വെറ്റിലപ്പാറ : വെറ്റിലപ്പാറ ഗവണ്മെന്റ് ഹൈസ്കൂളിലെ അധ്യാപകരും പിടിഎ, എംടിഎ, എസ്എംസി ഭാരവാഹികളും ജനപ്രതിനിധികളും രാഷ്ട്രീയ പ്രമുഖരും വ്യവസായികളും ഡ്രൈവർമാരും ഒത്തു ചേർന്നു സ്കൂളിൽ ജന ജാഗ്രത സമിതിക്കു രൂപം നൽകി.
ലഹരി വിരുദ്ധ പ്രവർത്തനങ്ങളുടെ ആദ്യഘട്ടം എന്ന നിലയിൽ ഇന്നു ഗാന്ധി ജയന്തി മുതൽ ഡിസംബർ വരെയുള്ള കാലയളവിൽ വിപുലമായ കർമ പദ്ധതികൾ തയാറാക്കി സ്കൂളിൽ നടപ്പാക്കും. മദ്യം, മയക്കുമരുന്ന്, മറ്റു ലഹരിവസ്തുക്കൾ എന്നിവക്കെതിരെയുള്ള ബോധവത്കരണ പ്രവർത്തനങ്ങളും സേവനങ്ങളും എല്ലാവരിലേക്കും എത്തിക്കുന്നതിനും ലഹരിവസ്തുക്കളുടെ ദൂഷ്യവശങ്ങളെക്കുറിച്ചും ചികിത്സയുടെ പ്രാധാന്യത്തെക്കുറിച്ചും കുടുംബത്തിലും സമൂഹത്തിലും അവബോധം സൃഷ്ടിക്കുന്നതിനുമായാണ് കാന്പയിൻ സംഘടിപ്പിക്കുന്നത്.
സ്കൂളിന്റെ സമീപ പ്രദേശങ്ങളായ വെറ്റിലപ്പാറ, കിണറടപ്പൻ, വിളക്കുപറന്പ്, ഓടക്കയം എന്നി ഭാഗങ്ങളിൽ ലഹരിക്കെതിരെ ബോധവത്കരണ ക്ലാസ് നടത്താൻ ജാഗ്രത സമിതി തീരുമാനിച്ചു. ഇതിനായി അധ്യാപകരും വിദ്യാർഥികളും പിടിഎ മെംബർമാരും ചേർന്ന് സ്കിറ്റ്, ഷോർട്ട്് ഫിലിം എന്നിവ തയാറാക്കാനും സ്കൂൾ കാന്പസിനകം ലഹരി വിരുദ്ധ പ്രവർത്തനം കാര്യക്ഷമമാക്കുന്നതിനു കുട്ടികളിൽ നിന്നു ആന്റി നാർകോട്ടിക് ക്ലബ് രൂപീകരിക്കാനും തീരുമാനമായി. ഗാന്ധി ജയന്തി ദിനമായ ഇന്നു കർമപരിപാടികൾക്ക് തുടക്കമാകും.
സ്കൂൾ ഓഡിറ്റോറിയത്തിൽ നടന്ന യോഗത്തിൽ ഹെഡ്മിസ്ട്രസ് ലൗലി ജോണ്, ലഹരി വിരുദ്ധ കോ-ഓർഡിനേറ്റർ റോജൻ, അധ്യക്ഷൻ ഉസ്മാൻ പാറക്കൽ, ജോഷി, സജീവ്, അലി അക്ബർ, കൗണ്സിലർ മുഹ്സിന, എസ്എംസി ചെയർമാൻ മുജീബ്, ബേബി മാത്യു, അബ്ദുൾ റഷീദ്, ഷറഫുദീൻ കൊറളിയാടൻ എന്നിവർ പ്രസംഗിച്ചു. അധ്യാപക പ്രതിനിധികൾ, രാഷ്ട്രീയ പ്രമുഖർ, വ്യവസായികൾ, ഡ്രൈവർമാർ, ജനപ്രതിനിധികൾ എന്നിവർ പങ്കെടുത്തു.