കരുവാരകുണ്ട്: വിദ്യാർഥികൾ ടെറസിൽ ചെയ്ത പച്ചക്കറി കൃഷിക്ക് നൂറുമേനി വിളവ്. തുവൂർ നീലാഞ്ചേരി ഹൈസ്കൂളിലെ വിദ്യാർഥികളാണ് സ്കൂൾ കെട്ടിടത്തിനു മുകളിൽ വിവിധ തരം പച്ചക്കറികൾ കൃഷി ചെയ്ത് വിജയം കൊയ്തത്.
വാർഡ് അംഗം കെ.സുജാത വിളവെടുപ്പുത്സവം ഉദ്ഘാടനം ചെയ്തു. പച്ചക്കറി വികസന പദ്ധതിയുടെ ഭാഗമായി സ്ഥാപനങ്ങളിലെ പ്രൊജക്ട് അധിഷ്ഠിത കൃഷിയിലുൾപ്പെടുത്തി രണ്ടു മാസം മുന്പാണ് വിദ്യാർഥികൾ ടെറസിൽ പച്ചക്കറി കൃഷി ആരംഭിച്ചത്.
സ്കൂളിലെ കാർഷിക ക്ലബ് തുവൂർ കൃഷി ഭവന്റെ സഹായത്തോടെയാണ് കൃഷി ചെയ്തത്. തക്കാളി, വെണ്ട, വഴുതന, കോളിഫ്ളവർ, ചീര തുടങ്ങി വിവിധയിനം കൃഷികളാണ് കെട്ടിടത്തിന് മുകളിൽ ചെയ്തത്. സ്കൂളിലെ ഉച്ചഭക്ഷണത്തിനു മായമില്ലാത്ത പച്ചക്കറി ലഭ്യമാകും എന്നതാണ് പദ്ധതിയുടെ ഗുണം.
ഇതോടൊപ്പം കുട്ടികളിൽ കാർഷിക താത്പ്പര്യം വർധിപ്പിക്കാനും പദ്ധതിയിലൂടെ സാധ്യമാകും.ചടങ്ങിൽ പ്രധാനാധ്യാപകൻ ടി.കെ.ഇബ്രാഹിം അധ്യക്ഷത വഹിച്ചു. കൃഷി ഓഫീസർ എം.ഷെഫീഖ് പദ്ധതി വിശദീകരണം നടത്തി.
എസ്എംസി ചെയർമാൻ കെ.പി.യൂസുഫ്, അധ്യാപകരായ ഇ.ജിതേഷ്, കെ.അസ്മാബി, ജയചന്ദ്രൻ, എം.രശ്മി, കെ. ശാലിനി, ഇ.സുജിത്ത് കുമാർ, പി.നിഷാന്ത്, വിദ്യാർഥികളായ എം.മുഹമ്മദ് ഫാത്തിഷ് ഉമർ, ടി.അർസൽ, ടി.കെ.ഇസാൻ, അംന ഫാത്തിമ തുടങ്ങിയവർ പങ്കെടുത്തു.