമെന്നും ഭീഷണിപ്പെടുത്തി. ഫോൺ പിടിച്ചുവാങ്ങുന്നതിനിടെ ഒരു സുഹൃത്തിനോട് വിവരം പറയാനായതിനാലാണ് കള്ളക്കേസിൽ കുടുങ്ങാതെ രക്ഷപ്പെട്ടത്. ഇക്കാര്യം സമൂഹമാധ്യമത്തിൽ പോസ്റ്റ് ചെയ്യാമായിരുന്നെങ്കിലും മുഴുവൻ പോലീസ് സേനയുടെയും സർക്കാരിന്‍റെയും പ്രതിച്ഛായ മങ്ങുമെന്നതിനാലാണ് അക്കാര്യം ചെയ്യാതിരുന്നത്. ഇവിടത്തെ സിസ്റ്റം എത്ര നന്നാക്കാൻ ശ്രമിച്ചാലും നന്നാകാൻ വിടില്ല എന്നു തീരുമാനിക്കുന്ന ഒരു വിഭാഗം പോലീസുകാരുണ്ട്. ഞാൻ പറയുന്നത് കേൾക്കാനുള്ള സാവകാശം പോലും പോലീസുകാർ കാണിച്ചില്ല. ഒരു മനുഷ്യനോട് പോലും കടുപ്പിച്ചു സംസാരിക്കാൻ പോലും കഴിയില്ല എന്നു തിരിച്ചറിഞ്ഞതു കൊണ്ട്. എസ്ഐ ടെസ്റ്റ്‌ എഴുതാതെ മടങ്ങി വന്ന ഒരാളാണ് ഞാൻ. ഒരു മണിക്കൂറോളം സ്റ്റേഷനിൽ വച്ച് ഹൃദ്രോഗികൂടിയായ എന്നെ എസ്ഐയുടെ നേതൃത്വത്തിൽ ചില പോലീസുകാർ മാനസികമായി പീഡിപ്പിക്കുകയായിരുന്നു. അറിയാവുന്ന ചില പോലീസുകാരും സിപിഎം ലോക്കൽ സെക്രട്ടറി ഷക്കീൽ ഉൾപ്പെടെയുള്ളവരും ഇടപെട്ടതിനാലാണ് മദ്യപാനകുറ്റത്തിൽനിന്നും രക്ഷപ്പെട്ടത്. അവരോട് എന്‍റെ സ്നേഹം അറിയിക്കുന്നു. മരിക്കുന്നതുവരെ ഇവരെ മറക്കില്ല. തിരക്കിന്‍റെ ഇടയിലും എനിക്ക് വേണ്ടി അവർ സംസാരിച്ചല്ലോ. സ്റ്റേഷനിലുള്ള പോലീസുകാരൊക്കെ ഒരു കൊലപാതകിയോട് പെരുമാറുന്നത് പോലെ അത്രയ്ക്ക് രൂക്ഷമായിട്ടാണ് പെരുമാറിയത്. എനിക്ക് ആ പോലീസുകാരോട് ദേഷ്യമല്ല തോന്നിയത്.., സങ്കടമാണ്. ഇങ്ങനെയുള്ളവരിൽനിന്ന് എന്ത് നീതി നിർവഹണമാണ് സമൂഹത്തിനു ലഭിക്കുക. ഇവരിൽ നിന്നും എന്തു നീതിയാണ് സമൂഹം പ്രതീക്ഷിക്കേണ്ടത്. പരാതി കൊടുത്താൽ പോലീസുകാർ പലരീതിയിലും എന്നെ കേസിൽ കുടുക്കും എന്നു എന്‍റെ പോലീസ് സുഹൃത്ത്‌ പറയുകയുണ്ടായി. അവരിൽനിന്നു തുടർന്നുണ്ടായേക്കാവുന്ന കേസുകൾ എന്നെ ഭയപ്പെടുത്തുന്നുണ്ട്. എന്‍റെ പ്രിയ മുഖ്യമന്ത്രീ.. ഭയമാകുന്നു...സർക്കാരിന്‍റെ മുഖമായാണ് എന്നെപ്പോലെയുള്ളവർ പോലീസിനെ കാണുന്നത് .അതുകൊണ്ട് തന്നെ, എന്‍റെ അനുഭവം മേലിൽ ആർക്കുമുണ്ടാകാതിരിക്കാൻ നടപടി ഉണ്ടാകണം. ആർക്കെതിരെയെങ്കിലുമുള്ള ശിക്ഷാ നടപടികൾ അല്ല, പകരം ഭരണകൂടത്തിന്‍റെ മർദനോപാധിയാണ് പോലീസ് എന്ന തോന്നൽ മാറ്റാൻ ആവശ്യമായ നടപടികൾ എടുക്കാൻ വികസന കേരളത്തിന്‍റെ നായകൻ എന്ന നിലയിൽ അങ്ങയുടെ സർക്കാർ ഇടപെടണം എന്നാണ് അപേക്ഷയെന്നും പരാതിയിലുണ്ട്.

വന്യമൃഗങ്ങളെ വനത്തിനുള്ളിൽ സംരക്ഷിക്കണം: ഇൻഫാം

കണ്ണൂർ: വന്യമൃഗങ്ങളെ വനത്തിനുള്ളിൽ സംരക്ഷിക്കാനും കൃഷിയിടങ്ങളിൽ ഇറങ്ങുന്നത് നിയന്ത്രിക്കാനും ആയിരം കോടി മാറ്റിവയ്ക്കാൻ സർക്കാർ തയാറാകണമെന്ന് ഇൻഫാം ദേശീയ സെക്രട്ടറി ഫാ.ജോസഫ് കാവനാടി. ഇൻഫാം ജില്ലാ ജനറൽബോഡി യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. നിലവിൽ ബജറ്റിൽ നീക്കിവയ്ക്കുന്ന നാമമാത്ര തുക നഷ്ടപരിഹാരത്തിനു പോലും തികയാറില്ല. കേന്ദ്ര-സംസ്ഥാന സർക്കാരുകളുടെ കിടമത്സരം മൂലം പാവപ്പെട്ട കർഷകരുടെ ജീവനാണ് ബലി കൊടുക്കേണ്ടിവരുന്നത്. കർഷകരുടെ സ്വത്തിനും ജീവനും യാതൊരു വിലയും കല്പിക്കാതെ വന്യമൃഗശല്യം കേരളമാകെ സംഹാര താണ്ഡവമാടുന്പോൾ ശാശ്വത പരിഹാരം കാണാനാകാതെ സർക്കാരും വനം വകുപ്പും ഇരുട്ടിൽ തപ്പുകയാണെന്ന് അദ്ദേഹം പറഞ്ഞു. വന നിയമങ്ങൾ ഭേദഗതി ചെയ്യുക, പ്രതിരോധ സംവിധാനത്തിന് ആയിരം കോടി അനുവദിക്കുക,പ്രതിരോധ പ്രവർത്തനങ്ങൾക്ക് ജനകീയ സമിതികൾ രൂപീകരിക്കുക, നഷ്ടപരിഹാര തുക വർധിപ്പിക്കുക തുടങ്ങിയ ആവശ്യങ്ങൾ സർക്കാരിന്‍റെ ശ്രദ്ധയിൽപ്പെടുത്താൻ യോഗം തീരുമാനിച്ചു. ഇൻഫാം ജില്ലാ പ്രസിഡന്‍റ് സ്കറിയ നെല്ലംകുഴി അധ്യക്ഷത വഹിച്ചു. ഇൻഫാം ഡയറക്ടർ ഫാ. ബിബിൻ വരമ്പകത്ത് വിഷയാവതരണം നടത്തി. സണ്ണി തുണ്ടത്തിൽ, ഉണ്ണിക്കൃഷ്ണൻ ചുഴലി, ജോസ് തോണിക്കൽ, ടോമി വടക്കേക്കുരിക്കാട്ട്, ഷാജി തെക്കേക്കര, ടോമി ചക്കാലക്കുന്നേൽ, ആന്‍റണി ജീരകത്തിൽ, ലാലിച്ചൻ കുഴിയാത്ത്, കുര്യാക്കോസ് പുതിയിടത്ത്പറമ്പിൽ എന്നിവർ പ്രസംഗിച്ചു.

സർവകലാശാല‍യിലേക്ക് എസ്എഫ്ഐ മാർച്ച് ; സംഘർഷം; ജലപീരങ്കി

കണ്ണൂർ: സർവകലാശാലയെ കാവിവത്കരിക്കാനുള്ള ഗവർണറുടെ നീക്കത്തിൽ പ്രതിഷേധിച്ച് താവക്കരയിലെ സർവകലാശാല ആസ്ഥാനത്തേക്ക്‌ എസ്എഫ്ഐ പ്രവർത്തകർ ന‌ടത്തിയ മാർച്ച്‌ സംഘർഷത്തിൽ കലാശിച്ചു. ബാരിക്കേഡുകൾ മറികടന്ന് മുന്നേറിയ വിദ്യാർഥികളിൽ ചിലർ സർവകലാശാലയുടെ ഗേറ്റ് ചാടിക്കടന്ന് സർവകലാശാല അഡ്മിനിസ്ട്രേറ്റീവ് ബ്ലോക്കിലേക്ക് കടന്നെത്തി കുത്തിയിരുന്ന് മുദ്രാവാക്യം വിളിച്ചു. ബാരിക്കേഡുകൾ തള്ളിമാറ്റിയതോടെ പോലീസും പ്രവർത്തകരും തമ്മിൽ ഉന്തും തള്ളുമുണ്ടായി സംഘർഷം കൂടിയതോടെ പോലീസ് ജലപീരങ്കി പ്രയോഗിച്ചു. സർവകലാശാല കാവിവത്കരിക്കാൻ ശ്രമിക്കുന്ന ഗവർണറുടെ ഇടപെടലുകളിൽനിന്ന് പിന്മാറുക, വൈസ് ചാൻസലറുടെ ഏകാധിപത്യ നിലപാട് അവസാനിപ്പിക്കുക എന്നീ ആവശ്യങ്ങൾ വിദ്യാർഥികൾ ഉന്നയിച്ചു. കേന്ദ്രകമ്മിറ്റി അംഗം ബിപിൻരാജ് പായം ഉദ്ഘാടനം ചെയ്തു. ജില്ലാ സെക്രട്ടറി ശരത്‌ രവീന്ദ്രൻ അധ്യക്ഷനായി. സംസ്ഥാന സെക്രട്ടേറിയറ്റ്‌ അംഗം ടി.പി. അഖില, കാസർഗോഡ് ജില്ലാ പ്രസിഡന്‍റ് ഋഷിത സി. പവിത്രൻ, സെക്രട്ടറി കെ. പ്രണവ്‌, സംസ്ഥാന കമ്മിറ്റി അംഗങ്ങളായ അഞ്ജലി സന്തോഷ്‌, കെ. നിവേദ്‌, ജോയൽ തോമസ്‌, സ്വാതി പ്രദീപൻ എന്നിവർ പ്രസംഗിച്ചു. ‌

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]