ADVERTISEMENT

ADVERTISEMENT

ശ്രേയസ് പ്രവര്‍ത്തകര്‍ ശുചീകരണം നടത്തി

മാനന്തവാടി: ഗാന്ധിജയന്തി ആചരണത്തിന്‍റെ ഭാഗമായി ശ്രേയസ് മേഖല കമ്മിറ്റിയുടെ നേതൃത്വത്തില്‍ ഗവ. യുപി സ്കൂളും പരിസരവും ശുചീകരിച്ചു. പ്രധാനധ്യാപകന്‍ കെ.ജി. ജോണ്‍സണ്‍ ഉദ്ഘാടനം ചെയ്തു. പ്രോഗ്രാം ഓഫീസര്‍ പ്രീമള വിജയന്‍, കോ ഓര്‍ഡിനേറ്റര്‍മാരായ ഷീബ ജോര്‍ജ്, ബേബി, സിന്ദു, അധ്യാപകരായ കെ.എസ്. സിനിമോള്‍, ഡാലിയ ലൂക്കോസ് എന്നിവര്‍ പ്രസംഗിച്ചു.

ADVERTISEMENT

പെരിന്തൽമണ്ണ നഗരസഭ ടൗണ്‍ഹാളിന് മുൻ ചെയർമാന്‍റെ പേരിടാൻ തീരുമാനം

പെരിന്തൽമണ്ണ: നഗരസഭയുടെ ആധുനിക ടൗണ്‍ഹാളിന് മുൻ ചെയർമാൻ കെ.ടി. നാരായണൻ മാസ്റ്ററുടെ പേര് നൽകാനും ടൗണ്‍ഹാളിന് പുതിയ ഫീസും ബൈലോയും അംഗീകരിക്കാനും നഗരസഭാ കൗണ്‍സിൽ യോഗം തീരുമാനിച്ചു. ഹരിത കർമസേനയുടെ വരുമാനവർധനത്തിന് വേണ്ടിയുള്ള ബിസിനസ് ഡെവലപ്മെന്‍റ് പ്ലാൻ യോഗം അംഗീകരിച്ചു. മാലിന്യം സംസ്കരിച്ച് നിർമിക്കുന്ന വിൻഡ്രോ വളം, ബ്രാൻഡ് ആക്കി വിപണനം നടത്തും. കെഎസ്ഡബ്ലിയുഎംപിയുടെ നേതൃത്വത്തിൽ പരിശീലനം നൽകി ഹരിതകർമസേനയെ സംരംഭകരാക്കും. നഗരസഭയിലെ മൂന്ന് വാർഡുകളിൽ 21 കുടുംബങ്ങൾക്ക് പട്ടയം അനുവദിക്കുന്നത് സംബന്ധിച്ച് ഭൂമി സർക്കാരിലേക്ക് നിക്ഷിപ്തമാക്കുന്നതിന് കൗണ്‍സിൽ യോഗം അംഗീകാരം നൽകി. പെരിന്തൽമണ്ണ അർബൻ പിഎച്ച്സിയിലും മൂന്ന് യുഎച്ച്ഡബ്ലിയുസികളിലും നിശ്ചിയിക്കപ്പെട്ട സമയങ്ങളിൽ ഡോക്ടറുടെ സേവനം ടെലി കണ്‍സൾട്ടേഷൻ സംവിധാനത്തിലൂടെ ലഭ്യമാക്കും. നഗരസഭയിൽ പാലിയേറ്റീവ് പ്രവർത്തനത്തിന് മൂന്ന് ആശാ പ്രവർത്തകരെ പുതിയതായി നിയമിക്കും. എസ്ബിഎം, ഐസി ഫണ്ടുകൾ വിനിയോഗിച്ച് നഗരത്തിലെ പൊതുസ്ഥലങ്ങളിൽ ശുചിത്വ സന്ദേശങ്ങളും മുന്നറിയിപ്പ് ബോർഡുകളും സ്ഥാപിക്കുന്നതിനും യോഗം തീരുമാനിച്ചു. നഗരസഭാ ചെയർമാൻ പി.ഷാജി അധ്യക്ഷനായിരുന്നു.

നിലന്പൂർ - അകന്പാടം റോഡിൽ അപകടങ്ങൾ തുടർക്കഥ

നിലന്പൂർ: നിലന്പൂർ - അകന്പാടം റോഡിൽ അപകടങ്ങൾ തുടർക്കഥയാകുന്നു. മഹാഗണിയിലും മൈലാടിയിലും സിസിടിവി സ്ഥാപിക്കണമെന്ന ആവശ്യം ശക്തമാകുന്നു. ഈ ഭാഗത്ത് കാറുകളുടെ അമിത വേഗത കാരണം ബൈക്ക് യാത്രക്കാരായ രണ്ട് യുവാക്കൾ കഴിഞ്ഞ ദിവസമാണ് മരിച്ചത്. ഞായറാഴ്ച ഉണ്ടായ അപകടത്തിൽ അകന്പാടം നഗറിലെ യദുകൃഷ്ണ (25)നും തിങ്കളാഴ്ച രാത്രി മൈലാടിയിൽ ഉണ്ടായ അപകടത്തിൽ നന്പൂരിപ്പൊട്ടി സ്വദേശി ആമീൻ അസ്ലവു (20)മാണ് മരിച്ചത്. ആമീൻ അസ്ലത്തെ ഇടിച്ച് വീഴ്ത്തിയ കാർ ഓടിച്ചിരുന്നത് വണ്ടൂർ സ്വദേശി ഹാരിസ് റഹ്മാനാണ്. ഇയാളെയും സഹായിയായി എത്തിയവരെയും നാട്ടുകാർ ഇന്നലെ പുലർച്ചെ ഒന്നരയോടെ പിടികൂടി നിലന്പൂർ പോലീസിന് കൈമാറി. മഹാഗണി അപകട വളവിൽ പൊതുമരാമത്ത് മുന്നറിയിപ്പ് ബോർഡ് സ്ഥാപിക്കണമെന്ന് നാട്ടുകാർ പലവട്ടം ആവശ്യപ്പെട്ടതാണ്. മൈലാടി പാലത്തിന് സമീപവും മഹാഗണിയിലും സിസിടിവികൾ വേണം. വെളിയംതോട് മുതൽ മൈലാടിപാലം വരെ മുന്നറിയിപ്പ് ബോർഡുകൾ അനിവാര്യമാണ്. നിലന്പൂർ - നായാടംപൊയിൽ മലയോര പാതയിൽ ഉൾപ്പെട്ട മൈലാടി മുതൽ അകന്പാടം വരെയുള്ള ഭാഗങ്ങൾ അപകടഭീതി ഉയർത്തുന്ന സ്ഥലമാണ്.

ദേശീയ പണിമുടക്ക് വിജയിപ്പിക്കും: ഡിബിടിയു

പെരിന്തൽമണ്ണ: കേന്ദ്രസർക്കാരിന്‍റെ തൊഴിലാളി, കർഷകവിരുദ്ധ നയങ്ങൾക്കെതിരെയും ഇന്ധന വിലവർധനവിനെതിരെയും മറ്റും ഇന്ന് നടക്കുന്ന ദേശീയ പണിമുടക്കിൽ മുഴുവൻ സ്വകാര്യ ബസ് തൊഴിലാളികളും പങ്കെടുക്കണമെന്ന് ഡിസ്ട്രിക് ബസ് തൊഴിലാളി യൂണിയൻ (ഡിബിടിയു-സിഐടിയു) ജില്ലാകമ്മിറ്റി തൊഴിലാളികളോട് അഭ്യർഥിച്ചു. രാജ്യത്തെ തൊഴിലാളികൾക്ക് സംരക്ഷണം നൽകുന്ന നിയമങ്ങൾ മാറ്റി പകരം വൻകിട മുതലാളിമാർക്ക് അനുകൂലമായ നിയമനിർമാണമാണ് ബിജെപി സർക്കാർ നടത്തുന്നത്. മോദി ഭരണത്തിൽ രാജ്യത്ത് പട്ടിണിയും വിലക്കയറ്റവും തൊഴിലില്ലായമയും ഉയർന്ന രീതിയിലാണ്. ഇക്കാര്യങ്ങളാൽ രാജ്യത്തെ തൊഴിലാളികൾ നടത്തുന്ന പണിമുടക്കിൽ മുഴുവൻ സ്വകാര്യബസ് തൊഴിലാളികളും പങ്കെടുക്കണമെന്ന് ജില്ലാ കമ്മിറ്റി ആവശ്യപ്പെട്ടു. യോഗത്തിൽ അഡ്വ.കെ.ഫിറോസ് ബാബു, കെ.അനിൽകുമാർ, കെ.ജാഫർ, മാടാല മുഹമ്മദലി, ശിവൻ എന്നിവർ പ്രസംഗിച്ചു.

ഫണ്ട് ലാപ്സായില്ല; ഓഡിറ്റ് പരാമർശം ശരിയല്ലെന്ന് ഭരണസമിതി അംഗങ്ങൾ

മഞ്ചേരി: 2023- 24 സാന്പത്തിക വർഷത്തിൽ മഞ്ചേരി നഗരസഭക്ക് അനുവദിച്ച പ്ലാൻ ഫണ്ടിൽ 9.16 കോടി രൂപ നഷ്ടപ്പെടുത്തിയെന്ന ഓഡിറ്റ് പരാമർശം ശരിയല്ലെന്നും സർക്കാർ ഫണ്ട് അനുവദിക്കാതെ എങ്ങനെയാണ് ഫണ്ട് ലാപ്സാക്കി എന്ന് പറയുന്നതെന്നും നഗരസഭ ഭരണസമിതി അംഗങ്ങൾ വാർത്താ സമ്മേളനത്തിൽ പറഞ്ഞു. ബജറ്റ് പ്രകാരം 32 കോടി രൂപക്കാണ് കഴിഞ്ഞ വർഷം പദ്ധതി തയാറാക്കാൻ നഗരസഭക്ക് നിർദേശം ലഭിച്ചത്. ഇതിന്‍റെ അടിസ്ഥാനത്തിൽ പദ്ധതി തയാറാക്കുകയും എട്ട് കോടി രൂപ ആദ്യ ഗഡുവായി ലഭിക്കുകയും ഇത് വിനിയോഗിക്കുകയും ചെയ്തു. രണ്ടാമത്തെ ഗഡുവായി എട്ട് കോടി രൂപ മാർച്ച് 22 നാണ് സർക്കാർ അനുവദിച്ചത്. ബില്ലുകൾ ട്രഷറിയിൽ സമർപ്പിച്ചെങ്കിലും ട്രഷറി നിയന്ത്രണം ഏർപ്പെടുത്തിയതോടെ തുക വിനിയോഗിക്കാൻ സാധിച്ചില്ല. വയോമിത്രം - 14 ലക്ഷം, ഭിന്നശേഷി സ്കോളർഷിപ്പ് -19, പിഎംഎവൈ വിഹിതം അടവാക്കൽ തുടങ്ങി നിരവധി ബില്ലുകൾ ട്രഷറി ക്യൂവിൽ ഉൾപ്പെടുത്തുകയായിരുന്നു. അഞ്ച് ലക്ഷത്തിന് മുകളിലുള്ള തുകയൊന്നും ട്രഷറി പാസാക്കിയില്ല. ഇത്തരത്തിൽ ട്രഷറി നിയന്ത്രണവും ബാക്കി തുക പണം അനുവദിക്കാതെയും സർക്കാർ നടത്തിയ നാടകമാണ് ഓഡിറ്റ് റിപ്പോർട്ടിലെ പരാമർശമെന്നും നഗരസഭ ചെയർപേഴ്സണ്‍ വി.എം. സുബൈദ, വൈസ് ചെയർമാൻ വി.പി. ഫിറോസ് എന്നിവർ പറഞ്ഞു. മഞ്ചേരി നഗരസഭ നടത്തുന്ന വികസന പ്രവർത്തനങ്ങൾക്ക് തുരങ്കംവയ്ക്കാനാണ് ഇത്തരത്തിലുള്ള സമര നാടകവുമായി എൽഡിഎഫ് മുന്നോട്ടുവന്നതെന്നും അംഗങ്ങൾ പറഞ്ഞു. വാർത്താസമ്മേളനത്തിൽ സ്ഥിരംസമിതി അധ്യക്ഷരായ സി. സക്കീന, യാഷിക് മേച്ചേരി, റഹീം പുതുക്കൊള്ളി, എൻ.കെ. ഖൈറുന്നീസ, എൻ.എം. എൽസി എന്നിവർ പങ്കെടുത്തു.

ജീവനക്കാരുടെ അഭാവം നേരിടുന്നു: കരുവാരക്കുണ്ട് സിഎച്ച്സി അവഗണനയിൽ

കരുവാരകുണ്ട്: പകർച്ചപനിയും മറ്റു രോഗങ്ങളും ബാധിച്ച് മലയോര ജനത കഷ്ടപ്പെടുന്പോഴും ആശ്വാസ നടപടികളിൽ ആരോഗ്യവകുപ്പധികൃതർ ശ്രദ്ധ കാണിക്കുന്നില്ലെന്ന് ആക്ഷേപം. ജീവനക്കാരുടെ അഭാവമാണ് പ്രധാന കാരണം. കരുവാരകുണ്ടിന് പുറമെ തുവൂർ, എടപ്പറ്റ പഞ്ചായത്തുകളിലെ ചില ഭാഗങ്ങളിലെ സാധാരണക്കാരും ആശ്രയിക്കുന്നത് കരുവാരകുണ്ട് കമ്മ്യൂണിറ്റി ഹെൽത്ത് സെന്‍ററിനെയാണ്. എന്നാൽ മതിയായ സൗകര്യങ്ങളും ജീവനക്കാരും ആശുപത്രിയിലില്ലെന്നാണ് പരാതി. കാലവർഷം ശക്തമായതോടെ പകർച്ചപനി ഉൾപ്പെടെയുള്ള രോഗം ബാധിച്ചവരുടെ തിരക്കാണിവിടെ. ദിനേന 300 ൽ പരം രോഗികൾ സിഎച്ച്സിയെ ആശ്രയിക്കുന്നുണ്ട്. എന്നിട്ടും ആശുപത്രിയിൽ മതിയായ ജീവനക്കാരെ നിയമിക്കാതെ മലയോര മേഖലയിലെ ജനങ്ങളെ അവഗണിക്കുന്ന നിലപാടാണ് സർക്കാർ കൈക്കൊള്ളുന്നതെന്നും നാട്ടുകാർ പറയുന്നു. കഴിഞ്ഞ യുഡിഎഫ് ഭരണകാലത്ത് ആശുപത്രിയിൽ നിയമിച്ച ജീവനക്കാരെ എൽഡിഎഫ് സർക്കാർ അധികാരമേറ്റശേഷം പിൻവലിക്കുകയാണുണ്ടായത്. ആശുപത്രി സംബന്ധമായ ആവശ്യങ്ങൾക്ക് ഡോകടർമാർ പുറത്തുപോയാൽ സേവനം ഒരു ഡോക്ടറിൽ ഒതുങ്ങും. കിടത്തി ചികിത്സക്ക് ഒരു പതിറ്റാണ്ടു മുന്പ് ലക്ഷങ്ങൾ ചെലവഴിച്ച് കെട്ടിടം നിർമിച്ചെങ്കിലും കിടത്തി ചികിത്സ നടക്കുന്നില്ല. ജീവനക്കാരുടെ അഭാവമാണ് ഇതിന്‍റെ പിന്നിലെന്ന് അധികൃതർ പറയുന്നു. ആവശ്യമായ ജീവനക്കാരെ നിയമിക്കണമെന്ന് സർക്കാരിനോട് ആവശ്യപ്പെട്ടിട്ടും പരിഹാരമായില്ലത്രെ. കരുവാരകുണ്ട് സിഎച്ച്സിയോടുള്ള സർക്കാരിന്‍റെ അവഗണനക്കെതിരെ പ്രതിഷേധം ശക്തമാണ്.

വായനപക്ഷാചരണ സമാപനം

കീഴാറ്റൂർ: കീഴാറ്റൂർ പൂന്താനം സ്മാരക ഗ്രന്ഥാലയത്തിൽ നടന്ന വായന പക്ഷാചരണത്തിന്‍റെ സമാപന സമ്മേളനം കീഴാറ്റൂർ അനിയൻ ഉദ്ഘാടനം ചെയ്തു. ചടങ്ങിൽ കെ.വികാസ് ഐ.വി. ദാസ് അനുസ്മരണ പ്രഭാഷണം നടത്തി. ഗ്രന്ഥശാല പ്രസിഡന്‍റ്് പാറമ്മൽ കുഞ്ഞിപ്പ അധ്യക്ഷത വഹിച്ചു. കെ.എം.ദാസ്, ജോമി ജോർജ്, കെ.അശോക്കുമാർ എന്നിവർ പ്രസംഗിച്ചു. പെരിന്തൽമണ്ണ: പെരിന്തൽമണ്ണ താലൂക്ക് ലൈബ്രറി കൗണ്‍സിൽ വായന പക്ഷാചരണത്തിന്‍റെ സമാപനവും ഐ.വി. ദാസ് അനുസ്മരണവും എൻജിഒ ഹാളിൽ സംഘടിപ്പിച്ചു. സംസ്ഥാന ലൈബ്രറി കൗണ്‍സിൽ അംഗം കെ.പി.രമണൻ ഉദ്ഘാടനം ചെയ്തു. വേണു പാലൂർ അനുസ്മരണ പ്രഭാഷണം നടത്തി. താലൂക്ക് വൈസ് പ്രസിഡന്‍റ് വി.ശശീന്ദ്രൻ അധ്യക്ഷത വഹിച്ചു. കെ. വാസുദേവൻ, കെ.മൊയ്തുട്ടി, അനിയൻ പുളിക്കീഴ്, എം.പി. രാജൻ, കെ.ടി. അലി അസ്കർ, സി.ശശികുമാർ, കെ.ജയപ്രകാശ് എന്നിവർ പ്രസംഗിച്ചു.

അറബിക്കിൽ പിടിഎം കോളജിലെ നാലു വിദ്യാർഥികൾക്ക് റാങ്ക്

പെരിന്തൽമണ്ണ: കാലിക്കട്ട് യൂണിവേഴ്സിറ്റി ബിരുദ ഫലം പ്രഖ്യാപിച്ചപ്പോൾ തുടർച്ചയായ നാലാം വർഷവും അറബിക്കിലെ ഉന്നത റാങ്കുകൾ കരസ്ഥമാക്കി പെരിന്തൽമണ്ണ പിടിഎം അറബിക് പഠന വകുപ്പ്. ആദ്യ പത്തു റാങ്കുകളിൽ നാലെണ്ണമാണ് പിടിഎമ്മിലെ മിടുക്കരായ വിദ്യാർഥികൾ നേടിയത്. ദിൽഷാന, ഇ.കെ. സുനയ്യ, കെ. ജംസീറ, ഫാത്തിമ റിന മേലേതിൽ എന്നിവർ യഥാക്രമം ഒന്ന്, നാല്, ആറ്, ഏഴ് റാങ്കുകൾ നേടി. ഒന്നാം റാങ്ക് നേടിയ ദിൽഷാന തിരൂർക്കാട് കുറ്റീരി മുഹമ്മദ് മുസ്തഫ-ബുഷ്റ ദന്പതിമാരുടെ മകളാണ്. നാലാം റാങ്ക് കരസ്ഥമാക്കിയ സുനയ്യ, അരക്കുപറന്പ് എങ്ങക്കോടൻ നാസർ-സൈനബ ദന്പതിമാരുടെ മകളാണ്. ആറാം റാങ്ക് നേടിയ ജംസീറ ആനമങ്ങാട് മണലായ കൂറ്റന്പാറ വീട്ടിൽ യൂസുഫ്-സീനത്ത് ദന്പതിമാരുടെ മകളാണ്. ഏഴാം റാങ്ക് നേടിയ ഫാത്തിമ റിന മക്കരപ്പറന്പ് സ്വദേശിയായ മേലേതിൽ അബ്ദുസലാം-റജ്ലീന ദന്പതിമാരുടെ മകളാണ്. തിളക്കമാർന്ന വിജയം നേടി കോളജിന്‍റെയും അറബിക് വിഭാഗത്തിന്‍റെയും യശസുയർത്തിയ വിദ്യാർഥികളെ വകുപ്പുതല സ്റ്റാഫ് കൗണ്‍സിൽ അഭിനന്ദിച്ചു.

വായനയ്ക്ക് പകരമാകാൻ മറ്റൊന്നിനും കഴിയില്ല: കളക്ടർ

മലപ്പുറം: വായനയ്ക്ക് പകരമാകാൻ മറ്റൊന്നിനും കഴിയില്ലെന്ന് ജില്ലാ കളക്ടർ വി.ആർ. വിനോദ്. വായനാ പക്ഷാചരണത്തിന്‍റെ ജില്ലാതല സമാപനം മലപ്പുറത്ത് ഉദ്ഘാടനം ചെയ്യുകയായിരുന്നു അദ്ദേഹം. വായന മനുഷ്യന്‍റെ ചിന്താശേഷി വർധിപ്പിക്കും. തീരുമാനമെടുക്കാനുള്ള കഴിവ് വളർത്താനും അറിവ് വർധിപ്പിക്കാനും വായന സഹായകമാകും. സാമൂഹിക മാധ്യമങ്ങളുടെ കാലഘട്ടത്തിലും വായനയുടെ പ്രാധാന്യം കുറയുന്നില്ല. സാങ്കേതികവിദ്യ വളർന്നെങ്കിലും പുസ്തക വായന കൂടിയിട്ടുണ്ടെന്നും അദ്ദേഹം പറഞ്ഞു. ജില്ലാ ഇൻഫർമേഷൻ ഓഫീസർ കെ. മുഹമ്മദ് അധ്യക്ഷത വഹിച്ചു. മുൻ വിദ്യാഭ്യാസ ഉപഡയറക്ടർ പി. സഫറുള്ള മുഖ്യപ്രഭാഷണം നടത്തി. വായനയിലൂടെ ലഭിക്കുന്നത് അറ്റമില്ലാത്ത അറിവാണെന്ന് അദ്ദേഹം പറഞ്ഞു. വായനാ പക്ഷാചരണത്തിന്‍റെ ഭാഗമായി നടത്തിയ ഉപന്യാസ രചന മത്സരത്തിലെ വിജയികളായ ഫാത്തിമത്ത് സുഹറ (പത്താം തരം, ജിഎംവിഎച്ച്എസ്എസ് വേങ്ങര), എം.പി. ഹസീന (പ്ലസ് വണ്‍, ജിഎച്ച്എസ്എസ് കടുങ്ങപുരം), എം.കെ. രമണി (പ്ലസ്ടു, ജിഎച്ച്എസ്എസ് കടുങ്ങപുരം) എന്നിവർക്ക് കളക്ടർ ഉപഹാരം നൽകി. സാക്ഷരതാ മിഷൻ അസിസ്റ്റന്‍റ് കോ ഓർഡിനേറ്റർ അബ്ദുൾ റഷീദ് ചോല പ്രതിജ്ഞ ചൊല്ലികൊടുത്തു. ലൈബ്രററി കൗണ്‍സിൽ എക്സിക്യൂട്ടീവ് മെംബർ കെ.ആർ. നാൻസി, പി.എൻ. പണിക്കർ ഫൗണ്ടേഷൻ ജില്ലാ സെക്രട്ടറി ജാഫർ കക്കൂത്ത്, സാക്ഷരതാ മിഷൻ ജില്ലാ കോ ഓർഡിനേറ്റർ ദീപ ജയിംസ്, അസിസ്റ്റന്‍റ് കോ ഓർഡിനേറ്റർ എം. മുഹമ്മദ് ബഷീർ എന്നിവർ പ്രസംഗിച്ചു.

പലചരക്ക് കട കത്തിനശിച്ചു

നിലന്പൂർ: വീട്ടിക്കുത്ത് റോഡിലെ കടയിൽ തീപിടിത്തം. രാജ്വേശരി സിനിമാശാലയ്ക്ക് മുൻവശത്തെ എൻകഐസ് വെജിറ്റബിൾസ് എന്ന പേരിലുള്ള വ്യാപാര സ്ഥാപനമാണ് ഇന്നലെ പുലർച്ചെ പൂർണമായി കത്തി നശിച്ചത്. മുമ്മുള്ളി സ്വദേശി നെടുങ്കോടൻ ഉബൈദിന്‍റെ പലചരക്കും പച്ചക്കറികളും ഉ്ൾപ്പെടുന്ന കടയാണ് തീ പിടിച്ചത്. തിങ്കളാഴ്ച രാത്രി 11.30 യോടെ കടയടച്ച് പോയതായിരുന്നു. പുലർച്ചെയാണ് കടയിൽ തീപിടിച്ചതായി വിവരമറിഞ്ഞതെന്നും വന്നപ്പോഴേക്കും കട പൂർണമായും കത്തിയമർന്നതായും ഉബൈദ് പറഞ്ഞു. രാവിലെ ആറു മണിയോടെയാണ് അഗ്നിശമന സേന സ്ഥലത്തെത്തി തീ പൂർണമായും അണച്ചത്. 25 ലക്ഷത്തോളം രൂപയുടെ നഷ്ടമുണ്ടായതായും കടയുടമ പറഞ്ഞു.

കടുവ കുടുങ്ങിയത് ആശ്വാസമായി : മലയോര കൃഷിയിടങ്ങളിൽ തൊഴിലുകൾ പുനരാരംഭിച്ചു

കരുവാരകുണ്ട്: കാളികാവ് അടക്കാക്കുണ്ടിൽ ടാപ്പിംഗ് തൊഴിലാളിയെ കൊലപ്പെടുത്തിയ കടുവ 53 ദിവസത്തെ തെരച്ചിലിനൊടുവിൽ കെണിയിൽ അകപ്പെട്ടതോടെ മലയോര ജനതക്ക് ആശ്വാസമായി. മലപ്പുറം, പാലക്കാട്, വയനാട് ജില്ലകളിൽ നിന്നുള്ള വനപാലകരെയും ആർആർടി സംഘാംഗങ്ങളെയും ഉൾപ്പെടുത്തിയാണ് മലയോരത്ത് രണ്ടുമാസത്തോളം പ്രത്യേക ദൗത്യസംഘം തെരച്ചിൽ നടത്തിയത്. ഇതിനിടെ കേരള എസ്റ്റേറ്റിൽ സ്ഥാപിച്ച കൂട്ടിൽ പുലി കുടുങ്ങിയിരുന്നു. ഇതോടു കൂടി വർഷങ്ങളായി മലയോര ജനത ചൂണ്ടിക്കാട്ടിയ പുലി സാന്നിധ്യവും യാഥാർഥ്യമായെന്ന് വ്യക്തമായി. അപകടകാരികളായ കാട്ടുമൃഗങ്ങൾ കരുവാരക്കുണ്ടിന്‍റെ മലയോരങ്ങളിലാണ് താവളമാക്കിമാക്കിയിരിക്കുന്നതെന്ന് നേരത്തെ തന്നെ മലയോര കർഷകർ വ്യക്തമാക്കുകയും ഇക്കാര്യം അധികൃതരുടെ ശ്രദ്ധയിൽപ്പെടുത്തിയതുമാണ്. എന്നാൽ അവർ അക്കാര്യം നിഷേധിക്കുകയായിരുന്നു. പുലികൾ കരുവാരകുണ്ടിന്‍റെ മലയോരങ്ങളിൽ ഇനിയുമുണ്ടെന്നാണ് തൊഴിലാളികളടക്കം ചൂണ്ടിക്കാട്ടുന്നത്. കാട്ടാന, കാട്ടുപോത്ത്, കാട്ടുപന്നി, വാനരക്കൂട്ടം തുടങ്ങിയ കാട്ടുമൃഗങ്ങളുടെ ശല്യം ദിനേന വർധിച്ചു വരുന്ന സാഹചര്യമാണിന്ന്. ഇവയുടെ ശല്യത്തെത്തുടർന്ന് നിരവധി കർഷകർ കൃഷിയോട് വിടപറഞ്ഞിരിക്കുകയാണ്. മനുഷ്യജീവനും കൃഷിക്കും ഭീഷണി സൃഷ്ടിക്കുന്ന കാട്ടുമൃഗങ്ങൾ കൃഷിയിടങ്ങളിൽ പ്രവേശിക്കാതിരിക്കാനുള്ള നടപടികൾ നടത്തണമെന്ന ആവശ്യമാണ് മലയോര ജനത മുന്നോട്ടുവയ്ക്കുന്നത്. കരുവാരകുണ്ടിൽ നിന്ന് പിടികൂടിയ കടുവയെ വനപാലകർ തൃശൂരിലെ സുവോളജിക്കൽ പാർക്കിൽ എത്തിച്ചു. അവിടെ തന്നെ കടുവയ്ക്ക് തുടർചികിത്സയും നൽകിവരുന്നു. കടുവ കൂട്ടിൽ കുടുങ്ങിയതോടെ മലയോര കൃഷിയിടങ്ങൾക്ക് ഉണർവുപകർന്ന് തൊഴിലാളികളും കർഷകരും തൊഴിലുകൾ പുനരാരംഭിച്ചു.

അനർഹരിൽ നിന്ന് മുൻഗണന റേഷൻ കാർഡ് പിടിച്ചെടുത്തു

മഞ്ചേരി: അനർഹമായി ഉപയോഗിച്ച് വരുന്ന മുൻഗണാ റേഷൻ കാർഡുകൾ കണ്ടെത്തി പിടികൂടി. ഏറനാട് താലൂക്കിലെ എടവണ്ണ പഞ്ചായത്തിലെ നീലിയംപാടം, ചൂനിയോട്, മൈലോങ്ങര എന്നീ പ്രദേശങ്ങളിൽ ഏറനാട് താലൂക്ക് സപ്ലൈ ഓഫീസറുടെ നേതൃത്വത്തിൽ പരിശോധനയിലാണ് അനർഹരിൽ നിന്ന് കാർഡുകൾ പിടികൂടിയത്. 1000 സ്ക്വയർ ഫീറ്റിൽ കൂടുതൽ വീടും നാലു ചക്രവാഹനവും സ്വന്തമായുള്ള 12 കുടുംബങ്ങളിൽ നിന്നാണ് മുൻഗണനാ കാർഡുകൾ കണ്ടെത്തിയത്. പിടിക്കപ്പെട്ട റേഷൻ കാർഡുടമകൾ അനർഹമായി കൈപ്പറ്റിയ റേഷൻ സാധനങ്ങളുടെ തുക ഈടാക്കി ഇത്തരം കാർഡുകൾ തരം മാറ്റി നൽകുമെന്നും വരും ദിവസങ്ങളിൽ താലൂക്കിലെ എല്ലാ പ്രദേശങ്ങളിലും പരിശോധന ശക്തമാക്കുന്നതാണെന്നും താലൂക്ക് സപ്ലൈ ഓഫീസർ എ.പി. ഫക്രുദ്ദീൻ അലി അറിയിച്ചു. പരിശോധനയിൽ റേഷനിംഗ് ഇൻസ്പെക്ടർമാരായ കെ.പി. അബ്ദുൽ നാസർ, രാജേഷ് അയനികുത്ത്, പി. പ്രദീപ്. വിപിൻരാജ് എന്നിവർ പങ്കെടുത്തു.

കെഎസ്എസ്പിയു മാർച്ചും ധർണയും നടത്തി

മലപ്പുറം: പിഎഫ്ആർഡിഎ നിയമം പിൻവലിക്കുക, സ്റ്റാറ്റിയൂട്ടറി പെൻഷൻ പുന:സ്ഥാപിക്കുക, ഫിനാൻസ് ഭേദഗതി ബിൽ 2025 കേന്ദ്ര സർക്കാർ പിൻവലിക്കുക, കേന്ദ്രം കേരളത്തോട് കാണിക്കുന്ന അവഗണനയും പ്രതികാര നടപടികളും ഉപേക്ഷിക്കുക തുടങ്ങിയ ആവശ്യങ്ങൾ ഉന്നയിച്ച് കേരള സ്റ്റേറ്റ് സർവീസ് പെൻഷനേഴ്സ് യൂണിയൻ (കെഎസ്എസ്പിയു) ജില്ലാ കമ്മിറ്റി ജില്ലാ മാർച്ചും ധർണയും നടത്തി. മലപ്പുറം കേന്ദ്ര ജിഎസ്ടി ഓഫീസിന് മുന്നിൽ നടന്ന ധർണ മുൻ എംഎൽഎ വി. ശശികുമാർ ഉദ്ഘാടനം ചെയ്തു. കെഎസ്എസ്പിയു ജില്ലാ പ്രസിഡന്‍റ് എൽ.ജെ. ആന്‍റണി അധ്യക്ഷത വഹിച്ചു. ബെഫി സംസ്ഥാന വൈസ് പ്രസിഡന്‍റ് ബിഗേഷ് ഉണ്ണിയൻ മുഖ്യപ്രഭാഷണം നടത്തി. കഐസ്എസ്പിയു സംസ്ഥാന സെക്രട്ടറി സി.ജി. താരാനാഥൻ, സംസ്ഥാന കമ്മിറ്റി അംഗം പി. ദാമോദരൻ, ജില്ലാ സെക്രട്ടറി ടി.കെ. നാരായണൻ, വൈസ് പ്രസിഡന്‍റ് കെ.വി. സ്കറിയ എന്നിവർ പ്രസംഗിച്ചു. പ്രകടനത്തിന് ജില്ലാ ജോയിന്‍റ് സെക്രട്ടറി ഡോ. കെ.ടി. അലി അസ്കർ, ജില്ലാ വൈസ് പ്രസിഡന്‍റുമാരായ എൽ.ജെ. ജേക്കബ്, എ. കുഞ്ഞുണ്ണി നായർ, ജോയിന്‍റ് സെക്രട്ടറിമാരായ യു. ഉണ്ണികൃഷ്ണൻ നന്പൂതിരി, കെ. രാമചന്ദ്രൻ, സംസ്ഥാന കമ്മിറ്റി അംഗം എം.കെ. ദേവകി എന്നിവർ നേതൃത്വം നൽകി.

വന്യജീവി ഭീഷണി: മലയോരത്തെ ദൗത്യസംഘത്തിന്‍റെ നിരീക്ഷണം തുടരും

കരുവാരക്കുണ്ട്: കടുവയെ പിടികൂടുന്നതിന് നിയോഗിച്ച ദൗത്യസംഘത്തിന്‍റെ നിരീക്ഷണം തുടരും. വന്യജീവികൾ കാട് വിട്ടിറങ്ങുന്നത് തടയാനുള്ള നൂതന സംവിധാനങ്ങൾ ഒരുക്കുമെന്നും സംസ്ഥാന ചീഫ് വൈൽഡ് ലൈഫ് വാർഡൻ പറഞ്ഞു. മലയോരവാസികൾക്ക് വന്യജീവികളിൽ നിന്ന് സംരക്ഷണം ഉറപ്പുവരുത്തുന്നതിന് വന ജാഗ്രത സമിതിയുടെ പ്രവർത്തനം ഉൾപ്പെടെ പ്രദേശത്ത് ഉണ്ടാകുമെന്നും ചീഫ് വൈൽഡ് ലൈഫ് വാർഡൻ പറഞ്ഞു. കരുവാരക്കുണ്ട് മലയോര ജാഗ്രത സമിതി തിരുവനന്തപുരത്തെ ഓഫീസിലെത്തി ചീഫ് വൈൽഡ് ലൈഫ് വാർഡനുമായി നടത്തിയ ചർച്ചയിലാണ് അനുകൂല തീരുമാനം ഉണ്ടായത്. ജില്ലയിലെ മലയോര കർഷക കുടിയേറ്റ പ്രദേശമാണ് കരുവാരക്കുണ്ട്. ജനവാസ മേഖലയിലേക്ക് വന്യജീവികൾ ഇറങ്ങിയതാണ് കുടിയേറ്റ കർഷകരെ ദുരിതത്തിലാക്കിയിട്ടുള്ളത്. കാർഷിക മേഖലയിൽ ജോലി ചെയ്യുന്ന തൊഴിലാളികളും കാർഷികോത്പന്നങ്ങൾ ശേഖരിക്കുന്നവരും ജീവന് ഭീഷണിയുള്ളതിനാൽ പണിയെടുക്കാൻ ഭയപ്പെടുന്നത് ഉൾപ്പെടെയുള്ള വിഷയങ്ങൾ സമിതി ഭാരവാഹികൾ ചീഫ് വൈൽഡ് ലൈഫ് വാർഡന്‍റെ ശ്രദ്ധയിൽപ്പെടുത്തി. കാട്ടുപോത്തിന്‍റെ പരാക്രമത്തിൽ കരുവാരക്കുണ്ടിൽ ഒരു ജീവൻ പൊലിഞ്ഞു. ആനയുടെ പരാക്രമവും വനമേഖലയിലെ ജനവാസ കേന്ദ്രങ്ങളിൽ പതിവാണ്. കടുവ, പുലി, കാട്ടുപന്നി തുടങ്ങിയ വന്യജീവികളിൽ നിന്ന് വളർത്തുമൃഗങ്ങൾക്കു മനുഷ്യർക്കും സംരക്ഷണം ഒരുക്കണമെന്നാണ് സമിതി ആവശ്യപ്പെട്ടത്. വിഷയത്തിന്‍റെ ഗൗരവം ഉൾകൊണ്ട് നടപടി ഉണ്ടാകുമെന്ന് ചീഫ് വൈൽഡ് ലൈഫ് വാർഡൻ വ്യക്തമാക്കി. ജനങ്ങളുടെ ആശങ്ക അകറ്റാൻ വനം വകുപ്പിലെ ഉന്നതരുടെ യോഗം വിളിച്ചു ചേർക്കാനും ചർച്ചയിൽ തീരുമാനമായി. ചീഫ് വൈൽഡ് ലൈഫ് വാർഡൻ പ്രമോദ് ജി. കൃഷ്ണനുമായി ഫോറസ്റ്റ് ഹെഡ് ക്വാർട്ടേഴ്സ് ആസ്ഥാനത്ത് നടന്ന ചർച്ചയിൽ മലയോര ജനജാഗ്രത സമിതി ഭാരവാഹികളായ മാനുവൽകുട്ടി മണിമല, ഒ.പി. ഇസ്മായിൽ, അയ്യൂബ് മേലേടത്ത്, അയ്യൂബ് പുലിയോടൻ എന്നിവർ പങ്കെടുത്തു.

വീട്ടുമുറ്റത്തും കാട്ടാന : പാത്തിപ്പാറയിലും ഏനാന്തിയിലും വൻതോതിൽ കൃഷി നശിപ്പിച്ചു

നിലന്പൂർ: നിലന്പൂർ നഗരസഭാ പരിധിയിലും കാട്ടാനകളുടെ പരാക്രമം. നഗരസഭയുടെ പാത്തിപ്പാറ, ഏനാന്തി മേഖലകളിൽ ജനങ്ങൾ തിങ്ങി പാർക്കുന്ന സ്ഥലങ്ങളിലാണ് ഇന്നലെ പുലർച്ചെ കാട്ടാനയെത്തിയത്. ഏനാന്തിയിൽ മൂച്ചിക്കൽ ചെറിയാപ്പു, പാത്തിപ്പാറയിൽ കുഞ്ഞുമോൻ, തൊണ്ടിയിൽ ജോയി, രാജു എന്നിവരുടെ കൃഷിയിടങ്ങളിലെ വാഴ, കമുക്, തെങ്ങ്, കൃഷികൾ വ്യാപകമായി നശിപ്പിച്ച ശേഷമാണ് കാട്ടാന പാത്തിപ്പാറയിലേക്ക് എത്തിയത്. ഇവിടെ വാഴയിൽ ജോയി, വാഴയിൽ ലിജു എന്നിവരുടെ വീട്ടുമുറ്റത്തേക്കാണ് ആദ്യം കാട്ടാന എത്തിയത്. പുറത്ത് ശബ്ദം കേട്ട് വാതിൽ തുറന്നു നോക്കുന്പോഴാണ് വീട്ടുമുറ്റത്ത് കാട്ടാനയെ കണ്ടതെന്ന് ഇവർ പറയുന്നു. നിരവധി കുടുംബങ്ങൾ താമസിക്കുന്ന പാത്തിപ്പാറയിലേക്കും ഏനാന്തിയിലേക്കും കരിന്പുഴ മുറിച്ചു കടന്നാണ് കാട്ടാനകൾ എത്തുന്നത്. റോബിൻ കാക്കുഴിയുടെ കൃഷിയിടത്തിലെ സംരക്ഷണവേലിയും കൃഷിയും നശിപ്പിച്ചു. രാജു കീച്ചേരിയുടെ വാഴ കൃഷിയും വ്യാപകമായി നശിപ്പിച്ചിട്ടുണ്ട്. കൃഷി നശിപ്പിക്കുന്നതിനൊപ്പം വീട്ടുമുറ്റങ്ങളിലേക്കും എത്തുന്ന കാട്ടാനകൾ ഈ ഭാഗത്തെ ജനങ്ങളുടെ സ്വൈര്യജീവിതം തകർക്കുകയാണ്. നിലന്പൂർ നഗരസഭയിൽ ഏറ്റവും കൂടുതൽ കർഷക കുടുംബങ്ങൾ താമസിക്കുന്ന പ്രദേശങ്ങളാണ് പാത്തിപ്പാറയും ഏനാന്തിയും. ജലസേചന സൗകര്യത്തിനായി നിർമിച്ച കനാലുകൾ, പൈപ്പുകൾ എല്ലാം നശിപ്പിക്കുകയാണ് കാട്ടാനകൾ. ജനങ്ങൾ വിവരം അറിയിക്കുന്പോൾ വനപാലകർ വന്ന് പോകുന്നതല്ലാതെ ഒരു പരിഹാരമാർഗവുമില്ലെന്ന് പ്രദേശവാസികൾ പറയുന്നു. രാവിലെ ടാപ്പിംഗിന് പോകുന്ന തൊഴിലാളികളുടെ മുന്നിലേക്ക് കാട്ടാനകൾ എത്തുന്നതും ആശങ്ക സൃഷ്ടിക്കുന്നു. നിലന്പൂർ നഗരത്തിലേക്ക് ഉൾപ്പെടെ കാട്ടാനകൾ എത്തിയതോടെ വന്യമൃഗഭീഷണി ശക്തമായിരിക്കുകയാണ്. ജനപ്രതിനിധികൾ ഇക്കാര്യത്തിൽ പ്രസ്താവന നടത്തുകയും പരസ്പരം പഴിചാരുകയുമല്ലാതെ വനം വകുപ്പിനെ കൊണ്ട് നടപടി എടുപ്പിക്കുന്നില്ല. തെരഞ്ഞെടുപ്പ് കാലത്ത് വന്യമൃഗ ശല്യം ചർച്ചയാക്കുകയല്ലാതെ പിന്നീട് കാര്യമായ ഇടപ്പെടൽ നടത്താത്തതാണ് ജനങ്ങൾക്ക് തിരിച്ചടിയായിരിക്കുന്നത്. കാട്ടാനകൾ കൃഷി നശിപ്പിക്കുന്നതിന് ഞങ്ങൾ എന്ത് ചെയ്യാനാ എന്ന ചോദ്യമാണ് വനപാലകർ തിരിച്ച് ചോദിക്കുന്നത്. ജില്ലയിലെ വനംവകുപ്പിന്‍റെ പ്രധാന കാര്യാലയങ്ങൾ സ്ഥിതി ചെയ്യുന്നത് നിലന്പൂർ നഗരസഭയുടെ ഹൃദയ ഭാഗത്താണ്. ദിവസവും വന്യജീവി ഭീഷണി നേരിടുകയാണ് നിലന്പൂർ മേഖല.

ഓട്ടോറിക്ഷ മറിഞ്ഞ് പരിക്കേറ്റ ഏഴ് വയസുകാരി മരിച്ചു

പെരിന്തൽമണ്ണ: പിതാവ് ഓടിച്ച ഓട്ടോറിക്ഷ മറിഞ്ഞ് പരിക്കേറ്റ ഏഴ് വയസുകാരി മരിച്ചു. പാണ്ടിക്കാട് വളരാടിലെ കൊപ്പത്ത് ശിബിലിയുടെ മകൾ ഹവ്വാസിയയാണ് മരിച്ചത്. പാണ്ടിക്കാട് ടൗണ്‍ ജിഎംഎൽപി സ്കൂളിലെ ഒന്നാം ക്ലാസ് വിദ്യാർഥിനിയാണ് ഹവ്വാസിയ. പാണ്ടിക്കാട് പാർക്കിലെ ഓട്ടോ ഡ്രൈവറായ പിതാവ് ശിബിലി ഓടിച്ച ഓട്ടോറിക്ഷ കഴിഞ്ഞ ദിവസം കക്കുളത്ത് വച്ച് റോഡിലെ കുഴിയിൽ വീണ് മറിയുകയായിരുന്നു. പരിക്കേറ്റ ഹവ്വാസിയയെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല . മാതാവ്: എടയാറ്റൂരിലെ പൊട്ടേങ്ങൽ മിദ്‌ലാജ. ഒരുവയസുള്ള ഇസിൻസാദ് സഹോദരനാണ്. പാണ്ടിക്കാട് പോലീസ് ഇൻക്വസ്റ്റ് നടത്തി. മൃതദേഹം പെരിന്തൽമണ്ണ ജില്ലാ ആശുപത്രിയിൽ പോസ്റ്റ്മോർട്ടത്തിനുശേഷം വളരാട് ജുമാമസ്ജിദിൽ കബറടക്കി.

കാറിടിച്ച് തോട്ടിൽ വീണ സ്കൂട്ടർ യാത്രക്കാരന്‍റെ മൃതദേഹം കണ്ടെത്തി

തിരൂരങ്ങാടി: ദേശീയപാതയിലെ തലപ്പാറയിൽ കാറിടിച്ച് തോട്ടിൽ വീണ സ്കൂട്ടർ യാത്രക്കാരന്‍റെ മൃതദേഹം കണ്ടെത്തി. വലിയപറന്പ് ചാന്ത് മുഹമ്മദ് ഹാഷിറി (22) ന്‍റെ മൃതദേഹമാണ് മണിക്കൂറുകളുടെ തെരച്ചിലിനൊടുവിൽ ചൊവ്വാഴ്ച രാവിലെ 6.30ന് കിഴക്കൻ തോട്ടിൽ മുട്ടിച്ചിറ ചോനാരി കടവിൽ നിന്ന് നൂറ് മീറ്റർ അകലെ ഇട്ടിങ്ങലിൽ നിന്ന് ലഭിച്ചത്. ഞായറാഴ്ച വൈകുന്നേരം 6.30ന് തലപ്പാറ കിഴക്കെ തോടിന്‍റെ പാലത്തിൽ വച്ചാണ് അപകടം ഉണ്ടായത്. കൊളപ്പുറം ഭാഗത്ത് നിന്ന് പരപ്പനങ്ങാടി ഭാഗത്തേക്ക് പോകുകയായിരുന്ന കാർ എതിരേ വന്ന സ്കൂട്ടറിൽ ഇടിക്കുകയായിരുന്നു. ഇടിയുടെ ആഘാതത്തിൽ ഹാഷിർ തോട്ടിലേക്ക് തെറിച്ചുവീഴുകയായിരുന്നു. തുടർന്ന് പോലീസും നാട്ടുകാരും ഫയർഫോഴ്സും സന്നദ്ധ സംഘടനാംഗങ്ങളും അപകടം ഉണ്ടായ സമയം മുതൽ തെരച്ചിൽ തുടങ്ങിയിരുന്നു. തിങ്കളാഴ്ച രാവിലെ ദേശീയ ദുരന്തനിവാരണ സേനാംഗങ്ങളും തെരച്ചിലിനെത്തി. മൃതദേഹം തിരൂരങ്ങാടി താലൂക്കാശുപത്രിയിലേക്ക് മാറ്റി. പോസ്റ്റ്മോർട്ടത്തിന് ശേഷം തലപ്പാറ വലിയപറന്പ് ജുമാ മസ്ജിദിൽ കബറടക്കം നടക്കും. പിതാവ്: മുഹമ്മദ് കോയ. മാതാവ്: ശരീഫ. സഹോദരങ്ങൾ: അബ്ദുറഹിമാൻ, ആശിഫ, അഫീദ.

കാലിക്കട്ടിൽ സിൻഡിക്കറ്റ് യോഗം അലങ്കോലമായി

തേഞ്ഞിപ്പലം: വൈസ് ചാൻസലറും ഇടത് സിൻഡിക്കറ്റ് അംഗങ്ങളും തമ്മിലുള്ള ഭിന്നത മുറുകിയതോടെ കാലിക്കട്ട് യൂണിവേഴ്സിറ്റിയിൽ വീണ്ടും സിൻഡിക്കറ്റ് യോഗം മുടങ്ങി. പാലക്കാട് വിക്ടോറിയ കോളജിലെ സൈക്കോളജി അവസാന സെമസ്റ്റർ ബിഎസ്‌സി വിദ്യാർഥിനി ജംഷിയ ഷെറിനെ പ്രൊജക്ടിൽ പുനർമൂല്യനിർണയം നടത്തി വിജയിപ്പിച്ചത് റദ്ദാക്കണമെന്ന് ആവശ്യപ്പെട്ടുള്ള ഇടത് അംഗങ്ങളുടെ പ്രതിഷേധമാണ് സിൻഡിക്കറ്റ് യോഗം തടസപ്പെടാനിടയാക്കിയത്. വിഷയം അജണ്ടയിൽ ഉൾപ്പെടുത്താത്തത് ചോദ്യം ചെയ്ത് യോഗത്തിന്‍റെ തുടക്കത്തിൽ തന്നെ ഇടത് അംഗം അഡ്വ. പി.കെ. ഖലീമുദീൻ രംഗത്തുവരികയായിരുന്നു. വിദ്യാർഥിനിയുടെ പ്രൊജക്ട് റീ അസസ്മെന്‍റ് നടത്തിയ നടപടികൾ റിപ്പോർട്ടാക്കി അടുത്ത സിൻഡിക്കറ്റ് യോഗത്തിൽ അവതരിപ്പിക്കാമെന്ന് വൈസ് ചാൻസലർ വ്യക്തമാക്കിയെങ്കിലും ഇടത് അംഗങ്ങൾ വഴങ്ങിയില്ല. ഇതോടെ രാവിലെ 10 ന് ചേർന്ന യോഗം ഒരൊറ്റ അജണ്ടയും പരിഗണിക്കാതെ ഉച്ചക്ക് 12.30 ഓടെ പിരിച്ചുവിടുകയായിരുന്നു. യൂണിവേഴ്സിറ്റി ചട്ട പ്രകാരം പ്രൊജക്ടിൽ പുനർമൂല്യനിർണയത്തിന് വ്യവസ്ഥയില്ലെന്നും പരീക്ഷ കണ്‍ട്രോളറെ മറികടന്ന് വൈസ് ചാൻസലർ പ്രഫ. ഡോ. പി. രവീന്ദ്രൻ പ്രത്യേകം അധ്യാപകരെ നിയോഗിച്ച് പ്രൊജക്ടിൽ പുനർമൂല്യനിർണയം നടത്തി കെ‌എസ‌്‌യു നേതാവ് കൂടിയായ വിദ്യാർഥിയെ വിജയിപ്പിച്ചെന്നും എന്നാൽ ഇക്കാര്യം അജണ്ടയിൽ എവിടെയും ഉൾപ്പെടുത്തിയിട്ടില്ലെന്നുമായിരുന്നു ഇടത് അംഗങ്ങളുടെ വാദം. എന്നാൽ നിയമവിധേയമായി തന്നെയാണ് പുനർമൂല്യനിർണയം നടത്തിയതെന്നും വിസി എന്ന നിലയിൽ വിവേചനാധികാര പ്രകാരമാണ് നടപടി സ്വീകരിച്ചതെന്നുമുള്ള നിലപാടിനെ ഇടത് അംഗങ്ങൾ എതിർത്തു. പ്രൊജക്ടിന് മാർക്ക് മനപൂർവം കുറച്ച് അധ്യാപിക രാഷ്ട്രീയ പകപോക്കലിന്‍റെ ഭാഗമായി വിദ്യാർഥിയെ തോൽപ്പിക്കുകയായിരുന്നുവെന്നും ഈ വിദ്യാർഥിക്ക് വിസി നീതി ലഭ്യമാക്കുകയാണ് ചെയ്തതെന്ന് സിൻഡിക്കറ്റിലെ പ്രതിപക്ഷ അംഗങ്ങൾ പ്രതികരിച്ചു. വിസി നടപടിക്രമങ്ങൾ കാറ്റിൽ പറത്തി : സിൻഡിക്കറ്റ് അംഗം തേഞ്ഞിപ്പലം: യൂണിവേഴ്സിറ്റി പരീക്ഷകളുടെ രഹസ്യസ്വഭാവവും നടപടിക്രമങ്ങളുമെല്ലാം കാറ്റിൽ പറത്തിയാണ് വിസി അധ്യാപകരെ സ്വയം നിർണയിച്ച് വിദ്യാർഥിനിയെ വിജയിപ്പിച്ചതെന്ന് ഇടത് സിൻഡിക്കറ്റംഗം അഡ്വ. പി.കെ. ഖലീമുദീൻ. നിലവിൽ യൂണിവേഴ്സിറ്റി നിയമപ്രകാരം പ്രൊജക്ടിന് പുനർമൂല്യനിർണയമില്ല. അടുത്ത വർഷം ജൂണിയർ ബാച്ചിനോടപ്പം പുനർസമർപ്പണം നടത്തുകയാണ് വേണ്ടത്. ഇതിന് വിരുദ്ധമായി വിദ്യാർഥി കൊടുത്ത പരാതി സിൻഡിക്കറ്റിലോ വിദ്യാർഥി പ്രശ്ന പരിഹാര സമിതിയിലോ വയ്ക്കാതെ, രണ്ട് അധ്യാപകരെ വിസി തന്നെ തീരുമാനിച്ച് ഇവരെ കൊണ്ട് പുനർമൂല്യനിർണയം നടത്തിക്കാൻ നിർദേശം നൽകുകയായിരുന്നു. നിലവിൽ വിദ്യാർഥിക്ക് ലഭിച്ച മാർക്കിന്‍റെ 300 ശതമാനമാണ് ലഭിച്ചിരിക്കുന്നത്. ഉത്തരക്കടലാസുകളിൽ 30 ശതമാനത്തിലേറെ വർധനവുണ്ടായാൽ വീണ്ടും പുനർമൂല്യനിർണയം നടത്തണമെന്ന നിയമവും നിലവിലുണ്ടെന്നും സിൻഡിക്കറ്റംഗം പറഞ്ഞു. പ്രൊജക്ട് മൂല്യനിർണയം നിയമപരമായി : വിസി തേഞ്ഞിപ്പലം: എല്ലാ പേപ്പറുകളിലും ഉയർന്ന മാർക്ക് നേടിയ സൈക്കോളജി അവസാന സെമസ്റ്റർ ബിഎസ്‌സി വിദ്യാർഥിനിയുടെ പരാതിയിൽ പ്രൊജക്ടിൽ പുനർമൂല്യനിർണയം നടത്തിയത് നിയമപരമായിട്ടാണെന്ന് കാലിക്കട്ട് യൂണിവേഴ്സിറ്റി വൈസ് ചാൻസലർ. എല്ലാ പേപ്പറിലും ജയിച്ച ജംഷിയ ഷെറിൻ പ്രൊജക്ടിൽ തന്നെ പ്രത്യേക ലക്ഷ്യം വച്ച് തോല്പിച്ചുവെന്നും വിഷയം അന്വേഷിച്ച് നീതിപൂർവകമായ നടപടി സ്വീകരിക്കണമെന്നും ആവശ്യപ്പെട്ട് നൽകിയ പരാതി പരിശോധിച്ചാണ് പുനർമൂല്യനിർണയത്തിന് മുതിർന്ന സൈക്കോളജി അധ്യാപകരെ നിയോഗിച്ചത്. കൂടുതൽ മാർക്കിന് അർഹതയുണ്ടെന്ന് രണ്ട് മുതിർന്ന അധ്യാപകരും പരീക്ഷാ കണ്‍ട്രോളർ മുഖേന രേഖാമൂലം വിസിയെ അറിയിച്ചിരുന്നു. ഇതിന്‍റെ അടിസ്ഥാനത്തിൽ പരീക്ഷ ബോർഡ് ചെയർമാനോട് പ്രൊജക്ട് വീണ്ടും പരിശോധിച്ച് റിപ്പോർട്ട് നൽകാൻ ആവശ്യപ്പെടുകയായിരുന്നു. പ്രൊജക്ട് പരിശോധിച്ച പരീക്ഷ ബോർഡ് ചെയർമാൻ പ്രൊജക്ടിന് കൂടുതൽ മാർക്കിന് വിദ്യാർഥിനിക്ക് അർഹതയുണ്ടെന്ന് പരീക്ഷാ കണ്‍ട്രോളർക്ക് റിപ്പോർട്ട് നൽകി. ഈ മാർക്ക് അന്തിമമായി പരിഗണിക്കണമെന്ന് സർവകലാശാലയോട് ആവശ്യപ്പെടുകയും ചെയ്തു. അതനുസരിച്ച് പ്രൊജക്ടിൽ ചെയർമാൻ നൽകിയ അന്തിമ മാർക്ക് പ്രകാരമാണ് വിദ്യാർഥിനി വിജയിച്ചതെന്നാണ് വിസിയുടെ ഓഫീസ് പറയുന്നത്.

പ്രളയ ബാധിതർക്ക് ഭൂരേഖ നൽകിയില്ല ; ആദിവാസി കുടുംബങ്ങൾ ഡിഎഫ്ഒയെ ഉപരോധിച്ചു

നിലന്പൂർ: ഭൂരേഖ നൽകാത്തതിൽ പ്രതിഷേധിച്ച് ആദിവാസികൾ നടത്തിയ ഡിഎഫ്ഒ ഓഫീസ് ഉപരോധം ഫലം കണ്ടു. ഇന്ന് ജില്ലാ കളക്ടറുടെ നേതൃത്വത്തിൽ ഡിസ്ട്രിക്ട് ലെവൽ കമ്മിറ്റി (ഡിഎൽസി) ഇതേക്കുറിച്ച് തീരുമാനമെടുക്കും. 2019 ലെ പ്രളയത്തിൽ വീടും സ്ഥലവും നഷ്ടപ്പെട്ട ആദിവാസി കുടുംബങ്ങൾക്ക് ആറ് വർഷമായിട്ടും വനാവകാശ നിയമപ്രകാരം നൽകേണ്ട ഭൂമിയുടെ രേഖ നൽകാത്തതിൽ പ്രതിഷേധിച്ചാണ് ഇന്നലെ രാവിലെ 11 മുതൽ രാത്രി ഏഴ് വരെ നിലന്പൂർ സൗത്ത് ഡിഎഫ്ഒ ജി. ധനിക് ലാലിനെ കരുളായി ഉൾവനത്തിലെ മുണ്ടക്കടവ്, ചേന്പൻകൊല്ലി നഗറുകളിലെ 37 കുടുംബങ്ങൾ ഉപരോധിച്ചത്. വൈകുന്നേരം ആറുമണിയോടെ കളക്ടറുടെ നിർദേശ പ്രകാരം ഡിഎഫ്ഒ ഓഫീസിലെത്തിയ ലാൻഡ് റവന്യു വിഭാഗം തഹസിൽദാർ സമരക്കാരുമായി നടത്തിയ ചർച്ചയിലാണ് ഉപരോധം അവസാനിപ്പിച്ചത്. ഡിഎഫ്ഒ ധനിക് ലാൽ, ലാൻഡ് റവന്യു വിഭാഗം തഹസിൽദാർ വിനോദ് കുമാർ, ഐടിഡിപി ജില്ലാ പ്രോജക്ട് ഓഫീസർ സി. ഇസ്മായിൽ എന്നിവർ കളക്ടറുടെ അധ്യക്ഷതയിൽ നടക്കുന്ന യോഗത്തിൽ തീരുമാനം ഉണ്ടാകുമെന്ന് എഴുതി രേഖാമൂലം നൽകിയതോടെ സമരം അവസാനിപ്പിച്ചതായി സമരക്കാർ അറിയിച്ചു. തങ്ങൾക്ക് അവകാശപ്പെട്ട ഭൂമിയുടെ രേഖ നൽകാതെ ഡിഎഫ്ഒ തങ്ങളെ പ്രയാസപ്പെടുത്തുകയാണെന്ന് ആരോപിച്ചായിരുന്നു ആദിവാസികളുടെസമരം. 2019 ലെ പ്രളയത്തിൽ കരുളായി ഉൾവനത്തിലെ മുണ്ടക്കടവ്, ചേന്പൻകൊല്ലി നഗറുകളിലെ 53 കുടുംബങ്ങൾക്കാണ് വീടും സ്ഥലവും നഷ്ടമായത്. പകരമായി 2005 - 06 ലെ വനാവകാശ നിയമപ്രകാരം ഭൂമി നൽകാൻ തീരുമാനിക്കുകയും വനത്തിനുള്ളിൽ വാസയോഗ്യമായ ഭൂമി കണ്ടെത്തുകയും ചെയ്തിരുന്നു. ഇതിനായി 100 ഏക്കർ സ്ഥലം മാറ്റിവച്ചിട്ടുണ്ട്. ഇതുപ്രകാരം അപേക്ഷ നൽകിയ 53 പേരിൽ 16 പേർക്ക് ഭൂരേഖ ഒപ്പിട്ട് നൽകിയിട്ടുണ്ട്. ബാക്കി 37 അപേക്ഷകർക്ക് ഭൂരേഖ ഒപ്പിട്ട് നൽകാൻ കഴിയില്ലെന്നാണ് ഡിഎഫ്ഒ പറയുന്നത്. ഇതിൽ 28 പേരും ഭൂരേഖ ലഭിച്ച 16 പേരും ഉൾപ്പെടെ 44 പേർ എല്ലാ രേഖകളും നൽകിയിട്ടുണ്ട്. ഒന്പത് കുടുംബങ്ങളുടെ അപക്ഷകൾ സങ്കേതിക കാരണങ്ങൾ പറഞ്ഞ് മാറ്റിവച്ചിട്ടുമുണ്ട്. 2005-06 ൽ നിലവിൽ വന്ന വനാവകാശ നിയമപ്രകാരം 2005-06 ൽ 18 വയസ് പൂർത്തിയായവർക്ക് മാത്രമാണ് അപേക്ഷ നൽകാൻ അർഹതയെന്നും ഡിഎഫ്ഒ പറഞ്ഞു. എന്നാൽ വനം വകുപ്പിന്‍റെ മെല്ലെപോക്ക് മൂലമാണ് തങ്ങൾക്ക് ഭൂരേഖ ലഭിക്കാത്തതെന്നാണ് ആദിവാസി കുടുംബങ്ങൾ പറയുന്നത്. വനാവകാശ നിയമപ്രകാരം പ്രളയ ബാധിതർക്ക് ഭൂമി നൽകാൻ 2023 ഓഗസ്റ്റിൽ ഹൈക്കോടതി ആവശ്യപ്പെട്ടിരുന്നു. ആറ് മാസത്തിനുള്ളിൽ ഉത്തരവ് നടപ്പാക്കാനായിരുന്നു നിർദേശം. എന്നാൽ രണ്ട് വർഷമായിട്ടും ഉത്തരവ് നടപ്പാക്കിയിട്ടില്ല. ഇതേ തുടർന്നാണ് ഇന്നലെ രാവിലെ 11ന് ആദിവാസി കുടുംബങ്ങൾ കാടിറങ്ങിയെത്തി നിലന്പൂർ സൗത്ത് ഡിഎഫ്ഒയുടെ ഓഫീസിൽ ഉപരോധ സമരം തുടങ്ങിയത്. ആറ് വർഷമായി താൽക്കാലിക പ്ലാസ്റ്റിക്ക് ഷെഡുകളിലാണ് വന്യമൃഗശല്യം രൂക്ഷമായ സ്ഥലത്ത് ആദിവാസി കുടുംബങ്ങൾ കഴിയുന്നത്. നിലന്പൂർ സിഐ സുനിൽ പുളിക്കൽ, അഡ്വ. അശോക് കുമാർ, കരുളായി ഗ്രാമപഞ്ചായത്തംഗം അബ്ദുറഹ്മാൻ എന്നിവർ ചർച്ചയിൽ പങ്കെടുത്തു.

പെരിന്തൽമണ്ണ ജില്ലാ ആശുപത്രിയോട് സർക്കാരിന് അവഗണനയെന്ന് എംഎൽഎ

പെരിന്തൽമണ്ണ: കേരളത്തിന്‍റെ ആരോഗ്യരംഗം പൊളിഞ്ഞ് വീണുകൊണ്ടിരിക്കുകയാണെന്ന് നജീബ് കാന്തപുരം എംഎൽഎ. പെരിന്തൽമണ്ണ ജില്ലാ ആശുപത്രിയിലെ രോഗികളെയും ജീവനക്കാരെയും സന്ദർശിച്ച ശേഷം സംസാരിക്കുകയായിരുന്നു അദ്ദേഹം. ആരോഗ്യരംഗത്ത് ഏറ്റവും മോശപ്പെട്ട സംസ്ഥാനമായി കേരളം മാറിയിരിക്കുകയാണ്. സാധാരണക്കാരും പാവപ്പെട്ടവരുമായ രോഗികളുടെ ഏക ആശ്രയമായ സർക്കാർ ആശുപത്രികളെ മെച്ചപ്പെടുത്തുന്ന കാര്യത്തിൽ ആരോഗ്യവകുപ്പ് പരാജയമാണ്. ആത്മാർഥതയും സേവന സന്നദ്ധരുമായ ഡോക്ടർമാരുടെയും ജീവനക്കാരുടെയും ആശുപത്രികളുടെ ജനകീയ വികസന സമിതികളുടെയും പിന്തുണകൊണ്ടു മാത്രമാണ് സർക്കാർ ആശുപത്രികൾ മുന്നോട്ടു പോകുന്നത്. സർക്കാർ ആശുപത്രികളിലെ കെട്ടിടങ്ങൾ പലതും പൊളിഞ്ഞു വീഴാറായിരിക്കുന്നു. ആരോഗ്യരംഗം വഷളായത് സർക്കാരിന്‍റെ കെടുകാര്യസ്ഥത കൊണ്ടുമാത്രമാണെന്നും എംഎൽഎ പറഞ്ഞു. എംഎൽഎയുടെ സന്ദർശനത്തെ തുടർന്ന് പെരിന്തൽമണ്ണ ജില്ലാ ആശുപത്രിയിൽ രോഗികൾക്ക് സൗകര്യപ്രദമാകുന്ന രീതിയിൽ ചില ക്രമീകരണങ്ങൾ നടത്താൻ തീരുമാനമായി. പഴയ കെട്ടിടത്തിൽ പ്രവർത്തിക്കുന്ന അത്യാഹിത വിഭാഗം നേരത്തെ സർജിക്കൽ വാർഡായി ഉപയോഗിച്ചിരുന്ന കെട്ടിടത്തിലേക്ക് മാറ്റും. ആശുപത്രി കെട്ടിടങ്ങളിലേക്ക് ചാഞ്ഞു കിടക്കുന്ന മരങ്ങൾ ഉടൻ മുറിച്ചുനീക്കും. ആശുപത്രിയിൽ ജല ലഭ്യത ഉറപ്പാക്കാൻ വാട്ടർ അഥോറിറ്റിക്ക് നിർദേശം നൽകി. നിർമാണം പൂർത്തിയായ പുതിയ ഒപി ബ്ലോക്ക് ഉടൻ പ്രവർത്തനമാരംഭിക്കാൻ നടപടി സ്വീകരിക്കും. 11 ന് ചേരുന്ന ആശുപത്രി വികസന സമിതി യോഗത്തിൽ ഇക്കാര്യത്തിൽ തീരുമാനമെടുക്കും. ഫാർമസി, ഒപി എന്നിവിടങ്ങളിൽ രോഗികൾക്ക് കൂടുതൽ ഇരിപ്പിട സൗകര്യം ഒരുക്കും. ഫാർമസിയിലെ തിരക്ക് ഒഴിവാക്കുന്നതിനും രോഗികൾക്ക് വേഗത്തിൽ മരുന്ന് വിതരണം ചെയ്യുന്നതിനുമായി പെരിന്തൽമണ്ണയിലെ ഫാർമസി കോളജുകളിലെ വിദ്യാർഥികളുടെ സേവനം ഉറപ്പാക്കും. കാലപ്പഴക്കം കാരണം കെട്ടിടം പൊളിച്ചു നീക്കുന്നതുമായി ബന്ധപ്പെട്ട നടപടികൾ വേഗമാക്കാനും തീരുമാനിച്ചു. ആശുപത്രി സന്ദർശിച്ച ശേഷം ചേർന്ന യോഗത്തിൽ എംഎൽഎ, സൂപ്രണ്ട് ഡോ. ഷീന ലാൽ, ആർഎംഒ ഡോ. ദീപക് കെ. വ്യാസ്, ഡോ. എ.കെ. റൗഫ്, നഴ്സിംഗ് സുപ്രണ്ട് സുജാത, ഷീബ ബഷീർ എന്നിവർ സംസാരിച്ചു.

കർഷക തൊഴിലാളി യൂണിയൻ ധർണ നടത്തി

അങ്ങാടിപ്പുറം: വിവിധ ക്ഷേമ പെൻഷൻ അപേക്ഷകൾ സമയബന്ധിതമായി പാസാക്കാതെ അനാസ്ഥ കാണിച്ച യുഡിഎഫ് നേതൃത്വം നൽകുന്ന അങ്ങാടിപ്പുറം പഞ്ചായത്തിന്‍റെ നടപടികളിൽ പ്രതിഷേധിച്ച് കർഷക തൊഴിലാളി യൂണിയൻ അങ്ങാടിപ്പുറം പഞ്ചായത്ത് കമ്മിറ്റി ഗ്രാമപഞ്ചായത്ത് ഓഫീസിന് മുന്നിൽ ധർണ നടത്തി. 2024 ജൂലൈ മുതൽ ലഭിച്ച 83 അപേക്ഷകളിൽ അന്വേഷണം നടത്തിയത് 2025ജൂണ്‍ മാസത്തിലാണ്. മൂന്ന് മാസം മുതൽ 12 മാസം വരെ അപേക്ഷകൾ പരിഗണിക്കാതെ കിടന്നു. അപേക്ഷ ലഭിച്ചാൽ ഒരു മാസത്തിനകം നടപടികൾ പൂർത്തിയാക്കി പാസാക്കണമെന്നാണ് നിയമം എന്നിരിക്കെ 7,96,800 രൂപ അപേക്ഷകർക്ക് നഷ്ടപ്പെട്ടതായി കണക്കാക്കപ്പെടുന്നു. ക്ഷേമകാര്യ സ്റ്റാൻഡിംഗ് ചെയർമാന്‍റെയും പഞ്ചായത്ത് പ്രസിഡന്‍റിന്‍റെയും ഗുരുതരമായ അനാസ്ഥയാണ് ഇതിന് കാരണമെന്ന് ഭാരവാഹികൾ ചൂണ്ടിക്കാട്ടി. ഇക്കാര്യത്തിൽ നടപടി ആവശ്യപ്പെട്ട് വകുപ്പ് മന്ത്രിക്കും മലപ്പുറത്ത് ജോയിന്‍റ് ഡയറക്ടർക്കും പരാതി നൽകാനും തീരുമാനിച്ചു. പഞ്ചായത്ത് പ്രസിഡന്‍റ്, വൈസ് പ്രസിഡന്‍റ്, വിവിധ സ്റ്റാൻഡിംഗ് കമ്മിറ്റി ചെയർമാൻമാർ എന്നിവരുടെ വാർഡുകളിൽ നിരവധി ആളുകൾക്ക് പ്രയാസമുണ്ടായിട്ടും അവർ ശ്രദ്ധിച്ചില്ലെന്നും യോഗം ചൂണ്ടിക്കാട്ടി. ധർണ സമരം കർഷക തൊഴിലാളി യൂണിയൻ ജില്ലാ കമ്മിറ്റി അംഗം ടി.പി. വിജയൻ ഉദ്ഘാടനം ചെയ്തു. കെ. അഹമ്മദ് അധ്യക്ഷത വഹിച്ചു. കെ.ടി.നാരായണൻ, ഗ്രാമപഞ്ചായത്ത് അംഗങ്ങളായ ഷിഹാദ് പേരയിൽ, അനിൽ പുലിപ്ര, ജൂലി പോളി, പി. രത്നകുമാരി, വാഹിദ വാപ്പുട്ടി, എ.സി. അനിൽകുമാർ, ഒ.ടി. മുഹമ്മദ് സമീർ എന്നിവർ പ്രസംഗിച്ചു.

കേരള കോണ്‍ഗ്രസ്-എം അനുമോദിച്ചു

കരുവാരകുണ്ട്: കേരള കോണ്‍ഗ്രസ്-എം വണ്ടൂർ നിയോജക മണ്ഡലം കമ്മിറ്റി എസ്എസ്എൽസി പരീക്ഷയിൽ ഉന്നത വിജയം നേടിയ കേരള കോണ്‍ഗ്രസ് പ്രവർത്തകരുടെ മക്കളെ അനുമോദിച്ചു. അനീറ്റ ഷാജി, അലോയ്സ് കെ.അനീഷ്, ഇസാബെൽ കെ.അജീഷ് എന്നിവരെയാണ് മെമന്‍റോയും കാഷ് പ്രൈസും നൽകി അനുമോദിച്ചത്. കരുവാരകുണ്ടിൽ നടന്ന അനുമോദന സമ്മേളനം വണ്ടൂർ നിയോജക മണ്ഡലം പ്രസിഡന്‍റ് അപ്പച്ചൻ തേക്കുംതോട്ടം ഉദ്ഘാടനം ചെയ്തു. കരുവാരകുണ്ട് മണ്ഡലം പ്രസിഡന്‍റ് കെ.യു. തോമസ് അധ്യക്ഷത വഹിച്ചു. ജോസ് ഉള്ളാട്ടിൽ, ബേബി കല്ലിടുക്കി, അജേഷ് ചോക്കാട്, ജോണി ഉപ്പുമാക്കാൻ, പയസ് ജോണ്‍ തുടങ്ങിയവർ പ്രസംഗിച്ചു.

പഞ്ചായത്ത് ഭരണസമിതിക്കെതിരേ യുഡിഎഫ് പ്രതിഷേധം

കരുവാരകുണ്ട്: കരുവാരകുണ്ട് ഗ്രാമപഞ്ചായത്ത് നവീകരിച്ച പഞ്ചായത്ത് ഹാളിന്‍റെ ഉദ്ഘാടന സമയം പുറത്ത് യുഡിഎഫ് നേതാക്കളുടെ പ്രതിഷേധ സമരം നടന്നു. ജനകീയ പ്രശ്നങ്ങൾ മറന്ന് അഴിമതി മുന്നിൽ കണ്ടാണ് എല്ലാ സൗകര്യങ്ങളും ഉണ്ടായിരുന്ന പഞ്ചായത്തുഹാൾ മോടി കൂട്ടാൻ 30 ലക്ഷം രൂപ ചെലവഴിച്ചതെന്ന ആക്ഷേപമുന്നയിച്ചായിരുന്നു യുഡിഎഫ് നേതാക്കളുടെ പ്രതിഷേധം. കരുവാരകുണ്ട് പെയിൻ ആൻഡ് പാലിയേറ്റീവ് കെയർ സൊസൈറ്റിയിലേക്കുള്ള റോഡിലൂടെ ഗതാഗത സൗകര്യം ദുസഹമാണെന്നും ഇക്കാര്യം പരിഹരിക്കണമെന്നുമുള്ള ആവശ്യം അധികൃതരുടെ ശ്രദ്ധയിൽ പെടുത്തിയിരുന്നു. എന്നാൽ ഇതുപോലുള്ള ജനകീയ പ്രശ്നത്തിന് പരിഹാരം കണ്ടില്ല. പാലിയം ഡയാലിസിസ് സെന്‍റർ പ്രവർത്തിക്കുന്നതും ഇവിടെയുള്ള കെട്ടിടത്തിലാണ്. ലക്ഷങ്ങൾ മുടക്കി അനാവശ്യ നിർമാണം നടത്തുന്നത് അഴിമതി മുന്നിൽ കണ്ടാണ്. ഇതുപോലുള്ള പ്രവൃത്തികൾക്കാണ് പഞ്ചായത്ത് ഭരണ നേതൃത്വം ശ്രമിക്കുന്നതെന്നും യുഡിഎഫ് നേതാക്കൾ കുറ്റപ്പെടുത്തി. എൻ.ഉണ്ണീൻകുട്ടി, എം.പി. വിജയകുമാർ, കെ.ഗോപാലകൃഷ്ണൻ, എ.ഹംസ, റഷീദ് കുട്ടത്തി തുടങ്ങിയ നേതാക്കൾ പ്രതിഷേധ സമരത്തിന് നേതൃത്വം നൽകി. നവീകരിച്ച പഞ്ചായത്ത് ഹാളിന്‍റെ ഉദ്ഘാടനം ഗ്രാമപഞ്ചായത്ത് പ്രസിഡന്‍റ് വി.എസ്. പൊന്നമ്മ നിർവഹിച്ചു. യുഡിഎഫ് അംഗങ്ങൾ ചടങ്ങിൽ നിന്ന് വിട്ടുനിന്നു.

മുണ്ടപ്പാടത്തും മൈലാടിപൊട്ടിയിലും കാട്ടാന കൃഷി നശിപ്പിച്ചു

നിലന്പൂർ: ചുങ്കത്തറ മുണ്ടപ്പാടത്തും ചാലിയാർ മൈലാടിപൊട്ടിയിലും കാട്ടാന വ്യാപകമായി കൃഷി നശിപ്പിച്ചു. പെരുന്പത്തൂർ സ്വദേശി മുല്ലേരി സുബ്രഹ്മണ്യന്‍റെ മുണ്ടപ്പാടത്തെ കൃഷിയിടത്തിൽ കാട്ടാന ഇന്നലെ പുലർച്ചെയാണ് വൻതോതിൽ കൃഷി നശിപ്പിച്ചത്. നൂറിലേറെ നേന്ത്രവാഴകളാണ് ഒറ്റ രാത്രി കൊണ്ട് നശിപ്പിച്ചത്. കഴിഞ്ഞ ദിവസം ഇതേ കൃഷിയിടത്തിലെത്തി കാട്ടാന കൃഷി നശിപ്പിച്ചിരുന്നു. നിലന്പൂർ മേഖലയിൽ കാട്ടാന ശല്യം അതിരൂക്ഷമാണ്. നെല്ല്, തെങ്ങ്, കമുക്, വാഴ കൃഷികളാണ് നശിപ്പിക്കുന്നത്. നിലന്പൂർ മേഖലകളിലെ ജനവാസകേന്ദ്രങ്ങളിൽ കാട്ടാനകൾ ഇറങ്ങാത്ത ദിവസമില്ല. മൈലാടിപൊട്ടിയിലെ തൈപറന്പിൽ ബിനുവിന്‍റെ വീടിന്‍റെ മതിലിനോട് ചേർന്ന കൃഷിയും ആനകൾ നശിപ്പിച്ചു. വാഴകൾ മതിലിലേക്കാണ് വീണുകിടക്കുന്നത്.

എസ്ബിഐ ക്രെഡിറ്റ് കാർഡ് തട്ടിപ്പ്: 12 പരാതികളിൽ 20,08,747 രൂപ നഷ്ടപരിഹാരം

മലപ്പുറം: എസ്ബിഐ ക്രെഡിറ്റ് കാർഡ് തട്ടിപ്പുകേസുകളിലെ 12 പരാതികളിൽ ഉപഭോക്തൃ കമ്മീഷൻ 20,08,747 രൂപ നഷ്ടപരിഹാരം വിധിച്ചു. എസ്ബിഐ ക്രഡിറ്റ് കാർഡ് ഉടമകളായ പന്ത്രണ്ട് പേർ നൽകിയ പരാതിയിലാണ് ജില്ലാ ഉപഭോക്തൃ കമ്മിഷന്‍റെ വിധി. ബാങ്കിൽ നിന്ന് ക്രെഡിറ്റ് കാർഡ് ലഭിക്കാൻ അർഹതയുള്ളവരാണെന്നും ബാങ്കിൽ വരണമെന്നുമുള്ള നിരന്തരമായ വിളിയെ തുടർന്ന് ക്രഡിറ്റ് കാർഡ് ആവശ്യമില്ലാത്തവർ പോലും ക്രെഡിറ്റ് കാർഡിനായി ബാങ്കിലെത്തി കാർഡ് എടുത്തു. തുടർന്ന് കാർഡ് ആവശ്യമില്ല എന്ന് തോന്നിയവരും ക്രെഡിറ്റ് കാർഡ് അക്കൗണ്ടിലൂടെ അധികമായി പണം പോകുന്നു എന്ന് തോന്നിയവരും കാർഡ് കാൻസൽ ചെയ്തു. തുടർന്നും പരാതിക്കാരുടെ അക്കൗണ്ടിൽ നിന്ന് പരാതിക്കാർ അറിയാതെ പണം നഷ്ടപ്പെടുന്നതായി ശ്രദ്ധയിൽ പെട്ടതിനെ തുടർന്ന് ബാങ്കുമായി ബന്ധപ്പെട്ടപ്പോഴാണ് ക്രെഡിറ്റ് കാർഡ് ജീവനക്കാരനായി പ്രവർത്തിച്ചയാൾ നിരവധി പേരുടെ കാർഡ് ഉപയോഗിച്ചു തട്ടിപ്പ് നടത്തിയതായി മനസിലാക്കിയത്. തുടർന്ന് പരാതിക്കാർ ഉപഭോക്തൃ കമ്മീഷനിൽ പരാതി നൽകി. അന്യായമായി അക്കൗണ്ടിൽ നിന്ന് എടുത്തു പറ്റിയ തുക തിരിച്ചു നൽകണമെന്നും പരാതിക്കാർ ഉപയോഗിച്ചിട്ടില്ലാത്ത കാർഡിന്‍റെ പേരിൽ പണം അടയ്ക്കാൻ പരാതിക്കാർക്ക് ബാധ്യതയില്ലെന്നും ഉചിതമായ നഷ്ടപരിഹാരം വേണമെന്നും ഹർജിയിൽ ആവശ്യപ്പെട്ടു. അന്വേഷണത്തിൽ ആറ് പരാതികൾ ശരിയെന്ന് കണ്ടെത്തി പരിഹരിക്കാൻ തീരുമാനിച്ചു. ശേഷിക്കുന്ന മുപ്പത്തിനാല് പരാതികളിൽ പരാതിക്കാരുടെ വീഴ്ചയാണ് പണം നഷ്ടപെട്ടതെന്നതിനാൽ പരിഹരിക്കാനായില്ലെന്നും ബോധിപ്പിച്ചു. എസ്ബിഐ കാർഡ്സും എസ്ബിഐയും രണ്ടു കന്പനികളാണെങ്കിലും ഒരേ കാര്യത്തിനായി ഒന്നിച്ച് പ്രവർത്തിക്കുന്നവരാണെന്ന് കമ്മീഷൻ കണ്ടെത്തി. ബാങ്കിൽ നിന്ന് നഷ്ടപെട്ട പണവും നഷ്ടപരിഹാരവും കോടതി ചെലവുമായി 20,08,747 രൂപ പരാതിക്കാർക്ക് 45 ദിവസത്തിനകം നൽകണമെന്നും വീഴ്ച വന്നാൽ വിധിസംഖ്യക്ക് ഒന്പത് ശതമാനം പലിശ നൽകണമെന്നും കെ. മോഹൻദാസ് പ്രസിഡന്‍റും മെന്പർമാരായ പ്രീതി ശിവരാമൻ, സി.വി. മുഹമ്മദ് ഇസ്മായിൽ എന്നിവർ അംഗങ്ങളുമായ കമ്മീഷൻ വിധിച്ചു. ഹർജിക്കാർക്കു വേണ്ടി അഭിഭാഷകരായ കെ.എം. കൃഷ്ണകുമാർ, സൈനുൽ ആബിദീൻ കുഞ്ഞിതങ്ങൾ, അഭിലാഷ്, ബീനാ ജോസഫ് എന്നിവർ ഹാജരായി.

വിദ്യാഭ്യാസ അവാർഡുകൾ വിതരണം ചെയ്തു

താഴെക്കോട്: എസ്എസ്എൽസി, പ്ലസ്ടു, എൽഎസ്എസ്, യുഎസ്എസ്, എൻഎംഎംഎസ് പരീക്ഷകളിൽ ഉന്നതവിജയം നേടിയ നൂറ്റന്പതിലേറെ വിദ്യാർഥികൾക്ക് താഴെക്കോട് സർവീസ് സഹകരണ ബാങ്ക് വിദ്യാഭ്യാസ എക്സലൻസ് അവാർഡുകൾ വിതരണം ചെയ്തു. വിതരണോദ്ഘാടനംനജീബ് കാന്തപുരം എംഎൽഎ നിർവഹിച്ചു. ബാങ്ക് പ്രസിഡന്‍റ് എ.കെ. സെയ്തുമുഹമ്മദ് അധ്യക്ഷത വഹിച്ചു. ഗ്രാമപഞ്ചായത്ത് മുൻ പ്രഡിഡന്‍റ് എ.കെ. നാസർ, മെന്പർ വി. മുസ്തഫ, ഓങ്ങല്ലൂർ ഹമീദ്, എം.ടി. അഫ്സൽ, പി. പത്മനാഭൻ, കെ.കെ. ഉമ്മർ ഫാറൂഖ്, എൻ. ബഷീർ, ടി.വി. ഉണ്ണികൃഷ്ണൻ, കെ. ശങ്കുണ്ണി, കെ. ജുമൈല, എം.ടി. നഫീസ, എം. അനീസ്, വി. ഐശ്വര്യ, ഒ. മൈമൂന, മുഹമ്മദ് അൻവർ, ബാങ്ക് മുൻ പ്രസിഡന്‍റും ഡയറക്ടറുമായ എൻ. ഹംസ, പുലിക്കട മുഹമ്മദാലി എന്നിവർ പ്രസംഗിച്ചു.

ഓഡിറ്റ് റിപ്പോർട്ട്: മഞ്ചേരി നഗരസഭക്ക് അംഗീകാരം ലഭിച്ചത് 1032 പദ്ധതികൾക്ക്, നടപ്പാക്കിയത് 327 മാത്രം

മഞ്ചേരി: നഗരസഭയിലെ അടിസ്ഥാന സൗകര്യവികസനത്തിനായി സർക്കാർ അനുവദിച്ച ഫണ്ടുകളിൽ സിംഹഭാഗവും ലാപ്സായതായി ഓഡിറ്റ് റിപ്പോർട്ട്. 1032 പദ്ധതികൾക്ക് അംഗീകാരം നൽകിയതിൽ കേവലം 327 പദ്ധതികൾ മാത്രമാണ് നടപ്പായത്. 2023-24 സാന്പത്തിക വർഷത്തെ പ്ലാൻ ഫണ്ടിലെ മാത്രം കണക്കാണിത്. പ്ലാൻഫണ്ടിൽ 18 കോടി രൂപയോളം ലഭിച്ചു. എന്നാൽ ചെലവഴിച്ചത് 8.76 കോടി രൂപ മാത്രം. 9,67,13,615 രൂപ ഇത്തരത്തിൽ ലാപ്സായതായാണ് ഓഡിറ്റ് റിപ്പോർട്ടിലുള്ളത്. 2025 മാർച്ച് 20ന് വന്ന റിപ്പോർട്ട് നാളിതുവരെ കൗണ്‍സിൽ ചർച്ച ചെയ്തില്ലെന്നാണ് മറ്റൊരു വസ്തുത. ഓഡിറ്റ് റിപ്പോർട്ട് ലഭിച്ചാൽ ബന്ധപ്പെട്ട ഉദ്യോഗസ്ഥരോട് വിശദീകരണം ചോദിക്കുകയും ഒരു മാസത്തിനകം പ്രത്യേക കൗണ്‍സിൽ ചേർന്ന് വിഷയം ചർച്ച ചെയ്യണമെന്നുമാണ് നിയമം. ഓഡിറ്റ് റിപ്പോർട്ടിലെ ആക്ഷേപങ്ങൾ പരിഹരിക്കുന്നതിനായി കൗണ്‍സിൽ സ്വീകരിച്ച നടപടികൾ സംബന്ധിച്ച് വാർഡ് സഭാ യോഗത്തിൽ വിശദീകരിക്കണമെന്നും പൊതുജനങ്ങളുടെ അറിവിലേക്കായി നഗരസഭയുടെ നോട്ടീസ് ബോർഡിൽ പ്രസിദ്ധീകരിക്കണമെന്നും നിഷ്കർഷയുണ്ട്. എന്നാൽ ഇത്തരം നടപടിക്രമങ്ങളൊന്നും പാലിച്ചിട്ടില്ല. തനത് ഫണ്ടിന്‍റെ കാര്യത്തിലും നഗരസഭ അലംഭാവം കാണിച്ചതായി റിപ്പോർട്ടിൽ പറയുന്നു. നികുതി, നികുതിയേതര വരുമാനങ്ങൾ പിരിച്ചെടുക്കുന്നതിലും ഭരണസമിതി പരാജയപ്പെട്ടു. 14 കോടി രൂപയോളമാണ് കുടിശികയുള്ളത്. നഗരസഭയുടെ ഉടമസ്ഥതയിലുള്ള കെട്ടിടങ്ങളുടെ വാടക പിരിക്കുന്നതിലും വീഴ്ച വരുത്തി. കൃത്യമായി രജിസ്റ്ററുകൾ സൂക്ഷിക്കുകയോ വിശകലനം നടത്തുകയോ ചെയ്യുന്നതായും കാണുന്നില്ല. സുപ്രധാന വിഷയങ്ങൾ ധനകാര്യ സ്റ്റാൻഡിംഗ് കമ്മിറ്റിയിൽ വിശകലനം ചെയ്യണമെന്ന വ്യവസ്ഥയും പാലിക്കുന്നില്ല. നികുതി, നികുതിയേതര വരുമാനം അന്പതു ശതമാനമെങ്കിലും പിരിച്ചെടുക്കണമെന്ന വ്യവസ്ഥ പാലിക്കാത്തതിനാൽ കേന്ദ്ര ഫിനാൻസ് കമ്മീഷന്‍റെ ഫണ്ട് മഞ്ചേരി നഗരസഭക്ക് ലഭിച്ചില്ല. ഈയിനത്തിൽ പത്തുകോടി രൂപയാണ് നഗരസഭക്ക് ലഭിക്കാതെ പോയത്. 2022-23 ലും സമാനമായ ഓഡിറ്റ് റിപ്പോർട്ടായിരുന്നു വന്നിരുന്നത്. അന്ന് അപാകതകൾ ആവർത്തിക്കില്ലെന്നായിരുന്നു മറുപടി നൽകിയിരുന്നത്. നഗരസഭയുടെ കെടുകാര്യസ്ഥതക്കെതിരേ ശക്തമായ സമരപരിപാടികൾ ആസൂത്രണം ചെയ്യുമെന്നും ഇതിന്‍റെ മുന്നോടിയായി വെള്ളിയാഴ്ച നഗരസഭാ കാര്യാലയത്തിലേക്ക് ബഹുജന മാർച്ചും പ്രതിഷേധ ധർണയും സംഘടിപ്പിക്കുമെന്നും എൽഡിഎഫ് കൗണ്‍സിലർമാരായ മരുന്നൻ സാജിദ് ബാബു, എ.വി. സുലൈമാൻ, സി.പി. അബ്ദുൾ കരീം, അഡ്വ. കെ.വി. പ്രേമാരാജീവ്, കെ.ടി. മുഹമ്മദലി എന്നിവർ വാർത്താ സമ്മേളനത്തിൽ പറഞ്ഞു.

കെ.സി. ജോബ് അനുസ്മരണവും ഫോട്ടോ അനാച്ഛാദനവും

എടക്കര: ബ്ലോക്ക് കോണ്‍ഗ്രസ് പ്രസിഡന്‍റും നിലന്പൂർ ബ്ലോക്ക് പഞ്ചായത്ത് പ്രസിഡന്‍റുമായിരുന്ന കെ.സി.ജോബ് അനുസ്മരണവും ഫോട്ടോ അനാച്ഛാദനവും നടത്തി. എടക്കര ബ്ലോക്ക് കോണ്‍ഗ്രസ് കമ്മിറ്റി നടത്തിയ അനുസ്മരണ സമ്മേളനം ആര്യാടൻ ഷൗക്കത്ത് എംഎൽഎ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ബാബു തോപ്പിൽ അധ്യക്ഷത വഹിച്ചു. പി. പുഷ്പവല്ലി, ഒ.ടി. ജയിംസ്, അസീസ് പുളിയഞ്ചാലി, കെ.സി. ഷാഹുൽ ഹമീദ്, പാനായിൽ ജേക്കബ്, പി. ഉസ്മാൻ, കെ. രാധാകൃഷ്ണൻ, വി.പി. അബ്ദുൾ ജലീൽ, താജാ സക്കീർ, അബ്ബാസ് കല്ലേങ്ങര എന്നിവർ പ്രസംഗിച്ചു.

ഡിഎഫ്ഒ പി. ധനേഷ് കുമാർ ചുമതലയേറ്റു

നിലന്പൂർ: നിലന്പൂർ നോർത്ത് ഡിവിഷൻ ഡിഎഫ്ഒ ആയി പി. ധനേഷ് കുമാർ ചുമതലയേറ്റു. മുൻ ഡിഎഫ്ഒ പി. കാർത്തിക് എറണാകുളത്തേക്ക് മാറിയതിന് പകരമായാണ് ധനേഷ് കുമാർ ഇന്നലെചുമതലയേറ്റത്. കോഴിക്കോട് വനം ഫ്ളയിംഗ് സ്ക്വാഡ് ഡിഎഫ്ഒ ആയി പ്രവർത്തിച്ചിട്ടുണ്ട്. കോഴിക്കോട് വെസ്റ്റ്ഹിൽ സ്വദേശിയാണ്. മികച്ച വനപാലകനുള്ള സംസ്ഥാന സർക്കാരിന്‍റെ സ്വർണ മെഡൽ നേടിയിട്ടുണ്ട്.

സ്വകാര്യ ബസുകൾ പണിമുടക്കും

മഞ്ചേരി: ബസുടമ സംയുക്ത സമരസമിതി പ്രഖ്യാപിച്ച സൂചന ബസ് സമരവുമായി ബന്ധപ്പെട്ട് സംയുക്ത സമരസമിതിയുമായി ട്രാൻസ്പോർട്ട് കമ്മീഷണർ നടത്തിയ ചർച്ച പരാജയം. ഇന്ന് സംസ്ഥാനത്ത് സ്വകാര്യ ബസുകൾ പണിമുടക്കുമെന്ന് സംയുക്ത സമരസമിതി ചെയർമാൻ ഹംസ ഏരിക്കുന്നൻ പറഞ്ഞു. ആവശ്യങ്ങൾ അംഗീകരിച്ചില്ലെങ്കിൽ 22 മുതൽ അനിശ്ചിതകാലത്തേക്ക് സർവീസ് നിർത്തി വയ്ക്കാനാണ് സംയുക്ത സമിതി തീരുമാനമെന്നും ഹംസ ഏരിക്കുന്നൻ പറഞ്ഞു. ട്രാൻസ്പോർട്ട് കമ്മീഷണർ നാഗാർജു ചക്കിലത്ത്, ജോയിന്‍റ് ട്രാൻസ്പോർട്ട് കമ്മീഷണർ മനോജ്, ഡിടിസി അനൂപ് ജേക്കബ്, സംയുക്ത സമിതി ചെയർമാൻ ഹംസ ഏരിക്കുന്നൻ, കണ്‍വീനർ ടി. ഗോപിനാഥ്, വൈസ് ചെയർമാൻ ഗോകുൽദാസ് ചർച്ചയിൽ പങ്കെടുത്തു.

മണ്ണാർമലയിലെ പുലി സാന്നിധ്യം: വനംമന്ത്രിക്ക് എംഎൽഎ കത്തയച്ചു

പെരിന്തൽമണ്ണ: മണ്ണാർമലയിൽ നിരന്തരമുള്ള പുലിയുടെ സാന്നിധ്യത്തെത്തുടർന്ന് അടിയന്തര ഇടപെടൽ ആവശ്യപ്പെട്ട് നജീബ് കാന്തപുരം എംഎൽഎ വനംമന്ത്രി എ.കെ. ശശീന്ദ്രൻ, വനം വകുപ്പ് പ്രിൻസിപ്പൽ ചീഫ് കണ്‍സർവേറ്റർ രാജേഷ് രവീന്ദ്രൻ എന്നിവർക്ക് കത്തയച്ചു. കഴിഞ്ഞ ദിവസവും പ്രദേശത്ത് സ്ഥാപിച്ച നിരീക്ഷണ കാമറയിൽ പുലിയുടെ ദൃശ്യം പതിഞ്ഞിരുന്നു. ഈ സാഹചര്യത്തിൽ വനംവകുപ്പിന്‍റെ നടപടി ഊർജിതമാക്കണമെന്നാവശ്യപ്പെട്ടാണ് എംഎൽഎ കത്തയച്ചത്. കഴിഞ്ഞ രണ്ടു വർഷമായി ഭീതിയോടെയാണ് പ്രദേശത്ത് ജനങ്ങൾ ജീവിക്കുന്നത്. പുലിയെ പിടികൂടുന്നതിന് ഉടൻ നടപടി സ്വീകരിക്കണമെന്ന് എംഎൽഎ കത്തിലൂടെ ആവശ്യപ്പെട്ടു.

കിംസ് അൽശിഫയിൽ വാതരോഗ നിർണയ ക്യാന്പ്

പെരിന്തൽമണ്ണ: കിംസ് അൽശിഫ ആശുപത്രിയിൽ വാതരോഗ വിഭാഗത്തിന്‍റെ കീഴിൽ ഒന്പത് മുതൽ 31 വരെ വാതരോഗ നിർണയ ക്യാന്പ് സംഘടിപ്പിക്കുന്നു. സന്ധിവാതം ഉണ്ടെന്ന് സംശയിക്കുന്നവരും സന്ധിവാതത്തിനു ചികിത്സ നടത്തികൊണ്ടിരിക്കുന്നവർക്കും യൂറിക് ആസിഡ് പോലെയുള്ള പ്രശ്നങ്ങൾ നേരിടുന്നവർക്കും പങ്കെടുക്കാം. ഡോക്ടർ പരിശോധനയിലും ലാബ്, റേഡിയോളജി പരിശോധനയിലും ഇളവുകൾ ലഭ്യമാകും. ഡോ. സി. അനൂപ് നേതൃത്വം നൽകും. ബുക്കിംഗിന് 8078777716 നന്പറിൽ ബന്ധപ്പെടണം.

കായികാധ്യാപകരുടെ പ്രശ്നങ്ങൾ പരിഹരിക്കണം: എൻടിയു

മലപ്പുറം : സ്കൂൾ കായികാധ്യാപകരുടെ തസ്തികകൾ നിലനിർത്തുന്നതിന് സർക്കാർ ഉത്തരവിറക്കണമെന്ന് ദേശീയ അധ്യാപക പരിഷത്ത് (എൻടിയു) ജില്ലാ പ്രസിഡന്‍റ് വി.സുധീർ, ജനറൽ സെക്രട്ടറി പി.ടി. സുരേഷ് എന്നിവർ ആവശ്യപ്പെട്ടു. യുപി സ്കൂളുകളിൽ 300 കുട്ടികൾക്ക് ഒരു കായിക അധ്യാപകൻ എന്ന അനുപാതം മാറ്റണം. അതുപോലെ എട്ട്, ഒന്പത് ക്ലാസുകൾക്ക് കായികാധ്യാപകനെ നിയമിക്കുന്പോൾ പത്താംക്ലാസിലെ കുട്ടികളുടെ എണ്ണവും പരിഗണിക്കണം. കഴിഞ്ഞ തവണത്തെ സംസ്ഥാന കായികമേളയിൽ മികച്ച സ്കൂളായി തെരഞ്ഞെടുക്കപ്പെട്ട സ്കൂളിലെ കായികാധ്യാപക തസ്തിക പോലും നഷ്ടപ്പെട്ട സാഹചര്യമുണ്ടായി. അനുപാതം കുറച്ചില്ലെങ്കിൽ തസ്തികകൾ ഇനിയും കൂടുതൽ നഷ്ടപ്പെടുന്നതിനും അത് മൊത്തത്തിൽ സ്കൂൾ കായിക മേഖല പിന്നാക്കം പോകുന്നതിനും കാരണമാകും. ഹൈസ്കൂൾ കായികാധ്യാപകർക്ക് യുപി അധ്യാപകരുടെ ശന്പള സ്കെയിലിൽ ശന്പളം നൽകുന്ന സന്പ്രദായം അവസാനിപ്പിച്ച് അർഹതപ്പെട്ട ശന്പളം നൽകണമെന്നും ഇരുവരും പ്രസ്താവനയിൽ ആവശ്യപ്പെട്ടു.

ലഹരി വിരുദ്ധ സന്ദേശ യാത്രയ്ക്ക് സ്വീകരണം നൽകി

എടക്കര: മലങ്കര ഓർത്തഡോക്സ് സുറിയാനി സഭയുടെ യുവജന പ്രസ്ഥാനം സംഘടിപ്പിച്ച ലഹരി വിരുദ്ധ സന്ദേശ യാത്രക്ക് മലബാർ ഭദ്രാസനത്തിന്‍റെ ആഭിമുഖ്യത്തിൽ എടക്കരയിൽ സ്വീകരണം നൽകി. എടക്കര ഇന്ദിരാഗാന്ധി ബസ് സ്റ്റാൻഡിൽ നൽകിയ സ്വീകരണ സമ്മേളനം ആര്യാടൻ ഷൗക്കത്ത് എംഎൽഎ ഉദ്ഘാടനം ചെയ്തു. ഓർത്തഡോക്സ് യുവജന പ്രസ്ഥാനം കേന്ദ്ര പ്രസിഡന്‍റ് ഡോ. ഗീവർഗീസ് മാർ യൂലിയോസ് മെത്രാപ്പോലീത്ത മുഖ്യസന്ദേശം നൽകി. മലബാർ ഭദ്രാസന യുവജന പ്രസ്ഥാനം വൈസ് പ്രസിഡന്‍റ് ഫാ. എൻ.എം ജോർജ് അധ്യക്ഷത വഹിച്ചു. ജാഥാ ക്യാപ്റ്റനും യുവജന പ്രസ്ഥാനം കേന്ദ്ര വൈസ് പ്രസിഡന്‍റുമായ ഫാ. വിജു ഏലിയാസ്, ട്രഷറർ രഞ്ജു എം. ജോയ്, കൃപ ഡി അഡിക്ഷൻ സെന്‍റർ ഡയറക്ടർ ഫാ. പോൾ വർഗീസ്, ലഹരി വിരുദ്ധ സമിതി വൈസ് പ്രസിഡന്‍റ് ഫാ. മാത്യൂസ് വട്ടിയാനിക്കൽ, ഒസിവൈഎം നിലന്പൂർ പ്രസിഡന്‍റ് ഫാ. ഷാബിൻ രാജു, എക്സൈസ് ഇൻസ്പെക്ടർ റെജി തോമസ്, ജോഷി ജോസ് എന്നിവർ പ്രസംഗിച്ചു. ഒസിവൈഎം നെല്ലിപ്പൊയിൽ ടീം അവതരിപ്പിച്ച തെരുവ് നാടകവും ചുങ്കത്തറ ടീമിന്‍റെ ഫ്ളാഷ് മോബും അരങ്ങേറി.

കോണ്‍ഗ്രസ് പ്രവർത്തകർ മന്ത്രിയുടെ കോലം കത്തിച്ചു

എടക്കര: കോട്ടയം മെഡിക്കൽ കോളജിൽ കെട്ടിടം തകർന്നുവീണ് ബിന്ദു എന്ന വീട്ടമ്മ മരിച്ച സംഭവത്തിൽ പ്രതിഷേധിച്ച് എടക്കരയിൽ കോണ്‍ഗ്രസ് പ്രവർത്തകർ ആരോഗ്യവകുപ്പ് മന്ത്രിയുടെ കോലം കത്തിച്ചു. മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തിലാണ് ടൗണിൽ പ്രകടനം നടത്തിയും കോലം കത്തിച്ചും പ്രവർത്തകർ പ്രതിഷേധിച്ചത്. കോണ്‍ഗ്രസ് പാർട്ടി ഓഫീസ് പരിസരത്തു നിന്നാരംഭിച്ച പ്രകടനം ടൗണ്‍ ചുറ്റി ഇന്ദിരഗാന്ധി ബസ് ടെർമിനൽ കവാടത്തിൽ സംഗമിച്ചു. തുടർന്ന് കഐൻജി റോഡിൽ മന്ത്രിയുടെ കോലം കത്തിച്ചു. ബ്ലോക്ക് കോണ്‍ഗ്രസ് പ്രസിഡന്‍റ് ബാബു തോപ്പിൽ, മണ്ഡലം പ്രസിഡന്‍റ് കെ. രാധാകൃഷ്ണൻ, നിലന്പൂർ ബ്ലോക്ക് പഞ്ചായത്ത് പ്രസിഡന്‍റ് പി. പുഷ്പവല്ലി, കെ.സി. ഷാഹുൽ ഹമീദ്, വിനോദ് കരിന്പനക്കൽ, സുലൈമാൻ കാട്ടിപ്പടി, അസീസ് ഉണിച്ചന്തം, പ്രകാശ് മുപ്പിനി, വി.വി. പ്രസാദ്, ടി.ടി. മൻസൂർ, സി.പി. സലാം എന്നിവർ നേതൃത്വം നൽകി.

പിതാവിന്‍റെ ഓർമക്കായി കുട്ടശേരി സ്കൂളിന് മകന്‍റെ കൈതാങ്ങ്

മഞ്ചേരി: പിതാവിന്‍റെ ഓർമക്കായി കുട്ടശേരി എഎംഎൽപി സ്കൂളിന് സാന്പത്തിക സഹായം നൽകി മകൻ. നൂറ് വർഷം മുന്പ് കുട്ടശേരിയിൽ സ്കൂൾ സ്ഥാപിക്കാൻ മുന്നിട്ടിറങ്ങുകയും കുട്ടശേരിയിലും സമീപ പ്രദേശങ്ങളിലുമായി ആറോളം വിദ്യാലയങ്ങൾ സ്ഥാപിക്കുകയും ചെയ്ത കമ്മുണ്ണി മുസ്ലിയാരുടെ ഓർമയ്ക്കായാണ് മകൻ മുഹമ്മദ് സ്കൂളിന് സഹായം നൽകിയത്. തുക ഉപയോഗിച്ച് പിതാവിന്‍റെ പേരിൽ ലൈബ്രറി ആരംഭിക്കണമെന്നാണ് മകന്‍റെ ആഗ്രഹം. നൂറ്റാണ്ടിന് മുന്പേ വിദ്യാഭ്യാസത്തിന്‍റെ വിലയറിഞ്ഞ് നാട്ടുകാരെ അറിവ് നേടാൻ പ്രോത്സാഹിപ്പിച്ച പണ്ഡിതനായിരുന്നു കമ്മുണ്ണി മുസ്ലിയാർ. പിതാവിന്‍റെ പാതയിൽ തന്നെ മകനും എഴുത്തുകാരനും ചിന്തകനും പ്രഭാഷകനുമായി. ഫാറൂഖ് കോളജിന് സമീപം കുട്ടശേരി ഹൗസ് എന്ന തന്‍റെ ഭവനത്തിൽ വിശ്രമജീവിതം നയിക്കുന്ന പ്രഫ. പി. മുഹമ്മദ് അനാരോഗ്യം കാരണം സ്കൂൾ അധികൃതരെ വീട്ടിലേക്ക് വിളിപ്പിച്ചാണ് തന്‍റെ ആഗ്രഹം അറിയിച്ചത്. പ്രധാനാധ്യാപകൻ ജോണ്‍ വർഗീസ്, പിടിഎ പ്രസിഡന്‍റ് സി.കെ. അബ്ദുൾറഫീഖ്, മുൻ പിടിഎ പ്രസിഡന്‍റ് ഹസൻ ദാരിമി, പി. അയ്മൻ ശൗഖി, പി. ബാസിമ, പി. ഹന, മാനേജർ അബ്ദുസലാം ചെറുകാട്, സീനിയർ അധ്യാപകനായ സി. അബ്ദുൾ ജലീൽ, സി. ഷിഫാസ് എന്നിവർ വീട്ടിലെത്തുകയായിരുന്നു. നൂറ്റാണ്ട് മുന്പത്തെ പ്രദേശത്തിന്‍റെ സാന്പത്തിക, മത ഭൗതിക വിദ്യാഭ്യാസ അവസ്ഥയും ഗതാഗത മാർഗവും പങ്കുവച്ച അദ്ദേഹവും ഭാര്യ എൻ.വി. ആസിയയും ചേർന്നാണ് തുക കൈമാറിയത്.

മരുതൻപാറ സദ്ഗ്രാമത്തിൽ കെട്ടിടം തകർന്ന സംഭവം: കുറ്റക്കാർക്കെതിരെ നടപടി വേണമെന്ന് എംഎൽഎ

പെരിന്തൽമണ്ണ: 2019-20 സാന്പത്തിക വർഷം പട്ടികജാതി വകുപ്പ് ഫണ്ട് ഉപയോഗിച്ച് താഴേക്കോട് ഗ്രാമപഞ്ചായത്തിലെ മരുതൻപാറ പട്ടികജാതി സദ്ഗ്രാമത്തിൽ ( ഉന്നതി നഗർ ) നിർമിക്കുന്ന കമ്മ്യൂണിറ്റി സെന്‍റർ കെട്ടിടം നിർമാണത്തിലിരിക്കെ നിലംപൊത്തിയ സംഭവത്തെക്കുറിച്ച് സമഗ്ര അന്വേഷണം നടത്തണമെന്നും കുറ്റക്കാർക്കെതിരെ ശക്തമായ നടപടി സ്വീകരിക്കണമെന്നും നജീബ് കാന്തപുരം എംഎൽഎ ആവശ്യപ്പെട്ടു. സ്ഥലം സന്ദർശിച്ച് സംസാരിക്കുകയായിരുന്നു അദ്ദേഹം. പട്ടികജാതി, പിന്നാക്ക വിഭാഗങ്ങളോട് സർക്കാരിന് യാതൊരു താൽപര്യവുമില്ല. പട്ടികജാതി വിഭാഗങ്ങൾക്കായി നടപ്പാക്കുന്ന പല പദ്ധതികളും അവതാളത്തിലാണ്. ഇത്തരം പദ്ധതികളുടെ പ്രവർത്തനം പരിശോധിക്കാനോ വിലയിരുത്താനോ ആരുമില്ലാത്ത അവസ്ഥയാണുള്ളതെന്നും എംഎൽഎ ചൂണ്ടിക്കാട്ടി. സർക്കാരിന് കീഴിലുള്ള ’നിർമിതി കേന്ദ്ര’മാണ് അംബേദ്കർ ഗ്രാമം പദ്ധതി പോലെയുള്ള നിർമാണ പ്രവർത്തനങ്ങൾ നടപ്പാക്കുന്നത്. മരുതൻപാറയിൽ തകർന്ന കെട്ടിടത്തിന്‍റെ പ്രവൃത്തി 2020-ൽ ആരംഭിച്ചതാണ്. അഞ്ചു വർഷമായിട്ടും പൂർത്തിയായിട്ടില്ല. കെട്ടിട നിർമാണത്തിൽ വലിയ അഴിമതി നടന്നതായി സംശയമുണ്ട്. ഗുണനിലവാരമില്ലാത്ത സാധനങ്ങളാണ് നിർമാണത്തിന് ഉപയോഗിച്ചിട്ടുള്ളതെന്ന് വ്യക്തമായിട്ടുണ്ട്. ഇക്കാര്യങ്ങളെക്കുറിച്ച് അന്വേഷണം നടത്തി കുറ്റക്കാരെ കണ്ടെത്തി നടപടി സ്വീകരിക്കണമെന്നും എംഎൽഎ ആവശ്യപ്പെട്ടു. യുഡിഎഫ് നേതാക്കളായ മുഹമ്മദലി ഹാജി, എൻ. അഷ്റഫ്, ടി.ടി. വിജയകുമാർ, കെ.എം. ഫത്താഹ്, വി.പി. സബാഹ്, കുഞ്ഞയമു ഹാജി, വാർഡ് മെംബർ ബാലൻ മരുതൻപാറ തുടങ്ങിയവർ എംഎൽഎക്കൊപ്പമുണ്ടായിരുന്നു.

കാർപോർച്ചിൽ കാട്ടാന, കൃഷിയും നിശിപ്പിച്ചു നിലന്പൂരിൽ കാട്ടാനകളുടെ പരാക്രമം നിത്യസംഭവം

നിലന്പൂർ: നിലന്പൂർ മേഖലയിൽ കാട്ടാനകളുടെ പരാക്രമം നിത്യസംഭവമാകുന്നു. നിലന്പൂർ ചാരംകുളത്ത് വീടിന്‍റെ കാർ പോർച്ചിൽ വരെ കാട്ടാനയെത്തി. ചാരംകുളത്ത് വ്യാപകമായി കൃഷിയും നശിപ്പിച്ചു. വീട്ടുമുറ്റത്തെ കാർ പോർച്ചിൽ എത്തിയ കാട്ടാനയെ വീട്ടുകാർ ബഹളം വച്ചാണ് ഓടിച്ചത്. ചാരംകുളം പുത്തൻപള്ളിൽ ഗോപാലകൃഷ്ണന്‍റെ കൃഷിയിടത്തിലെത്തിയ കാട്ടാന വൻതോതിൽ കൃഷി നശിപ്പിച്ചു. നൂറിലേറെ കപ്പയും അത്ര തന്നെ വാഴയും നശിപ്പിച്ചു. ഇന്നലെ പുലർച്ചെയാണ് സംഭവം. ശബ്ദം കേട്ട് വീട്ടുകാർ വാതിൽ തുറന്ന് നോക്കിയപ്പോൾ കാർ പോർച്ചിൽ നിൽക്കുന്ന കാട്ടാനയെയാണ് കണ്ടതെന്ന് രാധാകൃഷ്ണൻ പറയുന്നു. നിലന്പൂർ ജവഹർ നഗർ ഭാഗത്ത് നിന്ന് വെളിയംതോട് ഭാഗത്ത് കൂടി റോഡ് മുറിച്ച് കടന്നാണ് കാട്ടാനകൾ ചാരംകുളം ഭാഗത്തേക്ക് എത്തുന്നത്. വനംവകുപ്പിന്‍റെ സോളാർ വൈദ്യുതി വേലി ഇല്ലാത്ത ഭാഗത്ത് കൂടിയാണ് കാട്ടാനകൾ പ്രവേശിക്കുന്നത്. ജനസാന്ദ്രമായ ചാരംകുളം ഭാഗത്ത് വീട്ടുമുറ്റങ്ങളിലേക്ക് കാട്ടാനകൾ എത്തുന്നത് ആശങ്ക വർധിപ്പിക്കുകയാണ്.

കെഎസ്എസ്പിയു കീഴാറ്റൂർ യൂണിറ്റ് കണ്‍വൻഷൻ നടത്തി

ആക്കപ്പറന്പ്: കേരള സ്റ്റേറ്റ് സർവീസ് പെൻഷനേഴ്സ് യൂണിയൻ (കഐസ്എസ്പിയു) കീഴാറ്റൂർ യൂണിറ്റ് കണ്‍വൻഷൻ ആക്കപ്പറന്പ് പഞ്ചായത്ത് ഓഡിറ്റോറിയത്തിൽ നടത്തി. കഐസ്എസ്പിയു ജില്ലാ പ്രസിഡന്‍റ് എൽ.ജെ. ആന്‍റണി ഉദ്ഘാടനം ചെയ്തു. സംഘടനയുടെ വാർഷിക സമ്മേളന തീരുമാനങ്ങളും പ്രമേയങ്ങളും വിശദീകരിച്ചു. പെൻഷൻ വ്യവസ്ഥ അട്ടിമറിക്കുന്ന വിധം കേന്ദ്രം പാർലമെന്‍റിൽ അവതരിപ്പിച്ച ഫിനാൻസ് ഭേദഗതി നിയമം പിൻവലിക്കണമെന്നും സ്റ്റാറ്റ്യൂട്ടറി പെൻഷൻ പുനഃസ്ഥാപിക്കണമെന്നും കേന്ദ്രം കേരളത്തോട് കാട്ടുന്ന സാന്പത്തിക ഉപരോധം അവസാനിപ്പിക്കണമെന്നും ആവശ്യപ്പെട്ട് നാളെ സംസ്ഥാന വ്യാപകമായി നടത്തുന്ന ജിഎസ്ടി ജില്ലാ ഓഫീസിലേക്കുള്ള മാർച്ചും ധർണയും വിജയിപ്പിക്കണമെന്നും പ്രസിഡന്‍റ് ആഹ്വാനം ചെയ്തു. ഒന്പതിന് നടക്കുന്ന ദേശീയ പൊതുപണിമുടക്കിന് യോഗം ഐക്യദാർഢ്യം പ്രഖ്യാപിച്ചു. യൂണിറ്റ് പ്രസിഡന്‍റ് ഇ. ജനാർദനൻ അധ്യക്ഷനായിരുന്നു. കണ്‍വൻഷനിൽ നവാഗതരായ എട്ടു പേരെ ബ്ലോക്ക് വൈസ് പ്രസിഡന്‍റ് കെ. ഗോപാലകൃഷ്ണൻ പരിചയപ്പെടുത്തി. ബ്ലോക്ക് പ്രസിഡന്‍റ് കിഴാറ്റൂർ അനിയൻ, പി.ജി. നാഥ്, കെ.എം. വിജയകുമാർ, കെ. നാരായണൻ പി.കെ. മുഹമ്മദ്, സി. സുലോചന, സി.പി. രാംമോഹൻ, കെ.പി. രാജൻ, എസ്. സുദർശൻ, വി. ബാലകൃഷ്ണൻ, കെ.എൽ. പത്മാക്ഷി, വി.ആർ. ജ്യോതി, ജ്യോതിർമയി, ഉഷാദേവി, സെക്രട്ടറി നല്ലൂർ രാമചന്ദ്രൻ, ജോയിന്‍റ് സെക്രട്ടറി യു. സന്തോഷ് എന്നിവർ പ്രസംഗിച്ചു.

നിലന്പൂർ പഴയ ബസ് സ്റ്റാൻഡ് കെട്ടിടം അപകടാവസ്ഥയിൽ: മൗനം പാലിച്ച് നഗരസഭ

നിലന്പൂർ: നഗരസഭയുടെ ഉടമസ്ഥതയിലുള്ള പഴയ ബസ് സ്റ്റാൻഡ് കെട്ടിടം കാലപഴക്കം കാരണം അപകടാവസ്ഥയിൽ. തകർച്ച നേരിട്ടുകൊണ്ടിരിക്കുകയാണ് കെട്ടിടം. നിലന്പൂരിലെ ആദ്യത്തെ ബസ് സ്റ്റാന്‍റാണിത്. നിരവധി യാത്രക്കാർ നിത്യവും ബസുകൾ കാത്ത്നിൽക്കുന്ന സ്ഥലം കൂടിയാണിത്. കെട്ടിടത്തിന്‍റെ ചെറിയ കോണ്‍ക്രീറ്റ് കഷ്ണങ്ങൾ ബസ് കാത്ത്നിൽക്കുന്നവരുടെ തലയിൽ ഉൾപ്പെടെ വീഴുന്ന സംഭവങ്ങൾ ഉണ്ടായിട്ടുണ്ട്. പലതവണ ഇതേക്കുറിച്ച് നഗരസഭാ അധികൃതർക്ക് പരാതികൾ നൽകിയിട്ടും നടപടി ഉണ്ടായില്ലെന്നാണ് യാത്രക്കാരും ഓട്ടോ തൊഴിലാളികളും ബസുടമകളും പറയുന്നത്. കാലപഴക്കത്താൽ അപകട ഭീഷണി നേരിടുന്ന കെട്ടിടത്തിന്‍റെ സുരക്ഷ എൻജിനീയറിംഗ് വിഭാഗമാണ് ഉറപ്പ് വരുത്തേണ്ടത്. കെട്ടിടത്തിന്‍റെ സുരക്ഷ ഉറപ്പാക്കേണ്ടതും ആവശ്യമായ അറ്റകുറ്റപണികൾ നടത്തേണ്ടതും അധികൃതരുടെ ഉത്തരവാദിത്വമാണ്. കോട്ടയം മെഡിക്കൽ കോളജിന്‍റെ കെട്ടിടം തകർന്ന് വീണ് വീട്ടമ്മ ദാരുണമായി മരണപ്പെട്ട സാഹചര്യത്തിൽ അപകടാവസ്ഥയിലുള്ള കെട്ടിടങ്ങൾ സുരക്ഷിതമാണെന്ന് ഉറപ്പ്വരുത്തേണ്ടത് ഉത്തരവാദിത്വപ്പെട്ടവരുടെ ചുമതലയാണെന്നാണ് നാട്ടുകാർ പറയുന്നത്. പഴയ ബസ് സ്റ്റാൻഡ് കെട്ടിടത്തിന് മുന്നിൽ മഴ പെയ്താൽ ബസ് കാത്തുനിൽക്കുന്നവർ ആശങ്കയിലാകും. ഈ കെട്ടിടത്തിനുള്ളിൽ നിരവധി സ്ഥാപനങ്ങൾ പ്രവർത്തിക്കുന്നുണ്ട്. ഇതിലൂടെ ഓരോ മാസവും നഗരസഭക്ക് വലിയൊരു തുക വാടകയിനത്തിലും ലഭിക്കുന്നു. കെട്ടിടത്തിൽ നഗരസഭയുടെ മിനി ടൗണ്‍ഹാളും വയോജനങ്ങളുടെ പകൽ വീടുമെല്ലാം പ്രവർത്തിക്കുന്നു. നഗരസഭയുടെ ഭാഗത്ത് നിന്ന് ഇക്കാര്യത്തിൽ അടിയന്തര ഇടപെടൽ വേണമെന്നാണ് പ്രധാന ആവശ്യം. അതേസമയം പഴയ ബസ് സ്റ്റാൻഡ് കെട്ടിടം അറ്റകുറ്റപണി നടത്താൻ അരീക്കോട് സ്വദേശിക്ക് കരാർ നൽകുകയും ടെൻഡർ നടപടി പൂർത്തീകരിച്ചതാണെന്നും നഗരസഭ അധികൃതർ പറയുന്നു. കരാറുകാരൻ പ്രവൃത്തി വൈകിപ്പിക്കുകയാണെന്നാണ് നഗരസഭ ചൂണ്ടിക്കാട്ടുന്നത്.

കഠിനാധ്വാനവും അർപ്പണ മനോഭാവവും വിദ്യാർഥികൾ മുഖമുദ്രയാക്കണം: നജീബ് കാന്തപുരം

പെരിന്തൽമണ്ണ: കഠിനാധ്വാനവും അർപ്പണമനോഭാവവും വിദ്യാർഥികൾ മുഖമുദ്രയാക്കണമെന്ന് നജീബ് കാന്തപുരം എംഎൽഎ പറഞ്ഞു. വിവിധ പരീക്ഷകളിൽ ഉന്നത വിജയം നേടിയ നിയോജക മണ്ഡലത്തിലെ വിദ്യാർഥികൾക്ക് ശിഫ കണ്‍വൻഷൻ സെന്‍ററിൽ സംഘടിപ്പിച്ച അനുമോദന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വിജയത്തെക്കുറിച്ച് ചിന്തിക്കുന്നതോടൊപ്പം പരാജയങ്ങളെ സ്പോർട്സ്മാൻ സ്പിരിറ്റോടെ കാണാൻ വിദ്യാർഥികൾക്ക് കഴിയേണ്ടതുണ്ട്. രക്ഷിതാക്കളും സമൂഹവും കാണുന്ന സ്വപ്നങ്ങൾ യാഥാർഥ്യമാക്കാൻ മനസ് പാകപ്പെടുത്തണമെന്നും അദ്ദേഹം പറഞ്ഞു. പെരിന്തൽമണ്ണ എഇഒ കുഞ്ഞിമൊയ്തി അധ്യക്ഷത വഹിച്ചു. ട്രെയ്നർ പി.എം.എ. ഗഫൂർ മുഖ്യപ്രഭാഷണം നടത്തി. ഹൈദരലി ശിഹാബ് തങ്ങൾ ’ക്രിയ’ സിവിൽ സർവീസ് അക്കാഡമി സെക്രട്ടറി ഡോ. പി. ഉണ്ണീൻ, വെട്ടത്തൂർ ഗ്രാമപഞ്ചായത്ത് പ്രസിഡന്‍റ് സി.എം. മുസ്തഫ, എ.കെ. നാസർ, അഡ്വ. എസ്. അബ്ദുസലാം, യു.ടി. മുൻഷിർ, ഡോ. ഫഹദ്, സൈലം അക്കാഡമി ഫാക്കൽറ്റി ഫൈസൽ, പ്രഫിൻസ് സിഇഒ സമീൽ, സിസ്കോ ടെക്നോളജി ഫൗണ്ടർ ആൻഡ് എം.ഡി. മൊയ്തു കിഴിശേരി തുടങ്ങിയവർ പ്രസംഗിച്ചു.

1000 വീടുകളിലേക്ക് 1000 പുസ്തകങ്ങൾ :വായനയുടെ വാതിൽ തുറന്ന് പരിയാപുരം സെന്‍റ് മേരീസ് സ്കൂളിലെ വിദ്യാർഥികൾ

അങ്ങാടിപ്പുറം: ആയിരം വീടുകളിൽ ആയിരം പുതിയ പുസ്തകങ്ങൾ എത്തിക്കാനുള്ള പദ്ധതിയൊരുക്കി പരിയാപുരം സെന്‍റ് മേരീസ് ഹയർ സെക്കൻഡറി സ്കൂളിലെ വിദ്യാരംഗം കലാസാഹിത്യവേദി പ്രവർത്തകർ. വായനയുടെ വാതിൽ തുറന്ന് പുസ്തകങ്ങളുമായി ആഘോഷപൂർവം വീടുകളിലേക്കെത്തുകയാണ് കുട്ടികൾ. വായന മരിക്കുന്നു എന്ന മുറവിളി ഉയരുന്പോഴാണ് വായനയുടെ സന്ദേശവുമായി കുട്ടിക്കൂട്ടം എത്തുന്നത്. വൈകിട്ട് സ്കൂൾ വിട്ടശേഷം ചെറുസംഘങ്ങളായി മൂന്നാഴ്ച നീണ്ടുനിൽക്കും ഈ പുസ്തകയാത്ര. ഗൃഹവൈദ്യം മുതൽ ജീവചരിത്രം വരെയുള്ള പുസ്തകങ്ങൾ ഇവരുടെ പുസ്തകക്കൂട്ടത്തിലുണ്ട്. വീട്ടുകാർക്ക് ആവശ്യാനുസരണം തെരഞ്ഞെടുക്കാം. പെരിന്തൽമണ്ണയിലെ ശക്തി ബുക്സുമായി സഹകരിച്ചാണ് പരിപാടി. വായനസന്ദേശവുമായി എത്തിയ കൊച്ചുകൂട്ടുകാർക്ക് വീടുകളിൽ ഹൃദ്യമായ സ്വീകരണമാണ് ലഭിച്ചത്. പുസ്തക വിൽപ്പനയ്ക്കൊപ്പം വായനയുടെ പ്രാധാന്യത്തെക്കുറിച്ചും വിദ്യാർഥികൾ വീട്ടുകാരോട് വിശദീകരിക്കുന്നുണ്ട്. ആദ്യപുസ്തകം സ്വീകരിച്ച് പ്രധാനാധ്യാപകൻ പി.ടി.ബിജു ഉദ്ഘാടനം ചെയ്തു. വിദ്യാരംഗം കോ-ഓർഡിനേറ്റർ മനോജ് വീട്ടുവേലിക്കുന്നേൽ, അധ്യാപക വിദ്യാർഥി വി.അജയ്, വിദ്യാരംഗം കലാസാഹിത്യവേദി ഭാരവാഹികളായ കെ.എസ്.നിഹ ഫാത്തിമ, ജുവാന ജെയിൻ, ആൽബർട്ട് ജെറിൻ, ചിരാഗ് പി.റോബി, നന്ദിക പ്രഭാത്കുമാർ, പി.ദേവദർശൻ, ആൽബിന എലിസബത്ത് ചാക്കോ, പി.നവതേജ്, പി.മാളവിക, കെ.മിൻഹ ഫാത്തിമ, എസ്.ശ്രീകാർത്തിക, റയോണ ജോസഫ്, പി.വി.ഫാത്തിമ സന, കെ.വി.ഫാത്തിമത്ത് അഫീഫ, പി.ഷഹ്ബ, എൻ.പി.ഫാത്തിമ റിഷ്ലി, ജുവാൻ ടിജോ എന്നിവർ നേതൃത്വം നൽകി. പുസ്തകോത്സവവും ’എഴുത്തിന്‍റെ വഴിയേ’ പഠനയാത്രയും ഒട്ടേറെ വായന പ്രവർത്തനങ്ങളും സ്കൂളിൽ ഒരുക്കിയിട്ടുണ്ട്.

കടുവ കൂട്ടിൽ കുടുങ്ങി: ആശങ്കയൊഴിയാതെ മലയോരം

കരുവാരകുണ്ട്: വനം വകുപ്പ് സ്ഥാപിച്ച കൂട്ടിൽ കടുവ കുടുങ്ങിയെങ്കിലും ആശങ്കയൊഴിയാതെ മലയോരം. കരുവാരകുണ്ടിന്‍റെ മലയോര കൃഷിയിടങ്ങളിൽ കടുവകൾ ഇനിയുമുണ്ടെന്ന് കർഷകരും കർഷക തൊഴിലാളികളും ഉറപ്പിച്ച് പറയുന്നു. ഇന്നലെയാണ് സുൽത്താന എസ്റ്റേറ്റിൽ സ്ഥാപിച്ച കെണിയിൽ കടുവ കുടുങ്ങിയത്. എന്നാൽ ഈ കടുവയെ കൂടാതെ ഇനിയും കടുവകളുണ്ടെന്നാണ് പ്രദേശവാസികൾ പറയുന്നത്. സൈലന്‍റ് വാലി വനമേഖലയിൽ നിന്നാണ് അപകടകാരികളായ കാട്ടുമൃഗങ്ങൾ ജനവാസ കേന്ദ്രങ്ങളിലെത്തി ഭീതി വിതക്കുന്നതെന്ന് വർഷങ്ങൾക്കു മുന്പേ മലയോര ജനത വ്യക്തമാക്കിയിട്ടുള്ളതാണ്. ഇക്കാര്യങ്ങൾ അധികൃതരുടെ ശ്രദ്ധയിൽപ്പെടുത്തിയിട്ടും ഫലം കണ്ടിരുന്നില്ല. സൈലന്‍റ് വാലി വനമേഖലയിൽ നിന്ന് കൂന്പൻ മലയിടുക്കുവഴിയും കൽകുണ്ട് മണലിയാംപാടം വഴിയും എളുപ്പത്തിൽ കരുവാരകുണ്ടിന്‍റെ മലയോരത്ത് കടുവകൾക്ക് എത്തിപ്പെടാമെന്നും മലയോര കർഷകർ പറയുന്നു. കാളികാവിൽ ടാപ്പിംഗ് തൊഴിലാളിയായ യുവാവിനെ കടുവ പിടികൂടി കൊലപ്പെടുത്തിയതോടെയാണ് അധികൃതർ ഉണർന്ന് പ്രവർത്തിക്കാൻ തുടങ്ങിയത്. കടുവയെ പിടികൂടാൻ സ്ഥാപിച്ച കൂട്ടിൽ പുള്ളിപ്പുലി കുടുങ്ങിയിരുന്നു. പ്രദേശത്ത് പുളളിപ്പുലിയുടെ സാന്നിധ്യമുണ്ടെന്നും വളർത്തുമൃഗങ്ങളെ ഇവ ഇരയാക്കുന്നുണ്ടെന്നും വർഷങ്ങളായി മലയോര ജനത ചൂണ്ടിക്കാണിച്ച വിഷയമായിരുന്നു. എന്നാൽ വനം വകുപ്പധികൃതർ ഇത് അംഗീകരിച്ചിരുന്നില്ല. വളർത്തുനായ്ക്കളെയായിരുന്നു ഇവ ആദ്യം പിടികൂടി ഇരയാക്കിയിരുന്നത്. നായ്ക്കളെ കിട്ടാതായതോടെ ആടുകളെയും മേയാൻ വിട്ടിരുന്ന പോത്തുകളെയും പശുക്കളെയും ഇരയാക്കിയ സംഭവങ്ങളും ഭീതിയോടെയാണ് ജനങ്ങൾ കണ്ടിരുന്നത്. അധികൃതരോട് ഇക്കാര്യങ്ങൾ അറിയിച്ചാലും നടപടി ഒന്നുമില്ലായിരുന്നു. നിർധന കുടുംബങ്ങൾ ജീവിത വഴിക്കു വേണ്ടി വളർത്തിപ്പോന്നിരുന്ന ഒട്ടേറെ ആടുകളെ ഏതാനും വർഷത്തിനുള്ളിൽ പുലിയും കടുവയും ഇരയാക്കിയിരുന്നതായും കർഷകർ പറയുന്നു. സുൽത്താന എസ്റ്റേറ്റിൽ കടുവ കൂട്ടിൽ കുടുങ്ങിയതോടെ തെരച്ചിൽ അവസാനിപ്പിക്കാനുള്ള നീക്കം നടത്താതെ വീണ്ടും കടുവ സാന്നിധ്യമുള്ള പ്രദേശങ്ങളിൽ കൂടും കാമറയും സ്ഥാപിച്ചാൽ നരഭോജികളായ കാട്ടുമൃഗങ്ങളെ ഇനിയും കണ്ടെത്താനാകുമെന്നാണ് മലയോര ജനത വ്യക്തമാക്കുന്നത്.

മലപ്പുറത്ത് നിപ്പ സന്പർക്കപ്പട്ടികയിൽ 241 പേർ

മലപ്പുറം: ജില്ലയിൽ നിപ ബാധിച്ച വ്യക്തിയുടെ സന്പർക്ക പട്ടികയിലുള്ള 241 പേർ നിരീക്ഷണത്തിൽ. മലപ്പുറത്ത് 12 പേരാണ് ചികിത്സയിലുള്ളത്. അഞ്ച് പേർ ഐസിയു ചികിത്സയിലുണ്ട്. മന്ത്രി വീണാ ജോർജിന്‍റെ നേതൃത്വത്തിൽ ഉന്നതതല യോഗം ചേർന്നു. വീടുകളിലെ സന്ദർശനവും പനി സർവൈലൻസും നടത്തിവരുന്നു. ഐസൊലേഷനിലുള്ളവരെ ഫോണിൽ വിളിച്ച് മാനസിക പിന്തുണ ഉറപ്പാക്കുന്നുണ്ട്. ചികിത്സയ്ക്കായി എത്തുന്ന രോഗികൾ കൂടിയാൽ അത് മുന്നിൽകണ്ട് കൂടുതൽ ഐസിയു, ഐസൊലേഷൻ സൗകര്യങ്ങൾ ജില്ലയിൽ ഉറപ്പാക്കിയിട്ടുണ്ട്. ആരോഗ്യ വകുപ്പ് അഡീഷണൽ ചീഫ് സെക്രട്ടറി, എൻഎച്ച്എം സ്റ്റേറ്റ് മിഷൻ ഡയറക്ടർ, ആരോഗ്യ വകുപ്പ് ഡയറക്ടർ, മെഡിക്കൽ വിദ്യാഭ്യാസ വകുപ്പ് ഡയറക്ടർ, അഡീഷണൽ ഡയറക്ടർമാർ, ജില്ലാ കളക്ടർമാർ, ജില്ലാ മെഡിക്കൽ ഓഫീസർമാർ, വിവിധ വകുപ്പ് ഉദ്യോഗസ്ഥർ എന്നിവർ യോഗത്തിൽ പങ്കെടുത്തു.

നാല് വർഷം മുന്പ് കിണറ്റിലകപ്പെട്ട കോഴിക്ക് രക്ഷകരായി സന്നദ്ധ പ്രവർത്തകർ

എടക്കര: നാല് വർഷം മുന്പ് കിണറ്റിലകപ്പെട്ട കോഴിക്ക് രക്ഷകരായി സന്നദ്ധ പ്രവർത്തകർ. നാരോക്കാവ് ഒന്നാംപടി അങ്കണവാടിക്കുന്നിലെ കക്കുളങ്ങര പ്രദീപിന്‍റെ വീട്ടിലെ ഉപയോഗ ശൂന്യമായ കിണറ്റിൽ നാല് വർഷം മുന്പ് അകപ്പെട്ട പിടക്കോഴിയെയാണ് സന്നദ്ധ പ്രവർത്തകർ ചേർന്ന് രക്ഷിച്ചത്. കിണറ്റിലകപ്പെട്ട കോഴിക്ക് വീട്ടുകാർ കഴിഞ്ഞ നാല് വർഷമായി ഭക്ഷണം നൽകിവന്നിരുന്നു. വിരമറിഞ്ഞ് ഐഎൻടിയുസി യംഗ് വർക്കേഴ്സ് കൗണ്‍സിലിംഗ് മലപ്പുറം ജില്ലാ സെക്രട്ടറി മുജീബ് നാരോക്കാവ്, സന്നദ്ധ പ്രവർത്തകരായ ഹംസ, ബിനു തോമസ്, റോയ് പാലേമാട് എന്നിവർ സ്ഥലത്തെത്തുകയും ഹംസ കിണറ്റിലിറങ്ങി കോഴിയെ കരയ്ക്ക് കയറ്റുകയുമായിരുന്നു.

ബൈക്കും കാറും കൂട്ടിയിടിച്ച് യുവാവ് മരിച്ചു

നിലന്പൂർ: ബൈക്കും കാറും കൂട്ടിയിടിച്ച് യുവാവ് മരിച്ചു. അകന്പാടം എസ്‌സി നഗറിലെ കറത്തോടൻ രാധാകൃഷ്ണന്‍റെ മകൻ യദുകൃഷ്ണൻ (25) ആണ് മരിച്ചത്. ഇന്നലെ ഉച്ചക്ക്് 12.15 ഓടെ മണ്ണുപ്പാടം- മഹാഗണി വളവിലാണ് അപകടം. ഉടൻ നിലന്പൂർ ജില്ലാ ആശുപത്രിയിലും തുടർന്ന് മഞ്ചേരി മെഡിക്കൽ കോളജാശുപത്രിയിലും എത്തിച്ചെങ്കിലും രക്ഷിക്കാനായില്ല. മഹാഗണി വളവ് മുന്പും അപകട മരണങ്ങൾ ഉണ്ടായ സ്ഥലമാണ്. മുന്നറിയിപ്പ് ബോർഡ് പോലും പൊതുമരാമത്ത് വകുപ്പ് ഇവിടെ സ്ഥാപിച്ചിട്ടില്ല. സംസ്കാരം ഇന്ന് ഉച്ചക്ക് രണ്ടിന് കളക്കുന്ന് പൊതുശ്മശാനത്തിൽ. മാതാവ്. രഞ്ജിനി. സഹോദരങ്ങൾ: മീരാകൃഷ്ണൻ. ഹീരാ കൃഷ്ണൻ.

രക്ഷിതാക്കൾക്ക് തലവേദനയായി കുട്ടി ഡ്രൈവർമാർ

പരിശോധന കർശനമാക്കി പോലീസ് മഞ്ചേരി: കൗമാരക്കാർ മോട്ടോർ സൈക്കിളിൽ കറങ്ങി രക്ഷിതാക്കൾക്ക് ധനനഷ്ടവും മാനനഷ്ടവും ഉണ്ടാക്കുന്നത് പതിവാകുന്നു. ലൈസൻസില്ലാതെ വാഹനമോടിക്കുന്നത് ഗുരുതര കുറ്റമായാണ് കണക്കാക്കുന്നത്. എന്നാൽ പതിനെട്ട് വയസ് തികയാതെ വാഹനമോടിച്ചാൽ കുറ്റം ഗുരുതരമാകും. വാഹനത്തിന്‍റെ ഉടമക്കും രക്ഷിതാവിനും നിയമത്തിന്‍റെ നൂലാമാലകളിൽ കറങ്ങാനും പിഴയടക്കാനും മാത്രമേ നേരം കാണൂ. ഇത്തരത്തിൽ വാഹനമോടിക്കുന്നതിനെതിരേ സംസ്ഥാന സർക്കാർ ജിഒ (പി) നന്പർ 37/2019 പ്രകാരം പ്രത്യേക ഉത്തരവ് തന്നെ ഇറക്കിയിട്ടുണ്ട്. പ്രായപൂർത്തിയാകാത്തവർക്ക് വാഹനം ഓടിക്കാൻ നൽകിയാൽ 1988ലെ മോട്ടോർ വാഹന നിയമം 199 എ പ്രകാരം മൂന്ന് വർഷം വരെ തടവും 25000 രൂപ വരെ പിഴയും ശിക്ഷ ലഭിച്ചേക്കാം. ജില്ലാ പോലീസ് മേധാവിയുടെ പ്രത്യേക നിർദേശ പ്രകാരം സ്പെഷൽ ഡ്രൈവിലൂടെ (ഓപറേഷൻ ലാസ്റ്റ് ബെൽ) പരിശോധന കർശനമാക്കിയിരിക്കയാണ് പോലീസ്. ജില്ലയിലെ വിവിധ പോലീസ് സ്റ്റേഷൻ പരിധിയിൽ വിദ്യാഭ്യാസ സ്ഥാപനങ്ങൾ കേന്ദ്രീകരിച്ച് കഴിഞ്ഞ ദിവസങ്ങളിലായി നടന്ന പരിശോധനയിൽ നിരവധി കുട്ടി ഡ്രൈവർമാർ പിടിയിലായി. ഹെൽമെറ്റില്ലാതെയും മൂന്ന് പേർ യാത്ര ചെയ്തതും അമിത വേഗതയിൽ ബൈക്കോടിച്ചതിനുമാണ് പിടിയിലായത്. വാഹനത്തിനന്‍റെ ആർസി ഉടമയെ വിളിച്ചു വരുത്തി പിഴ ഈടാക്കിയും കുട്ടികളെ താക്കീത് നൽകിയും വിട്ടയക്കുകയായിരുന്നു. വരും ദിവസങ്ങളിൽ പരിശോധന കർശനമാക്കുമെന്നും കുറ്റക്കാർക്കെതിരേ ശക്തമായ നടപടി സ്വീകരിക്കുമെന്നും പോലീസ് പറഞ്ഞു.

രക്ഷാകർതൃ സംഗമവും ബോധവത്കരണവും നടത്തി

അങ്ങാടിപ്പുറം: പുത്തനങ്ങാടി സെന്‍റ് തെരേസാസ് സ്കൂളിൽ രക്ഷാകർതൃ സംഗമവും ബോധവത്കരണ സെമിനാറും സംഘടിപ്പിച്ചു. പരിയാപുരം സെന്‍റ് മേരീസ് ഹയർ സെക്കൻഡറി സ്കൂൾ അധ്യാപകൻ മനോജ് വീട്ടുവേലിക്കുന്നേൽ ക്ലാസ് നയിച്ചു. പ്രിൻസിപ്പൽ ലിസ ജോണ്‍, വൈസ് പ്രിൻസിപ്പൽ സിസ്റ്റർ സാൽവിൻ, മെറിൻ എന്നിവർ പ്രസംഗിച്ചു. പുതിയ പിടിഎ ഭാരവാഹികളായി ലിജോ ജോസഫ് (പ്രസിഡന്‍റ്), വി.വിനോദ്, സെബിൻ ഇമ്മാനുവേൽ, മിഥുൻ കുമാർ, ജോർജ് ജോസഫ്, ടോഷ് തോമസ്, ഷെറിൻ ജോർജ്, സതീഷ് തെക്കിൻകോട്ടിൽ, കെ.ആരവ്, ഷെമിൻ ജോർജ് (എക്സിക്യൂട്ടീവ് അംഗങ്ങൾ) എന്നിവരെ തെരഞ്ഞെടുത്തു.

വേട്ടക്കോട് ജിയുപി സ്കൂൾ വിദ്യാർഥികൾ ഫയർ സ്റ്റേഷൻ സന്ദർശിച്ചു

മഞ്ചേരി: പഠന പ്രവർത്തനങ്ങളുടെ ഭാഗമായി വേട്ടക്കോട് ജിയുപി സ്കൂൾ വിദ്യാർഥികൾ മഞ്ചേരി ഫയർ സ്റ്റേഷൻ സന്ദർശിച്ചു. അപകടം സംഭവിച്ചാൽ പ്രതിരോധിക്കേണ്ടതിനെ കുറിച്ചും മുൻകരുതലുകളെ കുറിച്ചും കുട്ടികൾക്ക് ബോധവത്കരണം നൽകി. ഫയർ ഓഫീസർമാരായ ഷാജി, ജാബിർ എന്നിവർ ബോധവത്കരണ ക്ലാസിന് നേതൃത്വം നൽകി. അധ്യാപകരായ ഇർഷാദ്, വാരിസ്, സരിത രവീന്ദ്രനാഥ് എന്നിവർ സംബന്ധിച്ചു.

കുന്നക്കാവ് സ്കൂളിൽ വിജയോത്സവം സംഘടിപ്പിച്ചു

ഏലംകുളം: കുന്നക്കാവ് ജിഎച്ച്എസ്എസിൽ നവീകരിച്ച പാചകപ്പുരയുടെ സമർപ്പണവും വിജയോത്സവവും സംഘടിപ്പിച്ചു. ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ പരിപാടി ഉദ്ഘാടനം ചെയ്തു. ജില്ലാ പഞ്ചായത്ത് ഏലംകുളം ഡിവിഷൻ അംഗം കെ.ടി. അഷ്റഫ് അധ്യക്ഷത വഹിച്ചു. ഏലംകുളം പഞ്ചായത്ത് പ്രസിഡന്‍റ് സുധീർബാബു മുഖ്യാതിഥിയായിരുന്നു. എസ്എസ്കെ അനുവദിച്ച ക്രിയേറ്റീവ് കോർണർ പ്രസിഡന്‍റ് സുധീർ ബാബുവും പുതിയ ഹയർ സെക്കൻഡറി ഓഫീസ് ഉദ്ഘാടനം കെ.ടി. അഷ്റഫും നിർവഹിച്ചു. ഹെഡ്മിസ്ട്രസ് കെ.കെ. ജയ റിപ്പോർട്ട് അവതരിപ്പിച്ചു. ബ്ലോക്ക് പഞ്ചായത്ത് അംഗം നാലകത്ത് ഷൗക്കത്ത്, പഞ്ചായത്ത് അംഗങ്ങളായ എം.ആർ. മനോജ്, സൽമ കുന്നക്കാവ്, രമ്യ മാണിതൊടി, സ്വപ്ന, സാവിത്രി, പിടിഎ പ്രസിഡന്‍റ് എം.ടി. ഇബ്രാഹിം, പിടിഎ വൈസ് പ്രസിഡന്‍റ് മധു, എംപിടിഎ പ്രസിഡന്‍റ് സമീറ മുസ്തഫ, പ്രിൻസിപ്പൽ കെ. ശ്രീജിത്, സ്റ്റാഫ് സെക്രട്ടറി ഡോ. പി. അബ്ദുൾഗഫൂർ തുടങ്ങിയവർ പ്രസംഗിച്ചു. ചടങ്ങിൽ വിവിധ തലങ്ങളിലെ ഉന്നതവിജയികളെ അനുമോദിച്ചു.

അങ്ങാടിപ്പുറത്ത് വാഹനഗതാഗതം ഭാഗികമായി പുനഃസ്ഥാപിച്ചു

പെരിന്തൽമണ്ണ: അങ്ങാടിപ്പുറം റെയിൽവേ ഓവർ ബ്രിഡ്ജിലൂടെയുള്ള വാഹനഗതാഗതം ഭാഗികമായി പുനഃസ്ഥാപിച്ചു. ഇന്ന് രാവിലെ മുതൽ ഇരുചക്ര വാഹനങ്ങൾ, നാലുചക്ര വാഹനങ്ങൾ എന്നിവ അങ്ങാടിപ്പുറം ഓവർ ബ്രിഡ്ജിലൂടെ കടത്തിവിടും. പാലക്കാട്-മണ്ണാർക്കാട് ഭാഗത്ത് നിന്ന് വരുന്ന ഹെവി വാഹനങ്ങൾ പൊന്ന്യാകുർശി ഷിഫ കണ്‍വൻഷൻ സെന്‍റർ ജംഗ്ഷനിൽ നിന്ന് തിരിഞ്ഞ് ചില്ലീസ് ജംഗ്ഷൻ മാനത്തുമംഗലം-പട്ടിക്കാട് -മുള്ള്യാകുർശി- ഓരാടംപാലം വഴി ഹൈവേയിൽ പ്രവേശിക്കണം. പട്ടാന്പി റോഡിൽ നിന്നും തൂത റോഡിൽ നിന്നും വരുന്ന ഹെവി വാഹനങ്ങൾ ചീരട്ടമല പരിയാപുരം വഴി ഹൈവേയിൽ പ്രവേശിക്കണം. കോഴിക്കോട്, മലപ്പുറം ഭാഗത്ത് നിന്ന് വരുന്ന ഹെവി വാഹനങ്ങൾ ഓരാടംപാലത്ത് നിന്നും മുള്ള്യാകുർശി-പട്ടിക്കാട്-ചില്ലീസ് ജംഗ്ഷൻ-മാനത്തുമംഗലം-ഷിഫാ കണ്‍വൻഷൻ സെന്‍റർ ജംഗ്ഷൻ വഴി ഹൈവേയിൽ പ്രവേശിക്കണം. പരിയാപുരം റോഡിൽ നിന്നും പെരിന്തൽമണ്ണ ഭാഗത്ത് നിന്നും ഹൈവേയിലേക്ക് പ്രവേശിക്കുന്ന എല്ലാ വാഹനങ്ങളും ഇടതുവശം തിരിഞ്ഞ് വളാഞ്ചേരി റോഡിൽ പ്രവേശിച്ച് യൂടേണ്‍ എടുത്ത് പെരിന്തൽമണ്ണ ഭാഗത്തേക്ക് പോകണമെന്നും ജില്ലാ കളക്ടർ അറിയിച്ചു. ബസുകൾക്ക് അനുമതി നൽകുന്ന കാര്യം ഉടനെ തീരുമാനിക്കും. കൂടാതെ തിരുമാന്ധാംകുന്ന് ക്ഷേത്രത്തിന് മുന്നിലുള്ള ബസ് സ്റ്റോപ്പ് പെരിന്തൽമണ്ണ ഭാഗത്തേക്ക് 100 മീറ്റർ മാറ്റി സ്ഥാപിക്കും. ട്രാഫിക് തുറന്നുകൊടുക്കുന്ന അവസരത്തിൽ ഭാരം കൂടിയ ചരക്ക് വാഹനങ്ങൾക്ക് അങ്ങാടിപ്പുറം പാലത്തിലൂടെ രാവിലെ 8.30 മുതൽ 10.30 വരെയും വൈകുന്നേരം മൂന്ന് മുതൽ അഞ്ചുവരെയും പ്രവേശനം നിരോധിച്ചെന്നും കളക്ടർ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]