ഗൂഡല്ലൂർ: മുതുമല ഫോറസ്റ്റ് ഡിവിഷനിലെ ശിങ്കാര, സീഗൂർ, തെങ്കുമാറട റേഞ്ചുകളിൽ വന്യജീവികളുടെ കണക്കെടുപ്പ് ഇന്ന് ആരംഭിക്കും. ഈ മാസം 27 വരെയാണ് കണക്കെടുപ്പ്.
മുതുമല, തൊപ്പക്കാട്, കാർക്കുടി, മസിനഗുഡി, നെല്ലാക്കോട്ട റേഞ്ചുകളിൽ കണക്കെടുപ്പ് പൂർത്തിയായിരുന്നു. മുതുമലയിൽ വർഷത്തിൽ രണ്ട് തവണയാണ് കണക്കെടുപ്പ്. ആന, പുള്ളിമാൻ, കടമാൻ, കരടി, കാട്ടുപോത്ത്, മയിൽ, പുലി, കടുവ, കുരങ്ങ് തുടങ്ങിയ ഇനം വന്യജീവികളുടെ കണക്കെടുപ്പാണ് നടത്തുന്നത്. ഇതിനു പ്രത്യേക പരിശീലനം ലഭിച്ച വനപാലകരെയാണ് നിയോഗിച്ചിരിക്കുന്നത്.
അഞ്ചു പേരടങ്ങുന്ന സംഘങ്ങളായി തിരിഞ്ഞാണ് കണക്കെടുപ്പ്. മുതുമലയിൽ ആന, കടുവ എന്നിവയുടെ കണക്കെടുപ്പ് പ്രത്യേകവും നടത്താറുണ്ട്.