ADVERTISEMENT

ADVERTISEMENT

കക്കാടംപൊയിൽ സെന്‍റ് മേരീസ് എച്ച്എസിന് പുരസ്കാരം

കക്കാടംപൊയിൽ: കുന്നമംഗലം ബിആർസിയുടെ ഇന്നവേറ്റീവ് സ്കൂൾ പുരസ്കാരം കക്കാടംപൊയിൽ സെന്‍റ് മേരീസ് ഹൈസ്കൂൾ കരസ്ഥമാക്കി.

2023 -24 വർഷത്തെ അക്കാദമിക പ്രവർത്തനങ്ങൾ പരിഗണിച്ചാണ് അവാർഡ്. അവാർഡ് സമർപ്പണം കൂടരഞ്ഞി പഞ്ചായത്ത് പ്രസിഡന്‍റ് ആദർശ് ജോസഫ് നിർവഹിച്ചു.

സ്കൂൾ മാനേജർ ഫാ. ഡാൻറ്റിസ് കിഴക്കരക്കാട്ട് അധ്യക്ഷത വഹിച്ചു. കുന്നമംഗലം ബിപിസി മനോജ് കുമാർ, ഹെഡ്മാസ്റ്റർ പി.ജെ. ഷാജി, വാർഡ് സംഗം സീന ബിജു, പിടിഎ പ്രസിഡന്‍റ് പി.ജെ. ജോസഫ്, എംപിടിഎ പ്രസിഡന്‍റ് ടിന്‍റു സുനീഷ്, സീനിയർ അസിസ്റ്റന്‍റ് സിസ്റ്റർ ടി.എം. ഗ്രേസി, ദീപ ജോസ്, സ്റ്റാഫ് സെക്രട്ടറി സിജു കുര്യാക്കോസ്, സ്കുൾ ലീഡർ സാവിയോ സെബാസ്റ്റ്യൻ എന്നിവർ പ്രസംഗിച്ചു.

ADVERTISEMENT

കോര്‍പറേഷനിലേക്കുള്ള ബിജെപി മാര്‍ച്ചില്‍ സംഘര്‍ഷം

കോഴിക്കോട്: കോഴിക്കോട് കോര്‍പറേഷനിലെ അഴിമതിയും ദുര്‍ഭരണവും അവസാനിപ്പിക്കണമെന്നാവശ്യപ്പെട്ടും കേന്ദ്ര വികസന പദ്ധതികള്‍ കോര്‍പറേഷന്‍ അട്ടിമറിക്കുന്നതിനെതിരെയും ബിജെപി നടത്തിയ കോര്‍പറേഷന്‍ ഓഫീസ് മാര്‍ച്ചില്‍ സംഘര്‍ഷം. പോലീസ് ബാരിക്കേഡുകള്‍ മറികടന്ന് കോര്‍പറേഷന്‍ ഓഫീസ് േകാമ്പൗണ്ടില്‍ പ്രവര്‍ത്തകര്‍ കയറി. സ്ത്രീകളടക്കമുള്ള പ്രവര്‍ത്തകെര പിന്നീട് പോലീസ് അറസ്റ്റ് ചെയ്തു നീക്കി. പ്രവര്‍ത്തകരും പോലീസും തമ്മില്‍ ഉന്തും തള്ളും നടന്നു. ബിജെപി സിറ്റി ഉപജില്ല കമ്മിറ്റിയുടെ നേതൃത്വത്തില്‍ കോര്‍പറേഷന്‍ ഓഫീസിലേക്ക് നടന്ന പ്രതിഷേധ മാര്‍ച്ച് ദേശീയ നിര്‍വാഹക സമിതി അംഗം പി.കെ. കൃഷ്ണദാസ് ഉദ്ഘാടനം ചെയ്തു. നാലര പതിറ്റാണ്ടുകാലമായി കോഴിക്കോട് കോര്‍പറേഷനില്‍ സിപിഎമ്മിന്‍റെ ദുര്‍ഭരണം നടക്കുകയാണെന്നും ഈ അഴിമതി ഭരണത്തുടര്‍ച്ചയ്ക്ക് അറുതിവരുത്തുന്നതു വരെ സമരം തുടരുമെന്നും കൃഷ്ണദാസ് പറഞ്ഞു. സിപിഎമ്മിന് കോര്‍പറേഷന്‍ ഭരണം കറവപ്പശുവാണ്. വോട്ട് ചെയ്ത് ഭരണത്തിലേറ്റിയ ജനങ്ങളെ കറിവേപ്പില പോലെയാണ് കണക്കാക്കുന്നത്. നിര്‍മാണ കുംഭകോണം, നികുതി കുംഭകോണം, നിയമന കുംഭകോണം എന്നിങ്ങനെ കോടികളുടെ കുംഭകോണമാണ് കോര്‍പറേഷനില്‍ നടക്കുന്നതെന്ന് അദ്ദേഹം പറഞ്ഞു. ബിജെപി സിറ്റി ജില്ല പ്രസിഡന്‍റ് കെ.പി. പ്രകാശ്ബാബു അധ്യക്ഷത വഹിച്ചു. നേതാക്കളായ വി. ഉണ്ണികൃഷ്ണന്‍, കെ.പി. ശ്രീശന്‍, നവ്യ ഹരിദാസ്, ടി.വി. ഉണ്ണികൃഷ്ണന്‍, എം. സുരേഷ്, എന്‍.പി. രാധാകൃഷ്ണന്‍, കെ. ഗണേഷ് എന്നിവര്‍ പ്രസംഗിച്ചു.

നിപ്പ: അനാവശ്യ ആശുപത്രി സന്ദര്‍ശനം ഒഴിവാക്കണം

കോഴിക്കോട്: സംസ്ഥാനത്ത് വീണ്ടും നിപ്പ രോഗബാധ റിപ്പോര്‍ട്ട് ചെയ്ത സാഹചര്യത്തില്‍ അനാവശ്യ ആശുപത്രി സന്ദര്‍ശനങ്ങള്‍ ഒഴിവാക്കണമെന്ന് കോഴിക്കോട് ജില്ലാ മെഡിക്കല്‍ ഓഫീസര്‍ ഡോ. കെ കെ രാജാറാം. ആശുപത്രിയില്‍ ചികിത്സയിലുള്ള ബന്ധുക്കളെയും സുഹൃത്തുക്കളെയും സന്ദര്‍ശിക്കുന്നത് പരമാവധി ഒഴിവാക്കണം. രോഗികളോടൊപ്പം സഹായിയായി ഒരാള്‍ മാത്രം നില്‍ക്കണം. ആരോഗ്യ പ്രവര്‍ത്തകരും ആശുപത്രിയിലെത്തുന്ന രോഗികളും കൂട്ടിരിപ്പുകാരും മാസ്‌ക് ധരിക്കണം. ആശുപത്രി സന്ദര്‍ശനത്തിന് ശേഷം കൈകള്‍ സോപ്പും വെള്ളവും ഉപയോഗിച്ച് വൃത്തിയാക്കണമെന്നും ഡിഎംഒ അറിയിച്ചു. ആശുപത്രിയില്‍ നേരിട്ട് പോകേണ്ടതില്ലാത്ത ചെറിയ ആരോഗ്യ പ്രശ്‌നങ്ങള്‍ക്ക് ഫോണിലൂടെ ഇ സഞ്ജീവനി വഴി ഡോക്ടറുടെ സൗജന്യ സേവനം ലഭ്യമാണ്. ഇതിലൂടെ രോഗപ്പകര്‍ച്ച ഇല്ലാതാക്കാനാകും. ഇ-സഞ്ജീവനി ടെലിമെഡിസിന്‍ സേവനങ്ങള്‍ക്കായി https://esanjeevani.mohfw.gov.in സന്ദര്‍ശിക്കുകയോ ഇ-സഞ്ജീവനി ആപ്ലിക്കേഷന്‍ മൊബൈലില്‍ ഡൗണ്‍ലോഡ് ചെയ്ത് ഉപയോഗിക്കുകയോ ചെയ്യാം. വീഡിയോ കോണ്‍ഫറന്‍സ് വഴി ഡോക്ടറോട് നേരിട്ട് രോഗവിവരം സംസാരിക്കാനും അവസരമുണ്ട്. നിപ പ്രത്യേക ഒ പി സേവനങ്ങള്‍ രാവിലെ എട്ട് മുതല്‍ വൈകിട്ട് എട്ട് വരെ ഇ-സഞ്ജീവനിയില്‍ ലഭ്യമാണ്. കൂടുതല്‍ വിവരങ്ങള്‍ക്കും സംശയങ്ങള്‍ക്കുമായി 104/1056/04712552056 എന്നീ ദിശ ടോള്‍ ഫ്രീ നമ്പറുകളില്‍ ബന്ധപ്പെടാം. നിപ്പ: കോഴിക്കോട്ടെ സമ്പര്‍ക്ക പട്ടികയില്‍ 114 പേര്‍ കോഴിക്കോട്: കോഴിക്കോട് ജില്ലയില്‍ നിപ സമ്പര്‍ക്കപ്പട്ടികയിലുള്ളത് 114 പേരെന്ന് ആരോഗ്യ മന്ത്രി വീണാ ജോര്‍ജ് അറിയിച്ചു. വിവിധ ജില്ലകളിലായി സമ്പര്‍ക്കപ്പട്ടികയില്‍ 609 പേരാണുള്ളത്. ഇതില്‍ 112 പേര്‍ പാലക്കാട് രണ്ടാമത് നിപ റിപ്പോര്‍ട്ട് ചെയ്തയാളുടെ സമ്പര്‍ക്കപ്പട്ടികയിലുള്ളവരാണ്. പാലക്കാട് 286, മലപ്പുറം 207, എറണാകുളം 2 എന്നിങ്ങനെയാണ് മറ്റു ജില്ലകളില്‍ സമ്പര്‍ക്കപ്പട്ടികയിലുള്ളവര്‍. മലപ്പുറത്ത് എട്ടുപേര്‍ ഐസിയു ചികിത്സയിലാണ്. മലപ്പുറം ജില്ലയില്‍ ഇതുവരെ 72 സാമ്പിളുകള്‍ നെഗറ്റീവ് ആയിട്ടുണ്ട്. പാലക്കാട് 5 പേര്‍ ഐസൊലേഷനില്‍ ചികിത്സയിലാണ്.

നമ്പികുളം മലയിലെ വാറ്റ്‌കേന്ദ്രം തകര്‍ത്തു

കൂരാച്ചുണ്ട്: എരപ്പാന്‍തോട് നമ്പികുളം മലയില്‍ പ്രവര്‍ത്തിച്ചിരുന്ന വ്യാജമദ്യ വാറ്റ്‌കേന്ദ്രം പേരാമ്പ്ര എക്‌സൈസ് സംഘം തകര്‍ത്തു. റെയ്ഡില്‍ 300 ലിറ്റര്‍ വാഷും 30 ലിറ്റര്‍ സ്‌പെന്‍ഡ് വാഷും 20 ലിറ്റര്‍ ചാരായവും വാറ്റുപകരണങ്ങളും കണ്ടെത്തി. നമ്പികുളം മലയില്‍ വ്യാജവാറ്റ് നടക്കുന്നതായി രഹസ്യ വിവരം ലഭിച്ചതിനെ തുടര്‍ന്ന് എക്‌സൈസ് സംഘം രണ്ടര കിലോമീറ്ററോളം കാല്‍നടയായി ഉള്‍ക്കാട്ടിലെത്തിയാണ് റെയ്ഡ് നടത്തിയത്. പേരാമ്പ്ര എക്‌സൈസ് സര്‍ക്കിള്‍ ഓഫീസിലെ അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ ചന്ദ്രന്‍ കുഴിച്ചാലില്‍, അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍മാരായ പി.സി.ബാബു, എ.കെ.പ്രകാശന്‍, പ്രിവന്‍റിവ് ഓഫീസര്‍ പി.ജെ. ബേബി എന്നിവരാണ് റെയ്ഡ് നടത്തിയത്.

സ്പീഡ് ബ്രേക്ക് ബാരിയര്‍ നശിപ്പിച്ചതില്‍ പ്രതിഷേധം

കൂടരഞ്ഞി: മലയോര ഹൈവേയില്‍ കരിങ്കുറ്റി സെന്‍റ് ജോസഫസ് ആശുപത്രിക്കും സ്റ്റെല്ല മാരിസ് സ്‌കൂളിനും മുന്‍പില്‍ സ്ഥാപിച്ച സ്പീഡ് ബ്രേക്ക് ബാരിയര്‍ സാമൂഹിക വിരുദ്ധ നശിപ്പിക്കുന്നത് പതിവാകുന്നു. അപകട സാധ്യതയേറിയ ഈ സ്ഥലത്ത് മൂന്നു മാസം മുമ്പാണ് സ്വകാര്യ വ്യക്തിയുടെ സഹായത്തോടെ സപീഡ് ബ്രേക്കര്‍ സ്ഥാപിച്ചത്. സ്‌കൂളിലേക്കും ആശുപത്രിയിലേക്കും വരുന്നവരുടെ സുരക്ഷ ഉറപ്പാക്കുന്നതിനും അപകടങ്ങള്‍ കുറക്കുന്നതിനും വേണ്ടി പഞ്ചായത്ത് പ്രസിഡന്‍റ് ആദര്‍ശ് ജോസഫിന്‍റെ നിര്‍ദേശപ്രകാരം സ്ഥാപിച്ച ബാരിയറാണ് നശിപ്പിച്ചത്. മുന്‍പ് മൂന്ന് തവണ ബാരിയര്‍ വാഹനമിടിച്ചു നശിപ്പിച്ചു. മറ്റൊരു തവണ ബൈക്ക് യാത്രക്കാരന്‍ ബാരിയര്‍ കല്ലുകൊണ്ട് ഇടിച്ച് നശിപ്പിക്കുകയും ചെയ്തു. തകരാര്‍ പരിഹരിച്ച് പുന:സ്ഥാപിച്ച ബോര്‍ഡാണ് കഴിഞ്ഞദിവസം ഇരുട്ടിന്‍റെ മറവില്‍ നശിപ്പിച്ചത്. ഇത് ചെയ്തവരെ നിയമത്തിന്‍റെ മുന്‍പില്‍ കൊണ്ടുവരണമെന്ന് ജനകീയ കമ്മിറ്റി ആവശ്യപ്പെട്ടു.

സ്വകാര്യ ആശുപത്രികള്‍ക്കായി മെഡി.കോളജിനെ സര്‍ക്കാര്‍ തകര്‍ക്കുന്നു: മുസ്ലിംലീഗ്

കോഴിക്കോട്: രാജ്യത്ത് തന്നെ ഏറ്റവുമധികം സാധാരണക്കാര്‍ ആശ്രയിക്കുന്ന കോഴിക്കോട് ഗവ.മെഡിക്കല്‍ കോളജിന്‍റെ പുരോഗതി തടസ്സപ്പെടുത്തി സംസ്ഥാന സര്‍ക്കാര്‍ തകര്‍ക്കുകയാണെന്ന് മുസ്ലിംലീഗ് ജില്ലാ ഭാരവാഹികള്‍ വാര്‍ത്താ സമ്മേളനത്തില്‍ ആരോപിച്ചു. സ്വകാര്യ ആശുപത്രികളുമായുള്ള ഒത്തുകളിയും കനത്ത അഴിമതിയുമാണ് ഗവ.മെഡിക്കല്‍ കോളജിനെ രോഗാതുരമാക്കുന്നതെന്ന നേതാക്കള്‍ പറഞ്ഞു. രോഗികളും കൂട്ടിരുപ്പുകാരും കൂടാതെ ആുപത്രി ജീവനക്കാരും ഒന്നടങ്കം പ്രതിസന്ധിയിലാണ്. സാധാരണക്കാരായ ഏറ്റവും കൂടുതല്‍ ആളുകള്‍ ആശ്രയിക്കുന്ന മെഡിക്കല്‍ കോളജ് പ്രശ്നങ്ങളുടേയും പ്രയാസങ്ങളുടേയും പടുകുഴിയിലാണ്. വിവാദങ്ങളും ദുരന്തങ്ങളും വാര്‍ത്തയില്‍ ഇടം പിടിച്ചു തുടങ്ങിയിട്ട് കുറച്ചു വര്‍ഷങ്ങളായി. തിരുവന്തപുരത്തെയും കോട്ടയത്തെയും അനുഭവങ്ങള്‍ പാഠമായെടുത്ത് കോഴിക്കോട് മെഡിക്കല്‍ കോളജിന്റെ കാര്യത്തില്‍ അടിയന്തിരമായ ഇടപെടലുകള്‍ ഒട്ടും വൈകിക്കൂട. ഇന്ന് മെഡിക്കല്‍ കോളജിന് മുമ്പില്‍ നടക്കുന്ന പ്രക്ഷോഭ സംഗമം പുതിയ സമരമുഖം തുറക്കും. രാവിലെ 10 മണിക്ക് മെഡിക്കല്‍ കോളജിന് മുമ്പില്‍ നടക്കുന്ന പ്രക്ഷോഭ സംഗമം സംസ്ഥാന ജനറല്‍ സെക്രട്ടറി പി.എം.എ സലാം ഉദ്ഘാടനം ചെയ്യും. ജില്ലാ പ്രസിഡന്റ് എം.എ റസാഖ്, ജനറല്‍ സെക്രട്ടറി ടി.ടി ഇസ്്മായില്‍, ട്രഷറര്‍ സൂപ്പി നരിക്കാട്ടേരി എന്നിവര്‍ വാര്‍ത്താ സമ്മേളനത്തില്‍ സംബന്ധിച്ചു.

കുളത്തുവയലില്‍ ഗ്രോട്ടോകള്‍ക്കു നേരെ ആക്രമണം

കൂരാച്ചുണ്ട്: കുളത്തുവയല്‍ സെന്‍റ് ജോര്‍ജ് തീര്‍ഥാടന കേന്ദ്രം ഇടവകയുടെ കീഴില്‍ റോഡരികില്‍ സ്ഥാപിച്ച ഗ്രോട്ടോകള്‍ക്കു നേരെ സാമൂഹിക വിരുദ്ധരുടെ ആക്രമണം. ഗ്രോട്ടോകളുടെ ചില്ലുകള്‍ തകര്‍ത്തു. രണ്ടു ദിവസങ്ങളിലായാണ് അതിക്രമം നടത്തിയത്. ചെമ്പ്ര ടൗണില്‍ നിന്നും തീര്‍ത്ഥാടന കേന്ദ്രത്തിലേക്കുള്ള റോഡില്‍ കുരിശിന്‍റെ വഴി നടത്തുന്നതിനായി ആറും ഏഴും സ്ഥലത്ത് സ്ഥാപിച്ചിട്ടുള്ള ഗ്രോട്ടോകളുടെ ചില്ലുകളാണ് തകര്‍ത്ത നിലയില്‍ കണ്ടത്. ഒരു ഗ്രോട്ടോയുടെ ഉള്ളില്‍ കല്ലും കണ്ടെത്തിയിട്ടുണ്ട്. ഞായറാഴ്ചയാണ് ഒരു ഗ്രോട്ടോയുടെ ചില്ല് തകര്‍ത്ത നിലയില്‍ ഇടവകക്കാര്‍ കണ്ടത്. മറ്റെന്തെങ്കിലും വീണു ചില്ല് തകര്‍ന്നതെന്നാണ് കരുതിയിരുന്നത്. ഇന്നലെ വൈകിട്ട് വീണ്ടും സമീപത്തുള്ള മറ്റൊരു ഗ്രോട്ടോയുടെ ചില്ലും തകര്‍ത്ത നിലയില്‍ കണ്ടതോടെയാണ് അതിക്രമം നടന്നതായി മനസിലായത്. തുടര്‍ന്ന് പള്ളി കമ്മിറ്റി പെരുവണ്ണാമൂഴി പോലീസില്‍ പരാതി നല്‍കി. സംഭവത്തില്‍ പ്രതിഷേധം ശക്തമായിട്ടുണ്ട്. കുറ്റവാളികളെ ഉടന്‍ പിടികൂടണമെന്ന് നാട്ടുകാര്‍ ആവശ്യപ്പെട്ടു.

എന്‍ജിഒ അസോസിയേഷന്‍ സി.രവീന്ദ്രന്‍ സ്മൃതി സദസ്സ്

കോഴിക്കോട് : സംഘടനാ രംഗത്ത് അതുല്യ നേതൃത്വത്തിന് ഉടമയായിരുന്നു സി. രവീന്ദ്രനെന്ന് എന്‍ജിഒ. അസോസിയേഷന്‍ ജില്ലാ പ്രസിഡന്‍റ് പ്രേംനാഥ് മംഗലശ്ശേരി പറഞ്ഞു. മാത്തോട്ടം വനശ്രീയില്‍ കേരള എന്‍ജിഒ അസോസിയേഷന്‍ സംഘടിപ്പിച്ച സി. രവീന്ദ്രന്‍ സ്മൃതി സദസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ബ്രാഞ്ച് പ്രസിഡന്‍റ് കെ.വി. ബാലകൃഷ്ണന്‍ അധ്യക്ഷനായി. സംസ്ഥാന കൗണ്‍സില്‍ അംഗം എം. വി. ബഷീര്‍, കെ.ജോതിഷ്‌കുമാര്‍, കെ. അഫ്‌സല്‍, കെ.കെ.അശോകന്‍ , മനോജ് പുളിക്കല്‍ എന്നിവര്‍ സംസാരിച്ചു. അനുസ്മരണ സദസ്സിന് ടി.വി. ശ്രീജ കെ.എന്‍ സാബിറ , കെ.ടി. നിഖില്‍ എന്നിവര്‍ നേതൃത്വം നല്‍കി.

തിരുവമ്പാടി ലയണ്‍സ് ക്ലബ് ഭാരവാഹികള്‍ സ്ഥാനമേറ്റു

തിരുവമ്പാടി: തിരുവമ്പാടി ലയണ്‍സ് ക്ലബ്ബിന്‍റെ 2025-26 വര്‍ഷത്തെ ഭാരവാഹികളുടെ സ്ഥാനാരോഹണ ചടങ്ങ് മുന്‍ ഡിസ്ട്രിക്ട് ഗവര്‍ണര്‍ അഡ്വ. ഡെന്നിസ് തോമസ് ഉദ്ഘാടനം ചെയ്തു. ക്ലബ് പ്രസിഡന്‍റ് അഡ്വ. ജിമ്മി ജോര്‍ജ് അധ്യക്ഷത വഹിച്ചു. പുതിയ പ്രസിഡന്‍റായി സണ്ണി തോമസ്, സെക്രട്ടറിയായി ഷാര്‍ലറ്റ് പോള്‍, ട്രഷററായി അഡ്വ.മോഹന്‍ കെ. ജോസ് തുടങ്ങിയവര്‍ അടങ്ങിയ 11 അംഗ കമ്മറ്റി ചുമതല ഏറ്റെടുത്തു. മറ്റു ഭാരവാഹികള്‍: വൈസ് പ്രസിഡന്‍റന്റുമാര്‍- സജന്‍ കുമാര്‍, അഡ്വ. സിബിന്‍ വി. ജോസ്. കമ്മിറ്റി ചെയര്‍മാന്‍മാര്‍ - ഡോ. പി.എം. മത്തായി, സാന്‍റി കളത്തിപറമ്പില്‍, റഹ്‌മത്തുല്ല, പ്രഫ. പി.എ. മത്തായി. ഡയറക്ടര്‍മാര്‍: ഇ.കെ. സെബാസ്റ്റ്യന്‍, ജയേഷ് സ്രാമ്പിക്കല്‍, കെ.സി.ജോണ്‍, എന്‍.കെ.ജോയ്. ക്ലബിന്‍റെ പുതിയ സേവന പദ്ധതിയുടെ ഉദ്ഘാടനം മുന്‍ ഡിസ്ട്രിക്ട് ഗവര്‍ണര്‍ അഡ്വ. വര്‍ഗീസ് സൈമണ്‍ നിര്‍വഹിച്ചു. റീജിയന്‍ ചെയര്‍മാന്‍ പി. വി. മോഹന്‍ദാസ്, സോണ്‍ ചെയര്‍പേഴ്‌സണ്‍ ഷീല പോള്‍, നാല് സത്യജിത് റേ അവാര്‍ഡുകള്‍ കരസ്ഥമാക്കിയ സജന്‍ കുമാര്‍, പ്ലസ്ടു പരീക്ഷയില്‍ മുഴുവന്‍ മാര്‍ക്കും വാങ്ങിയ ലീയാന്ദ്ര ഷെര്‍ലറ്റ് എന്നിവരെയും ആദരിച്ചു. ചാര്‍ട്ടര്‍ പ്രസിഡന്‍റ് ഡോ. പി.എം. മത്തായി, അഡ്വ. സിബിന്‍ വി. ജോസ്, പ്രഫ. പി.എ. മത്തായി, സാന്‍റി മൈക്കിള്‍, അന്ന മരിയ മത്തായി, ഷാര്‍ലെറ്റ് പോള്‍ എന്നിവര്‍ സംസാരിച്ചു. അഡ്വ. ജയേഷ് സ്രാമ്പിക്കല്‍, അഡ്വ. മോഹന്‍ കെ. ജോസ്, ഡോ. പി.എ. മത്തായി എന്നിവര്‍ നേതൃത്വം നല്‍കി.

കേരള കോണ്‍ഗ്രസ് ധര്‍ണ്ണ നടത്തി

ബാലുശ്ശേരി: ആരോഗ്യമന്ത്രി വീണാ ജോര്‍ജ് രാജിവയ്ക്കണമെന്ന് ആവശ്യപ്പെട്ട് കേരള കോണ്‍ഗ്രസ് (ജേക്കബ്) കോഴിക്കോട് ജില്ല കമ്മിറ്റി ബാലുശ്ശേരി താലൂക്ക് ആശുപത്രിക്ക് മുന്നില്‍ ധര്‍ണ്ണ നടത്തി. ജില്ല പ്രസിഡന്‍റ് കെ.പി. രാധാകൃഷ്ണന്‍ ഉദ്ഘാടനം ചെയ്തു. ജനറല്‍ സെക്രട്ടറി രാജന്‍ വര്‍ക്കി അധ്യക്ഷത വഹിച്ചു. പ്രദീപ് ചോമ്പാല, മനോജ് ആവള, ആഷിക്ക് അശോക്, സലീം പുല്ലടി, പൗലോസ് കരിപ്പാക്കുടി, തോമസ് പീറ്റര്‍, വി.ഡി.ജോസ്, ഷാര്‍ളി ഫിലിപ്പ് എന്നിവര്‍ പ്രസംഗിച്ചു.

കക്കയത്ത് വൈദ്യുതി മുടക്കം പതിവാകുന്നു

കൂരാച്ചുണ്ട്: മലബാറിലെ പ്രധാനപ്പെട്ട വൈദ്യുതി ഉല്‍പാദന കേന്ദ്രങ്ങള്‍ പ്രവര്‍ത്തിക്കുന്ന കക്കയത്ത് പകല്‍ സമയങ്ങളിലും രാത്രി കാലങ്ങളിലും വൈദ്യുതി വിതരണം പതിവായി തകരാറിലാകുന്നതായി പരാതി. മഴക്കാലമായതോടെ വൈദ്യുതി തകരാര്‍ നിത്യസംഭവമാണ്. നാട്ടുകാര്‍ ഏറെ ദുരിതത്തിലാണ്. നിലവിലുണ്ടായിരുന്ന വൈദ്യുതിലൈനുകള്‍ നീക്കി കേബിള്‍ സംവിധാനം മുഖേനയാണ് ഇപ്പോള്‍ വൈദ്യുതി വിതരണം നടത്തുന്നത്. അതിനു ശേഷമാണ് സ്ഥിരമായി വൈദ്യുതി മുടങ്ങാന്‍ തുടങ്ങിയതെന്നാണ് പ്രദേശവാസികളുടെ പരാതി. കക്കയത്തെ വൈദ്യുതി വിതരണത്തിലുള്ള സാങ്കേതിക തകരാര്‍ ഉടന്‍ പരിഹരിക്കണമെന്ന് മാനസ കക്കയം ആവശ്യപ്പെട്ടു. ജോണ്‍സണ്‍ കക്കയം അധ്യക്ഷത വഹിച്ചു. സുനില്‍ പാറപ്പുറത്ത് തോമസ്, വെളിയംകുളം തോമസ് പോക്കാട്ട് എന്നിവര്‍ പ്രസംഗിച്ചു.

കേരള ബാങ്ക് പന്തീരങ്കാവ് ശാഖ പുതിയ കെട്ടിടത്തിലേക്ക് മാറി

കോഴിക്കോട് : പ്രവര്‍ത്തനരംഗത്ത് 20 വര്‍ഷം പിന്നിടുന്ന കേരള ബാങ്ക് പന്തീരാങ്കാവ് ശാഖ ഇടപാടുകാര്‍ക്ക് മെച്ചപ്പെട്ട സൗകര്യങ്ങള്‍ ലഭ്യമാക്കുന്നതിന്റെ ഭാഗമായി പുതിയ കെട്ടിടത്തിലേക്ക് മാറി. മരക്കാട്ടുപുറത്ത് അര്‍ക്കേഡില്‍ സജ്ജീകരിച്ച ശാഖ കേരള ബാങ്ക് പ്രസിഡന്‍റ് ഗോപി കോട്ടമുറിക്കല്‍ ഉദ്ഘാടനം ചെയ്തു. ഡയറക്ടര്‍ ഇ.രമേശ് ബാബു അധ്യക്ഷത വഹിച്ചു. ഇടപാടുകാരായ ഡോ.ഗ്രേസ് ജോബ്,ടി.വി. ഗംഗാധരന്‍, ദേശീയ ഗെയിംസ് തൈക്കോണ്ടോയില്‍ വെങ്കല മെഡല്‍ നേടിയ സഹോദരങ്ങളായ ലയ ഫാത്തിമ, സെബ എന്നിവരെ ഗോപി കോട്ടമുറിക്കല്‍ ആദരിച്ചു.

ബേപ്പൂരിലെ ഏഴ് കുടുംബങ്ങള്‍ക്ക് ഭൂമി പതിച്ചുനല്‍കും

കോഴിക്കോട്: ബേപ്പൂര്‍ വില്ലേജിലെ പുലിമുട്ട് ഭാഗത്ത് താമസിക്കുന്ന ഏഴ് കുടുംബങ്ങള്‍ക്ക് പട്ടയം അനുവദിക്കാന്‍ തീരുമാനം. മന്ത്രി പി.എ.മുഹമ്മദ് റിയാസിന്‍റെ നേതൃത്വത്തില്‍ ജില്ലാ കളക്ടര്‍ സ്‌നേഹില്‍ കുമാര്‍ സിങ്ങിന്‍റെ അധ്യക്ഷതയില്‍ ചേര്‍ന്ന കോര്‍പറേഷന്‍തല ഭൂമി പതിവ് കമ്മിറ്റി യോഗത്തിലാണ് തീരുമാനം. സര്‍വേ നമ്പര്‍ 96ലെ പുറമ്പോക്കില്‍ 25 വര്‍ഷത്തിലേറെയായി ഭൂമി കൈവശം വച്ചുവരുന്ന ഏഴ് മത്സ്യത്തൊഴിലാളി കുടുംബങ്ങള്‍ക്കാണ് ഭൂമി പതിച്ചുനല്‍കുന്നത്. ജൂലൈ 16ന് കോവൂര്‍ കൃഷ്ണപിള്ള മെമ്മോറിയല്‍ ഹാളില്‍ നടക്കുന്ന പട്ടയമേളയില്‍ രേഖകള്‍ കൈമാറും. ഇതുമായി ബന്ധപ്പെട്ട നടപടിക്രമങ്ങള്‍ പൂര്‍ത്തിയായിട്ടുണ്ട്. 1995ലെ മുനിസിപ്പല്‍ കോര്‍പ്പറേഷന്‍ പ്രദേശങ്ങളിലെ ഭൂമി പതിവ് ചട്ടങ്ങള്‍ പ്രകാരമാണ് ഭൂമി പതിച്ച് നല്‍കുന്നത്. യോഗത്തില്‍ ഭൂപരിഷ്‌കരണ വിഭാഗം ഡെപ്യൂട്ടി കലക്ടര്‍ പി എന്‍ പുരുഷോത്തമന്‍, രാഷ്ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുത്തു.

കോഴിക്കോട് കളക്ടറേറ്റിനെ വിവരാവകാശ സൗഹൃദമായി പ്രഖ്യാപിക്കും

കോഴിക്കോട്: വിവരാവകാശ നിയമം പൂര്‍ണമായി നടപ്പാക്കിയ ദിനമായ ഒക്ടോബര്‍ 12ന് കോഴിക്കോട് കളക്ടറേറ്റിനെ വിവരാവകാശ സൗഹൃദമായി പ്രഖ്യാപിക്കുമെന്നു സംസ്ഥാന വിവരാവകാശ കമ്മീഷണര്‍ അഡ്വ. ടി.കെ. രാമകൃഷ്ണന്‍ പറഞ്ഞു. വിവരാവകാശ സൗഹൃദ കളക്ടറേറ്റ് പ്രഖ്യാപനത്തിന്‍റെ പ്രാരംഭ നടപടികളുടെ ഭാഗമായി സംസ്ഥാന വിവരാവകാശ കമ്മീഷനും ജില്ലാ ഭരണകൂടവും ചേര്‍ന്ന് സംഘടിപ്പിച്ച വിവരാവകാശ നിയമ സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. എല്ലാ സര്‍ക്കാര്‍ ഓഫീസുകളിലെയും ജീവനക്കാര്‍ക്ക് വിവരാവകാശ നിയമത്തെക്കുറിച്ച് വ്യക്തമായ ധാരണ ഉണ്ടാവുകയും കൃത്യമായ വിവരങ്ങള്‍ വേഗത്തില്‍ അപേക്ഷകന് ലഭ്യമാക്കുകയും വേണം. ഇതില്ലാതാവുമ്പോഴാണ് തെറ്റായ വാര്‍ത്തകളും വിവരങ്ങളും പ്രചരിക്കുന്നതെന്നും കമ്മീഷണര്‍ പറഞ്ഞു. സെമിനാറില്‍ സിവില്‍ സ്റ്റേഷനിലെ വിവിധ വകുപ്പ് മേധാവികളും അപ്പലേറ്റ് അഥോറിറ്റി, പബ്ലിക് ഇന്‍ഫര്‍മേഷന്‍ ഓഫീസര്‍മാര്‍ എന്നിവരും പങ്കാളികളായി. വിവരാവകാശ നിയമം വകുപ്പ് നാലില്‍ പ്രതിപാദിച്ച പ്രകാരം എല്ലാ ഓഫീസുകളിലെയും വിവരങ്ങള്‍ ക്രോഡീകരിച്ച് കാറ്റലോഗ് ചെയ്ത് കമ്പ്യൂട്ടറിലൂടെ ലഭ്യമാക്കല്‍, ഓഫീസ് വെബ്‌സൈറ്റിലെ വിവരങ്ങള്‍ കാലികമാക്കല്‍, വിവരാവകാശവുമായി ബന്ധപ്പെട്ട ബോര്‍ഡുകള്‍ സ്ഥാപിക്കല്‍ ഉള്‍പ്പടെയുള്ള പ്രവര്‍ത്തനങ്ങള്‍ ക്യാമ്പയിന്‍ കാലയളവില്‍ നടത്തും. കമ്മീഷന്‍റെ നേതൃത്വത്തില്‍ ആക്ഷന്‍ പ്ലാന്‍ തയാറാക്കി എല്ലാ ഓഫീസുകളിലും പരിശോധനയും നടത്തും. സെമിനാറില്‍ ജില്ലാ കളക്ടര്‍ സ്നേഹില്‍ കുമാര്‍ സിംഗ് അധ്യക്ഷത വഹിച്ചു.

കൊയിലാണ്ടിയില്‍ മിനി എംസിഎഫ്

കൊയിലാണ്ടി: കൊയിലാണ്ടി നഗരസഭയില്‍ മിനി എംസിഎഫുകള്‍ (മെറ്റീരിയല്‍ കളക്ഷന്‍ ഫെസിലിറ്റി സെന്‍റര്‍) സ്ഥാപിച്ചു. എംസിഎഫിന്‍റെ നഗരസഭതല ഉദ്ഘാടനം കണയംകോട് സുധ കിഴക്കേപാട്ട് നിര്‍വഹിച്ചു. നഗരസഭയിലെ 44 വാര്‍ഡുകളില്‍ നിന്നും ഹരിത കര്‍മ്മ സേന ശേഖരിക്കുന്ന പാഴ് വസ്തുക്കള്‍ സൂക്ഷിക്കുന്നതിനാണ് എംസിഎഫ് സ്ഥാപിച്ചത്. പൊതുമേഖല സ്ഥാപനമായ കേരള സ്റ്റീല്‍ ഇന്‍ഡസ്ട്രീസ് കോര്‍പ്പറേഷനാണ് എംസിഎഫിന്‍റെ പ്രവര്‍ത്തി ഏറ്റെടുത്ത് നടപ്പിലാക്കുന്നത്.

വിവരാവകാശ സൗഹൃദ കളക്ടറേറ്റ്: സെമിനാര്‍ ഇന്ന്

കോഴിക്കോട്: കളക്ടറേറ്റിലെ എല്ലാ ഓഫീസുകളും വിവരാവകാശ സൗഹൃദമാക്കുന്നതിനുള്ള ക്യാമ്പയിന്‍റെ ഭാഗമായി സംസ്ഥാന വിവരാവകാശ കമ്മീഷനും ജില്ലാ ഭരണകൂടവും ചേർന്ന് സംഘടിപ്പിക്കുന്ന സെമിനാർ ഇന്ന് കളക്ടറേറ്റ് കോൺഫറൻസ് ഹാളിൽ നടക്കും. രാവിലെ വകുപ്പ് മേധാവികള്‍ക്കും ഉച്ചക്ക് ശേഷം പബ്ലിക് ഇന്‍ഫര്‍മേഷന്‍ ഓഫീസര്‍മാര്‍, അപ്പീല്‍ അധികാരികള്‍ എന്നിവര്‍ക്കുമായാണ് സെമിനാര്‍ നടത്തുക. സംസ്ഥാന വിവരാവകാശ കമ്മീഷണര്‍ അഡ്വ. ടി.കെ. രാമകൃഷ്ണന്‍ ഉദ്ഘാടനം നിർവഹിക്കും. ജില്ലാ കളക്ടര്‍ സ്നേഹില്‍ കുമാര്‍ സിംഗ് അധ്യക്ഷത വഹിക്കും. വിവരാവകാശ നിയമത്തെ കുറിച്ച് ഉദ്യോഗസ്ഥര്‍ക്കും പൊതുജനങ്ങള്‍ക്കും അവബോധമുണ്ടാക്കുകയും സിവില്‍ സ്റ്റേഷനിലെ മുഴുവന്‍ ഓഫീസുകളെയും വിവരാവകാശ സൗഹൃദ ഓഫീസാക്കി മാറ്റുകയും ലക്ഷ്യമിട്ട് ഒക്ടോബര്‍ 12 വരെയാണ് ക്യാമ്പയിൻ നടത്തുന്നത്.‍ വിവരാവകാശ നിയമപ്രകാരം എല്ലാ ഓഫീസുകളിലെയും വിവരങ്ങള്‍ ക്രോഡീകരിച്ച് കാറ്റലോഗ് ചെയ്ത് കമ്പ്യൂട്ടറിലൂടെ ലഭ്യമാക്കാനുള്ള നടപടികള്‍, എല്ലാ ഓഫീസുകളിലും വിവരാവകാശവുമായി ബന്ധപ്പെട്ട ബോര്‍ഡുകള്‍ സ്ഥാപിച്ചിട്ടുണ്ടെന്ന പരിശോധന, ഓഫീസ് വെബ്‌സൈറ്റിലെ വിവരങ്ങള്‍ കാലികമാക്കുന്നത് ഉള്‍പ്പടെയുള്ള പ്രവര്‍ത്തനങ്ങള്‍ ക്യാമ്പയിന്‍ കാലയളവില്‍ നടത്തും. ഒക്ടോബര്‍ 12ന് വിവരാവകാശ സൗഹൃദ കളക്ടറേറ്റ് പ്രഖ്യാപനം നടത്തും.

ലോഗോ പ്രകാശനം ചെയ്തു

താമരശേരി: കോഴിക്കോട് മെഡിക്കൽ കോളജ് സ്റ്റേഡിയത്തിൽ ആഗസ്റ്റ് 16 മുതൽ 19 വരെ നടക്കുന്ന സംസ്ഥാന അത്‌ലറ്റിക് ചാമ്പ്യൻഷിപ്പിന്‍റെ ലോഗോ പ്രകാശനം മേയർ ഡോ. ബീന ഫിലിപ്പ് നിർവഹിച്ചു. സംസ്ഥാന സ്പോർട്സ് കൗൺസിൽ മെമ്പർ ടി.എം. അബ്ദുറഹിമാൻ അധ്യക്ഷത വഹിച്ചു. അത്‌ലറ്റിക് അസോസിയേഷൻ കോഴിക്കോട് ജില്ലാ സെക്രട്ടറി കെ.എം. ജോസഫ്, കൗൺസിലർ ഇ.എം. സോമൻ, കൗൺസിലർ കെ. മോഹനൻ, കെ.തങ്കച്ചൻ, നൂറുദ്ദീൻ, സി.ടി. ഇല്യാസ്, ഇബ്രാഹിം ചീനിക്ക, വിനോദ് ജോസ്, മുഹമ്മദ് ഹസൻ, എ. കെ. മുഹമ്മദ് അഷ്റഫ് എന്നിവർ പ്രസംഗിച്ചു.

വൻ മരം അപകട ഭീഷണി ഉയർത്തുന്നു

ചക്കിട്ടപാറ: പഞ്ചായത്ത് സ്റ്റേഡിയം കവാടത്തിനു സമീപം പാതയോരത്ത് നിൽക്കുന്ന വൻ മരം അപകട ഭീഷണി ഉയർത്തുന്നതായി പരാതി. ചെരിഞ്ഞു നിൽക്കുന്ന മരത്തിനു ചുവട്ടിലാണ് ഗാന്ധി പ്രതിമയുള്ളത്. ശിഖരം പൊട്ടി വീണാൽ പോലും പ്രതിമ തകരും. സമീപത്തുള്ള കെട്ടിടങ്ങൾക്കും മരം ഭീഷണിയാണ്. പഞ്ചായത്തിന്‍റെ സ്ഥലത്തു തന്നെയാണ് ഇത് നിൽക്കുന്നത്. വലിയ അപകടം സംഭവിക്കുന്നതിനു മുമ്പ് മുറിച്ചു നീക്കണമെന്നാണ് പൊതു ആവശ്യമുയരുന്നത്.

കാട്ടുപന്നികൾ കൃഷി നശിപ്പിച്ചു

പെരുവണ്ണാമൂഴി: ചക്കിട്ടപാറ പഞ്ചായത്ത് വാർഡ് ഏഴിൽപെട്ട മുതുകാട് റോഡ് എസ്റ്റേറ്റ് മുക്കിനു സമീപം താമസിക്കുന്ന വടക്കേടത്ത് തങ്കമ്മയുടെ കൃഷി കാട്ടുപന്നികൾ നശിപ്പിച്ചു. കായ്‌ഫലം ആകാറായ തെങ്ങും തൈകളാണ് കഴിഞ്ഞ ദിവസം നശിപ്പിച്ചത്. സ്ഥലത്തെ വാഴകളും കാമുകിൻ തൈകളും നശിപ്പിക്കൽ ഭീഷണി നേരിടുന്നുണ്ട്.

സാധാരണക്കാരുടെ ആശ്രയം സഹകരണ സംഘങ്ങൾ: രാജു അപ്സര

മുക്കം: പ്രാഥമിക സഹകരണ സംഘങ്ങളും സഹകരണ ബാങ്കുകളുമാണ് സാധാരണക്കാരും പാവപ്പെട്ടവരും ഉൾപ്പെടെയുള്ള ജനങ്ങൾക്ക് വായ്പയുടെ കാര്യത്തിൽ ഉപകാര പ്രദമാകുന്നതെന്ന് വ്യാപാരി വ്യവസായി ഏകോപന സമിതി സംസ്ഥാന പ്രസിഡന്‍റ് രാജു അപ്സര പറഞ്ഞു. മുക്കം അർബൻ കോ ഓപ്പറേറ്റീവ് സൊസൈറ്റി മണാശേരി ബ്രാഞ്ച് ആരംഭിച്ച ഗോൾഡ് ലോൺ പദ്ധതിയുടെ ഉദ്ഘാടനം നിർവഹിക്കുകയായിരുന്നു അദ്ദേഹം. ദേശസാൽകൃത ബാങ്കുകളും മറ്റു കൊമേഴ്സ്യൽ ബാങ്കുകളും ഏറ്റവും കൂടുതൽ വായ്പകൾ നൽകി സഹായിക്കുന്നത് വൻകിട കമ്പനികളെയും സ്ഥാപനങ്ങളെയും വ്യക്തികളെയും ഒക്കെയാണ്. ചെറുകിട ഇടത്തരം വ്യാപാരികൾക്കും കർഷകർക്കും തൊഴിലാളികൾക്ക് ഒക്കെ ഏറെ ആശ്രയമായിട്ടുള്ളത് പ്രാഥമിക സഹകരണ സംഘങ്ങളാണെന്നും അദ്ദേഹം പറഞ്ഞു. സൊസൈറ്റി പ്രസിഡന്‍റ് കപ്പിയേടത്ത് ചന്ദ്രൻ അധ്യക്ഷനായി. സഹകരണ വകുപ്പ് അസിസ്റ്റന്‍റ് രജിസ്ട്രാർ ബിജി മുഖ്യ അതിഥിയായി. വിവിധ രംഗങ്ങളിൽ ഉന്നത വിജയം നേടിയവരെയും സൊസൈറ്റി അംഗങ്ങളുടെ മക്കളിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവരെയും ചടങ്ങിൽ ആദരിച്ചു. സഹകരണവകുപ്പ് സീനിയർ ഇൻസ്പെക്ടർ കെ. സബീഷ് കുമാർ, വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് ബാപ്പു ഹാജി, ജില്ലാ വൈസ് പ്രസിഡന്‍റ് റഫീഖ് മാളിക, സൊസൈറ്റി വൈസ് പ്രസിഡന്‍റ് കെ. കമലാക്ഷി, പി. പ്രേമൻ, ദീപു പ്രേംനാഥ്, എം.കെ. ബാലൻ, ടി.കെ. സാമി, പി. അലി അക്ബർ, സൊസൈറ്റി സെക്രട്ടറി വി. സച്ചിൻ തുടങ്ങിയവർ പ്രസംഗിച്ചു. ഡയറക്ടർമാരായ വി.ആർ അജയചന്ദ്രൻ, എം.പി. മാധവൻ, ഡോ. ഗീത തിലക്, ഇ.കെ. ബഷീർ തുടങ്ങിയവർ നേതൃത്വം നൽകി.

വിദ്യാര്‍ഥിക്ക് ക്രൂര മര്‍ദനമേറ്റെന്ന് പരാതി‌

അത്തോളി: ഗവ. വൊക്കേഷണല്‍ ഹയര്‍ സെക്കൻഡറി സ്‌കൂളില്‍ വിദ്യാര്‍ഥിക്ക് ക്രൂര മര്‍ദനമേറ്റെന്ന് പരാതി. മുഹമ്മദ് അമീന്‍ എന്ന വിദ്യാര്‍ഥിക്കാണ് സീനിയർ വിദ്യാര്‍ഥികളില്‍നിന്ന് മര്‍ദനമേറ്റത്. സീനിയര്‍ വിദ്യാര്‍ഥികള്‍ പാട്ടുപാടാനും ഡാന്‍സ് ചെയ്യാനും നിര്‍ബന്ധിച്ചതിന് തയാറാകാതിരുന്നതോടെയാണ് സംഘം ചേർന്ന് സ്കൂളിന് സമീപമുള്ള ഇടവഴിയില്‍ വച്ച് അടിച്ചുവീഴ്ത്തുകയും നിലത്തിട്ട് ചവിട്ടുകയും ചെയ്തത്. തുടർന്ന് അമീൻ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സ തേടി.‌ വിദ്യാര്‍ഥിയുടെ രക്ഷിതാക്കള്‍ അത്തോളി പോലീസിലും, സ്കൂൾ പ്രിൻസിപ്പലിനും പരാതി നല്‍കി.

യൂത്ത് കോൺഗ്രസ്‌ ധർണ സംഘടിപ്പിച്ചു

മുക്കം: നഗരസഭയിലെ അഗസ്ത്യൻമുഴിയിലെയും മണാശേരിയിലെയും ഗതാഗത കുരുക്ക് പരിഹരിക്കാൻ ബദൽ സംവിധാനങ്ങൾ ഒരുക്കണം എന്നാവശ്യപ്പെട്ട് യൂത്ത് കോൺഗ്രസ്‌ മുക്കം മണ്ഡലം കമ്മിറ്റിയുടെ നേതൃത്വത്തിൽ അഗസ്ത്യൻമുഴി അങ്ങാടിയിൽ സായാഹ്ന ധർണ സംഘടിപ്പിച്ചു. പരിപാടി യൂത്ത് കോൺഗ്രസ്‌ ജില്ലാ പ്രസിഡന്‍റ് ആർ. ഷഹിൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ലെറിൻ റാഹത്ത് അധ്യക്ഷനായി. യൂത്ത് കോൺഗ്രസ്‌ സംസ്ഥാന ജനറൽ സെക്രട്ടറി അഡ്വ. സൂഫിയാൻ ചെറുവാടി, നിയോജക മണ്ഡലം പ്രസിഡന്‍റ് അഡ്വ. മുഹമ്മദ്‌ ദിഷാൽ, വൈസ് പ്രസിഡന്‍റ് നിഷാദ് വീച്ചി, ജനറൽ സെക്രട്ടറി മുൻദിർ ചേന്നമംഗല്ലൂർ, മുക്കം മണ്ഡലം കോൺഗ്രസ്‌ പ്രസിഡന്‍റ് എം. മധു, കെ.ടി മൻസൂർ, വേണു കല്ലുരുട്ടി തുടങ്ങിയവർ പ്രസംഗിച്ചു.

ജില്ലാ സബ് ജൂനിയർ ഫെൻസിംഗ് ചാമ്പ്യൻഷിപ്പ് ആരംഭിച്ചു

കോഴിക്കോട്: ജില്ലാ ഫെൻസിംഗ് അസോസിയേഷൻ സംഘടിപ്പിക്കുന്ന ജില്ലാ സബ് ജൂനിയർ ഫെൻസിംഗ് ചാമ്പ്യൻഷിപ്പ് എളേറ്റിൽ എംജെ ഹയർ സെക്കൻഡറി സ്കൂൾ ഗ്രൗണ്ടിൽ ആരംഭിച്ചു. ജില്ലാ അസോസിയേഷൻ ചെയർമാൻ കെ. മുസ്തഫ ചാമ്പ്യൻഷിപ്പ് ഉദ്ഘാടനം ചെയ്തു. സ്കൂൾ ഹെഡ്മാസ്റ്റർ പി.പി. മുഹമ്മദ്‌ ഇസ്മായിൽ അധ്യക്ഷത വഹിച്ചു. ജില്ലാ സ്പോർട്സ് കൗൺസിൽ അംഗം എം.പി. മുഹമ്മദ്‌ ഇസ്ഹാഖ്, പി.കെ. അബ്ദുൽ ജലീൽ, പി.ടി. അബ്ദുൽ അസീസ്, കെ.കെ. ഖമറുദ്ധീൻ, പി.കെ. സുകുമാരൻ, എ.എം. ഷംസീന, ഷബീർ ചുഴലിക്കര എന്നിവർ പ്രസംഗിച്ചു.

സ്വയം പ്രതിരോധ ബോധവത്കരണ ക്ലാസ് സംഘടിപ്പിച്ചു

നെല്ലിപ്പൊയിൽ: സെന്‍റ് ജോൺസ് ഹൈസ്കൂളിൽ ഡിസിഎൽ ക്ലബിന്‍റെ ആഭിമുഖ്യത്തിൽ പോലീസ് വകുപ്പിന്‍റെ സഹകരണത്തോടെ സ്വയം പ്രതിരോധ ബോധവത്കരണ ക്ലാസ് സംഘടിപ്പിച്ചു. സ്ത്രീ സുരക്ഷയുടെ പ്രാധാന്യം മനസിലാക്കി വിദ്യാർഥികളിൽ ആത്മവിശ്വാസം വർധിപ്പിക്കുക, സ്വയം പ്രതിരോധ വിദ്യകൾ അഭ്യസിപ്പിക്കുന്നതിലൂടെ പെൺകുട്ടികളിലെ ആശങ്കകളും ഭയങ്ങളും കുറയ്ക്കുക എന്നീ ലക്ഷ്യത്തോടെയാണ് ക്ലാസ് സംഘടിപ്പിച്ചത്. താമരശേരി അസിസ്റ്റന്‍റ് സബ് ഇൻസ്പെക്ടർ ഷീജ വിദ്യാർഥികൾക്കായി ക്ലാസ് നയിച്ചു. സീനിയർ സിവിൽ പോലീസ് ഓഫീസർ കെ.ജി. ജീജയുടെ നേതൃത്വത്തിൽ സ്വയം പ്രതിരോധ പ്രായോഗിക പരിശീലനം നടത്തി. സ്കൂൾ ഹെഡ്മിസ്ട്രസ് ഷില്ലി സെബാസ്റ്റ്യൻ, ഡിസിഎൽ കൺവീനർ ട്രിഫ്റ്റി സെബാസ്റ്റ്യൻ, ഡിസിഎൽ സ്കൂൾ ഡെപ്യൂട്ടി ലീഡർ അന്ന ബെൻ എന്നിവർ നേതൃത്വം നൽകി.

കരിയാത്തുംപാറയിലെത്തിയ ടൂറിസ്റ്റുകൾ നിരാശരായി മടങ്ങുന്നു

കൂരാച്ചുണ്ട്: ജലസേചന വകുപ്പിന്‍റെ അധീനതയിലുള്ള വിനോദ സഞ്ചാര കേന്ദ്രമായ കൂരാച്ചുണ്ട് പഞ്ചായത്തിലെ കരിയാത്തുംപാറ ടൂറിസം കേന്ദ്രത്തിൽ എത്തുന്ന വിനോദ സഞ്ചാരികൾ നിരാശരായി മടങ്ങുന്നു. മഴ ശക്തമായതിനെ തുടർന്ന് കേന്ദ്രം ഒരു മാസമായി അടച്ചിട്ട നിലയിലാണ്. എന്നാൽ സമീപമുള്ള തോണിക്കടവ്, കക്കയം ടൂറിസം കേന്ദ്രങ്ങൾ തുറന്നു പ്രവർത്തനം ആരംഭിച്ചിരുന്നു. വിവിധ പ്രദേശങ്ങളിൽ നിന്നെത്തുന്നവർ കരിയാത്തുംപാറയിലും സന്ദർശിക്കുന്നതിനു കൂടിയാണ് എത്തുന്നത്. എന്നാൽ ഏറെ നിരാശയോടെയാണ് പലരും മടങ്ങുന്നത്. കൂടുതൽ സുരക്ഷാ സംവിധാനമൊരുക്കി കേന്ദ്രം തുറക്കണമെന്നാണ് ആവശ്യം ഉയരുന്നത്. മാത്രമല്ല കരിയാത്തുംപാറയിൽ കേന്ദ്രത്തെ ആശ്രയിച്ചു പ്രവർത്തിക്കുന്ന വ്യാപാര സ്ഥാപനങ്ങൾ നിരവധിയുണ്ട്. അവരുടെ ജീവിതവും വഴിമുട്ടിയ നിലയിലാണ്. എത്രയും വേഗം തുറന്നു പ്രവർത്തിക്കാൻ ആവശ്യമായ നടപടി സ്വീകരിക്കണമെന്നാണ് പ്രദേശവാസികളുടെ ആവശ്യം.

കെഎസ്ആർടിസി ബസിന് പിറകിൽ പിക്കപ്പ് വാൻ ഇടിച്ചു

കൊയിലാണ്ടി: കെഎസ്ആർടിസി ബസും മിനി പിക്കപ്പും കൂട്ടിയിടിച്ച് ഒരാൾക്ക് പരിക്ക്. ഇന്നലെ പുലർച്ചെ അഞ്ചോടെയാണ് അപകടം. പൂക്കാട് പെട്രോൾ പമ്പിന് സമീപം നാഷണൽ ഹൈവേയിൽ കൊയിലാണ്ടി ഭാഗത്തേക്ക് വരികയായിരുന്നു കെഎസ്ആർടിസി ബസിന്‍റെ പിറകിൽ മിനി പിക്കപ്പ് വാൻ ഇടിക്കുകയായിരുന്നു. അപകടത്തിൽ ഡ്രൈവറുടെ കൂടെ ഉണ്ടായിരുന്ന വയനാട് സ്വദേശിയായ ജോബി (40)ക്ക് കാലിന് പരിക്കേറ്റു. കൊയിലാണ്ടിയിൽ നിന്നും അഗ്നിരക്ഷാസേന എത്തി പരിക്കേറ്റയാളെ കൊയിലാണ്ടി ആശുപത്രിയിൽ എത്തിച്ചു.

കക്കാടംതോട് നവീകരണം നീളുന്നു; ഇനി വേണ്ടത് മൂന്ന് കോടി കൂടി

കർഷകരുടെ ആവശ്യം പരിഗണിച്ചത് ജില്ലാ പഞ്ചായത്ത് മാത്രം കാരശേരി: മണ്ണും കല്ലും ചെളിയും മാലിന്യങ്ങളുമെല്ലാം അടിഞ്ഞുകൂടി കിടന്ന കക്കാടം തോട് നവീകരിക്കാനുള്ള കർഷകരുടെ ആവശ്യം പരിഹരിക്കാതെ തുടരുന്നു. ജില്ലാ പഞ്ചായത്ത് മാത്രമാണ്എന്തെങ്കിലും ഇടപെടൽ നടത്തിയത് . തോട് നവീകരിക്കാൻ 25 ലക്ഷം രൂപ അനുവദിച്ചതായി വികസനകാര്യ സ്ഥിരം സമിതി അധ്യക്ഷ വി.പി.ജമീല അറിയിച്ചു. കഴിഞ്ഞ വർഷവും 25 ലക്ഷം അനുവദിച്ചിരുന്നു. എന്നാൽ തോടു നവീകരിക്കാൻ വേണ്ടത് 3.5 കോടി ആണ്. ഇതുവരെ ആകെ ലഭിച്ചത് അര കോടി മാത്രം. മൂന്നു കോടി രൂപ കൂടി ലഭിച്ചാലേ തോട് നവീകരിച്ച് പൂർണമായും കർഷകർക്കും നാട്ടുകാർക്കും ഉപയോഗപ്രദമാകൂ. കഴിഞ്ഞവർഷം അനുവദിച്ച തുക കൊണ്ട് 150 മീറ്ററോളമാണ് തോടു നവീകരിക്കാൻ സാധിച്ചത്. ഇപ്പോൾ അനുവദിച്ച തുകകൊണ്ട് ഇത്രയും കൂടിയേ നവീകരിക്കാൻ സാധ്യതയുള്ളൂ. മുഖ്യമന്ത്രിയുടെ 2023 ലെ നവകേരള സദസിൽ ഇത് സംബന്ധിച്ച് നിവേദനം നൽകിയിരുന്നു.ഇതിന്‍റെ അടിസ്ഥാനത്തിൽ ബന്ധപ്പെട്ട ഉദ്യോഗസ്ഥർ സ്ഥലം പരിശോധിക്കുകയും രണ്ടു കിലോമീറ്റർ നീളത്തിൽ തോട്ടിലെ മണ്ണും ചെളിയും മാലിന്യങ്ങളും നീക്കം ചെയ്ത് രണ്ടു മീറ്റർ ഉയരത്തിൽ ഇരുവശങ്ങളിലും കരിങ്കൽ ഭിത്തി കെട്ടി തോട് സംരക്ഷിക്കേണ്ടതാണെന്ന് ചെറുകിട ജലസേചന വകുപ്പിന് റിപ്പോർട്ട് നൽകിയിരുന്നു. ഇതിന്‍റെ അടിസ്ഥാനത്തിൽ പ്രവർത്തിക്ക് 3.5 കോടി രൂപ വേണ്ടിവരുമെന്നും ഫണ്ട് ലഭ്യമാകുന്ന മുറക്ക് പ്രവൃത്തി ഏറ്റെടുത്തു നടത്തുന്നതാണെന്ന് ചെറുകിട ജലസേചന വകുപ്പ് കോഴിക്കോട് ഡിവിഷൻ എക്സിക്യൂട്ടീവ് എൻജിനീയർ നിവേദനം നൽകിയവർക്ക് മറുപടിയും നൽകിയിരുന്നു. പക്ഷേ ഇതുവരെയും ഇതു സംബന്ധിച്ച മറ്റു നടപടികളൊന്നും ഉണ്ടായിട്ടില്ല. കൊടിയത്തൂർ പഞ്ചായത്തിലെ തോണിച്ചാൽ, ബെല്ലാറ മലകളിൽ നിന്നും ഉത്ഭവിച്ച് രണ്ട് തോടുകളായി ഒഴുകി കൊയിലാണ്ടി -എടവണ്ണ സംസ്ഥാന പാതയിലെ രണ്ട് കലുങ്ക് വഴി കടന്ന് ശേഷം ഒന്നായി സംഗമിച്ച് കൊടിയത്തൂർ, കാരശേരി പഞ്ചായത്തുളിലൂടെ ഒഴുകി കോട്ടമുഴിൽവച്ച് ഇരുവഞ്ഞിപ്പുഴയിൽ സംഗമിക്കുന്നതാണ് കക്കാടം തോട്. നിരവധി കൈത്തോടുകളും ഈ തോട്ടിൽ വന്നുചേരുന്നുണ്ട്. കൃഷിക്കും മീൻ പിടിക്കാനും അലക്കാനും കുളിക്കാനും കുട്ടികൾക്ക് നീന്തൽ പഠിക്കാനും ഒരു പ്രദേശത്തിന്‍റെ മുഴുവനും കിണറുകളിലെ ജല ശ്രോതസായും നിലനിന്നതാണ് ഈ തോട്. ആവശ്യമായ തുക അനുവദിച്ച് തോട് സംരക്ഷിക്കാനാവശ്യമായ നടപടി സ്വീകരിക്കണമെന്നാണ് പ്രദേശവാസികളുടെ ആവശ്യം.

ഹിന്ദു മതമല്ല, ധര്‍മമാണ്: ആഷാ മേനോന്‍

കോഴിക്കോട്: ഹിന്ദു മതമല്ല, ധര്‍മമാണെന്ന് പ്രമുഖ സാഹിത്യകാരനും നിരൂപകനുമായ ആഷാ മേനോന്‍ അഭിപ്രായപ്പെട്ടു. കാശ്യപ വേദ റിസര്‍ച്ച് ഫൗണ്ടേഷന്‍റെ ഗുരുപൂര്‍ണിമ ആഘോഷത്തില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം. ധര്‍മം എന്നത് രഹസ്യാത്മകമാണ്. ഇത് ഉള്‍ക്കൊള്ളാതെ വേദങ്ങളെയും ഉപനിഷത്തുക്കളെയും വളച്ചൊടിക്കുകയും തരംതാഴ്ത്തുകയുമാണ് മാക്സ് മുള്ളറിനെപ്പോലുള്ളവര്‍ ചെയ്തത്. വലിയ പ്രതിഭകളെപ്പോലും അദ്ദേഹം വഴിതെറ്റിച്ചുവെന്നും ആഷാ മേനോന്‍ പറഞ്ഞു. ചടങ്ങില്‍, ആചാര്യശ്രീ രാജേഷ് രചിച്ച ‘ഹിന്ദുധര്‍മരഹസ്യം' പുസ്തകത്തിന്‍റെ ഇരുപതാം പതിപ്പിന്‍റെ പ്രകാശനവും നടന്നു. നെഹ്‌റു ഗ്രൂപ്പ് ഓഫ് ഇന്‍സ്റ്റിറ്റിയൂഷന്‍സ് ചെയര്‍മാനും മാനേജിംഗ് ട്രസ്റ്റിയുമായ അഡ്വ. ഡോ. പി. കൃഷ്ണദാസ് റിലയന്‍സ് ജിയോ (കേരളം) സീനിയര്‍ വൈസ് പ്രസിഡന്‍റ് കെ. സി. നരേന്ദ്രന് പുസ്തകം കൈമാറി. കാശ്യപ വേദ റിസര്‍ച്ച് ഫൗണ്ടേഷന്‍ ഏര്‍പ്പെടുത്തിയ വിദ്യാജ്യോതി പുരസ്‌ക്കാരം അഡ്വ. ഡോ. പി. കൃഷ്ണദാസിന് ആചാര്യശ്രീ രാജേഷ് സമ്മാനിച്ചു. മീര കെ. രാജേഷ്, വിവേക് ഡി. ഷേണായ്, എം.ആര്‍. വേദലക്ഷ്മി, ഡോ.ബി. മനീഷ് എന്നിവര്‍ പങ്കെടുത്തു.

സി. രവീന്ദ്രന്‍ സ്മാരക പുരസ്‌കാരം സമര്‍പ്പിച്ചു

കോഴിക്കോട്: മുന്‍ ഡിസിസി ജനറല്‍ സെക്രട്ടറിയും എന്‍ജിഒ അസോസിയേഷന്‍ സംസ്ഥാന നേതാവുമായിരുന്ന സി. രവീന്ദ്രന്‍റെ മൂന്നാം ചരമ വാര്‍ഷികവും അദ്ദേഹത്തിന്‍റെ സ്മരണാര്‍ഥം ആക്ടീവ് കോഴിക്കോട് ഏര്‍പ്പെടുത്തിയ പുരസ്‌കാര സമര്‍പ്പണവും മുന്‍ കെപിസിസി പ്രസിഡന്‍റ് മുല്ലപ്പള്ളി രാമചന്ദ്രന്‍ ഉദ്ഘാടനം ചെയ്തു. ഡിസിസി ജനറല്‍ സെക്രട്ടറി പി.എം. അബ്ദുറഹിമാൻ പുരസ്‌കാരം സമ്മാനിച്ചു. ഡിസിസി പ്രസിഡന്‍റ് കെ. പ്രവീണ്‍ കുമാര്‍ പൊന്നാട അണിയിച്ചു. കെപിസിസി ജനറല്‍ സെക്രട്ടറി കെ. ജയന്ത് പ്രശസ്തി പത്രം സമര്‍പ്പിച്ചു. ആക്ടീവ് കോഴിക്കോട് പ്രസിഡന്‍റ് എം.പി. രാമകൃഷ്ണന്‍ അധ്യക്ഷത വഹിച്ചു. ബോണി വര്‍ഗീസ്, ഡോ.എം.പി.പത്മനാഭന്‍, എം. രാജന്‍, എം.കെ.ബീരാന്‍, കെ. പത്മകുമാര്‍, എ.കെ. മുഹമ്മദാലി, എം.എ.പ്രഭാകരന്‍, പി.എം. അബ്ദുറഹിമാന്‍ എന്നിവര്‍ പങ്കെടുത്തു.

വടകരയില്‍ മാവോവാദി അനുകൂല പോസ്റ്ററുകള്‍

വടകര: വടകരയിലും ഓര്‍ക്കാട്ടേരിയിലും മാവോവാദി അനുകൂല പോസ്റ്ററുകള്‍. വടകര പഴയ ബസ് സ്റ്റാന്‍റ്ന പരസരത്തും ഓര്‍ക്കാട്ടേരി ടൗണിലുമാണ് പോസ്റ്ററുകള്‍ പ്രത്യക്ഷപ്പെട്ടത്. മുതിര്‍ന്ന വോവാദി നേതാവ് രൂപേഷിന് അനുകൂലമായാണ് ജസ്റ്റിസ് ഫോര്‍ പ്രിസണേഴ്സ് എന്ന സംഘടനയുടെ പേരില്‍ പോസ്റ്റര്‍ പ്രത്യക്ഷപ്പെട്ടത്. പുതിയ കേസ് ചുമത്തിയ കര്‍ണാടക സര്‍ക്കാര്‍ നടപടി പിന്‍വലിക്കണമെന്ന് പോസ്റ്ററില്‍ പറയുന്നു. 10 വര്‍ഷമായി ജയിലിലടക്കപ്പെട്ട രൂപേഷിന്‍റെ മോചനം തടയാനുളള ഈ കള്ളക്കേസ് കേന്ദ്ര സര്‍ക്കാരിന്‍റെ അടിച്ചമര്‍ത്തല്‍ നയത്തിന്‍റെ ഭാഗം എന്ന ആരോപണവും പോസ്റ്ററില്‍ ഉന്നയിച്ചിട്ടുണ്ട്. ആരൊക്കെയാണ് പോസ്റ്ററിനു പിന്നിലെന്ന് പോലീസിന് സൂചന ലഭിച്ചിട്ടുണ്ട്. ഇതു സംബന്ധിച്ച് അന്വേഷണം നടക്കുന്നതായി സ്പെഷ്യല്‍ ബ്രാഞ്ച് വൃത്തങ്ങള്‍ അറിയിച്ചു.

രാമാശ്രമം ഉണ്ണീരിക്കുട്ടി പുരസ്‌കാരം ഡോ. എസ്. സോമനാഥിന്

കോഴിക്കോട്: കഴിഞ്ഞ വര്‍ഷത്തെ രാമാശ്രമം ഉണ്ണീരിക്കുട്ടി പുരസ്‌കാരം ഐഎസ്ആര്‍ഒ മുന്‍ ചെയര്‍മാന്‍ ഡോ. എസ്. സോമനാഥിന്. അരലക്ഷം രൂപയും ഫലകവുമടങ്ങുന്ന പുരസ്‌കാരം ഓഗസ്റ്റ് അവസാനത്തില്‍ കോഴിക്കോട്ടുനടക്കുന്ന ചടങ്ങില്‍ സമ്മാനിക്കുമെന്ന് രാമാശ്രമം ട്രസ്റ്റ് ചെയര്‍മാന്‍ എം. മുകുന്ദന്‍ വാര്‍ത്താസേമ്മളനത്തില്‍ അറിയിച്ചു. ബഹിരാകാശ ശാസ്ത്രമേഖലയ്ക്ക് ഡോ. എസ്. സോമനാഥ് നല്‍കിയ സംഭാവനകള്‍ പരിഗണിച്ചാണ് പുരസ്‌കാരം. ബഹിരാകാശ ശാസ്ത്രമേഖലയില്‍ രാജ്യത്തിന്റെ യശസ് വാനോളമുയര്‍ത്തിയ മഹത് വ്യക്തിയാണ് സോമനാഥ്. അതിസങ്കീര്‍ണമായ ഈ രംഗത്ത് ചുരുങ്ങിയ കാലത്തിനുള്ളില്‍ അദ്ദേഹം നല്‍കിയ സംഭാവനകള്‍ സമാനതകളില്ലാത്തതാണ്. അതു ലോകം അംഗീകരിച്ചുകഴിഞ്ഞുവെന്ന് അദ്ദേഹം പറഞ്ഞു. ശിഷന്‍ ഉണ്ണീരിക്കുട്ടി, എ.അഭിലാഷ് ശങ്കര്‍ എന്നിവരും വാര്‍ത്താസേമ്മളനത്തില്‍ സംബന്ധിച്ചു.

സ്കൂൾ സമയമാറ്റം: പ്രശ്ന പരിഹാരത്തിന് ശ്രമിക്കുമെന്ന് കാരാട്ട് റസാഖ്

താമരശേരി: സ്കൂൾ സമയമാറ്റവുമായി ബന്ധപ്പെട്ട് മദ്രസാ മാനേജ്മെന്‍റുകളും മുസ്ലീം സംഘടനകളും സർക്കാരുമായി ഉടലെടുത്തിരിക്കുന്ന പ്രശ്നത്തിന് അടിയന്തര പരിഹാരം അനിവാര്യമാണെന്ന് മദ്രസാധ്യാപക ക്ഷേമനിധി ബോർഡ് ചെയർമാൻ കാരാട്ട് റസാഖ് പറഞ്ഞു. വിദ്യാഭ്യാസ മേഖലയുടെ പുരോഗതി ലക്ഷ്യമാക്കി കോടതി വിധിയുടെയും ദേശീയ വിദ്യാഭ്യാസ നയത്തിന്‍റെയും അടിസ്ഥാനത്തിൽ പരിഷ്കരണങ്ങൾ നടത്താൻ സർക്കാരിന് ബാധ്യതയുണ്ട്. എന്നാൽ നൂറ്റാണ്ടുകളായി തുടർന്നു വരുന്ന മദ്രസാ വിദ്യാഭ്യാസം അട്ടിമറിക്കപ്പെടുമോ എന്ന സംഘടനകളുടെ ആശങ്ക സ്വാഭാവികവും പരിഹരിക്കപ്പെടേണ്ടതുമാണ്. വിഷയം പർവതീകരിച്ച് സാമൂഹിക അന്തരീക്ഷം കലുഷിതമാക്കാൻ ശ്രമിക്കുന്ന ചിദ്രശക്തികളെ ഒറ്റപ്പെടുത്തണം. ജാഗ്രതയും വിട്ടുവീഴ്ചയും അനിവാര്യമാണ്. കൂട്ടായ ചർച്ചയിലൂടെ പ്രശ്ന പരിഹാരം കാണുന്നതിന് മദ്രസാധ്യാപക ക്ഷേമനിധി ബോർഡ് നേതൃത്വം നൽകുമെന്നും അദ്ദേഹം പറഞ്ഞു.

നീന്തല്‍ പരിശീലനത്തിനിടെ വിദ്യാര്‍ഥി കുളത്തില്‍ മുങ്ങി മരിച്ചു

കോഴിക്കോട്: കുറ്റിച്ചിറ കുളത്തില്‍ നീന്തല്‍ പരിശീലനത്തിനിടെ വിദ്യാര്‍ഥി മുങ്ങി മരിച്ചു. പയ്യാനക്കല്‍ കപ്പക്കല്‍ സ്വദേശി യഹിയ (17) ആണ് മരിച്ചത്. ഇന്നലെ രാവിലെ ഒമ്പതരയോടെയായിരുന്നു അപകടം. ഫയര്‍ ഫോഴ്‌സ് എത്തി കുട്ടിയെ ബീച്ച് ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാന്‍ സാധിച്ചില്ല. ബീച്ചില്‍ ഫുട്‌ബോള്‍ കളിച്ചശേഷം കൂട്ടുകാര്‍ക്കൊപ്പം കുറ്റിച്ചിറയില്‍ നീന്താന്‍ എത്തിയതായിരുന്നു യഹിയ. കുറ്റിച്ചിറയില്‍ മതിയായ സുരക്ഷാ സംവിധാനങ്ങളില്ലാത്തതാണ് വിദ്യാര്‍ഥിയുടെ മരണത്തിന് കാരണമായതെന്ന് നാട്ടുകാര്‍ ആരോപിച്ചു. ഞായറാഴ്ചകളിലും അവധി ദിവസങ്ങളിലും വിദ്യാര്‍ഥികളടക്കം ഇവിടെ നിരവധി പേര്‍ നീന്താനും നീന്തല്‍ പരിശീലനത്തിനും എത്താറുണ്ട്. ലൈഫ് ജാക്കറ്റുകളടക്കം ആവശ്യത്തിന് സംവിധാനങ്ങളില്ലാതെയാണ് നീന്തല്‍ പരിശീലനമെന്നും ഭാവിയിലും ദുരന്തങ്ങള്‍ സംഭവിക്കാന്‍ സാധ്യതയുണ്ടെന്നുമാണ് പ്രദേശവാസികള്‍ ചൂണ്ടിക്കാട്ടുന്നത്. യഹിയ ഇത്തവണ പയ്യാനക്കല്‍ ഗവ. ഹയര്‍ സെക്കന്‍ഡറി സ്‌കൂളില്‍ നിന്ന് എസ്എസ്എല്‍സി പരീക്ഷ ജയിച്ചിരുന്നു. മാതാവ്: ആയിഷ. സഹോദരങ്ങള്‍: അക്ബര്‍, സാഹില്‍.

കായകൽപ് പുരസ്കാര നിറവിൽ വീണ്ടും കോട്ടപ്പറമ്പ് ആശുപത്രി

കോഴിക്കോട്: കായകൽപ് പുരസ്കാര നിറവിൽ വീണ്ടും കോട്ടപ്പറമ്പ് സ്ത്രീകളുടെയും കുട്ടികളുടെയും ആശുപത്രി. സ്ത്രീകളുടെയും കുട്ടികളുടടെയും ആശുപത്രി വിഭാഗത്തിൽ മലപ്പുറം നിലമ്പൂര്‍ ജില്ലാ ആശുപത്രി രണ്ടാംസ്ഥാനം (20 ലക്ഷം രൂപ) പങ്കിട്ടത്. 92 മാർക്കാണ് നേടിയത്. മാസം 300മുതൽ 350വരെ ജില്ലയിൽ ഏറ്റവും കൂടുതൽ പ്രസവം നടക്കുന്ന ആശുപത്രികളിലൊന്നാണിത്. വിക്ടോറിയ രാജ്ഞിയുടെ സ്മരണയ്ക്കായി ആരംഭിച്ച മലബാറിലെ ആദ്യത്തെ എൻഎബിഎച്ച് അക്രഡിറ്റഡ് ആശുപത്രിയും കോട്ടപ്പറമ്പാണ്. നഗരത്തിന്‍റെ ഹൃദയഭാഗത്ത് 3.12 ഏക്കറിൽ അതിമനോഹരമായ പൂന്തോട്ടങ്ങൾക്കിടയിലുള്ള ആശുപത്രി രോഗികൾക്ക്‌ ആശ്വാസമാണ്. 345 കിടക്കകളുണ്ട്‌. സംസ്ഥാന മലിനീകരണ നിയന്ത്രണ ബോർഡിന്‍റെ പുരസ്കാരങ്ങൾ, എൻഎബിഎച്ച് അക്രഡിറ്റേഷൻ, ലക്ഷ്യ, എൻക്യുഎഎസ്, മികച്ച ബ്ലഡ് ബാങ്കിനുള്ളവ തുടങ്ങി നിരവധി അംഗീകാരങ്ങൾ ഇതിനകം ആശുപത്രിയെ തേടിയെത്തി. 2022ൽ സ്ഥാപിച്ച വന്ധ്യതാനിവാരണ ക്ലിനിക്കിലെ ചികിത്സയിലൂടെ നാൽപ്പതോളം സ്ത്രീകളാണ് പ്രസവിച്ചത്. സംസ്ഥാനത്താകെ അഞ്ച് സർക്കാർ ആശുപത്രികളിലാണ് ക്ലിനിക്കുള്ളത്. ലെവൽ രണ്ടിലേക്ക് ക്ലിനിക്കിനെ ഉയർത്താനുള്ള നടപടി പുരോഗമിക്കയാണ്. അമ്മയുടെ പാൽ ശേഖരിച്ചുവച്ച് കുഞ്ഞിന് നൽകുന്ന ലാക്ടേഷൻ മാനേജ്മെന്‍റ് യൂണിറ്റും ഇവിടെയുണ്ട്. പ്രസവത്തോടനുബന്ധിച്ച് സൗജന്യ യാത്രാസൗകര്യവുമുണ്ട്. ഹോർമോൺ അനലൈസർ ഉൾപ്പെടെ നൂതന ഉപകരണങ്ങളും ലഭ്യമാണ്. സ്ത്രീകളുടെ വിഭാഗത്തിൽ എട്ടും കുട്ടികളുടെ വിഭാഗത്തിൽ നാലും ഡോക്ടർമാരാണുള്ളത്. ദിവസേന കാൻസർ സ്‌ക്രീനിംഗും നടക്കുന്നു. ശുചിത്വം, മാലിന്യ പരിപാലനം, അണുബാധാ നിയന്ത്രണം എന്നിവ വിലയിരുത്തി പ്രോത്സാഹിപ്പിക്കുന്നതിനായാണ് കായകൽപ് പുരസ്കാരം നൽകുന്നത്.

മലബാർ റിവർ ഫെസ്റ്റിവൽ : കൃഷിവൈവിധ്യങ്ങളെ ചേർത്തുപിടിച്ച് കാർഷിക ടൂറിസം സർക്യൂട്ട് യാത്ര

കോടഞ്ചേരി: 11-ാം മലബാർ റിവർ ഫെസ്റ്റിവൽ രാജ്യാന്തര വൈറ്റ് വാട്ടർ കയാക്കിംഗ് ചാമ്പ്യൻഷിപ്പിന്‍റെ പ്രീ ഇവന്‍റുകളുടെ ഭാഗമായി പഞ്ചായത്തും തിരുവമ്പാടി കലാ-സാംസ്കാരിക സമിതിയും ഇരവഞ്ഞിവാലി ടൂറിസം ഫാർമർ ഇന്‍ററസ്റ്റ് ഗ്രൂപ്പും ചേർന്ന് തിരുവമ്പാടി ഫാം ടൂറിസം സർക്യൂട്ടിലേക്ക്‌ ഏകദിന യാത്ര സംഘടിപ്പിച്ചത്. പെരുമാലിപ്പടിയിൽ പ്ലാത്തോട്ടത്തിൽ ജയ്സന്‍റെ ഉടമസ്ഥതയിലുള്ള ലെയ്ക് വ്യൂ ഫാം സ്റ്റേയിൽ നിന്നാരംഭിച്ച യാത്ര പഞ്ചായത്ത് പ്രസിഡന്‍റ് ബിന്ദു ജോൺസൺ ഫ്ലാഗ് ഓഫ്‌ ചെയ്തു. കൃഷിയെ കലയുമായി ബന്ധിപ്പിക്കുന്നതിന്‍റെ ഉദാഹരണമായ മുട്ടത്തുകുന്നേൽ ബോണിയുടെ ഗ്രെയ്സ് ഗാർഡൻ, മൂന്ന് തവണ സംസ്ഥാന അവാർഡ് നേടിയ കൈതക്കുളം സെലിൻ വിൽസന്‍റെ മലബാർ എഗർ ഫാം, പുരയിടത്തിൽ ജോസിന്‍റെ ആടുവളർത്തൽ ഫാം, കർഷകശ്രീ ജേതാവായ സാബു തറക്കുന്നേലിന്‍റെ തറക്കുന്നേൽ ഗാർഡൻസ്, കേരകേസരി, കർഷകോത്തമ ജേതാവ് ഡൊമിനിക് മണ്ണുക്കുശുമ്പിലിന്‍റെ സമ്മിശ്ര കൃഷിയിടമായ കാർമൽ അഗ്രോ ഫാം, ദേവസ്യ മുളക്കലിന്‍റെ ഗ്രീൻ ഫാം വില്ലാസ് എന്നിവിടങ്ങളിലൂടെയായിരുന്നു യാത്ര. ഓരോ കൃഷിയിടത്തെയും ഓരോ ടൂറിസം കേന്ദ്രങ്ങളാക്കി മാറ്റുക വഴി കർഷകരുടെയും നാടിന്‍റെ പൊതുവായുമുള്ള വരുമാന വർധന ലക്ഷ്യമിട്ടാണ് ജില്ലാ പഞ്ചായത്തിന്‍റെ നേതൃത്വത്തിലുള്ള കാഫ്റ്റ് സൊസൈറ്റിയുടെ കീഴിൽ നടത്തി വരുന്ന ഫാം ടൂറിസം പദ്ധതി. ഇതിന്‍റെ ഏറ്റവും ജനകീയവും ആകർഷകവുമായ പതിപ്പാണ് ഇപ്പോൾ തിരുവമ്പാടി പഞ്ചായത്തിൽ നടപ്പാക്കി വരുന്നത്. കാഴ്ചയുടെ മനോഹാരിതക്കും മാനസിക ഉല്ലാസത്തിനുമൊപ്പം കൃഷി സംബന്ധമായ ആധികാരിക പഠനവും ഈ യാത്രയിലൂടെ സാധ്യമാകുന്നു. തെങ്ങ്, ജാതി, സമ്മിശ്ര കൃഷികൾ, അലങ്കാര ചെടികൾ, മത്സ്യ കൃഷി, അലങ്കാര മത്സ്യകൃഷി, ആട് കൃഷി തുടങ്ങി വിവിധ കാർഷിക ഫാമുകളിലേക്കാണ് സന്ദർശനം ഒരുക്കുന്നത്. കാർഷികവൃത്തി നടത്തുന്നതിനൊപ്പം കൃഷിയിടത്തെ എങ്ങനെ ടൂറിസം കേന്ദ്രമാക്കി മാറ്റാം എന്നതിന്‍റെ മികച്ച ഉദാഹരണമായി മാറിക്കൊണ്ടിരിക്കുകയാണ് തിരുവമ്പാടി ഫാം ടൂറിസം സർക്യൂട്ട് ഫാമുകൾ. കേരളത്തിന്‍റെ വിവിധ ഭാഗങ്ങളിൽനിന്നും കേരളത്തിന് പുറത്ത് നിന്നും ധാരാളം ആളുകൾ ഇവിടെ സന്ദർശനത്തിനായി എത്തുന്നുണ്ട്. പരിപാടിക്ക്‌ വാർഡ് മെമ്പർമാരായ ലിസി മാളിയേക്കൽ, അപ്പു കോട്ടയിൽ, ലിസി സണ്ണി, ഷൈനി ബെന്നി, ഫെഡറൽ ബാങ്ക് മാനേജർ രഞ്ജിത്ത്, കാവാലം ജോർജ്, അജു എമ്മാനുവൽ തുടങ്ങിയവർ നേതൃത്വം നൽകി.

ബഥാനിയയില്‍ ദിവ്യകാരുണ്യ ആരാധനയും അഖണ്ഡ ജപമാല സമര്‍പ്പണം 17 മുതല്‍

പുല്ലൂരാംപാറ: ബഥാനിയ റിന്യൂവല്‍ സെന്‍ററില്‍ ദിവ്യകാരുണ്യ ആരാധനയും അഖണ്ഡ ജപമാല സമര്‍പ്പണവും 17 മുതല്‍ ഒക്‌ടോബര്‍ 25 വരെ നടക്കും. ലോകസമാധാനത്തിനും കുടുംബ വിശുദ്ധീകരണത്തിനും വേണ്ടിയാണ് 25-ാം വര്‍ഷത്തെ ദിവ്യകാരുണ്യ ആരാധനയും അഖണ്ഡ ജപമാല സമര്‍പ്പണവും നടത്തുന്നതെന്ന് ബഥാനിയ റിന്യൂവല്‍ സെന്‍റര്‍ ഡയറക്ടര്‍ ഫാ. റോണി പോള്‍ കാവില്‍ അറിയിച്ചു. 17ന് രാവിലെ 11.15ന് താമരശേരി ബിഷപ് മാര്‍ റെമീജിയോസ് ഇഞ്ചനാനിയിലിന്‍റെ മുഖ്യകാര്‍മികത്വത്തില്‍ ആഘോഷമായ വിശുദ്ധ കുര്‍ബാന, ദൈവവചന പ്രഘോഷണം എന്നിവ ഉണ്ടാകും. തുടര്‍ന്ന് ഉച്ചയ്ക്ക് 12.30ന് ദിവ്യകാരുണ്യ ആരാധനയും ജമപാല സമര്‍പ്പണവും ആരംഭിക്കും. 24 മണിക്കൂറും ആരാധന ഉണ്ടായിരിക്കും. ഞായറാഴ്ച ഒഴികെ എല്ലാ ദിവസങ്ങളിലും രാവിലെ ആറിനും ഉച്ചയ്ക്ക് 12നും വൈകു ന്നേരം ഏഴിനും ദിവ്യബലി ഉണ്ടാകും. ഉച്ചയ്ക്ക് ദിവ്യബലിയോടനുബന്ധിച്ച് വചനപ്രഘോഷണവും രോഗശാന്തി ശുശ്രൂഷയും ഉണ്ടായിരിക്കും. ഉച്ചയ്ക്കും രാത്രിയിലും നേര്‍ച്ച ഭക്ഷണവും ഉണ്ടാകും. ബഥാനിയ ഡയറക്ടര്‍ ഫാ. റോണി പോള്‍ കാവില്‍, അസി. ഡയറക്ടര്‍ ഫാ. ആല്‍ബിന്‍ വിലങ്ങുപാറ, ഫാ. ജോസ് പൂവന്നിക്കുന്നേല്‍ എന്നിവര്‍ നേതൃത്വം നല്‍കും.ഫോണ്‍: 9539884280, 9539535364.

പതിനഞ്ചുമാസം പിന്നിട്ടു : ഓണ്‍ലൈന്‍ ടാക്‌സികള്‍ക്ക് അഗ്രഗേറ്റര്‍ നയം നടപ്പാക്കിയില്ല

കോഴിക്കോട്: ഓണ്‍ലൈന്‍ ടാക്‌സികള്‍ക്കായി സംസ്ഥാന സര്‍ക്കാര്‍ അഗ്രഗേറ്റര്‍ നയം പുറത്തിറക്കി പതിനഞ്ചുമാസം പിന്നിട്ടിട്ടും ഇതുവരെ നടപ്പാക്കിയില്ല. നയം നടപ്പാക്കാന്‍ വീണ്ടും ഹൈേക്കാടതിയെ സമീപിക്കാനുള്ള ഒരുക്കത്തിലാണ് കോഴിക്കോട് ഓണ്‍ലൈന്‍ ടാക്‌സി ഡ്രൈവേഴ്‌സ് യൂണിയന്‍. നേരത്തെ യൂണിയന്‍ ഹൈക്കേടതിയെ സമീപിച്ചതിനെത്തുടര്‍ന്നാണ് അഗ്രഗേറ്റര്‍ നയം പുറത്തിറക്കാന്‍ സംസ്ഥാന സര്‍ക്കാര്‍ നിര്‍ബന്ധിതമായത്. കഴിഞ്ഞ വര്‍ഷം ഏപ്രില്‍ എട്ടിനാണ് അഗ്രഗേറ്റര്‍ നയം സംസ്ഥാനത്ത് പുറത്തിറക്കിയത്. 2020-ലെ കേന്ദ്ര സര്‍ക്കാറിന്റെ മോട്ടോര്‍ വാഹന അഗ്രഗേറ്റ് പോളിസിയുടെ മാര്‍ഗനിര്‍ദേശപ്രകാരമാണ് സംസ്ഥാനത്ത് ഈ നയം നടപ്പാക്കാന്‍ സര്‍ക്കാര്‍ തീരുമാനിച്ചത്. ഓണ്‍ലൈന്‍ ടാക്‌സികള്‍ക്ക് ഏകീകൃത കൂലിയും യാത്രക്കാര്‍ക്ക് പരിരക്ഷയും ഉറപ്പുനല്‍കുന്നതാണ് ഈ നയം. ഇതു നടപ്പാക്കുന്നതോടെ ഓണ്‍ലൈന്‍ ടാക്ലി വാഹനങ്ങള്‍ സര്‍വീസ് നടത്താന്‍ മോട്ടോര്‍ വാഹന വകുപ്പില്‍നിന്ന് അനുമതി വാങ്ങേണ്ടിവരും. സംസ്ഥാനത്ത് നിലവില്‍ 20,000 ഓണ്‍ലൈന്‍ ടാക്‌സി വാഹനങ്ങള്‍ ഓടുന്നുണ്ടെന്നാണ് കണക്ക്. ആലപ്പുഴ, എറണാകുളം, തിരുവനന്തപുരം, തൃശൂര്‍, കോഴിക്കോട് ജില്ലകളിലാണ് ഓണ്‍ലൈന്‍ ടാക്‌സികള്‍ ഉള്ളത്. ഊബര്‍, ഓല, കേരള സവാരി, ജുബ്‌നോ, റാപിഡോ, യാത്രി തുടങ്ങിയവതാണ് പ്രധാനമായും സര്‍വീസ് നടത്തുന്നവ. മറ്റു ടാക്‌സിക്കാര്‍ അമിതമായി കൂലി വാങ്ങുമ്പോള്‍ കുറഞ്ഞ നിരക്കിലാണ് ഇത്തരം ഓണ്‍ലൈന്‍ വാഹനങ്ങളുടെ ചാര്‍ജ്. സംസ്ഥാനത്തിനു പുറത്തുനിന്നു വരുന്നവരാണ് പ്രധാനമായും ഓണ്‍ലൈന്‍ വാഹനങ്ങള്‍ ബുക്ക് ചെയ്യുന്നത്. ചെറുപ്പക്കാരും ബുക്ക് ചെയ്യുന്നുണ്ട്.നിലവില്‍ ബുക്കിംഗ് കുറവായതാണ് ഓണ്‍ ലൈന്‍ ടാക്‌സികള്‍ നേരിടുന്ന പ്രതിസന്ധി. വാഹനങ്ങളുെട എണ്ണം കൂടിയത് ജോലിസാധ്യതയെ ബാധിക്കുന്നുണ്ട്. നിലവില്‍ ഒരു വാഹനത്തിനു ആയിരത്തില്‍താഴെ വരുമാനംമാത്രമാണുള്ളതെന്ന് ഓണ്‍ ലൈന്‍ ടാക്‌സി ഡ്രൈവര്‍മാര്‍ പറയുന്നു. ഓണ്‍ലൈന്‍ ടാക്‌സികളുടെ കൂലി ഏകീകരിക്കുന്നതിനു ഇടപെടല്‍ ആവശ്യപ്പെട്ട് ഓണ്‍ലൈന്‍ ടാക്‌സി ഡ്രൈവേഴ്‌സ് യൂണിയന്‍ സര്‍ക്കാറിനു നിവേദനം നല്‍കിയിരുന്നു. എന്നാല്‍ നടപടിയുണ്ടാകാത്തിനത്തെുടര്‍ന്നാണ് സംഘടന ഹൈക്കോടതിയെ സമീപിച്ചിരുന്നതെന്ന് ഓണ്‍ലൈന്‍ ടാക്‌സി ഡ്രൈവേഴ്‌സ് യുണിയന്‍ കോഴിക്കോട് ജില്ലാ സെക്രട്ടറി സന്തോഷ് നെച്ചൂളി പറഞ്ഞു. ഇതില്‍ ഹര്‍ജിക്കാര്‍ക്ക് അനുകൂലമായി ഹൈക്കോടതി ഉത്തരവു പുറപ്പെടുവിക്കുകയായിരുന്നു.

ഐഎൻടിയുസി നിയോജക മണ്ഡലം ക്യാമ്പ് നാളെ

പേരാമ്പ്ര: ഐഎൻടിയുസി പേരാമ്പ്ര നിയോജക മണ്ഡലം നേതൃത്വ പഠന ക്യാമ്പ് നാളെ വൈകീട്ട് അഞ്ചിന് തറമ്മലങ്ങാടി കാരയാട് എഎം എൽപി സ്കൂളിൽ നടക്കും. ചാണ്ടി ഉമ്മൻ എംഎൽഎ ഉദ്ഘാടനം ചെയ്യും. ഐഎൻടിയുസി സംസ്ഥാന ജനറൽ സെക്രട്ടറി മനോജ് എടാണി മുഖ്യപ്രഭാഷണം നടത്തും. ക്യാമ്പ് വിജയത്തിനായി തറമ്മലങ്ങാടി ഇന്ദിരാഭവനിൽ ചേർന്ന സ്വാഗത സംഘം രൂപികരണ യോഗം നിയോജക മണ്ഡലം പ്രസിഡന്‍റ് ഷാജു പൊൻപറ ഉദ്ഘാടനം ചെയ്തു. യൂസഫ് കുറ്റിക്കണ്ടി അധ്യക്ഷത വഹിച്ചു. അരിക്കുളം മണ്ഡലം കോൺഗ്രസ് പ്രസിഡന്‍റ് ശശി ഊട്ടേരി, യുഡിഎഫ് ചെയർമാൻ സി. രാമദാസ്, ലതേഷ് പുതിയെടുത്ത്, ശ്രീധരൻ കണ്ണമ്പത്ത്, സി.പി. സുഹനാദ്, മുഹമ്മദ് എടച്ചേരി, രാമചന്ദ്രൻ ചിത്തിര, കെ.പി. രാജീവൻ, ടി. മുത്തു കൃഷ്ണൻ, ചാത്തോത്ത് മോഹൻദാസ്, പി.കെ.കെ ബാബു, കെ.എം.എ ജലീൽ എന്നിവർ പ്രസംഗിച്ചു. സ്വാഗത സംഘം ഭാരവാഹികൾ: ശശി ഊട്ടേരി (ചെയർമാൻ), മുഹമ്മദ് എടച്ചേരി (കൺവീനർ).

വെളിച്ചെണ്ണയുടെ അളവ് വർധിപ്പിക്കണം: സിപിഐ

പേരാമ്പ്ര: വെളിച്ചെണ്ണയുടെ വില കുത്തനെ കൂടുന്ന സാഹചര്യത്തിൽ മാവേലി സ്റ്റോറുകളിൽ നിന്നും സബ്‌സിഡി നിരക്കിൽ ലഭിക്കുന്ന വെളിച്ചെണ്ണയുടെ അളവ് വർധിപ്പിക്കണമെന്ന് സിപിഐ പേരാമ്പ്ര ലോക്കൽ കമ്മിറ്റി യോഗം ആവശ്യപ്പെട്ടു. ഗോപാല കൃഷ്ണൻ തണ്ടോറപ്പാറ അധ്യക്ഷത വഹിച്ചു. മണ്ഡലം സെക്രട്ടറി യൂസഫ് കോറോത്ത്, പഞ്ചായത്ത് മെമ്പർ വിനോദ് തിരുവോത്ത്, പി.കെ. രാജു, എം. കെ. സീമ, കെ.സി. ബാലകൃഷ്ണൻ, അശോകൻ മഹാറാണി എന്നിവർ സംബന്ധിച്ചു.

കോൺഗ്രസ് പേരാമ്പ്ര താലൂക്ക് ആശുപത്രിക്ക് മുമ്പിൽ ധർണ നടത്തി

പേരാമ്പ്ര: ആരോഗ്യമേഖലയോടുള്ള സംസ്ഥാന സർക്കാരിന്‍റെ അവഗണനയ്ക്കും അനാസ്ഥയ്ക്കുമെതിരേ പേരാമ്പ്ര - മേപ്പയ്യൂർ ബ്ലോക്ക് കോൺഗ്രസ് കമ്മിറ്റികളുടെ നേതൃത്വത്തിൽ പേരാമ്പ്ര താലൂക്ക് ആശുപത്രിയ്ക്ക് മുന്പിൽ പ്രതിഷേധ ധർണ സംഘടിപ്പിച്ചു. യൂത്ത് കോൺഗ്രസ് ദേശീയ സെക്രട്ടറി വിദ്യ ബാലകൃഷ്ണൻ ഉദ്ഘാടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് കെ. മധുകൃഷ്ണൻ അധ്യക്ഷത വഹിച്ചു. സത്യൻ കടിയങ്ങാട്, ഇ.അശോകൻ, രാജൻ മരുതേരി, ഇ.വി. രാമചന്ദ്രൻ, പി.കെ. രാഗേഷ്, റെജി കോച്ചേരി, കെ.പി. വേണുഗോപാൽ, വി.പി. ഇബ്രാഹിം, എം.കെ സുരേന്ദ്രൻ, രാജൻ കെ. പുതിയേടത്ത്, മനോജ് എടാണി തുടങ്ങി‍യവർ പ്രസംഗിച്ചു.

സാഹസികതയുടെ ആവേശത്തിൽ തേവർമലയിലെ ഓഫ്‌റോഡ്‌ ഫൺഡ്രൈവ്

കോടഞ്ചേരി: സാഹസികതയുടെ ആവേശത്തിലേറി തേവർമലയിലെ ഓഫ്‌റോഡ്‌ ഫൺഡ്രൈവ്. സംസ്ഥാന ടൂറിസം വകുപ്പും കേരള അഡ്വഞ്ചർ ടൂറിസം പ്രമോഷൻ സൊസൈറ്റിയും ഡിടിപിസിയും ചേർന്ന് സംഘടിപ്പിക്കുന്ന 11-ാം മലബാർ റിവർ ഫെസ്റ്റിവൽ രാജ്യാന്തര വൈറ്റ് വാട്ടർ കയാക്കിംഗ് ചാമ്പ്യൻഷിപ്പിന് മുന്നോടിയായി കോടഞ്ചേരി പഞ്ചായത്തിലെ തേവർ മലയിലേക്ക് സംഘടിപ്പിച്ച ഓഫ്‌റോഡ്‌ ഫൺഡ്രൈവാണ് നാട്ടുകാരിൽ ആവേശം നിറച്ചത്. കോടഞ്ചേരി ഹൈസ്കൂൾ ഗ്രൗണ്ടിൽ അണിനിരന്ന മുപ്പതിലധികം വാഹനങ്ങൾ പഞ്ചായത്തിലെ ഏറ്റവും ഉയരം കൂടിയ തേവർമല ലക്ഷ്യമിട്ട് കല്ലും മണ്ണും നിറഞ്ഞ പാതയിലൂടെ കുതിച്ചുകയറി. ഗ്രാമപഞ്ചായത്തും കെഎൽ 11 ഓഫ്റോഡേഴ്സും മൗണ്ട് ഡി കോടഞ്ചേരിയും ചേർന്നാണ് പരിപാടി സംഘടിപ്പിച്ചത്. കോടഞ്ചേരി പഞ്ചായത്തിലെ രണ്ടാമത്തെ പ്രീ ഇവന്‍റായിരുന്നു ഫൺഡ്രൈവ്. തുഷാരഗിരിയിലെ വനിതാ മഴ നടത്തത്തോടെയാണ് പ്രീ ഇവന്‍റുകൾക്ക്‌ തുടക്കമായത്. പരിപാടിയുടെ ഫ്ലാഗ്ഓഫ്‌ പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി നിർവഹിച്ചു. ജില്ലാ പഞ്ചായത്ത് അംഗം ബോസ് ജേക്കബ് അധ്യക്ഷത വഹിച്ചു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ മുഖ്യാതിഥിയായി. വാർഡ് മെമ്പർമാരായ ചാൾസ് തയ്യിൽ, ചിന്ന അശോകൻ, എംആർഎഫ് കോഓഡിനേറ്റർ പോൾസൺ അറക്കൽ, ജോബിറ്റ്, ഹാറുൺ ഹുസൈൻ തുടങ്ങിയവർ പ്രസംഗിച്ചു.

മണിയൂരില്‍ സ്വകാര്യ ആശുപത്രിയിലെ ഡോക്ടറെ ആക്രമിച്ച കേസില്‍ ഒരാള്‍ അറസ്റ്റില്‍

വടകര: മണിയൂരില്‍ സ്വകാര്യ ആശുപത്രിയിലെ ഡോക്ടറെ ആക്രമിച്ച സംഭവത്തില്‍ ഒരാള്‍ അറസ്റ്റില്‍. പുറക്കാട് കിടഞ്ഞിക്കുന്ന് ലക്ഷംവീട് കോളനിയില്‍ സമീറാണ് (28) പയ്യോളി പോലീസിന്‍റെ പിടിയിലായത്. ആറു പേരടങ്ങിയ അക്രമി സംഘത്തിലെ മറ്റുള്ളവര്‍ ഒളിവിലാണെന്നാണ് വിവരം. മണിയൂര്‍ അട്ടക്കുണ്ട് എലൈറ്റ് ഹോസ്പിറ്റലിലെ ഡോക്ടര്‍ ഗോപു കൃഷ്ണയ്ക്കു നേരെയാണ് അക്രമമുണ്ടായത്. ഇക്കഴിഞ്ഞ എട്ടിന് ഉച്ചക്കു ശേഷമെത്തിയ ആറംഗ സംഘം ഡോക്ടറെ ക്രൂരമായി മര്‍ദിക്കുകയായിരുന്നു. പിടിയിലായ സമീര്‍ ദുബായില്‍ ജോലി ചെയ്യുകയാണ്. കഴിഞ്ഞ മാസം നാട്ടിലെത്തിയ ഇയാള്‍ കേസില്‍ അഞ്ചാം പ്രതിയാണ്. ചിറക്കര സ്വദേശികളായ മരക്കാട്ട് താഴെകുനി നിഹാല്‍ (27), മീത്തലെ കേളന്‍ കണ്ടി ഉനൈസ് (28), ഒറ്റമരക്കാട്ടില്‍ റമീസ് (24), മണപ്പുറത്ത് നഫാഫ് (23) എന്നിവരും പ്രതികളാണെന്ന് പയ്യോളി പോലീസ് അറിയിച്ചു. ഒളിവില്‍ കഴിയുന്ന ഇവര്‍ക്കായി ഊര്‍ജിതാന്വേഷണം നടക്കുന്നതായി പോലീസ് അറിയിച്ചു.

കേന്ദ്ര വനം- പരിസ്ഥിതി നിയമം ഭേദഗതി ചെയ്യണം: കർഷക സംഘം

ചക്കിട്ടപാറ: കർഷക ദ്രോഹ കേന്ദ്ര വനം- പരിസ്ഥിതി നിയമം ഭേദഗതി ചെയ്യണമെന്ന് കേരള കർഷക സംഘം ചക്കിട്ടപ്പാറ വില്ലേജ് സമ്മേളനം ആവശ്യപ്പെട്ടു. സ്റ്റേറ്റ് കമ്മിറ്റി അംഗം പി.സി. ഷിജു ഉദ്ഘാടനം ചെയ്‌തു. വില്ലേജ് കമ്മിറ്റി പ്രസിഡന്‍റ് എം.ബി പ്രകാശൻ അധ്യക്ഷത വഹിച്ചു. ഏരിയ കമ്മിറ്റി അംഗങ്ങളായ ചന്ദ്രൻ, സുജാത മനക്കൽ, സിപിഎം ലോക്കൽ സെക്രട്ടറി എ.ജി. ഭാസ്കരൻ, പി.പി.രഘുനാഥ്, ഐ.സുരേഷ് എന്നിവർ പ്രസംഗിച്ചു. ഭാരവാഹികൾ: എം.ബി.പ്രകാശൻ (സെക്രട്ടറി), പി.എ.ജോർജ് (പ്രസിഡന്‍റ്), ഐ. സുരേഷ് (ട്രഷറർ). 21അംഗ കമ്മിറ്റിയെയും തെരഞ്ഞെടുത്തു. കർഷകർക്ക് അർഹതപ്പെട്ട പട്ടയം ഉടൻ വിതരണം ചെയ്യുക, പേരാമ്പ്ര ഫാർമേഴ്‌സ് പ്രൊഡ്യൂസർസ് കമ്പനിയുടെ പ്രതിസന്ധി അവസാനിപ്പിക്കാൻ സർക്കാർ ഇടപെടുക, രാസ വളത്തിന്‍റെ അന്യായ വിലവർധനവ് തടയുക, ചക്കിട്ടപ്പാറയിൽ 12 മീറ്റർ വീതി ഉറപ്പു വരുത്തി മലയോര ഹൈവേ നിർമാണം പൂർത്തിയാക്കുക എന്നീ പ്രമേയങ്ങളും പാസാക്കി.

പ്രതിഷേധ ജ്വാലയ്ക്ക് സ്വീകരണം നൽകി

കൂടരഞ്ഞി: കാട്ടാനയിൽ നിന്ന് ജനങ്ങളെ സംരക്ഷിക്കണമെന്ന് ആവശ്യപ്പെട്ടു കള്ളിപ്പാറയിൽ നിന്നും ആരംഭിച്ച ആർജെഡി പഞ്ചായത്ത് കമ്മിറ്റിയുടെ പ്രതിഷേധ ജ്വാലയ്ക്ക് പീടികപ്പാറയിൽ സ്വീകരണം നൽകി. ജിമ്മി ജോസ് പൈമ്പിള്ളി അധ്യക്ഷത വഹിച്ചു. പി.എം തോമസ് ഉദ്ഘാടനം ചെയ്തു. പാർട്ടി ഭാരവാഹികളായ വിത്സൻ പുല്ലുവേലിൽ, ജോൺസൺ കുളത്തിങ്കൽ, എം.ടി. സൈമൺ, ജോർജ് മംഗര, മുഹമ്മദ് കുട്ടി പുളിയ്ക്കൽ, ജോളി പൊന്നും വരിക്കയിൽ തുടങ്ങിയവർ പ്രസംഗിച്ചു. കാട്ടാനയെ മയക്കുവെടി വച്ച് പിടികൂടുക, ഫോറസ്റ്റ് സെക്ഷൻ ഓഫീസ് പീടികപ്പാറയിൽ സ്ഥാപിക്കുക, കർഷകർക്ക് മതിയായ നഷ്ടപരിഹാരം നൽകുക തുടങ്ങിയ ആവശ്യങ്ങൾ ജ്വാലയിൽ ആർജെഡി പ്രവർത്തകർ ഉന്നയിച്ചു.

ഉന്നത വിജയിയെ ആദരിച്ചു

മുക്കം: സിഎ പരീക്ഷയിൽ ഉന്നത വിജയം നേടി നാടിന് അഭിമാനമായി മാറിയ വിഷ്ണു രാജിന് നാട്ടുകാരുടെ ആദരം. വിഷ്ണു രാജിന്‍റെ വീട്ടിലെത്തിയാണ് പന്നിക്കോട് പാസ്കോ ക്ലബിന്‍റെ നേതൃത്വത്തിൽ ആദരിച്ചത്. ഡോ. വി.കെ. സുരേഷ് ബാബു ഉപഹാരം സമർപ്പിച്ചു. പി.കെ.സി മുഹമ്മദ് പൊന്നാട അണിയിച്ചു. ചടങ്ങിൽ സി. ഫസൽബാബു അധ്യക്ഷത വഹിച്ചു. മജീദ് പുതുക്കുടി, ശ്രീതു ശ്രീനിവാസ്, ജബ്ബാർ പുറായിൽ, കെ.കെ. സബീൽ തുടങ്ങിയവർ സംബന്ധിച്ചു.

മെത്താംഫിറ്റാമിനുമായി യുവാവ് പിടിയിൽ

പേരാമ്പ്ര: 30.595 ഗ്രാം മെത്താംഫിറ്റാമിൻ ലഹരിയുമായി യുവാവ് പിടിയിൽ. പേരാമ്പ്ര എരവട്ടൂർ സ്വദേശി വിഷ്ണു ലാൽ (29) നെയാണ് ഇയാൾ സഞ്ചരിച്ച സ്കൂട്ടർ സഹിതം ബാലുശേരി റെയ്ഞ്ച് എക്സൈസ് ഇൻസ്പെക്ടർ എസ്. ദ്രുപതും സംഘവും കസ്റ്റഡിയിലെടുത്തത്. എക്‌സൈസ് ഉദ്യോഗസ്ഥരായ പി.എസ്. രാജീവൻ, ഡി.എസ്. ദിലീപ് കുമാർ, ഇ.എം. ഷാജി, കെ. ലിനീഷ്, ഷൈനി, ഡ്രൈവർ സി.ഇ.ഒ പ്രശാന്ത് എന്നിവർ സംഘത്തിൽ ഉണ്ടായിരുന്നു.

പാലം പണി തുടങ്ങിയതോടെ ദുരിതത്തിലായി വിദ്യാർഥികൾ

പുല്ലൂരാംപാറ: കാളിയാമ്പുഴ പാലം പണിയോടെ ബസ് റൂട്ട് പുന്നക്കൽ വഴി തിരിച്ചുവിടുന്നതിനാൽ ദുരിതത്തിലായി വിദ്യാർഥികൾ. പുല്ലൂരാംപാറ സെന്‍റ് ജോസഫ്സ് ഹയർ സെക്കൻഡറി സ്കൂളിലെ വിദ്യാർഥികളാണ് പ്രയാസം അനുഭവിക്കുന്നത്. മലയോര മേഖലയായ ആനക്കാംപൊയിൽ, മുത്തപ്പൻ പുഴ, കരിമ്പ്, മറിപ്പുഴ എന്നീ പ്രദേശങ്ങളിൽ നിന്നും വരുന്ന വിദ്യാർഥികളാണ് ബസ് ഇല്ലാതെ ബുദ്ധിമുട്ടുന്നത്. മഴ കനത്തതോടുകൂടി നടന്നു പോകാനും പറ്റാത്ത സ്ഥിതിയാണ്. മലവെള്ളപ്പാച്ചിലും മലയിടിച്ചിലുമൊക്കെ പ്രതിസന്ധിയുടെ ആക്കം കൂട്ടുന്നു. സ്കൂൾ അധികൃതർ ഗതാഗത മന്ത്രിക്കും എംഎൽഎയ്ക്കും പരാതി നൽകാൻ ഒരുങ്ങുകയാണ്. രാവിലത്തെ ഒരു ട്രിപ്പ് തിരുവമ്പാടിയിൽ നിന്നും പുന്നക്കൽ വഴി വരുന്ന ബസ് ബഥാനിയ വഴി പള്ളിപ്പടിയിൽ എത്തുകയും ആനക്കാംപൊയിൽ നിന്നും വരുന്ന ബസ് പള്ളിപ്പടിയിലെത്തി ബഥാനിയ വഴി തിരുവമ്പാടിയിൽ എത്തിച്ചേരുന്ന രീതിയിൽ ക്രമീകരിക്കണമെന്നാണ് ആവശ്യം ഉയരുന്നത്. എത്രയും വേഗം കാളിയാമ്പുഴ പാലം പണി പൂർത്തീകരിക്കണമെന്നും നാട്ടുകാർ ആവശ്യം ഉയർത്തുന്നുണ്ട്.

ജൈവവൈവിധ്യ രജിസ്റ്റർ പരിഷ്കരണ നടപടികൾ ആരംഭിച്ചു

കോടഞ്ചേരി: കോടഞ്ചേരി പഞ്ചായത്തിലെ ജൈവവൈവിധ്യ രജിസ്റ്റർ ജനകീയ പങ്കാളിത്തത്തോടു കൂടി ഡിജിറ്റൽ രൂപത്തിലാക്കുന്ന പ്രവർത്തനങ്ങൾക്ക് തുടക്കമായി. കോടഞ്ചേരി പഞ്ചായത്തിലെ ജൈവ സമ്പത്ത് വരും തലമുറയ്ക്ക് വിവരങ്ങൾ ഡിജിറ്റൽ രൂപത്തിൽ ലഭ്യമാക്കുക എന്ന് ഉദ്ദേശത്തോടെ കാലാവസ്ഥ വ്യതിയാനം വന്യജീവി അതിക്രമങ്ങൾ കാർഷിക മേഖലയിലെ വെല്ലുവിളികൾ അടക്കമുള്ള ഭാവി പ്രതിസന്ധികളെ പരിഹരിക്കാൻ ആവശ്യമായ വിവരശേഖരണം ആരംഭിച്ചു. പരിശീലന പരിപാടി പഞ്ചായത്ത് പ്രസിഡണ്ട് അലക്സ് തോമസ് ചെമ്പകശേരി ഉദ്ഘാടനം ചെയ്തു. വൈസ് പ്രസിഡന്‍റ് ജമീല അസീസ് അധ്യക്ഷത വഹിച്ചു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സൂസൻ വർഗീസ്, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സിബി ചിരണ്ടായത്ത്, വാർഡ് മെമ്പർമാരായ റോസിലി മാത്യു, റിയാനസ് സുബൈർ, വനജ വിജയൻ, ലീലാമ്മ കണ്ടത്തിൽ, റോസമ്മ കയത്തുങ്കൽ, ലിസി ചാക്കോ, ഷാജി മുട്ടത്ത്, ബിന്ദു ജോർജ്, ചിന്ന അശോകൻ വിവിധ വാർഡുകളിൽ നിന്നും രണ്ടു വീതം ജൈവ രജിസ്റ്റർ കാലികമാക്കുന്ന വോളണ്ടിയർമാർ എന്നിവർ സംബന്ധിച്ചു. കോടഞ്ചേരിയുടെ ജൈവ സമ്പത്തിനെ കുറിച്ച് ചർച്ചയിലും തുടർന്നുള്ള ക്ലാസുകൾക്കും സംസ്ഥാന ജൈവവൈവിധ്യ ബോർഡിന്‍റെ ജില്ലാ കോർഡിനേറ്റർ ഡോ. ബിന്ദു, ഉണ്ണികൃഷ്ണൻ എന്നിവർ നേതൃത്വം നൽകി.

കല്ലാനോട്ടെ കേരളാ കോൺഗ്രസ് -എം പ്രവർത്തകർ കോൺഗ്രസിൽ ചേർന്നു

കൂരാച്ചുണ്ട്: കേരളാ കോൺഗ്രസ് -എം കല്ലാനോട് മണ്ഡലം കമ്മിറ്റിയുടെ ഭാരവാഹികളായിരുന്നവർ അടക്കം അൻപതോളം കുടുംബങ്ങൾ അടങ്ങുന്ന പ്രവർത്തകർ കോൺഗ്രസിൽ ചേർന്നു. കൂരാച്ചുണ്ട് കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ കല്ലാനോട് ആറ്, ഏഴ് വാർഡുകളുടെ കുടുംബ സംഗമത്തോടനുബന്ധിച്ചു. ഇന്നലെ നടന്ന സമ്മേളനത്തിൽ പാർട്ടിയിൽ ചേർന്നവരെ ഡിസിസി പ്രസിഡന്‍റ് അഡ്വ. കെ. പ്രവീൺകുമാർ ഷാൾ അണിയിച്ച് സ്വീകരിച്ചു. സമ്മേളനത്തിന്‍റെ ഉദ്ഘാടനവും അദ്ദേഹം നിർവഹിച്ചു. മലയോര മേഖലയിലെ ജനതയെ ബാധിക്കുന്ന ജലസേചന വകുപ്പിന്‍റെ ബഫർസോൺ പ്രഖ്യാപനത്തിൽ പ്രതിഷേധിച്ച് കേരള കോൺഗ്രസ് -എം കല്ലാനോട് മണ്ഡലം കമ്മിറ്റി ഭാരവാഹികൾ അടക്കമുള്ളവർ മാസങ്ങൾക്ക് മുമ്പ് കൂട്ടമായി രാജി വയ്ക്കുകയും മണ്ഡലം കമ്മിറ്റി പിരിച്ചുവിടുകയും ചെയ്തിരുന്നു. തുടർന്നാണ് പ്രവർത്തകർ കോൺഗ്രസിൽ ചേർന്ന് പ്രവർത്തിക്കാൻ തീരുമാനിച്ചത്. വാർഡ് പ്രസിഡന്‍റ് കുര്യൻ ചെമ്പനാനി അധ്യക്ഷത വഹിച്ചു. ഡിസിസി ജനറൽ സെക്രട്ടറി നിജേഷ് അരവിന്ദ് മുഖ്യപ്രഭാഷണം നടത്തി. ബ്ലോക്ക് പ്രസിഡന്‍റ് കെ.രാജീവൻ, മണ്ഡലം പ്രസിഡന്‍റ് ജോസ് വെളിയത്ത്, ഡിസിസി ജനറൽ സെക്രട്ടറി അഗസ്റ്റിൻ കാരക്കട, വാർഡ് മെമ്പർ സിമിലി ബിജു, യൂത്ത് കോൺഗ്രസ് മണ്ഡലം പ്രസിഡന്‍റ് നിസാം കക്കയം, ഗീതാ ചന്ദ്രൻ തുടങ്ങിയവർ പ്രസംഗിച്ചു.

മത്സ്യകൃഷിയിൽ വിജയം : വിദേശജോലി ഉപേക്ഷിച്ചെത്തിയ അംബരീഷിന് സംസ്ഥാന പുരസ്‌കാരം

കൊയിലാണ്ടി: നാട്ടിൽ കൃഷി ചെയ്ത് ജീവിക്കാനാകുമോ? ഈ ചോദ്യത്തിന് അംബരീഷ് ഉത്തരം ന‍ൽകിയത് ചെമ്മീന്‍റ കൃഷിയിലെ വിജയഗാഥയിലൂടെയാണ്. കൃഷി ലാഭകരമായി ചെയ്യാനാകുമെന്ന് മാത്രമല്ല, കുറച്ചുപേർക്ക് ജോലി കൂടി നൽകാൻ സാധിക്കുമെന്നാണ് ചേമഞ്ചേരി തിരുവങ്ങൂര്‍ സ്വദേശി അംബരീഷ് തെളിയിച്ചു. തിരുവങ്ങൂരിലെ ഫാമിൽ വിജയകരമായി ചെമ്മീന്‍ കൃഷി ചെയ്ത അദ്ദേഹത്തെ തേടിയെത്തിയത് സംസ്ഥാന മത്സ്യ കര്‍ഷക പുരസ്കാരമാണ്. മികച്ച ചെമ്മീന്‍ കര്‍ഷകനുള്ള പുരസ്കാരത്തിൽ മൂന്നാം സ്ഥാനമാണ് വിദേശത്തെ ജോലി ഒഴിവാക്കി നാട്ടിൽ തിരിച്ചെത്തി സംരംഭം ആരംഭിച്ച അംബരീഷിന് ലഭിച്ചത്. യുകെയില്‍ നിന്ന് ബിരുദാനന്തര ബിരുദം നേടി സീ ഫുഡ് എക്‌സ്‌പോര്‍ട്ടിംഗ് ആന്‍ഡ് സപ്ലൈയില്‍ ജോലി ചെയ്തു വരുന്ന കാലത്താണ് നാട്ടിൽ തിരിച്ച് വന്ന് എന്തെങ്കിലും സംരംഭം തുടങ്ങാമെന്ന് അംബരീഷ് തീരുമാനിക്കുന്നത്. 2015 ല്‍ നാട്ടിലെത്തി ഫ്രഷ് വാട്ടര്‍ ഫിഷിന്‍റെയും മറൈന്‍ വാട്ടര്‍ ഫിഷിന്‍റെയും എക്‌സ്‌പോര്‍ട്ടിങ്ങിൽ ജോലി നോക്കുകയും ചെയ്തു. എന്നാലിത് വിചാരിച്ച രീതിയില്‍ മുന്നോട്ടുപോയില്ല. ഈ സംരംഭം ഉപേക്ഷിച്ച് 2017-18 ൽ ബന്ധുവിന്‍റെ 18 ഏക്കര്‍ സ്ഥലം ഏത് രീതിയില്‍ ഉപയോഗപ്പെടുത്താന്‍ സാധിക്കും എന്ന് അന്വേഷിച്ചിറങ്ങിയതിൽ നിന്നാണ് മത്സ്യകൃഷിയിൽ എത്തുന്നത്. തുടക്കത്തില്‍ അര്‍ദ്ധശാസ്ത്രീയ രീതിയില്‍ കൃഷി ചെയ്തു. അതില്‍ മെച്ചം കാണാത്തതിനാല്‍ ഫാം വിപുലീകരിക്കാന്‍ തീരുമാനിച്ചു. കേരളത്തിലെ മത്സ്യകൃഷി ഫാമുകള്‍ സന്ദര്‍ശിക്കുകയും മത്സ്യം വളര്‍ത്തുന്നത് നോക്കി മനസിലാക്കുകയും ചെയ്തു. ശേഷമാണ് സ്വന്തമായി ചെമ്മീന്‍ കൃഷിയിലേക്ക് ഇറങ്ങി തിരിക്കുന്നത്. 2021 ല്‍ ജെസിബി ഇറക്കി വനാമി ചെമ്മീനു വേണ്ട രീതിയില്‍ കുളം ഒരുക്കി. ബണ്ട് നിര്‍മ്മിച്ചു. ബയോ സെക്യൂരിറ്റി ഉറപ്പുവരുത്തി. 2022 ല്‍ കൃഷി തുടങ്ങുമ്പോള്‍ രണ്ടു കുളങ്ങളായിരുന്നു ഉണ്ടായിരുന്നത്. കൃഷി മെച്ചപ്പെടാന്‍ തുടങ്ങിയപ്പോള്‍ കുളങ്ങളുടെ എണ്ണവും വർ‌ധിപ്പിച്ചു. ഇപ്പോള്‍ നാല് കുളങ്ങളും രണ്ട് റിസര്‍വോയര്‍ കുളങ്ങളുണ്ട്. അവസാനത്തെ സീസണില്‍ കൃഷി വിജയകരമായി കൊണ്ടുപോകന്‍ സാധിച്ചു. വിളവെടുപ്പില്‍ 12.5 ടണ്‍ വിളവെടുക്കാന്‍ സാധിച്ചു. ഈ വര്‍ഷം എട്ട് ലക്ഷം വനാമി വിത്ത് ഇട്ടു. മത്സ്യ കൃഷി വഴി ഒരുപാട് ആളുകള്‍ക്ക് ജോലി നല്‍കാനും അംബരീഷിന് സാധിച്ചു. എട്ട് പേരോളം സ്ഥിര ജീവനക്കാര്‍ ഈ ഫാമില്‍ ജോലി ചെയ്യുന്നുണ്ട്.

25 ലിറ്റർ മാഹി മദ്യം പിടികൂടി

കൊയിലാണ്ടി: ബൈക്കിൽ കടത്തുകയായിരുന്ന മാഹി വിദേശ മദ്യവുമായി യുവാവ് പിടിയിൽ. തിക്കോടി പാലൂർ കരിയാറ്റിക്കുനി നാണു സ്മാരക റോഡിന് സമീപം റോയൽ എൻഫീൽഡ് ക്ലാസിക് ബൈക്കിൽ കടത്തുകയായിരുന്ന 25 ലിറ്റർ മദ്യമാണ് പിടികൂടിയത്. മദ്യം കൊണ്ടുവന്ന വടകര ഒഞ്ചിയം വില്ലേജിൽ മടപ്പള്ളി ഇടത്തിൽ വീട്ടിൽ ജാക്സൺ (40) പോലീസ് അറസ്റ്റു ചെയ്തു. മദ്യം കൊണ്ടുവന്ന ബൈക്കും കസ്റ്റഡിയിലെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]