കൽപ്പറ്റ: ജില്ലയിലെ വൈദ്യുതി വിതരണ മേഖലയിൽ നവീകരണത്തിനും വികസനത്തിനും കെഎസ്ഇബി 418.084 കോടി രൂപയുടെ പദ്ധതികൾ തയാറാക്കി. വിതരണ ശൃംഖലയ്ക്കായി 333.60 ഉം ഉപ പ്രസരണ ശൃഖംലയ്ക്കായി 84.48 ഉം കോടി രൂപയുടെ പദ്ധതികളാണ് ആവിഷ്കരിച്ചത്. ജനപ്രതിനിധികളും വിദഗ്ധരും പങ്കെടുത്ത ശിൽപശാലയിലാണ് പദ്ധതികൾ രൂപപ്പെടുത്തിയത്. ഇവ കേന്ദ്ര സർക്കാരിന്‍റെ നവീകരിച്ച വിതരണ മേഖല പദ്ധതിയിൽ (ആർഡിഎസ്എസ്) ഉൾപ്പെടുത്തി നടപ്പാക്കുന്നതിന് ഉൗർജ മന്ത്രാലയത്തിന്‍റെ അംഗീകാരത്തിനു സമർപ്പിക്കും.
നിലവിലെ വൈദ്യുതി പ്രസരണ-വിതരണ ശൃംഖല പരിഷ്കരിക്കുക, ഉൗർജനഷ്ടം കുറച്ച് ഗുണമേൻമയുള്ള വൈദ്യുതി ഉപഭോക്താക്കളിൽ എത്തിക്കുക, ഉൗർജ മേഖലയുടെ സാന്പത്തിക സുസ്ഥിരത, ആധുനികവത്കരണം, മെച്ചപ്പെട്ട കാര്യക്ഷമത എന്നിവയാണ് വികസന പദ്ധതികളിലൂടെ ലക്ഷ്യമിടുന്നത്. പ്രീ പെയ്ഡ് സ്മാർട്ട് മീറ്ററിംഗ്, ഫീഡർ, ബോർഡർ, ട്രാൻസ്ഫോർമർ എന്നിവയുമായി ബന്ധപ്പെട്ട സ്മാർട്ട് മീറ്റർ, വിതരണ മേഖലയിലെ അടിസ്ഥാന സൗകര്യങ്ങളുടെ വികസനം, കെഎസ്ഇബിഎൽ ജീവനക്കാരുടെ സാങ്കേതിക മികവും ശേഷിയും വർധിപ്പിക്കാനുള്ള പരിശീലനം തുടങ്ങിയവ പദ്ധതികളിലെ പ്രധാന ഘടകങ്ങളാണ്. ഒക്ടോബറിൽ വൈദ്യുത മന്ത്രിമാരുടെ ദേശീയ സമ്മേളനത്തിൽ സംസ്ഥാനത്തിന് കൂടുതൽ വിഹിതം അനുവദിക്കാമെന്നു ഉറപ്പുലഭിച്ചതിന്‍റെ അടിസ്ഥാനത്തിലാണ് ജില്ലകൾ ആർഡിഎസ്എസിൽ കൂടുതൽ പദ്ധതികൾ അംഗീകാരത്തിനായി സമർപ്പിക്കുന്നത്.
അംഗീകാരം തേടുന്ന പദ്ധതികൾ: അഞ്ച് പുതിയ സബ്സ്റ്റേഷൻ(10 കോടി രൂപ), 36 കിലോ മീറ്റർ പുതിയ 33 കെവി ലൈൻ(26.17 കോടി), 60.5 കിലോ മീറ്റർ 33 കെവി റീ കണ്ടക്ടറിംഗ് (36.30 കോടി), മൂന്ന് 110 കെവി/33 കെവി ട്രാൻസ്ഫോർമർ (12 കോടി), 268.25 കിലോ മീറ്റർ പുതിയ എച്ച്ടി ലൈൻ (65.84 കോടി), 156.03 കിലോ മീറ്റർ പുതിയ എൽടി ലൈൻ( 16.30 കോടി), 263.44 കിലോ മീറ്റർ എച്ച് ടി ലൈൻ റീകണ്ടക്ടറിംഗ് (48.69 കോടി), 1653.38 കിലോ മീറ്റർ എൽടി ലൈൻ റീകണ്ടക്ടറിംഗ് (112.72 കോടി), 100 പുതിയ ട്രാൻസ്ഫോർമർ (4.67 കോടി), പഴയ 81 ട്രാൻസ്ഫോർമർ മാറ്റി സ്ഥാപിക്കൽ (3.15 കോടി), 684 കിലോ മീറ്റർ എൽടി ലൈൻ പരിവർത്തനം (79.86 കോടി), 47 റിംഗ് മെയിൻ യൂണിറ്റ് (2.35 കോടി രൂപ).
പ്രസരണ-വിതരണ അടിസ്ഥാന വികസന പ്രവൃത്തികൾക്കായി തദ്ദേശ സ്ഥാപന അടിസ്ഥാനത്തിൽ അംഗീകരിച്ച തുക(കോടിയിൽ): അന്പലവയൽ-12.86, എടവക-10.35, കണിയാന്പറ്റ-11.42, കോട്ടത്തറ-6.03, മീനങ്ങാടി-15.04, മേപ്പാടി-23.49, മുളളൻകൊല്ലി-14.16 , മൂപ്പൈനാട്-11.89, മുട്ടിൽ-11.91, നെൻമേനി-12.08, നൂൽപ്പുഴ-4.86, പടിഞ്ഞാറത്തറ-22.81, പനമരം-19.91, പൂതാടി-17.82, പൊഴുതന-9.55, പുൽപ്പള്ളി-47.07, തരിയോട്- 4.81, തവിഞ്ഞാൽ-20.91, തിരുനെല്ലി-16.81, തൊണ്ടർനാട്-12.78, വെള്ളമുണ്ട-25.97, വെങ്ങപ്പള്ളി-5.99, വൈത്തിരി-14.29, കൽപ്പറ്റ-22.52, മാനന്തവാടി-15.90, ബത്തേരി-26.71.