ADVERTISEMENT

ADVERTISEMENT

വിജയോത്സവം സംഘടിപ്പിച്ചു

വിഴിഞ്ഞം : വിഴിഞ്ഞം സെന്‍റ് മേരിസ് എച്ച്എസ്എസ് സംഘടിപ്പിച്ച വിജയോത്സവം വിസിൽ എംഡി ഡോ.ദിവ്യ എസ്.അയ്യർ ഉദ്ഘാടനം ചെയ്തു.

അഡ്വ.എം. വിൻസന്‍റ് എംഎൽഎ, സ്കൂൾ മാനേജർ റവ. ഡോ.ടി.നിക്കോളാസ്, നഗരസഭ കൗൺസിലർ പനിയടിമ, സ്കൂൾ പ്രിൻസിപ്പൽ സിറിൽ പെരേര, ഹെഡ്മിസ്ട്രസ് ടി.സുനി, മുൻ എച്ച്എം പോൾ വി. ബി.ചന്ദ് , പിടിഎ വൈസ് പ്രസിഡന്‍റ് ലിസി,എന്നിവർ പ്രസംഗിച്ചു.

പരിക്ഷകളിൽ മികച്ച വിജയം നേടിയ വിദ്യാർഥികളെ ഡോ.ദിവ്യ എസ്.അയ്യർ മൊമെന്‍റോ, ക്യാഷ് അവാർഡ് എന്നിവ നൽകി അനുമോദിച്ചു.

ADVERTISEMENT

റിട്ട. സയന്‍റിസ്റ്റ് മരിച്ച നിലയില്‍

പേരൂര്‍ക്കട: ഐഎസ്ആര്‍ഒ റിട്ട.സയന്‍റിസ്റ്റിനെ റെയില്‍പ്പാളത്തില്‍ മരിച്ചനിലയില്‍ കണ്ടെത്തി. പൂജപ്പുര ചിത്രാ നഗര്‍ ചില്‍ഡ്രന്‍സ് പാര്‍ക്കിനു സമീപം സിഎന്‍ആര്‍എ 57 (2)ല്‍ ചന്ദ്രമോഹന്‍ (69) ആണ് മരിച്ചത്. ജൂണ്‍ 19 മുതല്‍ ഇദ്ദേഹത്തെ കാണാനില്ലെന്നു കാട്ടി വീട്ടുകാര്‍ പൂജപ്പുര പോലീസില്‍ പരാതി നല്‍കിയിരുന്നു. സ്വന്തമായി കാര്‍ ഓടിച്ചാണ് ഇദ്ദേഹം വീട്ടില്‍നിന്നു പോയത്. അന്വേഷണം നടന്നുവരുന്നതിനിടെ നാഗര്‍കോവിലിൽ റെയില്‍വേ ട്രാക്കില്‍ മരിച്ചനിലയില്‍ കണ്ടെത്തുകയായിരുന്നു. ഞായറാഴ്ച രാത്രിയാണ് ഇതുസംബന്ധിച്ച വിവരം പോലീസിന് ലഭിക്കുന്നത്. ആത്മഹത്യയെന്നാണു പ്രാഥമിക നിഗമനമെന്നു പൂജപ്പുര സിഐ അറിയിച്ചു. ഇദ്ദേഹവുമായി ബന്ധപ്പെട്ട് ഒരു പീഡനപരാതി പൂജപ്പുര സ്റ്റേഷനില്‍ ഉണ്ടായിരുന്നു. നിരപരാധിയായ തന്നെ മാനസികമായി പീഡിപ്പിക്കുന്നതായി ഇദ്ദേഹം സുഹൃത്തുക്കളോട് പറഞ്ഞിരുന്നുവെന്നും വിവരമുണ്ട്. മൃതദേഹം പോസ്റ്റുമോര്‍ട്ടത്തിനുശേഷം ബന്ധുക്കള്‍ക്കു വിട്ടുനല്‍കി. പരേതയായ അംബികയാണ് ഭാര്യ. മക്കള്‍‌: രേഷ്മ മോഹന്‍‌, ചിപ്പി.

വടകര ബേബി അനുസ്മരണവും പഠനോപകരണ വിതരണവും

വെള്ളറട: കോണ്‍ഗ്രസ് അണമുഖം വാര്‍ഡ് കമ്മിറ്റിയുടെ ആഭിമുഖ്യത്തില്‍ അനുസ്മരണം വടകര ബേബി അനുസ്മരണവും പഠനോപകരണ വിതരണവും സംഘടിപ്പിച്ചു. കെപിസിസി സെക്രട്ടറി ഡോ: ആര്‍. വത്സലന്‍ ഉദ്ഘാടനം ചെയ്തു. വാര്‍ഡ് പ്രസിഡന്‍റ് വടകര രാജീവ് അധ്യക്ഷത വഹിച്ചു. കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്. അനില്‍ മുഖ്യ പ്രഭാഷണം നടത്തി. ബ്ലോക്ക് പ്രസിഡന്‍റ് അഡ്വ: എസ് ജോണ്‍, ആങ്കോട് സര്‍വീസ് സഹകരണ ബാങ്ക് പ്രസിഡന്‍റ് അമ്പലത്തറയില്‍ ഗോപകുമാര്‍, മണ്ഡലം പ്രസിഡന്‍റ് ബിനില്‍ മണലുവിള, ബ്ലോക്ക് വൈസ് പ്രസിഡന്‍റുമാരായ വടകര ജയന്‍, അണമുഖം വിജയകുമാര്‍ തുടങ്ങിയവർ പ്രസംഗിച്ചു. അണമുഖം വാര്‍ഡില്‍ എസ്എസ്എല്‍സി, പ്ലസ്ടു, ഡിഗ്രി പരീക്ഷകളിൽ ഉന്നത വിജയം നേടിയ വിദ്യാർഥികളെ ചടങ്ങിൽ ആദരിച്ചു. വാര്‍ഡിലെ കുട്ടികള്‍ക്ക് പഠനോപകരണ വിതരണവും സംഘടിപ്പിച്ചു.

തിരുവല്ലം ജനത സമാജം ഗ്രന്ഥശാല ഉദ്ഘാടനം ചെയ്തു

തിരുവല്ലം: തിരുവല്ലം ജനത സമാജം ഗ്രന്ഥശാലയുടെ ഉദ്ഘാടനം മന്ത്രി വി. ശിവൻകുട്ടി നിർവഹിച്ചു. താലൂക്ക് ലൈബ്രറി കൗൺസിൽ ജനറൽ കൺവീനർ കെ.ജി. സനൽകുമാർ അധ്യക്ഷത വഹിച്ചു. ലൈബ്രറിയുടെ ഉദ്ഘാടനം തിരുവനന്തപുരം താലൂക്ക് ലൈബ്രറി കൗൺസിൽ പ്രസിഡന്‍റ് ബി.പി. മുരളി നിർവഹിച്ചു. തിരുവനന്തപുരം ലൈബ്രറി കൗൺസിൽ സെക്രട്ടറി സി. അനിൽ കുമാർ, തിരുവല്ലം വാർഡ് കൗൺസിലർ വി. സത്യവതി, തിരുവനന്തപുരം താലുക്ക് ലൈബ്രറി കൗൺസിൽ അംഗം കെ. ഗോപാലകൃഷ്ണൻ നായർ, സിപിഎം കോവളം ഏരിയ സെക്രട്ടറി എസ്. അജിത്, സനൽ ഡാലുമുഖം, സനൽ കുമാർ, എസ്.എസ്.കെ സ്റ്റേറ്റ് പ്രോഗ്രാം ഓഫീസർ സുധീഷ്കുമാർ, തിരുവനന്തപുരം താലൂക്ക് ലൈബ്രറി കൗൺസിൽ അംഗം സി.ആർ. ശശിധരൻ എന്നിവർ ആശംസകൾ അർപ്പിച്ചു സംസാരിച്ചു. പുഞ്ചക്കരി വാർഡ് കൗൺസിലറും സ്വാഗതം സംഘം ചെയർമാനുമായ ഡി. ശിവൻകുട്ടി സ്വാഗതവും ജനത സമാജം ഗ്രന്ഥശാല ജോയിന്‍റ് സെക്രട്ടറി പി. ജെ. കൃഷ്ണകുമാർ നന്ദിയും പറഞ്ഞു.

കല്ലിയൂർ പഞ്ചായത്ത് ലഹരി വിരുദ്ധ കാന്പയിൻ

നേമം: കല്ലിയൂർ പഞ്ചായത്തും കാർഷിക കോളജ് എൻഎസ്എസ് യൂണിറ്റും സംയുക്തമായി ലഹരി വിരുദ്ധ കാമ്പയിൻ സംഘടിപ്പിച്ചു. കല്ലിയൂർ പഞ്ചായത്ത് വൈസ് പ്രസിഡന്‍റ് എൽ. ശാന്തിമതി അധ്യക്ഷത വഹിച്ച യോഗത്തിൽ പ്രസിഡന്‍റ് എം സോമശേഖരൻ നായർ കാന്പയിൻ ഉദ്ഘാടനം ചെയ്തു. ദക്ഷിണ മേഖല ജോയിന്‍റ് എക്സൈസ് കമ്മീഷണർ ബി. രാധാകൃഷ്ണൻ ലഹരി വിരുദ്ധ ബോധവത്കരണ ക്ലാസ് നയിച്ചു. എൻഎസ്എസ് പ്രോഗ്രാം ഓഫീസർ ഡോ. കെ.ജി. സംഗീത ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. തിരുവനന്തപുരം ജില്ലാ പഞ്ചായത്തംഗം ഭഗത് റൂഫസ്, കല്ലിയൂർ പഞ്ചായത്ത് അംഗങ്ങളായ അംഗങ്ങളായ പ്രീതാറാണി, വി. സുധർമ്മ, കല്ലിയൂർ കുടുംബ ആരോഗ്യ കേന്ദ്രത്തിലെ ഡോ. സുനിത, ഹെൽത്ത് ഇൻസ്പെക്ടർ നജീന, ജൂണിയർ ഹെൽത്ത് ഇൻസ്പെക്ടർ വിനോദ്, ഗവ. മോഡൽ സ്പോർട്സ് സ്കൂൾ പ്രിൻസിപ്പൽ ആർ. ദീപ എന്നിവർ സംസാരിച്ചു. അയ്യങ്കാളി സ്മാരക സ്പോർട്സ് സ്കൂളിലെ വിദ്യാർഥികൾ, കാർഷിക കോളേജീലെ എൻഎസ്എസ് വോളണ്ടിയേർമാർ, വിദ്യാർഥികൾ, അധ്യാപകർ ജീവനക്കാർ എന്നിവരുൾപ്പെടെ നൂറോളം പേർ ചടങ്ങിൽ പങ്കെടുത്തു.

വീട് മാറിക്കയറി 10 അംഗ സംഘത്തിന്‍റെ ഗുണ്ടാക്രമണം: പോലീസ് കേസെടുത്തു

വെള്ളറട : വീട് മാറിക്കയറി ഗുണ്ടാക്രമണം നടത്തി വീടിന്‍റെ ജനലും, കതകും ചവിട്ടി തകര്‍ത്തു 10 അംഗ സംഘത്തിനെതിരെ പോലീസ് കേസെടുത്തു. എള്ളുവിളയില്‍ പ്രവീണിന്‍റെ വീടാണെന്നു കരുതി എള്ളുവിള പ്ലാങ്കാല പുത്തന്‍വീട്ടില്‍ സലിന്‍ കുമാറി(54)ന്‍റെ വീട്ടിലാണു കഴിഞ്ഞ ദിവസം രാത്രി ഒന്പതരയോടെ പത്തംഗ സംഘത്തിന്‍റെ ആക്രണം. ആക്രമണത്തില്‍ വീടിന്‍റെ ജനല്‍, കതക് തുടങ്ങി 25,000 രൂപയിലധികം നഷ്ടം സംഭവിച്ചിട്ടുണ്ട്. വെള്ളറട സര്‍ക്കിള്‍ ഇന്‍സ്‌പെക്ടര്‍ പ്രസാദിന്‍റെ നേതൃത്വത്തിലുള്ള പോലീസ് സംഘം സംഭവസ്ഥലം സന്ദര്‍ശിച്ചു കേസെടുത്തു. ഗുണ്ടകളായ 10 അംഗ സംഘത്തെക്കുറിച്ച് ഊര്‍ജ്ജിത അന്വേഷണം നടത്തി വരികയാണെന്നും എത്രയും വേഗം പ്രതികള്‍ വലയിലാകുമെന്നും സര്‍ക്കിള്‍ ഇന്‍സ്‌പെക്ടര്‍ പ്രസാദ് പറഞ്ഞു.

ഗതാഗത ക്രമീകരണങ്ങള്‍ ഏര്‍പ്പെടുത്തി

പൂന്തുറ: മേല്‍പ്പാല നിര്‍മാണവുമായി ബന്ധപ്പെട്ട് ഈഞ്ചക്കല്‍-കല്ലുംമൂട് റോഡില്‍ ഗതാഗത നിയന്ത്രണം ഏര്‍പ്പെടുത്തി. ജൂൺ 30 രാത്രി പ ത്തു മുതല്‍ ജൂലൈ ഒന്നാം തീയതി രാവിലെ 6.00 മണി വരെ മേല്‍പ്പാല നിര്‍മാണവുമായി ബന്ധപ്പട്ട പണി നടക്കുന്നതിനാലാണ് നഗരത്തില്‍ പ്രവേശിക്കുന്നതിന് വാഹനങ്ങള്‍ക്ക് ഗതാഗത നിയന്ത്രണം ഏര്‍പ്പെടുത്തിയത്. കിഴക്കേകോട്ട, കഴക്കൂട്ടം ഭാഗത്തേയ്ക്ക് പോകേണ്ട കോവളം ഭാഗത്തുനിന്നും വരുന്ന വലിയ വാഹനങ്ങള്‍ തിരുവല്ലം-അമ്പലത്തറ-കമലേശ്വരം-മണക്കാട് വഴി പോകേണ്ടതാണ്. എയര്‍പോര്‍ട്ടിലേയ്ക്കു വരുന്ന ചെറിയ വാഹനങ്ങള്‍ കുമരിച്ചന്ത-പരുത്തിക്കുഴി ജംഗ്ഷനില്‍ നിന്നും സര്‍വീസ് റോഡ് വഴി കല്ലുംമൂട് ജംഗ്ഷനില്‍നിന്നും തിരിഞ്ഞു വലിയതുറ ഭാഗത്തേയ്ക്ക് പോകേണ്ടതാണ്. അട്ടക്കുളങ്ങര ഭാഗത്തുനിന്നും ചാക്ക ഭാഗത്തേയ്ക്കു പോകുന്ന കാര്‍ ഉള്‍പ്പെടെയുളള ചെറിയ വാഹനങ്ങള്‍ പരമാവധി ഈഞ്ചക്കല്‍ ജങ്ഷന്‍ ഒഴിവാക്കി വാഴപ്പളളി-ശ്രീകണ്‌ഠേശ്വരം-ഉപ്പിടാമൂട്-നാലുമുക്ക്-പേട്ട വഴിയും അട്ടക്കുളങ്ങര ഭാഗത്തുനിന്നും മുട്ടത്തറ ഭാഗത്തേയ്ക്കു പോകുന്ന ചെറിയ വാഹനങ്ങള്‍ മണക്കാട് -കല്ലുംമൂട് വഴിയോ മണക്കാട് -കമലേശ്വരം വഴിയോ പോകേണ്ടതാണ്. തിരുവനന്തപുരം സിറ്റി പോലീസിന്‍റെ മേല്‍പ്പറഞ്ഞ ഗതാഗത ക്രമീകരണങ്ങളോട് പൊതുജനങ്ങള്‍ സഹകരിക്കേണ്ടതാണ്. ഗതാഗത ക്രമീകരണങ്ങളുടെ വിവരങ്ങള്‍ അറിയിന്നതിലേയ്ക്കു 0471-2558731, 9497990005 എന്നീ നമ്പരുകളില്‍ ബന്ധപ്പെടാവുന്നതാണ്.

ഗതാഗത കരുക്കൊഴിയാതെ കരമന-കളിയിക്കാവിള ദേശീയപാത

നെയ്യാറ്റിന്‍കര: അവധി ദിവസങ്ങളിലും കരമന- കളിയിക്കാവിള പാതയിലെ ബാലരാമപുരം, ആലുംമൂട് മുതലായ ജംഗ്ഷനുകളിലെ ഗതാഗതക്കുരുക്കിന് ശമനമില്ലെന്നു യാത്രക്കാര്‍. വിദ്യാലയങ്ങളില്‍ പുതിയ അധ്യയന വര്‍ഷത്തിനു തുടക്കമായതോടെ രാവിലെയും വൈകുന്നേരവും ബാലരാമപുരം മുതല്‍ നെയ്യാറ്റിന്‍കര വരെ മിക്ക ജംഗ്ഷനുകളിലും ഗതാഗത കുരുക്കുണ്ട്. എങ്കിലും ഏറ്റവും കൂടുതല്‍ ബുദ്ധിമുട്ട് അനുഭവിക്കുന്ന ജംഗ്ഷനുകളുടെ പട്ടികയില്‍ ബാലരാമപുരം, ആലുംമൂട് ജംഗ്ഷന്‍ എന്നിവയുള്‍പ്പെടുന്നു. പലപ്പോഴും വഴിമുക്ക് മുതല്‍ ബാലരാമപുരം വരെ വാഹനങ്ങള്‍ ഇഴഞ്ഞിഴഞ്ഞാണ് നീങ്ങാറുള്ളത്. ദേശീയപാതാ വികസനം ബാലരാമപുരം കൊടിനട വരെ സാധ്യമായിട്ടുള്ളൂ. ബാലരാമപുരം ജംഗ്ഷനിലൂടെ നെയ്യാറ്റിന്‍കര ഭാഗത്തേയ്ക്ക് പോകുന്ന വാഹനങ്ങളുടെ നീണ്ട നിര ആരംഭിക്കുന്നതും കൊടിനടയിലാണ്. വിശാലമായ പാതയില്‍ നിന്നും ജംഗ്ഷനപ്പുറത്തെ വീതി കുറഞ്ഞ ഇടത്തേയ്ക്ക് വാഹനങ്ങള്‍ പ്രവേശിക്കുന്പോഴുണ്ടാകുന്ന ഗതാഗതക്കുരുക്കാണതെന്നു യാത്രക്കാര്‍ ചൂണ്ടിക്കാട്ടി. വികസനവുമായി ബന്ധപ്പെട്ട് പാതയോരത്തെ കെട്ടിടങ്ങള്‍ പൊളിക്കലും പൊളിച്ച കെട്ടിടാവശിഷ്ടങ്ങള്‍ നീക്കം ചെയ്യലും പുരോഗമിക്കുന്നുണ്ട്. അതേസമയം, വേഗത്തില്‍ ഈ പ്രവൃത്തികള്‍ പൂര്‍ത്തിയാക്കണമെന്ന് യാത്രക്കാര്‍ ആവശ്യപ്പെട്ടു. കൊടിനട മുതല്‍ വഴിമുക്ക് വരെയാണ് അടുത്ത ഘട്ട വികസനം. നിലവിലുള്ള സംസ്ഥാന സര്‍ക്കാരിന്‍റെ ഭരണകാലാവധിക്കു മുന്പ് പാത വികസനം സാക്ഷാത്കരിക്കണമെന്നതാണ് യാത്രക്കാരുടെ ആവശ്യം. ഞായറാഴ്ച ഉള്‍പ്പെടെയുള്ള അവധി ദിവസങ്ങളില്‍ പോലും ബാലരാമപുരത്തും ആലുംമൂട് ജംഗ്ഷനിലുമൊക്കെ തുടരുന്ന ഗതാഗതക്കുരുക്ക് വലിയ യാത്രാക്ലേശം തീര്‍ക്കുന്നുവെന്ന് പലരും പറഞ്ഞു.

മെഡിക്കല്‍ കോളജില്‍ ബഹുനില കാര്‍ പാര്‍ക്കിംഗ് ഒരുങ്ങുന്നു

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രിയില്‍ ബഹുനില കാര്‍ പാര്‍ക്കിംഗ് സംവിധാനം ഒരുങ്ങുന്നു. സൂപ്പര്‍ സ്‌പെഷാലിറ്റി ആശുപത്രിക്കു സമീപമാണ് പാര്‍ക്കിംഗ് കേന്ദ്രം ഒരുങ്ങുന്നത്. സ്മാര്‍ട്ട്‌സിറ്റി പദ്ധതിയില്‍ നിന്ന് 18 കോടി രൂപയാണ് ഇതിനായി ചെലവിടുന്നത്. രണ്ടാഴ്ചയ്ക്കുള്ളില്‍ നിര്‍മാണം പൂര്‍ത്തീകരിക്കാനാണ് ലക്ഷമിടുന്നത്. മെഡിക്കല്‍കോളജ് ആശുപത്രി, എസ്എടി ആശുപത്രി, ചൈല്‍ഡ് ഡവലപ്‌മെന്‍റ് സെന്‍റര്‍, ശ്രീചിത്ര, ആര്‍സിസി, ഡന്‍റല്‍ കോളജ്, മെഡിക്കല്‍ വിദ്യാഭ്യാസ ഡയറക്ടറേറ്റ്, ബാങ്കുകള്‍, ട്രഷറി ഉള്‍പ്പെടെയുള്ള വിവിധ സ്ഥാപനങ്ങളിലെത്തുന്നവര്‍ക്കെല്ലാം ഇവിടെ വാഹനങ്ങള്‍ പാര്‍ക്ക് ചെയ്യാന്‍ സാധിക്കുമെന്നുള്ളതാണ് പ്രത്യേകത. വാഹനങ്ങള്‍ പാര്‍ക്ക് ചെയ്യാന്‍ സാധിക്കാത്തതുമൂലം നിരവധി വാഹനയാത്രികര്‍ വാഹനവുമായി വലയുന്നത് സ്ഥിരം കാഴ്ചയാണ്. ഇതിനാണ് വിരാമമാകാന്‍ പോകുന്നത്. 250 ഓളം ഇടത്തരം കാറുകള്‍ക്ക് ഒരേസമയം പാര്‍ക്ക് ചെയ്യാനുള്ള സൗകര്യമാണ് വരാന്‍ പോകുന്നത്. നിശ്ചിത പാര്‍ക്കിംഗ് ഫീസ് ഈടാക്കി പാര്‍ക്കിംഗിന് അനുവദിക്കുന്നതിനാല്‍ ഏറെ തിരക്കുള്ള മെഡിക്കല്‍കോളജ് ഭാഗത്ത് ഇനി വാഹനം പാര്‍ക്ക് ചെയ്യാന്‍ അലയേണ്ടതില്ല. നിര്‍മാണം പൂര്‍ത്തീകരിക്കുന്നതോടെ ഉദ്ഘാടനം തീരുമാനിച്ച് ജൂലൈ അവസാനത്തോടെ പ്രവര്‍ത്തനം തുടങ്ങാനാണ് തീരുമാനിച്ചിട്ടുള്ളത്.

ഒളിവില്‍ കഴിഞ്ഞിരുന്ന പ്രതി 24 വര്‍ഷങ്ങള്‍ക്കുശേഷം പിടിയില്‍

വലിയതുറ: ഒളിവില്‍ കഴിഞ്ഞിരുന്ന പിടിച്ചുപറി കേസിലെ പ്രതിയെ 24 വര്‍ഷങ്ങള്‍ക്കുശേഷം വലിയതുറ പോലീസ് അറസ്റ്റ് ചെയ്തു. ബീമാപളളി സ്വദേശിയായ മുഹമ്മദ് ഷാഫിയെയാണ് ബീമാപള്ളി ആസാദ് നഗറില്‍നിന്നും അറസ്റ്റ് ചെയ്തത്. പിടിച്ചുപറി കേസുമായി ബന്ധപ്പെട്ട് 2001-ല്‍ വലിയതുറ പോലീസ് രജിസ്റ്റര്‍ ചെയ്ത കേസിലെ പ്രതിയായിരുന്നു ഇയാള്‍. വിചാരണ തുടങ്ങുന്നതറിഞ്ഞു ഷാഫി നാട്ടില്‍ നിന്നും മുങ്ങുകയായിരുന്നു. കഴിഞ്ഞദിവസം ബീമാപളളി ആസാദ് നഗറില്‍ എത്തിയതായി പോലീസിനു ലഭിച്ച രഹസ്യ വിവരത്തെത്തുടര്‍ന്നാണ് ഷാഫിയെ പിടികൂടിയത്. പ്രതിയെ കഴിഞ്ഞദിവസം കോടതിയില്‍ ഹാജരാക്കി.

സുരക്ഷ മുൻകരുതലുകൾ അകലെ : മരണത്തിന്‍റെ കാണാക്കയങ്ങൾ ഒളിച്ചുവച്ച് പനച്ചോട്ടുകടവ്

പേയാട് : സുരക്ഷാ മുൻകരുതലൊരുക്കാൻ അധികൃതർ വൈകുന്നതോടെ കുണ്ടമൺഭാഗം പനച്ചോട്ടുകടവ് അപകടമരണങ്ങളുടെ കേന്ദ്രമായി മാറുന്നു. കഴിഞ്ഞ ദിവസം ഒട്ടോ ഡ്രൈവർ മുങ്ങി മരിച്ചത് ഈ കടവിലാണ്. വിളവൂർക്കൽ പഞ്ചായത്തിൽ മൂലത്തോപ്പിലാണ് പനച്ചോട്ടുകടവ്. നിരവധിപേർ കുളിക്കാനെത്തുന്നുണ്ടെങ്കിലും കൽപ്പടവുകളുള്ള കുളിക്കടവില്ല. കരമനയാറിന്‍റെ തീരത്തെ കടവിൽ വെള്ളമുയരുന്നതും താഴുന്നതും എപ്പോഴാണെന്നു നാട്ടുകാർക്കുപോലും നിശ്ചയമില്ല. ഈ സാഹചര്യത്തിലാണിവിടെ അപകടങ്ങളുണ്ടാകുന്നതെന്ന് അവർ പറയുന്നു. അടിയൊഴുക്കും ചുഴികളും പാറയിടുക്കുകളും നിറഞ്ഞ പുഴയിൽ പലയിടവും ആഴമേറിയ കയങ്ങളാണ്. ഇവരിൽ ഭൂരിഭാഗവും യുവാക്കളും കൗമാരക്കാരുമാണ്. മണൽവാരൽ മൂലമുണ്ടായ കയങ്ങൾ, അടിയൊഴുക്കു കാരണം രൂപപ്പെടുന്ന ചുഴികൾ, അടിത്തട്ടിലെ ചെളി നിക്ഷേപങ്ങൾ, പാറക്കൂട്ടങ്ങൾ എന്നിവയാണ് അപകടത്തിനിടയാക്കുന്നത്. നീന്തൽ അറിയാവുന്നവർപോലും ഇത്തരം കയങ്ങളിൽപ്പെടുമ്പോൾ വെള്ളത്തിൽനിന്നു കയറാനാകാതെ കുടുങ്ങും. കാൽവഴുതിയുള്ള വീഴ്ചകളിൽ പാറക്കൂട്ടങ്ങളിൽ തലയിടിച്ചു ബോധരഹിതരാകും. ഇതും അപകടതീവ്രത വർധിപ്പിക്കുന്നു. വിളപ്പിൽ, വിളവൂർക്കൽ പഞ്ചായത്തുകളിൽ കരമനയാറിന്റെ മിക്ക പ്രദേശവും അപകടകരമാണ്. അപകടമുണ്ടാക്കുന്ന മിക്ക കടവുകൾക്കു സമീപത്തും ആൾത്താമസം കുറവാണ്. സ്വകാര്യതയ്ക്കുവേണ്ടി മുതിർന്നവരുടെ കണ്ണുവെട്ടിച്ചും കുട്ടികൾ പല കടവുകളിലും എത്തുന്നുണ്ട്. ആറിലേക്ക് ഇറങ്ങാൻ കഴിയുന്നിടത്തൊക്കെ ഇക്കൂട്ടർ എത്തിപ്പറ്റുന്നതിനാൽ അപകടം തടയാനും കഴിയുന്നില്ല. വിളപ്പിൽ പഞ്ചായത്തിലെ പേയാട് അരുവിപ്പുറം കടവ്, കാവടിക്കടവ് എന്നിവിടങ്ങളിൽ മാത്രം 16 പേർ മരിച്ചിട്ടുണ്ട്. അരുവിപ്പുറം കടവിൽ അപകടമുന്നറിയിപ്പ് ബോർഡ് സ്ഥാപിച്ചതുമാത്രമാണ് നടപടി. വിളവൂർക്കൽ പഞ്ചായത്തിലെ പനച്ചോട്ടുകടവിൽ എട്ടു ജീവനുകളാണ് പൊലിഞ്ഞത്. പാപ്പനംകോട് പാറയിൽക്കടവ്, വട്ടിയൂർക്കാവിനു സമീപം മേലേക്കടവ്, ആയിരവില്ലിക്ഷേത്രത്തിനു സമീപം ആറാട്ടുകടവ്, കുലശേഖരം ശങ്കരനാരായണ ക്ഷേത്രത്തിനു സമീപമുള്ള കടവ്, തമലത്തിനു സമീപം ചുള്ളമുക്ക് തെറ്റിക്കുഴി, കരമന കാട്ടാൻവിള, തെറ്റിക്കുഴി, ആറാട്ടുകടവ്, ബലിക്കടവ്, അലക്കുകടവ് എന്നിങ്ങനെ അപകടമേഖലകളുടെ എണ്ണം നീളും. അപകടമൊഴിവാക്കാൻ പലവഴികൾ സ്ഥിരം പകടമേഖലകളിൽ മുന്നറിയിപ്പു ബോർഡുകൾ സ്ഥാപിക്കുക, പ്രദേശവാസികളുടെ സഹായത്തോടെ ജാഗ്രതാ സമിതി രൂപവത്കരിക്കുക എന്നിവയാണ് പരിഹാരമായി നിർദേശിക്കപ്പെടുന്നത്. അപകടകരമായ രീതിയിൽ അപരിചിതരും കൗമാരക്കാരും ആറിലേക്കിറങ്ങുന്നതു തടയാൻ ഇതിലൂടെ കഴിയും. സ്‌കൂൾ, പ്ലസ്ടു വിദ്യാർഥികൾക്ക് അപകടബോധവത്കരണ ക്യാമ്പ് സംഘടിപ്പിക്കുകയാണ് മറ്റൊരു മാർഗം. കുളങ്ങളിലും മറ്റും നീന്തി പരിചയമുള്ളവർക്കുപോലും ആറ്റിലെ ഒഴുക്കിൽ നീന്താൻ കഴിയില്ല. ചെളിയിൽ താഴ്ന്നുപോയാൽ തിരികെ ഉയർന്നുവരാൻ കഴിയില്ല. ഇത്തരം സാഹചര്യങ്ങളിൽ പരിചയമുള്ളവർക്കു മാത്രമേ നീന്തിക്കയറാൻ കഴിയുകയുള്ളൂ. ആറ്റിൽ ഇറങ്ങണമെന്ന് നിർബന്ധമുള്ളവർ ലൈഫ് ജാക്കറ്റ് പോലുള്ള സുരക്ഷാസജ്ജീകരണങ്ങൾ ഉപയോഗിക്കുകയാണ് അപകടമൊഴിവാക്കാനുള്ള മറ്റൊരു മാർഗമെന്നു നാട്ടുകാർ പറയുന്നു.

ഹൈമാസ്റ്റ് ലൈറ്റ് തകര്‍ന്ന നിലയില്‍

വെള്ളറട : വെള്ളറട പഞ്ചായത്തിലെ കള്ളിമൂട് വാര്‍ഡില്‍ കള്ളിമൂട് ജംഗ്ഷനില്‍ സ്ഥാപിച്ച ഹൈമാസ്റ്റ് ലൈറ്റ് അജ്ഞാത വാഹനമിടിച്ചു തകര്‍ന്ന നിലയില്‍. ഏത് വാഹനമാണ് ഹൈമാസ്റ്റിനെ തകര്‍ത്തതെന്ന് വിവരമില്ല. ഹൈമാസ്റ്റ് ലൈറ്റ് നിലം പൊത്താറായ അവസ്ഥയിലാണ്. ഹൈമാസ്റ്റ് ലൈറ്റ് ആരുടെയെങ്കിലും പുറത്തുകൂടിയോ, വാഹനത്തിനു പുറത്തുകൂടിയോ പതിച്ചാല്‍ വന്‍ ദുരന്തമായിരിക്കും സംഭവിക്കുക. എത്രയും വേഗം ഹൈമാസ്റ്റ് ലൈറ്റ് തകര്‍ത്ത അജ്ഞാത സംഘത്തെ കണ്ടെത്തണമെന്നും ലൈറ്റിനെ ഉപയോഗപ്രദമായ രീതിയില്‍ പുനഃസ്ഥാപിക്കണമെന്നും പ്രദേശത്ത് വെളിച്ചം ലഭിക്കാന്‍വേണ്ട ക്രമീകരണ ഒരുക്കണമെന്നും പ്രദേശ വാസികള്‍ ആവശ്യപ്പെട്ടു.

ജോയിന്‍റ് കൗൺസിൽ മാർച്ച്‌: വിശദീകരണ കാമ്പയിൻ നടത്തി

നെടുമങ്ങാട്: 2024 ജൂലൈ ഒന്ന് പ്രാബല്യത്തിൽ നടപ്പിലാക്കേണ്ട ശമ്പള പരിഷ്കരണ പ്രക്രിയ ആരംഭിക്കണമെന്നാവശ്യപ്പെട്ട് ജോയിന്‍റ് കൗൺസിലിന്‍റെ നേതൃത്വത്തിൽ സെക്രട്ടറിയേറ്റിലേക്കും ജില്ലാ കേന്ദ്രങ്ങളിലേക്കും നാളെ നടത്തുന്ന മാർച്ചും ധർണയുമായി ബന്ധപ്പെട്ട വിഷയങ്ങൾ ജീവനക്കാർക്കിടയിൽ വിശദീകരിക്കുന്നതിനായി ജോയിന്‍റ് കൗൺസിൽ നെടുമങ്ങാട് മേഖലയുടെ കീഴിലുള്ള വിവിധ കാര്യാലയങ്ങളിൽ വിശദീകരണ യോഗങ്ങൾ സംഘടിപ്പിച്ചു. പതിനൊന്നാം ശമ്പള പരിഷ്കരണ കുടിശിക സമയബന്ധിതമായി ലഭ്യമാക്കാത്തതും വിലക്കയറ്റത്തിന് അനുപാതികമായി പ്രഖ്യാപിക്കപ്പെടുന്ന ക്ഷാമബത്ത ആനുകൂല്യങ്ങളും മുൻകാല പ്രാബല്യം അനുവദിക്കാതെ തടഞ്ഞു വയ്ക്കപ്പെടുന്നതും ജീവനക്കാരെ ഏറെ പ്രയാസത്തിലാ ക്കിയിരിക്കുകയാണ്. സർക്കാർ പ്രഖ്യാപിക്കുന്ന ജനോപകാരപ്രദമായ പദ്ധതികൾ താഴെത്തട്ടിൽ നടപ്പിലാക്കുന്ന സർക്കാർ ജീവനക്കാരുടെ ന്യായമായ അവകാശങ്ങളും ആനുകൂല്യങ്ങളും സംരക്ഷിക്കാനുള്ള ഉത്തരവാദിത്വം ഇടതുപക്ഷ ജനാധിപത്യ മുന്നണി സർക്കാരിനുണ്ടെന്ന് വിശദീകരണ യോഗങ്ങൾ വിലയിരുത്തി. വിശദീകരണ യോ ഗങ്ങളിൽ ജോയിന്‍റ് കൗൺസിൽ സംസ്ഥാന-ജില്ലാ-മേഖലാ ഭാരവാഹികളായ വി.കെ മധു, വി.ബാലകൃഷ്ണൻ, ആർ.സരിത, ആർ.എസ്. സജീവ്, സതീഷ് കണ്ടല, ആർ.എൽ. ലിജു, എം. അച്ചു, എച്ച്.എൻ. ബ്രൂസ്ഖാൻ,പ്രവീൺ, ജെ.കെ ഷിബു, ആര്യ, രാജേഷ്,ദേവി, ഉമേഷ് എന്നിവർ പ്രസംഗിച്ചു.

ലഹരി വിരുദ്ധ പ്രവര്‍ത്തനങ്ങള്‍ക്കുള്ള ജില്ലാതല അവാര്‍ഡ് ചെമ്പൂര് എല്‍എംഎസ്. എച്ച്എസ്എസിന്

വെള്ളറട: ആന്‍റി നര്‍കോട്ടിക് ആക്ഷന്‍ കൗണ്‍സില്‍ ഓഫ് ഇന്ത്യ ഏര്‍പ്പെടുത്തിയ തിരുവനന്തപുരം ജില്ലയിലെ മികച്ച ഹൈസ്‌കൂളിനുള്ള അവാര്‍ഡ് ചെമ്പൂര് എല്‍എംഎസ് ഹയര്‍ സെക്കൻഡറി സ്‌കൂള്‍ കരസ്ഥമാക്കി. അന്താരാഷ്ട്ര ലഹരിവിരുദ്ധ ദിനത്തില്‍ കനകക്കുന്നില്‍ നടത്തിയ അവാര്‍ഡുദാന ചടങ്ങില്‍ മന്ത്രി കടന്നപ്പള്ളി രാമചന്ദ്രനില്‍നിന്ന് സ്കൂൾ അധികൃതർ അവാര്‍ഡ് ഏറ്റുവാങ്ങി. ചലച്ചിത്ര അക്കാഡമി ചെയര്‍മാന്‍ പ്രേംകുമാർ സര്‍ട്ടിഫിക്കു വിതരണം ചെയ്തു.

അനന്ദുവിന്‍റെ കുടുംബത്തിന് 46 ലക്ഷംരൂപ നഷ്ടപരിഹാരം

കാട്ടാക്കട: വാഹനാപകടത്തിൽ മരണപെട്ട വിളപ്പിൽശാല ചക്കിട്ടപാറ ഊറ്റുകുഴി കുന്നിൽ വീട്ടിൽ രാജകുമാരൻ ബിനുകുമാരി ദമ്പതികളുടെ മകൻ അനന്ദു (20) വിന്‍റെ കുടുംബത്തിന് നഷ്ടപരിഹാരമായി പലിശ സഹിതം 46 ലക്ഷം രൂപ അനുവദിച്ചു നെയ്യാറ്റിൻകര മോട്ടോർ ആക്‌സിഡന്‍റ് ക്ലെയിംസ് ട്രൈബ്യുണൽ കവിതാ ഗംഗാധരൻ വിധി പ്രഖ്യാപിച്ചു. 2018 ആഗസ്റ്റു മാസം തിരുമല പാങ്ങോട് റോഡിൽ അനന്ദു യാത്ര ചെയ്തു പോയ മോട്ടോർ സൈക്കിളിൽ എതിർദിശയിൽ വന്ന കെഎസ്ആർടിസി ബസ് ഇടിച്ചാണ് അപകടം ഉണ്ടായത്. ഹർജികക്ഷികൾക്ക് വേണ്ടി അഡ്വക്കേറ്റുമാരായ കാട്ടാക്കട പി.എസ്. അനിൽ, മുഹമ്മദ് മുനീർ എന്നിവർ ഹാജരായി.

പൈതൃകങ്ങളെ തൊട്ടറിഞ്ഞ് അമേരിക്കന്‍ മലയാളി വിദ്യാര്‍ഥികള്‍

തിരുവനന്തപുരം: കേരളത്തിന്‍റെ മൂല്യങ്ങളും പൈതൃകങ്ങളും തൊട്ടറിഞ്ഞ് അമേരിക്കന്‍ മലയാളി വിദ്യാര്‍ഥികള്‍. സമ്മര്‍ ടു കേരള 2025 പ്രോഗ്രാമിലൂടെ കേരളത്തിന്‍റെ സമ്പന്നമായ സംസ്‌കാരവും പൈതൃകവും നേരിട്ട് കണ്ടറിയുന്നതിനായി അമേരിക്കന്‍ മലയാളി വിദ്യാര്‍ഥികള്‍ തിരുവനന്തപുരത്തെത്തി. ഫെഡറേഷന്‍ ഓഫ് മലയാളി അസോസിയേഷന്‍സ് ഓഫ് അമേരിക്കാസിന്‍റെ (ഫോമ) നേതൃത്വത്തിലാണ് അമേരിക്കയിലെ വിവിധ ഭാഗങ്ങളിലുള്ള മലയാളി വിദ്യാര്‍ഥികള്‍ കേരള തലസ്ഥാനം സന്ദര്‍ശിക്കാനെത്തിയത്. പാളയം രക്തസാക്ഷി മണ്ഡപം, കനകക്കുന്ന് കൊട്ടാരം, ഐഎസ്ആര്‍ഒ കാമ്പസ്, കുതിരമാളിക, കഴക്കൂട്ടം ഡിഫറന്‍റ് ആര്‍ട്‌സ് സെന്‍റര്‍ തുടങ്ങിയ സ്ഥലങ്ങള്‍ വിദ്യാര്‍ഥികള്‍ സന്ദര്‍ശിച്ചു. ബോട്ടിംഗ്, ബീച്ച് സ്‌റ്റേ തുടങ്ങിയ പരിപാടികളും ഒരുക്കിയിരുന്നു. കേരളീയ പൈതൃകത്തോടുള്ള ആത്മബന്ധം കൊണ്ടും സ്‌നേഹം കൊണ്ടുമാണു കേരളത്തെക്കുറിച്ച് കൂടുതല്‍ അറിയുന്നതിന് എത്തിയതെന്നു സമ്മര്‍ ടു കേരളയില്‍ പങ്കെടുക്കാനെത്തിയ വദ്യാര്‍ഥികള്‍ പറഞ്ഞു. വിദ്യാര്‍ഥികള്‍ക്ക് ഇന്നലെ മാസ്‌ക്കറ്റ് ഹോട്ടലില്‍ സ്വീകരണവും ഒരുക്കിയിരുന്നു. സിപിഐ സംസ്ഥാന സെക്രട്ടറി ബിനോയ് വിശ്വം മുഖ്യാതിഥിയായിരുന്നു. പണത്തേക്കാളും പദവിയേക്കാളും വലുതാണു മനുഷ്യരുടെ മൂല്യബോധമെന്ന് അദ്ദേഹം പറഞ്ഞു. സമ്മര്‍ ടു കേരള പ്രോഗ്രാമിലൂടെ തങ്ങളുടെ വേരുകളെക്കുറിച്ചും മൂല്യങ്ങളെക്കുറിച്ചും പറഞ്ഞുകൊടുക്കുന്ന ഫോമയുടെ പ്രവര്‍ത്തനം മാതൃകാപരമാണ്. ഫോമയുമായി വര്‍ഷങ്ങളായുള്ള ബന്ധത്തെക്കുറിച്ചും അദ്ദേഹം പറഞ്ഞു. ഫോമയുടെ സിഗ്നേച്ചര്‍ പദ്ധതികളിലൊന്നാണു സമ്മര്‍ ടു കേരള എജ്യൂക്കേഷണല്‍ ടൂര്‍ പ്രോഗ്രാമെന്നു പ്രോഗ്രാം ചെയര്‍പേഴ്‌സണ്‍ അനു സ്‌കറിയ പറഞ്ഞു. ഫോമയുടെ നേതൃത്വത്തില്‍ അനു സ്‌കറിയ ചെയര്‍പേഴ്‌സണായും രേഷ് മ രഞ്ജന്‍ ഇവന്‍റ് ആന്‍ഡ് പിആര്‍ കോ-ഓര്‍ഡിനേറ്ററായും രാജേഷ് പുഷ്പരാജന്‍ കോ ഓര്‍ഡിനേറ്ററുമായുള്ള കമ്മറ്റിയാണ് സമ്മര്‍ ടു കേരള പ്രോഗ്രാം വിദ്യാര്‍ഥികള്‍ക്കായി ഒരുക്കിയത്.

വിതുര പഞ്ചായത്തിലെ ടൂറിസം കേന്ദ്രങ്ങളെ ഹരിത ടൂറിസം കേന്ദ്രങ്ങളായി പ്രഖ്യാപിച്ചു

വിതുര : മാലിന്യമുക്ത കേരളം നവകേരളം ജനകീയ കാന്പയിന്‍റെ ഭാഗമായി വിതുര പഞ്ചായത്തിലെ ടൂറിസം കേന്ദ്രങ്ങളെ ഹരിത ടൂറിസം കേന്ദ്രങ്ങളായി പഞ്ചായത്ത് പ്രഖ്യാപിച്ചു. ബോണക്കാട്, വാഴ്വാന്തോൾ വെള്ളച്ചാട്ടം, പേപ്പാറ വന്യജീവി സങ്കേതം, കല്ലാർ ഗോൾഡൻ വാലി, താവയ്ക്കൽ വെള്ളച്ചാട്ടം എന്നിവയാണ് ഹരിത ടൂറിസം കേന്ദ്രങ്ങൾ. കല്ലാർ ഗോൾഡൻ വാലിയിൽനടന്ന ചടങ്ങിൽ പഞ്ചായത്ത് പ്രസിഡന്‍റ് മഞ്ജുഷ ജി. ആനന്ദ് പ്രഖ്യാപനം നടത്തി. പഞ്ചായത്തിന്‍റെയും ഹരിത കേരള മിഷന്‍റെയും ഇടപെടലുകളുടെ ഭാഗമായി ഈ ടൂറിസ്റ്റ് കേന്ദ്രങ്ങൾക്ക് മാലിന്യ സംസ്കരണ ബിന്നുകളും ബോട്ടിൽ ബൂത്തുകളും നൽകുകയും ഹരിത ഓഡിറ്റിംഗിനു വിധേയമാക്കുകയും ഐഇസി ബോർഡുകൾ സ്ഥാപിക്കുകയും ചെയ്തു. ചടങ്ങിൽ ജനപ്രതിനിധികളായ മാൻകുന്നിൽ പ്രകാശ്, ഗിരീഷ്, ലൗലി, പഞ്ചായത്ത് സെക്രട്ടറി ഷിബു പ്രണാബ്, പൊന്മുടി എക്കോ ടൂറിസം എസ്എഫ്ഒ വിജു, നവകേരളം ആർപി ത്രേസ്യാമ്മ ജോണി എന്നിവർ പ്രസംഗിച്ചു.

പുതുക്കുറിച്ചി ഫെറോന അൽമായ സംഗമം സംഘടിപ്പിച്ചു

തിരുവനന്തപുരം: ലത്തീൻ അതിരൂപത പുതുക്കുറിച്ചി ഫെറോന സംഘടിപ്പിച്ച അല്മായ സംഗമം അതിരൂപതാ വികാരി ജനറാൾ മോൺ. യൂജിൻ എച്ച്. പെരേര ഉദ്ഘാടനം ചെയ്തു. "ഒന്നായി നമുക്ക് ഉണരാം ഉയർത്താം - തദ്ദേശ സ്വയ ഭരണ തെരഞ്ഞെടുപ്പ് സാധ്യതകളും വെല്ലുവിളികളും' എന്ന വിഷയത്തെപ്പറ്റി റവ. ഡോ. മൈക്കിൾ തോമസ് ക്ലാസ് നയിച്ചു. സുമം രതീഷ് അധ്യക്ഷത വഹിച്ചു. രൂപതാ ഡയറക്ടർ റവ. ഫാ. ബീഡ് മനോജ് മുഖ്യപ്രഭാഷണം നടത്തി. ഫാ. ബിനു അലക്സ് അനുഗ്രഹ പ്രഭാഷണം നടത്തി. ഫാ. കോസ്മസ്, ഫാ. അലോഷ്യസ്, നിക്‌സൻ ലോപ്പസ്, എഫ്.എം ക്രിസ്റ്റിൽ, രാജു തോമസ്, ജോളി പത്രോസ് എന്നിവർ പ്രസംഗിച്ചു. തണൽ മംഗല്യസഹായ പദ്ധതിയുടെ ഉദ്ഘാടനം പരിപാടിയോടനുബന്ധിച്ചു നടന്നു.

സുകുമാർ അഴീക്കോട് അവാർഡ് ഡോ. ഷാജി പ്രഭാകരന്

നേമം: ഡോ.സുകുമാർ അഴീക്കോട് സ്മാരക ദേശീയ ട്രസ്റ്റിന്‍റെ 2025- ലെ അവാർഡിന് പ്രമുഖ ന്യൂറോളജിസ്റ്റും സാംസ്കാരിക പ്രവർത്തകനും എഴുത്തുകാരനുമായ പ്രഫ. ഡോ. ഷാജി പ്രഭാകരൻ അർഹനായി. 50,000 രൂപയും ശില്പവും പൊന്നാടയും അടങ്ങുന്നതാണ് അവാർഡ്. കവിയും ഐ.ജെ.ടി ഡയറകുമായ ഡോ. ഇന്ദ്ര ബാബു ചെയർമാനും പ്രശസ്ത പ്രമേഹരോഗ വിദഗ്ധൻ ഡോ. ജ്യോതിദേവ് കേശവദേവ്, പ്രമുഖ ഭൗമശാസ് ത്രജ്ഞൻ ഡോ. ഡി. പദ്മലാൽ എന്നിവർ അംഗങ്ങളും ട്രസ്റ്റ് ദേശീയ പ്രസിഡന്‍റ് ശാസ്താന്തല സഹദേവൻ കൺവീനറുമായ ജൂറിയാണ് അവാർഡ് നിർണയിച്ചത്. ആലപ്പുഴ മെഡിക്കൽ കോളേജിൽനിന്നു പ്രിൻസിപ്പലായി വിരമിച്ച ഷാജി പ്രഭാകരൻ ആതുര ശുശ്രൂഷാമേഖലയിൽ ഇപ്പോഴും നിറസാന്നിദ്ധ്യമാണ്. ജീവകാരുണ്യപ്രവർത്തന രംഗത്തും സാംസ്കാരിക രംഗത്തും അദ്ദേഹം നടത്തിയിട്ടുള്ള പ്രവർത്തനങ്ങളെക്കൂടി പരിഗണിച്ചാണ് സമഗ്ര സംഭാവനയ്ക്കുള്ള പുരസ്കാരം സമ്മാനിക്കുന്നതെന്ന് ട്രസ്റ്റ് ദേശീയ പ്രസിഡന്‍റ് ശാസ്താന്തല സഹദേവൻ ട്രസ്റ്റ് ഹാളിൽ നടന്ന വാർത്താസമ്മേളനത്തിൽ അറിയിച്ചു. നേമം മെരിലാന്‍റ് സ്റ്റുഡിയോയ്ക്ക് എതിർവശം പുതുതായി നിർമിച്ച അഴീക്കോട് സ്മാരക ഹാളിൽ ഓഗസ്റ്റ് രണ്ടാം വാരം നടക്കുന്ന ചടങ്ങിൽ അവാർഡ് സമ്മാനിക്കുമെന്നു ജനറൽ സെക്രട്ടറി പനവിള രാജശേഖരൻ പറഞ്ഞു.

ആൾമാറാട്ടം നടത്തി വ്യാജ ഒപ്പിട്ട് ചിട്ടിത്തുക കൈക്കലാക്കിയ സംഭവം: ഒരാൾ അറസ്റ്റിൽ

കാട്ടാക്കട: കാട്ടാക്കട കെഎസ് എഫ്ഇയുടെ ഈവനിംഗ് ശാഖയിൽ നിന്നും ആൾമാറാട്ടം നടത്തി വ്യാജ ഒപ്പിട്ട് ചിട്ടി തുക കൈക്കലാക്കിയ പ്രതികളിൽ ഒരാൾ കാട്ടാക്കട പോലീസിന്‍റെ പിടിയിലായി. കള്ളിക്കാട് മൈലക്കര സ്വദേശിയൂം കെഎസ്എഫ്ഇ കളക്്ഷൻ ഏജന്‍റുമായ അഭിജിത് (30) ആണ് പിടിയിലായത്. 2024 ജൂലൈ 15 തീയതിയിലാ ണ് അഭിജിത്ത്, സാം രാജ്, ചിട്ടി അംഗമായ ശരണ്യ ജയൻ എന്നിവർ ചേർന്ന് തട്ടിപ്പ് നടത്തിയത്. കള്ളിക്കാട് സ്വദേശിയായ കള്ളിക്കാട് ബ്രാഞ്ചിൽ ചിട്ടാളനുമായ വിഷ്ണു എന്നയാളുടെ ചിട്ടി തവണ തുക അടച്ചു നൽകാമെന്നു പറഞ്ഞു പാസ്ബുക്കും തവണ തുകയും കള്ളിക്കാട് മൈലക്കര സ്വദേശിയായ അഭിജിത്ത് കൈക്കലാക്കി. ശേഷം കാട്ടാക്കട ശാഖയിൽ ശരണ്യ ജയനു ജാമ്യം നിൽക്കുന്നത് വിഷ്ണുവാണെന്നു ധരിപ്പിച്ചു സാം രാജിനെ വച്ച് ആൾമാറാട്ടം നടത്തി ശരണ്യ ജയനു നറുക്കെടുപ്പിലൂടെ ലഭിച്ച ചിട്ടിക്ക് ജാമ്യത്തിന് ഒപ്പിട്ട് പണം കൈകലാക്കുകയായിരുന്നു. കാട്ടാക്കട ഈവനിംഗ് ശാഖ ബ്രാഞ്ച് മാനേജർ രാഹുൽ രവീന്ദ്രൻ നൽകിയ പരാതിയിലാണ് ഇപ്പോൾ അറസ്റ്റ് നടന്നത്. 2,65,112 രൂപയാണ് ചിട്ടി തുക. പ്രതിയെ കാട്ടാക്കട കോടതിയിൽ ഹാജരാക്കി റിമാൻഡ് ചെയ്തു.

എംഡിഎംഎയുമായി സിപിഐ നേതാവ് പിടിയിൽ

തിരുവനന്തപുരം: എംഡിഎംഎയുമായി സിപിഐ നേതാവ് ഉൾപ്പെടെ രണ്ടു പേർ എക്സൈസിന്‍റെ പിടിയിലായി. സിപിഐ പാളയം ലോക്കൽ കമ്മിറ്റി അംഗവും വഴുതക്കാട് സ്വദേശിയുമായ കൃഷ്ണചന്ദ്രൻ, ആലി മുഹമ്മദ് എന്നിവരാണ് പിടിയിലായത്. ഇവരുടെ പക്കൽ നിന്നും ഒൻപത് ഗ്രാം എംഡിഎംഎ പിടിച്ചെടുത്തു. ബൈക്കിലെത്തിയ രണ്ടു പേർക്ക് ഇവർ എംഡിഎംഎ കൈമാറുന്നതായുള്ള രഹസ്യവിവരത്തിന്‍റെ അടിസ്ഥാനത്തിൽ എക്സൈസ് സംഘമാണ് നഗരത്തിൽ നിന്നും ഇവരെ പിടികൂടിയത്. ഇവരുടെ ബൈക്കുകളും മൊബൈൽ ഫോണുകളും പോലീസ് പിടിച്ചെടുത്തു. അതേസമയം സാമൂഹ്യവിരുദ്ധ പ്രവർത്തനത്തിന്‍റെ പേരിൽ സിപിഐ ബേക്കറി ബ്രാഞ്ച് അംഗമായ കൃഷ്ണചന്ദ്രനെ പ്രാഥമിക അംഗത്വത്തിൽ നിന്നും പുറത്താക്കിയതായി മണ്ഡലം സെക്രട്ടറി ടി.എസ് ബിനുകുമാർ അറിയിച്ചു. ഇയാൾക്ക് പാർട്ടിയുമായോ ബഹുജന സംഘടനകളുമായോ ബന്ധപ്പെട്ട നേതൃത്വ ചുമതലകളൊന്നുമില്ലെന്നും അത്തരത്തിലുള്ള വാർത്തകൾ അടിസ്ഥാനരഹിതമാണെന്നും സെക്രട്ടറി പത്രക്കുറിപ്പിൽ അറിയിച്ചു.

എക്സൈസ് മിന്നൽ പരിശോധന : അഞ്ച് കിലോയിലധികം നിരോധിത പുകയില ഉൽപന്നങ്ങൾ പിടിച്ചെടുത്തു

നെടുമങ്ങാട്: എക്സൈസ് നടത്തിയ മിന്നൽ പരിശോധനയിൽ അഞ്ചു കിലോയിലധികം നിരോധിത പുകയില ഉൽപന്നങ്ങൾ ആര്യനാട് റേഞ്ചിന്‍റെ വിവിധ ഭാഗങ്ങളിൽ നിന്നായി കണ്ടെടുത്തു. കാപ്പിക്കാട് കോട്ടക്കുഴിയിൽ വാടകയ്ക്ക് താമസിക്കുന്ന മാഹീൻ, മഠത്തിക്കോണം ജംഗ്ഷനിൽ കട നടത്തുന്ന വിനയകുമാർ, സതീഷ്, ജോണി എന്നിവരിൽ നിന്നുമാണ് കൂടുതലും ലഹരി വസ്തുക്കൾ പിടിച്ചെടുത്തത്. കേസ് എടുത്തു പിഴ ഈടാക്കി. ഇവരുടെ കടകളുടെ രജിസ്ട്രേഷൻ റദ്ദാക്കുന്നതിന് പഞ്ചായത്തിൽ കത്തു നൽകുമെന്ന് എക്സൈസ് അധികൃതർ അറിയിച്ചു. സ്കൂൾ, കോളജ് വിദ്യാർഥികൾക്ക് ഹാൻസ്, കൂൾ തുടങ്ങിയ നിരോധിത പുകയില ഉൽപന്നങ്ങൾ വിൽപ്പന നടത്തുന്നു എന്ന പരാതികളിൽ രഹസ്യ അന്വേഷണം നടത്തിയ ശേഷമായിരുന്നു റെയ്ഡ്. സ്കൂൾ തുറപ്പിനുശേഷം വിദ്യാലയങ്ങൾ കേന്ദ്രീകരിച്ച് ലഹരി വിൽപന നടത്തുന്നവരെ പിടികൂടുന്നതിനായി പ്രത്യേക ഷാഡോ ടീം രൂപീകരിച്ചിരുന്നു. അധ്യാപകരിൽ നിന്നും പിടിഎ അംഗങ്ങളിൽ നിന്നും ശേഖരിച്ച വിവരത്തിന്‍റെ അടിസ്ഥാനത്തിൽ ആയിരുന്നു എക്സൈസ് റെയ്ഡ്.

സെക്രട്ടേറിയറ്റിനു മുന്നിൽ സൂംബ താളവുമായി വിദ്യാർഥികൾ

തിരുവനന്തപുരം: സൂംബ നൃത്തത്തിനു പിന്തുണയുമായി മന്ത്രി വി. ശിവൻകുട്ടി സൂംബ നൃത്തം ചെയ്യുന്ന വിദ്യാർഥികളെ കാണാനെത്തി. ഇന്നലെ രാവിലെ സെക്രട്ടറിയറ്റിലെ നോർത്ത് ഗേറ്റിനുമുന്നിലാണ് സൂംബാ നൃത്തവുമായി വിദ്യാർഥികളെത്തിയത്. ഇവർക്ക് പിന്തുണയുമായാണ് മന്ത്രിയും ഇവർക്കിടയിലേക്ക് വന്നത്. സൂംബ പരിശീലകരുടെ കൂട്ടായ്മയുടെ നേതൃത്വത്തിലാണ് സെക്രട്ടറിയറ്റിനുമുന്നിൽ സൂംബ അവതരിപ്പിച്ചത്. ജില്ലാ ഫുട്ബോൾ അസോസിയേഷനിലെ കുട്ടികളാണ് സൂംബാ നൃത്തം ചവിട്ടിയത്. 15 മിനിറ്റു നീണ്ട നൃത്തം അവസാനിക്കുന്നതു വരെ മന്ത്രിയും കുട്ടികൾക്കൊപ്പം നിന്നു. പരിശീലകരായ ദർശന സുദർശനൻ, നക്ഷത്ര പ്രദീപ്, വി.സി. ഉല്ലാസ്, ഇസ ജോഷി എന്നിവരാണ് സൂംബക്ക് നേതൃത്വം നൽകിയത്. സൂംബ എന്നാൽ എന്താണെന്നും എങ്ങനെയാണ് അത് കുട്ടികളെ ഉൾപ്പെടെ ഫിറ്റ്നസ് നിലനിർത്താനും ലഹരി ഉൾപ്പെടെയുള്ള തെറ്റായ വഴികളിൽനിന്ന് അകറ്റാനും സഹായിക്കുകയെന്ന ബോധവത്കരണത്തിന്‍റെ ഭാഗമായാണു പരിപാടി സംഘടിപ്പിച്ചതെന്നു സംഘാടകർ പറഞ്ഞു.

ഒടുവിൽ അധികൃതർ ഉണർന്നു : വിഴിഞ്ഞം പാലം: ആദ്യഘട്ട മണ്ണു പരിശോധനയ്ക്ക് തുടക്കം

വിഴിഞ്ഞം: ഒടുവിൽ അധികൃതർ ഉണർന്നു, അപകടാവസ്ഥയിലായ വിഴിഞ്ഞത്തെ പഴയ പാലത്തിനു പകരം പുതിയതു നിർമിക്കാനുള്ള ശ്രമം തുടങ്ങി; ആദ്യ ഘട്ടമായ മണ്ണു പരിശോധനക്ക് ആരംഭമായി. ഇതോടെ ഒരു നൂറ്റാണ്ടിലേറെ പഴക്കമേറിയ പഴയ പാലം വൈകാതെ ഓർമയാകും. വിഴിഞ്ഞം - മുക്കോല റോഡിൽ ഗംഗയാർ തോടിനു കുറുകെയുള്ള പഴയ പാലമാണ് പൊളിച്ച് മാറ്റുന്നത്. 3,05,000 രൂപയുടെ സാങ്കേതികാനുമതി ലഭിച്ചതിനെ തുടർന്നാണു മണ്ണു പരിശോധന ആരംഭിച്ചതെന്നറിയുന്നു. പരിശോധന റിപ്പോർട്ട് പിഡബ്ല്യു ഡി ബ്രിഡ്ജസ് വിഭാഗത്തിനു കിട്ടിയ ശേഷമാകും പാലത്തിന്‍റെ ഡിസൈൻ തയാറാക്കുക. നൂറു വർഷത്തിലേറെ പഴക്കമുള്ള ഈ പാലം ബ്രിട്ടീഷുകാർ നിർമിച്ചതാണെന്നു പഴമക്കാർ പറയുന്നു. ഒരു കാലത്തു വിഴിഞ്ഞത്തെയും തലസ്ഥാനത്തെയും ബന്ധിപ്പിച്ചിരുന്ന ഏക മാർഗമായിരുന്നു ഈ പാലം. ഇതു പൊളിച്ചുമാറ്റുന്നതോടെ വിഴിഞ്ഞത്തിന്‍റെ മറ്റൊരു ചരിത്രവും ഓർമയാകും. മൂന്നുതൂണുകളുടെ സ ഹായത്തോടെ നിൽക്കുന്ന പാലത്തിനു നേരത്തെ ബലക്ഷയം പ്രകടമായിരുന്നു. കൽക്കെട്ടുകൾ തകർന്നും കോൺക്രീറ്റ് ഇളകിയും നാശത്തിന്‍റെ വക്കിലായ പാലത്തിൽ കൂടിയുള്ള കെഎസ്ആർടിസി ബസ് സർവീസിനെതിരേയും പരാതി ഉയർന്നിരുന്നു. പൂവാർ, കാട്ടാക്കട, പാറശാല, നെയ്യാറ്റിൻകര ഉൾപ്പെടെയുള്ള ഡിപ്പോകളിൽ നിന്നുള്ള എല്ലാ ബസുകളും വിഴിഞ്ഞം വഴി തിരുവനന്തപുരത്തേക്കു പോകുന്നത് പഴയപാലം കടന്നാണ്. ഇത് ഏറെ വിമർശനങ്ങൾക്കും വഴി തെളിച്ചിരുന്നു. പരിപാലനമില്ലാതെ കാടും പടലും പിടിച്ച് ഇഴജന്തുക്കളുടെ താവളമായും പാലവും പരിസരവും മാറിയെങ്കിലും നടപടി ഉണ്ടായില്ല. തകർച്ച വന്നതോടെ ഏതാനും വർഷം മുൻപ് കോൺക്രീറ്റ് നിർമിത കൈവരി സ്ഥാപിച്ച് അധികൃതർ തടി തപ്പി. എന്നാൽ പുതിയ പാലത്തിന് ഇരുവശത്തും മാത്രമേ തൂണുകൾ ഉണ്ടാവുകയുള്ളൂ. അതിനാൽ ഗംഗയാർ തോടിന്‍റെ ഒഴുക്ക് സുഗമമാകുമെന്നും വിലയിരുത്തപ്പെടുന്നു. 18 മീറ്റർ നീളമുള്ള സ്പാൻ ഉപയോഗിച്ച് ഒറ്റ ലൈനായാണ് പാലം വരുന്നത്. ഇവിടത്തെ ഗതാഗതക്കുരുക്കും ഒഴിവാക്കാനാകും. മണ്ണുപരിശോ ധന നടക്കുന്നതിനാൽ പഴയപാലം വഴിയുള്ള കെഎസ്ആർടി സി സർവീസിന് നിയന്ത്രണം ഏർപ്പെടുത്തി. ജൂലൈ ഒന്നുവരെതൊട്ടടുത്ത പുതിയ പാലം വഴി മാത്രമേ സർവീസ് നടത്തൂവെന്നും അധികൃതർ അറിയിച്ചു.

കെഎസ്ആർടിസി റിട്ട.സ്റ്റേഷൻ മാസ്റ്റർ മരിച്ച നിലയിൽ

നെടുമങ്ങാട് : കെഎസ്ആർടിസി റിട്ട.സ്റ്റേഷൻമാസ്റ്ററെ വീട്ടിനുള്ളിൽ മരിച്ച നിലയിൽ കണ്ടെത്തി. നെടുമങ്ങാട് നെട്ടിറച്ചിറ ആസിഫ് മൻസിലിൽ അഷറഫ് (68)നെയാണ് കഴിഞ്ഞ ദിവസം പുലർച്ചെ മരിച്ച നിലയിൽ കണ്ടെത്തിയത്. ഭാര്യ മാജിദ രണ്ടു വർഷം മുന്പ് മരിച്ചതിനാൽ അഷറഫ് ഒറ്റക്കായിരുന്നു കുടുംബ വീട്ടിൽ താമസം. തൃശൂർ മെഡിക്കൽ കോളജിൽ ബിരുദാനന്തര ബിരുദ മെഡിക്കൽ വിദ്യാഥിയായ ഏക മകൻ ഡോ.ആസിഫിനൊപ്പം താമസിച്ചിരുന്ന അഷറഫ് ഒരാഴ്ച മുന്പാണ് നെട്ടിറച്ചിറയിലെ കുടുംബ വീട്ടിൽ എത്തിയത്. അഷറഫിന് ഭാര്യവീട്ടുകാരുമായി സ്വത്ത് തർക്കമുണ്ടായിരുന്നു. അഷറഫിന്‍റെ മരണത്തിൽ ദുരൂഹതയുണ്ടെന്നു ബന്ധുക്കൾ ആരോപണം ഉന്നയിച്ചു. പോസ്റ്റുമോർട്ടം റിപ്പോർട്ട് കിട്ടിയശേഷമേ മരണ കാരണത്തെ കുറിച്ചു വ്യക്തമാവുകയുള്ളുവെന്നാണ് സിഐ പറയുന്നത്. എറണാകുളം ജനറൽ ഹോസ്പിറ്റലിലെ ഡോക്ടർ പി. എം. മെഹനാസ് മരുമകൾ ആണ്.

ഇരുചക്ര വാഹനമിടിച്ച് കാൽനട യാത്രക്കാരൻ മരിച്ചു

നെടുമങ്ങാട് : റോഡ് മുറിച്ച് കടക്കുന്നതിനിടെ ഇരുചക്ര വാഹനം ഇടിച്ച് കാൽനട യാത്രക്കാരൻ മരണമടഞ്ഞു.കണ്ണംമ്പള്ളി ചെന്നാട്ടുകോണത്ത് വീട്ടിൽ ശശി (68) ആണ് മരിച്ചത്. ഉറിയാക്കോട് സിഎസ്ഐ ചർച്ചിൽ പോയിട്ട് വീട്ടിലേക്ക് മടങ്ങുന്നതിനിടെ ഉറിയാക്കോട് മഹാത്മജി ഗ്രന്ഥശാലക്ക് സമീപം ഇന്നലെ രാവിലെ 11.30 ഓടെ ആണ് അപകടം നടന്നത് മെഡിക്കൽ കോളജ് ആശുപത്രിയിൽ പ്രവേശിച്ചെങ്കിലും ജീവൻ രക്ഷിക്കാനായില്ല. ഭാര്യ: ഓമന. മക്കൾ: ഷാജി, ജോൺ.

യുവാവ് വീടിനുള്ളിൽ മരിച്ചനിലയിൽ

പൂവാർ : യുവാവിനെ വീടിനുള്ളിൽ തൂങ്ങി മരിച്ചനിലയിൽ കണ്ടെത്തി. തിരുപുറം കാഞ്ചിപുരം വീട്ടിൽ സതീശന്‍റെയും വിജയകുമാരിയുടെയും മകൻ ശരത് (24) ആണ് മരിച്ചത്. സഹോദരിയുടെ പ്രസവുമായി ബന്ധപ്പെട്ട് മാതാപിതാക്കൾ ആശുപത്രിയിൽ പോയിരുന്നതിനാൽ ശരത് വീട്ടിൽ ഒറ്റക്കായിരുന്നു. ഇന്നലെ രാവിലെ തൊട്ടടുത്ത് താമസിക്കുന്ന അമ്മയുടെ സഹോദരി കൊണ്ടുവന്ന ചായയും കുടിച്ചിരുന്നു. പത്ത് മണിയോടെ കാപ്പിയുമായെത്തിയ കുഞ്ഞമ്മയാണ് ഇയാളെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയത്. ഇവർ അറിയിച്ചതിനെ തുടർന്ന് പൂവാർ പോലീസ് എത്തി മേൽ നടപടി സ്വീകരിച്ചു. ഐടിഐ പഠന ശേഷം ശരത് ചെറിയ ജോലികൾ ചെയ്തുവരികയായിരുന്നുവെന്ന് വീട്ടുകാർപറയുന്നു. മൃതദേഹം പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടു നൽകി.

അരശു പറമ്പ് -കൊപ്പംപാണോട് റോഡ് ഉദ്ഘാടനം ചെയ്തു

നെടുമങ്ങാട്: തദ്ദേശസ്വയംഭരണ സ്ഥാപനങ്ങളിൽ ഉള്ള ഗ്രാമീണ റോഡുകളുടെ പുനർനിർമാണ പദ്ധതിയിൽ ഉൾപ്പെടുത്തി അനുവദിച്ച ഫണ്ട് ഉപയോഗിച്ച് നിർമാണ പ്രവർത്തനം ആരംഭിക്കുന്ന നെടുമങ്ങാട് നഗരസഭയിലെ അരശു പറന്പ്- കൊപ്പം പാണോട് റോഡിന്‍റെ ഉദ്ഘാടനം ഭക്ഷ്യ സിവിൽ സപ്ലൈസ് മന്ത്രി ജി. ആർ. അനിൽ നിർവഹിച്ചു. നഗരസഭ ചെയർപേഴ്സൺ സി. എസ്. ശ്രീജ അധ്യക്ഷത വഹിച്ചു. വാർഡ് കൗൺസിലർ എസ്. അജിത , സ്റ്റാൻഡിങ് കമ്മിറ്റി ചെയർമാൻ പി. ഹരി കേശൻ നായർ , കൗൺസിലർമാരായ ശ്യാമള, പുങ്കു മൂട് അജി, മുൻ കൗൺസിലർ പി. ജി .പ്രേമചന്ദ്രൻ, നജീ പത്താംകല്ല്, രതീഷ് എന്നിവർ പ്രസംഗിച്ചു.

ക്രൈസ്റ്റ് നഗര്‍ സെന്‍ട്രല്‍ സ്‌കൂളില്‍ വിവിധ ക്ലബുകളുടെ ഉദ്ഘാടനം

തിരുവനന്തപുരം: ക്രൈസ്റ്റ് നഗര്‍ സെന്‍ട്രല്‍ സ്‌കൂളിലെ 2025 അധ്യയന വര്‍ഷത്തിലെ വിവിധ ക്ലബുകളുടെയും സാഹിത്യോത്സവത്തിന്‍റെയും ഉദ്ഘാടനം റേഡിയോ ജോക്കികളായ ചിഞ്ചു, കാര്‍ത്തിക് എന്നിവര്‍ നിര്‍വഹിച്ചു. പ്രിന്‍സിപ്പല്‍ ഫാ. സേവ്യര്‍ അമ്പാട്ട് സിഎംഐയുടെ അധ്യക്ഷതയില്‍ നടന്ന ചടങ്ങില്‍ റേഡിയോ ക്ലബിന്‍റെയും സാഹിത്യോത്സവത്തിന്‍റെയും ലോഗോകള്‍ പ്രകാശനം ചെയ്തു. ആര്‍ട്‌സ് ക്ലബ് സെക്രട്ടറി ഹന്ന നിര്‍മല്‍ ഫ്രാന്‍സിസ് ,ഡോ. ഹണി കുരുവിള, എല്‍.പ്രിയങ്ക, അനു ഉദയകുമാര്‍ തുടങ്ങിയവര്‍ പങ്കെടുത്തു.

കിടപ്പുരോഗികളുടെ പരിചരണത്തിന് പുതിയ യൂണിറ്റ് തയാർ: സി.എസ്.ശ്രീജ

നെടുമങ്ങാട് : നഗരസഭയിൽ കിടപ്പുരോഗികളുടെ പരിചരണത്തിന് ഒരു പാലിയേറ്റിവ് യൂണിറ്റ് കൂടി സജ്ജമായതായി നഗരസഭ ചെയർപേഴ്‌സൺ സി.എസ്.ശ്രീജ പറഞ്ഞു. നിലവിൽ ഒരു യൂണിറ്റാണ് പ്രവർത്തിക്കുന്നത്. വാർഡുകളുടെ എണ്ണം വർദ്ധിച്ചതിന്‍റെ പശ്ചാത്തലത്തിലാണ് സന്നദ്ധ പ്രവർത്തകരുടെയും സ്വകാര്യ പാലിയേറ്റീവ് സംഘടനകളുടെയും സഹകരണത്തോടെ പുതുതായി യൂണിറ്റ് ആരംഭിക്കാനുള്ള തീരുമാനം. മാരക രോഗബാധിതർക്ക് ചികിത്സാധനസഹായം വിതരണം ചെയ്യുന്നുണ്ടെന്നും ചെയർപേഴ്‌സൺ അറിയിച്ചു.അരശുപറമ്പ് കർഷക സഹായി ഗ്രന്ഥശാല ഹാളിൽ സംഘടിപ്പിച്ച ആരോഗ്യ സുരക്ഷാ സെമിനാറും സൗജന്യ മെഡിക്കൽ ക്യാമ്പും ഉദ്‌ഘാടനം ചെയ്യുകയായിരുന്നു അവർ. ഗ്രന്ഥശാല സെക്രട്ടറി പി.ജി.പ്രേമചന്ദ്രൻ അദ്ധ്യക്ഷത വഹിച്ചു. നെടുമങ്ങാട്ജില്ലാ ആശുപത്രി സൂപ്രണ്ട് ഡോ.രേഖ എം.രവീന്ദ്രൻ ക്ലാസെടുത്തു. വിശ്വ ഹോമിയോസ് ഹോസ്പിറ്റലിന്റെ നേതൃത്വത്തിൽ സൗജന്യ മെഡിക്കൽ പരിശോധനകളും മരുന്ന് വിതരണവും നടന്നു.

പാറശാല സെന്‍റ് പീറ്റേഴ്‌സ് ദേവാലയ തിരുനാളിനു കൊടിയേറി

പാറശാല: സെന്‍റ് പീറ്റേഴ്‌സ് ഫെറോന ദേവാലയ ഇടവകയുടെ സ്വര്‍ഗീയ മദ്ധ്യസ്ഥനായ വിശുദ്ധ പത്രോസിന്‍റെ തിരുനാള്‍ മഹോത്സവത്തിന് കൊടികയറി. വികാരി ഫാ.ജോസഫ് സേവ്യര്‍ തിരുനാള്‍ കൊടിയേറ്റി. റവ. മോണ്‍ റൂഫസ് പയസ്‌ലിന്‍ മുഖ്യ കാര്‍മ്മികത്വം വഹിച്ചു. റവ.ഫാ. പി.ഒ.വിശാന്ത് വചന പ്രഘോഷണം നടത്തി. കൗണ്‍സില്‍ സെക്രട്ടറി ടി.ഡൊമനിക്, വൈസ് പ്രസിഡന്‍റ് ഷിബു, ട്രഷറര്‍ ദേവരാജ് തുടങ്ങിയവര്‍ പങ്കെടുത്തു. തിരുനാള്‍ മഹത്സവം ജൂലൈ ആറിനു സമാപനമാകും.

ക്രൈസ്റ്റ് നഗർ കോളജിൽ അന്താരാഷ്‌ട്ര ലഹരി വിരുദ്ധ ദിനം ആചരിച്ചു

മാറനല്ലൂർ: തിരുവനന്തപുരം റൂറൽ ജില്ലാ പോലീസിന്‍റെ നേതൃത്വത്തിൽ മാറനല്ലൂർ ക്രൈസ്റ്റ് നഗർ കോളജിൽ അന്താരാഷ്‌ട്ര ലഹരി വിരുദ്ധ ദിനം ആചരിച്ചു.തിരുവനന്തപുരം റേഞ്ച് ഡിഐജി അജിത ബീഗം ഉദ്ഘാടനം ചെയ്തു. തുടർന്ന് വിദ്യാർഥികൾ ലഹരി വിരുദ്ധ പ്രതിജ്ഞയും എടുത്തു. നാർക്കോട്ടിക് സെൽ ഡിവൈഎസ്പി കെ.പ്രദീപ് അധ്യക്ഷത വഹിച്ചു. കാട്ടാക്കട ഡിവൈഎസ്പി കെ.റാഫി, കോളജ് മാനേജർ ഫാ. സിറിയക്ക് മഠത്തിൽ സിഎംഐ, പ്രിൻസിപ്പൽ ഡോ. ജോളി ജേക്കബ്, കേരള പോലീസ് അസോസിയേഷൻ തിരുവനന്തപുരം റൂറൽ സെക്രട്ടറി ആർ. കെ. ജ്യോതിഷ്, മാറനല്ലൂർ ഐഎസ്എച്ച് ഒ വി.ഷിബു എന്നിവർ പ്രസംഗിച്ചു. പരിപാടിയുടെ ഭാഗമായി കൊല്ലം ഗവ. മെഡിക്കൽ കോളജ് സൈക്കോളജി വിഭാഗം മേധാവി ഡോ. മോഹൻ റോയിയുടെ നേതൃത്വത്തിൽ ബോധവത്കരണ ക്ലാസും സംഘടിപ്പിച്ചു.

ദേശീയ ജൂണിയർ ബോക്സിംഗിൽ മെഡൽ നേട്ടവുമായി അജയ് കൃഷ്ണ

നെടുമങ്ങാട്: ദേശീയ ജൂണിയർ ബോക്സിംഗിൽ വെങ്കലമെഡൽ നേടി എ.എസ്.അജയ് കൃഷ്ണ. ഹരിയാനയിൽ നടന്ന ദേശീയ 80കിലോഗ്രാം ജൂണിയർ ബോക്സിംഗ് ചാമ്പ്യൻ ഷിപ്പിലാണ് ആര്യനാട് സ്വദേശിയായ എ.എസ്.അജയ്കൃഷ്ണ നേട്ടം കൈവരിച്ചത്. ദേശീയ ചാമ്പ്യൻഷിപ്പിന് മുന്നോടിയായി നടന്ന സംസ്ഥാന ചാമ്പ്യൻ ഷിപ്പിലും അജയ്കൃഷ്ണ ഒന്നാം സ്ഥാനം നേടിയിരുന്നു.നാല് വ‌ഷത്തെ കഠിന പ്രയത്നമാണ് അജയ് കൃഷ്ണയ്ക്ക് നേട്ടങ്ങൾ കൈവരാൻ അവസരമൊരുക്കിയത്.മികച്ച പ്രകടനത്തിന്‍റെ അടിസ്ഥാനത്തിൽ ഇപ്പോൾ ഇന്ത്യൻ ടീമിൽ ഇടംനേടാനും കഴിഞ്ഞു. എട്ടാംക്ലാസ് മുതലാണ് അജയ് കൃഷ്ണ ബോക്സിംഗിൽ സമ്മാനങ്ങൾ വാങ്ങി തുടങ്ങിയത്.പത്താം ക്ലാസിനിടയിൽ മൂന്ന് പ്രാവശ്യം സ്കൂൾ തലത്തിൽ ഒന്നാം സ്ഥാനം നേടാനായി. പത്താം ക്ലാസ് വരെ അരുവിക്കര മൈലം ജിവി രാജ സ്കൂളിലായുരുന്നു പഠനം. ഇവിടത്തെ സ്പോർട്ട്സ് കൗൺസിലിന്‍റെ കോച്ചായിരുന്ന മനോജാണ് അജയ് കൃഷ്ണയെ ഇപ്പോൾ നാഷണൽ ലവൽവരെ എത്തിക്കാൻ പ്രേരക ശക്തിയായി മാറിയത്. ആര്യനാട് പോസ്റ്റ് ഓഫീസ് ജംഗ്ഷനിൽ തങ്കംവിലാസത്തിൽ പത്മനാഭപുരം ക്ഷേത്രത്തിലെ സുരക്ഷാ വിഭാഗത്തിലെ പോലീസ് സബ് ഇൻസ്പെക്ടർ അരുൺകുമാറിന്‍റെയും ശിവപ്രിയയുടേയും മകനാണ്. മാർ ഇവാനിയോസ് കോളജിലെ ബിഎ രണ്ടാം വർഷ വിദ്യാർഥിനി അരുണിമ സഹോദരിയാണ്. അജയ് കൃഷ്ണയ്ക്ക് ആര്യനാട്ട് സ്വീകരണ മൊരുക്കാനുള്ള തയാറെടുപ്പിലാണ് പ്രദേശവാസികൾ.

എംഎസ്എംഇ സംരംഭകര്‍ക്കായി ശില്‍പശാല സംഘടിപ്പിച്ചു

തിരുവനന്തപുരം: ബിസിനസ്, ഫിനാന്‍ഷ്യല്‍‌, കോസ്റ്റ് മാനേജ്‌മെന്‍റ് വിഷയത്തില്‍ എംഎസ്എംഇ മേഖലയിലെ സംരംഭകര്‍ക്കായി "പ്രോഫിറ്റ് മാസ്റ്ററി: കോസ്റ്റ് ടു പ്രോഫിറ്റ്' എന്ന പേരിൽ തിരുവനന്തപുരം റെസിഡന്‍സി ടവറില്‍ ശിൽപശാല സംഘടിപ്പിച്ചു. കേരള സ്റ്റേറ്റ് വിമന്‍സ് ഡെവലപ്‌മെന്‍റ് കോര്‍പ്പറേഷന്‍ ലിമിറ്റഡ് മാനേജിംഗ് ഡയറക്ടര്‍ വി.സി. ബിന്ദു ഉദ്ഘാടനം ചെയ്തു. ജില്ലാ വ്യവസായ കേന്ദ്രം ജനറല്‍ മാനേജര്‍ വി.എസ്. ശരത് , ഐസിഎംഎഐ വൈസ് പ്രസിഡന്‍റ് ശ്രീനിവാസ പ്രസാദ്, എംഎസ്എം ഇ ആൻഡ് സ്റ്റാര്‍ട്ടപ്പ് പ്രമോഷന്‍ ബോര്‍ഡ് ചെയര്‍മാന്‍ സുരേഷ് ആര്‍. ഗുഞ്ചലി, ഐസിഎംഎഐ തിരുവനന്തപുരം ചാപ്റ്റര്‍ ചെയര്‍മാന്‍ പ്രണവ് ജയന്‍ എന്നിവര്‍ പങ്കെടുത്തു.

നെടുമങ്ങാട് സത്രംമുക്കിൽ വെള്ളക്കെട്ട് ദുരിതം

നെടുമങ്ങാട്: ഏറ്റവും ജനത്തിരക്കേറിയ നെടുമങ്ങാട് ടൗണിലെ സത്രം മൂക്കിലെ വെള്ളക്കെട്ട് പൊതുജനങ്ങൾക്ക് ദുരിതമായി മാറുന്നു. സത്രം ജംഗ്ഷനിൽ റോഡിന്‍റെ അറ്റകുറ്റപ്പണികൾ നടത്തിയതോടെ റോഡ് ഉയർന്ന് റോഡരികിൽ സ്ഥിരമായി വെള്ളക്കെട്ട് രൂപപ്പെടുകയായിരുന്നു. ചെറിയ മഴ പെയ്താൽ സത്രം മുക്ക് കുളം ആയി മാറും. കേരള പുരാവസ്തു വകുപ്പിന്‍റെ കോയിക്കൽ കൊട്ടാരത്തിലേക്കുള്ള പ്രധാന കവാടത്തിലാണ് വെള്ളക്കെട്ട്. ഇതിനു പുറമേ കോയിക്കൽ ശ്രീ മഹാദേവ ക്ഷേത്രത്തിൽ നിത്യേന നൂറുകണക്കിനാളുകൾ ചെളി വെള്ളം ചവിട്ടി കൊണ്ടാണ് ക്ഷേത്ര ദർശനം നടത്തുന്നത്. സ്വദേശികളും വിദേശികളും ഉൾപ്പെടെ നിരവധി ടൂറിസ്റ്റുകൾ നാണയ ശേഖര മ്യൂസിയം കാണാൻ കോയിക്കൽ കൊട്ടാരത്തിൽ വരുന്നതും ഇതുവഴിയാണ്. കെഎസ്ഇബി അസിസ്റ്റൻറ് എക്സിക്യൂട്ടീവ് എൻജിനീയറുടെ ഓഫീസിലേക്കും വെള്ളക്കെട്ട് താണ്ടിയാണ് എത്തേണ്ടത്. കെഎസ്ആർടിസി ബസ് നിർത്തുന്ന സ്റ്റോപ്പ് വെള്ളക്കെട്ടിനു സമീപത്താണ്. ബസിൽ നിന്ന് ഇറങ്ങുന്ന യാത്രക്കാർ കാലു വയ്ക്കുന്നത് ഇപ്പോൾ വെള്ളത്തിലേക്കാണ്. വെള്ളക്കെട്ട് പരിഹരിക്കാൻ യാതൊരു നടപടിയും നഗരസഭയുടെ ഭാഗത്തുനിന്നും ഉണ്ടായിട്ടില്ല.

സ്കൂബ ടീമിന്‍റെ തെരച്ചിലിനെ സഹായിച്ചത് യുവാവ് മൊബൈലില്‍ പകർത്തിയ ചിത്രം

പേരൂര്‍ക്കട: വിളപ്പില്‍ശാല സ്വദേശി സുനില്‍കുമാറിനായുള്ള തിരുവനന്തപുരം സ്‌കൂബ ടീമിന്‍റെ തെരച്ചില്‍ എളുപ്പമാക്കിയത് യുവാവ് മൊബൈലില്‍ പകര്‍ത്തിയചിത്രം. പേയാട് സ്വദേശിയായ യുവാവാണ് ചിത്രം പകര്‍ത്തിയത്. യാദൃശ്ചികമായി കുലശേഖരം പാലത്തിലൂടെ ഇയാള്‍ പോയപ്പോഴാണ് ആറ്റിലൂടെ ഒരാളുടെ മൃതദേഹം ഒഴുകിപ്പോകുന്നതായി ശ്രദ്ധയിൽപ്പെട്ടത്. ഉടന്‍തന്നെ മൊബൈലില്‍ ചിത്രം പകര്‍ത്തി വിളപ്പില്‍ശാല പോലീസിന് കൈമാറി. പോലീസ് ഫയര്‍ഫോഴ്‌സിന് ചിത്രം കൈമാറി. ദൃശ്യം വ്യക്തമായിരുന്നില്ലെങ്കിലും പാലം കടന്ന് മൃതദേഹം പോയി എന്ന് ഉറപ്പിക്കാനായതും കാവടിത്തലയ്ക്കല്‍ ഭാഗം ഒഴിവാക്കി കുലശേഖരം പാലം മുതല്‍ തിരച്ചില്‍ ആരംഭിച്ചതും യുവാവ് നല്‍കിയ വിവരത്തിന്‍റെയും ഫോട്ടോയുടെയും അടിസ്ഥാനത്തിലായിരുന്നു. പാലത്തിനടുത്തുനിന്ന് ഒരുകിലോമീറ്റര്‍ അകലെയായി പാറക്കെട്ടില്‍ കുടുങ്ങിയ നിലയിലാണ് മൃതദേഹം സ്‌കൂബടീം കണ്ടെത്തിയത്. വെള്ളിയാഴ്ച അഞ്ച് മണിക്കൂറും ഇന്നലെ ഒരുമണിക്കൂറുമായിരുന്നു സ്‌കൂബ ടീമിന്‍റെ തെരച്ചില്‍.

സൊലസ് ആസ്ഥാനമന്ദിരവും ഷോർട്ട് സ്റ്റേ ഹോമും ഉദ്ഘാടനം ചെയ്തു

തിരുവനന്തപുരം: 18 വയസിനു താഴെയുള്ള ദീർഘകാല രോഗമുള്ള കുട്ടികളെയും അവരുടെ കുടുംബങ്ങളെയും സംരക്ഷിക്കാനും ചികിത്സ - ഭക്ഷണ - താമസ സൗകര്യം ഒരുക്കാനും വേണ്ടി പ്രവർത്തിക്കുന്ന സന്നദ്ധ സംഘടനയായ സൊലസിന്‍റെ തിരുവനന്തപുരത്തെ ആസ്ഥാന മന്ദിരവും ഷോർട്ട് സ്റ്റേ ഹോമും കുമാരപുരത്ത് മന്ത്രി കെ.രാജൻ ഉദഘാടനം ചെയ്തു. തിരുവനന്തപുരം ആർസിസി, ശ്രീചിത്തിര തിരുനാൾ, മെഡിക്കൽ കോളജ് തുടങ്ങിയ ആശുപത്രികളിൽ ചികിത്സയിലിരിക്കുന കുട്ടികൾക്കും മാതാപിതാക്കൾക്കും ചികിത്സാ കാലയളവിൽ സൗജന്യമായി താമസവും ഭക്ഷണവും മരുന്നും യാത്രാ സൗകര്യവും ഒരുക്കുന്നതിനാണ് ഷോർട്ട് സ്റ്റേ ഹോം ലക്ഷ്യമിടുന്നത്. ഒരേ സമയം 25 കുടുംബങ്ങൾക്ക് ഇവിടെ താമസ സൗകര്യം ഉണ്ടാകും. സൊലസ് ഫൗണ്ടർ ഷീബ അമീറിന്‍റെ അധ്യക്ഷതയിൽ നടന്ന ചടങ്ങിൽ മുൻ ചീഫ് സെക്രട്ടറി കെ.ജയകുമാർ മുഖ്യാതിഥിയായിരുന്നു. മുതിർന്ന മാധ്യമ പ്രവർത്തക ആർ. പാർവതി ദേവി, പ്രസ് ക്ലബ് സെക്രട്ടറി എം.രാധാകൃഷ്ണൻ, സൊലസ് വൈസ് പ്രസിഡന്‍റ് ഇ.എം.ദിവാകരൻ, ജില്ലാ കൺവീനർ രാജഗോപാലൻ കെ.പി, മിനി ആർ. നായർ, ഷീല രാഹുലൻ എന്നിവർ പ്രസംഗിച്ചു.

നിരവധി കേസുകളില്‍ പ്രതിയായ കരാട്ടെ ജോണി പിടിയില്‍

നെയ്യാറ്റിന്‍കര: പോലീസിനെ ആക്രമിച്ചതുള്‍പ്പെടെ 25 ഓളം കേസുകളില്‍ പ്രതിയായ കരാട്ടേ ജോണിയെ അറസ്റ്റ് ചെയ്തു. ജോണിയുടെ വീട്ടില്‍ നടത്തിയ റെയ്ഡില്‍ വിദേശനിര്‍മിത മദ്യം, ചാരായം, ബിയര്‍, വൈന്‍ എന്നിവയും കണ്ടെടുത്തു. പൂവാര്‍ എരിക്കലുവിള സ്വദേശിയായ ജോണി (45) യുടെ കരിങ്കുളം പൊന്നുനട തെക്കേക്കര വീട്ടിലാണ് കോടതിയില്‍ നിന്നുള്ള സെര്‍ച്ച് വാറണ്ട് പ്രകാരം പോലീസ് റെയ്ഡ് നടത്തിയത്. വ്യാജ പാസ്പോര്‍ട്ട് ചമച്ചതിനും കലാപം ഉണ്ടാക്കിയതിനുമടക്കം നിരവധി കേസുകള്‍ ജോണിയുടെ പേരിലുണ്ടെന്ന് പോലീസ് പറഞ്ഞു. ജോണിക്ക് നാല് ആഡംബര വീടുകളുണ്ടെന്നും ഇവയ്ക്കെല്ലാം മതിലുകളുണ്ടെന്നും എക്സൈസിനോ പോലീസിനോ പെട്ടെന്ന് എത്താനാവാത്ത വിധത്തില്‍ റിമോട്ട് സംവിധാനം വീടുകളിലുണ്ടെന്നും നെയ്യാറ്റിന്‍കര ഡിവൈഎസ്പി പറഞ്ഞു.

സർക്കാർ സ്ഥാപനങ്ങൾക്ക് വേസ്റ്റ്ബിൻ വിതരണം ചെയ്യുന്ന പദ്ധതി ഉദ്ഘാടനം

നെടുമങ്ങാട്: ഉഴമലക്കൽ പഞ്ചായത്തിനെ സമ്പൂർണ മാലിന്യമുക്തമാക്കുന്നതിന്‍റെ ഭാഗമായി പ്രദേശത്തെ സർക്കാർ സ്ഥാപനങ്ങൾക്ക് വേസ്റ്റ്ബിന്നുകൾ വിതരണം ചെയ്യുന്ന പദ്ധതി പഞ്ചായത്ത് പ്രസിഡന്‍റ് ജെ.ലളിത അയ്യപ്പൻകുഴി അങ്കണവാടിക്ക് വേസ്റ്റ്ബിന്നു നൽകി ഉദ്ഘാടനം ചെയ്തു. വാർഡ് മെമ്പർ മഞ്ജു, അസിസ്റ്റന്‍റ് സെക്രട്ടറി സനൽകുമാർ, ജീവനക്കാർ തുടങ്ങിയവർ പങ്കെടുത്തു. പഞ്ചായത്തിലാകെ 56 സ്ഥാപനങ്ങൾക്കാണ് വേസ്റ്റ് ബിനുകൾ വിതരണം ചെയ്യുന്നത്.

ക്രിമിനൽ കേസ് പ്രതി വാളുമായി പിടിയിൽ

മെഡിക്കൽ കോളജ്: നിരവധി ക്രിമിനൽ കേസുകളിലെ പ്രതിയെ വാളുമായി മെഡിക്കൽ കോളജ് പോലീസ് പിടികൂടി. ഇടവക്കോട് മാവർത്തലക്കോണം സജി ഭവനിൽ ജിത്ത് (28) ആണ് പിടിയിലായത്. വെള്ളിയാഴ്ച വൈകുന്നേരം മെഡിക്കൽ കോളജിൽ മെട്രോ ലാബിനു സമീപം ഒരു ഓട്ടോറിക്ഷയിൽ വന്നിറങ്ങുകയായിരുന്നു ജിത്തുവും പ്രായപൂർത്തിയാകാത്ത ഒരു ആൺകുട്ടിയും. ജിത്തിന്‍റെ കൈവശം വാളും ഒരു കത്തിയും കണ്ടെത്തിയതിനെ തുടർന്ന് സമീപത്തുണ്ടായിരുന്നവർ പോലീസിൽ വിവരമറിയിക്കുകയായിരുന്നു. ഉള്ളൂർ ഭാഗത്തേക്ക് ഓട്ടോയിൽ വന്നിറങ്ങിയ പ്രതിയുടെ ലക്ഷ്യം ആരെയെങ്കിലും ആക്രമിക്കുകയാണോ എന്ന് വ്യക്തമായിട്ടില്ല. മെഡിക്കൽ കോളജ് സിഐ ബി .എം ഷാഫിയുടെ നേതൃത്വത്തിലുള്ള സംഘം പിടികൂടിയ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

ക്ഷീര കര്‍ഷകനെ അക്രമിച്ച് പണം തട്ടിയ നാലുപേര്‍ അറസ്റ്റില്‍

വെഞ്ഞാറമൂട്: ക്ഷീര കര്‍ഷകനെ അക്രമിക്കുകയും ഭീഷണിപ്പെടുത്തി പണം തട്ടിയെടുക്കുകയും ചെയ്ത സംഭവത്തില്‍ നാല് പേര്‍ അറസ്റ്റില്‍. വെമ്പായം കൊഞ്ചിറ വെങ്കിട്ട വിളയില്‍ ആലിയായ് പുതുവല്‍ വിള പുത്തന്‍ വീട്ടില്‍ അജിത് കുമാര്‍(37), വെമ്പായം കൊഞ്ചിറ കൈതയില്‍ അഹ്‌ന മന്‍സിലില്‍ അസീം(42) കോലിയക്കോട് ആലിയാട് പുതുവല്‍വിള പുത്തന്‍ വീട്ടില്‍ സുധീഷ്(25) വാമനപുരം വാര്യംകോണം വിഷ്ണു വിലാസത്തില്‍ കിച്ചു (31) എന്നിവരാണ് അറസ്റ്റിലായത്. വലിയകട്ടയ്ക്കാല്‍ മുരൂര്‍ക്കോണം രോഹിണിയില്‍ അനില്‍ കുമാറിനാണ് മര്‍ദ്ദനമേറ്റതും പണം നഷ്ടമായതും. ഇക്കഴിഞ്ഞ ബുധനാഴ്ച രാത്രി വീടിന് അല്പം അകലെയായി അനില്‍ കുമാര്‍ നടത്തുന്ന ആമ്പാടി ഡയറി ഫാമില്‍വച്ചായിരുന്നു സംഭവം. മൊബൈല്‍ ഫോണ്‍ പിടിച്ചുവാങ്ങി അക്കൗണ്ടിലെ 16,000 രൂപ മറ്റൊരു സുഹൃത്തിന്‍റെ അക്കൗണ്ടിലേക്ക് ഗൂഗിള്‍ പേ വഴി അയക്കുകയുമായിരുന്നു. കോടതിയില്‍ ഹാജരാക്കിയ പ്രതികളെ റിമാൻഡ് ചെയ്തു.

അപകട ഭീഷണിയിൽ നെയ്യാർ ചാനൽ ബണ്ട് റോഡ്

കള്ളിക്കാട്: നെയ്യാർ ചാനൽ ബണ്ട് റോഡ് തകർന്ന് അപകട ഭീഷണിയിലായി. കള്ളിക്കാട് ഗ്രാമ പഞ്ചായത്തിലെ തുണ്ടുനട പെരുംകുളങ്ങര മരക്കുന്നം റോഡാണ് തകർച്ചയുടെ വക്കിലായത്. കള്ളിക്കാട്ടു നിന്നും നെയ്യാർഡാം ചുറ്റാതെ പോകാൻ കഴിയുന്ന പ്രധാന റോഡാണിത്. റോഡ് ചെന്നു ചേരുന്നത് നെയ്യാർഡാം - തുറന്നജയിൽ റോഡിലാണ്. അതാണ് വർഷങ്ങളായി തകർന്നു കിടക്കുന്നത്. റോഡിന്‍റെ മിക്ക ഭാഗവും വർഷങ്ങളായി തകർന്നു കിടക്കുകയാണ്. മഴ കൂടി വന്നതോടെ തകർച്ച പൂർണ്ണമായി. ഇപ്പോൾ വാഹനഗതാഗതവും ഏതാണ്ട് നിലച്ചമട്ടാണ്. പഞ്ചായത്തു വക റോഡാണിത്. ഇതിനു നെയ്യാർ ഇറിഗേഷൻ പദ്ധതി പ്രകാരം ഫണ്ട് അനുവദിക്കാറുമുണ്ട്. ഡാം നിർമ്മാണത്തിന് പിന്നാലെയാണ് നാട്ടുകാരുടെ യാത്രാസൗകര്യത്തിന് റോഡും പാലും അവർ തന്നെ നിർമിച്ചത്. പിന്നീട് റോഡിന്‍റെ അവകാശം പഞ്ചായത്തിന് ഏൽപ്പിച്ച് അവർ മുങ്ങി. അതോടെ റോഡിന്‍റെ അവസ്ഥ ദയനീയമായി. പല തവണ നാട്ടുകാർ റോഡിന്‍റെ ആവശ്യത്തിനായി ബന്ധപ്പെട്ടവരെ സമീപിച്ചെങ്കിലും ഒരു നടപടിയുമില്ല.

ഭൂമിക്കൊരു ഹൃദയക്കാഴ്ച്ച

തിരുവനന്തപുരം: ലോക പരിസ്ഥിതി ദിനത്തിന്‍റെ ഭാഗമായി പ്രശസ്ത കലാ വിദഗ്ധനും ചിത്രകാരനുമായ ജോര്‍ജ് ഫെര്‍ണാസ് നേതൃത്വം നല്‍കുന്ന പ്രദര്‍ശനത്തിനു തുടക്കമായി. പച്ചോല കൊണ്ട് തീര്‍ത്ത തുമ്പി, പുല്‍ച്ചാടി, ആട്, പാമ്പ്, തൊപ്പി. തുണികൊണ്ടുള്ള പഴ്സുകള്‍, തടികൊണ്ടുള്ള ചീപ്പ്, കളിപ്പാട്ടങ്ങള്‍, ഓലകൊണ്ടുള്ള സ്ട്രോ, തടി വിശറി, വീട്ടില്‍ ഉണ്ടാക്കുന്ന കണ്‍മഷി അങ്ങനെ പ്രകൃതി സൗഹൃദക്കാഴ്ചയുടെ ഒരു വിസ്മയ ലോകംതന്നെയാണ് മ്യൂസിയം ഓഡിറ്റോറിയത്തില്‍ ഫ്ളോറ ഇന്‍സ്റ്റിറ്റ്യൂട്ട് ഓഫ് ആര്‍ട്സ് ആന്‍ഡ് ക്രാഫ്റ്റ്സ് ഒരുക്കിയിരിക്കുന്നത്. ’നോ വെയര്‍ ലൈക്ക് എര്‍ത്ത്, ഹെല്‍പ്പ് മദര്‍ എര്‍ത്ത് ത്രൈവ്’ എന്ന് പേരു നല്‍കിയിരിക്കുന്ന പ്രദര്‍ശനം അക്ഷരാര്‍ഥത്തില്‍ പ്ലാസ്റ്റിക്കിലും രാസമാലിന്യങ്ങളിലും ആണ്ടുപോകുന്ന ഭൂമിയെ രക്ഷിക്കുവാനുള്ള ഒരു ചുവടു വയ്പ്പാണ്. പ്രകൃതിക്കു ഏറെ വിനാശകരമായ പ്ലാസ്റ്റിക് കൊണ്ടുള്ള നിത്യോപയോഗ വസ്തുക്കള്‍ക്കു പകരം മുള, തുണി, മരം തുടങ്ങിയവകൊണ്ട് തീര്‍ത്ത വസ്തുക്കളുടെ ശേഖരമാണ് വീണ മരുത്തൂര്‍ എന്ന പ്രകൃതി സ്നേഹി കാഴ്ച്ചവയ്ക്കുന്നത്. സന്ധ്യാ ലക്ഷ്മി, ജോണ്‍ ബേബി, സാബു ജോൺ , സന്തോഷ്, അനൂപ് തുടങ്ങിയവരുടെ പ്രദർശനവും ശ്രദ്ധേയമാണ്. പ്രദര്‍ശനത്തിന്‍റെ ഭാഗമായി ഇന്നലെ വിദ്യാര്‍ഥികള്‍ക്കുള്ള പെയിന്‍റിംഗ് മത്സരം നടന്നു. ഇന്ന് വൈകുന്നേരം 4.30ന് സമാപിക്കും.

ആശമാരുടേത് നീതിക്കായുള്ള സമരം: ആര്യാടന്‍ ഷൗക്കത്ത് എംഎല്‍എ

തിരുവനന്തപുരം: നീതിക്കു വേണ്ടിയുള്ള സമരമാണ് ആശ പ്രവര്‍ത്തകര്‍ നടത്തുന്നതെന്നു ആര്യടന്‍ ഷൗക്കത്ത് എംഎല്‍എ. ആശ സമരത്തിനു പിന്തുണ അര്‍പ്പിച്ച് സെക്രട്ടേറിയറ്റിനു മുന്നിലെ സമരപന്തല്‍ സന്ദര്‍ശിച്ച ശേഷം മാധ്യമപ്രവര്‍ത്തകരോടു സംസാരിക്കുകയായിരുന്നു അദ്ദേഹം. ഇവരുടെ മാനുഷിക പ്രശ്‌നങ്ങള്‍ സഭയ്ക്കകത്തും പുറത്തും ഉന്നയിക്കാന്‍ തനിക്ക് കിട്ടുന്ന ഏതവസരവും വിനിയോഗിക്കും. പഞ്ചായത്ത് പ്രസിഡന്‍റും നഗരസഭാ ചെയര്‍മാനുമായിരുന്നതിനാല്‍ ആശ വോളന്‍റിയര്‍മാരുടെ പ്രധാന്യം നന്നായറിയാം. കോവിഡ് കാലത്ത് നടത്തിയ സേവനത്തിന് നല്ലവാക്കിലുള്ള അഭിനന്ദനം മാത്രം പോര. മാന്യമായി ജീവിക്കാനുള്ള വേതനം കൂടി നല്‍കണം. 24 മണിക്കൂറും നാടിനു വേണ്ടി ജോലി ചെയ്യുന്ന ആശ വർക്കര്‍മാര്‍ക്ക് ജയിലില്‍ കുറ്റവാളികള്‍ക്ക് ലഭിക്കുന്ന വേതനം പോലും ലഭിക്കുന്നില്ല. ആശ സമരത്തെ സര്‍ക്കാര്‍ അവഹേളിക്കുകയും അപമാനിക്കുകയുമാണ്. ആശ വര്‍ക്കര്‍മാരുടെ പ്രശ്‌നം പരഹരിക്കുന്ന സര്‍ക്കാര്‍ അധികാരത്തില്‍ വരുമെന്നും ഷൗക്കത്ത് പറഞ്ഞു. ആശ ഹെല്‍ത്ത് വര്‍ക്കേഴ്‌സ് അസോസിയേഷന്‍ സംസ്ഥാന വൈസ് പ്രസിഡന്‍റ് എസ്. മിനിയെ ഷാള്‍ അണിയിച്ച് ആര്യാടന്‍ ഷൗക്കത്ത് സമരത്തിന് ഐക്യദാര്‍ഡ്യം പ്രഖ്യാപിച്ചു.

വിഴിഞ്ഞത്ത് കണ്ടെയ്നറിൽ നിന്ന് പുക ഉയർന്നത് പരിഭ്രാന്തി പടർത്തി

വിഴിഞ്ഞം: വിഴിഞ്ഞം അന്താരാഷ്‌ട്ര തുറമുഖത്ത് യാർഡിൽ സൂക്ഷിച്ചിരുന്ന കണ്ടെയ്നറിൽ നിന്ന് പുക ഉയർന്നു. നൂറ് കണക്കിന് കണ്ടെയ്നർ അടുക്കിയിരുന്ന സ്ഥലത്ത് നിന്ന് പുക ഉയർന്നത് ഏറെ നേരംആശങ്കക്കിടയാക്കി. വിഴിഞ്ഞത്ത് നിന്ന് രണ്ട് യൂണിറ്റ് ഫയർ എൻജിൻ എത്തി കണ്ടെയ്നർ തണുപ്പിച്ച് അപകടം ഒഴിവാക്കി. സുരക്ഷാ മേഖലയിലേക്ക് മാറ്റിയ കണ്ടെയ്നർ എംഎസ്‌സി കമ്പനി അധികൃതർ എത്തി സീൽ ചെയ്ത് കൊണ്ട് പോകുമെന്ന് ബന്ധപ്പെട്ടവർ അറിയിച്ചു. ഇന്നലെ പുലർച്ചെ നാലോടെ എൻജിനിയറിംഗ് വിഭാഗത്തിന് സമീപം ഉണ്ടായിരുന്ന ഒരു കണ്ടെയ്നറിൽ നിന്നാണ് പുക ഉയർന്നത്. തുറമുഖത്തിനുള്ളിൽ സ്ഥിരമായി ഉണ്ടായിരുന്ന വിഴിഞ്ഞം ഫയർഫോഴ്സിന്‍റെ ഒരു യൂണിറ്റ് നടത്തിയ ശ്രമം വിജയം കാണാതെ വന്നതോടെ ഫയർ സ്റ്റേഷന്‍റെ കൂടുതൽ സഹായം തേടെണ്ടി വന്നു അധികൃതർക്ക്. പുലർച്ചെ സൈറൺ മുഴക്കി തുറമുഖത്തിനുള്ളിലേക്ക് ഫയർ എൻജിൻപാഞ്ഞ് പോയത് നാട്ടുകാരെയും പരിഭ്രാന്തിയിലാക്കി. ഒരു വശത്ത് ഇരുന്ന കണ്ടെയ്നർ ആയതിനാൽ പുകയടക്കി കാര്യങ്ങൾ എളുപ്പമാക്കാനും അധികൃതർക്കായി.ഹൈഡ്രജൻ പെറോക്‌സൈഡ് നിറച്ച കണ്ടെയ്നറിൽ നിന്ന് ലീക്കായ കെമിക്കൽ അന്തരീക്ഷവായുവുമായി ചേർന്ന് പുകയുകയായിരുന്നു. ഇത് അപകടകരമല്ലെന്നും എല്ലാ തുറമുഖങ്ങളിലും ഇത്തരം സംഭവങ്ങൾ ഉണ്ടാകാറുണ്ടെന്നും അധികൃതർ പറയുന്നു. ഒരാഴ്ച മുൻപ് ഒരു കണ്ടെയ്നർ പൊട്ടി കെമിക്കൽ പുറത്തേക്ക് ഒഴുകിയ സംഭവം വരെ ഉണ്ടായതായി അറിയുന്നു. വിവരമറിഞ്ഞ് സാങ്കേതിക വിദഗ്ദർ എത്തി ചോർച്ച അടച്ച് അന്ന്പരിഹാരം കണ്ടു. പതിനായിരം കണ്ടെയ്നറുകൾ വരെ സൂക്ഷിക്കാൻ കഴിയുന്ന ഇന്ത്യയിലെ തന്നെ ഏറ്റവും വലിയ തുറമുഖങ്ങളിൽ ഒന്നായ വിഴിഞ്ഞം അന്താരാഷ്‌ട്ര തുറമുഖ യാർഡിൽ ആയിരക്കണക്കിന് കണ്ടെയ്നറുകൾ ഇപ്പോഴുമുണ്ട്. ഇതോടൊപ്പം ആയിരക്കണക്കിന് കണ്ടെയ്നറുകൾ നിറച്ച കൂറ്റൻ കപ്പലുകൾ ദിനംപ്രതി വന്നു പോകുന്നുമുണ്ട്. എന്നാൽ ഇവയെ തീപിടിത്തത്തിൽ നിന്ന് സംരക്ഷിക്കാൻ ചുമതലപ്പെട്ടത് വിഴിഞ്ഞം ഫയർ ഫോഴ്‌സിൽ നിന്നുള്ള കണ്ടം ചെയ്യാറായ ഒരു ഫയർ എൻജിനാണ്. രാസപദാർത്ഥങ്ങൾ നിറച്ച കണ്ടെയ്നറുകൾ കൈകാര്യം ചെയ്യുന്ന തുറമുഖത്ത് ആവശ്യമായ സുരക്ഷാ സംവിധാനത്തിന്‍റെ കുറവ് നേരത്തെയും മാധ്യമങ്ങൾ റിപ്പോർട്ട് ചെയ്തിരുന്നു. ഇതൊന്നും വക വയ്ക്കാതെയുള്ള അധികൃരുടെ പോക്ക് അപകടങ്ങൾക്ക് വഴി തെളിക്കാമെന്നും വിലയിരുത്തലുണ്ട്.

സ്വകാര്യ ഫാർമസി കോളജിൽ അമിത ഫീസ്; വിദ്യാർഥികൾ പ്രതിഷേധിച്ചു, സംഘർഷാവസ്ഥ

കാട്ടാക്കട : സ്വകാര്യ ഫാർമസി കോളജിലെ അമിത ഫീസ് . വിദ്യാർഥികൾ കോളജ് അധികൃതരെ തടഞ്ഞ് പ്രതിഷേധിച്ചു. കണ്ടലയിൽ പ്രവർത്തിക്കുന്ന കേരള അക്കാമി ഓഫ് ഫാർമസി കോളജിലെ വിദ്യാർഥികളാണ് മാനേജർ ഉൾപ്പെടെ കോളജ് അധികൃതരെ ഗേറ്റിൽ തടഞ്ഞ് പ്രതിഷേധിച്ചത്. സെമസ്റ്റർ ഫീസ് 46000 നൽകിയതിന് പുറമെ ക്ലാസ് തുടങ്ങി ഒരുമാസം കഴിഞ്ഞപ്പോൾ തന്നെ പുതുതായി അഡ്മിഷൻ എടുത്ത കുട്ടികളിൽ നിന്ന് അധിക ഫീസ് നൽകാൻ ആവശ്യപ്പെട്ടതാണ് പ്രതിഷേധത്തിന് കാരണമായത്. 1500 രൂപ വീതം സ്റ്റേഷനറി ഫീസ് ആയി ആണ് ആവശ്യപ്പെട്ടത്.അതെ സമയം ആദ്യം നൽകിയ 46000 രൂപയിൽ സ്റ്റേഷനറി ഫീസും ഉൾപ്പെട്ടിട്ടുണ്ട്. പിന്നെന്തിന് അധികമായി തുക നൽകണമെന്നാണ് വിദ്യാർഥികൾ ചോദിക്കുന്നത്. കോളജിൽ സൗകര്യങ്ങൾ അപര്യാപ്തമാണെന്നും വൃത്തിഹീനമായ സാഹചര്യമെന്നും വിദ്യാർഥികൾ പറഞ്ഞു. കെഎസ്‌യു-കോൺഗ്രസ് പിന്തുണയോടെയായിരുന്നു പ്രതിഷേധം. പ്രതിഷേധം കനത്തപ്പോൾ മാറനല്ലൂർ പോലിസും പ്രതിഷേധക്കാരും തമ്മിൽ നേരിയ തോതിൽ ഉന്തും തള്ളും ഉണ്ടായി. ഇന്നലെ രാവിലെ 11.ന് ആരംഭിച്ച സമരം വൈകുന്നേരം 4.30 വരെ നീണ്ടു. കാട്ടാക്കട ഡിവൈഎസ്പി റാഫിയുടെ നേതൃത്വത്തിൽ നടന്ന ചർച്ചയിലാണ് താത്കാലികമായി അവസാനിപ്പിച്ചത്. ബുധനാഴ്ച പിടിഎ മീറ്റിംഗ് ചേർന്ന് വിദ്യാർഥികളുടെ ആവശ്യത്തിന് പരിഹാരം കാണാമെന്ന ഉറപ്പിലാണ് സമരം താത്കാലികമായി അവസാനിപ്പിക്കാൻ വിദ്യാർഥികൾ തയാറായത്.

മരുതൂര്‍ കൊലപാതകം : സഹോദരിയെ കൊന്നത് കഴുത്തുഞെരിച്ചെന്ന് പ്രതി

പേരൂര്‍ക്കട: മണ്ണന്തല മരുതൂരിലെ ഹോംസ്റ്റേയിലുണ്ടായ കൊലപാതകവുമായി ബന്ധപ്പെട്ട് പ്രതികളെ പോലീസ് തെളിവെടുപ്പിനെത്തിച്ചു. ഇന്നലെ രാവിലെ 11 ഓടുകൂടിയാണ് മരുതൂരിലെ അത്രക്കാട്ടില്‍ എന്‍ക്ലേവില്‍ ഷംഷാദ് ഷഫീഖ്, സുഹൃത്ത് വിശാഖ് എന്നിവരെ തെളിവെടുപ്പിനായി കൊണ്ടുവന്നത്. ഹോംസ്റ്റേയുടെ ഒന്നാംനിലയിലെ മുറിയിലാണ് ഷംഷാദും സഹോദരി ഷഹീനയും താമസിച്ചിരുന്നത്. മൂന്നു സുഹൃത്തുക്കള്‍ ചേര്‍ന്നാണ് ഇവര്‍ക്ക് ഇവിടെ മുറി തരപ്പെടുത്തിക്കൊടുത്തത്. ഹോംസ്റ്റേയില്‍ താന്‍ ഉപയോഗിച്ചിരുന്ന ഹാള്‍‌, ടോയ്‌ലെറ്റ്, ബെഡ്‌റൂം, കിച്ചണ്‍ എന്നിവയെല്ലാം പ്രതി പോലീസിന് കാണിച്ചുകൊടുത്തു. കൊലപാതകത്തില്‍ ഒരാഴ്ച മുമ്പുതന്നെ വിവിധ സമയങ്ങളിലായി സഹോദരിയെ താന്‍ മര്‍ദ്ദിച്ചിരുന്നതായി പ്രതി വെളിപ്പെടുത്തി. മലപ്പുറം സ്വദേശിയായ ഒരാളുമായി മെസേജ് ചെയ്യുന്നതും വീഡിയോകോള്‍ ചെയ്യുന്നതും സംബന്ധിച്ചാണ് തര്‍ക്കം ഉടലെടുക്കുന്നത്. ഷഹീനയുടെ ശരീരത്തില്‍ക്കണ്ട അടയാളങ്ങളെല്ലാം വിവിധ ദിവസങ്ങളിലായി മര്‍ദ്ദനമേറ്റതുമൂലം ഉണ്ടായതാണ്. സംഭവദിവസം ഉച്ചയ്ക്ക് ഷഹീനയെ താന്‍ ക്രൂരമായി മര്‍ദ്ദിച്ചുവെന്നും ശ്വാസം മുട്ടിച്ചു കൊലപ്പെടുത്തുകയായിരുന്നുവെന്നും ഇയാള്‍ പോലീസിനോടു പറഞ്ഞു. മരണവെപ്രാളത്തിനിടെയാണ് ഷഹീന കട്ടിലില്‍നിന്നു താഴെ വീണത്. ചെമ്പഴന്തി അണിയൂരിലെ ഒരു വീട്ടില്‍ സഹോദരങ്ങള്‍ വാടകയ്ക്കു താമസിച്ചിരുന്നുവെന്നും അപ്പോള്‍ അമ്മയും ഒപ്പമുണ്ടായിരുന്നുവെന്നും ഷംഷാദ് പറഞ്ഞു. ഇയാള്‍ മദ്യപിച്ചെത്തി അമ്മയെ ക്രൂരമായി മര്‍ദ്ദിച്ചതോടെയാണ് അണിയൂരില്‍നിന്നു താമസം മാറ്റേണ്ടതായി വന്നത്. സമീപവാസികളും ബന്ധുക്കളുമൊന്നും വഴക്കുനടക്കുന്നത് അറിയാതിരിക്കാനാണ് മരുതൂരില്‍ വീട് വാടകയ്‌ക്കെടുത്തത്. നിരവധി ക്രിമിനല്‍ക്കേസുകളില്‍ ഉള്‍പ്പെട്ട ഷംഷാദിന് അടിപിടിക്കിടെ പല്ല് നഷ്ടമായിട്ടുണ്ടെന്നും പല്ലിന്‍റെ ചികിത്സയ്ക്കുവേണ്ടിയും കൂടിയാണ് മരുതൂരില്‍ എത്തിയതെന്നും പോലീസ് വെളിപ്പെടുത്തി. സഹോദരിയെ മർദിക്കുന്ന ദിവസങ്ങളെല്ലാം വീടിന്‍റെ മുറി പുറത്തുനിന്ന് പൂട്ടിയശേഷമാണ് ഇയാള്‍ പോയിരുന്നത്. വീണ്ടും മദ്യപിച്ചെത്തി ആക്രമിക്കുമായിരുന്നു. ഷഹീന മരിച്ചുവെന്ന് അറിയാമായിരുന്ന ഷംഷാദ് സുഹൃത്തായ വിശാഖിനെ വിളിച്ചുവരുത്തിയത് മൃതദേഹം മറവുചെയ്യാനായിരുന്നു. എന്നാല്‍ ഷഹീനയുടെ മാതാപിതാക്കള്‍ അവിടെ യാദൃശ്ചികമായി എത്തിയതോടെയാണ് പദ്ധതികള്‍ പൊളിഞ്ഞത്. പ്രതികള്‍ ഇരുവരും മദ്യലഹരിയിലായിരുന്നതിനാല്‍ പോലീസ് വീട്ടിലെത്തുന്ന നേരം സ്ഥലകാല സന്ദര്‍ഭങ്ങളെക്കുറിച്ച് ഇവര്‍ക്കു നിശ്ചമില്ലായിരുന്നു. താന്‍ സഹോദരിയെ ശ്വാസംമുട്ടിച്ച് കൊലപ്പെടുത്തിയെന്നു സമ്മതിച്ച ഷംഷാദിന്‍റെ മുഖത്ത് കുറ്റബോധം പ്രകടമായിരുന്നു. ആദ്യദിവസത്തെ തെളിവെടുപ്പിനുശേഷം പ്രതികളെ ദന്തല്‍ ആശുപത്രിയിലെത്തിച്ച് സാമ്പിള്‍ ശേഖരിച്ചു. ഷഹീനയുടെ ശരീരത്തില്‍ കടിയേറ്റ അടയാളങ്ങള്‍ എങ്ങനെയുണ്ടായി എന്ന് ഉറപ്പുവരുത്തുകയാണ് ലക്ഷ്യം. പ്രതികളെ ഇനി അണിയൂരിലെ വാടകവീട്ടിലെത്തിച്ച് തെളിവെടുക്കുമെന്നു മണ്ണന്തല സിഐ ഡി. ഗോപി പറഞ്ഞു.

ഒഴുക്കില്‍പ്പെട്ട് കാണാതായ യുവാവിന്‍റെ മൃതദേഹം കണ്ടെത്തി

പേരൂര്‍ക്കട: പേയാട് കാവടിത്തലയ്ക്കലിനു സമീപം കരമനയാറ്റില്‍ കാണാതായ യുവാവിന്‍റെ മൃതദേഹം കണ്ടെത്തി. വിളപ്പില്‍ശാല ഗവ. ആശുപത്രിക്കു സമീപം വാടകയ്ക്കു താമസിച്ചിരുന്ന സുനില്‍കുമാര്‍ (43) ആണ് മരിച്ചത്. തിരുവനന്തപുരം ഫയര്‍ഫോഴ്‌സിന്‍റെ സ്‌കൂബ ടീം ശനിയാഴ്ച രാവിലെ 10നു നടത്തിയ തെരച്ചിലിലാണ് കുലശേഖരം പാലത്തിനു സമീപത്തുനിന്ന് ഒരുകിലോമീറ്ററോളം അകലെ പാറക്കെട്ടില്‍ കുടുങ്ങിയ നിലയില്‍ മൃതദേഹം കണ്ടെത്തിയത്. വെള്ളിയാഴ്ച വൈകുന്നേരം മുതല്‍ രാത്രി ഒന്പതുവരെ സ്‌കൂബ ടീം ഊര്‍ജിതമായ തെരച്ചില്‍ നടത്തിയെങ്കിലും സുനിലിനെ കണ്ടെത്താനായിരുന്നില്ല. വെള്ളിയാഴ്ച കുലശേഖരം പാലത്തിനു സമീപം ഒരാളുടെ മൃതദേഹം ഒഴുകിപ്പോകുന്നതു കണ്ടതായി ഒരു യുവാവ് വട്ടിയൂര്‍ക്കാവ് പോലീസില്‍ അറിയിച്ചിരുന്നു. ഇതിന്‍റെ അടിസ്ഥാനത്തിലാണ് കുലശേഖരം പാലത്തിനടുത്തുനിന്ന് സ്‌കൂബ ടീം ഇന്നലെ തെരച്ചില്‍ പുനരാരംഭിച്ചത്. സുനില്‍ തന്‍റെ ബന്ധുവായ സുമനന്‍, രണ്ടു സുഹൃത്തുക്കള്‍ എന്നിവര്‍ക്കൊപ്പമാണ് കാവടിത്തലയ്ക്കല്‍ എത്തിയത്. തിരികെപ്പോകാന്‍ തുടങ്ങുന്നതിനിടെയാണ് ആറ്റില്‍ ഇറങ്ങി കുളിച്ചിട്ടുപോകാമെന്ന തീരുമാനം ഇവര്‍ കൈക്കൊള്ളുന്നത്. കടവില്‍നിന്നു വെള്ളത്തിലേക്കിറങ്ങിയപ്പോള്‍ത്തന്നെ സുനില്‍ ശക്തമായ അടിയൊഴുക്കില്‍പ്പെടുകയായിരുന്നു. സുഹൃത്തുക്കള്‍ പറഞ്ഞാണ് വിവരം പോലീസും നാട്ടുകാരും അറിയുന്നത്. മൃതദേഹം തിരുവനന്തപുരം മെഡിക്കല്‍കോളജ് ആശുപത്രിയില്‍ പോസ്റ്റുമോര്‍ട്ടം നടത്തി. സിന്ധുവാണ് ഭാര്യ. മക്കള്‍: അശ്വന്‍, ആഷ്‌ലിന്‍.

വാഹനാപകടത്തിൽ പരിക്കേറ്റ് ചികിത്സയിലിരുന്നയാൾ മരിച്ചു

നെടുമങ്ങാട്: വാഹനാപകടത്തിൽ പരിക്കേറ്റ് ചികിത്സയിലിയിരുന്നയാൾ മരിച്ചു. പാലൈകോണം സുജ ഭവനിൽ ജെ.ബാബു (മണിയൻ–72) ആണ് മരിച്ചത്. കഴിഞ്ഞ 18ന് വൈകുന്നേരം പാലൈകോണം ജംഗ്ഷനിൽ റോഡ് വക്കിൽ നിൽക്കുകയായിരുന്ന ബാബുവിനെ മിനിലോറി ഇടിക്കുകയായിരുന്നു. മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. വീട്ടിലെത്തി രണ്ടു ദിവസം കഴിഞ്ഞപ്പോൾ ശ്വാസതടസ്സം അനുഭവപ്പെട്ടതോടെ ആശുപത്രിയിൽ എത്തിച്ചെങ്കിലും മരണമടയുകയായിരുന്നു. ഭാര്യ: മണിയമ്മ. മക്കൾ: ഉഷ, സുജ.

പ്രതികളെ കസ്റ്റഡിയില്‍ വാങ്ങി; തെളിവെടുപ്പ് ഇന്ന്

പേരൂര്‍ക്കട: മരുതൂര്‍ കൊലപാതകത്തിലെ പ്രതികളെ മണ്ണന്തല പോലീസ് കസ്റ്റഡിയില്‍ വാങ്ങി. പോത്തന്‍കോട് സ്വദേശി ഷംഷാദ് ഷഫീഖ്, ചെമ്പഴന്തി സ്വദേശി വിശാഖ് എന്നിവരെ കസ്റ്റഡിയില്‍ വാങ്ങിയത്. ഇവരെ ഇന്നു വിവിധ സ്ഥലങ്ങളില്‍ തെളിവെടുപ്പിന് എത്തിക്കും. വെള്ളിയാഴ്ച പ്രതികളെ തെളിവെടുപ്പിന് കൊണ്ടുവരുമെന്നു പറഞ്ഞിരുന്നുവെങ്കിലും കസ്റ്റഡിയില്‍ വാങ്ങാന്‍ വൈകിയതാണ് തെളിവെടുപ്പ് ഇന്നത്തേക്കു മാറ്റാന്‍ കാരണം. ജൂണ്‍ 21ന് മരുതൂരിലെ ഒരു ഹോം സ്റ്റേയില്‍ ഷഹീന എന്ന യുവതി മരിച്ചതുമായി ബന്ധപ്പെട്ടാണ് ഇവരുടെ സഹോദരന്‍ ഷംഷാദും സുഹൃത്ത് വിശാഖും പോലീസിന്‍റെ പിടിയിലായത്. ഷംഷാദ് യുവതിയെ മര്‍ദ്ദിച്ചു കൊലപ്പെടുത്തുകയായിരുന്നു.

ടോറസ് ലോറി അപകടത്തിൽപ്പെട്ടു

വിതുര: തൊളിക്കോട് ജംഗ്ഷനിൽ ടോറസ് ലോറി അപകടത്തി ൽപ്പെട്ടു. അപകടത്തിൽ ഡ്രൈവർ രാഹുലിന് പരിക്കേറ്റു. അപകടത്തെ തുടർന്നു റോഡിലേക്ക് ഓയിൽ ഒഴുകിയതുമൂലം ഗതാഗതം തടസപ്പെട്ടു. ഉടൻ തന്നെ വിതുര ഫയർഫോഴ്സും പോലീസും സ്ഥലത്തെത്തി ഓയിൽ നീക്കം ചെയ്യാൻ ആരംഭിച്ചു. ജനപ്രതിനിധികളായ തോട്ടുമുക്ക് അൻസർ,പ ്രതാപൻ, ഷെമി ഷംനാദ്,സന്ധ്യ പൊതുപ്രവർത്തകരായ തൊളിക്കോട് ഷംനാദ്, നൈ സാം, ഷാനവാസ്, ഷാനി തുടങ്ങിയവർ റോഡ് ശുചീകരണ പ്രവർത്തനത്തിൽ പങ്കുചേർന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]