കീഴാറ്റൂർ: മൃഗസംരക്ഷണ വകുപ്പിന്‍റെ 2021-22 വർഷത്തെ മികച്ച കർഷകർക്കുള്ള ജില്ലാതല പുരസ്കാരങ്ങൾ കീഴാറ്റൂർ ഗ്രാമപഞ്ചായത്ത് ഓഡിറ്റോറിയത്തിൽ അഡ്വ. യു.എ ലത്തീഫ് എംഎൽഎ വിതരണം ചെയ്തു.
ജില്ലയിലെ മികച്ച ക്ഷീരകർഷകനായി തെരഞ്ഞെടുത്ത ഷൗക്കത്തലി പന്തലിങ്ങൽ, മികച്ച സമ്മിശ്ര കർഷകൻ മാത്യു പുത്തൻപുരക്കൽ വടപുറം എന്നിവർക്കാണ് പുരസ്കാരം നൽകിയത്. മികച്ച ക്ഷീരകർഷകന് 20,000 രൂപയും മികച്ച സമ്മിശ്ര കർഷകന് 10,000 രൂപയും കൂടാതെ പ്രശസ്തി പത്രവും ഫലകവുമാണ് നൽകിയത്. ചടങ്ങിൽ കീഴാറ്റൂർ ഗ്രാമപഞ്ചായത്ത് പ്രസിഡന്‍റ് ജമീല ചാലിയതൊടി അധ്യക്ഷത വഹിച്ചു. ജില്ലാ പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർപേർസണ്‍ സറീന ഹസീബ്, പെരിന്തൽമണ്ണ ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ മുസ്തഫ, മന്പാട് ഗ്രാമപഞ്ചായത്ത് പ്രസിഡന്‍റ് ശ്രനിവാസൻ എന്നിവർ വിശിഷ്ടാതിഥികളായിരുന്നു. ജില്ലാ മൃഗസംരക്ഷണ ഓഫീസർ ഡോ.പി.യു.അബ്ദുൾ അസീസ് പദ്ധതി വിശദീകരിച്ചു. പിആർഒ ഡോ.ഹാറൂണ്‍ അബ്ദുൾ റഷീദ് അവാർഡ് ജേതാക്കളെ പരിചയപ്പെടുത്തി.കീഴാറ്റൂർ ഗ്രാമപഞ്ചായത്ത് വൈസ് പ്രസിഡന്‍റ് എൻ. മുഹമ്മദ്, ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ അബ്ദുൾ അസീസ്, ഗ്രാമപഞ്ചായത്ത് സ്ഥിരം സമിതി അംഗങ്ങളായ സഫ്ന അനസ്, ബിന്ദുമാത്യു, ബഷീർ, ഗ്രാമ പഞ്ചായത്തംഗം ഉണ്ണികൃഷ്ണൻ, എഡിസിപി പെരിന്തൽമണ്ണ താലൂക്ക് കോ-ഓർഡിനേറ്റർ ഡോ.ശിവകുമാർ മന്പാട്, വെറ്ററിനറി സർജൻ ഡോ.സൂരജ്, എൽഎംടിസി ഡെപ്യൂട്ടി ഡയറക്ടർ ഇൻചാർജ് ഡോ.മധു, കീഴാറ്റൂർ വെറ്ററിനറി സർജൻ ഡോ. ലൈല എന്നിവർ പ്രസംഗിച്ചു. മൃഗസംരക്ഷണ മേഖലയിലെ വിവിധ വിഷയങ്ങളിൽ നടന്ന സെമിനാറുകൾക്ക് ഡോ.സവിത, ഡോ.ജിനു ജോണ് എന്നിവർ നേതൃത്വം നൽകി.