ഇരിട്ടി: സ്വകാര്യ ആഘോഷവേളകളിൽ നിർധനനായ ഒരു രോഗിക്ക് ഒരുനേരം ഡയാലിസിസ് നടത്താനുള്ള ഫണ്ടോ വിഹിതമായി 500 രൂപയെങ്കിലുമോ സംഭാവന ചെയ്യണമെന്ന ചിന്ത സമൂഹത്തിലും കുടുംബത്തിലും ഉണ്ടാകണമെന്ന് ആർച്ച്ബിഷപ് എമെരിറ്റസ് മാർ ജോർജ് ഞറളക്കാട്ട്. ആർച്ച്ബിഷപ് എമെരിറ്റസ് മാർ ജോർജ് ഞറളക്കാട്ടിന്‍റെ പൗരോഹിത്യ സുവർണ ജൂബിലി സ്മാരകമായി ആരംഭിച്ച എയ്ഞ്ചൽ ട്രസ്റ്റിന്‍റെ രണ്ടാമത് സൗജന്യ ഡയാലിസിസ് സെന്‍റർ ഇരിട്ടി കടത്തുംകടവിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. പണം ഇല്ലാത്തതുകൊണ്ട് ഒരു വൃക്കരോഗിക്കും ഡയാലിസിസ് മുടങ്ങരുതെന്ന ലക്ഷ്യത്തിലാണ് ഈ പദ്ധതി ആരംഭിച്ചതെന്നും ഇതിന് സുമനസുകളുടെ സഹായം വേണമെന്നും മാർ ഞറളക്കാട്ട് പറഞ്ഞു.
നിർധനരായ രോഗികൾക്ക് ഡയാലിസിസ് നടത്താനുള്ള ക്രമീകരണമൊരുക്കാനാണ് എയ്ഞ്ചൽ ട്രസ്റ്റ് രൂപീകരിച്ചതെങ്കിലും ഡയാലിസിസ് നടത്തേണ്ട സാഹചര്യത്തിലേക്ക് നമ്മളെ എത്തിക്കുന്ന വൃക്കരോഗം വരാതിരിക്കാനുള്ള ജീവിതശീലങ്ങൾ സംബന്ധിച്ച് ബോധവത്കരണംകൂടി എയ്ഞ്ചൽ ട്രസ്റ്റ് നടത്തുമെന്ന് ചടങ്ങിൽ അധ്യക്ഷത വഹിച്ചു പ്രസംഗിച്ച തലശേരി ആർച്ച്ബിഷപ് മാർ ജോസഫ് പാംപ്ലാനി പറഞ്ഞു .
ചടങ്ങിൽ എംഎൽഎമാരായ സണ്ണി ജോസഫ്, സജീവ് ജോസഫ്, കടന്നപ്പള്ളി രാമചന്ദ്രൻ, അതിരൂപത വികാരി ജനറാൾമാരായ മോൺ. ആന്‍റണി മുതുകുന്നേൽ, മോൺ. സെബാസ്റ്റ്യൻ പാലാക്കുഴി, ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ.വേലായുധൻ, പഞ്ചായത്ത് പ്രസിഡന്‍റുമാരായ പി.രജനി (പായം), പി.സി.ഷാജി (ഉളിക്കൽ), കുര്യാച്ചൻ പൈമ്പള്ളിക്കുന്നേൽ (അയ്യൻകുന്ന്), സച്ചിദാനന്ദ പ്രകൃതി ക്ഷേത്ര ട്രസ്റ്റ് സെക്രട്ടറി റവ.ഡോ.ഫിലിപ്പ് കവിയിൽ, പ്രസിഡന്‍റ് ഫാ. ബെന്നി നിരപ്പേൽ, എയ്ഞ്ചൽ ട്രസ്റ്റ് ഡയറക്‌ടർ ഫാ. തോമസ് മുണ്ടമറ്റം, എംഎസ്‌ജെ സന്യാസിനീ സമൂഹം പ്രൊവിൻഷ്യൽ സുപ്പീരിയർ സിസ്റ്റർ ഷീല, എയ്ഞ്ചൽ ട്രസ്റ്റ് കോ-ഓർഡിനേറ്റർ ഫാ. ജിൻസ് വാളിപ്ലാക്കൽ, പായം പഞ്ചായത്ത് അംഗം പി.പി.കുഞ്ഞൂഞ്ഞ്, സച്ചിദാനന്ദ പ്രകൃതിക്ഷേത്ര ട്രസ്റ്റ് വൈസ് പ്രസിഡന്‍റ് ജോർജ് മാരാംകുഴയ്ക്കൽ, ഫൊറോന വികാരിമാരായ ഫാ. ജോസഫ് കാവനാടിയിൽ (നെല്ലിക്കാംപൊയിൽ), റവ. ഡോ. ജോസഫ് കൊച്ചുകരോട്ട് (പേരാവൂർ), ഫാ. തോമസ് വടക്കേമുറിയിൽ (എടൂർ), ഫാ. അഗസ്റ്റിൻ പാണ്ട്യാംമാക്കൽ (കുന്നോത്ത്) എന്നിവർ പ്രസംഗിച്ചു.
അന്തരിച്ച ഫാ. ജോസ് മണിപ്പാറ സ്ഥാപിച്ച സച്ചിദാനന്ദ പ്രകൃതി ക്ഷേത്ര ട്രസ്റ്റിന്‍റെ കടത്തുംകടവിലെ കെട്ടിടത്തിലാണ് അതിരൂപതയുടെ സാമൂഹ്യസേവന വിഭാഗമായ തലശേരി സോഷ്യൽ സർവീസ് സൊസൈറ്റിയുടെ നേതൃത്വത്തിൽ രണ്ടര കോടി രൂപ മുടക്കി ഡയാലിസിസ് സെന്‍റർ ഒരുക്കിയിട്ടുള്ളത്.