കണ്ണൂർ: ജില്ലാ അഗ്രി ഫോര്ട്ടികള്ച്ചറല് സൊസൈറ്റി സംഘടിപ്പിക്കുന്ന "കണ്ണൂര് പുഷ്പോത്സവം -23' നാളെ മുതൽ നടക്കും. പോലീസ് മൈതാനിയില് വൈകുന്നേരം അഞ്ചിന് ഗാനരചയിതാവ് പത്മശ്രീ കൈതപ്രം ദാമോദരന് നമ്പൂതിരി ഉദ്ഘാടനം ചെയ്യും. വൈകുന്നേരം ആറിന് സിനിമാ പിന്നണി ഗായകൻ അതുൽ നറുകര നയിക്കുന്ന സൂപ്പർ മെഗാഹിറ്റ് ഗാനമേള അരങ്ങേറുമെന്ന് ജില്ലാ കളക്ടര് എസ്. ചന്ദ്രശേഖർ അറിയിച്ചു.
ചെടികളും പച്ചക്കറി ഫലവൃക്ഷത്തൈകളും മറ്റു നടീല്വസ്തുക്കളും ഔഷധസസ്യങ്ങളും മിതമായ നിരക്കില് ലഭ്യമാകും. പുഷ്പാലങ്കാരം, വെജിറ്റബിള് കാര്വിംഗ്, പാചകം, സലാഡ് അറേഞ്ച്മെന്റ്, മൈലാഞ്ചി ഇടല്, കൊട്ട-ഓല മെടയല്, പുഷ്പരാജ റാണി, പുഞ്ചിരി, കാര്ഷിക ഫോട്ടോഗ്രഫി, മൊബൈല് ഫോട്ടോഗ്രഫി, കാരിക്കേച്ചര് രചന തുടങ്ങിയ മത്സരങ്ങളും നടത്തും. വിവിധ ദിവസങ്ങളിലായി കാര്ഷിക ഉത്പാദന മേഖല നേരിടുന്ന വെല്ലുവിളികള്, പച്ചക്കറി കൃഷിയിലെ നൂതന പ്രവണതകള്, നാളികേരത്തില് മൂല്യവര്ധിത സാധ്യതകള്, പഴവര്ഗ കൃഷിയിലെ നവാഗതര് തുടങ്ങിയ വിഷയങ്ങളില് സെമിനാറുകള്, വനിതാ കര്ഷക സംഗമം, കുട്ടി കര്ഷകസംഗമം എന്നിവയും നടത്തും. ലഹരിക്കെതിരേയുള്ള കാമ്പയിനിന്റെ ഭാഗമായി പോലീസിന്റെ നേതൃത്വത്തില് "യോദ്ധാവ്' മെഗാഷോയും വിവിധ കലാപരിപാടികളും അരങ്ങേറും. ഫെബ്രുവരി ആറു വരെയാണ് പുഷ്പോത്സവം.
പത്രസമ്മേളനത്തില് ജില്ലാ ഹോര്ട്ടി കള്ച്ചറല് സൊസൈറ്റി സെക്രട്ടറി വി.പി. കിരണ്, വൈസ് പ്രസിഡന്റുമാരായ ടി.പി. റൗഫ്, കെ.സി. വത്സല, പി.വി. ഷൈലജ, ട്രഷറര് കെ.എം. ബാലചന്ദ്രന്, രക്ഷാധികാരികളായ യു.കെ.ബി. നമ്പ്യാര്, പി.സി. മിത്രന്, ജോയിന്റ് സെക്രട്ടറിമാരായ എം.കെ. മൃദുല്, ഇ.ജെ. ഉണ്ണിക്കൃഷ്ണന്, എക്സിക്യൂട്ടീവ് കമ്മിറ്റി അംഗങ്ങളായ ജില്ലാ ഇന്ഫര്മേഷന് ഓഫീസര് ഇ.കെ. പത്മനാഭന്, ടി.പി. വിജയന്, പി.വി. രത്നാകരന്, സി. അബ്ദുള് ജലീല്, ടി. വേണുഗോപാല് എന്നിവര് പങ്കെടുത്തു.