ADVERTISEMENT

ADVERTISEMENT

അനുശോചിച്ചു

കൂടരഞ്ഞി: കെഎസ്എസ്പിയു കൂടരഞ്ഞി യൂണിറ്റിന്‍റെ സജീവ പ്രവർത്തകനും രാഷ്ട്രീയ സാമൂഹിക രംഗത്ത് നിറസാന്നിധ്യവുമായിരുന്ന പൂക്കുളത്തിൽ പി.ടി. മാത്യുവിന്‍റെ വിയോഗത്തിൽ കെഎസ് എസ്പിയു കൂടരഞ്ഞി യൂണിറ്റ് അനുശോചനം രേഖപ്പെടുത്തി.

യോഗത്തിൽ കെ.വി. ജോസഫ്‌, ഷാഹുൽ ഹമീദ്, എ.എസ്. ജോസ്, കെ.ജെ. ഇമ്മാനുവൽ, വി.വി. മാണി, എ.ടി. ജോസഫ്, സോമനാഥൻ കുട്ടത്ത് എന്നിവർ പ്രസംഗിച്ചു.

ADVERTISEMENT

ലോഡ്ജ് അടിച്ചുതകർത്ത് പണം അപഹരിച്ച പ്രതി പിടിയിൽ

കോഴിക്കോട്: കല്ലായി റോഡിലുള്ള ലോഡ്ജിലെ റിസപ്ഷനിൽ അതിക്രമിച്ച് കയറി ഭീകരാന്തരീക്ഷം സൃഷ്ടിക്കുകയും ജീവനക്കാരെ ഭീഷണിപ്പെടുത്തി മേശവലിപ്പിലുണ്ടായിരുന്ന പണം അപഹരിക്കുകയും ചെയ്ത കേസില്‍ പ്രതി അറസ്റ്റില്‍. ചാലപ്പുറം സ്വദേശി ഫാത്തിമ്മ ഹൌസിൽ മിജാഷിർ (39 ) നെ കസബ പോലീസ് അറസ്റ്റ് ചെയ്തു. ന്യൂ കീർത്തി മഹൽ ലോഡ്ജിലെ റിസപ്ഷനിലെ രണ്ട് ലാൻഡ് ഫോണുകളും പ്രിന്‍ററും പ്രതി എറിഞ്ഞ് പൊട്ടിക്കുകയും ലോഡ്ജിലെ ജീവനക്കാരെ ആക്രമിക്കുകയും മൊബൈൽ ഫോൺ പിടിച്ച് പറിച്ച് എറിഞ്ഞ് പൊട്ടിക്കാൻ ശ്രമിക്കുകയുമായിരുന്നു. തുടർന്ന് കസബ പോലീസ് കേസ് രജിസ്റ്റർ ചെയ്ത് അന്വേഷണം നടത്തിവരവെ സിസിടിവി ദൃശ്യങ്ങളിൽ നിന്ന് പ്രതിയെ മനസിലാക്കുകയും കസ്റ്റഡിയിലെടുക്കുകയുമായിരുന്നു.

ലഹരിക്കെതിരായ പോരാട്ടം സ്‌കൂളുകളില്‍നിന്നു തുടങ്ങണം: സംവിധായകന്‍ ജിന്‍റോ തോമസ്

ദീപിക കളര്‍ ഇന്ത്യ മത്സരത്തിന്‍റെ രജിസ്‌ട്രേഷന്‍ ലോഞ്ചിംഗ് നടത്തി കോഴിക്കോട്: ലഹരിക്കെതിരായ പോരാട്ടം സ്‌കൂളുകളില്‍നിന്നു തുടങ്ങണമെന്ന് ചലച്ചിത്രസംവിധായകന്‍ ജിന്‍റോ തോമസ്. പാട്ടും നൃത്തവും വരയും ലഹരിയാക്കിമാറ്റാന്‍ കുട്ടികള്‍ക്കു കഴിയണമെന്നും അദ്ദേഹം പറഞ്ഞു. പത്തുലക്ഷത്തിലധികം വിദ്യാര്‍ഥികള്‍ മാറ്റുരയ്ക്കുന്ന ചിത്രരചനാമത്സരമായ ദീപിക കളര്‍ ഇന്ത്യ മത്സരത്തിന്‍റെ രജിസ്‌ട്രേഷന്‍ ലോഞ്ചിംഗ് ബാലുശേരി ജയ്‌റാണി എസ്എബിഎസ് പബ്ലിക് സ്‌കൂളില്‍ നിര്‍വഹിക്കുകയായിരുന്നു അദ്ദേഹം. ചിത്രരചനാ മത്സരത്തിന്‍റെ തീം ആയ "നോ ഡ്രഗ് നോ വാര്‍' ഏറെ പ്രസ്‌കതമായ മുദ്രാവാക്യമാണെന്ന് അദ്ദേഹം പറഞ്ഞു. ജീവിതത്തോടാണ് നമ്മള്‍ യുദ്ധം ചെയ്യേണ്ടത്. കുട്ടികളാണ് നാളെ സമൂഹത്തെയും നാടിനെയും നയിക്കേണ്ടത്. ശാസ്ത്രജ്ഞരും രാഷ്ട്രതന്ത്രജ്ഞരുമെല്ലാം ആവേണ്ടവര്‍. മയക്കുമരുന്ന് ഉപയോഗിച്ചാല്‍ പിന്നീട് സാധാരണ ജീവിതത്തിലേക്ക് തിരിച്ചുവരാന്‍ കഴിയില്ല. ജീവിതകാലം മുഴുവന്‍ രോഗിയായി മാറുന്ന അവസ്ഥയുണ്ടാകും. അതുകൊണ്ട് തമാശയ്ക്കുപോലും ഒരിക്കലും ലഹരി ഉപയോഗിക്കാന്‍ പാടില്ലെന്ന് അദ്ദേഹം കുട്ടികളെ ഉദ്‌ബോധിപ്പിച്ചു. ലഹരിയെ മാറ്റി നിര്‍ത്താനും ചവിട്ടിപുറത്താക്കാനുമുള്ള തന്‍റേടം കുട്ടികള്‍ ആര്‍ജിക്കണം. ജീവിതത്തിനു പ്രചോദനമാകുന്ന നല്ല കാര്യങ്ങള്‍ തുടങ്ങാന്‍ കുട്ടികള്‍ക്കു കഴിയണം. തന്‍റെ സിനിമാ ജീവിതത്തില്‍ ഏറ്റവും കൂടുതല്‍ പ്രോത്സാഹനം നല്‍കിയത് ദീപികയാണെന്ന് അദ്ദേഹം പറഞ്ഞു.മയക്കുമരുന്നനെതിരേ ദീപികയുടെ പോരാട്ടം അഭിമാനകരമാണെന്നും ജിന്‍റോ തോമസ് അഭിപ്രായപ്പെട്ടു. ജയ്‌റാണി എസ്എബിഎസ് പബ്ലിക് സ്‌കൂള്‍ പ്രിന്‍സിപ്പല്‍ സിസ്റ്റര്‍ ഫിലോ തോമസ് അധ്യക്ഷത വഹിച്ചു. കേരളത്തെ അക്ഷരങ്ങള്‍ കൊണ്ട് വിളിച്ചുണര്‍ത്തിയ പത്രമാണ് ദീപികയെന്ന് അവര്‍ പറഞ്ഞു. സംസ്ഥാനത്ത് പുതിയ വായനാസംസ്‌കാരത്തിനു തുടക്കം കുറിച്ച പത്രം. സ്‌നേഹത്തിന്‍റെ പങ്കുവയ്ക്കലാണ് ദീപിക നടത്തുന്നത്. ദീപികയുടെ കളര്‍ ഇന്ത്യ ചിത്രരചനാമത്സരം കുട്ടികളില്‍ സര്‍ഗാത്മകത വളര്‍ത്തുന്നതാണെന്നും അവര്‍ പറഞ്ഞു. ദീപിക കോഴിക്കോട് റസിഡന്‍റ് മാനേജര്‍ ഫാ. ഷെറിന്‍ പുത്തന്‍പുരയ്ക്കല്‍ ആമുഖ ഭാഷണവും ബാലുശേരി സെന്‍റ് മേരീസ് ചര്‍ച്ച് വികാരി ഫാ. മെല്‍വിന്‍ വെള്ളയ്ക്കാകുടിയില്‍ അനുഗ്രഹ പ്രഭാഷണവും നടത്തി. സ്റ്റാഫ് സെക്രട്ടറി ശ്രുതിമോള്‍ ജോസഫ് സ്വാഗതവും വൈസ് പ്രിന്‍സിപ്പല്‍ സിസ്റ്റര്‍ അനുഷാ മാത്യു നന്ദിയും പറഞ്ഞു.വേദലക്ഷ്മി രത്‌നഹരി, ജോസ്‌വിന്‍ സണ്ണി എന്നിവര്‍ ഗാനങ്ങള്‍ ആലപിച്ചു. സ്‌കൂള്‍ നൃത്തസംഘത്തിന്‍റെ നൃത്ത പരിപാടികളും അരങ്ങേറി.

കല്ലായി പുഴയിലെ ചെളി നീക്കല്‍ 2026 മാര്‍ച്ചില്‍ പൂര്‍ത്തീകരിക്കും

മന്ത്രിയുടെ നേതൃത്വത്തില്‍ യോഗം കോഴിക്കോട്: കല്ലായി പുഴയില്‍ അടിഞ്ഞുകൂടിയ ചെളി 2026 മാര്‍ച്ചോടെ പൂര്‍ണമായി നീക്കം ചെയ്ത് ഉദ്ഘാടനം നടത്തുമെന്ന് മന്ത്രി റോഷി അഗസ്റ്റിന്‍. കല്ലായി പുഴ നവീകരണവുമായി ബന്ധപ്പെട്ട് ഗവ. ഗസ്റ്റ് ഹൗസില്‍ ചേര്‍ന്ന അവലോകന യോഗത്തില്‍ സംസാരിക്കുകയായിരുന്നു മന്ത്രി. ടൂറിസം സാധ്യതയടക്കം ഉള്‍പ്പെടുത്തി പദ്ധതിയുടെ തുടര്‍പ്രവൃത്തിയുമായി ബന്ധപ്പെട്ട് ജലസേചന വകുപ്പ് വിശദമായ ഡിപിആര്‍ തയാറാക്കി കോര്‍പറേഷന് നല്‍കണം. ഓരോ മാസവും ചെയ്യേണ്ട കാര്യങ്ങള്‍ പ്രത്യേകം പട്ടിക തയാറാക്കി അവലോകനം നടത്തണമെന്നും മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കി. പ്രവൃത്തി പുരോഗമിക്കുന്ന വേളയില്‍ ഇതിന്‍റെ വേഗം കൂട്ടാനുള്ള എല്ലാ സാധ്യതകളും ഉപയോഗപ്പെടുത്തണം. ഒരു തദ്ദേശ സ്ഥാപനം പുഴ സംരക്ഷണത്തിന് കോടികള്‍ ചെലവിട്ട് ഇടപെടല്‍ നടത്തുന്നത് മാതൃകാപരമാണെന്നും മന്ത്രി കൂട്ടിച്ചേര്‍ത്തു.പുഴ ശുചീകരണത്തിന് 12.98 കോടിയുടെ പദ്ധതിയാണ് കോര്‍പറേഷന്‍ ആവിഷ്‌കരിച്ചത്. ബാര്‍ജ്, ഡ്രഡ്ജര്‍, എസ്‌കവേറ്റര്‍ എന്നിവ ഉപയോഗിച്ചാണ് ചെളി നീക്കം ചെയ്യുക. ഇവ ബാര്‍ജില്‍കൊണ്ടുപോയി കടലില്‍ നിക്ഷേപിക്കും. കോതി മുതല്‍ മാങ്കാവ് വരെയുള്ള ഭാഗത്തെ 3.29 ലക്ഷം ക്യൂബിക് മീറ്റര്‍ ചെളിയാണ് എടുക്കുക. നിലവില്‍ 300 മീറ്റര്‍ ഭാഗികമായും 180 മീറ്ററില്‍ പൂര്‍ണമായും നീക്കം ചെയ്തിട്ടുണ്ട്. കടലിലെ പ്രതികൂല കാലാവസ്ഥ കണക്കിലെടുത്ത് പ്രവൃത്തി താല്‍ക്കാലികമായി നിര്‍ത്തിവെച്ചിരിക്കുകയാണ്. നഗരത്തിലെ വെള്ളക്കെട്ടിനുള്ള ശാശ്വതപരിഹാരമെന്ന രീതിയിലാണ് കല്ലായിപ്പുഴയിലെ ചെളിനീക്കലിനെ കാണുന്നത്. പ്രവൃത്തി പൂര്‍ത്തിയാകുന്നതോടെ കല്ലായിയിലെയും കനോലി കനാലിലെയും ഒഴുക്ക് സുഗമമാകും.

സംരക്ഷണഭിത്തിയില്ല: മലയോര ഹൈവേ നിര്‍മാണസ്ഥലത്ത് കൃഷിയിടങ്ങള്‍ ഇടിഞ്ഞുതാഴുന്നു

ജോൺസൺ പൂകമല കൂരാച്ചുണ്ട്: മലയോര ഹൈവേ നിർമ്മാണ പ്രവർത്തി നടക്കുന്ന പടിക്കൽവയൽ- ഇരുപത്തെട്ടാംമൈൽ റോഡിൽ കൂരാച്ചുണ്ട് പഞ്ചായത്ത് ആറാം വാർഡിൽ ഉൾപ്പെട്ട ഇരുപത്തെട്ടാംമൈൽ മേഖലയിൽ റോഡിന് വീതി വർധിപ്പിക്കുന്നതിനായി ഇടിച്ചു നീക്കിയത് മൂലം കൃഷിയിടങ്ങൾ ഇടിഞ്ഞു തകരുന്നു. റോഡിനായി കൃഷിയിടം ഇടിച്ചു നിരത്തിയ സ്ഥലത്ത് സംരക്ഷണ ഭിത്തി നിർമിക്കാത്തതുമൂലം നിരവധി കൃഷിയിടങ്ങളിലെ കാർഷിക വിളകളാണ് നാശത്തിലായത്. മഴ കനത്തതോടെ നാല്‍പതടിയോളം ഉയരത്തിലുള്ള തിണ്ട് നിരന്തരം പല സ്ഥലത്തും ഇടിഞ്ഞ് തകരുകയാണ്. എന്നാൽ ഈ മേഖലയിൽ മണ്ണ് നീക്കിയ ഭാഗങ്ങളിൽ സംരക്ഷണ ഭിത്തി നിർമിക്കണമെന്നും ഈ ഭാഗത്ത് പൊതുമരാമത്ത് വകുപ്പിന്‍റെ അധീനതയിലായി റോഡിന് ആവശ്യമായ വീതി വർധിപ്പിക്കാൻ റോഡിന് മറുഭാഗത്ത് സ്ഥലമുണ്ടായിട്ടും കൃഷിയിടം ഇടിച്ചു നീക്കിയെന്നും ആക്ഷേപമുണ്ട്. റോഡിന്‍റെ മറുഭാഗം താഴ്ചയുള്ള ഭാഗമാണ്. ഈ ഭാഗത്തും സംരക്ഷണമതിൽ നിർമിക്കുന്നില്ല. 200 മീറ്ററോളം ദൂരത്തിൽ ഈ മേഖലയിൽ മാത്രം റോഡിന് കരിങ്കൽ ഭിത്തി നിർമ്മിക്കാതെയാണ് പ്രവർത്തി നടക്കുന്നത്. ഉയർന്നു നിൽക്കുന്ന റോഡിന്‍റെ താഴ്ഭാഗത്തായി കൃഷിയിടങ്ങളും വീടുകളുമുണ്ട്. കരിങ്കൽഭിത്തി നിർമിച്ചില്ലെങ്കിൽ റോഡ് ഇടിഞ്ഞു തകർന്നാൽ കൃഷിയിടങ്ങൾക്കും വീടുകൾക്കും ഭീഷണിയാകുമെന്നുറപ്പാണ്. ഇവിടം ഒഴികെ താഴ്ചയുള്ള ബാക്കി ഭാഗങ്ങളിലെല്ലാം കരിങ്കൽ ഭിത്തികൾ നിർമിച്ചിട്ടുണ്ട്. റോഡിന്‍റെ ഈ മേഖലയിൽ ഇരുഭാഗങ്ങളിലും സംരക്ഷണഭിത്തി നിർമിക്കണമെന്നാണ് ആവശ്യം ഉയരുന്നത്. റോഡരികിലെ കൃഷിയിടങ്ങളിലേക്കുള്ള വഴിയും ഇല്ലാതെയായതായും പരാതിയുണ്ട്. കാലാന്തരത്തിൽ മണ്ണ് ഇടിഞ്ഞ് സമീപത്തെ ഡാം റിസർവോയറിൽ അടിയുന്നതും ഭാവിയിൽ പ്രശ്നങ്ങൾ സൃഷ്ടിക്കാനിടയുണ്ട്. കല്ലാനോട് ആറാം വാർഡിലെ തടത്തിൽ ജോർജ് തോമസ്, തടത്തിൽ സണ്ണി തോമസ്, തടത്തിൽ നിമിഷ, ലവ്‌ലി സണ്ണി, ജോർജ് ചിറ്റക്കാട്ടുകുഴി, തടത്തിൽ ഫിലോമിന, ഷൈൻ ജോർജ് തുടങ്ങിയവരുടെ കൃഷിയിടങ്ങളിലെ തെങ്ങ് കമുക് റബർ തുടങ്ങിയ കൃഷി വിളകളാണ് ഇത്തരത്തിൽ ഭീഷണി നേരിടുന്നത്. ഇതു സംബന്ധിച്ച് കെആർഎഫ്ബി വകുപ്പ് ഉദ്യോഗസ്ഥർക്ക് പരാതി നൽകുമെന്നും കർഷകർ അറിയിച്ചു. ഇടിയുന്ന ഭാഗത്ത് സംരക്ഷണഭിത്തി കെട്ടണം കൂരാച്ചുണ്ട്: മലയോര ഹൈവേ നിർമാണത്തിനായി ഭൂമി വിട്ടു നൽകിയ നിരവധി പേരുടെ കൃഷിയിടങ്ങൾ വീണ്ടും വീണ്ടും ഇടിഞ്ഞ് തകരുകയാണ് റോഡിന്‍റെ രണ്ടു വശങ്ങളിലും കെട്ടില്ലാത്തത് മൂലം വലിയ പ്രതിസന്ധിയാണ് നേരിടുന്നത്. റോഡിന്‍റെ താഴ്ഭാഗത്തുള്ള കർഷകർക്കും അവരുടെ കൃഷിസ്ഥലം നശിക്കുന്നു. താഴെ ഭാഗത്ത് പതിനഞ്ച് മീറ്ററോളം പിഡബ്ല്യൂഡിക്ക് സ്ഥലമുണ്ട്. ആ ഭാഗം കരിങ്കൽ ഭിത്തി നിർമിച്ച് സംരക്ഷിക്കുകയും ചെയ്തുകൊണ്ട് റോഡിന്‍റെ ഇടിയുന്ന ഭാഗത്ത് സംരക്ഷണഭിത്തി കെട്ടുകയും ചെയ്താൽ മാത്രമെ പ്രശ്ന പരിഹാരമാവുകയുള്ളു. മഴ കനത്തതോടെ മണ്ണിടിച്ചിൽ കൂടി കൂരാച്ചുണ്ട്: മലയോര ഹൈവേ നിർമാണ പ്രവൃത്തി നടക്കുന്ന ഇരുപത്തെട്ടാം മൈൽ മേഖലയിലെ 200 മീറ്റർ ദൂരം വരുന്ന റോഡിന്‍റെ ഇരു ഭാഗങ്ങളിലും സംരക്ഷണ ഭിത്തികൾ നിർമിച്ച് റോഡിനും ഇരുഭാഗങ്ങളിലുമുള്ള കർഷകരുടെ കൃഷിയിടങ്ങൾക്കും സുരക്ഷ ഉറപ്പാക്കാൻ ബന്ധപ്പെട്ട അധികാരികൾ നടപടി സ്വീകരിക്കേണ്ടതുണ്ട്. മഴ കനത്തതോടെ ഈ മേഖലയിലെ മണ്ണിടിച്ചിൽ മൂലം നിരവധി കൃഷിയിടങ്ങളും കാർഷിക വിളകളും തകർന്നടിയുകയാണ്. അടിയന്തരമായി പരിഹാരം കാണണം.

തീരദേശ സദസ് നേതൃസംഗമം

കോഴിക്കോട്: കടല്‍ കടലിന്‍റെ മക്കള്‍ക്ക് കടലോര മക്കളോടൊപ്പം കോണ്‍ഗ്രസ് എന്ന മുദ്രാവാക്യമുയര്‍ത്തി ജില്ലാ കോണ്‍ഗ്രസ് കമ്മിറ്റി ആഗസ്ത് രണ്ട് മുതല്‍ അഞ്ച് വരെ നടത്തുന്ന തീരദേശ സദസ് വിജയിപ്പിക്കുന്നതിനുവേണ്ടിയുള്ള മേഖലാ യോഗങ്ങള്‍ വടകര, കൊയിലാണ്ടി, കോഴിക്കോട് എന്നിവിടങ്ങളില്‍ നടന്നു. ആഗസ്ത് രണ്ടിന് അഴിയൂര്‍, വടകര മൂന്നിന് പയ്യോളി, കൊയിലാണ്ടി നാലിന് കാപ്പാട്, പുതിയാപ്പ, അഞ്ചിന് മുഖദാര്‍, ചാലിയം എന്നിവിടങ്ങളില്‍ നടക്കുന്ന തീരദേശ സദസില്‍ കടലോരമേഖലയിലെ വ്യത്യസ്ത വിഷയങ്ങളില്‍ മത്സ്യതൊഴിലാളികളില്‍നിന്ന് വിവരശേഖരണം നടത്തും. ഇതിന്‍റെ അടിസ്ഥാനത്തില്‍ ആവശ്യമായ സമരങ്ങളും നിയമ പോരാട്ടങ്ങളും ജില്ലാ കോണ്‍ഗ്രസ് കമ്മിറ്റി ഏറ്റെടുത്ത് നടത്തും. തീരദേശ സദസ്സില്‍ ഉയര്‍ന്നുവന്ന വിഷയങ്ങള്‍ കെപിസിസിക്കും പ്രതിപക്ഷ നേതാവിനും കൈമാറും. പ്രവര്‍ത്തക സംഗമങ്ങള്‍ ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ ഉദ്ഘാടനം ചെയ്തു. ഡിസിസി ജനറല്‍ സെക്രട്ടറി നിജേഷ് അരവിന്ദ്, സത്യനാഥന്‍ മാടഞ്ചേരി, സത്യന്‍ പുതിയാപ്പ, ഡിസിസി ഭാരവാഹികള്‍, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റുമാര്‍, മണ്ഡലം പ്രസിഡന്‍റുമാര്‍, മത്സ്യതൊഴിലാളി കോണ്‍ഗ്രസ് നേതാക്കള്‍ എന്നിവര്‍ പങ്കെടുത്തു.

ബാലുശേരി ഭക്ഷ്യസംസ്‌കരണ-പോഷകാഹാര കേന്ദ്രത്തിന്‍റെ ചുമതല ഇനി ബ്ലോക്ക് പഞ്ചായത്തിന്

ബാലുശേരി: ഭക്ഷ്യസംസ്‌കരണ-പോഷകാഹാര കേന്ദ്രത്തിന്‍റെ നവീകരണത്തിന് വഴിയൊരുങ്ങുന്നു. ഗ്രാമവികസന വകുപ്പിന് കീഴില്‍ പ്രവര്‍ത്തിച്ചിരുന്ന കേന്ദ്രം ബാലുശേരി ബ്ലോക്ക് പഞ്ചായത്തിന് കൈമാറിയതോടെയാണ് കൂടുതല്‍ വികസന പ്രവര്‍ത്തങ്ങള്‍ക്ക് സാധ്യത തെളിഞ്ഞത്. ദക്ഷിണേന്ത്യയിലെ ആദ്യ ഭക്ഷ്യ സംസ്‌കരണ-പോഷകാഹാര കേന്ദ്രമാണ് ബാലുശേരിയിലേത്. 1982ല്‍ യുനിസെഫിന്‍റെ സഹായത്തോടെയാണ് കേന്ദ്രസര്‍ക്കാര്‍ ഇതാരംഭിച്ചത്. 1988ല്‍ സംസ്ഥാന ഗ്രാമവികസന വകുപ്പിന് വിട്ടുനല്‍കി. വിളവെടുപ്പിന് ശേഷം ഭക്ഷ്യധാന്യങ്ങള്‍ സംസ്‌കരിച്ചെടുക്കുന്നതിനും മൂല്യവര്‍ധിത ഉല്‍പന്നങ്ങളാക്കി വിപണനം നടത്തി വരുമാനം കണ്ടെത്തുന്നതിനും ഗ്രാമീണ ജനതയെ പ്രാപ്തരാക്കുകയെന്ന ലക്ഷ്യത്തോടെയാണ് സ്ഥാപനം ആരംഭിച്ചത്. ബേക്കറി പലഹാരങ്ങള്‍, പഴങ്ങള്‍ ഉപയോഗിച്ച് ജാം, സ്‌ക്വാഷ് എന്നിവ നിര്‍മിക്കുന്നതിലാണ് ഇവിടെ പരിശീലനം നല്‍കുന്നത്. ഇവിടെനിന്ന് പരിശീലനം നേടിയവര്‍ കേന്ദ്രത്തിലെ സംസ്‌കരണ സംവിധാനം ഉപയോഗിച്ച് ഉല്‍പന്നങ്ങള്‍ തയാറാക്കി വിപണനം നടത്തുന്നുണ്ട്. സ്ത്രീകള്‍ക്കും യുവാക്കള്‍ക്കും കൂടുതല്‍ തൊഴിലവസരങ്ങള്‍ കണ്ടെത്താന്‍ കഴിയുംവിധം കേന്ദ്രത്തെ വികസിപ്പിക്കാനാണ് ബ്ലോക്ക് പഞ്ചായത്ത് ലക്ഷ്യമിടുന്നത്. കെ.എം. സച്ചിന്‍ദേവ് എംഎല്‍എ, ബ്ലോക്ക് പഞ്ചായത്ത് പ്രസിഡന്‍റ് വി.കെ. അനിത എന്നിവരുടെ ശ്രമഫലമായാണ് ഭക്ഷ്യസംസ്‌കരണ-പോഷകാഹാര കേന്ദ്രത്തിന്‍റെ ചുമതല ബ്ലോക്ക് പഞ്ചായത്തിന് ലഭിച്ചത്.

4.5 കോടി രൂപയുടെ പദ്ധതികള്‍ക്ക് ഭരണാനുമതി

കുന്നമംഗലം: കുന്നമംഗലം നിയോജക മണ്ഡലത്തില്‍ നാല് പ്രവൃത്തികള്‍ക്കായി 4.5 കോടി രൂപയുടെ ഭരണാനുമതി ലഭിച്ചതായി പി.ടി.എ. റഹീം എംഎല്‍എ അറിയിച്ചു. കാരന്തൂര്‍ പാറക്കടവ് റോഡിന് രണ്ട് കോടി, പുവാട്ടുപറമ്പ്-കോട്ടായിത്താഴം റോഡിന് 1.75 കോടി, ചെത്തുകടവ് വരിട്ട്യാക്കില്‍ ബൈപാസ് സ്ഥലമെടുപ്പിന് 50 ലക്ഷം, കളന്‍തോട് ടൗണില്‍ കൂളിമാട് റോഡ് ജംഗ്ഷന്‍ സ്ഥലമെടുപ്പിന് 25 ലക്ഷം എന്നിങ്ങനെയാണ് തുക അനുവദിച്ചത്. 2025-26 സാമ്പത്തിക വര്‍ഷത്തെ ബജറ്റില്‍ ധനകാര്യ മന്ത്രി പ്രഖ്യാപിച്ച പദ്ധതികള്‍ക്കാണ് സര്‍ക്കാര്‍ ഉത്തരവിലൂടെ തുക അനുവദിച്ചതെന്നും പദ്ധതികള്‍ യാഥാര്‍ഥ്യമാക്കാന്‍ അടിയന്തര നടപടി സ്വീകരിക്കാന്‍ പൊതുമരാമത്ത് വകുപ്പ് ഉദ്യോഗസ്ഥര്‍ക്ക് നിര്‍ദേശം നല്‍കിയതായും എംഎല്‍എ അറിയിച്ചു.

വടകരയില്‍ വാഹന പരിശോധന: നിരവധി വാഹനങ്ങള്‍ക്ക് പിഴയിട്ടു

വടകര: ആര്‍ടിഒയുടെ നിര്‍ദേശപ്രകാരം വടകരയില്‍ നടത്തിയ പ്രത്യേക വാഹനപരിശോധനയില്‍ നിയമം ലംഘിച്ച് വാഹനമോടിച്ചവര്‍ക്കെതിരേ നടപടി സ്വീകരിച്ചു. ടാക്‌സും ഫിറ്റ്നസ് സര്‍ട്ടിഫിക്കറ്റും ഇന്‍ഷൂറന്‍സും ഇല്ലാതെ വാഹനമോടിക്കല്‍, നമ്പര്‍ പ്ലേറ്റ് പ്രദര്‍ശിപ്പിക്കാതിരിക്കല്‍, നിരോധിത എയര്‍ ഹോണ്‍ തുടങ്ങിയ നിയമലംഘനങ്ങള്‍ക്കെതിരെയാണ് നടപടിയെടുത്തത്. ഹെല്‍മറ്റ് ഇല്ലാതെ യാത്ര ചെയ്ത 10 ഇരുചക്രവാഹന യാത്രക്കാരില്‍ നിന്ന് പിഴ ഈടാക്കി. ഹസാര്‍ഡ് ഗുഡ്സ് കൊണ്ടുപോകുന്ന വാഹനങ്ങള്‍ പരിശോധിച്ചതില്‍ ക്രമക്കേടുകള്‍ കണ്ടെത്തി. ഇത്തരം അഞ്ചു വാഹനങ്ങള്‍ക്കെതിരേയും നടപടി സ്വീകരിച്ചു. റോഡ് നികുതി ഇല്ലാതെയും ഫിറ്റ്നസ് സര്‍ട്ടിഫിക്കറ്റ് കൃത്യമായി പ്രദര്‍ശിപ്പിക്കാതെയും സര്‍വ്വീസ് നടത്തിയ റോഡ് നിര്‍മാണ കമ്പനിയുടെ വാഹനങ്ങള്‍ക്കെതിരെയും പിഴ ചുമത്തി. സര്‍വ്വീസ് നിര്‍ത്തിവയ്ക്കാനുള്ള നിര്‍ദേശവും നല്‍കിയിട്ടുണ്ട്. വരും ദിവസങ്ങളിലും പരിശോധന തുടരുമെന്ന് വടകര ആര്‍ടിഒ പി.രാജേഷ് അറിയിച്ചു.

അജ്ഞാത ജീവിയുടെ ആക്രമണത്തിൽ വളർത്തു നായക്ക് പരിക്ക്

കൂമ്പാറ: കൂമ്പാറ ചങ്ങാത്തൊടിയിൽ ബാബുവിന്‍റെ വളർത്തു നായയ്ക്ക് അജ്ഞാത ജീവിയുടെ ആക്രമണത്തിൽ പരിക്കേറ്റു. കഴിഞ്ഞദിവസം രാത്രിയാണ് സംഭവം. പുലിയാണോ എന്ന് സംശയിക്കുന്ന തരത്തിലാണ് ആക്രമണം. വളർത്തുന്നായയെ കക്കാടംപൊയിൽ മൃഗാശുപത്രിയിൽ എത്തിച്ചു പരിശോധന നടത്തിയപ്പോൾ പുലിയുടേതായ ആക്രമണ ശൈലിയാണ് നായയുടെ ശരീരത്തിൽ ഉള്ളതെന്ന് മൃഗഡോക്ടർ പറഞ്ഞു. സ്ഥലത്തെത്തിയ ആര്‍ആർടി സംഘം പുലിയുടെ ആക്രമണം ആണെന്നും പ്രദേശത്ത് ക്യാമറ സ്ഥാപിക്കുമെന്നും പറഞ്ഞു. ഈ പ്രദേശങ്ങളിൽ വന്യജീവികളുടെ ആക്രമണം പെരുകി വരുകയാണ്. കഴിഞ്ഞ ദിവസങ്ങളിൽ വിവിധ രാഷ്ട്രീയ കക്ഷി നേതാക്കൾ ഈ പ്രദേശങ്ങളിൽ സന്ദർശിക്കുകയും പ്രതിഷേധിക്കുകയും ചെയ്തിരുന്നു.

സാം തോമസിന് സ്നേഹാദരം

കോഴിക്കോട്: അരനൂറ്റാണ്ടിലേറെയായി മലയാള നാടകവേദിയിൽ സജീവ സാന്നിധ്യമായ സാം തോമസിനെ സുഹൃദ്സംഘം ആദരിക്കുന്നു. പ്രൈമറി സ്കൂൾ കാലം തൊട്ട് നാടകങ്ങളിൽ അഭിനയിച്ചു തുടങ്ങിയ സാം തോമസ് 1958 മുതൽ ദേവഗിരി സെന്‍റ് ജോസ്ഫ്സ് കോളജിൽ ഹോസ്റ്റൽ വിഭാഗത്തിൽ അക്കൗണ്ടന്‍റാണ്. നാടകരചയിതാവ്, നടൻ, സംവിധായകൻ, ഗായകൻ എന്നീ നിലകളിൽ കോഴിക്കോടൻ നാടകവേദിക്ക് സുപരിചിതനായ സാം തോമസ് ഏതാനും ചലച്ചിത്രങ്ങളിലും അഭിനയിച്ചിട്ടുണ്ട്. ഇന്ന് വൈകുന്നേരം 4.30 ന് കോഴിക്കോട് ചാവറ കൾചറൽ സെന്‍ററിൽ നടക്കുന്ന സുഹൃദ് സമ്മേളനം പ്രമുഖ മലയാള സിനിമാ സംവിധായകൻ വി.എം. വിനു ഉദ്ഘാടനം ചെയ്യും. കലാഭവൻ പ്രസിഡന്‍റ് ഫാ. ചെറിയാൻ കുനിയന്തോടത്ത് പൊന്നാട അണിയിക്കും.

മണ്ണിടിച്ചിൽ: പൂഴിത്തോട്ടിൽ തകർന്ന് കൃഷിയിടങ്ങൾ

പൂഴിത്തോട്: ഇന്നലെ പുലർച്ചെയുണ്ടായ കനത്ത മഴയെ തുടർന്ന് ചക്കിട്ടപാറ പഞ്ചായത്ത് നാലാം വാർഡിൽ പെട്ട പൂഴിത്തോട്ടില ഇന്ദിര പുത്തൻപുരയിൽ, ദേവി കുന്നത്ത് എന്നിവരുടെ കൃഷിയിടത്തിൽ ഉരുൾപൊട്ടലിനു സമാനമായ രീതിയിലുണ്ടായ കനത്ത മണ്ണ് ഇടിച്ചിലിൽ വൻ കൃഷി നാശം. കൊക്കോ, റബ്ബർ, കുരുമുളക്, കമുങ്ങ്, പ്ലാവ് എന്നീ കാർഷിക വിളകളാണ് നശിച്ചത്. രണ്ടു പേർക്കും കൂടി ഒരേക്കർ സ്ഥലമാണുണ്ടായിരുന്നത്‌. ഇതിൽ ഭൂരിഭാഗവും നശിച്ചു. അജേഷ് മണിമലക്കുന്നേൽ, മാത്യു കുംബ്ലാനിക്കൽ, ബാബു പൊട്ടനാനിക്കൽ, സേവ്യർ പതിപ്പള്ളിൽ, ത്രേസ്യാമ്മ മുണ്ടക്കൽ, ജോൺസൺ കാരിക്കനാൽ എന്നിവരുടെ വീടുകളുടെ പിൻ വശങ്ങളിലും അപകട ഭീഷണി ഉയർത്തുന്ന വിധത്തിൽ മണ്ണിടിച്ചിൽ സംഭവിച്ചിട്ടുണ്ട്. പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർമാൻ സി.കെ. ശശി, കൃഷി ഓഫീസർ രശ്മ നായർ, അസിസ്റ്റന്‍റ് കൃഷി ഓഫീസർ കെ. ഗിരീഷ് കുമാർ, കൃഷി അസിസ്റ്റന്‍റ് ഇ. ലിനൂപ് എന്നിവർ സംയുക്തമായി നാശമുണ്ടായ കൃഷിയിടങ്ങൾ സന്ദർശിച്ചു. നാശനഷ്ടം നേരിട്ടവർക്ക് സാമ്പത്തിക സഹായം നൽകണമെന്ന് വാർഡ് മെമ്പർ കൂടിയായ സി.കെ.ശശി ആവശ്യപ്പെട്ടു.

പുല്ലൂരാംപാറ സെന്‍റ് ജോസഫ്സ് ഹൈസ്കൂൾ ജൂബിലി നിറവിൽ

പുല്ലൂരാംപാറ: അരനൂറ്റാണ്ടു കാലമായി തലയുയർത്തി നിൽക്കുന്ന പുല്ലുരാംപാറ സെന്‍റ് ജോസഫ്സ് ഹൈസ്കൂൾ സുവർണ ജൂബിലിയിലേക്ക്. ജൂബിലി ആഘോഷങ്ങളുടെ ഉദ്ഘാടനം ഇന്ന് 9.30 ന് ഹൈസ്കൂൾ പരിസരത്ത് നിന്ന് ആരംഭിക്കുന്ന വിളംബരജാഥയോടെ നടക്കും. ആദ്യകാല ഗുരുക്കന്മാരും 50 ബാച്ചുകളിലെയും പ്രതിനിധികളും തിരികത്തിച്ചു നൽകും. ലിന്‍റോ ജോസഫ് എംഎൽഎ ഭദ്ര ദീപം തെളിക്കുന്നതോടു ഒരു വർഷം നീണ്ടു നിൽക്കുന്ന ജൂബിലി ആഘോഷങ്ങൾക്ക് തുടക്കം കുറിക്കും. പഞ്ചായത്ത്‌ പ്രസിഡന്‍റ് ബിന്ദു ജോൺസൺ, കോർപറേറ്റ് മാനേജർ ഫാ. ജോസഫ് വർഗീസ് പാലക്കാട്ട്, സ്കൂൾ മാനേജർ ഫാ. കുര്യാക്കോസ് മുകാല, എച്ച്എം ജോളി ഉണ്ണിയേപ്പിള്ളിൽ തുടങ്ങിയവർ പങ്കെടുക്കും.

ശക്തമായ മഴ: രാത്രി മുഴുവന്‍ മുള്‍മുനയിലായി വിലങ്ങാട്

നാദാപുരം: ശക്തമായ മഴയില്‍ പുഴ കരകവിഞ്ഞൊഴുകി വിലങ്ങാട്, നാദാപുരം മേഖലകളില്‍ വ്യാപക നാശം. വ്യാഴാഴ്ച രാവിലെ മുതല്‍ നാദാപുരം മേഖലയില്‍ മഴ തിമര്‍ത്ത് പെയ്തതോടെ താഴ്ന്ന പ്രദേശങ്ങളില്‍ വെളളം കയറി. വിലങ്ങാട് മലയോരത്തെ ശക്തമായ മഴയില്‍ മയ്യഴി പുഴയുടെ ഉത്ഭവ കേന്ദ്രമായ പുല്ലുവപുഴയിലും മലയങ്ങാട് പുഴയിലും ശക്തമായ ഒഴുക്കായിരുന്നു. വിലങ്ങാട് ടൗണ്‍ പാലത്തിലും വായാട് ഉന്നതി റോഡിലെ വായാട് പാലത്തിനും മുകളിലൂടെ വെളളം ഒഴുകിയതോടെ നാട്ടുകാര്‍ പരിഭ്രാന്തിയിലായി. കഴിഞ്ഞ ജൂലൈ 30 നാണ് നാടിനെ നടുക്കി വിലങ്ങാട് ഉരുള്‍പൊട്ടലുണ്ടായത്. രാത്രിയില്‍ പുഴ കരകവിഞ്ഞൊഴുകിയതോടെ പ്രയാസം അനുഭവിക്കുന്നവര്‍ വിലങ്ങാട് പാരിഷ് ഹാളിലെത്തണമെന്ന മുന്നറിയിപ്പും നല്‍കിയിരുന്നു. വായാട് പാലത്തിന്‍റെ അപ്രോച്ച് റോഡ് പുഴയിലെ കുത്തൊഴുക്കില്‍ ഒലിച്ച് പോയി. അപ്രോച്ച് റോഡ് തകര്‍ന്നതോടെ ഇരുചക്രവാഹനങ്ങള്‍ മാത്രമേ പാലത്തിലൂടെ കടത്തി വിടുന്നുളളു. വിഷ്ണു മംഗലം ബണ്ട് കരകവിഞ്ഞതോടെ പെരുവങ്കര, ചെറുമോത്ത്, വിഷ്ണുമംഗലം, ഈയ്യങ്കോട് ഭാഗങ്ങളിലും നാദാപുരം പോലീസ് സ്റ്റേഷന് സമീപത്തെ മുത്താറിക്കുനി ഭാഗങ്ങളിലെ വീടുകളിലും വെളളം കയറി. രാത്രി പതിനൊന്ന് മണിയോടെ നാദാപുരം കസ്തൂരി കുളത്തെ പാലേരി റഷീദിന്‍റെ മുപ്പത് മീറ്ററോളം നീളത്തിലുളള വീട്ടുമതിലും മഴയില്‍ തകര്‍ന്ന് വീണു. നാദാപുരം പോലീസും ഫയര്‍ ഫോഴ്സും സ്ഥലത്തെത്തി നാട്ടുകാരുടെ സഹായത്തോടെ മണ്ണ് മാറ്റി ആളുകള്‍ മണ്ണിനടിയില്‍ പെട്ടിട്ടില്ലെന്ന് ഉറപ്പ് വരുത്തി. പല ഭാഗങ്ങളിലും മരങ്ങള്‍ കടപുഴകി വീണ് വൈദ്യുതി തൂണുകളും ലൈനുകളും തകര്‍ന്നു. വളയത്ത് വീട് തകർന്നു നാദാപുരം: ശക്തമായ മഴയിൽ വളയത്ത് വീട് തകർന്നു. വളയം ചാലിയാട്ട് പൊയിൽ കിണറ്റിൽ പിലാവുള്ള പറമ്പത്ത് കണ്ണന്‍റെ വീടിന്‍റെ മേൽക്കൂരയുടെ ഒരു ഭാഗമാണ് ബുധനാഴ്ച്ച രാത്രി തകർന്ന്വീണത്. സംഭവം നടക്കുമ്പോൾ വീട്ടിൽ ആളുകളുണ്ടായിരുന്നെങ്കിലും പരിക്കേൽക്കാതെ രക്ഷപ്പെട്ടു.നൂറിലേറെ ഓടുകൾ തകർന്നു. പഞ്ചായത്ത് പ്രസിഡന്‍റ് കെ.പി. പ്രദീഷിന്‍റെ നേതൃത്വത്തിൽ ജനപ്രതിനിധികൾ സ്ഥലം സന്ദർശിച്ചു. വീടിന്‍റെ ചുമർ ഇടിഞ്ഞു വീണു താമരശേരി: കനത്ത മഴയിൽ വീടിന്‍റെ ചുമർ ഇടിഞ്ഞു വീണു. പുതുപ്പാടി പഞ്ചായത്തിലെ പെരുമ്പള്ളി ആനപ്പാറപ്പൊയിൽ രാധയുടെ വീടിന്‍റെ പിൻഭാഗമാണ് തകർന്നത്. രാധയും മൂന്നു മക്കളുമാണ് വീട്ടിൽ താമസം. മൺ കട്ടകൾക്കൊണ്ട് മലമുകളിൽ നിർമിച്ച വീടിന്‍റെ അടുക്കള ഭാഗം തകർന്നതോടെ താമസ യോഗ്യമല്ലാതെയായി. ഇതേ തുടർന്ന് ഇവർ മകളുടെ വീട്ടിലേക്ക് മാറിയിരിക്കുകയാണ്. അടച്ചുറപ്പുള്ള ഒരു വീടിനായി പലതവണ ലൈഫ് പദ്ധതിയിൽ അപേക്ഷ നൽകിയെങ്കിലും ഇതുവരെ പരിഗണിച്ചില്ലെന്ന് ഇവർ പറയുന്നു. വീടിന് പിന്നിലെ തിണ്ടിടിഞ്ഞു കൂരാച്ചുണ്ട്: കനത്ത മഴയിൽ വീടിന് പിന്നിലെ തിണ്ടിടിഞ്ഞ് വീടിന് ഭീഷണി.കൂരാച്ചുണ്ട് പഞ്ചായത്ത് പന്ത്രണ്ടാം വാർഡ് കൈതക്കൊല്ലി മ ൂന്നാംമുക്ക് മേഖലയിൽ താമസിക്കുന്ന വാളിയാംപ്ലാക്കൽ ജോബിയുടെ വീടിന്‍റെ പിൻഭാഗമാണ് ഇടിഞ്ഞത്. ഇവിടെയുണ്ടായിരുന്ന മരം വീടിന് മുകളിൽ വീണ് മേൽക്കൂരയുടെ ഓടിനും നാശം സംഭവിച്ചിട്ടുണ്ട്. തലയാട് ഭാഗങ്ങളിൽ മണ്ണിടിച്ചിൽ ബാലുശേരി: തലയാട്, ചിടികുഴി, ചുരുക്കൻ കാവ് ഭാഗങ്ങളിൽ കനത്ത മഴയിൽ മണ്ണിടിച്ചിൽ. പനങ്ങാട് പഞ്ചായത്തിന്‍റെയും കാന്തലാട് വില്ലേജിന്‍റെയും ശക്തമായ മുന്നറിയിപ്പുകൾ ഉണ്ടായിരുന്നതിനെത്തുടർന്ന് ആളുകളെ മാറ്റിപ്പാർപ്പിച്ചിരുന്നു. ആയതിനാൽ വൻ അപകടം ഒഴിവായി.പ്രദേശത്ത് കൃഷി നാശം ഉണ്ടായിട്ടുണ്ട്. മഴ കനത്താൽ ഇനിയും ഈ പ്രദേശത്ത് മണ്ണിടിയാൻ സാധ്യതയുണ്ട്. അടിയന്തരമായി സർക്കാർ ഇടപെടണമെന്ന് പ്രദേശവാസികൾ പറഞ്ഞു.

കണ്ണോത്ത് സെന്‍റ് ആന്‍റണീസ് ഹൈസ്കൂൾ ജൂബിലി നിറവിൽ

കോഴിക്കോട്: കണ്ണോത്ത് സെന്‍റ് ആന്‍റണീസ് ഹൈസ്കൂൾ സുവർണ ജൂബിലി വർഷത്തിൽ പ്രവേശിച്ചു. ജൂബിലി പ്രവർത്തനങ്ങളുടെ പ്രാരംഭമായി 12 അംഗ കോർ കമ്മിറ്റി രൂപീകരണം നടന്നു. സ്കൂൾ മാനേജർ ഫാ. സെബാസ്റ്റ്യൻ പുളിക്കലിന്‍റെ നേതൃത്വത്തിൽ നടന്ന കോർ കമ്മിറ്റി രൂപീകരണ യോഗത്തിൽ സ്കൂൾ മാനേജ്മെന്‍റ്, പിടിഎ, അധ്യാപക- അനധ്യാപക പ്രതിനിധികൾ പങ്കെടുത്തു. സ്കൂൾ മാനേജർ ഫാ. സെബാസ്റ്റ്യൻ പുളിക്കൽ ചെയർമാനും സ്കൂൾ അസിസ്റ്റന്‍റ് മാനേജർ ഫാ. എബിൻ മാടശേരി വൈസ് ചെയർമാനും ഹെഡ്മാസ്റ്റർ റോഷിൻ മാത്യു കൺവീനറും സ്റ്റാഫ് സെക്രട്ടറി സി. അന്നമ്മ തോമസ് ട്രഷററുമായാണ് കമ്മിറ്റി രൂപീകരിച്ചത്. 24ന് ഉച്ചയ്ക്ക് 2.30 ന് വിപുലമായ സ്വാഗത സംഘം രൂപീകരിക്കുവാൻ തീരുമാനിച്ചു. കണ്ണോത്തിന്‍റെ അക്ഷര വെളിച്ചമായി 1976 ജൂൺ മാസത്തിലാണ് വിദ്യാലയം സ്ഥാപിതമാകുന്നത്.

പിക്കപ്പ് വാൻ പാലത്തിന്‍റെ കൈവരിയിൽ ഇടിച്ചു തകർന്നു ; മൂന്ന് പേർക്ക് പരിക്ക്

നാദാപുരം: വിഷ്ണുമംഗലം പുഴയുടെ പാലത്തിന്‍റെ കൈവരിയിൽ നിയന്ത്രണംവിട്ട പിക്കപ്പ് വാൻ ഇടിച്ചു കയറി തകർന്നു. വ്യാഴാഴ്ച്ച പുലർച്ചെയാണ് അപകടം. കല്ലാച്ചി ഭാഗത്ത് നിന്ന് വളയം ഭാഗത്തേക്ക് പോവുകയായിരുന്ന വാനാണ് അപകടത്തിൽപെട്ടത്. വളയം സ്വദേശികളായ ചെക്കോറ്റ അശ്വന്ത് (26), ചെക്കോറ്റ ജിഷ്ണുജിത്ത് (22), ചെറ്റക്കണ്ടി മണത്തണേമ്മൽ അശ്വിൻ (26) എന്നിവർക്കാണ് പരിക്കേറ്റത്. വാനിന്‍റെ മുൻഭാഗവും പാലത്തിന്‍റെ കൈവരിയും തകർന്നു. മലയോരത്ത് പെയ്ത കനത്ത മഴയിൽ പുഴ നിറഞ്ഞൊഴുകുന്ന അവസ്ഥയിലായിരുന്നു. വിഷ്ണുമംഗലം ബണ്ടിന്‍റെ മുകളിൽക്കൂടി പോകുന്ന പാലത്തിൽ നിന്ന് വാഹനം താഴെ വീഴാതിരുന്നതിനാൽ വൻദുരന്തം ഒഴിവായി. വളയം പോലീസും, ഫയർ ഫോഴ്സും സ്ഥലത്തെത്തി അപകടത്തിൽപെട്ട വാൻ നീക്കിയാണ് ഗതാഗതം പുന:സ്ഥാപിച്ചത്.

സ്വച്ഛ് സര്‍വേക്ഷന്‍ സര്‍വേ : കോഴിക്കോട് കോര്‍പറേഷനും പയ്യോളി നഗരസഭക്കും നേട്ടം

കോഴിക്കോട്: കേന്ദ്ര പാര്‍പ്പിട നഗരകാര്യ മന്ത്രാലയം നടത്തുന്ന രാജ്യത്തെ ഏറ്റവും വലിയ ശുചിത്വ സര്‍വേയായ സ്വച്ഛ് സര്‍വേക്ഷന്‍ 2024ല്‍ മികച്ച നേട്ടവുമായി കോഴിക്കോട് കോര്‍പറേഷനും പയ്യോളി നഗരസഭയും. രാജ്യത്തെ 4,852 തദ്ദേശ സ്ഥാപനങ്ങള്‍ പങ്കെടുത്ത മത്സരത്തില്‍ കോഴിക്കോട് കോര്‍പറേഷന്‍ 70-ാം റാങ്കിലെത്തി. 2023ല്‍ 3,367 ആയിരുന്നു കോര്‍പറേഷന്‍റെ സ്ഥാനം. 2016 മുതല്‍ കേന്ദ്രസര്‍ക്കാര്‍ നടത്തിവരുന്ന സര്‍വേയില്‍ 1000ത്തില്‍ താഴെ റാങ്കിലേക്ക് കേരളത്തിലെ ഒരു നഗരസഭയും ഇതുവരെ എത്തിയിരുന്നില്ല. "ഗാര്‍ബേജ് ഫ്രീ സിറ്റി' വണ്‍ സ്റ്റാര്‍ റാങ്കിങ്ങില്‍ സംസ്ഥാനത്തുനിന്ന് തെരഞ്ഞെടുക്കപ്പെട്ട 20 നഗരങ്ങളില്‍ പയ്യോളി നഗരസഭയും ഇടം പിടിച്ചു. ആദ്യമായാണ് സര്‍വേക്ഷനിലെ പ്രധാന ഘടകമായ ഗാര്‍ബേജ് ഫ്രീ സിറ്റീസ് സ്റ്റാര്‍ റേറ്റിങ്ങില്‍ സംസ്ഥാനത്തെ നഗരസഭകള്‍ സ്ഥാനം പിടിക്കുന്നത്. സ്വച്ഛ് സര്‍വേഷനില്‍ കഴിഞ്ഞ വര്‍ഷം 3,707-ാം റാങ്കിലായിരുന്ന പയ്യോളി ഇത്തവണ 596-ാം സ്ഥാനത്തെത്തി. 2024 സര്‍വേക്ഷനില്‍ കൂടുതല്‍ മികവ് പുലര്‍ത്താനായി ശുചിത്വ മിഷന്‍റെ നേതൃത്വത്തില്‍ എല്ലാ നഗരസഭകളിലും സ്വച്ഛ് സര്‍വേക്ഷന്‍ പ്രീ അസസ്മെന്‍റ് നടത്തിയിരുന്നു. ഈ പരിശോധനയില്‍ കണ്ടെത്തിയ പോരായ്മകള്‍ പരിഹരിച്ചതും റാങ്കില്‍ മുന്നേറാന്‍ സഹായകമായി.

ട്രാക്ടര്‍ മറിഞ്ഞ് ഡ്രൈവര്‍ മരിച്ചു

താമരശേരി: പുതുപ്പാടി ഗവ. സ്വീഡ് ഫാമില്‍ നിലം ഉഴുത് മറിക്കുന്നതിനിടെ ട്രാക്ടര്‍ മറിഞ്ഞ് ഫാം ട്രാക്ടര്‍ ഡ്രൈവര്‍ മരിച്ചു. മലപുറം വളഞ്ഞപാറ ഞാറ്റുംപറമ്പില്‍ ഹരിദാസന്‍ (52) ആണ് മരിച്ചത്. ഇന്നലെ രാവിലെ 10.30 ഓടെയാണ് അപകടം. നിലം ഉഴുത് മറിക്കുന്നതിനിടെ തലകീഴായി മറിഞ്ഞ ട്രാക്ടറിനടിയില്‍ കുടുങ്ങിയ ഹരിദാസനെ സഹ തൊഴിലാളികള്‍ രക്ഷിക്കാന്‍ ശ്രമിച്ചെങ്കിലും ചെളിയില്‍ കുടുങ്ങുകയായിരുന്നു. പിന്നീട് നാട്ടുകാരും തൊഴിലാളികളും ചേര്‍ന്ന് ഏറെ പണിപെട്ട് ഹരിദാസിനെ പുറത്തെടുത്തപ്പോഴേക്കും മരണം സംഭവിച്ചിരുന്നു. പരേതരായ കരിയാത്തൻ-കൊല്ലായി ദമ്പതിമാരുടെ മകനാണ് ഹരിദാസൻ. ഭാര്യ: സുലോചന (ആശാവർക്കർ). മക്കൾ: അരുൺ ഹരിദാസ്, ഹിരൺ ഹരിദാസ്. സഹോദരങ്ങൾ: ശാരദ, സൗമിനി, പരേതനായ ശശി.

ഡാം റിസർവോയർ മേഖലയിൽ സന്ദർശകർക്ക് നിയന്ത്രണം

കൂരാച്ചുണ്ട്: കരിയാത്തുംപാറ, കക്കയം മേഖലകളിൽ വ്യാപിച്ചുകിടക്കുന്ന പെരുവണ്ണാമൂഴി ഡാം റിസർവോയർ മേഖലകളിൽ വിനോദസഞ്ചാരികൾക്ക് നിയന്ത്രണങ്ങൾ ഏർപ്പെടുത്താൻ തീരുമാനം. ഗ്രാമപഞ്ചായത്തിന്‍റെ നേതൃത്വത്തിൽ കക്കയം എംവൈസി ഹാളിൽ ചേർന്ന സർവകക്ഷി യോഗത്തിലാണ് തീരുമാനം. ഒരാഴ്ച മുമ്പ് കക്കയം മേഖലയിലെ ഡാം റിസർവോയറിൽ യുവാവ് മുങ്ങി മരിച്ച സംഭവത്തെ തുടർന്നാണ് കൂടുതൽ നിയന്ത്രണങ്ങൾ ഏർപ്പെടുത്തുന്നത്. അപകട സാധ്യതകൾ ഏറെയുള്ള ഇവിടങ്ങളിൽ പ്രവേശനം നിരോധിച്ചിട്ടുണ്ടെങ്കിലും സന്ദർശകർ ഇവയൊന്നും വകവയ്ക്കാതെ വെള്ളത്തിൽ ഇറങ്ങുകയും അപകടത്തിൽ പെടുകയും ചെയ്യുന്നത് തുടർ സംഭവമായി മാറുന്നുണ്ട്. എന്നാൽ നാട്ടുകാർ സന്ദർശകരെ പുഴയിൽ ഇറങ്ങുന്നത് സംബന്ധിച്ച് മുന്നറിയിപ്പ് നൽകിയാൽ അവയെല്ലാം അവഗണിക്കുകയാണ് ചെയ്യുന്നത്. ഇതിനു പരിഹാരം കാണുന്നതിനായി റിസർവോയർ മേഖലകളിൽ പ്രവേശിക്കുന്നത് നിരോധിച്ചുകൊണ്ടുള്ള മുന്നറിയിപ്പ് ബോർഡുകൾ കൂടുതൽ സ്ഥലങ്ങളിൽ സ്ഥാപിക്കാൻ സർവ്വകക്ഷി യോഗം തീരുമാനിച്ചു. കൂടാതെ ഒന്പതംഗ കമ്മിറ്റിയും രൂപീകരിച്ചു. ഈ വിഷയം സംബന്ധിച്ച് ഗ്രാമപഞ്ചായത്ത് ബോർഡിൽ പ്രത്യേക അജണ്ട വെച്ച് തീരുമാനമെടുക്കാനും എംഎൽഎയുമായി ചർച്ച ചെയ്തു കൂടുതൽ ഗൈഡുമാരെ നിയമിക്കുന്നതിനുള്ള നടപടികൾ സ്വീകരിക്കാനും തീരുമാനിച്ചു. പഞ്ചായത്ത് പ്രസിഡന്‍റ് ഒ.കെ.അമ്മദ് അധ്യക്ഷത വഹിച്ചു. വാർഡ് മെമ്പർ ഡാർലി ഏബ്രഹാം, ആൻഡ്രൂസ് കട്ടിക്കാന, മുജീബ് കൊട്ടോല, വിപിൻ പാറക്കൽ, അരുൺ പാറക്കൽ, മേരി സണ്ണി, വിപിൻ ജോസ്, ജാനേഷ് കല്ലക്കുടി, നിപിൻ ഐകുളമ്പിൽ എന്നിവർ പ്രസംഗിച്ചു. പത്രോസ് പന്നിവെട്ടുപറമ്പിൽ (കൺവീനർ), മുജീബ് കോട്ടോല (ചെയർമാൻ) ആയി ഒന്പതംഗ കമ്മിറ്റി രൂപീകരിച്ചു.

കൊടിയത്തൂരിൽ കിടപ്പു രോഗികൾ ഉൾപ്പെടെയുള്ളവർക്ക് വീട്ടിലെത്തി പെൻഷൻ മസ്റ്ററിംഗ്

മുക്കം: കൊടിയത്തൂർ പഞ്ചായത്തിലെ രണ്ടാം വാർഡിൽപെട്ട പെൻഷൻ ഗുണഭോക്താക്കൾക്ക് വീടുകളിലെത്തി പെൻഷൻ മസ്റ്ററിംഗ് ചെയ്ത് കൊടുത്ത് വാർഡ് മെമ്പറുടെ മാതൃക. രണ്ടാം വാർഡ് മെമ്പർ വി. ഷംലൂലത്തിന്‍റെ നേതൃത്വത്തിലാണ് സാമൂഹ്യ സുരക്ഷ - ക്ഷേമനിധി പെൻഷനുകൾ വാങ്ങുന്നവർക്കായി ചെറുവാടി അക്ഷയ സെന്‍ററിന്‍റെ സഹകരണത്തോടെ മസ്റ്ററിംഗ് സൗകര്യമൊരുക്കിയത്. നിലവിൽ കൊടിയത്തൂരിൽ അക്ഷയ സെന്‍റർ ഇല്ലാത്തതിനാൽ ചെറുവാടി - നെല്ലിക്കാപറമ്പ് തുടങ്ങിയ അക്ഷയ സെന്‍ററുകളിലെത്തി ഏറെ നേരം കാത്തിരിക്കേണ്ട അവസ്ഥയായിരുന്നു. എന്നാൽ വീടുകളിലെത്തി മസ്റ്ററിംഗ് ചെയ്ത് നൽകിയതോടെ ഭിന്നശേഷിക്കാർ, കിടപ്പു രോഗികൾ, വയോധികർ തുടങ്ങി വിവിധ കാരണങ്ങൾ കൊണ്ട് വീടിന് പുറത്തിറങ്ങാൻ പറ്റാത്തവർ ഉൾപ്പെടെ മുഴുവൻ പെൻഷൻ ഗുണഭോക്താക്കൾക്കും വലിയ ആശ്വാസമായി. 2024 ഡിസംബർ 31 വരെ സാമൂഹ്യ സുരക്ഷാ/ക്ഷേമനിധി ബോർഡ്‌ പെൻഷൻ ലഭിക്കുന്ന എല്ലാ ഗുണഭോക്താക്കളും വാർഷിക മാസ്റ്ററിംഗ് പൂർത്തീകരിക്കേണ്ടതുണ്ടെന്ന സർക്കാർ ഉത്തരവ് ഗുണഭോക്താതാക്കൾക്ക് വലിയ പ്രയാസമാണ് സൃഷ്ടിച്ചിരുന്നത്. വീട്ടിൽ നിന്ന് പുറത്തിറങ്ങാൻ പോലും പറ്റാത്തവർക്ക് അക്ഷയ കേന്ദ്രങ്ങളിൽ പോയി മസ്റ്ററിംഗ് നടത്താൻ കഴിയാത്ത അവസ്ഥയായിരുന്നു. ഇങ്ങനെ പ്രയാസപ്പെടുന്ന അവസ്ഥയിലാണ് തന്‍റെ വാർഡിലെ ഗുണഭോക്താക്കൾക്കായി വീടുകളിലെത്തി മസ്റ്ററിംഗ് സൗകര്യമൊരുക്കിയതെന്ന് വാർഡ് മെമ്പർ വി. ഷംലൂലത്ത് പറഞ്ഞു. നിലവിൽ 80 ശതമാനം പേരാണ് മസ്റ്ററിംഗ് പൂർത്തിയാക്കിയത്. ബാക്കിയുള്ളവരുടേത് വരും ദിവസം ഗുണഭോക്താക്കളുടെ വീട്ടിലേക്ക് നേരിട്ട് എത്തി തന്നെ പൂർത്തിയാക്കുമെന്നും ഷംലൂലത്ത് പറഞ്ഞു.

തുഷാരഗിരിയിൽ ബ്രഷ് സ്ട്രോക്ക്സ് നടത്തി

കോടഞ്ചേരി: 24 മുതൽ 27 വരെ തുഷാരഗിരിയിൽ ചാലിപ്പുഴയിലും ഇരുവഞ്ഞിപ്പുഴയിലും നടക്കുന്ന മലബാർ റിവർ ഫെസ്റ്റിവലിന്‍റെ ഭാഗമായി സംഘടിപ്പിച്ച കയാക്കിംഗ് ബ്രഷ് സ്ട്രോക്ക്സ് 2025 ചിത്രകാരൻ കെ.ആർ. ബാബു ഉദ്ഘാടനം ചെയ്തു. കോടഞ്ചേരി പഞ്ചായത്തും കേരള ചിത്രകലാ പരിഷത്തും സംയുക്തമായാണ് പരിപാടി സംഘടിപ്പിച്ചത്. കോടഞ്ചേരി പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി, കേരള ചിത്രകലാ പരിഷത്ത് പ്രസിഡന്‍റ് സി.കെ. ഷിബുരാജ്, സെക്രട്ടറി ഷാജു നെരവത്ത്, തുഷാരഗിരി ഡിടിപിസി സെനറ്റർ മാനേജർ ഷെല്ലി മാത്യു എന്നിവർ പ്രസംഗിച്ചു. 35 ചിത്രകലയുമായി ബന്ധപ്പെട്ട ആർട്ടിസ്റ്റുകൾ പങ്കെടുത്തു.

വിദ്യാരംഗം കലാസാഹിത്യവേദി ഉദ്ഘാടനം ചെയ്തു

കൂടരഞ്ഞി: മരഞ്ചാട്ടി മേരിഗിരി ഹൈസ്കൂളിലെ വിദ്യാരംഗം കലാസാഹിത്യവേദിയുടെയും വിവിധ ക്ലബുകളുടെയും ഉദ്ഘാടനം നടത്തി. പ്രശസ്ത നാടൻപാട്ട് കലാകാരനും സിനിമ നാടക ഗായകനുമായ എം.ജി. ഭാസ്കരൻ പരിപാടി ഉദ്ഘാടനം ചെയ്തു. സ്കൂൾ മാനേജർ ഫാ. ജോർജ് നരിവേലിൽ അധ്യക്ഷത വഹിച്ചു. മനോജ് തോമസ്, എഞ്ചൽ മരിയ ജോളി, ഷിബിൽ ജോസ് എന്നിവർ പ്രസംഗിച്ചു. വേനൽ അവധിക്കാലത്ത് രക്ഷിതാക്കൾക്കും കുട്ടികൾക്കുമായി നടത്തിയ വിവിധ മത്സരങ്ങൾക്കുള്ള സമ്മാനങ്ങൾ വിതരണം ചെയ്തു. ചടങ്ങിൽ കുട്ടികളുടെ വിവിധ കലാപരിപാടികൾ ശ്രദ്ധേയമായി.

പ്രവാസി കേരളീയ ക്ഷേമ ബോര്‍ഡ് അംഗത്വ കാമ്പയിന്‍

കോഴിക്കോട്: കേരള പ്രവാസി കേരളീയ ക്ഷേമ ബോര്‍ഡിന്‍റെ ആഭിമുഖ്യത്തില്‍ നാളെ രാവിലെ പത്തിന് കോഴിക്കോട് കളക്ടറേറ്റ് കോണ്‍ഫറന്‍സ് ഹാളില്‍ അംഗത്വ കാമ്പയിനും അംശദായ കുടിശിക നിവാരണവും സംഘടിപ്പിക്കും. 18നും 60നും ഇടയില്‍ പ്രായമുള്ള, രണ്ടുവര്‍ഷം പ്രവാസജീവിതം നയിച്ചവര്‍ക്ക് പ്രവാസി ക്ഷേമനിധിയില്‍ അംഗമാകാം. ക്ഷേമനിധിയില്‍ അംഗത്വമെടുത്ത് അംശദായത്തില്‍ കുടിശിക വരുത്തിയവര്‍ക്ക് പിഴ ഇളവോടെ കുടിശിക അടച്ചു തീര്‍ക്കാനുളള അവസരവും കാമ്പയിനില്‍ ഉണ്ടാകും. പുതുതായി രജിസ്റ്റര്‍ ചെയ്യാന്‍ ആഗ്രഹിക്കുന്ന പ്രവാസികള്‍ ആവശ്യമായ രേഖകള്‍ സഹിതം കാമ്പയിന്‍ നടക്കുന്ന സ്ഥലങ്ങളില്‍ എത്തണം. കോഴിക്കോട് റീജിയണിലെ കാമ്പയിന്‍ പ്രവര്‍ത്തനങ്ങള്‍ക്ക് ശേഷം മറ്റ് പത്ത് ജില്ലകളിലും കാമ്പയിന്‍ നടത്താനും സെപ്റ്റംബര്‍ അവസാനത്തോടെ എല്ലാ ജില്ലകളിലും അംഗത്വ കുടിശികനിവാരണ കാമ്പയിനുകള്‍ സംഘടിപ്പിക്കാനും തീരുമാനിച്ചിട്ടുണ്ടെന്ന് കേരള പ്രവാസി കേരളീയ ക്ഷേമ ബോര്‍ഡ് ചെയര്‍മാന്‍ അഡ്വ. ഗഫൂര്‍ പി. ലില്ലീസ് അറിയിച്ചു. ഫോൺ: 9847874082, 9447793859.

സ്റ്റുഡന്‍റ് അംബാസഡേഴ്സ് മീറ്റ്‌അപ്പ്: ലേണേഴ്സ് ഫെസ്റ്റ് സംഘടിപ്പിച്ചു

മുക്കം: ജില്ലയിലുള്ള എൻജിനീയറിംഗ്, പോളിടെക്നിക്, ആർട്സ് കോളജുകളിൽ നിന്നുള്ള വിദ്യാർഥികളായ കരിയർ അംബാസിഡർമാരെ ഉൾപ്പെടുത്തിക്കൊണ്ടുള്ള സ്റ്റുഡന്‍റ് അംബാസഡേഴ്സ് മീറ്റപ്പ് "ലേണേഴ്സ് ഫെസ്റ്റ് 2025' ഡോൺ ബോസ്കോ കോളജ് മാമ്പറ്റയിൽ നടന്നു. വിദ്യാർഥികളിലെ നേതൃഗുണങ്ങൾ, ആത്മവിശ്വാസം, ചാരുത തുടങ്ങിയവ വർധിപ്പിക്കുന്നതിൽ ശ്രദ്ധകേന്ദ്രീകരിച്ചുള്ള ട്രെയിനിംഗ് പ്രോഗ്രാമാണ് നടന്നത്. പരിപാടിയുടെ ഉദ്ഘാടനം ഡോൺ ബോസ്കോ കോളജ് പ്രിൻസിപ്പൽ ഡോ. ഫാ. ജോബി എം. ഏബ്രഹാം നിർവഹിച്ചു. കോളജ് മാനേജർ ഫാ. മാർട്ടിൻ അഗസ്റ്റിൻ അധ്യക്ഷനായി. കെ-ഡിസ്‌ക് പ്രതിനിധികളായ വിനീത് വിജയൻ, ജയഗോവിന്ദ്, ആലീന ഷാജി പ്രസംഗിച്ചു. പരിപാടികൾക്ക് കോളജ് വൈസ് പ്രിൻസിപ്പൽ ജിജി ജോർജ്, കോളജ് പിആർഒ സന്തോഷ് അഗസ്റ്റിൻ എന്നിവർ നേതൃത്വം നൽകി.

വൈദ്യുതി കാലിൽ വള്ളിപടർപ്പ് മൂടി

കൂരാച്ചുണ്ട്: പ്രധാന റോഡരികിലുള്ള വൈദ്യുതി കാലിൽ അപകടകരമായി വള്ളിപ്പടർപ്പ് മൂടിയതിനെതിരേ അക്ഷേപം. കൂരാച്ചുണ്ട് -പേരാമ്പ്ര റോഡിലെ കേളോത്തുവയൽ ബസ് സ്റ്റോപ്പിന് സമീപമാണ് 11 കെവി ലൈനും, വൈദ്യുതി വിതരണലൈനും കടന്നു പോകുന്ന വൈദ്യുതി കാലിലും ലൈനിലും വള്ളിപ്പടർപ്പ് നിറഞ്ഞത്. കെഎസ്ഇബി ചക്കിട്ടപാറ സെക്ഷന്‍റെ കീഴിലുള്ള ലൈനാണിത്. മഴക്കാലമായതിനാൽ ഇത് അപകട സാധ്യതയ്ക്ക് കാരണമാകുമെന്നാണ് നാട്ടുകാരുടെ പരാതി. ഈ വിവരം അധികൃതരെ അറിയിച്ചിട്ടും നടപടിയില്ലെന്നാണ് നാട്ടുകാർ പറയുന്നത്.റോഡരികിൽ ആയതിനാൽ ഏറെ അപകട ഭീഷണിയാകുന്ന സാഹചര്യത്തിൽ അടിയന്തര നടപടി സ്വീകരിക്കണമെന്നാണ് ആവശ്യപ്പെടുന്നത്.

മണ്ണെണ്ണ വേഗം ലഭ്യമാക്കണം: വ്യാപാരികള്‍

കോഴിക്കോട് : കോഴിക്കോട് താലൂക്കിലെ റേഷന്‍കടകളിലേക്ക് ജൂലൈ, ഓഗസ്റ്റ്, സെപ്റ്റംബര്‍ മാസത്തേക്ക് അനുവദിച്ച മണ്ണെണ്ണ എത്രയും വേഗം ലഭ്യമാക്കണമെന്ന് ആള്‍ കേരള റീട്ടെയില്‍ റേഷന്‍ ഡീലേഴ്‌സ് അേസാസിയേഷന്‍ താലൂക്ക് എക്‌സിക്യൂട്ടീവ് യോഗം ആവശ്യപ്പെട്ടു. മണ്ണെണ്ണ ഏറ്റെടുക്കാത്ത മൊത്തവിതരണക്കാരെ ഒഴിവാക്കി ബദല്‍ സംവിധാനം ഒരുക്കണം. റേഷന്‍ വ്യാപാരികള്‍ ഒരിടത്തും മണ്ണെണ്ണ ഏറ്റെടുക്കില്ലെന്ന് പറഞ്ഞിട്ടില്ല. മറിച്ചുള്ള പ്രചരണം തെറ്റിദ്ധാരണ ജനകമാണ്.ഏഴോളം മൊത്തവിതരണക്കാര്‍ ഉണ്ടായിരുന്ന താലൂക്കില്‍ ഇപ്പോള്‍ രണ്ടെണ്ണമേ നിലവിലുള്ളു. അതില്‍ ഒരു മൊത്തവിതരണക്കാരന്‍ മണ്ണെണ്ണ ഏറ്റെടുക്കാത്തതാണ് പ്രതിസന്ധി സൃഷ്ടിച്ചിരിക്കുന്നത്.മാത്രവുമല്ല കൊയിലാണ്ടി,വടകര,താമരശേരി താലൂക്കുകളില്‍ മൊത്ത വിതരണക്കാര്‍ തീരെയില്ല. ഈ പ്രദേശത്തെ പ്രശ്‌നം കൂടി പരിഹരിക്കേണ്ടതുണ്ട്. സുരക്ഷിതത്വം ഇല്ലാത്ത വാഹനത്തില്‍ മണ്ണെണ്ണ കയറ്റി കൊണ്ടുപോകുവാന്‍ നിയമപരമായി അനുവാദമില്ലാത്തതിനാല്‍ വാതില്‍ പടിയിലൂടെ വിതരണം നടത്തണമെന്ന് യോഗം ആവശ്യപ്പെട്ടു. സംസ്ഥാന ജനറല്‍ സെക്രട്ടറി ടി.മുഹമ്മദലി ഉദ്ഘാടനം ചെയ്തു. താലൂക്ക് പ്രസിഡണ്ട് പി. അരവിന്ദാക്ഷന്‍ അധ്യക്ഷത വഹിച്ചു.

ഹോമിയോ കോളജ് റോഡില്‍ ഞാറ് നട്ട് പ്രതിഷേധിച്ചു

കോഴിക്കോട് :കാരപ്പറമ്പ് ഒ.പി രാമന്‍ - ഹോമിയോ കോളജ് റോഡിന്‍റെ ശോചനീയാവസ്ഥക്കെതിരെ ബിജെപി മലാപ്പറമ്പ് എട്ടാം വാര്‍ഡ് കമ്മിറ്റി റോഡില്‍ ഞാറ് നട്ട് പ്രതിഷേധിച്ചു. സമരം ബി ജെ പി മുന്‍ സംസ്ഥാന സമിതി അംഗം സതീഷ് പാറന്നൂര്‍ ഉല്‍ഘാടനം ചെയ്തു.റോഡിലെ ശോചനീയാവസ്ഥയില്‍ നാട്ടുകാരും യാത്രക്കാരും നേരിടുന്ന ദുരിതങ്ങളില്‍ ശാശ്വത പരിഹാരം കാണാതെ കോര്‍പറേഷനും സ്ഥലം കൗണ്‍സിലറും ജനങ്ങളെ കബളിപ്പിക്കുകയാന്നെന്നും റോഡിന്റെ തകര്‍ച്ച യുദ്ധകാലാടിസ്ഥാനത്തില്‍ പരിഹരിച്ച് ഇരു മുന്നണികളും ജനങ്ങളോട് മാപ്പ് പറയണമെന്ന് അദ്ദേഹം ആവശ്യപ്പെട്ടു. പ്രശ്‌ന പരിഹാരം കണ്ടില്ലെങ്കില്‍ വീണ്ടും ശക്തമായ തുടര്‍ സമരങ്ങള്‍ നടത്തുമെന്ന് പ്രതിഷേധ കൂട്ടായ്മ വ്യക്തമാക്കി.ബിജെപി സിവില്‍ സ്റ്റേഷന്‍ ഏരിയാ പ്രസിഡന്റ് ടി.പി.രമേശന്‍ അധ്യക്ഷത വഹിച്ചു. ജനറല്‍ സെക്രട്ടറി ഇ.പി.സുജീഷ് , ഏരിയാ സെക്രട്ടറിമാരായ സുനില്‍ ബാബു, ഗണേശന്‍, പ്രജി നാഗത്താന്‍ പറമ്പ്, നോര്‍ത്ത് മണ്ഡലം വൈസ് പ്രസിഡന്‍റ് കെ. അജയലാല്‍, കെ.യു. ശശിധരന്‍, സുനില്‍ കുമാര്‍, സുജിത്, രതിഭ. ടി, വിനീഷ്, സിദ്ധാര്‍ത്ഥന്‍, സി. സിന്ധു തുടങ്ങിയവര്‍ സംസാരിച്ചു.

ആനക്കുട്ടിയെ പരിപാലന കേന്ദ്രത്തിലേക്ക് മാറ്റുമെന്ന്

കുറ്റ്യാടി: തൊട്ടിൽപാലം ചുരണിമലയിൽ കുറച്ച് ദിവസങ്ങളായി വിഹരിച്ചു കൊണ്ടിരുന്ന കാട്ടാനകുട്ടിയുടെ ആക്രമണങ്ങളിൽ പൊറുതി മുട്ടിയ നാട്ടുകാർ പ്രതിഷേധത്തിനിറങ്ങി. തുടർ‌ന്ന് മറ്റ് രാഷ്ട്രീയ പാർട്ടികളും പ്രതിഷേധിച്ചു. കാട്ടാന ശല്യത്തിൽ പരിഹാരം ആവശ്യപ്പെട്ട്സിപിഎം ചാത്തൻകോട്ട്നട ലോക്കൽ കമ്മിറ്റിയുടെ നേതൃത്വത്തിൽ കുറ്റ്യാടി ഫോറസ്റ്റ് റെയിഞ്ച് ഓഫീസ് ഉപരോധ സമരം സംഘടിപ്പിച്ചു. രണ്ട് മണിക്കൂറോളം നേരംഫോറസ്റ്റ് ഓഫീസ് സിപിഎം പ്രവർത്തകർ ഉപരോധിച്ചു. തുടർന്ന് അധികാരികളുമായി നടത്തിയ ചർച്ചയിൽ ചുരണിയിലും, മുറ്റത്തെപ്ലാവിലും 24 മണിക്കൂർ ക്യാമ്പ് ഓഫീസ്ആരംഭിക്കുമെന്നും കാട്ടാനക്കുട്ടിയെ പരിപാലന കേന്ദ്രത്തിലേക്ക് മാറ്റുമെന്നുള്ള ഉറപ്പും ലഭിച്ചു. തുടർന്ന് സമരം താൽക്കാലികമായി അവസാനിപ്പിച്ചു. സിപിഎം കുന്നുമ്മൽ ഏരിയ കമ്മിറ്റി അംഗം കെ.ടി. മനോജൻ സമരം ഉദ്ഘാടനം ചെയ്തു.

പയ്യോളി സർവീസ് റോഡിലെ കുഴിയിൽ വീണ് പിക്കപ്പ് ലോറി മറിഞ്ഞു

‌പയ്യോളി: കണ്ണൂർ ഭാഗത്തേക്കുള്ള സർവീസ് റോഡിലെ കുഴിയിൽ വീണു പിക്കപ്പ് ലോറി മറിഞ്ഞതിനെ തുടർന്ന് മണിക്കൂറുകളോളം ഗതാഗതം സ്തംഭിച്ചു. ഇന്നലെ പുലർച്ച രണ്ടു മണിയോടെ പയ്യോളിയിലെ സ്വകാര്യ ഇവി ചാർജിങ് സ്റ്റേഷന് സമീപത്താണ് ഭാരം കയറ്റി വന്ന പിക്കപ്പ് ലോറി മറിഞ്ഞത്. ഇവിടെ മുട്ടറ്റം ആഴമുള്ള കുഴിയാണ് ഉള്ളത്. ചെറുവാഹനങ്ങൾ വഴി തിരിച്ചു പോയെങ്കിലും ലോറികൾ ഉൾപ്പെടെയുള്ള വലിയ വാഹനങ്ങൾ നിർത്തിയിട്ടതിനെ തുടർന്ന് വലിയ ഗതാഗതക്കുരുക്കാണ് അനുഭവപ്പെട്ടത്. പിന്നീട് പുലർച്ചെ അഞ്ചര മണിയോടെ ക്രെയിൻ എത്തിച്ചാണ് ലോറി ഉയർത്തിയത്. പക്ഷേ ഗതാഗതക്കുരുക്ക് മാറാൻ പിന്നെയും മണിക്കൂറുകൾ എടുത്തു. മഴ കനക്കുന്ന സമയങ്ങളിൽ ദേശീയപാതയിലെ യാത്രാദുരിതം വർദ്ധിക്കുന്നതായി യാത്രക്കാർ പരാതി പറയുന്നു. രണ്ടാഴ്ച മുമ്പ് ജില്ലാ കലക്ടർ വിളിച്ചു ചേർത്ത അടിയന്തര യോഗത്തിൽ ദേശീയപാതയിലെ വെള്ളക്കെട്ട് നീക്കാൻ നടപടി സ്വീകരിക്കാൻ ആവശ്യപ്പെട്ടെങ്കിലും അതെങ്ങും എത്തിയില്ല. പലപ്പോഴും രോഗികളും വിദ്യാർത്ഥികളും ഉൾപ്പെടെയുള്ളവർ വാഹനങ്ങളിൽ കുടുങ്ങിക്കിടന്ന് യാതന അനുഭവിക്കുകയാണ്.

കോഴിക്കോട്, താമരശേരി താലൂക്ക് പട്ടയമേള‌ : പട്ടയ അര്‍ഹതാ പരിധി ഉയര്‍ത്താന്‍ ആലോചിക്കുന്നു: മന്ത്രി കെ. രാജന്‍

1080 പട്ടയങ്ങള്‍ വിതരണം ചെയ്തു കോഴിക്കോട്: പട്ടയ അര്‍ഹതാ പരിധി ഒരു ലക്ഷം രൂപയില്‍നിന്ന് രണ്ടര ലക്ഷമാക്കി ഉയര്‍ത്താന്‍ സര്‍ക്കാര്‍ ആലോചിക്കുന്നതായി മന്ത്രി കെ. രാജന്‍. "എല്ലാവര്‍ക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാര്‍ട്ട്' എന്ന ലക്ഷ്യത്തിന്‍റെ ഭാഗമായി കോവൂര്‍ പി. കൃഷ്ണപിള്ള ഓഡിറ്റോറിയത്തില്‍ നടന്ന കോഴിക്കോട്, താമരശേരി താലൂക്കുകളുടെ പട്ടയമേള ഓണ്‍ലൈനായി ഉദ്ഘാടനം ചെയ്യുകയായിരുന്നു മന്ത്രി. സംസ്ഥാനത്ത് റവന്യൂ ഡിജിറ്റല്‍ കാര്‍ഡ് നവംബറോടെ നടപ്പാക്കും. ഭൂമിസംബന്ധമായ 14ഓളം വിവരങ്ങളടങ്ങിയതാകും കാര്‍ഡ്. സംസ്ഥാനത്തെ 312 വില്ലേജുകളില്‍ ഡിജിറ്റല്‍ സര്‍വേ പൂര്‍ത്തിയാവുകയാണ്. സര്‍വേ പൂര്‍ത്തിയായയുടന്‍ എല്ലാ വില്ലേജുകളിലെയും ജനങ്ങള്‍ക്ക് അവരുടെ ഭൂമിയുടെയും കെട്ടിടത്തിന്‍റെയും ഉള്‍പ്പെടെ സമ്പൂര്‍ണ വിവരങ്ങള്‍ അടങ്ങിയ ഡിജിറ്റല്‍ റവന്യൂ കാര്‍ഡ് വിതരണം ചെയ്യും. ഡിജിറ്റല്‍ സര്‍വേയുടെ ഭാഗമായി കണ്ടെത്തുന്ന കൈവശമുള്ളതും ആരുടെയും പേരിലല്ലാത്തതുമായ ഭൂമിയുടെ ഉടമസ്ഥതയും അര്‍ഹതയും പരിശോധിച്ച് പട്ടയം വിതരണം ചെയ്യാനുള്ള ക്രമീകരണങ്ങളും നടത്തുന്നുണ്ട്. ഭൂരഹിതരായ ഒരാളുമില്ലാത്ത കേരളം കെട്ടിപ്പടുക്കുകയാണ് സര്‍ക്കാരെന്നും അദ്ദേഹം കൂട്ടിച്ചേര്‍ത്തു. എലത്തൂര്‍ മണ്ഡലത്തില്‍ 165, കോഴിക്കോട് നോര്‍ത്ത് 108, കോഴിക്കോട് സൗത്ത് 94, ബേപ്പൂര്‍ 46, കുന്നമംഗലം 270, തിരുവമ്പാടി 261, കൊടുവള്ളി 136 എന്നിങ്ങനെ 1080 പട്ടയങ്ങളാണ് മേളയില്‍ വിത രണം ചെയ്തത്. ചടങ്ങില്‍ തോട്ടത്തില്‍ രവീന്ദ്രന്‍ എംഎല്‍എ അധ്യക്ഷത വഹിച്ചു. ജില്ലാ കളക്ടര്‍ സ്‌നേഹില്‍ കുമാര്‍ സിംഗ്, ലിന്‍റോ ജോസഫ് എംഎല്‍എ, ഡെപ്യൂട്ടി കളക്ടര്‍ പി.എന്‍. പുരുഷോത്തമന്‍, വാര്‍ഡ് കൗണ്‍സിലര്‍ ഇ.എം. സോമന്‍, രാഷ്ട്രീയപാര്‍ട്ടി പ്രതിനിധികള്‍ തുടങ്ങിയവര്‍ പ്രസംഗിച്ചു.

ബോചെ ബ്രഹ്മി ടീയുടെ ആദ്യത്തെ ബോചെ പാര്‍ട്ണര്‍ ഷോറൂം പ്രവര്‍ത്തനമാരംഭിച്ചു

കോഴിക്കോട്: ബോചെ ബ്രഹ്മി ടീയുടെ ആദ്യത്തെ ബോചെ പാര്‍ട്ണര്‍ ഷോറൂം ഉദ്ഘാടനം ചെയ്തു. 812 കി.മീ. റണ്‍ യുനീക് വേള്‍ഡ് റിക്കാര്‍ഡ് ജേതാവ് ബോചെ ഉദ്ഘാടന കര്‍മം നിര്‍വഹിച്ചു. അത്തോളി പഞ്ചായത്ത് പ്രസിഡന്‍റ് ബിന്ദു രാജന്‍ ചടങ്ങില്‍ മുഖ്യാതിഥിയായി. മൊടക്കല്ലൂര്‍ എംഎംസി ഹോസ്പിറ്റലിനു സമീപം മലീക ടവറിലാണ് ബ്രഹ്മി ടീയുടെ ബോചെ പാര്‍ട്ണര്‍ ഷോറൂം പ്രവര്‍ത്തിക്കുന്നത്. ബോചെ ബ്രഹ്മി ടീ വാങ്ങുന്നവര്‍ക്ക് ടീ പാക്കറ്റിനൊപ്പം ലഭിക്കുന്ന സ്‌ക്രാച്ച് ആൻഡ് വിന്‍ കാര്‍ഡിലൂടെ ഫ്ലാറ്റുകള്‍, കാറുകള്‍, ടൂ വീലറുകള്‍, ഐ ഫോണുകള്‍, ബോചെ പബ്ബില്‍ നിന്നും ഒരു കുപ്പി ബോചെ പാനീയം, ടീ പാക്കറ്റ്, ബോബി ചെമ്മണൂര്‍ ഇന്‍റര്‍നാഷണല്‍ ജ്വല്ലേഴ്‌സിന്‍റെ കാഷ് വൗച്ചര്‍ എന്നീ സമ്മാനങ്ങള്‍ നേടാം. കൂടാതെ സ്‌ക്രാച്ച് ആൻഡ് വിന്‍ കാര്‍ഡിലൂടെ ദിവസേന ആയിരക്കണക്കിന് രൂപയുടെ സമ്മാനങ്ങള്‍ നേടാം.

പശുക്കടവില്‍ ഉരുള്‍പൊട്ടല്‍ ? നിരവധി പ്രദേശങ്ങളില്‍ വെള്ളം കയറി

പെരുവണ്ണാമൂഴി/കുറ്റ്യാടി: മലയോര മേഖലകളില്‍ കനത്ത മഴ തുടരുന്നതിനിടെ പശുക്കടവ് പിറുക്കന്‍തോട് ഭാഗത്ത് വന്‍ മലവെള്ളപ്പാച്ചില്‍. ഉരുള്‍പൊട്ടലുണ്ടായതാണെന്നു നാട്ടുകാര്‍. അപ്രതീക്ഷിതമായി കുതിച്ചെത്തിയ വെള്ളപ്പാച്ചിലില്‍ താഴ്ന്ന പ്രദേശങ്ങളും റോഡുകളും വെള്ളത്തിനടിയിലായി. പുഴയോരത്ത് താമസിപ്പിക്കുന്നവരെ മാറ്റിപ്പാര്‍പ്പിക്കാനുള്ള ശ്രമങ്ങള്‍ ഇന്നലെ രാത്രി തന്നെ ആരംഭിച്ചു. കടന്തറപ്പുഴയിലുണ്ടായ മലവെള്ളപ്പാച്ചിലില്‍ ചക്കിട്ടപാറ പഞ്ചായത്തിലെ ചെമ്പനോടയില്‍ പല ഭാഗത്തും വെള്ളം കയറി. ഇല്ലിക്കല്‍ ഹൗസിംഗ് കോളനിയില്‍ നിന്നു ആളുകളെ മാറ്റിപ്പാര്‍പ്പിച്ചു. താമരമുക്ക് ഭാഗത്തും വെള്ളം കയറി. പൂഴിത്തോട്ടില്‍ പല ഭാഗത്തും മണ്ണിടിച്ചിലുണ്ടായി. പെരുവണ്ണാമൂഴി - ചെമ്പനോട റോഡിലെ ഓനിപ്പുഴ പാലത്തില്‍ വെള്ളംകയറി ഗതാഗതം തടസപ്പെട്ടു. പിറുക്കന്‍തോട്ടില്‍ ഉരുള്‍പൊട്ടല്‍ ഉണ്ടായതായി കടന്തിറ പുഴയോരത്തു താമസിക്കുന്നവര്‍ പറഞ്ഞു. മലവെള്ളപ്പാച്ചിലിനെ തുടര്‍ന്ന് മരുതോങ്കര പഞ്ചായത്ത് അംഗങ്ങളായ സി.പി. ബാബുരാജ്, ഡെന്നീസ് എന്നിവരുടെ നേതൃത്വത്തില്‍ ആളുകളെ സുരക്ഷിത സ്ഥാനത്തേക്കു മാറ്റി. കുറ്റ്യാടി മേഖലകളില്‍ കനത്ത മഴയാണ് ഇന്നലെ പെയ്തത്. പട്ട്യാട്ട് പുഴയില്‍ ശക്തമായ മലവെള്ളപ്പാച്ചിലുണ്ടായി. മുള്ളന്‍കുന്ന് റോഡില്‍ വെള്ളം കയറി ഗതാഗത തടസമുണ്ടായി. കാവിലുംപാറ പുഴ കരകവിഞ്ഞ് ഒഴുകുകയാണ്. താഴ്ന്ന പ്രദേശങ്ങളിലും പുഴയോരങ്ങളിലും താമസിക്കുന്നവര്‍ ജാഗ്രത പാലിക്കണമെന്ന് അധികൃതര്‍ അഭ്യര്‍ഥിച്ചു. കോഴിക്കോട്- വയനാട് റൂട്ടില്‍ ഈങ്ങാപുഴയില്‍ റോഡില്‍ വെള്ളം കയറി. താമരശേരി ചുരത്തിലും പരിസരങ്ങളിലും കനത്ത മഴയാണ് ഇന്നലെ രാത്രിയിലും പെയ്തത്. ചുരത്തില്‍ നിന്നുള്ള മലവെള്ളപ്പാച്ചിലിലാണ് ഈങ്ങാപ്പുഴയില്‍ വെള്ളം കയറിയത്. നാദാപുരം: കനത്ത മഴയെ തുടര്‍ന്ന് വിലങ്ങാട് അങ്ങാടിയിലെ പാലത്തില്‍ വെള്ളം കയറി. അങ്ങാടിയോടു ചേര്‍ന്ന് ഒഴുകുന്ന പുഴയില്‍ ശക്തമായ വെള്ളപ്പാച്ചിലാണുള്ളത്. കഴിഞ്ഞ വര്‍ഷത്തെ ഉരുള്‍പൊട്ടലിന്‍റെ ഭീതിയില്‍ പ്രദേശവാസികളെല്ലാം ജാഗ്രതയിലാണ്. കുറ്റ്യാടി, കാവിലുംപാറ, തൊട്ടില്‍ പാലം മേഖലകളിലെ പുഴകളെല്ലാം നിറഞ്ഞ് ഒഴുകുകയാണ്. രാത്രിയിലും മലയോര മേഖലകളില്‍ ശക്തമായ മഴ തുടര്‍ന്നു. പുഴകളോടു ചേര്‍ന്നുള്ള റോഡുകളില്‍ വെള്ളം കയറി. മലയോര മേഖലകളില്‍ രാത്രികാല യാത്രകള്‍ ഒഴിവാക്കണമെന്ന് അധികൃതര്‍ അറിയിച്ചു. താമരശേരി, കുറ്റ്യാടി ചുരം റോഡുകളില്‍ നിയന്ത്രണം കോഴിക്കോട്: മഴ ശക്തമായ സാഹചര്യത്തില്‍ താമരശേരി, കുറ്റ്യാടി ചുരം റോഡുകളില്‍ ഗതാഗത നിയന്ത്രണം ഏര്‍പ്പെടുത്താന്‍ ജില്ലാ കളക്ടര്‍ സ്‌നേഹില്‍ കുമാര്‍ സിംഗ് നിര്‍ദ്ദേശം നല്‍കി. അത്യാവശ്യ വാഹനങ്ങള്‍ക്കു മാത്രമേ ചുരം റോഡില്‍ പ്രവേശനം അനുവദിക്കൂ. ഭാരം കൂടിയ വാഹനങ്ങള്‍ കടത്തിവിടില്ല. പ്രദേശത്ത് പോലിസ് പട്രോളിംഗ് ശക്തിപ്പെടുത്താനും ജില്ലാ കളക്ടര്‍ നിര്‍ദ്ദേശം നല്‍കി. അടിയന്തര സാഹചര്യങ്ങള്‍ നേരിടുന്നതിന് പൂര്‍ണ സജ്ജരായിരിക്കാന്‍ ഫയര്‍ ആൻഡ് റെസ്‌ക്യു, കെഎസ്ഇബി തുടങ്ങിയ വിഭാഗങ്ങള്‍ക്കും നിര്‍ദ്ദേശം നല്‍കിയിട്ടുണ്ട്. കാലവര്‍ഷക്കെടുതികള്‍ക്ക് സാധ്യതയുള്ള പ്രദേശങ്ങളിലെ ആളുകളെ സുരക്ഷിത സ്ഥലങ്ങളിലേക്ക് മാറ്റിപ്പാര്‍പ്പിക്കുന്നതിന് വില്ലേജ് ഓഫീസര്‍മാര്‍ക്കും കളക്ടര്‍ നിര്‍ദേശം നല്‍കി. കക്കയം ഉരക്കുഴി ഇക്കോ ടൂറിസം കേന്ദ്രം ഇനി ഒരു അറിയിപ്പ് ഉണ്ടാകുന്നതുവരെ പ്രവര്‍ത്തിക്കില്ലെന്ന് അധികൃതര്‍ അറിയിച്ചു.

വെളിച്ചെണ്ണയില്‍ മായംചേര്‍ക്കല്‍ കണ്ടെത്താന്‍ പരിശോധന ഊര്‍ജിതം

കോഴിക്കോട്: സംസ്ഥാനത്ത് വെളിച്ചെണ്ണ വില കുതിച്ചുയരുന്ന സാഹചര്യത്തില്‍ വെളിച്ചെണ്ണയില്‍ മായം ചേര്‍ക്കുന്നുണ്ടോ എന്നു കണ്ടെത്തുന്നതിനു പരിശോധന ഊര്‍ജിതമാക്കി. ഫുഡ് സേഫ്റ്റി വകുപ്പാണ് സഗ്‌സഥാന വ്യാപകമായി പരിശോധന നടത്തുന്നത്. വില കുറഞ്ഞ മറ്റ് എണ്ണകള്‍ വെളിച്ചെണ്ണയില്‍ ചേര്‍ത്തിട്ടുണ്ടോ എന്നറിയുന്നതിനാണ് പ്രധാനമായും പരിശോധന. വെളിച്ചെണ്ണ നിര്‍മാണ യൂണിറ്റുകള്‍, മൊത്ത വ്യാപാര കടകള്‍, റീട്ടെയില്‍ വില്പന കടകള്‍ എന്നിവിടങ്ങളില്‍ നിന്നാണ് സാമ്പിളുകള്‍ ശേഖരിച്ചിട്ടുള്ളത്. ഇവ റീജണല്‍ അനാലിറ്റിക്കല്‍ ലബോറട്ടറികളില്‍ പരിശോധിച്ചു വരികയാണ്. ഒരു മാസത്തിനകം റിസള്‍ട്ട് ലഭിക്കും. അതിനുശേഷമായിരിക്കും േകസുകള്‍ രജിസ്റ്റര്‍ ചെയ്യുന്ന കാര്യത്തില്‍ തീരുമാനമെടുക്കുക. വെളിച്ചെണ്ണ വില വലിയ തോതിലാണ് ഉയരുന്നത്. വെളിച്ചെണ്ണ കിലോക്ക് 420 രപയാണ് വില. നാളികേരത്തിന്‍റെ വില കിലോക്ക് 73 രൂപയില്‍ എത്തിനില്‍ക്കുന്നു. നാളികേര ഉത്പാദനം കുറഞ്ഞതിനെത്തുടര്‍ന്നാണ് വെളിച്ചെണ്ണ വിലയില്‍ വര്‍ധനവ് ഉണ്ടായത്. ഓണം സീസണ്‍ ആവുന്നതോടെ ഇനിയും വില ഉയരുമെന്നാണ് കണക്കുക്കുന്നത്. ഈ സാഹചര്യത്തില്‍ വെളിച്ചെണ്ണയില്‍ വിലകുറഞ്ഞ മറ്റ് എണ്ണകള്‍ ചേര്‍ക്കാനുള്ള സാധ്യത ഫഒഡ് സേഫ്റ്റി വകുപ്പ് മുന്‍കൂട്ടി കാണുന്നുണ്ട്.എണ്ണപ്പനയുടെ കുരുക്കളില്‍ നിന്നുള്ള എണ്ണ വെളിച്ചെണ്ണയില്‍ചേര്‍ക്കുന്നുണ്ടോയെന്നും പരിശോധിക്കുന്നുണ്ട്. തമിഴ്‌നാട് അടക്കമുള്ള സംസ്ഥാനങ്ങളില്‍നിന്ന് പാക്കിലാക്കിയ വെളിച്ചെണ്ണ എത്തുന്നുണ്ട്. അവയും പരിശോധിക്കുന്നുണ്ട്. കോഴിക്കോട് ജില്ലയിലെ പരിശോധനയില്‍ നൂറോളം സാമ്പിളുകള്‍ ശേഖരിച്ച് ലാബിലേക്ക് അയച്ചിട്ടുണ്ട്.

മൂടക്കൊല്ലിയിൽ കാട്ടാനശല്യം തുടരുന്നു

സുൽത്താൻ ബത്തേരി: വാകേരി മൂടക്കൊല്ലിയിൽ കാട്ടാനശല്യം തുടരുന്നു. പ്രദേശത്ത് കാവൽ നിൽക്കുന്ന വനം ജീവനക്കാരെയും കുംകിയാനകളെയും വെട്ടിച്ചാണ് കാട്ടാനകൾ ജനവാസകേന്ദ്രത്തിൽ എത്തുന്നത്. കഴിഞ്ഞരാത്രി മൂടക്കൊല്ലിയിൽ ഇറങ്ങിയ ആന നെടിയാക്കൽ വിനുവിന്‍റെ കോഴിക്കൂടും കൊല്ലംപറന്പിൽ ഗോപിനാഥ്, മാവത്ത് ബിനു, കുന്നേൽ പുഷ്പാകരൻ തുടങ്ങിയവരുടെ കൃഷികളും നശിപ്പിച്ചു. കഴിഞ്ഞദിവസം കുംകിയാനകളുടെ സഹായത്തോടെ ഉൾക്കാട്ടിലേക്ക് തുരത്തിയ കാട്ടാനകളാണ് തിരിച്ചെത്തി കൃഷനാശം വരുത്തിയത്. കാട്ടാനകളുടെ സാന്നിധ്യം ജനങ്ങളുടെ സ്വൈരം കെടുത്തുകയാണ്.

കളർ ഇന്ത്യ രജിസ്ട്രേഷൻ ലോഞ്ചിംഗ് നാളെ

കോഴിക്കോട്: പത്തുലക്ഷം വിദ്യാർഥികൾ അണിനിരക്കുന്ന ചിത്രരചനാ മത്സരമായ ദീപിക കളർ ഇന്ത്യ മത്സരത്തിന്‍റെ രജിസ്ട്രേഷൻ ലോഞ്ചിംഗ് നാളെ ബാലുശേരി ജയറാണി എസ്എബിഎസ് പബ്ലിക് സ്കൂളിൽ നടക്കും. രാവിലെ 11 ന് സ്കൂൾ ഓഡിറ്റോറിയത്തിൽ നടക്കുന്ന രജിസ്ട്രേഷൻ ലോഞ്ചിംഗ് പ്രശസ്ത സിനിമ സംവിധായകൻ ജിന്‍റോ തോമസ് നിർവഹിക്കും. സ്കൂൾ പ്രിൻസിപ്പൽ സിസ്റ്റർ ഫിലോ തോമസ് അധ്യക്ഷത വഹിക്കുന്ന ചടങ്ങിൽ ദീപിക റസിഡന്‍റ് മാനേജർ ഫാ. ഷെറിൻ പുത്തൻപുരയ്ക്കൽ ആമുഖ പ്രഭാഷണവും ബാലുശേരി സെന്‍റ് മേരീസ് പള്ളി വികാരി ഫാ. മെൽബിൻ വെള്ളയ്ക്കാകുടിയിൽ അനുഗ്രഹ പ്രഭാഷണവും നടത്തും. സ്റ്റാഫ് സെക്രട്ടറി ശ്രുതിമോൾ ജോസഫ് സ്വാഗതവും വൈസ് പ്രിൻസിപ്പൽ സിസ്റ്റർ അനുഷ മാത്യു നന്ദിയും പറയും. തുടർന്ന് കുട്ടികളുടെ വിവിധ കലാപരിപാടികളും അരങ്ങേറും. മലയാളത്തിലെ പ്രഥമദിനപത്രമായ ദീപിക രാഷ്ട്ര സേവനത്തിന്‍റെയും ദേശീയോദ്ഗ്രഥന പ്രവർത്തനങ്ങളുടേയും 139-ാം വാർഷികം ആഘോഷിക്കുന്ന അവസരത്തിൽ വിദ്യാർഥികളുടെയും പൊതു സമൂഹത്തിന്‍റെയും ഭാവി നശിപ്പിക്കുന്ന ലഹരിക്കെതിരേ ബാല ചേതനകളെ ഉണർത്തുക, ലോക സമാധാനം തകർക്കുന്ന യുദ്ധങ്ങൾ അവസാനിപ്പിക്കാനും എല്ലാ മനുഷ്യനും സൗഹാർദത്തിൽ ഒരുമിക്കുവാനും പൊതു സമൂഹ ബോധം ഉണർത്തുക എന്നീ ലക്ഷ്യത്തോടെ "നാം ഒരു കുടുംബം' എന്ന സന്ദേശവുമായി "ഒരേയൊരിന്ത്യ, ഒരൊറ്റ ജനത' എന്നതാണ് ദീപിക കളർ ഇന്ത്യ സീസൺ 4. ഓഗസ്റ്റ് എട്ടിന് നടക്കുന്ന മത്സരത്തിന്‍റെ രജിസ്ട്രേഷൻ 20 ന് അവസാനിക്കും.

വളയത്ത് അഞ്ചുപേർക്ക് പരിക്ക്

നാദാപുരം: വളയത്ത് സ്കൂൾ വിദ്യാർഥി ഉൾപ്പെടെ അഞ്ച് പേരെ തെരുവുനായ അക്രമിച്ചു. ചൊവ്വാഴ്ച്ച വൈകുന്നേരവും ബുധനാഴ്ച്ച രാവിലെയുമാണ് നായ അക്രമകാരിയായത്. ചൊവ്വാഴ്ച്ച ഉച്ചക്ക് ശേഷം വളയം മത്സ്യ മാർക്കറ്റ് പരിസരത്തും ആശുപത്രി പരിസരത്ത് നിന്നുമാണ് നാലുപേരെ നായ കടിച്ചത്. ഇതിനുപിന്നാലെ ബുധനാഴ്ച്ച പുലർച്ചെ വളയം ടൗൺ ബസ് കാത്തിരിപ്പ് കേന്ദ്രത്തിന് സമീപം ബസ് കാത്ത് നിൽക്കുകയായിരുന്ന വളയത്തെ ലോട്ടറി ഏജന്‍റിനെയും നായ കടിച്ചു. കടിയേറ്റയാൾക്ക് കെഎസ്ആർടിസി ബസ് ജീവനക്കാരും, സഹയാത്രികരും ചേർന്ന് പ്രാഥമിക ചികിൽസ നൽകുകയും തുടർന്ന് വടകര ജില്ലാ ആശുപത്രിയിലും പ്രവേശിപ്പിച്ചു. ഒരേ നായ തന്നെയാണ് അഞ്ചുപേരെയും കടിച്ചത്. സാരമായി പരിക്കേറ്റ വിദ്യാർഥിക്ക് കോഴിക്കോട് മെഡിക്കൽ കോളജിൽ ചികിത്സ നൽകി. മറ്റ് മൂന്നുപേർ നാദാപുരം ഗവ. ആശുപത്രിയിലും ചികിത്സതേടി. മണിക്കൂറുകളോളം ടൗണിലും പരിസരങ്ങളിലും ഭീതി പരത്തിയ നായയെ നാട്ടുകാർ തല്ലിക്കൊന്നു.

തെരുവുനായ ആക്രമണം : പന്തിരങ്കാവില്‍ മൂന്നുപേര്‍ക്ക് ഗുരുതര പരിക്ക്

കോഴിക്കോട്: പന്തീരങ്കാവില്‍ തെരുവുനായ ആക്രമണത്തില്‍ മൂന്നുപേര്‍ക്ക് ഗുരുതര പരിക്ക്. എടക്കലപ്പുറത്ത് രാധ, തോട്ടുളി ചന്ദ്രന്‍, ഇവരുടെ ഭാര്യ രമണി എന്നിവര്‍ക്കാണ് തെരുവുനായയുടെ ആക്രമണത്തില്‍ സാരമായി പരിക്കേറ്റത്. ഇന്നലെ വൈകുന്നേരം നാലോടെ പന്തിരങ്കാവിനു സമീപം മുതുവനത്തറയിലാണ് തെരുവുനായയുടെ ആക്രമണമുണ്ടായത്. വീടിന് സമീപത്തു നില്‍ക്കുമ്പോഴാണ് തെരുവുനായ പാഞ്ഞെത്തി ആക്രമണം നടത്തിയത്. മൂന്നുപേര്‍ക്കും കൈകള്‍ക്കും കാലിനും തലക്കുമാണ് കടിയേറ്റത്. നിലവിളികേട്ട് ഓടിയെത്തിയ പരിസരവാസികളാണ് തെരുവുനായയുടെ ആക്രമണത്തില്‍ നിന്നും ഇവരെ രക്ഷിച്ചത്. മൂന്നു പേരെയും കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. പരിസരത്തുണ്ടായിരുന്ന വളര്‍ത്തുമൃഗങ്ങളെയും തെരുവുനായ ആക്രമിച്ചു. നായയെ പിന്നീട് നാട്ടുകാര്‍ തല്ലിക്കൊന്നു.

കുളത്തുവയലിലെ ഗ്രോട്ടോകൾ നശിപ്പിച്ച സംഭവം: പോലീസ് അന്വേഷണം ആരംഭിച്ചു

കുളത്തുവയൽ: കുളത്തുവയൽ സെന്‍റ് ജോർജ് തീർഥാടന കേന്ദ്രം ഇടവകയുടെ കീഴിൽ റോഡരികിൽ സ്ഥാപിച്ച രണ്ട് ഗ്രോട്ടോകളുടെ ചില്ലുകൾ സാമൂഹിക വിരുദ്ധർ അക്രമിച്ച് തകർത്ത സംഭവത്തിൽ പെരുവണ്ണാമൂഴി പോലീസ് സ്ഥലത്തെത്തി പരിശോധന നടത്തി. ഇതു സംബന്ധിച്ച് പള്ളി കമ്മിറ്റി പോലീസിന് പരാതി നൽകിയിരുന്നു. ചെമ്പ്ര ടൗണിൽ നിന്നും ആരംഭിച്ച് തീർഥാടന കേന്ദ്രംവരെ പതിനാല് സ്ഥലങ്ങളിൽ സ്ഥാപിച്ചിട്ടുള്ള ഗ്രോട്ടോകളിൽ ആറും ഏഴും സ്ഥലത്തെ ഗ്രോട്ടോകളുടെ ചില്ലുകളാണ് തകർത്തത്. ഇതിനുള്ളിൽ എറിഞ്ഞ കല്ലുകളുമുണ്ട്. ഈ മേഖലയിൽ താമസക്കാർ കുറവായതിനാൽ ചില്ലുകൾ തകർത്തതിന്‍റെ ശബ്ദം ആരും കേട്ടിട്ടില്ലെന്നാണ് പറയുന്നത്. രാത്രി സമയങ്ങളിൽ ഇതുവഴി നിരവധി ഇരുചക്രവാഹന യാത്രക്കാർ പോകാറുള്ളതായും പറയുന്നുണ്ട്. വർഷങ്ങൾക്കു മുമ്പും ചെമ്പ്ര ടൗണിന് സമീപത്തെ ഗ്രോട്ടോയുടെ ചില്ല് തകർത്ത സംഭവം ഉണ്ടായിട്ടുണ്ട്‌. പെരുവണ്ണാമൂഴി പോലീസ് സബ് ഇൻസ്പെക്ടർ കെ. ജിതിൻ വാസിന്‍റെ നേതൃത്വത്തിൽ അഡീഷണൽ സബ് ഇൻസ്പെക്ടർ രജിത്ത് നാഥ്, സീനിയർ പോലീസ് ഓഫീസർ കെ.കെ. സമീർ എന്നിവരാണ് സംഭവസ്ഥലത്ത് പരിശോധന നടത്തിയത്. ‌ അതിക്രമം കാട്ടിയ കുറ്റക്കാരെ കണ്ടെത്തി ശക്തമായ നടപടി സ്വീകരിക്കണമെന്നാണ് വ്യാപകമായി ആവശ്യം ഉയരുന്നത്. ഈ പ്രദേശത്ത് പോലീസ് രാത്രികാല പട്രോളിംഗ് ശക്തമാക്കണമെന്നും നാട്ടുകാർ ആവശ്യപ്പെട്ടു. കുറ്റവാളികളെ നിയമത്തിനു മുമ്പിൽ കൊണ്ടുവരണമെന്ന് എകെസിസി കൂരാച്ചുണ്ട്: കുളത്തുവയൽ സെന്‍റ് ജോർജ് തീർഥാടന കേന്ദ്രത്തിലെ ഗ്രോട്ടോകൾ സാമൂഹിക വിരുദ്ധർ നശിപ്പിച്ച സംഭവത്തിൽ കത്തോലിക്ക കോൺഗ്രസ് കൂരാച്ചുണ്ട് ഫൊറോന കമ്മിറ്റി ശക്തമായി അപലപിച്ചു. കുറ്റക്കാർക്കെതിരേ ശക്തമായ നടപടികൾ സ്വീകരിക്കണമെന്നും സ്ഥലം സന്ദർശിച്ച നേതാക്കൾ ആവശ്യപ്പെട്ടു. ഓരോ വ്യക്തികളുടെയും വിശ്വാസത്തെയും ആരാധനാലയങ്ങളെയും സംരക്ഷിക്കാൻ സർക്കാർ പ്രതിജ്ഞാബദ്ധമാണ്. അക്കാര്യത്തിൽ സർക്കാർ നീതി പുലർത്തണമെന്നും അഭിപ്രായപ്പെട്ടു. തുടർന്നും ഇത്തരത്തിലുള്ള അനിഷ്ട സംഭവങ്ങൾ ഉണ്ടാകാതിരിക്കാൻ ബന്ധപ്പെട്ടവർ ആവശ്യമായ നടപടികൾ കൈക്കൊള്ളണമെന്നും അല്ലാത്തപക്ഷം ശക്തമായ പ്രതിഷേധം ഉയരുമെന്നും നേതാക്കൾ അറിയിച്ചു.

കത്തോലിക്ക കോൺഗ്രസ് ഫൊറോന ഡയറക്ടർ ഫാ. വിൻസെന്‍റ് കണ്ടത്തിൽ, രൂപത ജനറൽ സെക്രട്ടറി ജോൺസൺ കക്കയം, ഫൊറോന വൈസ് പ്രസിഡന്‍റ് നിമ്മി പൊതിയിട്ടേൽ, കമ്മിറ്റി അംഗം വി.ടി. തോമസ് വെളിയംകുളം, കല്ലാനോട് യൂണിറ്റ് പ്രസിഡന്‍റ് ദാസ് കാനാട്ട്, ജെയിംസ് കൂരാപ്പിള്ളിൽ എന്നിവർ സംഭവസ്ഥലം സന്ദർശിച്ചു.

കലാകാരന്മാരെ പ്രോത്സാഹിപ്പിക്കുന്നതിലൂടെ‌ ലക്ഷ്യമിടുന്നത് നാടിന്‍റെ പുരോഗതി: മന്ത്രി സജി ചെറിയാന്‍

കൊയിലാണ്ടി: കലകളെയും കലാകാരന്മാരെയും പ്രോത്സാഹിപ്പിക്കുന്നത് വഴി നാടിന്‍റെ സാംസ്‌കാരിക പുരോഗതിയാണ് സര്‍ക്കാര്‍ ലക്ഷ്യമിടുന്നതെന്ന് സാംസ്‌കാരിക മന്ത്രി സജി ചെറിയാന്‍. പത്മശ്രീ മാണി മാധവ ചാക്യാര്‍ കലാപഠന കേന്ദ്രം ഉദ്ഘാടനം ചെയ്യുകയായിരുന്നു അദ്ദേഹം. കലാകാരന്മാര്‍ നമ്മുടെ സംസ്‌കാരത്തിന്‍റെ വേരുകളാണ്. അവരെ ഓര്‍മിക്കുകയും ആദരിക്കുകയും ചെയ്യേണ്ടത് നമ്മുടെ കടമയാണ്. കേരളത്തിലെ സാംസ്‌കാരിക പൈതൃകത്തിന് മാണി മാധവ ചാക്യാര്‍ നല്‍കിയ സംഭാവനകള്‍ക്ക് പകരം വയ്ക്കാനാകില്ലെന്നും മന്ത്രി കൂട്ടിച്ചേര്‍ത്തു. ചടങ്ങില്‍ ടി.പി. രാമകൃഷ്ണന്‍ എംഎല്‍എ അധ്യക്ഷത വഹിച്ചു. ടി.പി. രാമകൃഷ്ണന്‍ എംഎല്‍എയുടെ പ്രാദേശിക വികസന നിധിയില്‍നിന്ന് അനുവദിച്ച 75 ലക്ഷം രൂപ ചെലവില്‍ ജന്മദേശമായ അരിക്കുളം പഞ്ചായത്തിലെ കാരയാട് തിരുവങ്ങായൂര്‍ ശിവക്ഷേത്രത്തിന് സമീപമാണ് സാംസ്‌കാരിക പഠനകേന്ദ്രം നിര്‍മിച്ചത്. മാണി മാധവ ചാക്യാരുടെ കുടുംബം സൗജന്യമായി നല്‍കിയ പത്തുസെന്‍റ് സ്ഥലത്താണ് കെട്ടിടം. സാംസ്‌കാരിക കേന്ദ്രത്തിലെ ഫര്‍ണിച്ചറുകള്‍ക്കായി മൂന്ന് ലക്ഷം രൂപ പന്തലായനി ബ്ലോക്ക് പഞ്ചായത്ത് അനുവദിച്ചിട്ടുണ്ട്. അരിക്കുളം ഗ്രാമപഞ്ചായത്ത് അസി. എന്‍ജിനീയര്‍ അഖില ഉണ്ണികൃഷ്ണന്‍ റിപ്പോര്‍ട്ട് അവതരിപ്പിച്ചു. സാഹിത്യ അക്കാദമി സെക്രട്ടറി സി.പി. അബൂബക്കര്‍, പത്മാവതി ഇലോടമ്മ, മാണി നീലകണ്ഠന്‍ ചാക്യാര്‍, പൊതിയില്‍ നാരായണ ചാക്യാര്‍, പി.കെ. ഹരീഷ് നമ്പ്യാര്‍, മാണി മാധവാനന്ദ് ചാക്യാര്‍ എന്നിവര്‍ വിശിഷ്ടാതിഥികളായി. പന്തലായനി ബ്ലോക്ക് പഞ്ചായത്ത് പ്രസിഡന്‍റ് പി. ബാബുരാജ്, അരിക്കുളം പഞ്ചായത്ത് പ്രസിഡന്‍റ് എ.എം. സുഗതന്‍, വൈസ് പ്രസിഡന്‍റ് കെ.പി. രജനി, ജില്ലാ പഞ്ചായത്ത് അംഗം എം.പി. ശിവാനന്ദന്‍, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷന്‍ കെ. അഭിനീഷ്, അംഗം ടി.എം. രജില തുടങ്ങിയവര്‍ പ്രസംഗിച്ചു.

ഗാന്ധിജിയും ഗുരുവും വിവേചനരഹിതമായ സമൂഹത്തിനുവേണ്ടി നിലക്കൊണ്ടു: സമദാനി

കോഴിക്കോട്: മഹാത്മാഗാന്ധിയും ശ്രീനാരായണഗുരുവും മനുഷ്യത്വത്തിന്‍റെയും സാമൂഹിക സഹവര്‍ത്തിത്വത്തിന്‍റെയും തത്വവും പ്രയോഗവും നിറവേറ്റിയ മഹാപുരുഷന്മാരായിരുന്നുവെന്ന് എം.പി.അബ്ദുസമദ് സമദാനി എംപി. ജവഹര്‍ലാല്‍ നെഹ്‌റു നാഷണല്‍ ലീഗല്‍ ആന്‍ഡ് സോഷ്യല്‍ ഫോറം കോഴിക്കോട്ട് സംഘടിപ്പിച്ച ദേശീയ സംവാദം ഉദ്ഘാടനം ചെയ്യുകയായിരുന്നു അദ്ദേഹം. ദര്‍ശനങ്ങളുടെയും രീതിശാസ്ത്രങ്ങളുടെയും കാര്യത്തില്‍ വിശദാംശങ്ങളുടെ വ്യത്യാസങ്ങളുണ്ടാകാമെങ്കിലും ഇരുവരും ജാതീയതയുടെ ഉന്മൂലനത്തിനും വിവേചനരഹിതമായ സമൂഹത്തിനും വേണ്ടിയാണ് നിലകൊണ്ടത്. വിവിധങ്ങളായ രീതികളില്‍ വിവേചനങ്ങള്‍ തലപൊക്കുന്ന ഇക്കാലത്ത് ഇരുവരുടെയും സന്ദേശങ്ങളും കര്‍മ മാര്‍ഗങ്ങളും കൂടുതല്‍ പഠിക്കുകയും പ്രചരിപ്പിക്കുകയും ചെയ്യേണ്ടതുണ്ടെന്ന് അദ്ദേഹം പറഞ്ഞു. മഹാത്മാഗാന്ധിയും ഗുരുവും നല്‍കിയ ദര്‍ശനങ്ങള്‍ വര്‍ത്തമാന കാലഘട്ടത്തില്‍ ഏറെ പ്രസക്തമാണെന്നും അവയുടെ യഥാര്‍ഥത്തിലുള്ള നടത്തിപ്പാണ് വര്‍ത്തമാനകാല പ്രശ്‌നങ്ങള്‍ക്കുള്ള ഏക പരിഹാരമെന്നും ഡോ. എം.എന്‍ കാരശേരി പറഞ്ഞു. സൂംബാ ഡാന്‍സിന് എതിരേയുള്ള അഭിപ്രായപ്രകടനങ്ങളും സിനിമയില്‍ ജാനകി എന്ന പേര് ഉപയോഗിക്കുന്നതിന് എതിരേയുള്ള പ്രതികരണളും രാജ്യത്തെ 100 വര്‍ഷം പിന്നോട്ട് നയിക്കുമെന്ന് അദ്ദേഹം പറഞ്ഞു. ഫോറം പ്രസിഡന്‍റ് അഡ്വ. പി.വി. മോഹന്‍ലാല്‍ അധ്യക്ഷത വഹിച്ചു. യുഡിഎഫ് ജില്ലാ ചെയര്‍മാന്‍ കെ. ബാലനാരായണന്‍, ഡിസിസി ഭാരവാഹികളായ അഡ്വ.എം. രാജന്‍, പി. മുഹമ്മദ് കോയ, ബി.പി. റഷീദ്, ടി.കെ. സത്യനാഥന്‍, ആയിഷ മുഹമ്മദ് , നിസാര്‍ പുനത്തില്‍, ടി.പി. നസീര്‍ ഹുസൈന്‍ എന്നിവര്‍ പ്രസംഗിച്ചു.

ദൃശ്യം മോഡല്‍ കൊലപാതകം: മുഖ്യപ്രതിയുടെ കാര്‍ കസ്റ്റഡിയിലെടുത്തു

കോഴിക്കോട്: സാമ്പത്തിക പണിമിടപാടുമായി ബന്ധപ്പെട്ട തര്‍ക്കത്തെ തുടര്‍ന്ന് ബത്തേരി പൂമല ചെട്ടിമൂല സ്വദേശി ഹേമചന്ദ്രനെ ദൃശ്യം മോഡലില്‍ കൊലപ്പെടുത്തി കുഴിച്ചിട്ട കേസിലെ മുഖ്യപ്രതി ബത്തേരി പഴുപ്പത്തൂര്‍ സ്വദേശി പുല്ലമ്പി വീട്ടില്‍ നൗഷാദി (33)ന്‍റെ ഉടമസ്ഥയിലുള്ള കാര്‍ പോലീസ് മലപ്പുറത്തുനിന്നു പോലീസ് കണ്ടെടുത്തു. ഹേമചന്ദ്രനെ കൊലപ്പെടുത്തി മൃതദേഹം െകാണ്ടുപോയത് ഈ കാറിലാണെന്നാണ് പോലീസ് സംശയിക്കുന്നത്. കാര്‍ ഫോറന്‍സിക്‌ പരിശോധനയ്ക്ക് വിധേയമാക്കും. കാറിന്‍റെ ഡിക്കിയില്‍ പെയിന്‍റടിച്ചിട്ടുണ്ട്. മൃതദേഹം കൊണ്ടുപോയതിന്‍റെ തെളിവുകള്‍ നശിപ്പിക്കാനാണോ പെയിന്‍റടിച്ചതെന്നു പോലീസ് അന്വേഷിക്കുന്നുണ്ട്. നൗഷാദിന്‍റെ ഉടമസ്ഥതയിലുള്ള കാര്‍ മലപ്പുറം സ്വദേശിക്ക് പണയത്തിന് കൊടുത്തിരിക്കുകയായിരുന്നു. കോഴിക്കോട് മെഡിക്കല്‍ കോളജ് ഇന്‍സ്‌പെക്ടര്‍ കെ.കെ. ആഗേഷിന്‍റെ നേതൃത്വത്തില്‍ ഡാന്‍സാഫ് അംഗങ്ങള്‍ കാര്‍ കസ്റ്റഡിയിലെടുത്ത് മെഡിക്കല്‍ കോളജ് പോലീസ് സ്റ്റേഷനില്‍ എത്തിച്ചു. ഹേമചന്ദ്രന്‍റെ മൃതദേഹം കഴിഞ്ഞമാസം 28നാണ് നീലഗിരിയിലെ ചേരമ്പാടി വനമേഖലയില്‍ കുഴിച്ചിട്ടനിലയില്‍ കണ്ടെത്തിയത്. സാമ്പത്തിക ഇടപാടിന്‍റെ പേരില്‍ സ്ത്രീകളെ ഉള്‍പ്പെടെ ഉപയോഗിച്ച് ഹേമചന്ദ്രനെ കെണിയില്‍പെടുത്തി വയനാട്ടിലേക്ക് കൊണ്ടുപോയി കൊലപ്പെടുത്തുകയായിരുന്നുവെന്നാണ് പോലീസ് കണ്ടെത്തിയിരിക്കുന്നത്. ഒന്നരവര്‍ഷം മുമ്പ് കോഴിക്കോട്ടുനിന്നാണ് ഹേമചന്ദ്രനെ കാണാതായത്. കോഴിക്കോട് മെഡിക്കല്‍ കോളജിന് സമീപമുള്ള മായനാട് നടപ്പാലത്തുള്ള വാടകവീട്ടില്‍നിന്ന് ടൗണിലേക്കാണെന്നു പറഞ്ഞ് പോയ ഹേമചന്ദ്രനെ കാണാനില്ലെന്ന് ചൂണ്ടിക്കാട്ടി 2024 ഏപ്രില്‍ ഒന്നിന് ഭാര്യ മെഡിക്കല്‍ കോളജ് പോലീസില്‍ പരാതിനല്‍കിയിരുന്നു. തുടര്‍ന്നുള്ള അന്വേഷണത്തിലാണ് ഹേമചന്ദ്രന്‍ കൊല്ലപ്പെട്ടുവെന്ന സൂചനയിലേയ്‌ക്കെത്തിയത്. റിയല്‍ എസ്റ്റേറ്റ്, സ്വകാര്യ ചിട്ടി കമ്പനി, റെന്‍റ് എ കാര്‍ തുടങ്ങിയ ഇടപാടുകള്‍ നടത്തിയിരുന്ന ഹേമചന്ദ്രന്‍ 20 ലക്ഷത്തോളം രൂപ പലര്‍ക്കും നല്‍കാനുണ്ടായിരുന്നതായാണ് പോലീസിനു ലഭിച്ചിരിക്കുന്ന സൂചന.

മലബാര്‍ റിവര്‍ ഫെസ്റ്റിവല്‍: മഴയും കോടയും നിറഞ്ഞ വീഥിയിലൂടെ മണ്‍സൂണ്‍ ട്രക്കിംഗ്

കോടഞ്ചേരി: പാട്ടുപാടിയും കഥ പറഞ്ഞും കോട നിറഞ്ഞ മലകളുടെ ഭംഗി ആസ്വദിച്ചും മണ്‍സൂണ്‍ ട്രക്കിംഗില്‍ പങ്കെടുക്കാനെത്തിയവര്‍ തുഷാരഗിരിയിലെ നീരാറ്റ്കുന്ന് കയറി. 24 മുതല്‍ 27 വരെ തുഷാരഗിരിയില്‍ ചാലിപ്പുഴയിലും ഇരുവഞ്ഞിപ്പുഴയിലും നടക്കുന്ന മലബാര്‍ റിവര്‍ ഫെസ്റ്റിവലിന്‍റെ പതിനൊന്നാം പതിപ്പിന്‍റെ ഭാഗമായാണ് കോടഞ്ചേരി പഞ്ചായത്തിന്‍റെ ആഭിമുഖ്യത്തില്‍ ട്രക്കിംഗ് സംഘടിപ്പിച്ചത്. പരിപാടിയുടെ ഫ്‌ളാഗ് ഓഫ് കേരള ടൂറിസം ഇന്‍ഫ്രാസ്ട്രക്ചര്‍ ചെയര്‍മാന്‍ എസ്.കെ. സജീഷ് നിര്‍വഹിച്ചു. കോടഞ്ചേരി ഗ്രാമപഞ്ചായത്ത് പ്രസിഡന്‍റ് അലക്‌സ് തോമസ് ചെമ്പകശേരി അധ്യക്ഷത വഹിച്ചു. നാലാം വാര്‍ഡ് മെമ്പര്‍ സിസിലി ജേക്കബ്, ഡിടിപിസി ഡെസ്റ്റിനേഷന്‍ മാനേജര്‍ ഷെല്ലി മാത്യു, വിവിധ ഉപസമിതി അംഗങ്ങളായ സി.എസ്. ശരത്, എം.എസ്. ഷെജിന്‍, പോള്‍സണ്‍ അറയ്ക്കല്‍, വനസംരക്ഷണ സമിതി പ്രസിഡന്‍റ് ബേബി കോട്ടപ്പുള്ളി, അധ്യാപകരായ ശില്‍പ, നിധിന്‍ എന്നിവര്‍ നേതൃത്വം നല്‍കി. കോടഞ്ചേരി ഗവ. കോളജിലെയും കൈതപ്പൊയില്‍ ലിസ കോളജിലെയും വിദ്യാര്‍ഥികളുള്‍പ്പെടെ നൂറിലധികം പേര്‍ പരിപാടിയില്‍ പങ്കാളികളായി.

കുറ്റിച്ചിറ കുളത്തിലെ സുരക്ഷാവീഴ്ച: കേസെടുത്തു

കോഴിക്കോട്: കുറ്റിച്ചിറ കുളത്തിൽ യാതൊരു സുരക്ഷാ മുന്നറിയിപ്പും സ്ഥാപിക്കാത്തതു കാരണം കുളിക്കാനിറങ്ങിയ വിദ്യാർഥി മുങ്ങിമരിച്ചതായി പരാതിയുയർന്ന സാഹചര്യത്തിൽ കോഴിക്കോട് നഗരസഭാ സെക്രട്ടറി വിശദമായ അന്വേഷണം നടത്തി റിപ്പോർട്ട് സമർപ്പിക്കണമെന്ന് മനുഷ്യാവകാശ കമ്മീഷൻ ജുഡീഷൽ അംഗം കെ. ബൈജുനാഥ് നിർദേശം നൽകി.15 ദിവസത്തിനകം റിപ്പോർട്ട് സമർപ്പിക്കണം. ഓഗസ്റ്റിൽ നടക്കുന്ന സിറ്റിംഗിൽ കേസ് പരിഗണിക്കും. മഴക്കാലമായതിനാൽ കുളത്തിൽ മൂന്നാൾപൊക്കത്തിൽ വെള്ളമുണ്ട്. കുളിക്കാനും നീന്തൽ പരിശീലനത്തിനുമായി ആളുകൾ എത്തുന്ന ഇവിടെ സുരക്ഷാ ഉപകരണങ്ങളോ മുന്നറിയിപ്പ് ബോർഡോ ഇല്ല. വെള്ളത്തിൽ വീണാൽ രക്ഷപ്പെടുത്താനാവശ്യമായ ഉപകരണങ്ങൾ മുമ്പുണ്ടായിരുന്നെങ്കിലും നഷ്ടമായതായി മനസിലാക്കുന്നു. കുളം നവീകരിച്ചതോടെ നിരവധിയാളുകൾ ഇവിടെയെത്തുന്നുണ്ട്. കുളത്തിന്‍റെ സ്വഭാവം മനസിലാക്കാത്തവർ കുളത്തിലിറങ്ങുന്നത് പതിവാണ്. ലൈറ്റുകൾ കേടായി കത്താത്ത നിലയിലാണ്. ഇക്കഴിഞ്ഞ ദിവസം ടി.ടി. യഹിയ എന്ന വിദ്യാർഥിയാണ് ഇവിടെ മുങ്ങി മരിച്ചത്.

ആരോഗ്യ മേഖല തകര്‍ന്നതിനുത്തരവാദി സംസ്ഥാന സര്‍ക്കാര്‍: പി.എം.എ. സലാം

കോഴിക്കോട്: ലോകത്ത് തന്നെ മാതൃകായിരുന്ന കേരളത്തിലെ ആരോഗ്യ രംഗം തകര്‍ന്നതിനുത്തുരവാദി സംസ്ഥാന സര്‍ക്കാരാണെന്നും മന്ത്രി വീണാ ജോര്‍ജിന് മന്ത്രി സ്ഥാനത്ത് തുടരാന്‍ അര്‍ഹതയില്ലെന്നും മുസ്ലിം ലീഗ് സംസ്ഥാന ജനറല്‍ സെക്രട്ടറി പി.എം.എ. സലാം. സാധാരണക്കാരായ ജനങ്ങള്‍ ആശ്രയിക്കുന്ന സര്‍ക്കാര്‍ ആശുപത്രികള്‍ ഇന്ന് ആവശ്യത്തിന് ഡോകര്‍മാരും ജീവനക്കാരും ഇല്ലാതെ ബുദ്ധിമുട്ട് അനുഭവിക്കുകയാണെന്നും ആവശ്യത്തിന് മരുന്നുകളോ ഉപകരണങ്ങളോ ലഭ്യമല്ലെന്നും അദ്ദേഹം ചൂണ്ടിക്കാട്ടി. ആരോഗ്യ വകുപ്പിലെ കെടുകാര്യസ്ഥതയില്‍ ആരോഗ്യ മന്ത്രി രാജി വയ്ക്കുക,അടച്ച് പൂട്ടിയ പിഎംഎസ്എസ്‌വൈ ബ്ലോക്ക് അടിയന്തിരമായി തുറക്കുക തുടങ്ങിയ ആവശ്യങ്ങള്‍ ഉന്നയിച്ച് മുസ്ലിം ലീഗ്് കോഴിക്കോട് ജില്ലാ കമ്മിറ്റി കോഴിക്കോട് മെഡിക്കല്‍ കോളജ് പരിസരത്ത് നടത്തിയ ബഹുജന പ്രക്ഷോഭം ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് എം.എ. റസാഖ് അധ്യക്ഷനായിരുന്നു. ജില്ലാ ജനറല്‍ സെക്രട്ടറി ടി.ടി. ഇസ്മായില്‍,ട്രഷറര്‍ സൂപ്പി നരിക്കാട്ടേരി , ഉമ്മര്‍ പാണ്ടികശാല, സി.പി. ചെറിയ മുഹമ്മദ്, സി.കെ.സുബൈര്‍, അഹമ്മദ് പുന്നക്കല്‍, വി.എം ഉമ്മര്‍, എം.സി വടകര, പി.കെ.ഫിറോസ്, നൂര്‍ബിന റഷീദ് എന്നിവര്‍ പ്രസംഗിച്ചു.

കടലിൽ കുടുങ്ങിയ തൊഴിലാളികളെ രക്ഷപ്പെടുത്തി

കൊയിലാണ്ടി: മത്സ്യബന്ധനത്തിന് പോയി വഞ്ചിയു‌ടെ എൻജിൻ തകരാറായി കടലിൽ കുടുങ്ങിയ 30 തൊഴിലാളികളെ സുരക്ഷിതരായി കരയ്ക്കെത്തിച്ചു. കൊയിലാണ്ടിയിൽ നിന്നും മത്സ്യബന്ധനത്തിന് പോയ വിഷ്ണുമൂർത്തി എന്ന വഞ്ചിയാണ് എൻജിൻ തകരാറിനെ തുടർന്ന് കടലിൽ കുടുങ്ങിയത്. ഫിഷറീസ് അസി. ഡയറക്ടർ സുനീറിന്‍റെ നിർദേശപ്രകാരം സബ് ഇൻസ്പെക്ടർ രാജൻ, എസ്‌സിപിഒ ബൈജു, റസ്ക്യു ഗാർഡുമാരായ നിധിഷ്, ജിജിൻ എന്നിവർ ചേർന്നാണ് വഞ്ചി കൊയിലാണ്ടി ഹാർബറിൽ സുരക്ഷിതമായി എത്തിച്ചത്.

ആശുപത്രിയിൽ ചികിത്സക്കെത്തിയ രോഗിയുടെ ബാഗ് മോഷണംപോയി

കൊയിലാണ്ടി: താലൂക്ക് ആശുപത്രിയിൽ ചികിത്സക്കെത്തിയ രോഗിയുടെ ബാഗ് മോഷണം പോയി. ഉള്ളൂർ സ്വദേശി ബീനയുടെ ബാഗാണ് മോഷ്ടിക്കപ്പെട്ടത്. ചൊവ്വാഴ്ച രാവിലെയാണ് സംഭവം. ഒപി വിഭാഗത്തിൽ കാണിക്കാനായി എത്തിയപ്പോൾ വെയിറ്റിംഗ് ഏരിയയിൽ കസേരയിൽ ബാഗ് വയ്ക്കുകയും ഡോക്ടറെ കാണിക്കാനായി അകത്ത് കയറിയപ്പോൾ എടുക്കാൻ മറക്കുകയുമായിരുന്നു. തിരിച്ചെത്തിയപ്പോഴാണ് ബാഗ് നഷ്ടമായെന്ന് മനസിലായത്. 2000 രൂപയും, മൊബൈൽ ഫോണും ഒരു മോതിരവുമാണ് ബാഗിൽ ഉണ്ടായിരുന്നത്. സംഭവത്തിന്‍റെ സിസിടിവി ദൃശ്യങ്ങൾ പുറത്ത് വന്നിട്ടുണ്ട്. പ്രായമുള്ള ഒരാൾ തന്‍റെ കൈയിലുള്ള കുട ബാഗിൽ വച്ചാണ് മോഷണം നടത്തിയത്.

രാസവള വില വർധന; ‌കർഷകർ പോസ്റ്റ് ഓഫീസ് മാർച്ച് നടത്തി

താമരശേരി: രാസവള വില വർധനവ് തടയുക, സബ്സിഡി വെട്ടിക്കുറച്ച കേന്ദ്രസർക്കാർ നടപടി പിൻവലിക്കുക എന്നീ ആവശ്യങ്ങൾ ഉന്നയിച്ച് കേരള കർഷക സംഘം താമരശേരി ഏരിയാ കമ്മിറ്റിയുടെ നേതൃത്വത്തിൽ കർഷകർ താമരശേരി പോസ്റ്റ് ഓഫീസ് മാർച്ചും ധർണയും നടത്തി. കർഷക സംഘം ജില്ലാ കമ്മിറ്റി അംഗം ടി.കെ. അരവിന്ദാക്ഷൻ ഉദ്ഘാടനം ചെയ്തു. പി.സി. അബ്ദുൾ അസീസ് അധ്യക്ഷത വഹിച്ചു. പി.സി. വേലായുധൻ, കെ.കെ. വിജയൻ, കെ.എസ്. മനോജ്, കെ. ജമീല, എൻ.വി. രാജൻ, കെ.പി.സുബീഷ് എന്നിവർ പ്രസംഗിച്ചു.

വന്യജീവി ആക്രമണം : ‘ജനങ്ങളെ രക്ഷിക്കാൻ സർക്കാർ അടിയന്തര നടപടി സ്വീകരിക്കണം’

പെരുവണ്ണാമൂഴി: വന്യജീവികളുടെ ആക്രമണത്തിൽ നിന്ന് ജനങ്ങളുടെ ജീവനും സ്വത്തിനും സംരക്ഷണം നൽകാൻ സർക്കാർ അടിയന്തര നടപടി സ്വീകരിക്കണമെന്ന് ബിജെപി ജില്ല സെക്രട്ടറി കെ.കെ. രജീഷ് ആവശ്യപ്പെട്ടു. കാട്ടാനകളുടെ ആക്രമണമുണ്ടായ ചക്കിട്ടപാറ പഞ്ചായത്തിലെ പെരുവണ്ണാമൂഴി, പന്നിക്കോട്ടൂർ, ചെമ്പനോട പ്രദേശങ്ങളിൽ കൃഷിനാശമുണ്ടായ ഇടങ്ങൾ അദ്ദേഹവും സംഘവും സന്ദർശിച്ചു. പ്രശ്‌നത്തിൽ സർക്കാർ അടിയന്തരമായി ഇടപെട്ടില്ലെങ്കിൽ പെരുവണ്ണാമൂഴി ഫോറസ്റ്റ് ഓഫീസിലേക്ക് ബഹുജന മാർച്ച് സംഘടിപ്പിക്കുമെന്നും രജീഷ് മുന്നറിയിപ്പ് നൽകി. ബിജെപി ജില്ലാ സെക്രട്ടറി തറമൽ രാഗേഷ്, പാർട്ടി ചക്കിട്ടപാറ പഞ്ചായത്ത് കമ്മിറ്റി പ്രസിഡന്‍റ് ബാബു പുതുപ്പറമ്പിൽ, ശ്രീനിവാസൻ മനയ്ക്കൽ, വി.വി. രാജൻ, അനൂപ് പറമ്പിൽ, സിബി പന്നിക്കോട്ടൂർ, ചോയി പൂക്കോട്ട്ചാലിൽ എന്നിവരും സന്ദർശക സംഘത്തിൽ ഉണ്ടായിരുന്നു.

പേരാമ്പ്രയിൽ വനിതാ വെൽനസ് സെന്‍റർ തുറന്നു

പേരാമ്പ്ര: ആരോഗ്യ മുന്നേറ്റത്തിലേക്കുള്ള പ്രധാന ചുവടുവയ്പ്പായ വനിതാ വെൽനസ് സെന്‍റർ പേരാമ്പ്ര പൈതോത്ത് റോഡിൽ പഞ്ചായത്ത് പ്രസിഡന്‍റ് വി.കെ. പ്രമോദ് ഉദ്ഘാടനം ചെയ്തു. സ്ത്രീകളിൽ പൊതുവെ കണ്ടുവരുന്ന ജീവിത ശൈലീ രോഗങ്ങൾക്കും വർധിച്ചുവരുന്ന മാനസിക സമ്മർദത്തിനും ഉത്തമ പരിഹാരമാണ് വെൽനസ് സെന്‍റർകൊണ്ട് ലക്ഷ്യമിടുന്നതെന്ന് അദ്ദേഹം പറഞ്ഞു. ഇരുപതോളം ആധുനിക വ്യായാമ ഉപകരണങ്ങളും യോഗ, സൂംബ ഡാൻസ് തുടങ്ങിയ വ്യായാമമുറകൾ ചെയ്യുന്നതിനുമുള്ള പ്രത്യേക സൗകര്യവും വനിതകൾക്കായി ഇവിടെ ഒരുക്കിയിട്ടുണ്ട്. 14,12937രൂപ പഞ്ചായത്ത് ഫണ്ടും അഞ്ച് ലക്ഷം രൂപ ജില്ലാ പഞ്ചായത്ത് ഫണ്ടും ഉപയോഗിച്ചാണ് സെന്‍റർ പണി പൂർത്തീകരിച്ചത്. ചടങ്ങിൽ പഞ്ചായത്ത് വൈസ് പ്രസിഡന്‍റ് കെ.എം. റീന അധ്യക്ഷത വഹിച്ചു. ഐസിഡിഎസ് സൂപ്പർ വൈസർ കെ. രേഷ്മ റിപ്പോർട്ട് അവതരിപ്പിച്ചു.

ബി.പി. മൊയ്തീൻ അനുസ്മരണം സംഘടിപ്പിച്ചു

മുക്കം: ബി.പി. മൊയ്തീന്‍റെ 43-ാം ചരമ വാർഷികം ബി.പി. മൊയ്തീൻ സേവാ മന്ദിറും ബി.പി. മൊയ്തീൻ ലൈബ്രറിയും ചേർന്ന് വിവിധ പരിപാടികളോടെ ആചരിച്ചു. അനുസ്മരണ സമ്മേളനംഡോ. എം.എൻ. കാരശേരി ഉദ്ഘാടനം ചെയ്തു. പ്രഫ. ഹമീദ് ചേന്ദമംഗല്ലൂർ അധ്യക്ഷത വഹിച്ചു. കേരള സംഗീത നാടക അക്കാദമിയുടെ ഗുരുപൂജ അവാർഡ് നേടിയ മുക്കം സലിം, എഴുത്തുകാരനും കലാകാരനുമായ മുക്കം ഭാസി എന്നിവരെ അഡ്വ. ആനന്ദ കനകം ഷാളണിയിച്ചാദരിച്ചു. മുക്കം ഭാസിയുടെ പുതിയ പുസ്തകം "മുക്കത്തിന്‍റെ ചരിത്ര വീഥികളിലൂടെ' കഥാകൃത്ത് എ.വി. സുധാകരൻ പരിചയപ്പെടുത്തി. സി.ഡി. വർക്കി, എം. സുകുമാരൻ, മുക്കം ബാലകൃഷ്ണൻ, നാസർ കൊളായി, എ.എം. ജമീല, കെ. രവീന്ദ്രൻ, വി. ഇന്ദിര, കെ.വി. ജസിമോൾ, ദാമോദരൻ കോഴഞ്ചേരി, പ്രഭാകരൻ മുക്കം, ബി. അലി ഹസൻ, ഡോ. ബേബി ഷക്കീല എന്നിവർ പ്രസംഗിച്ചു.

കാർ വൈദ്യുത പോസ്റ്റിൽ ഇടിച്ചുതകർന്നു

കൂടരഞ്ഞി: കക്കാടംപൊയിൽ-കോടഞ്ചേരി മലയോര ഹൈവേയിൽ വാഹനാപകടം. കൂടരഞ്ഞി പോസ്റ്റോഫീസ് ജംഗ്ഷന് സമീപം കൂമ്പാറയിൽ നിന്നും ഇറക്കം ഇറങ്ങിവരികയായിരുന്ന കാർ നിയന്ത്രണംവിട്ട് വീട്ടുമതിലിലും വൈദ്യുത പോസ്റ്റിലും ഇടിക്കുകയായിരുന്നു. ഇന്നലെ രാവിലെ 11നാണ് സംഭവം. പരിക്കേറ്റ കക്കാടംപൊയിൽ സ്വദേശി രജീഷ്, കൂമ്പാറ സ്വദേശി ബിനു എഴുത്താണിക്കുന്നേൽ എന്നിവരെ കൂടരഞ്ഞിയിലെ സ്വകാര്യ ആശുപത്രിയിലും തുടർന്ന് മണാശേരിയിലെ മെഡിക്കൽ കോളജ് ആശുപത്രിയിലും പ്രവേശിപ്പിച്ചു. ഇരുവരുടെയും പരിക്ക് ഗുരുതരമല്ല. അപകടത്തിൽ കാറിന്‍റെ മുൻഭാഗം തകർന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]