കൽപ്പറ്റ: രാഹുൽ ഗാന്ധിയുടെ പാർലമെന്‍റ് അംഗത്വം റദ്ദ് ചെയ്ത് കൊണ്ട് ജനാധിപത്യത്തെ കശാപ്പ് ചെയ്ത നരേന്ദ്ര മോദിയുടെ ഫാസിസത്തിനെതിരേ ജില്ലയിൽ പ്രതിഷേധ സമരം ശക്തമാക്കാൻ യുഡിഎഫ് ജില്ലാ കമ്മിറ്റി തീരുമാനിച്ചു.
വയനാട്ടുകാർ എന്‍റെ കുടുംബാംഗങ്ങളാണെന്ന രാഹുൽ ഗാന്ധിയുടെ വാക്കുകൾ വയനാട്ടുക്കാർക്കുള്ള സമ്മാനവും അംഗീകാരവുമാണെന്ന് യോഗം വിലയിരുത്തി. യുഡിഎഫ് സമരത്തിന്‍റെ ആദ്യഘട്ടം എന്ന നിലയിൽ നാളെ നാലിന് പഞ്ചായത്തടിസ്ഥാനത്തിൽ ജനകീയ പ്രതിഷേധ സംഗമം നടത്തും.
ഏപ്രിൽ ഒന്നിന് രാവിലെ 10 ന് കൽപ്പറ്റ ടെലിഫോണ് എക്സ്ചേഞ്ചിലേക്ക് മാർച്ച് നടത്തും. യുഡിഎഫ് ദേശീയ, സംസ്ഥാന നേതാക്കൾ മാർച്ചിൽ പങ്കെടുക്കും.
ജില്ലാ കോണ്ഗ്രസ് കമ്മിറ്റി ഓഫീസിൽ ചേർന്ന യോഗം ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. യുഡിഎഫ് ചെയർമാൻ കെ.കെ. അഹമ്മദ് ഹാജി അധ്യക്ഷത വഹിച്ചു. മുൻ മന്ത്രി പി.കെ. ജയലക്ഷ്മി, എം.എ. ജോസഫ്, പി.പി. ആലി, വി.എ. മജീദ്, എം.സി. സെബാസ്റ്റ്യൻ, ടി. മുഹമ്മദ്, എൻ.കെ. റഷീദ്, റസാഖ് കൽപ്പറ്റ, പി.കെ. അസ്മത്ത്, പ്രവീണ്‍ തങ്കപ്പൻ, മുഹമ്മദ് ബഷീർ, യഹ്യാഖാൻ തലക്കൽ, കെ. കുഞ്ഞിക്കണ്ണൻ, സി.ജെ. വർക്കി, ജോസഫ് കളപ്പുരക്കൽ, മുഹമ്മദ് തെക്കേടത്ത്, വിനോദ്കുമാർ, കെ.എ. ആന്‍റണി എന്നിവർ പ്രസംഗിച്ചു.