നെയ്യാറ്റിന്കര : സംസ്ഥാന ചലച്ചിത്ര അക്കാദമിയുടെ സഹകരണത്തോടെ മര്യാപുരം വൈഎംസിഎ, വിചാരലോകം മാസിക, ജെ.സി. ഡാനിയേല് ഫിലിം സൊസൈറ്റി എന്നിവയുടെ സംയുക്താഭിമുഖ്യത്തില് മര്യാപുരത്ത് സംഘടിപ്പിക്കുന്ന ഒന്നാമത് ജെ.സി. ഡാനിയേല് ചലച്ചിത്രോത്സവത്തിന് ഇന്ന് തിരശീലയുയരും.
ഉണര്ത്തുപാട്ട്, അടൂര് ഗോപാലകൃഷ്ണന്റെ സ്വയംവരം സിനിമയുടെ അന്പതാം വാര്ഷികത്തോടനുബന്ധിച്ച് എക്സിബിഷന്, ഉച്ചക്കട ആര്സി എല്പി സ്കൂളിലെ കുട്ടികളുടെ നാടകം, ജെസി ചലച്ചിത്ര ക്വിസ് ഫൈനല്, ഓപ്പണ് ഫോറം, ഉദ്ഘാടന സമ്മേളനം എന്നിവ ഇന്ന് നടക്കും. നാളെ മലയാള സിനിമയും മാറുന്ന സാങ്കേതിക വിദ്യയും എന്ന വിഷയത്തില് സെമിനാര്, ഓപ്പണ് ഫോറം എന്നിവയും 11 ന് നല്ല സിനിമകള് നാട്ടിന്പുറങ്ങളിലേയ്ക്ക് എന്ന വിഷയത്തില് സംവാദം, ജെ.സി അനുസ്മരണ പ്രഭാഷണം, സമാപന സമ്മേളനം, അവാര്ഡ് ദാനം എന്നിവയും സംഘടിപ്പിച്ചിട്ടുണ്ട്. സിനിമാ രംഗത്തെ സമഗ്ര സംഭാവനയ്ക്ക് അടൂര് ഗോപാലകൃഷ്ണനും കലാരംഗത്തെ സമഗ്ര സംഭാവനയ്ക്ക് സൂര്യ കൃഷ്ണമൂര്ത്തിക്കും മേളയില് ആദരം നല്കും.
മന്ത്രി എ.കെ ശശീന്ദ്രന്, ചെങ്കല് പഞ്ചായത്ത് പ്രസിഡന്റ് ആര്. ഗിരിജ, സാംസ്കാരിക പ്രവര്ത്തക ക്ഷേമനിധി ബോര്ഡ് ചെയര്മാന് മധുപാല്, ചലച്ചിത്ര അക്കാദമി വൈസ് ചെയര്മാന് പ്രേംകുമാര്, സെക്രട്ടറി സി. അജോയ്, സിനിമ സീരിയല് താരം ജോബി, ഹ്യൂമന് ബീറ്റ് ബോക്സര് ഡോ. ആര്ദ്ര സാജന്, വൈഎംസിഎ യിലെ ഫാ. ബി.വി. ജയകുമാര്, കവി ഡോ. ബിജു ബാലകൃഷ്ണന്, ജില്ലാ പഞ്ചായത്ത് പ്രസിഡന്റ് അഡ്വ. ഡി. സുരേഷ് കുമാര് എന്നിവര് വിവിധ ദിവസങ്ങളില് മേളയിലെത്തും.