മാനന്തവാടി: മൂന്ന് ഒന്നാം സ്ഥാനം നേടി മാനന്തവാടി എംജിഎം ഹയർ സെക്കൻഡറി സ്കൂളിലെ പ്ലസ് വണ് സയൻസ് വിദ്യാർഥി ആദർശ് രാജ് കലോത്സവത്തിലെ താരമായി.
ക്ലാർനെറ്റ്, നാദസ്വരം, ഫ്ളൂട്ട് എന്നിവയിലാണ് ആദർശിനു ഒന്നാം സ്ഥാനം. അകക്കണ്ണിന്റെ വെളിച്ചത്തിൽ പിതാവ് ജയരാജ് പകർന്നുനൽകിയ വിദ്യകളുടെ മാറ്റാണ് ആദർശ് കലോത്സവ വേദികളിൽ ഉരച്ചുനോക്കിയത്. പനവല്ലി ഗവ.എൽപി സ്കൂൾ അധ്യാപകനാണ് ജയരാജ്. ചെണ്ട, ഓർഗൻ, ഹാർമോണിയം, സാക്സ്ഫോണ്, ജാസ് എന്നിവയും ആദർശിന് വശമുണ്ട്.
2019ലെ സംസ്ഥാന സ്കൂൾ കലോത്സവത്തിൽ നാദസ്വരം, ഫ്ളൂട്ട് എന്നിവയിൽ എ ഗ്രേഡ് നേടിയിരുന്നു. അമ്മ ടി.കെ. സീമയും പനവല്ലി ഗവ.എൽപി സ്കൂളിൽ അധ്യാപികയാണ്.
കോണ്ഗ്രസ് എക്സിക്യൂട്ടീവ് ക്യാന്പ് ഇന്ന്
കൽപ്പറ്റ: 2024 പാർലമെന്റ് തെരഞ്ഞെടുപ്പ് മുന്നൊരുക്കത്തിനു ഡിസിസി സംഘടിപ്പിക്കുന്ന എക്സിക്യുട്ടീവ് ക്യാന്പ് ഇന്ന് പുത്തൂർവയലിൽ നടക്കും. രാവിലെ ഒന്പതിനു കെപിസിസി വർക്കിംഗ് പ്രസിഡന്റ് ടി. സിദ്ദിഖ് എംഎൽഎ ഉദ്ഘാടനം ചെയ്യും. ഡിസിസി പ്രസിഡന്റ് എൻ.ഡി. അപ്പച്ചൻ അധ്യക്ഷത വഹിക്കും. ഐ.സി. ബാലകൃഷ്ണൻ എംഎൽഎ, ജമീല അലിപ്പറ്റ, കെ.കെ. ഏബ്രഹാം, കെ.എൽ. പൗലോസ്, കെ.കെ. വിശ്വനാഥൻ, പി.കെ. ജയലക്ഷ്മി, പി.പി. ആലി, കെ.ഇ. വിനയൻ, സംഷാദ് മരക്കാർ തുടങ്ങിയവർ നേതൃത്വം നൽകും.