കണ്ണൂർ: കളറാക്കാം ദസറ കളയാം ലഹരിക്കറ എന്ന സന്ദേശത്തോടെ നടത്തുന്ന കണ്ണൂർ ദസറയ്ക്ക് 26 ന് തുടക്കമാകും. കളക്ടറേറ്റ് മൈതാനിയിൽ വൈകുന്നേരം അഞ്ചിന് കെ.സുധാകരൻ എംപി ഉദ്ഘാടനം ചെയ്യുമെന്ന് കോർപറേഷൻ മേയർ ടി.ഒ. മോഹനൻ പത്രസമ്മേളനത്തിൽ അറിയിച്ചു. എഴുത്തുകാരൻ എം. മുകുന്ദൻ, സിനി ആർടിസ്റ്റും സംവിധായകനുമായ വിനീത് കുമാർ, ജില്ലാ പഞ്ചായത്ത് പ്രസിഡന്‍റ് പി.പി.ദിവ്യ, കളക്ടർ എസ്.ചന്ദ്രശേഖർ,സിറ്റി പോലീസ് കമ്മീഷണർ ആർ.ഇളങ്കോ എന്നിവർ മുഖ്യാതിഥികളാകും. തുടർന്ന് ഗാനമേള അരങ്ങേറും.
എല്ലാ ദിവസവും വൈകുന്നേരം 5:30 ന് സാംസ്കാരിക സമ്മേളനം നടക്കും. 27 ന് രാജ്‌മോഹൻ ഉണ്ണിത്താൻ എംപി ഉദ്ഘാടനം ചെയ്യും. ചെറുകഥാകൃത്ത് പി. സുരേന്ദ്രൻ മുഖ്യാതിഥിയാകും. തുടർന്ന് സിനി ആർട്ടിസ്റ്റ് സിറാജ് പയ്യോളി ഷോ നടക്കും. 28 ന് പി. സന്തോഷ്‌കുമാർ എംപി ഉദ്ഘാടനം ചെയ്യും.എഴുത്തുകാരൻ വിനോയ് തോമസ് പ്രശസ്ത സിനിമാ താരങ്ങളായ നിവിൻ പോളി,അജു വർഗീസ്, സിജു വിൽസൻ എന്നിവർ വിശിഷ്ടാതിഥികളാകും. സിറാജ് പയ്യോളി ഷോയുമുണ്ടാകും.
29 ന് ശ്രീകണ്ഠപുരം നഗരസഭ ചെയർപേഴ്‌സൺ ഡോ.കെ.വി.ഫിലോമിന ഉദ്ഘാടനം ചെയ്യും. എഴുത്തുകാരി കെ.പി. സുധീര, പ്രഫ.മുഹമ്മദ് അഹമ്മദ് എന്നിവർ മുഖ്യാതിഥികളാകും. അയജയ ഗോപാലൻ നയിക്കുന്ന ഗാനമേളയും ഉണ്ടാകും. 30 ന് എ.കെ.എം. അഷ്റഫ് എംഎൽഎ ഉദ്ഘാടനം ചെയ്യും. പി.പി. കുഞ്ഞികൃഷ്ണൻ മുഖ്യാതിഥിയാകും. തുടർന്ന് ലക്ഷ്മി ഗോപാലസ്വാമി നയിക്കുന്ന നൃത്തസന്ധ്യയും അരങ്ങേറും.
ഒന്നിന് സണ്ണി ജോസഫ് എംഎൽഎ ഉദ്ഘാടനം ചെയ്യും. പദ്മശ്രീ മട്ടന്നൂർ ശങ്കരൻകുട്ടി, സിനിമാ നടൻ ശിവദാസ് കണ്ണൂർ മുഖ്യാതിഥിയാകും. മട്ടന്നൂർ ശങ്കരൻകുട്ടിയുടെ തൃത്തായമ്പകയുണ്ടാകും. രണ്ടിന് സജീവ് ജോസഫ് എംഎൽഎ ഉദ്ഘാടനം ചെയ്യും. എഴുത്തുകാരൻ യു.കെ. കുമാരൻ മുഖ്യാതിഥിയാകും. ഡോ. എ.എസ്. പ്രശാന്ത് കൃഷ്ണൻ അവതരിപ്പിക്കുന്ന സംഗീത കച്ചേരിയും അരങ്ങേറും.
മൂന്നിന് കടന്നപ്പള്ളി രാമചന്ദ്രൻ എംഎൽഎ ഉദ്ഘാടനം ചെയ്യും. ബാലസാഹിത്യകാരൻ പി.ഐ. ശങ്കരനാരായണൻ, സിനിമ കളറിസ്റ്റ് ലിജു പ്രഭാകരൻ എന്നിവർ മുഖ്യാതിഥികളാകും. നൃത്ത സന്ധ്യയും തിറയാട്ടവും അരങ്ങേറും.
അവസാന ദിവസമായ നാലിന് സമാപന സമ്മേളനം മന്ത്രി എം.ബി. രാജേഷ് ഉദ്ഘാടനം ചെയ്യും. എം.പി. അബ്ദുൾസമദ് സമദാനി, ടി. പദ്മനാഭൻ, കെ.വി.സുമേഷ് എംഎൽഎ എന്നിവർ വിശിഷ്ടാതിഥികളാകും. തുടർന്ന് ഭരതനാട്യവും, അസ്ലം മുംബൈ നയിക്കുന്ന അസ്ലം നൈറ്റും അരങ്ങേറും.
പത്രസമ്മേളനത്തിൽ ഡെപ്യൂട്ടി മേയർ കെ.ഷബീന, സ്റ്റാൻഡിംഗ് കമ്മിറ്റി ചെയർമാൻമാരായ സുരേഷ് ബാബു എളയാവൂർ, എം.പി.രാജേഷ്, പി.ഷമീമ, പി.ഇന്ദിര, ഷാഹിന മൊയ്തീൻ കൗൺസിലർമാരായ മുസ്‌ലിഹ് മഠത്തിൽ, ടി. രവീന്ദ്രൻ, കെ.സി.രാജൻ, വി.വി. ലതേഷ്‌കുമാർ എന്നിവരും പങ്കെടുത്തു.